N saa da eɛ a United Church of Canada misa neŋkpoŋ kaŋa, azuŋ daa zaa o maŋ deɛ maa ane N yɔɔpɔge gaa ne Sunday school, ka anaŋ wa ŋmɛ 11:00 a.m. teŋ tuu gaa a misa. Ŋmenaa saŋa teŋ la tu N Ma meŋ gaa Jehoova Sieree Deme lammo. A da eɛ mɔlɔ ka te nyɛ tɛɛtɛɛ naŋ be a puoruu ayi ŋa kpakyagaŋ.

N ma da mannɛɛ yelpaala na o naŋ zanna na korɔ o zɔmenne mine o neŋ ba naŋ baŋ taa kɔɔre, bana la Bob ane Marion Hutcheson, ba meŋ da piili zanna a Baabole. Yuoni 1958, te yɔɔdɔɔ Hutchesons ane o pɔge da de maŋ ane ba bidɔɔbilii bata teŋ gaa a Divine Will Donɛɛ Zaa Lammokpɛŋ na ba naŋ da e New York teŋkpɛŋ poɔŋ beri anii na. Pampana ŋa maŋ baŋ ka a da ba e mɔlɔ ka ba de ma gaa a lammo ŋa, kyɛ a lammo ŋa eɛ N zemmo yɛlɛ mine maŋ daŋ koŋ inne zaa.

N baapaaloŋ saŋa te da guolee dunni, N da nɔŋɛɛ dunni guoluu soŋ. N da teɛrɛŋ ka N gaa sakuu a wa leɛ dɔkta naŋ maŋ kaara dunni laafeeloŋ yɛlɛ. N ma da yelee a yɛlɛ ko a lantaapuoruu neŋkpoŋ kaŋa. O da teɛre maŋ ka, te be la a “bebi-baare saŋa,” a da soore ma ka, ka maaŋ gaa university wala ka N neŋ Jehoova niiloŋ na waa? (2 Tim. 3:1) Lɛ zuŋ N da de la gbɛre ka N koŋ lɛ gaa university.

 Saŋa na maŋ da wa baare SHS na N da ba baŋ bon na maŋ na e N zemmo poɔŋ. Daagbuli baaraa zaa, N da maŋ gaa la naaŋ moɔloo, kyɛ N da ba maŋ nyɛrɛ popeɛloŋ a naaŋ moɔloo poɔŋ, azuŋ N da ba nyɛ ka N na baŋ eɛ paaneɛ. Kyɛ N saa ane N saaŋbile naŋ da ba puoro Jehoova da eŋnɛ maŋ faŋa ka N gaa tonɔ toma korɔ insurance company kpoŋ kaŋa naŋ be Toronto teŋkpɛŋ naŋ. N saaŋbile na da taa la arezikpoŋ a toma zieŋ, azuŋ N da sagɛɛ a toma.

Saŋa na maŋ da be Toronto na, N da maŋ de la N wagre kpoŋ zie zaa tonɔ toma kyɛ ka N neŋ noba naŋ ba puoro Jehoova lanna, azuŋ N da ba nyɛrɛ wagre na gaa lammozie ane a naaŋ moɔloo. N neŋ N sããkoma la da laŋ kpeɛrɛ, kyɛ saŋa na oŋ wa kpi na, a da seŋ ka N la te bɔ ziyuo a kpeɛrɛ.

Te yɔɔdɔɔ Hutcheson ane o pɔge naŋ da de ma gaa ne a 1958 lammokpɛŋ na da waa ŋa N dɔgreba. Ba da sagɛɛŋ maŋ wa kpeɛrɛ ba dieŋ a da soŋ ma ka N neŋ Jehoova niiloŋ e kpeɛŋaa. Yuoni 1960 poɔŋ N neŋ ba bidɔɔ John da laŋ de la suobu. John da piilee a paaneɛ toma, azuŋ a da eŋ maŋ faŋa ka N meŋ moɔ̃ nimiri a naaŋ moɔloo toma poɔŋ. Te yɔɔmine na da nyɛɛŋ ka N nyɛrɛɛ nimitɔɔre gaabo, azuŋ ba da iri maŋ ka N e neɛ naŋ na kaara a Zemmo ane Naaŋ Moɔloo Toma lammo zu.

