1-2. Sobuoŋ teŋ na baŋ de Kristabie manne neŋ a die na ba naŋ mɛ oŋ e wogi yaga zaa na? (1 Korinti 15:58)

 YUONI 1978 poɔŋ ba da mɛ la die kaŋa naŋ da e wogi yaga zaa Tokyo, Japan paaloŋ. Noba yaga da yeleŋ ka, wala ka a de-wogi ŋa na toɔ̃ are, bonso teŋgbigre ba yaara eebo ana teŋkpoŋ naŋ. Sobuo ka a de-meɛreba da mɛ a die ŋa ka teŋgbigreŋ wa e kyɛ ka a die ŋa ta le? Ba da mɛ la a die oŋ e kpeɛŋaa yaga zaa kyɛ na baŋ toɔ̃ laŋlaŋ fẽẽ a kyɛ ba lere ka teŋgbigreŋ wa erɛ. Kristabiiri meŋ waa ŋa ana de-wogi ŋa. Sobuoŋ?

² Azuŋ Kristabie meŋ seŋ ka o maŋ are kpeɛŋaa kyɛ ta vɛŋ ka o yɛlɛ e kpeɛŋaa te gaali. Aseŋ ka o maŋ are kpeɛŋaa a e siri ka o maŋ tuuro Jehoova bege ane o sowuli zaa. (Kanne 1 Korinti 15:58.) O maŋ “nareŋ ka o sagra noɔre” a ba bara o sagediibu fẽẽ zaa. Kyɛ a ba seŋ ka o yɛlɛ e kpeɛŋaa te gaali, ka anaŋ wa fɛre ka o leɛre yɛlɛ fẽẽ o maŋ eɛ lɛ. (Gyi. 3:17) Ka Kristabieŋ toɔ̃ e lɛ, o na maŋ arɛɛ kpeɛŋaa ka anaŋ wa seŋ neŋ ka o e lɛ, kyɛ o yɛlɛ koŋ e kpeɛŋaa te gaali. A zannoo ŋa poɔŋ, te na zannɛɛ lɛ teŋ na baŋ e a maŋ are kpeɛŋaa a ta leɛrɛ gɛrɛ puori. Te na nyɛɛ soe anuu Setaana naŋ maŋ tu a boɔrɔ ka o vɛŋ ka a e kpeɛŋaa ko te ka te are kpeɛŋaa, ane lɛ teŋ na baŋ e are a noɔreŋ.

3. Jehoova naŋ taa sori yaga zaa ka o korɔ nensaaleba bege na, bo bege mine oŋ ko te aŋ be Toma 15:28, 29?

³ Jehoova la taa sori yaga zaa ka o ko nensaaleba bege. Ka onaŋ wa korɔ o noba bege, o maŋ ko baŋ a bege aŋ pɛle ka a tuubu meŋ ba e tuo. (Aiz. 33:22) Aŋa mannoo poɔŋ, a dɛndɛŋ  Kristabiiri lantaa zukaareba na da wulee yɛlɛ ata mine Kristabiiri naŋ seŋ ka ba are kpeɛŋaa a poɔŋ: (1) ka ba zagre tebɛ puoruu kyɛ puoro Jehoova yoŋ, (2) a tuuro Jehoova bege o naŋ biŋ kyaare zĩĩ, (3) a tuuro bege Jehoova naŋ biŋ kyaare peɛ̃mo toma. (Kanne Toma 15:28, 29.) Wala ka Kristabiiri na baŋ e sagra Jehoova noɔre a yɛlɛ ata ŋa poɔŋ?

4. Wala teŋ na baŋ e a puoro Jehoova yoŋ? (Yel-iriwulaa 4:11)

⁴ Te maŋ zagrɛɛ tebɛ puoruu, kyɛ puoro Jehoova yoŋ. O da yelko la a Izerayɛl biiri ka ba puoro ona Jehoova yoŋ. (Dut. 5:6-10) Saŋa na Setaana meŋ naŋ da wa e Yezu nyɛ na, Yezu da yelka Jehoova yoŋ aŋ seŋ ka te puoro. (Mat. 4:8-10) Azuŋ te ba puoro puoruu bonmeɛraa zaa. Te ba derɛ gyeremɛ naŋ seŋ ka te de ko Naaŋmen na korɔ nensaaleba. Ka ba eɛ puoruu wedeɛreba, a donɛɛ namine, bee ka ba eɛ noba naŋ de yuori nimipɛle yɛlɛ poɔŋ. Te maŋ puoree Jehoova yoŋ bonso ona la “iri . . . boma zaa.”​—Kanne Yel-iriwulaa 4:11.

