1. Sobuo ka bidɔɔlee kaŋa wuli lɛ o sagediibu naŋ e kpeɛŋaa a kũũ leɛ iruu tamaa na eŋɛŋ?

 BIDƆƆLEE kaŋa baŋ boɔlɔ Matthew da beɛrɛŋ nimizeɛŋ aŋ da fɛre ka ba wɛroo. Saŋa na oŋ da wa di yuomo ayɔpoi na, o neŋ o dɔgreba da kaarɛɛ a JW Broadcasting^® vidio na ba naŋ maŋ iri kyuu la kyuu zaa na. Saŋa na a vidio naŋ da wa baara na, ba da iree yiele vidio kaŋa naŋ wulo noba naŋ korɔ ba nɔŋneba naŋ ire yire kũũni poɔŋ waayaane. b Saŋa na baŋ da wa kaa a vidio baare na, Matthew da tage peɛlɛɛ o dɔgreba a nyɔge ba nuuri a kyɛ yelko ba ka: “N Ma ane N Ba, yɛ nyɛɛŋ, ka maaŋ kpi gba kyɛ N na leɛ iri la a kũũni leɛ iruu saŋa. Yɛ na baŋ kyɛnlɛ maŋ ka N leɛ wa ana saŋa.” Hooŋ leɛteɛre nyɛ lɛ a bidɔgreba poori naŋ na pɛle yaga zaa ka ba nyɛ lɛ ba bidɔɔ na sagediibu naŋ e kpeɛŋaa yaga zaa a kũũni leɛ iruu eŋɛŋ.

2-3. Ananso la wala aŋ seŋ ka te maŋ teɛrɛ a kũũ leɛ iruu nɔ-eŋnaa na yɛlɛ?

² Aseŋ ka te zaa maŋ mɔɔ kyɛ teɛrɛ a Baabole nɔ-ennee naŋ kyaare nendaare kaŋa kũũ leɛ iruu na yɛlɛ. (Gyn. 5:28, 29) Bonso te kaŋa la kaŋa zaa ba baŋ saŋa na baaloŋ nimizeɛ kaŋa naŋ na kpɛ te, bee saŋa na teŋ na kɔŋ te nɔŋna kaŋa kũũ poɔŋ. (Ikil. 9:11; Gyi. 4:13, 14) A kũũ leɛ iruu ŋa na baŋ soŋ teŋ ka te are te yelkpeɛne zaa noɔreŋ. (1 Tɛs. 4:13) A Baabole vɛŋɛɛŋ aŋ pɛle ka Jehoova baŋ teŋ velaa zaa a nɔŋ te meŋ yaga zaa. (Luk. 12:7) Jehoova baŋ teŋ velaa zaa, azuŋ o na seŋ teŋ yi kũũni poɔŋ ka te naŋ taa te gyogri zaa a maŋ baŋ teɛre yɛlɛ zaa meŋ naŋ e te zemmo poɔŋ. Jehoova nɔŋ teŋ yaga zaa a boɔrɔ ka te taa nyɔvore naŋ ba taa baaraa, azuŋ ka teneeŋ kpi gba, kyɛ o na leɛ seŋ teŋ!

 ³ A zannoo ŋa poɔŋ, te na daŋ zanne nyɛɛ ananso teŋ na baŋ sage a kũũ leɛ iruu nɔ-eŋnaa na di. A kyɛ lɛ zanne Baabole sɛgre kaŋa naŋ eŋnɛ sagediibu faŋa yaga, o poɔŋ baŋ ire a zannoo ŋa yelzu na yi: “A ho yɔɔdɔɔ na leɛ-iri la.” (Gyn. 11:23) A baaraa zaa, te na zanne nyɛɛ lɛ teŋ na baŋ eŋ te sagediibu faŋa a kyaare a kũũ leɛ iruu tamaa na.