Yuoni 1966 poɔŋ N da de la Randi Berge oŋ e N pɔge. O da eɛ paaneɛ naŋ taa eŋnyagroŋ a naaŋ moɔloo toma poɔŋ a da boɔrɔ ka o te soŋ zie ba naŋ boɔrɔ naaŋ moɔleba yaga. Te gbandige zukaara da soŋ teŋ yaga zaa a da eŋ te faŋa ka te gaa soŋ lantaapuoruu naŋ be Orillia naŋ be Ontario. Azuŋ te da gaayɛŋ.

Teŋ da te ta Orillia a ba kɔɔre kyɛ maŋ meŋ da piili a paaneɛ toma. N meŋ da wa taa la eŋnyagroŋ na Randi naŋ da taa na! Maŋ da mɔɔrɔ N mɔɔbo zaa ka N tonɔ a paaneɛ toma soŋ na zuŋ, N da piili nyɛrɛɛ popeɛloŋ ka maaŋ wa de a Baabole wulo noba a nyɛ ka ba wonee a muni soŋ. N poɔ da pɛlɛɛŋ yaga zaa teŋ da toɔ̃ soŋ kultaa deme mine naŋ be Orillia, baŋ leɛre ba zemmo yɛlɛ a wa puoro Jehoova na.

Te da gaa la Toronto, a te pɔge Arnold MacNamara naŋ da e te yɔɔdɔɔ na kaŋa naŋ derɛ weɛ Bɛɛtiliŋ na. O da soore teŋ ka te na boɔrɔ ka te e special paaneere bee. Maŋ da yelka: “Te na boɔrɔŋ! Kyɛ te koŋ boɔrɔ ka te gaa Quebec yɛŋ!” Teɛroŋ faa na noba naŋ yele Nansaalee kɔkɔre Canada paaloŋ naŋ taa kyaare noba naŋ yele French kɔkɔre a be Quebec na da sãã la N teɛroŋ. Ana saŋa na, noba mine naŋ yi Quebec da iri zɔɔrɔ ne la a paaloŋ namine ka ba boɔrɔŋ ka Quebec meŋ e paaloŋ naŋ be o yoŋ.

Arnold da yeleeŋ ka, “Quebec yoŋ baŋ naŋ derɛ special paaneere gɛrɛ pampana ŋa.” N da sagɛɛŋ tɔntɔbaalɛ ka te na gaaŋ. N da baŋɛɛ ka Randi da boɔrɔŋ ka o gaa be te soŋ a naaŋ moɔloo toma saŋa zaa. A puoriŋ N da nyɛɛŋ ka, a gbɛre ŋa teŋ de ŋa da somaŋ yaga zaa.

Te da de la daaraanuu zanne French kɔkɔre, kyɛ ka te neŋ kultaa deme mine pãã da laŋ gaa Rimouski naŋ be Montreal samun-gɔɔ ane sapare seŋ kpakyagaŋ, be ne Montreal tɔɔre da eɛ kilometare 540. Kyɛ te da naŋ ba wono a kɔkɔre soŋ, a yɛlɛ ŋa da pɛlɛɛŋ saŋa na maŋ da kanna duoro mine a lammo zieŋ. N da yeleeŋ ka te lammokpɛŋ ŋa naŋ waana na, “saamma yaga na yi la ostrich” a wa a lammo. Kyɛ a da seŋ ka N yelka “saamma yaga na yi la Austria” a wa a lammo.

Te yɔɔpɔgeba banaare mine naŋ da ba kul serebɛ naŋ da taa eŋnyagroŋ yaga zaa da wa poɔ la te poɔŋ, ka Huberdeau ane o pɔge ane ba bibiiri bayi meŋ da wa poɔ te poɔŋ. Te yɔɔdɔɔ Huberdeau ane ò pɔge da ha la de-kpoŋ kaŋa, ka a paaneere na zaa naŋ da kpeɛrɛ be na da soŋ baŋ yɔɔ a sane. Te da boɔlɛɛ a die ŋa ka a De-pilaa, bonso o nimitɔɔre ane o pilare da eɛ peɛle. Noba 12 la da maŋ kpeɛrɛ be saŋa kaŋa meŋ noba 14. N ne Randi naŋ da e special paaneere na zuŋ, te da maŋ gaa la a naaŋ moɔloo beguo saŋa, ŋmenaa saŋa, ane zimaanee saŋa. Te poɔ zaaŋ da maŋ pɛle te yɔɔmine naŋ da maŋ beɛle te gaa a naaŋ moɔloo, ɔɔre saŋa gba, zimaanee zaa ba da maŋ beɛle teŋ gaa.