5. Ananso la wala teŋ maŋ tuuro Jehoova bege o naŋ biŋ kyaare nyɔvore ane zĩĩ?

⁵ Te maŋ tuuree Jehoova bege o naŋ biŋ kyaare nyɔvore ane zĩĩ. Ananso la wala? Bonso Jehoova yeleeŋ ka zĩĩ are ko la nyɔvore, kyɔɔtaa naŋ e tigroŋ naŋ yi Jehoova zie. (Liiv. 17:14) A piilee saŋa na Jehoova naŋ da yelka nensaaleba ɔɔrɔ nɛne na, o da ko baŋ bege ka ba ta wa dire a zĩĩ. (Mun. 9:4) O da lɛ de la a bege ŋa ko Moosis ka o de ko a Izerayɛl biiri. (Liiv. 17:10) O da lɛ ko la a lantaa zukaareba sowuli ka ba yelko a Kristabiiri zaa ka: “yɛ ta dire . . . zĩĩ.” (Tom. 15:28, 29) Azuŋ te maŋ kaa iree baaloŋ saŋ na baŋ koŋ de zĩĩ eŋ te. b

6. Bo yɛlɛ teŋ na toɔ̃ e ka lɛ vɛŋ ka te nyɔge bege Jehoova naŋ biŋ kyaare peɛ̃mo toma na kpeɛŋaa?

⁶ Te maŋ nyɔgɛɛ Jehoova bege o naŋ biŋ kyaare peɛ̃mo toma na kpeɛŋaa. (Hib. 13:4) A bitontona Pɔɔl da de la yelmannaa kaŋa naŋ soma manne ne a yɛlɛ ŋa soŋ zaa a ko te kawane ka, te “ko” a teŋɛzu yɛlɛ naŋ be te enneŋ. Lɛ wuli ka te mɔɔ te mɔɔbo zaa a iri vɔlfaare zaa bare te sukyieŋ. (Kol. 3:5; Joob 31:1) Ka teneeŋ wa tuore pigrinyɛ, te maŋ zagrɛɛ teɛrɛ zaa bee yelzaa naŋ na baŋ sãã te ne Naaŋmen niiloŋ.

7. Bo yɛlɛ aŋ seŋ ka te e siri ka te e, ka ananso la wala?

⁷ Jehoova boɔrɔŋ ka te maŋ “sagra noɔre a [yi te] sukyie poɔ.” (Uro. 6:17) Bege zaa o naŋ ko te ka te tuuro, te soŋ zuŋ oŋ ko te ana bege na, te koŋ baŋ leɛraa meŋ. (Aiz. 48:17, 18; 1 Kor. 6:9, 10) Te maŋ mɔɔrɛɛ te mɔɔbo zaa ka te tuuro Jehoova bege na a kyɛ taa gyogo na a yieloŋ yiele naŋ da taa a yelka: “N leɛrɛɛ N sukyiri eŋ ho sowuli tuubuŋ wagre zaaŋ, haali a gɛrɛ a baaraa.” (Yiem. 119:112) Kyɛ Setaana boɔrɔŋ ka o vɛŋ ka a e kpeɛŋaa ko te ka te are. Bo soe oŋ maŋ tu kyɛ e lɛ?

8. Sobuo ka Setaana maŋ tu dɔgroŋ eŋɛŋ a boɔrɔ ka o vɛŋ ka te sagediibu bale?

⁸ Dɔgroŋ. A Dɛɛvul maŋ de la zɔɔre ane dɔgroŋ tuore te ka lɛ na vɛŋ ka te sagediibu bale. O boɔrɔŋ ka o nyɔge te “ɔɔ,” a sãã te neŋ Jehoova niiloŋ na. (1 Pit. 5:8) Ba da tɔ la dabeɛ̃ eŋ a dɛndɛŋ Kristabiiri na, a ŋmɛ ba mine, a ko ba mine meŋ, ba naŋ da e siri ka ba nyɔge Jehoova puoruu kpeɛŋaa na zuŋ. (Tom. 5:27, 28, 40; 7:54-60) Setaana naŋ de la dɔgroŋ a tonɔ ne toma zenɛ ŋa. Te nyɛrɛɛ ana yɛlɛ ŋa a yi lɛ na ba naŋ dɔgrɔ te yɔɔmine Russia ane paalonne mine pooreŋ, ane nimikuõ-yɛlɛ na ba naŋ maŋ erɛ te yɔɔmine ŋa na.

