“Saŋa na maŋ da e bibile na, bebiri la bebiri zaa N beɛre da maŋ ŋmɛ maŋ, a maŋ lɛ toto ma zoma yaga. Saŋa na maŋ wa kuli serɛ na, N serɛ ma meŋ da maŋ erɛ maŋ yɛlɛ naŋ ba seŋ neŋ. O neŋ N serɛ ba da erɛ maŋ yɛlɛ aŋa maŋ waa gbaŋgbaa ko ba. Saŋa kaŋa, a maŋ wa la N teɛroŋ poɔŋ ka N ko N meŋɛ.”—Madhu, a India.

 World Health Organization noba yeleeŋ ka, “A donɛɛ lombori zaa noba maŋ ŋmeɛrɛɛ pɔgeba.” Ba yelpeɛre wuleeŋ ka, a yi pɔgeba bata zaa poɔŋ, ba poɔ bonyeni eɛ neɛ baŋ maŋ ŋmɛ, kyɛbee a fere gaŋne o zemmo poɔŋ.

 Ka a yɛlɛ ama taaŋ daaŋ pɔgebo, aminekaŋaŋ dabeɛ̃ na erɛ boŋ ka zie zaa hoŋ gaa noba na toorɔ boŋ zoma, a ŋmɛ bo, kyɛbee a fere gaŋne bo. Lɛ na noba naŋ maŋ erɛ pɔgeba potu-yɛlɛ ane yɛlɛ naŋ ba seŋ neŋ na na toɔ̃ vɛŋeŋ ka ho teɛre ka noba mine ba de pɔgeba ka ba eɛ bonzaa. Kyɛ, Naaŋmen nimitɔɔreŋ pɔgeba eɛ neŋtegrɛ bee?

 Baabole sɛgre: ‘Dɔɔ neŋ pɔge ka [Naaŋmen] da maale.’—Munpiilee 1:27.

 Yɛlɛ a sɛgre naŋ boɔrɔ ka o wuli: Naaŋmen la maale dɔba neŋ pɔgeba zaa. Naaŋmen nimitɔɔreŋ dɔba ane pɔgeba zaa eɛ neŋtegrɛ naŋ seŋ neŋ gyeremɛ. Ane meŋ, Naaŋmen boɔrɔŋ ka serɛ “nɔŋ o pɔge aŋa o meŋɛ.” Naaŋmen ba boɔrɔ ka serɛ de kpaŋkpaŋkpeɛ̃o kyɛbee nɔbaare ferɛ o pɔge ka o erɛ yɛlɛ oŋ boɔrɔ. (Efesu 5:33; Kolosi 3:19) Azuŋ, a pɛlɛɛŋ ka Naaŋmen boɔrɔŋ ka pɔgeba taa gomeŋɛ.

 “Saŋa na maŋ da e bibile na, N dɔgreba mine da maŋ fere gaŋne maŋ. Saŋa na maŋ wa nyɛ yuomo 17, N tomazie neŋkpoŋ da yeleeŋ ka, ka maaŋ ba sage ka N ne o gaŋneŋ taa, lɛ yɛŋ o na kare maŋ bare a tomazieŋ. Saŋa na maŋ wa leɛ pɔge kpoŋ na, N serɛ, N dɔgreba, ane N laŋkpeɛreba ba maŋ wulo ma gyeremɛ fẽẽ zaa. Kyɛ N wa zannɛɛ Neɛ naŋ maale ma na yɛlɛ. A da soŋ maŋ maŋ wa nyɛ ka Jehoova b taaɛ gyeremɛ naŋ e zuluŋ ko pɔgeba. A yɛlɛ ŋa da soŋ maŋ maŋ nyɛ ka Jehoova nɔŋɛɛ N yɛlɛ. Jehoova nimitɔɔreŋ N eɛ neŋtegroŋ.”—Maria, Argentina.

 Baabole sɛgre: “Zɔmeŋɛ kaŋa bebeŋ a maŋ tage peɛle bo a gaŋ ho mabie.”—Yeng Yelibie 18:24.

