A maŋ eɛ kpeɛŋaa ka te nyɛ wagre a zanne a Baabole te meŋɛŋ. Kyɛ ka teneeŋ wa nyɛ a wagre, wala teŋ na baŋ de o toŋ ne toma soŋ? A dɛndɛŋ, ta maŋ pagra. Ka hooŋ mãã ho meŋɛ a zanne bon fẽẽ kaŋa soŋ, ho na nyɛ la tɔnɔ gaŋ hoŋ na kanne boma yaga kyɛ ba woŋaa muni.

Daŋ zanne yɛlɛ naŋ e nimizeɛ yaga. (Efe. 5:15, 16) Yɛlɛ mine hoŋ na baŋ e la ŋa:

• Maŋ kanne a Baabole bebiri zaa. (Yiem. 1:2) Ana somaŋ ka ho maŋ daŋ kanne a daagbuli Baabole kannoo na te naŋ maŋ zanne a daagbuli poɔ lammo saŋa na.

• Maŋ daŋ zanne a Kaakaara Ziduoruu Zannoo ane a daagbuli poɔ lammo zannoo na sɛre kyɛ gɛrɛ a lammozie. Maŋ nare ho meŋɛ soŋ ka ho iri yɛlɛ noɔre.​—Yiem. 22:22.

• Mɔɔ kyɛ kanna gama na zaa ba naŋ maŋ iri teŋ de pono korɔ noba na, a maŋ kaa vidiori ane boma na zaa ba naŋ maŋ de eŋ jw.org zuŋ na.

• Maŋ peɛre yɛlɛ gaa tɔɔre. Ka hooŋ tuoro yelkpeɛŋaa kaŋa bee a taa soorebiri kaŋa, ho na baŋ peɛrɛɛ a yɛlɛ gaa tɔɔre, bee Baabole poɔ yɛlɛ mine ho naŋ boɔrɔ ka ho baŋ a tɛgɛ soŋ. Ka hooŋ boɔrɔ, ho na baŋ gaa la “Bible Study Activities” naŋ be jw.org zuŋ a te nyɛ yelzuri mine hoŋ na baŋ zanne a yɛlɛ.