9. De yelmannaa a wuli ananso a naŋ seŋ ka te baŋ nyaammo soe Setaana naŋ maŋ tu kyɛ ferɛ te.

 ⁹ Nyaammo soe Setaana naŋ maŋ tu kyɛ ferɛ te. Setaana maŋ de la “nyaayɛlɛ” erɛ te nyɛrɛ a kyɛ maŋ dɔgrɔ te kpogoko lɛ. (Efe. 6:11) Hooŋ leɛ nyɛ yɛlɛ naŋ da pɔge Bob saŋa na baŋ da gaaloo asibitiŋ, a boɔrɔ ka ba wɛroo na. O da yelko la a dɔktare ka lɛ zaa a naŋ waa kyɛ o daŋ koŋ deɛ zĩĩ zaa. A dɔkta naŋ na wɛroo na da sage la a yɛlɛ ŋa. Zie naŋ na nyaaŋ ka ba weroo na, ana zisoɔree na, dɔkta kaŋa meŋ da wa la Bob zie saŋa na o dɔgreba naŋ da gaa die na. O da yelko la Bob ka a dɔktare koŋ emoo zĩĩ, kyɛ ba na de la a zĩĩ mine biŋ, aminekaŋaŋ a na wa fɛreŋ ka ba emoo zĩĩ. Aminekaŋaŋ a dɔkta ŋa teɛroŋ da la ka Bob na leɛrɛɛ o teɛroŋ o dɔgreba naŋ ba kyebe zuŋ. Kyɛ Bob da arɛɛ kpeɛŋaa, a da yelka lɛ zaa naŋ la kyɛ o koŋ deɛ zĩĩ.

10. Bonso ka nensaaleba teɛroŋ e kyɛbaa? (1 Korinti 3:19, 20)

¹⁰ Nensaaleba teɛroŋ. Ka teneeŋ taa teɛroŋ na noba naŋ ba de Jehoova bege tonɔ ne toma naŋ taa na, ana vɛmeŋ ka te zagre Jehoova bege. (Kanne 1 Korinti 3:19, 20.) “A teŋɛ ŋa zu yɛmbaŋ” maŋ bɛnlɛɛ noba ka ba zagre Naaŋmen noɔre. Kristabiiri mine naŋ da be Pɛgamu ane Taatira tenne na da piili tɔglɛɛ noba naŋ da ŋmaa gyeere ba a maala baga a kyɛ tonɔ peɛ̃mo toma na gyogo. Yezu da yelee ba nimiri yɛlɛ ko ba, ba naŋ da tere sori ka peɛ̃mo toma kpɛ a lantaapuoruu na zuŋ. (Yel. 2:14, 20) Zenɛ ŋa, noba naŋ ŋmaa gyeere te na baŋ bɛnle teŋ ka te nyɛ teɛroŋ naŋ ba soma. Te booree deme mine na maŋ mɔɔrɔŋ ka ba leɛre te teɛroŋ, a yele ka te yɛlɛ eɛ tuo gaali, a boɔrɔ ka te e yelkaŋa sãã Jehoova bege. Aŋa mannoo poɔŋ, ba na baŋ yeleŋ ka, a Baabole sowuli parɛɛŋ, azuŋ ka hooŋ de ho meŋɛ eŋ peɛmo toma poɔŋ a ba e yelnimizeɛ zaa.

11. Aneazaa ka aseŋ ka te are kpeɛŋaa, kyɛ bo yɛlɛ aŋ ba seŋ ka te erɛ?

¹¹ Saŋa kaŋa te na maŋ nyɛŋ ka sowuli na Jehoova naŋ korɔ te na ba seŋ. Aminekaŋaŋ gba, te na maŋ “e gaŋ [la] bon na ba naŋ sɛge biŋ.” (1 Kor. 4:6) A yelfaa ŋa la ka a ŋmenpuore wedeɛreba naŋ da bebe Yezu saŋa na da maŋ erɛ. Ba da maŋ de la ba menne bege poɔ a Bege poɔŋ aŋ da maŋ e kpeɛŋaa ko a noba ka ba tu ana Bege na. (Mat. 23:4) Jehoova maŋ ko teŋ sowuli naŋ pɛle yaga zaa a yi o Yelbiri ane o lantaapuoruu na eŋɛŋ. A ba seŋ ka te maŋ de te meŋɛ bege poɔ sowuli na Jehoova naŋ ko te na. (Yeng. 3:5-7) Azuŋ, te ta maŋ e gaŋ bon na ba naŋ sɛge eŋ a Baabole poɔŋ, bee a binne bege korɔ te Kristabitaaba a kyaare yɛlɛ a Baabole naŋ ba yelka te e bee te ta e.

