1. Ka teneeŋ boɔrɔ ka te nyɛ faabo Jehoova bebiri na, wala aŋ seŋ ka te e?

 A BAABOLE poɔŋ, “Jehoova bebiri” na eɛ saŋa na oŋ maŋ sãã o dɔndɔnne zaa, a kyɛ faa o puorebiiri. Takoreŋ saŋa na, Jehoova da maŋ tagɛɛ paalonne mine tobo. (Aiz. 13:1, 6; Izik. 13:5; Zef. 1:8) Te saŋa ŋaŋ, “Jehoova bebiri” na na piiliŋ saŋa na a teŋɛzu namine naŋ na sãã Baabilɔŋ Kpoŋ na. A bebiri na baarɛɛ Hammagedon zɔɔre na saŋa. Ka teneeŋ boɔrɔ ka te nyɛ faabo ana “bebiri” na, aseŋ ka te nare te menne pampana. Yezu yeleeŋ ka te kaara a “dɔgroŋ kpoŋ” soriŋ, kyɛ o lɛ yeleeŋ ka te ‘nare te menne’ meŋ.​—Mat. 24:21; Luk. 12:40.

2. Bo tɔnɔ teŋ na baŋ nyɛ yi a 1 Tɛsalonika gane poɔŋ?

² A yi o dɛndɛŋ lɛta na oŋ sɛge te ko a Tɛsalonika noba na, bitontona Pɔɔl da de la yelmannee mine wuli yɛlɛ mine muni aŋ pɛle. O da boɔrɔŋ ka o soŋ Kristabiiri ka ba nare ba menne ko Jehoova sɛrɛɛdiibu bebi-kpoŋ na. Pɔɔl da baŋɛɛŋ ka Jehoova bebiri na koŋ wa ana saŋa naŋ. (2 Tɛs. 2:1-3) Kyɛ, o da yelko la o yɔɔmine na ka ba nare ba menne aŋa bieu la Jehoova bebiri na. Te meŋ na baŋ de la o kawane na toŋ neŋ toma. Yɛ vɛŋ ka te nyɛ lɛ oŋ wuli a yɛlɛ ata ŋa muni soŋ: (1) lɛ na Jehoova bebiri naŋ na tu kyɛ wa, (2) aŋ mineŋ koŋ nyɛ faabo ana bebiri naŋ, ane (3) lɛ teŋ na baŋ e nare te menne a nyɛ faabo Jehoova bebiri na.

3. Sobuo ka Jehoova bebiri na na wa aŋa nannyige naŋ maŋ wa tensogɔ saŋa? (Kaa a foto meŋ.)

³ “Aŋa nannyige naŋ maŋ wa tensogɔ saŋa.” (1 Tɛs. 5:2) A yi a dɛndɛŋ yelmannaa ŋa poɔŋ, bitontona Pɔɔl wulee sori na Jehoova bebiri naŋ na tu kyɛ wa. Zisoɔree saŋa, ka nobaŋ wa gbire a gaa tɔɔre aba kaara soriŋ na, ana saŋa ka nannyigre maŋ wa wieoŋ a wa zu ba boma. Jehoova bebiri na na waŋ tɔntɔbaalɛ,  saŋa na noba naŋ ba kaara soriŋ. Aminekaŋaŋ, yelmeŋɛ Kristabiiri nɔɛ na mãã la neŋ lɛ na yɛlɛ naŋ na erɛ wieoŋ wieoŋ na. Kyɛ teneeŋ yɛŋ na nyɛɛ faabo.

4. Sobuo ka Jehoova bebiri na na wa aŋa pɔge bidɔge poɔ naŋ maŋ uri beɛrɛ lɛ?

⁴ “Aŋa pɔge bidɔge poɔ naŋ maŋ uri beɛrɛ lɛ.” (1 Tɛs. 5:3) Ka pɔgeŋ wa taa poɔ, o ba maŋ baŋ wagre meŋɛ o bidɔge poɔ naŋ na piili beɛroo. Kyɛ, o maŋ baŋeŋ ka lɛ zaa naŋ la a bebiri na taŋ. Ka a bebiriŋ wa ta, tɔntɔbaalɛ a bidɔge poɔ maŋ beɛrɛ la, a beɛrɛ yaga zaa. Lɛ neŋ o zu la, te ba baŋ bebiri na ane wagre na Jehoova bebiri naŋ na piili. Kyɛ te baŋɛɛŋ ka a bebiri na waŋ. A bebiri na wa uree neŋfaare, ba kaŋa zaa koŋ nyɛ nyɔvore.