4. Ka hooŋ na sage noɔre emmo di, bo yɛlɛ aŋ seŋ ka ho daŋ baŋ peɛlaaŋ? Manne wuli.

⁴ Ka teneeŋ na sage noɔre neɛ kaŋa naŋ eŋ te di, aseŋ ka te baŋ peɛlaaŋ ka o soba taa la a boɔbo ane a kpeɛ̃o ka o paale a noɔre. Aŋa mannoo poɔŋ: Te de ka sasekpeɛŋaa kaŋa wa sãã la ho die. Ka ho zɔmeŋɛ kaŋa wa eŋ bo noɔre ka, ‘N na soŋ boŋ ka ho leɛ mɛ a die.’ O eɛ yelmeŋɛ soba, hoŋ sagedi meŋ ka o boɔrɔŋ ka o soŋ bo. Ka o naŋ baŋ die meɛbo soŋ zaa a taa a tontoŋ boma meŋ zaa, ho na baŋeŋ ka o na baŋ soŋ boŋ. Azuŋ ho na sagɛɛ o nɔ-eŋ na di. Lɛ yɛŋ, ka noɔre na Naaŋmen naŋ eŋ ko te a kyaare kũũ leɛ iruu na meŋ? O sereŋ taa la a boɔbo ane a kpeɛ̃o ka o paale ana noɔre na bee?

5-6. Ananso la wala teŋ na baŋ sagedi ka Jehoova boɔrɔŋ ka o la seŋ kũũni?

⁵ Jehoova taa la a boɔbo ka o seŋ kũũni bee? Nɔkpeɛne zaa kyebe ka o taaɛŋ. O da de la o vooroŋ soŋ ko Baabole sɛgsɛgreba baŋ sɛge o nɔ-eŋnaa a kyaare nendaare kaŋa kũũ leɛ iruu na. (Aiz. 26:19; Hoz. 13:14; Yel. 20:11-13) Noɔre zaa Jehoova naŋ eŋ o maŋ paalaaŋ. (Joos. 23:14) Jehoova eŋɛ nyagraŋ ka o seŋ bana naŋ kpi na. Ananso la wala teŋ yel lɛ?

⁶ Teɛre yɛlɛ na Gyoob naŋ da yel na. O da sagediiŋ ka ka o naŋ kpi gba, kyɛ Jehoova na la boɔrɔŋ ka o nyɛ o ka o voorɔ. (Joob 14:14, 15) Ana teɛroŋ na ne o zu ka Jehoova taa kyaare o puorebiiri zaa naŋ kpi. O eŋɛ nyagraŋ ka o seŋ ba ka ba iri yi kũũni poɔŋ a taa laafeeloŋ naŋ soma ane popeɛloŋ. Ka noba turiturituri na zaa naŋ kpi kyɛ ba toɔ̃ baŋ yelmeŋɛ naŋ bebe a kyaare Jehoova na meŋ? Te nɔmmo Naaŋmen na boɔrɔŋ ka o seŋ ba meŋ. (Tom. 24:15) O boɔbo la ka ba nyɛ apoɔsori a wa bammoo a nyɛ nyɔvore naŋ ba taa baaraa. (Gyn. 3:16) A pɛlɛɛŋ ka Jehoova boɔrɔŋ ka o seŋ kũũni.

7-8. Ananso la wala teŋ na baŋ sagedi ka Jehoova taa la a kpeɛ̃o ka o seŋ kũũni?

⁷ Nɔkpeɛne zaa kyebe ka Jehoova taa la a kpeɛ̃o meŋ a na baŋ seŋ kũũni. O na la a “Kpeɛ̃o Zaa Soba.” (Yel. 1:8) Azuŋ o taa la a kpeɛ̃o ka o baŋ zɔɔtoɔ̃ o dɔndɔnne zaa ane kũũ meŋ gba. (1 Kor. 15:26) A eɛ sukyiri dii yaga zaa te naŋ baŋ ana yɛlɛ ŋa. Te nyɛ te Yɔɔpɔge Emma Arnold zemmo yɛlɛ. A Donɛɛ Zaa Zɔɔre ayi soba na saŋa, o neŋ o yideme da tuoree pigrinyɛ yaga zaa. Emma da yelee yelkaŋa a dii o pɔgeyaa sukyiri, bonso o nɔŋneba yaga da kpieŋ a Nazi concentration kampore na pooreŋ, o da yelka: “Ka nobaŋ kpi a koŋ baŋ la iri kũũni poɔŋ yɛŋ, lɛ yɛŋ, te dɔndɔma kũũ taa la kpeɛ̃o gaŋ Naaŋmen, kyɛ lɛ meŋ daŋ koŋ baŋ e yelmeŋɛ.” Yelmɛŋɛ la, bonzaa kyebe a taa kpeɛ̃o gaŋ Jehoova! A kpeɛ̃o zaa daana Naaŋmen naŋ maale nyɔvore na taa la a kpeɛ̃o ka o ko noba naŋ kpi nyɔvore.