12. Sobuo ka Setaana maŋ tu “bɛllɛ” eŋɛŋ kyɛ bɛllɛ noba?

¹² Bɛllɛ. Setaana maŋ de la “bɛllɛ” ane “nensaaleba wuluu” bɛllɛ noba a kyɛ waana ne wɛltaa. (Kol. 2:8) A dɛndɛŋ Kristabiiri saŋa na, a yɛlɛ ŋa da eɛ nensaaleba wuluu ane a Gyuumine wuluu naŋ ba yi Naaŋmen Yelbiri na poɔŋ, ane baŋ da maŋ wulo ka Kristabiiri seŋ ka ba tuuro a Moosis Bege na. Ana wuluu ŋa da maŋ bɛllɛɛ noba a tage ba teɛroŋ yi Jehoova naŋ e Neɛ na zie yɛŋ zaa naŋ yi na. Zenɛ ŋa, Setaana maŋ tu la a donɛɛ ŋa namine eŋɛŋ kyɛ ŋmeɛrɛ duoro ane yɛlɛ naŋ ba kye dɛlebo yaara korɔ noba intanɛt ane social media zuŋ. Te nyɛɛ a yɛlɛ ŋa taa a COVID-19 baaloŋ faa na saŋa. c Jehoova Sieree Deme na naŋ da kyɛlle woŋ sowuli na a lantaapuoruu naŋ da korɔ te na, da ba tuore toɔrɔ aŋa bana naŋ da kyɛlle woŋ duoro naŋ ba kye dɛlebo na.​—Mat. 24:45.

13. Bonso aŋ seŋ ka te kaara soŋ a ta saana te wagre yɛlɛ mine poɔŋ?

¹³ Yɛlɛ naŋ maŋ derɛ te wagre. Te vɛŋ ka  “yɛlɛ naŋ fɛre yaga zaa” e nimizeɛ ko te. (Fil. 1:9, 10) Ka teneeŋ wa vɛŋ ka yɛlɛ mine deɛ te wagre kpoŋ zie zaa, a na baŋ sãã la wagre teŋ da na baŋ de e yɛlɛ mine naŋ na yi tɔnɔ ko te. Yɛlɛ te naŋ maŋ erɛ bebiri zaa aŋa bondirii diibu, dãã nyu, nimipɛle yɛlɛ, ane te meŋɛ toma na baŋ deɛ la te wagre zaa ka teneeŋ vɛŋ ka a e yɛlɛ naŋ e nimizeɛ te zemmo poɔŋ. (Luk. 21:34, 35) Bebiri la bebiri zaa meŋ te maŋ wonee duoro a kyaare tage kaŋ tage naŋ be nensaaleba zemmo poɔŋ ane a donɛɛ ŋa naaŋ di yɛlɛ poɔŋ. A ba seŋ ka te vɛŋ ka a yɛlɛ ŋa taa deɛrɛ te wagre. Ka lɛ naane ka teneeŋ ba kaa soŋ te meŋ na piili arɛɛ a noba ŋa mine puoriŋ te sukyie ane te teɛroŋ poɔŋ. Setaana maŋ tu la a soe ŋa zaa a boɔrɔ ka o bale te sagediibu ka a e kpeɛŋaa ko te ka te are kpeɛŋaa. Yɛ vɛŋ ka te nyɛ lɛ teŋ na baŋ zɔɔtoɔ̃ a yɛlɛ ŋa zaa a kyɛ are kpeɛŋaa.