5. Sobuo ka a dɔgroŋ kpoŋ waa ŋa zinyaane?

⁵ Aŋa zinyaane. A yi a taaloŋ yelmannaa ŋa poɔ, Pɔɔl da lɛ yelee nannyigre naŋ wa ka ba zu boma zisoɔree saŋa yɛlɛ. Kyɛ, ŋa saŋa yɛŋ, Pɔɔl de la Jehoova bebiri na manne neŋ zinyaane. (1 Tɛs. 5:4) Ka nannyigreŋ kɔɔ kpɛ die kaŋa zisoɔree saŋa a zuuro boma, ka ba naŋ ba kaa soŋ, ba koŋ baŋ saŋa na wagre naŋ gaa. Ka zieŋ wa nyaa pɔge ba, ba olo na yiŋ. A dɔgroŋ kpoŋ saŋa, noba na zaa naŋ waa ŋa nannyigre a moɔ̃ niŋe sɔgle erɛ yelfaare naŋ ba pɛlɛ Naaŋmen poɔ na olo na yiŋ. A ba seŋ ka te tɔglɔ ba, kyɛ aseŋ ka te erɛ yɛlɛ naŋ pɛlɛ Jehoova poɔ. Aseŋ ka te lɛ moɔ̃ niŋe boɔrɔ “yelzaa naŋ tori ane yelzaa naŋ e yelmeŋɛ.” (Efe. 5:8-12) Pɔɔl da lɛ de la yelmannee ayi mine naŋ yitaa a de wuli noba naŋ koŋ nyɛ faabo.

6. Sobuo ka noba yaga gbire zenɛ ŋa? (1 Tɛsalonika 5:6, 7)

⁶ “Bana naŋ gbire.” (Kanne 1 Tɛsalonika 5:6, 7.) Pɔɔl da de la noba naŋ koŋ nyɛ nyɔvore Jehoova bebiri na, a de manne neŋ noba naŋ  gbire. Noba naŋ gbire ba maŋ baŋ yɛlɛ naŋ erɛ, kyɛbee lɛ na wagre naŋ gɛrɛ. Azuŋ, ba ba maŋ baŋ yelnimizeere naŋ erɛ, kyɛbee a toɔ̃ e yelkaŋa a kyaaraa. Zenɛ ŋa, noba yaga gbireŋ siiloŋ poɔŋ. (Uro. 11:8) Ba ba sagedi ka te be la a “bebi-baare saŋa.” Ba ba lɛ sagedi ka a koŋ kɔɔre a dɔgroŋ kpoŋ na waŋ. Ka yelnimizeere mineŋ wa e a donɛɛ poɔŋ, a maŋ vɛmeŋ ka ba mine piili boɔrɔ ka ba kyɛlle woŋ te Naaloŋ duorisoŋ na. Kyɛ, aŋ da seŋ ka ba gu ba menne velaa na, ba maŋ leɛ te gbireŋ siiloŋ poɔŋ. Haali noba naŋ sagedi ka Jehoova sɛrɛɛdiibu bebiri na na waŋ teɛrɛɛŋ ka a bebiri na kɔɔreŋ kyɛ wa. (2 Pit. 3:3, 4) Kyɛ, a eɛ nimizeɛ yaga zaa ka te de a Baabole kawane tonɔ neŋ toma, a gu te menne velaa a kyɛ kaara soŋ.