 Yɛlɛ a sɛgre naŋ boɔrɔ ka o wuli: Ho zɔmeŋɛ kaŋa naŋ peɛle bo na toɔ̃ soŋ boŋ. Ka hooŋ teɛre ka lɛ eebo na baŋ soŋ boŋ, ho na baŋ mannɛɛ yelzaa naŋ be ho sukyiriŋ a dɔɔnɔ bo ko neɛ kaŋa ho naŋ dɛle.

 “Yuomo 20 la ŋa pare wa gaa, kyɛ N daaŋ ba yelko neɛzaa ka neɛ kaŋa da maŋ fere gaŋne maŋ. Lɛ da vɛŋɛɛŋ N da ba taa popeɛloŋ, ka eŋkyere neŋ teɛroŋ gyɛre meŋ da maŋ kpɛ ma yaga. Kyɛ, saŋa na maŋ wa manne yɛlɛ na maŋ tuoro na ko neɛ kaŋa naŋ taa wagre ka o kyɛlle woŋ N yɛlɛ na, a da waa ŋa baŋ togi tuo tegroŋ kaŋa yi N zuŋ.”—Elif, Türkiye.

 Baabole sɛgre: “Yɛ de a yɛ yelwonni zaa ko O, bonso, [Naaŋmen] taa la yɛ yɛlɛ.”—1 Piita 5:7.

 Yɛlɛ a sɛgre naŋ boɔrɔ ka o wuli: Ka hooŋ wa puore sɔre Naaŋmen, o maŋ kyɛlle woŋeŋ. (Yieme 55:22; 65:2) Naaŋmen taaɛ ho yɛlɛ, azuŋ o na baŋ soŋ bo ka ho baŋ lɛ na ho naŋ waa tegroŋ o nimitɔɔreŋ.

 “Saŋa na maŋ wa zanna Jehoova yɛlɛ na, a da soŋ maŋ maŋ nyɛ sukyirimaaroŋ a yi yelfaare na zaa naŋ da pɔge ma na eŋɛŋ. Pampana, N na baŋ tu la puore sɔroo eŋɛŋ a vɛŋ ka Naaŋmen baŋ yelzaa na dɔɔnɔ ma. O eɛ N zɔmeŋɛ naŋ sereŋ baŋ yɛlɛ na naŋ maŋ dɔɔnɔ ma.”—Ana, Belize.

 Baabole sɛgre: ‘Jehoova . . . na di la sɛrɛɛ ko bikpeebire ane noba baŋ dɔgrɔ. O na eɛ lɛ ka nensaalaa baŋ de tane maale ta lɛ dɔgrɔ noba.’—Yieme 10:​17, 18.

 Yɛlɛ a sɛgre naŋ boɔrɔ ka o wuli: A koŋ kɔɔre, Naaŋmen na iree daŋkyagre zaa bare. O na iree potu-yɛlɛ ane kpaŋkpaŋkpeɛ̃o na noba naŋ de erɛ pɔgeba na meŋ bare.

 “Saŋa na maŋ wa zanne baŋ ka a koŋ kɔɔre Jehoova na iree yelfaare na noba naŋ de erɛ pɔgeba ane pɔgsaree bare na, a da dii la N sukyiri yaga zaa. A lɛ vɛŋɛɛŋ maŋ taa teɛroŋ yeni meŋ.”—Roberta, Mexico.

 Ka hooŋ boɔrɔ ka ho zanne yɛlɛ yaga a kyaare teɛretɔ na a Baabole naŋ korɔ te, bon nanso hoŋ na baŋ dɛle a Baabole nɔ-ennee, ane sori na Jehoova Sieree Deme naŋ maŋ tu a Baabole eŋɛŋ a de sommo korɔ ba taaba, yelko neɛ naŋ ko bo a gampɛlee ŋa ka ho boɔrɔŋ ka te wa ho zie.

 Tage a gampɛlee ŋa a te printi.