1. Bigre yɛlɛ naŋ da e saŋa na Yezu naŋ da toŋ o toŋseɛlɛ dɛndɛŋ soba na.

 HOOŊ leɛteɛre nyɛ lɛ yɛlɛ naŋ da waa saŋa na Yezu naŋ da piili o naaŋ moɔloo toma na yuoni 29 C.E. Ba da toŋ boɔlɛɛ Yezu, o ma Mareya ane o potuuribo na, ka ba wa kultaa tigri kaŋa. Ba da erɛɛ a tigri Yezu teŋɛ Naazɛrɛ teŋbile kaŋa ba naŋ boɔlɔ Keeina. Mareya zɔmenne da la noba na naŋ da erɛ a kultaa na, azuŋ o da sonnɔŋ baŋ kaara a saamma. Kyɛ a kultaa tigri saŋa, yelkaŋa da eɛŋ aŋ danaaŋ baŋ vɛŋ ka vi kpɛ a kultaa deme ane ba yideme. A dãã da baarɛɛŋ. b Aminekaŋaŋ ba da ba kaara soriŋ ka noba na wa la a tigri zie lɛ. Mareya da gaa la o bidɔɔ zie wieoŋ lɛ a te yelkoo ka: “A ba dãã baarɛɛ la.” (Gyn. 2:1-3) Wala ka Yezu da e? O da eɛ yelseɛlee kaŋa a vɛŋ ka koɔ̃ leɛ “dãã . . . naŋ kpɛ.”​—Gyn. 2:9, 10.

2-3. (a) Bo toŋseɛlɛ ka Yezu da toŋ? (b) Bo tɔnɔ teŋ na nyɛ ka teneeŋ zanne Yezu toŋseɛlɛ na yɛlɛ?

² Yezu da toŋ la toŋseɛlɛ o naaŋ moɔloo toma na poɔŋ. c O toŋ la a toŋseɛlɛ ŋa a soŋ noba turituri yaga zaa. Aŋa mannoo poɔŋ, o da toŋ la toŋseɛlɛ ayi mine, o da ko la dɔbɔ 5,000 bondirii, a puoriŋ oŋ da la ko dɔbɔ 4,000 bondirii, kyɛ ka hooŋ de pɔgeba neŋ bibiiri na zaa naŋ da bebe na ane a dɔbɔ zaa lantaa, ba na parɛɛ 27,000. (Mat. 14:15-21; 15:32-38) Saŋa na Yezu naŋ da tonɔ a toŋseɛlɛ ŋa na, o da saŋɛɛ baalba  meŋ baaloŋ. (Mat. 14:14; 15:30, 31) Hooŋ leɛteɛre nyɛ lɛ a nembeɛoŋ poɔ naŋ na pɛle yaga zaa saŋa na Yezu naŋ tu soseɛlɛ eŋɛŋ kyɛ saŋ ba baaloŋ, a kyɛ lɛ ko ba bondirii na!

³ Zenɛ ŋa te na baŋ zannɛɛ yelkaŋa a yi toŋseɛlɛ na Yezu naŋ da toŋ na poɔŋ. A zannoo ŋa poɔŋ, te na zannɛɛ yɛlɛ mine naŋ eŋnɛ sagediibu faŋa yaga zaa a yi Yezu toŋseɛlɛ na poɔŋ. A kyɛ lɛ zanne nyɛ lɛ teŋ na baŋ tɔgle Yezu sigrimennoŋ ane o nimibaaloŋ na o naŋ da maŋ taa saŋa na oŋ da maŋ tonɔ ana toŋseɛlɛ ŋa na.

4. Yezu toŋseɛlɛ na wulo teŋ yɛlɛ naŋ eŋnɛ sagediibu faŋa yaga a kyaare nembuo?

⁴ Yezu toŋseɛlɛ na wulo teŋ yɛlɛ naŋ eŋnɛ sagediibu faŋa yaga a kyaaroo ane o Saa. Bonso Jehoova zie ka kpeɛ̃o na zaa Yezu naŋ da maŋ de tonɔ a toŋseɛlɛ na yi. Toma 10:38 yelko teŋ ka: “Lɛnɛɛ Naaŋmen naŋ da paale a Yezu, a Naazɛrɛ Bie, ne a vooroŋ soŋ ane kpeɛ̃o; lɛnɛɛ o naŋ da yɔ tonɔ tonsonne kyɛ saŋna banaŋ zaa a Dɛɛvul naŋ da dɔgrɔ, bonso, Naaŋmen da be la O zie.” Ane meŋ yɛlɛ na zaa Yezu naŋ da yel ane yɛlɛ na zaa oŋ da e ane toŋseɛlɛ na zaa o naŋ da toŋ na poɔŋ, o da maŋ tɔglɛɛ lɛ o Saa naŋ da maŋ teɛrɛ yɛlɛ na. (Gyn. 14:9) Te nyɛ yɛlɛ ata mine teŋ na baŋ zanne yi Yezu toŋseɛlɛ na poɔŋ.

5. Ananso la wala ka Yezu da maