YƐ KAARA VELAA!
Noba Boɔrɔŋ Ka Ba Tu Kpaŋkpaŋkpeɛ̃o Eŋɛŋ A Waneŋ Leɛroo Ba Politics Yɛlɛ Poɔŋ—Wala Ka A Baabole Yeli Kyaare A Yɛlɛ Ŋa?
Politics yɛlɛ vɛŋɛɛŋ ka noba tonɔ kpaŋkpaŋkpeɛ̃o toma a donɛɛ lombori zaa, a yɛlɛ ŋa vɛŋɛɛŋ ka dabeɛ̃ kpɛ noba.
Mexico paaloŋ poɔŋ, ba ko la politics noba naŋ e wedeɛreba naŋ ta 39. A yɛlɛ ama taa daaŋ ba e zaa. A politics yɛlɛ kpaŋkpaŋkpeɛ̃o toma mine meŋ vɛŋɛɛŋ ka dabeɛ̃ kpɛ noba. A yɛlɛ tagɛɛ ba teɛroŋ yi a yuoni 2023-2024 vooteŋ yɛlɛ poɔŋ.
A ba kɔɔre kyɛ ka noba piili tonɔ kpaŋkpaŋkpeɛ̃o toma Europe paalonne mine poɔŋ politics yɛlɛ zuŋ. May 15, 2024, neɛ kaŋa gba da boɔrɔ ka o sɔgle a ko Slovakia paaloŋ gɔmenante wedeɛrɛ kaŋa, kyɛ o soba da ba toɔ̃ e lɛ.
July 13, 2024, noba naŋ be United States paaloŋ nɔɛ zaaŋ da mãã saŋa na neɛ kaŋa naŋ da boɔrɔ ka o ko Donald Trump naŋ da e a paaloŋ wedeɛrɛ na.
Bonso ka noba tonɔ kpaŋkpaŋkpeɛ̃o toma politics yɛlɛ zuŋ? A yɛlɛ ŋa daaŋ na baareŋ bee? Wala ka a Baabole yeli kyaare a yɛlɛ ŋa?
A Baabole daŋyeleeŋ ka politics yɛlɛ na wanɛɛ wɛltaa noba kpakyagaŋ
A Baabole wulee yɛlɛ naŋ na erɛ te saŋa ŋaŋ. A Baabole yeleeŋ ka te saŋa ŋa la “a bebi-baaree.” Azuŋ, noba yaga taaɛ gyogri naŋ maŋ waneŋ yelbawoŋtaa ane zɔɔre.
“A bebi-baare saŋa, a zie na e la kpeɛŋaa yaga. Bonso, noba . . . [koŋ] baŋ bareka puoruu, a waa nendɛgɛ, . . . a ba dire suuri, . . . a e noba naŋ na taa dabeɛ̃, . . . a e nenfaare, a e noba naŋ maŋ erɛ yɛlɛ kyɛ ba teɛrɛ, a paale ne pɔloo.”—2 Timoti 3:1-4.
A Baabole lɛ yeleeŋ ka te saŋa ŋa, zie na dɔɔnɔŋ, ka noba maŋ iri zɔɔrɔ ne ba gɔmenantere meŋ. (Luka 21:9) Kyɛ, ŋaaŋ naane ka yɛlɛ na erɛ lɛɛŋ a gɛrɛ.
Politics yɛlɛ kpaŋkpaŋkpeɛ̃o toma na baareŋ
A Baabole vɛŋɛɛŋ aŋ pɛle ka Naaŋmen na iree nensaalaa gɔmenantere ŋa zaa bare, a kyɛ vɛŋ ka o sazu gɔmenante na dire naaŋ a kaara nensaaleba zaa.
“A sazu Naaŋmen na na biŋ [la] naaloŋ kaŋa naŋ . . . na [ŋmare] a naalonne ŋa zaa a baare a yɛlɛ, kyɛ ka o yoŋ are a gɛrɛ wagre naŋ ba taa baaraa.”—Daaniel 2:44.
Naaŋmen Naaloŋ na na vɛŋeŋ ka nensaaleba taa noɔreyeni, a lɛ vɛŋ ka emmaaroŋ be a tendaa lombori zaa.
Yezu Krista la Naaŋmen Naaloŋ na Naa, azuŋ emmaaroŋ na be la a tendaa lombori zaa, bonso ona la a ‘Maaroŋ Nabie.’ Ona lɛ vɛŋeŋ ka ‘maaroŋ naŋ koŋ baŋ baare bebe.’—Aizeeya 9:6, 7.
Pampana ŋa gba, noba naŋ na be a naaloŋ puliŋ na zannɛɛ lɛ na baŋ na toɔ̃ zeŋ ne ba taaba emmaaroŋ poɔŋ. Azuŋ, a Baabole yeleeŋ ka: “Ba na kuree ba zɔɔzɔɔsɔre ka a leɛ koɔbo kue A kure ba kpama ka a leɛ sɔre baŋ maŋ de ŋmaara danuuri. Paaloŋ zaa koŋ lɛ zɛge zɔɔzɔɔsoɔ o tɔ eŋɛŋ, Ba koŋ lɛ zanne zɔɔre meŋ zaa.”—Aizeeya 2:3, 4.
Ka hooŋ boɔrɔ ka ho zanne yɛlɛ yaga poɔ, kanne a yelzu ŋa, “What Will God’s Kingdom Accomplish?” (Bo Yɛlɛ Ka Naaŋmen Naaloŋ Na Maale Ko Te?) a lɛ kaa a vidio ŋa meŋ, Bo La Naaŋmen Naaloŋ?