Naaŋmen tonɔ boɔlɛɛ nemboorɔ zaa ka ba maŋ tu puore sɔroo eŋɛŋ a wa o nimitɔɔre. (Yieme 65:2) Kyɛ o ba maŋ kyɛllɛ kyɛbee a sagra puore sɔroo zaa. Aŋa mannoo poɔŋ, ka dɔɔŋ erɛ o pɔge yɛlɛ naŋ ba seŋ neŋ, Naaŋmen koŋ kyɛlle woŋ o puore sɔroo. (1 Piita 3:7) Ane meŋ, saŋa na a Izerayɛl biiri naŋ da moɔ̃ niŋe a tonɔ toŋfaare na, Naaŋmen da zagrɛɛŋ ka o kyɛlle woŋ ba puore sɔroo. Kyɛ, ka yelfa-erɛŋ e kaŋdabaŋkalɛ a leɛre o eebo, Naaŋmen na kyɛlle woŋ la o puore sɔroo na. Azuŋ, a pɛlɛɛŋ ka puore sɔroo eɛ apoɔsori naŋ e tegroŋ yaga zaa.​—Kanne Aizeeya 1:15; 55:7.

 Kaa a vidio, Naaŋmen Maŋ Kyɛnlɛ Wono La Puoru Zaa?

 Puore sɔroo poɔ la puoruu na teŋ de korɔ Naaŋmen na poɔŋ. Azuŋ, Jehoova naŋ e Neɛ naŋ maale te na yoŋ aŋ seŋ ka te maŋ puoro sɔrɔ. (Matio 4:10; 6:9) Ane meŋ te eɛ noba naŋ ba pɛgeyi, azuŋ aseŋ ka te maŋ tu Yezu yuori eŋɛŋ a puoro sɔrɔ. Ananso la ka, te yelbebe zuŋ ka Yezu kpi. (Gyɔɔn 14:6) Jehoova ba boɔrɔ ka te maŋ sɛge te puore sɔroo na biŋ, kyɛbee a maŋ nyɔge yɛlɛ mine eŋ te teɛroŋ poɔŋ a maŋ yele ana yɛlɛ na saŋa zaa teŋ wa puoro sɔroo. O boɔrɔŋ ka te maŋ yi te sukyie poɔŋ a puoro sɔroo.​—Kanne Matio 6:7; Filipae 4:6, 7.

 Neɛ naŋ maale te na na baŋ woŋee puoro na teŋ maŋ puoro te teɛroŋ poɔŋ na. (1 Saamiuel 1:12, 13) Naaŋmen eŋnɛ teŋ faŋa ka te maŋ puoro sɔroo wagre zaa. Te na baŋ puore sɔrooŋ beguo saŋa, zimaanee saŋa, bondirii saŋa, ane saŋa na teŋ wa tuoro yelkpeɛne.​—Kanne Yieme 55:22; Matio 15:36.

 Noba naŋ ba taa sagediibu Naaŋmen eŋɛŋ la ŋmaa gyeere te, ba mine meŋ maŋ yeleŋ ka noɔre na oŋ eŋ a kyaare a teŋgane na koŋ nyɛ eebo, azuŋ a ba e mɔlɔ ka te erɛ yɛlɛ naŋ na  vɛŋ ka te tage peɛle Naaŋmen. (2 Timoti 3:1, 4; 2 Piita 3:3, 13) Azuŋ, a eɛ nimizeɛ ka te maŋ te laŋ neŋ te yɔɔmine a eŋ taa faŋa.​—Kanne Hiburu 10:24, 25.

 Ka teneeŋ maŋ laŋna neŋ noba naŋ nɔŋ Naaŋmen, a na soŋ teŋ ka te toɔ̃ tage peɛloo. Lammore na Jehoova Sieree Deme naŋ maŋ erɛ na maŋ yuo la sori ko noba ka ba nyɛ faŋa emmo a yi ba taaba sagediibu eŋɛŋ.​—Kanne Urom 1:11, 12.

 Ka hooŋ maŋ mãã ho meŋɛ a teɛrɛ yɛlɛ na hoŋ zanna yire Naaŋmen Yelbiri na poɔ gɛrɛ tɔɔre, ho na tage peɛlooŋ yaga zaa. Maŋ teɛrɛ o yel-eree meŋ yɛlɛ, o kawane, ane o nɔ-ennee na yɛlɛ. Ka teneeŋ maŋ mãã te menne a teɛrɛ Naaŋmen yɛlɛ gɛrɛ tɔɔre, a maŋ lɛ puoro sɔroo meŋ, a na vɛŋeŋ ka te taa nimipa naŋ e zuluŋ a ko o nɔmmo ane o yɛŋ na.​—Kanne Joosua 1:8; Yieme 1:1-3.

 Ka hooŋ dɛle Naaŋmen, a taa sagediibu o eŋɛŋ, a na soŋ boŋ ka ho tage peɛloo. Kyɛ, sagediibu waa ŋa bonvore, aseŋ ka ho kaara o zu velaa ka o toɔ̃ baara. Ka hooŋ maŋ bɔ wagre a zeŋ teɛre bon nanso hoŋ sage yɛlɛ na hoŋ sagedi na, a na soŋ boŋ ka ho sagediibu maaleŋ e kpeɛŋaa.​—Kanne Matio 4:4; Hiburu 11:1, 6.

 Jehoova maŋ kaarɛɛ noba naŋ nɔmoo na zu velaa. O na baŋ go baŋ yi yelzaa naŋ na baŋ sãã ba sagediibu, ane ba nyɔvore naŋ ba taa baaraa teɛretɔ na. (Yieme 91:1, 2, 7-10) Jehoova maŋ kpãã teŋ ka te tage te menne yi yɛlɛ naŋ na baŋ sãã te laafeeloŋ ane popeɛloŋ eŋɛŋ. O maŋ wulo teŋ lɛ teŋ na baŋ e a taa zeŋ laafeɛ.​—Kanne Yieme 73:27, 28; Gyimisi 4:4, 8.