7. Sobuo ka noba na Naaŋmen naŋ na sãã na waa ŋa dããnyukuoliba?

⁷ “Banaŋ naŋ maŋ nyu dãã kuoli.” Bitontona Pɔɔl da de la noba na Naaŋmen naŋ na sãã na manne neŋ dããnyukuoliba. Dããnyukuoliba maŋ eɛ maaroŋ ka ba de gbɛɛ a kyaare yɛlɛ naŋ erɛ peɛle ba, ba ba maŋ derɛ gbɛ-sonne meŋ. Lɛ neŋ o zu la, neŋfaare ba maŋ kyɛllɛ Naaŋmen kpããmo na. Ba maŋ erɛɛ yɛlɛ naŋ na de ba gaaneŋ saammo poɔ. Kyɛ, ba ko la Kristabiiri kawane ka ba baŋ ba menne taabo velaa, a kyɛ maŋ teɛrɛ yɛlɛ soŋ. (1 Tɛs. 5:6) Baabole Gaŋbanna kaŋa yeleeŋ ka, ka neɛŋ baŋ o meŋɛ taabo “o ba maŋ kyɛre o meŋɛ, kyɛ o maŋ mãã la o meŋɛ. Lɛ maŋ vɛmeŋ oŋ teɛrɛ yɛlɛ soŋ zaa, azuŋ o maŋ toɔ̃ de la gbɛ-sonne.” Bonso aŋ seŋ ka te maŋ mãã te menne kyɛ are kpeɛŋaa? Ananso la ka, ka teneeŋ ba are kpeɛŋaa, te na wa banna ka te de la te menne eŋ politics yɛlɛ ane a donɛɛ ŋa yɛlɛ poɔŋ. Saŋa na Jehoova bebiri naŋ tagra peɛlɛ na, noba na ferɛ teŋ yaga ka te de te menne eŋ a yɛlɛ ŋa poɔŋ. Kyɛ, a ba seŋ ka te kyerɛ te menne a kyaare lɛ teŋ na iri yɛlɛ nɔɛ ko ba. Naaŋmen vooroŋ soŋ na na toɔ̃ soŋ teŋ ka te mãã te menne, a are kpeɛŋaa, a toɔ̃ de gbɛɛ meŋ naŋ soma.​—Luk. 12:11, 12.

8. Sobuo ka yɛlɛ naŋ be 1 Tɛsalonika 5:8 wuli te gyogri aŋ na baŋ soŋ te ka te baŋ te menne taabo a kyɛ kaara soŋ meŋ? (Kaa a foto meŋ.)

⁸ De a kuri kparoo ba naŋ maŋ su pɔge nyaa na su, a kyɛ de a kpogli meŋ vɔgle. Pɔɔl de teŋ manne neŋ sogyare naŋ su boma, a kyɛ nare ba menne ko zɔɔre. (Kanne 1 Tɛsalonika 5:8.) Ka zɔɔreŋ wa iri, noba maŋ kaarɛɛ soriŋ ka sogyare nare ba menne a gaa a zɔɔre. Lɛ ka yɛlɛ waa ko te meŋ. Te na baŋ narɛɛ te menne a ko Jehoova bebiri na, ka teneeŋ de a sagediibu kuri nyaa pigraa su ane nɔmmo, a kyɛ lɛ de te faabo tamaa na vɔgle aŋa kpogli. A gyogri ŋa na toɔ̃ soŋ teŋ yaga.

9. Sobuo ka sagediibu maŋ go te?

⁹ Kuri nyaa pigraa maŋ go la sogya sukyiri. Sori kaŋa poɔŋ, te na baŋ yeliŋ ka sagediibu ane nɔmmo maŋ go la te sukyie. A gyogri ŋa na toɔ̃ soŋ teŋ ka te naŋ kyɛnɛ puoro Naaŋmen, a kyɛ tuuro Yezu meŋ. Sagediibu maŋ vɛmeŋ teŋ baŋ ka, ka teneeŋ yi te sukyie zaa poɔŋ a boɔrɔ Naaŋmen, te na nyɛɛ saŋyɔɔ. (Hib. 11:6) Sagediibu maŋ vɛmeŋ teŋ naŋ dire yelmennoŋ korɔ te Wedeɛrɛ Yezu, haali ka lɛŋ wuli ka te na tuoree yelkpeɛne gba. Ka teneeŋ wa zanne nyɛ lɛ na Jehoova puorebiiri naŋ bebe zenɛ ŋa naŋ are kpeɛŋaa saŋa na ba libi-yɛlɛ naŋ ba taa nimiri, ane lɛ ba mine naŋ are kpeɛŋaa saŋa na baŋ wa tuoro dɔgroŋ na, a maŋ eŋɛɛ te sagediibu faŋa. Ka teneeŋ wa tɔglɔ noba na naŋ vɛŋ ka ba zemmo e mɔlɔ ka lɛ vɛŋ baŋ de a Naaloŋ toma yɛlɛ de weɛ ba zemmo poɔŋ na, a maŋ soŋ teŋ teŋ tage te menne yi bombɔ-gaŋne poɔŋ. b