⁸ Ananso kaŋa teŋ lɛ sagedi ka Jehoova na baŋ seŋ la kũũni la ka, lɛ na oŋ maŋ toɔ̃ leɛteɛre yɛlɛ na, a ba taa mannoo. O maŋ boɔlɛɛ a ŋmarbie kaŋa zaa ne o yuori. (Aiz. 40:26) O maŋ teɛrɛɛ bana na zaa meŋ naŋ kpi na yɛlɛ. (Joob 14:13; Luk. 20:37, 38) A eɛ mɔlɔ koo ka o teɛre yelzaa a kyaare noba na oŋ na seŋ yi kũũni poɔŋ na, lɛ baŋ da waa, ba gyogri, ane ba zemmo yɛlɛ, azuŋ, ka o naŋ wa seŋ ba, ba na baŋ leɛteɛrɛɛ yelzaa naŋ da e ba zemmo poɔŋ.

9. Ananso la wala hoŋ sagedi ka nendaare kaŋa Jehoova na seŋ la kũũni?

 ⁹ A pɛlɛɛŋ ka te na baŋ sagɛɛ noɔre na Jehoova naŋ eŋ ko te ka nendaare kaŋa o na seŋ la kũũni na, bonso o taa la a boɔbo ane a kpeɛ̃o ka o paale a noɔre emmo ŋa. Te lɛ nyɛ ananso kaŋa zuŋ teŋ na baŋ sage a kũũni leɛ iruu di: Saŋa kaŋa naŋ pare, Jehoova da seŋ la kũũni. Takoreŋ saŋa na, o da ko la Yezu ane dɔbɔ mine naŋ da taa sagediibu kpeɛ̃o baŋ seŋ kũũni. Pampana, te waanaŋ ka te zanne kũũni leɛ iruu kaŋa yɛlɛ Yezu naŋ da e, baŋ sɛgaa eŋ Gyɔɔn zuri 11 poɔŋ na.

10. Boŋ da e Bɛtani poɔŋ saŋa na Yezu naŋ da be a Gyɔɔdan lombo zaala kaŋaŋ a tonɔ o naaŋ moɔloo toma na, ka boŋ oŋ da e? (Gyɔɔn 11:1-3)

¹⁰ Kanne Gyɔɔn 11:1-3. Hooŋ leɛteɛre nyɛ yɛlɛ naŋ da e Bɛtani teŋɛ na poɔŋ yuoni 32 C.E. baaroo saŋa. Yezu da taa la zɔmenne naŋ da peɛloo yaga zaa a koraa ŋa poɔŋ; bana la Laazoro ane o yɔɔpɔgeba Mareya ane Maata. (Luk. 10:38-42) Laazoro da wa beɛrɛŋ, aŋ da e dabeɛ̃ yaga a ko o yɔɔpɔgeba na. Ba da toɔlɛɛ duoro ko Yezu, kyɛ Yezu da be la a Gyɔɔdan koɔnbɔɔ na lombo zaala kaŋa, ka o naŋ na yi be a kyɛŋ gaa Bɛtani o na di la beraayi kyɛ ta be. (Gyn. 10:40) Kyɛ a posaanaa la ka, saŋa na a duoro naŋ da wa tara Yezu na ka Laazoro kpie. Aneazaa ka Yezu da baŋɛɛŋ ka o zɔmeŋɛ na kpieŋ, kyɛ o da naŋ be la zie na oŋ be na beraayi sɛre kyɛ pãã da tu sori gaa Bɛtani. Azuŋ Laazoro naŋ kpi beraanaare daare ka Yezu da te ta be. Yezu da boɔrɔŋ ka o e yelkaŋa a soŋ o zɔmenne na, kyɛ ka a de puubu ko Naaŋmen meŋ.​—Gyn. 11:4, 6, 11, 17.