14. Bo yelkaŋa la na baŋ soŋ te ka te are Jehoova puoriŋ kpeɛŋaa?

¹⁴ Teɛre ananso na ho naŋ de ho meŋɛ ko Jehoova a de suobu. Ho da de la ana gbɛɛ na ho naŋ da boɔrɔ ka ho are Jehoova puoriŋ zuŋ. Teɛrɛ bon naŋ da soŋ bo hoŋ sagedi ka ho nyɛ la a yelmeŋɛ. Ho wa zanne baŋɛɛ Jehoova yɛlɛ ka lɛ vɛŋ hoŋ nɔmoo a kyɛ taa gyeremɛ koo ka o na la ho sazu Saa. Ho wa taa la sagediibu ka lɛ vɛŋ hoŋ e kaŋdabaŋkalɛ a leɛre yi ho yelfaare poɔŋ. Ho barɛɛ yɛlɛ naŋ ba soma eebo kyɛ piili erɛ yɛlɛ naŋ pɛlɛ Jehoova poɔ. Ho poɔ zaaŋ da pɛle saŋa na ho naŋ da nyɛ ka Naaŋmen di la ho yelbebe suuri ko bo na. (Yiem. 32:1, 2) Ho da piili waanɛɛ a lammore a kyɛ manna yɛlɛ na ho naŋ zanne na korɔ noba. Pampana ŋa ho eɛ Kristabie naŋ de suobu, a kyɛnɛ a nyɔvore sori naŋ, ho e la siri meŋ ka ho naŋ kyɛnɛ a sori ŋa poɔŋ wagre zaa.​—Mat. 7:13, 14.

15. Bo tɔnɔ teŋ na nyɛ ka teneeŋ maŋ zanna boma a teɛrɛ a yɛlɛ gɛrɛ tɔɔre?

¹⁵ Maŋ zanna Naaŋmen Yelbiri na a teɛrɛ a yɛlɛ gɛrɛ tɔɔre. Aŋa lɛ teɛ nyegɛ naŋ sigi teŋɛ yaga naŋ maŋ are kpeɛŋaa na, ka teneeŋ meŋ taa sagediibu naŋ e kpeɛŋaa Jehoova eŋɛŋ, te meŋ na toɔ̃ arɛɛ kpeɛŋaa. Ka teɛŋ wa baara, o nyegɛ meŋ maŋ sigree teŋɛ yaga zaa. Ka  teneeŋ meŋ zanna boma a maŋ teɛre a yɛlɛ gaa tɔɔre, te sagediibu na maaleŋ eɛ kpeɛŋaa yaga zaa ka te sagedi yaga zaa meŋ ka Naaŋmen sowuliŋ soma gaŋ sowuli zaa. (Kol. 2:6, 7) Teɛre nyɛ lɛ Jehoova sowuli naŋ da go a kyɛ soŋ o puorebiiri saŋa naŋ pare. Aŋa mannoo poɔŋ, Iziikiel da kyɛllɛŋ soŋ zaa saŋa na a maleke naŋ da manna a ŋmenpuore die na oŋ da nyɛ o yelnyɛ poɔŋ na. A yelnyɛ ŋa da eŋɛɛ Iziikiel faŋa, kyɛ te meŋ zannɛɛ yɛlɛ yaga yi be a kyaare sori na Jehoova naŋ boɔrɔ ka te puoruu yelmennoŋ poɔŋ na. d (Izik. 40:1-4; 43:10-12) Te meŋ maŋ nyɛɛ tɔnɔ ka teneeŋ wa zanna Baabole poɔ yɛlɛ naŋ e zuluŋ.

16. Bob naŋ da taa sukyiri naŋ e kpagu na zuŋ, sobuo aŋ da somoo? (Yieme 112:7)

¹⁶ Taa sukyiri kpagu. Naa Deevid da yeleeŋ ka o nɔmmo o naŋ taa ko Jehoova daŋ koŋ baare zaa a da yiele ka: “N sukyiri nyɔgɛɛ kpeɛŋaa oo Naaŋmen.” (Yiem. 57:7) Te meŋ na baŋ taa la sukyiri kpagu a dɛle Jehoova kpɛlɛŋkpɛlɛŋ. (Kanne Yieme 112:7.) Te nyɛ lɛ a yɛlɛ ŋa naŋ soŋ Bob te naŋ yel o yɛlɛ a piilee saŋa na. Saŋa na baŋ da yelkoo ka ba na de la a zĩĩ mine biŋ ka a naŋ wa fɛre ka ba emoo zĩĩ na, o da yelko baŋ ka, ka ba naŋ baŋ ka ba na emooŋ zĩĩ yɛŋ, ona yi la a asibitiŋ tɔntɔbaalɛ a gaa die. A puoriŋ Bob da yeleeŋ ka, “N da ba taa bonnoo zaa a kyaare yɛlɛ na maŋ erɛ na; yɛlɛ naŋ na yi a poɔŋ wa meŋ yɛlɛ da ba dɔnnɔ ma.”