10. Sobuo ka nɔmmo te naŋ taa ko Naaŋmen ane te taaba maŋ soŋ te teŋ toɔ̃ dire kannyiri?

 ¹⁰ Ka teneeŋ boɔrɔ ka te baŋ te menne taabo, a kyɛ kaara soŋ, aseŋ ka te taa nɔmmo. (Mat. 22:37-39) Nɔmmo te naŋ taa ko Naaŋmen maŋ soŋ teŋ, teŋ de kannyiri moɔlɔ a duorisoŋ, haali saŋa na teŋ tuoro yelkpeɛne. (2 Tim. 1:7, 8) Te nɔnɛɛ noba naŋ ba puoro Jehoova meŋ, azuŋ teŋ maŋ leɛ gaa ba zie a te moɔle a duorisoŋ ko ba. Te maŋ lɛ tu la fone ane lɛtɛ sɛgebo eŋɛŋ kyɛ moɔlɔ a duorisoŋ ko ba. Te maŋ taaɛ tamaa ka noba na teŋ moɔlɔ a duoro korɔ na na leɛrɛɛ ba eebo, a kyɛ leɛ erɛ yɛlɛ naŋ soma.​—Izik. 18:27, 28.

11. Sobuo ka nɔmmo te naŋ taa ko te Kristabitaaba maŋ toɔ̃ soŋ te? (1 Tɛsalonika 5:11)

¹¹ Te nɔŋɛɛ te Kristabitaaba meŋ. Te maŋ wulee a nɔmmo ŋa saŋa na teŋ maŋ “yele yɛlɛ teɛrɛ taa kyɛ soŋnɔ taa” na. (Kanne 1 Tɛsalonika 5:11.) Aŋa lɛ na sogyare naŋ be zɔɔre poɔŋ naŋ maŋ erɛ na, aseŋ ka te maŋ eŋnɛ taa faŋa. Yelmeŋɛ la, ka a zɔɔreŋ wa e tuloŋ yaga zaa, a sogya kaŋa na baŋ perɛɛ o tɔsoba babammo poɔŋ. Lɛ neŋ o zu la, a ba seŋ ka te baŋ perɛ kyɛ maŋ erɛ yɛlɛ naŋ na sãã te yɔɔmine poɔ, kyɛbee a maŋ de faaloŋ yaa faaloŋ sane. (1 Tɛs. 5:13, 15) Ka teneeŋ wulo te yɔɔdɔba naŋ kaara a lantaapuoruu zu na gyeremɛ, lɛ wuleeŋ ka te wulo baŋ nɔmmo. (1 Tɛs. 5:12) A Tɛsalonika lantaapuoruu na da naŋ ba nyɛ yuoni gbuli, saŋa na Pɔɔl naŋ da sɛge a lɛtɛ ŋa te ko ba. A dɔbɔ naŋ da kaara a lantaapuoruu zu na da ba baŋ yɛlɛ yaga nimiri, aminekaŋaŋ ba da ŋmeɛrɛ gbɛɛ meŋ. Kyɛ, aseŋ ka ba da naŋ wulo ba gyeremɛ. Saŋa na a dɔgroŋ kpoŋ naŋ tagra tara na, a na wa fɛreŋ ka te dɛle a lantaapuoruu nembɛrɛ ka ba korɔ te sowuli a gaŋ pampana ŋa gba. Aminekaŋaŋ, a na baŋ wa eɛ kpeɛŋaa ka te nyɛrɛ sowuli yire te donɛɛ zaa tomazikpɛŋ naŋ kyɛbee bɛɛtil; azuŋ, a eɛ nimizeɛ ka te nɔnɔ a kyɛ wulo a lantaapuoruu nembɛrɛ gyeremɛ pampana. Lɛ zaa naŋ la, yɛ vɛŋ ka te kaara te menne velaa. A ba seŋ ka te de te teɛroŋ eŋ ba gbɛ ŋmɛ eŋɛŋ, kyɛ aseŋ ka te de te teɛroŋ eŋ lɛ na Jehoova naŋ tuuro Krista eŋɛŋ a kyɛ derɛ sowuli korɔ a dɔbɔ ŋa na.