Te da tage peɛlɛɛ a paaneere ŋa yaga zaa aŋ da waa ŋa te neŋ ba yi la booree bonyeni. Saŋa kaŋa, te zaa da maŋ laŋ zeŋ uoree vũũ, te da taa la bebiri meŋ teŋ zaa maŋ laŋ maale bondirii di. Te yɔɔdɔɔ kaŋa naŋ da bebe da eɛ yieloŋ yiele, azuŋ Asibitidaare zimaanee zaa, te da maŋ yielee yiele a seɛ.

Noba yaga naŋ da be Rimouski teŋɛ na da boɔrɛɛ a Baabole zannoo! Yuomo anuu kpakyagaŋ, te poɔ zaaŋ da pɛle te Baabole zannezanneba mine naŋ da nyɛ nimitɔɔre gaabo a wa de suobu na. A lantaapuoruu meŋ da baayɛŋ a da taa naaŋ moɔleba naŋ ta 35.

Te da nyɛɛ wuluu aŋa naaŋ moɔleba Quebec poɔŋ. Te da nyɛɛ lɛ Jehoova naŋ soŋ te a naaŋ moɔloo poɔŋ a kyɛ ko te bonzaa yɛlɛ naŋ fɛre te. Ane meŋ, te da wa nɔŋ la a French deme yɛlɛ, ane ba lasiri yɛlɛ yaga zaa, ka lɛ vɛŋ teŋ wa nɔŋ noba mine meŋ lasiri yɛlɛ.​—2 Kor. 6:13.

Te da ba kaara soriŋ kyɛ ka Bɛɛtil da yelka te gaa Tracadie naŋ be New Brunswick sapare seŋ. A yɛlɛ ŋa da eɛ kpeɛŋaa ko te, bonso te neŋ neɛ kaŋa da sɛgrɛɛ yɛlɛ biŋ ka te na wa ha la o die, teŋ da nyɛ sakuu toma mine meŋ teŋ na maŋ de te wagre kyɛllee te toŋ. Ane meŋ, te Baabole zannezanneba mine da wa leɛ naaŋ moɔleba aŋ ba kɔɔre, ba da waana ka ba mɛ Lammozi-paalaa meŋ ko te.

Te da puoreeŋ ana daagbuli na baaraa zaa a kyaare a yɛlɛ ŋa, te da gaa la Tracadie meŋ ka te te nyɛ be. Be ane Rimouski yɛlɛ da ba yi taa fẽẽ zaa. Kyɛ te da sagɛɛŋ ka Jehoova naŋ boɔrɔ ka te gaa zuŋ, te na gaaŋ. Te da dɛlɛɛ Jehoova a da nyɛ lɛ oŋ da iri te yelkpeɛne zaa bare. (Maal. 3:10) Randi neŋ  Jehoova niiloŋ naŋ da e kpeɛŋaa na zuŋ, o da ba boɔrɔ o meŋɛ yoŋ boɔbo. O da eɛ neɛ meŋ naŋ maŋ maala laare, azuŋ teŋ da yi zie te naŋ be a gɛrɛ zi-zaala na yɛlɛ da ba e tuo yaga.

Te yɔɔdɔɔ Robert Ross yoŋ da la lantaapuoruu neŋkpoŋ teŋ gaa pɔge be. O neŋ o pɔge Linda da eɛ paaneere, kyɛ saŋa na baŋ wa dɔge ba dɛndɛŋ bie na, ba da naŋ zeŋɛɛ be a sonnɔ a toma. Aneazaa ka ba da guolee ba bidɔɔ na, kyɛ lɛ na baŋ da taa saannoŋ deebo gyogo, kyɛ da taa eŋnyagroŋ a naaŋ moɔloo poɔŋ na da eŋ teŋ faŋa yaga zaa.