11. Bo yɛlɛ teŋ na baŋ zanne yi a sɛgre ŋa poɔŋ a kyaare zɔmennoŋ yɛlɛ?

¹¹ Te zannɛɛ yelkaŋa yi a sɛgre ŋa poɔŋ a kyaare zɔmennoŋ yɛlɛ. Ka hooŋ nyɛ, saŋa na Mareya ane Maata naŋ da toɔle ka ba de a duoro te ko Yezu na, ba da ba yel ka o wa Bɛtani. Yɛlɛ baŋ da yel la ka o zɔmeŋɛ o naŋ nɔmoo yaga zaa na beɛrɛŋ. (Gyn. 11:3) Saŋa na Laazoro naŋ wa kpi na o da naaŋ toɔ̃ be la zie na o naŋ be na kyɛ seŋ o yi kũũni poɔŋ. Kyɛ Yezu da gaa la Bɛtani ka o te be o zɔmenne Mareya ane Maata zieŋ. Ka hooŋ taa zɔmeŋɛ kaŋa naŋ na wa soŋ bo ka hooŋ gbaŋ ba yelkoo ka o wa soŋ bo, lɛ yɛŋ ho na baŋ dɛlooŋ “dɔgɛɛ daare.” (Yeng. 17:17) Te meŋ tɔglɔ Yezu a meŋ e a zɔmeŋɛ ŋa tɔ a ko te taaba! Yɛ vɛŋ ka te lɛ kaa a sɛgre a nyɛ yɛlɛ naŋ da lɛ e.

12. Bo noɔre ka Yezu da eŋ ko Maata? Ka ananso la wala oŋ na baŋ sage ana nɔ-eŋ na di? (Gyɔɔn 11:23-26)

¹² Kanne Gyɔɔn 11:23-26. Maata da woŋeeŋ ka Yezu peɛlɛɛ Bɛtani. O da lonneeŋ wieoŋ a te pɔge o a yelka: “Daana, ka hooŋ da be kyɛ, a N yɔɔdɔɔ da koŋ kpi.” (Gyn. 11:21) Yelmeŋɛ la, o da naaŋ baŋ toɔ̃ saŋ la Laazoro. Kyɛ Yezu da boɔrɔŋ ka o toŋ toŋseɛlee kaŋa naŋ gaŋ lɛ. O da emmooŋ noɔre ka: “A ho yɔɔdɔɔ na leɛ-iri la.” O da la wulee Maata ananso oŋ na baŋ sage o nɔ-eŋ na di a da yelka: “Maa la a kũũni poɔ leɛ iruu ane a nyɔvore.” Yelmeŋɛ la, Naaŋmen koo la kpeɛ̃o oŋ na baŋ seŋ kũũni. O daŋ  seŋ la bipɔglee kaŋa naŋ kpi aŋ ba kɔɔre, a da la seŋ dɔɔ kaŋa meŋ daare na oŋ da kpi na. (Luk. 7:11-15; 8:49-55) Kyɛ ka lɛ o na baŋ seŋ la neɛ kaŋa naŋ kpi beraanaare a piili poɔnɔ bee?

13. Aŋa lɛ Gyɔɔn 11:32-35 naŋ wuli na, wala ka Yezu da e saŋa na oŋ da nyɛ Mareya ane o taaba mine naŋ kono na? (Kaa a foto meŋ.)

¹³ Kanne Gyɔɔn 11:32-35. Hooŋ leɛteɛre nyɛ yɛlɛ naŋ da la e. Laazoro yɔɔpɔge na kaŋa baŋ boɔlɔ Mareya na meŋ da gaa tuoree Yezu. O meŋ da yelee yɛlɛ na ne a zu Maata naŋ da yel na: “Daana, ka hooŋ da be kyɛ, a N yɔɔdɔɔ da koŋ kpi.” O neŋ noba naŋ da be o zieŋ na da kono hiine la. Saŋa na Yezu naŋ da wa nyɛ a kyɛ woŋ ba naŋ kono na, a da dɔ̃ɔ̃ o la. O zɔmenne na nembaaloŋ naŋ da kpɛ o zuŋ, o da koŋee la. O da nyɛɛ lɛ a naŋ maŋ beɛrɛ seŋ ka neɛ kɔŋ o nɔŋna. O sereŋ e la siri ka o iri yɛlɛ naŋ maŋ vɛŋ ka ba kono na bare!

14. Saŋa na Yezu naŋ da nyɛ Mareya naŋ kono ka lɛ vɛŋ oŋ meŋ koŋ na, boŋ te na baŋ zanne yi be a kyaare Jehoova?

¹⁴ Lɛ na Yezu naŋ da e o yɛlɛ a kyaare Mareya konni na wuli teŋ ka Jehoova eɛ nimibaaloŋ Naaŋmen. Ananso la wala teŋ yel lɛ? A zannoo naŋ pare na poɔŋ, te zannɛɛŋ ka Yezu maŋ tɔglɛɛ lɛ o Saa naŋ maŋ teɛrɛ yɛlɛ na. (Gyn. 12:45) Saŋa na Yezu naŋ da nyɛ o zɔmenne naŋ kono na, ba nembaaloŋ da kpɛ o la, azuŋ ka Jehoova meŋ wa nyɛ te naŋ kono, te nembaaloŋ maŋ kpɛ o la. (Yiem. 56:8) Nɔkpeɛne zaa kyebe ka a vɛŋɛɛŋ hoŋ boɔrɔ ka ho tage peɛle te Naaŋmen naŋ taa nyonono yaga zaa na.