12. Sobuo ka te tamaa na maŋ go te teɛroŋ?

 ¹² Aŋa lɛ na kpogli naŋ maŋ go sogya zu na, te faabo tamaa na meŋ maŋ go la te teɛroŋ. Ka te tamaa naŋ e kpeɛŋaa, te na wa nyɛŋ ka boma na zaa naŋ be a donɛɛ ŋa poɔŋ ba taa tɔnɔ zaa. (Fil. 3:8) Te tamaa na maŋ korɔ teŋ sukyirimaaroŋ, a kyɛ vɛŋ teŋ are kpeɛŋaa meŋ. Lɛ ka Wallace ane Laurinda naŋ be Africa da wa nyɛ. Daaraata kpakyagaŋ, ba kaŋa zaa da kɔŋ la ba dɔgrɔ kaŋa kũũ poɔŋ. A COVID-19 baaloŋ zuŋ, ba da ba toɔ̃ leɛ gaa ba yiri a te poɔ ba booree deme poɔŋ ana saŋa na. Wallace sɛgɛɛŋ ka: “A kũũ leɛ-iruu tamaa na maŋ vɛmeŋ maŋ teɛrɛ ba yɛlɛ. N ba maŋ teɛrɛ lɛ na baŋ da waa saŋa na aŋ da kyɛre fẽẽ ka ba kpi na, kyɛ N maŋ leɛteɛrɛɛ lɛ na baŋ na waa bebiri na maŋ na leɛ nyɛ ba a dompaalaa poɔŋ na. Ka nembaoŋ wa kpɛ ma yaga zaa, a tamaa ŋa maŋ ko maŋ sukyirimaaroŋ.”

13. Wala teŋ na toɔ̃ e ka Naaŋmen de o vooroŋ soŋ na ko te?

¹³ “Yɛ ta kpinni a vooroŋ soŋ vũũ bare.” (1 Tɛs. 5:19) Pɔɔl de la a vooroŋ soŋ manne neŋ vũũ naŋ dire te poɔŋ. Ka Naaŋmen vooroŋ soŋ naŋ be te eŋɛŋ, te eŋɛ maŋ nyagraŋ ka te erɛ yɛlɛ naŋ soma, te maŋ taaɛ faŋa ka te tonɔ tonkpeɛne korɔ Jehoova. (Uro. 12:11) Wala teŋ na toɔ̃ e ka Naaŋmen de o vooroŋ soŋ na ko te? Te na baŋ puore sɔrɛɛ Naaŋmen ka o ko te a vooroŋ soŋ. Aseŋ ka te zanna Naaŋmen Yelbiri na, a kyɛ kpimare Jehoova lantaapuoruu na oŋ de o vooroŋ soŋ wulo sori na. Lɛ eebo na soŋ teŋ ka te taa “a vooroŋ soŋ wɔnee” na.​—Gal. 5:22, 23.

14. Ka teneeŋ boɔrɔ ka Naaŋmen naŋ kyɛnɛ korɔ te o vooroŋ soŋ na, bo yɛlɛ aŋ seŋ ka te tage te menne yi a eŋɛŋ? (Kaa a foto meŋ.)

¹⁴ Ka Naaŋmeneŋ wa ko te o vooroŋ soŋ na, aseŋ ka te kaara soŋ a ta wa “kpinni a vooroŋ soŋ vũũ bare.” Naaŋmen maŋ de la o vooroŋ soŋ na ko noba naŋ taa teɛroŋ ane gyogri naŋ e forifori. Ka teneeŋ ba taa teɛroŋ naŋ soma, kyɛbee a erɛ yɛlɛ naŋ ba soma, Naaŋmen koŋ ko te o vooroŋ soŋ na. (1 Tɛs. 4:7, 8) Ka teneeŋ boɔrɔ ka Naaŋmen naŋ kyɛnɛ korɔ te o vooroŋ soŋ na, a ba seŋ ka te “derɛ daŋyelbo  fɔ̃ɔ̃.” (1 Tɛs. 5:20) A sɛgre ŋa poɔŋ, “daŋyelbo” eɛ duoro na Naaŋmen naŋ maŋ tu o vooroŋ soŋ na eŋɛŋ kyɛ de ko te. A duoro ŋa mine kyaarɛɛ Jehoova bebiri na, ane lɛ na a donɛɛ baaroo naŋ peɛle aseŋ. A ba seŋ ka te teɛrɛ ka Jehoova bebiri na, kyɛbee Hammagedon koŋ wa te zemmo poɔŋ. Kyɛ, aseŋ ka te maŋ teɛrɛ a bebiri yɛlɛ, a baŋ ka o na baŋ waŋ wieoŋ lɛ. Aseŋ ka te tonɔ tonkpeɛne, a mɔɔrɔ ka te taa gyog-soŋ naŋ seŋ neŋ “Naaŋmen boɔbo tuubu poɔŋ.”​—2 Pit. 3:11, 12.