Te da toŋɛɛ a paaneɛ toma yuomo ayi Tracadie poɔŋ, kyɛ baŋ da yelka te gaa te tonɔ a gbandige zukaara toma. Te da ba kaara soriŋ ka lɛ na eŋ. Yuomo ayɔpoi teŋ da de toŋ a gbandige zukaara toma Nansaalee kɔkɔre poɔŋ, a puoriŋ ba da leɛ de teŋ gaane Quebec ka te te tonɔ a gbandige zukaara toma French kɔkɔre poɔŋ. Te district overseer Léonce Crépeault da maŋ ko maŋ garebanyɛ ka maaŋ wa tere gyamaa poɔ yelyaga baare. Kyɛ a puoriŋ o da maŋ soore maŋ ka, “Wala hoŋ na baŋ e a vɛŋ ka ho yelyaga na eŋnɛ faŋa?” a A sommo oŋ da ko ma na da soŋ maŋ maŋ de N teɛroŋ eŋ lɛ N yelyaga naŋ na maŋ eŋnɛ noba faŋa kyɛ maŋ e mɔlɔ ka noba woŋ a muni meŋ.

Toma mine baŋ da ko ma maŋ daŋ koŋ inne zaa la saŋa na teŋ da e “Victorious Faith” Lammokpɛŋ Montreal yuoni 1978 na. N da tonɛɛ toma a Bondirii Maaloo zie na. Te da kaarɛɛ soriŋ ka noba 80,000 la na wa, ba da eɛ leɛroo a kyaare sori na teŋ maŋ tu ko a saamma bondirii na. A yɛlɛ zaaŋ da leɛre kpɛlɛŋkpɛlɛŋ, boma teŋ na de maala ne a bondirii, a bondirii teŋ na maale, ane sori teŋ na tu maalaa. Te da taa la lɔbɛrɛ 20 naŋ e frigere, kyɛ saŋa kaŋa a mine da ba maŋ tonɔ. Zie naŋ na nyaa ka te piili na, teŋsugɔ saŋa teŋ da toɔ̃ kpɛ a stadium na teŋ na e a lammo na a te maale be, bonso noba mine da erɛ kɔɔ dɛne deɛ̃ mine be. A da seŋ ka te sɛgre boma teŋ na de maale ne a bondirii biŋ, bonso te na maalɛɛ beguo bondirii ka zieŋ wa nyaaŋ! Te da balɛɛŋ yaga zaa, kyɛ N da zannɛɛ yɛlɛ yaga a yi te yɔɔmine na zie, ba toŋ tonkpeɛne, lɛ ba naŋ kyilli, a ne lɛ baŋ da maŋ maala laare teŋ laara na. Te da wa eɛ zɔmenne a wa tɔ zenɛ. A da e teŋ popeɛloŋ te naŋ da toɔ̃ gaa a lammokpɛŋ baŋ da e Quebec na, bonso o da eɛ o yoŋ. Ayi yuoni 1940 a waana 1960, ba da dɔgrɛɛ te yɔɔmine ana zie ŋaŋ yaga zaa.

 N zannɛɛ yɛlɛ yaga a yi N taaba naŋ da e zukaareba zieŋ a yi a lammokpɛŋ na meŋ teŋ da e Montreal na. Yuoni gbuli kpakyagaŋ, te yɔɔdɔɔ David Splane naŋ e a Lantaa Zukaareba kaŋa pampana da la a lammobɛrɛ zukaara. Kyɛ a puoriŋ, saŋa na baŋ da leɛ de ana toma ŋa ko ma na, David da soŋ maŋ a toma poɔŋ.

Te da de la yuomo 36 a toŋ a gbandige zukaara toma, kyɛ yuoni 2011 poɔŋ ba da yelka N e a Lantaapuoruu Nembɛrɛ Sakuu wulwulo na kaŋa. N neŋ Randi naŋ da maŋ gɛrɛ ziiri yaga na zuŋ, yuomo ayi yoŋ kpakyagaŋ te da gaŋ la godore naŋ ta 75. Kyɛ tɔnɔ da maŋ yi la sarekare na zaa teŋ da e na poɔŋ wa. A daagbuli zaa baaraa, a lantaapuoruu nembɛrɛ da maŋ taa la nimipa yaga zaa, bonso ba da nyɛɛŋ ka a Lantaa Zukaareba boɔrɔŋ ka ba ne Jehoova niiloŋ e kpeɛŋaa.