15. Aŋa lɛ Gyɔɔn 11:41-44 naŋ wuli na, bo yɛlɛŋ da e a Laazoro uumu zie na? (Kaa a foto meŋ.)

¹⁵ Kanne Gyɔɔn 11:41-44. Yezu da gaa la zie na baŋ da ũũ Laazoro na, a da yelka ba binli a kuurii naŋ da furi a bogi noɔreŋ na bare. Kyɛ Maata da ba sage a da yelka bon na seŋ ŋa, o na nyuuroŋ. Kyɛ ka Yezu da yel sɔge o: “N da ba yeli ko bo ka ka hooŋ wa sage de, ho na nyɛ la a Naaŋmen puubu bee?” (Gyn. 11:39, 40) Yezu pãã da gboli kaa la sazu a da puori. Yɛlɛ na zaa oŋ da waana ka o e na, o da boɔrɔŋ ka o de a emmo zaa ko Jehoova. Ka Yezu pãã da boɔle ne kɔkɔkpeɛŋaa ka: “Laazoro, iri yi wa!” Ka Laazoro da iri wa yi a yaa poɔ! Yezu da  eɛ yelkaŋa neɛzaa naŋ da teɛre ka a koŋ baŋ nyɛ eebo.

16. Sobuoŋ ka yɛlɛ naŋ be Gyɔɔn zuri 11 na toɔ̃ eŋ te sagediibu faŋa a kũũni leɛ iruu tamaa eŋɛŋ?

¹⁶ Sobuoŋ ka yɛlɛ naŋ be Gyɔɔn zuri 11 na toɔ̃ eŋ te sagediibu faŋa a kũũni leɛ iruu tamaa eŋɛŋ? Teɛre ka Yezu da yelko la Maata ka: “A ho yɔɔdɔɔ na leɛ-iri la.” (Gyn. 11:23) Yezu meŋ da taa la a boɔbo ane a kpeɛ̃o ka o paale a noɔre ŋa aŋa o Saa. O kuori na da wuleeŋ ka o taa la a boɔbo ka o iri kũũ bare kpɛlɛŋkpɛlɛŋ ane posaanaa na o naŋ maŋ vɛŋ ka noba taa na. Saŋa na Laazoro naŋ da wa yi a yaa poɔŋ na, a da wuleeŋ ka Yezu taa la a kpeɛ̃o ka o seŋ kũũni. Hooŋ leɛteɛre nyɛ yɛlɛ na Yezu naŋ da leɛteɛre Maata na: “N da ba yeli ko bo ka ka hooŋ wa sage de, ho na nyɛ la a Naaŋmen puubu bee?” (Gyn. 11:40) Yɛlɛ yaga bebeŋ a wuli ka te na baŋ sagediŋ ka noɔre na Naaŋmen naŋ eŋ kyaare kũũni leɛ iruu na na nyɛɛ eebo. Kyɛ boŋ teŋ na baŋ e ka te sagediibu maaleŋ e kpeɛŋaa yaga a kũũ leɛ iruu tamaa ŋa eŋɛŋ?

17. Bo yɛlɛŋ seŋ ka a be te teɛroŋ ka teneeŋ wa kanna a kũũ leɛ iruu yɛlɛ naŋ be a Baabole poɔŋ na?

¹⁷ Maŋ kanna kyɛ teɛrɛ a kũũni leɛ iruu yɛlɛ naŋ e saŋa kaŋa naŋ pare na. A Baabole mannɛɛ kũũni leɛ iruu anii yɛlɛ. c Ho na baŋ mãã la ho meŋɛ kyɛ zanne ana kũũni leɛ iruu yɛlɛ ŋa yi a Baabole poɔŋ. Ka hooŋ wa zanna a yɛlɛ teɛre baŋ ka, ana noba ŋa da eɛ noba naŋ da bebe meŋɛ, pɔgeba, dɔbɔ, ane bibiiri. Kaara ka ho zanne yelkaŋa yi be. Teɛre nyɛ lɛ ana yɛlɛ ŋa kaŋa zaa naŋ maŋ wuli ka Naaŋmen taa la a boɔbo ane a kpeɛ̃o ka o seŋ kũũni. Agaŋaazaa, teɛre kũũ leɛ iruu na yɛlɛ naŋ e nimizeɛ yaga zaa na yɛlɛ, ona la a Yezu kũũ leɛ iruu na. Teɛre baŋ ka saŋa na Yezu naŋ wa iri kũũni poɔŋ na, noba kɔɔ kɔɔ yaga la da nyɛ aŋ e sieree teŋ na baŋ sage o kũũ leɛ iruu na di.​—1 Kor. 15:3-6, 20-22.

