Jehoova ko teŋ te yɔɔdɔba ane te yɔɔpɔgeba naŋ be a “tendaa lomboe zaa” ka ba sonnɔ te. (1Pi 5:9) Ba na toɔ̃ soŋ teŋ ka te baŋ are yelkpeɛne zaa noɔreŋ a naaŋ moɔloo poɔŋ, ka tɔnɔ baŋ yi be wa. Aŋa mannoo poɔŋ, bitontona Pɔɔl da nyɛ la tɔnɔ a yi sommo na Akuyɛla ane Peresela, Selase, Timoti, ane o yɔɔmine naŋ da ko o na.​—Tm 18:1-5.

Sobuo ka ho yɔɔmine na toɔ̃ soŋ bo a naaŋ moɔloo poɔŋ? Ba na toɔ̃ wuli boŋ lɛ aŋ seŋ ka ho e ka neɛ kaŋaŋ wa yelka o ba boɔrɔ ka o kyɛlle woŋ ho yɛlɛ na, ane lɛ hoŋ na toɔ̃ e leɛ gaa nyɛ, a toɔ̃ piili Baabole zannoo ane sori naŋ seŋ ka ho maŋ tu ka ho neŋ neɛ zanne a Baabole. Ka hooŋ wa baŋ neɛ kaŋa naŋ be a lantaapuoruu poɔŋ naŋ na toɔ̃ soŋ bo, yelko a soba ka o soŋ bo. Nɔkpeɛne zaa kyebe ka yɛ zaa na nyɛɛ tɔnɔ yaga zaa, a lɛ eebo meŋ na vɛmeŋ ka yɛ taa popeɛloŋ yaga.—Fi 1:25.

KAA A VIDIO ŊA, NYƐ POPEƐLOŊ NAŊ BE A YEZU POTUURIBO LEƐROO TOMA POƆŊ​—SAGE JEHOOVA SOMMO​—TE YƆƆMINE, KYƐ PÃÃ IRI A SOOREBIE ŊA NƆƐ:

• Sobuo ka Neeta da tu a eŋ Jade faŋa ka o wa a lammo zie?

• Bonso aŋ seŋ ka te maŋ vɛŋ ka te yɔɔ kaŋa beɛle te ka teneeŋ wa gɛrɛ te Baabole zannezanna kaŋa zie?

• Bo yɛlɛ ka Jade ane Abigay zaa da nɔŋ?

• Bo yelpaala la ka ho yɔɔmine na baŋ wuli bo a naaŋ moɔloo poɔŋ?