A puoriŋ, N da wa eɛ a Naaloŋ Duore-Enneba Sukuu wulwulo na kaŋa. A sakuubiiri da maŋ de la aware ayɔpoi zeŋ zanne boma bebiri zaa, a maŋ de aware ata toŋ toma ba naŋ ko ba ka ba gaa die te toŋ bebiri zaa zimaanee, a da maŋ taa sakuu toma anaare bee anuu ka ba toŋ daa zaa, azuŋ ba da maŋ baleŋ a ba taa wagre meŋ fẽẽ zaa. N neŋ N wulwulitɔ na da maŋ yelko baŋ ka, ka Jehoova sommoŋ naane ba koŋ baŋ e a yɛlɛ ŋa zaa ba menne. N daŋ koŋ inne lɛ a sakuu biiri nɔɛ zaa naŋ da maŋ mãã, saŋa na baŋ wa nyɛ ka ba naŋ de ba menne dɛle Jehoova na zuŋ, ba toɔ̃ eɛ yɛlɛ na zaa baŋ da teɛrɛ ka ba koŋ baŋ e na.

N ma naŋ da teɛrɛɛ noba yɛlɛ na, a da soŋ la o Baabole zannezanneba baŋ nyɛ nimitɔɔre gaabo, a kyɛ da vɛŋ ka N saa meŋ poɔ piili pɛlɛ ne Jehoova puoruu. Beraata sɛre ka N ma na kpi na, N saa da wa kyɛlle woŋ la gyamaa poɔ Baabole yelyaga kaŋa a Lammozieŋ, te noɔre zaaŋ da mãã. A puoriŋ o da naŋ waanɛɛ a lammore aŋa yuomo 26. Aneazaa ka N saa ba de suobu kyɛ kpi, kyɛ a lantaapuoruu nembɛrɛ da yelka onaŋ da maŋ daŋ neɛzaa ta a lammozie daa zaa.

N ma da eɛ ewuli soŋ a ko maaŋ ane N yɔɔpɔgeba na zaa. N yɔɔpɔgeba bata na zaa ane ba sereba puoree Jehoova ne yelmennoŋ. Ba bayi tonɛɛ bɛɛtil, kaŋa be la Portugal bɛɛtil ka kaŋa meŋ be Haiti bɛɛtil.

N ne Randi eɛ special paaneere Hamilton naŋ be Ontario. Saŋa na teŋ da be a gbandige zukaara toma poɔŋ na, te poɔ da maŋ pɛlɛŋ ka te beɛle te yɔɔmine ka ba gaa ba Baabole zannezanneba zie. Kyɛ pampana yɛŋ, te poɔ pɛlɛɛŋ ka te nyɛ te menne Baabole zannezanneba naŋ wa nɔŋ Jehoova. Te neŋ te yɔɔmine naŋ be a lantaapuoruu na poɔŋ te naŋ be pampana na nyɔgrɛɛ zɔmenne, a maŋ eŋ teŋ faŋa ka teneeŋ wa nyɛ lɛ Jehoova naŋ sonnɔ ba wagre kpeɛne poɔŋ ane wagre sonne meŋ poɔŋ.

Ka teneeŋ leɛteɛrɛ lɛ noba mine naŋ wuli ka ba teɛrɛɛ te yɛlɛ saŋa kaŋa naŋ pare na, te niŋe maŋ paŋ yaga zaa. Azuŋ te meŋ mɔɔrɔŋ ka te wuli te taaba ka te “taa” la ba yɛlɛŋ, a eŋnɛ ba faŋa ka ba mɔɔrɔ ba mɔɔbo zaa Jehoova puoruu poɔŋ. (2 Kor. 7:6, 7) Aŋa mannoo poɔŋ, te yɔɔdɔɔ kaŋa pɔge, o bidɔɔ, ane o pɔgeyaa zaa da eɛ paaneere. N da soorooŋ ka, ka lɛ o meŋ na boɔrɔŋ ka o toŋ a paaneɛ toma bee? O da iree a noɔre ka, o kaarɛɛ paaneere bata zu. N da lɛ soorooŋ ka, “Ho na baŋ kaa la ba zu a gaŋ Jehoova bee?” N da emooŋ faŋa ka o meŋ mɔɔ kyɛ nyɛ popeɛloŋ na ba naŋ da nyɛrɛ na. Kyuuri ayoɔbo puoriŋ o meŋ da piilee a paaneɛ toma.

N neŋ Randi naŋ na kyɛnɛ mannɛɛ Jehoova “toŋseɛlɛ yɛlɛ” korɔ noba zaa, te poboɔbo meŋ la ka ba nyɛ popeɛloŋ na te naŋ nyɛ Jehoova puoruu poɔŋ na.​—Yiem. 71:17, 18.