ZANNOO 7
Boŋ La Naaŋmen Naaloŋ Na?
1. Boŋ la Naaŋmen Naaloŋ na?
Boŋ vɛŋ ka Yezu e Naa naŋ soma yaga zaa?—MARKO 1:40-42.
Naaŋmen Naaloŋ na eɛ gɔmenante naŋ be sazuŋ. A Naaloŋ ŋa na wa iree nensaaleba gɔmenantere ŋa zaa bare, a lɛ vɛŋ ka Naaŋmen boɔbo nyɛrɛ eebo sazuŋ ane a teŋɛzuŋ. A duorisoŋ naŋ kyaare Naaŋmen Naaloŋ na somaŋ yaga. A koŋ kɔɔre, Naaŋmen Naaloŋ na na kaarɛɛ nensaaleba zaa zu. A Naaloŋ ŋa la soma a gaŋ naaloŋ zaa. A Naaloŋ na vɛŋeŋ ka noɔreyeni be a teŋɛzu zaa.—Kanne Daaniel 2:44; Matio 6:9, 10; 24:14.
Naaloŋ zaa maŋ taaɛ naa. Jehoova kaa iree o Bidɔɔ Yezu Krista ka o e O Naaloŋ na Naa.—Kanne Yel-iriwulaa 11:15.
Kaa a vidio, Bo La Naaŋmen Naaloŋ?
2. Bonso ka Yezu e Naa naŋ soma yaga zaa?
Naaŋmen Bidɔɔ na eɛ Naa naŋ soma, bonso o eɛ nimimaaroŋ soba, a maŋ lɛ erɛ yɛlɛ naŋ soma wagre zaa. (Matio 11:28-30) Ane meŋ, o taaɛ a kpeɛ̃o ka o soŋ noba, bonso o na be la sazuŋ a dire naaŋ kaara a teŋɛzu. Saŋa na baŋ da seŋ Yezu oŋ iri yi kũũni poɔŋ na, o da gaa la sazu a te zeŋ Jehoova nuduloŋ a kyɛnlɛ. (Hiburu 10:12, 13) Wagre pãã da wa taɛŋ ka Naaŋmen de kpeɛ̃o koo oŋ piili dire naaŋ.—Kanne Daaniel 7:13, 14.
3. Aŋ mine neŋ Yezuŋ na di a naaloŋ?
Noba mine ba naŋ boɔlɔ ka ‘neŋ-forifori’ na gaa la sazu ka ba neŋ Yezu te di a Naaloŋ. (Daaniel 7:27) A neŋ-forifori dɛndɛŋ noba na baŋ da kaa iri la Yezu bitontonee naŋ da e yelmeŋɛ deme na. A yi ana wagre na a waana zenɛ ŋa, Jehoova iree dɔba ane pɔgeba naŋ e yelmeŋɛ deme a poɔ a neŋ-forifori ŋa poɔŋ. Aŋa lɛ na Jehoova naŋ da e ko Yezu na, ka ba naŋ wa kpi Jehoova na seŋ baŋ ka ba leɛ malekere a gaa sazu.—Kanne Gyɔɔn 14:1-3; 1 Korinti 15:42-44.
Noba bawala la na gaa sazu? Yezu da yeleeŋ ka a noba ŋa eɛ ‘pesugu naŋ e fẽẽ.’ (Luka 12:32) Ba zaa noɔre eɛ 144,000. Ba neŋ Yezu na di la naaŋ a kaara a teŋɛzu.—Kanne Yel-iriwulaa 14:1.
4. Bo yɛlɛŋ da e saŋa na Yezu naŋ piili naaŋ diibu na?
Yuoni 1914 ka Naaŋmen Naaloŋ na piili dire naaŋ. a Saŋa na Yezu naŋ wa leɛ Naa na, o da iree Setaana neŋ o maleke-faare na yi neŋ sazu a lɔɔ bare a teŋɛzuŋ. A dɛndɛŋ yɛlɛ oŋ da e la lɛ. A yɛlɛ ŋa da vɛŋɛɛŋ ka Setaana suuri iri yaga zaa, oŋ piili erɛ yɛlɛ naŋ vɛŋ ka toɔrɔ be a teŋɛzu zaa. (Yel-iriwulaa 12:7-10, 12) A yi ana saŋa na a wa ta zenɛ ŋa, nensaaleba maaleŋ diree dɔgɛɛ yaga zaa. Zɔɔre, kɔŋ, baalonne, ane teŋgbigre na zaa naŋ erɛ na eɛ “yeli” naŋ wuli ka a koŋ kɔɔre kyɛ ka Naaŋmen Naaloŋ na na wa iri a nensaaleba namine ŋa zaa bare. Naaŋmen Naaloŋ na la na leɛ kaara a teŋɛzu zaa.—Kanne Luka 21:7, 10, 11, 31.
5. Bo yɛlɛ ka Naaŋmen Naaloŋ na na e ko te?
Ba moɔlɛɛ Naaŋmen Naaloŋ duorisoŋ na a donɛɛ lombori zaa. A tuuro a toma ŋa eŋɛŋ, nembeɛoŋ naŋ yi a donɛɛ lombori zaa wa laŋɛɛ taa a taa noɔreyeni. Noba turituri naŋ sigri ba menne de la ba menne wa eŋ Yezu Naaloŋ na puliŋ. Naaŋmen Naaloŋ na na go baŋ, a kyɛ sãã neŋfaare zaa bare. Azuŋ, noba na zaa naŋ boɔrɔ ka ba be Naaŋmen Naaloŋ na puliŋ seŋ ka ba zanne baŋ lɛ baŋ na toɔ̃ sagra Yezu nɔɛ.—Kanne Yel-iriwulaa 7:9, 14, 16, 17.
Yezu yuoŋ turi naaloŋ diibu na poɔŋ, Naaŋmen Naaloŋ na na vɛŋeŋ ka poboɔbo na Naaŋmen naŋ da taa ko nensaaleba na leɛ wa bebe. A teŋɛzu zaa na leɛ la paradiisi. A baaraa zaa, Yezu na leɛ de la a Naaloŋ ko o Saa. (1 Korinti 15:24-26) Ho baŋɛɛ neɛ kaŋa hoŋ boɔrɔ ka ho manne Naaŋmen Naaloŋ na yɛlɛ ko bee?—Kanne Yieme 37:10, 11, 29.
a Ka hooŋ boɔrɔ ka ho baŋ yɛlɛ yaga a kyaare lɛ na Baabole daŋyelbo yɛlɛ naŋ wuli yuoni 1914 yɛlɛ, kanne a gane ŋa What Does the Bible Really Teach? o gampɛlɛ 215-218. (O be la Nansaalee ane Twi kɔkɔɛ poɔŋ.)