17. Bo yɛlɛ teŋ na baŋ zanne yi Bob zemmo yɛlɛ na poɔŋ? (Kaa a foto meŋ.)

¹⁷ Bob da toɔ̃ arɛɛ kpeɛŋaa bonso o da de la gbɛre ka o are kpeɛŋaa sɛre kyɛ gɛrɛ a asibiti. A yeldɛndɛŋ la ka o da boɔrɔŋ ka o e yɛlɛ naŋ na vɛŋ ka Jehoova poɔ pɛle. A yiiloŋ, o zannɛɛ a Baabole ane te gama naŋ yele nyɔvore ane zĩĩ yɛlɛ na soŋ. A taaloŋ, o da sagedieŋ ka ka onaŋ tu Jehoova sowuli, Jehoova na kooŋ maaloo yaga. Yelkpeɛŋaa zaa naŋ pɔge te, te meŋ na baŋ taa la sukyiri kpagu.

18. Sobuo ka Barake ewuli na wuli te ka te dɛle Jehoova? (Kaa a gane niŋe foto.)

¹⁸ Dɛle Jehoova. Te nyɛ lɛ Barake naŋ da toɔ̃ toŋ o toma soŋ o naŋ da dɛle Jehoova sowuli na zuŋ. Ana saŋa na a Izerayɛl biiri da ba e  zɔɔre siri, ba gba da ba taa zɔɔzɔɔ boma meŋ. Kyɛ Jehoova da yelka ba te zɔɔ neŋ Keenan sogyare neŋkpoŋ Siisera ane o sogyare. (Sar. 5:8) Deebora a pɔge daŋyele da yelko la Barake ka o sigi gaa teŋgbaŋgbali a te zɔɔ neŋ Siisera naŋ da taa zɔɔre torikori 900. A da na eɛ kpeɛŋaa ka a Izerayɛl biiri zɔɔtoɔ̃ a sogyare naŋ taa a zɔɔre torikori na, Barake meŋ da baŋɛɛ lɛ kyɛ o da tu la a sowuli. Saŋa na a sogyare naŋ da yi Teeber Taŋa a sigre waana na, Jehoova da vɛmeŋ ka saa piili waana yaga zaa. Siisera zɔɔre torikori na da kpɛ la mɛmɛrɛɛ a ba la toɔnɔ kyɛnɛ, azuŋ Jehoova da soŋɛɛ Barake oŋ zɔɔtoɔ̃. (Sar. 4:1-7, 10, 13-16) Lɛ meŋ la, ka teneeŋ dɛle Jehoova ane a sowuli o naŋ korɔ te a tuuro a lantaapuoruu eŋɛŋ, o na soŋ teŋ ka te zɔɔtoɔ̃ baare.​—Dut. 31:6.

19. Ananso la wala teŋ boɔrɔ ka te are kpeɛŋaa?

¹⁹ Teŋ naŋ be a doŋfaa ŋa poɔŋ yɛŋ, aseŋ ka te naŋ moɔ̃ nimiri a mɔɔrɔ ka te naŋ are kpeɛŋaa. (1 Tim. 6:11, 12; 2 Pit. 3:17) Te zaa e siri ka te koŋ vɛŋ ka dɔgroŋ, nyaammo soe Setaana naŋ maŋ tu kyɛ ferɛ te, nensaaleba teɛroŋ, bɛllɛ, ane yɛlɛ naŋ maŋ derɛ te wagre bɛlle te. (Efe. 4:14) Kyɛ yɛ vɛŋ ka te are kpeɛŋaa, a dire yelmeŋɛ korɔ Jehoova a nɔnɔ Jehoova a kyɛ sagra o nɔɛ. Kyɛ a ba seŋ ka te yɛlɛ e kpeɛŋaa te gaali. A zannoo naŋ tɔnne na poɔŋ, te na zanne nyɛɛ lɛ Jehoova ane Yezu naŋ e ewuli soŋ ko te a ba maŋ vɛŋ ka ba yɛlɛ e kpeɛŋaa te gaali.