15. Wala teŋ na baŋ e ka lɛ vɛŋ ka noba ta toɔ̃ de zirii duoro, kyɛbee ka a malekefaare duoro na bɛnle te? (1 Tɛsalonika 5:21)

¹⁵ A koŋ kɔɔre, Naaŋmen dɔndɔnne na na tu la sori kaŋa poɔŋ kyɛ moɔle ka: “Emmaaroŋ ane zeŋ-laafeɛ bebe la.” (1 Tɛs. 5:3) A malekefaare la na bɛnle ba ka ba moɔle a duoro ŋa ko a donɛɛ noba zaa, ba na bɛnlɛɛ noba yaga meŋ. (Yel. 16:13, 14) Ka te meŋ? Ka teneeŋ “maŋ peɛre yɛlɛ zaa” soŋ zaa, ba koŋ toɔ̃ bɛnle te. (Kanne 1 Tɛsalonika 5:21.) A Giriki yelbiri na baŋ de toŋ neŋ toma a zie ŋaŋ na wulee lɛ na noba naŋ da maŋ peɛre kuree aŋa salema ane ware a nyɛ ka a sereŋ eɛ kuree menne bee. Azuŋ, aseŋ ka te meŋ maŋ peɛre yɛlɛ na teŋ kyɛllɛ, ane yɛlɛ na teŋ kanna na a nyɛ ka a sereŋ eɛ yelmeŋɛ bee. A yɛlɛ ŋa da eɛ yelnimizeɛ ko a Tɛsalonika noba, saŋa na a dɔgroŋ kpoŋ naŋ tagra tara na, aseŋ ka te meŋ de a yɛlɛ ŋa nimizeɛ yaga zaa. A ba seŋ ka te maŋ sage yelzaa noba naŋ yele a di, kyɛ aseŋ ka te maŋ teɛre yɛlɛ gaa tɔɔre a de yɛlɛ na teŋ woŋ na bee yɛlɛ na teŋ kanne na manne neŋ yɛlɛ naŋ be a Baabole poɔŋ, ane yɛlɛ na Jehoova lantaapuoruu naŋ wulo te na. Ka teneeŋ erɛ lɛ, a malekefaare koŋ toɔ̃ bɛnle te.​—Yeng. 14:15; 1 Tim. 4:1.

16. Bo tamaa naŋ bebe meŋɛmeŋɛ la teŋ taa? Ka wala aŋ seŋ ka te e?

¹⁶ Te baŋɛɛŋ ka Jehoova puorebiiri na nyɛɛ faabo a dɔgroŋ kpoŋ saŋa. Kyɛ, te kaŋa zaa ba baŋ yɛlɛ naŋ na e bieu. (Gyi. 4:14) Ka teneeŋ toɔ̃ yi a dɔgroŋ kpoŋ poɔ, kyɛbee ka teneeŋ kpi sɛre ka a saŋa ta, kyɛ te baŋɛɛŋ ka ka teneeŋ dire yelmennoŋ, te na nyɛɛ nyɔvore naŋ ba taa baaraa. Kristabiiri na baŋ sɔ naaloŋ kãã na te poɔ la Krista eŋɛŋ sazuŋ. A pikyɛlɛɛ na meŋ na zeŋ la paradiisi teŋɛ na zuŋ. Azuŋ, yɛ vɛŋ ka te zaa de te teɛroŋ eŋ te tamaa na eŋɛŋ, a kyɛ nare te menne meŋ ko Jehoova bebiri na!