Te taa la vidiori anaare mine teŋ maŋ de tonɔ neŋ toma a naaŋ moɔloo poɔŋ. Bonso baŋ maale a vidiori ŋa kaŋa zaa?

• Bonso Aŋ Seŋ Ka Fo Zanne A Baabole?​—Vidio. Ba maalɛɛ a vidio ŋa ka te de soŋ noba naŋ be puoruu zaa poɔŋ ka ba wa boɔrɔ ka ba zanne a Baabole. A vidio eŋnɛɛ noba faŋa ka ba zanne a Baabole a nyɛ zemmo poɔ soorebie mine naŋ e nimizeɛ yaga zaa nɔɛ iribo. A vidio lɛ wuleeŋ ka yɛŋ be la a Baabole nɔɛ iribo na poɔŋ. O lɛ wulee sori neɛ naŋ na baŋ tu a fiili a Baabole zannoo fɔɔm intanɛt zuŋ, ka lɛ vɛŋ ka te wa o zie ka te ne o piili Baabole zannoo.

• Bonso Aŋ Seŋ Ka Fo Zanne A Baabole? (vidio kyɛlee) A vidio ŋa e la ŋmaa a gaŋ a vidio gbuli na. Te na baŋ de la a vidio ŋa toŋ neŋ toma ziiri na noba naŋ ba maŋ taa wagre ka ba neŋ noba di dama na poɔŋ.

• Sobuo Ka Te Maŋ Tu Wullo Noba A Baabole? Ba maalɛɛ a vidio ŋa ka te de soŋ noba ka ba boɔrɔ ka te ne ba zanna a Baabole zaala zaala. A vidio lɛ iree soorebie mine noba naŋ taa a kyaare te Baabole zannoo na nɔɛ, a kyɛ wuli sori neɛ naŋ na toɔ̃ tu kyɛ fiili a Baabole zannoo fɔɔm intanɛt zuŋ.

• Ho Waayaane A Wa Ho Baabole Zannoo Na. Ba maalɛɛ a vidio ŋa ka te iroo wuli te Baabole zannezanneba. Aneazaa ka a vidio be la a Nyɛ Zeŋ Laafeɛ Tegitegilɛ! gane na gampɛlɛ ayi poɔŋ, kyɛ te na baŋ iree a vidio wuli te Baabole zannezanna saŋa na teŋ wa piili ka te zanne a Nyɛ Zeŋ Laafeɛ Tegitegilɛ! gambile na. A vidio wulee a gane poɔ ziiri mine yɛlɛ, ane yɛlɛ a Baabole zannezanna naŋ seŋ ka o kaara soriŋ a zannoo saŋa.

Aneazaa ka te taa la ananso te naŋ maale a vidiori ŋa kaŋa zaa, kyɛ te na baŋ iraaŋ kyɛbee a de a toɔle ko noba saŋa na aŋ seŋ ka te e lɛ. Te eŋnɛɛ a naaŋ moɔleba zaa faŋa ka ba baŋ a vidiori ŋa poɔ yɛlɛ soŋ zaa, a kyɛ lɛ de a tonɔ neŋ toma a naaŋ moɔloo poɔŋ meŋ.