18. Sobuo hoŋ na baŋ de te yiele na mine naŋ kyaare a kũũ leɛ iruu tamaa na toŋ ne toma soŋ? (Kaa a muni zie yɛlɛ na.)

 ¹⁸ Maŋ kyɛllɛ kyɛ kyeɛrɛ “siiloŋ poɔ yiele” naŋ kyaare a kũũni leɛ iruu tamaa yɛlɛ. d (Efe. 5:19) Ana yiele ŋa maŋ eŋɛɛ te sagediibu faŋa a kyaare a kũũ leɛ iruu tamaa naŋ e tegroŋ yaga zaa ko te na. Azuŋ maŋ kyɛllaa, a zanna a yielibo, yɛ booree zannoo saŋa meŋ yɛ maŋ di dama kyaare bon na a yiele yelbie naŋ wulo. Nyɔge a yiele yelbie eŋ ho teɛroŋ ane ho sukyiri poɔŋ. Ka hooŋ wa tuoro kũũ yɛlɛ mine bee ka ho nɔŋna kaŋaŋ wa kpi, Jehoova vooroŋ soŋ na baŋ soŋ boŋ ka ho leɛteɛre a yiele ŋa ka a dii ho sukyiri a kyɛ eŋ bo faŋa meŋ.

19. Bo yɛlɛ teŋ na baŋ ŋmaa a foto te teɛroŋ poɔŋ a kyaare a kũũ leɛ iruu? (Kaa a daga ŋa, “ Bo Yɛlɛ Hoŋ Na Soore Ba?”)

¹⁹ Maŋ ŋmaa yɛlɛ foto ho teɛroŋ. Jehoova maale teŋ teŋ na baŋ ŋmaa foto te teɛroŋ a nyɛ te menne a dompaalaa poɔŋ. Te yɔɔpɔge kaŋa yeleeŋ ka: “N maŋ deɛ wagre yaga a ŋmaa foto N teɛroŋ poɔŋ a nyɛ N meŋɛ a dompaalaa poɔŋ yaga zaa, aŋ gba maŋ waa ŋa N naŋ wono a felaawa veɛle naŋ na be Paradiisi na nyuu.” Leɛteɛre nyɛ hoŋ na nyɛ dɔbɔ ane pɔgeba naŋ da taa sagediibu yaga zaa baŋ sɛge ba yɛlɛ eŋ a Baabole poɔŋ na. Nembuo hoŋ kaara soriŋ ka ho nyɛ? Bo yɛlɛ hoŋ na soore o soba? Leɛteɛre nyɛ hoŋ na nyɛ ho nɔŋneba naŋ kpi na. Teɛre nyɛ saŋa na hoŋ na te nyɛ ba, yelbie na hoŋ na daŋ yelko ba, lɛ hoŋ na kori ba, ane lɛ ho poɔ naŋ na pɛle yaga zaa ka ho leɛ nyɛ ba.

20. Bo aŋ seŋ ka te e siri ka te na eŋ?

²⁰ Te puoree Jehoova bareka yaga o naŋ eŋ noɔre ka o na seŋ la kũũni! Te na baŋ sagediŋ ka ana noɔre ŋa na nyɛɛ eebo meŋɛmeŋɛ bonso, Jehoova taa la a boɔbo ane a kpeɛ̃o ka o paale a noɔre. Yɛ vɛŋ ka te zaa moɔ̃ niŋe, a vɛŋ ka te sagediibu te naŋ taa a kyaare tamaa ŋa naŋ e tegroŋ yaga zaa ko te na maaleŋ erɛ kpeɛŋaa. Ka teneeŋ wa erɛ lɛ, te na tage peɛlɛɛ a Naaŋmen na naŋ eŋ noɔre ko te kaŋa la kaŋa zaa ka, ‘Ho nɔŋneba na leɛ-iri la!’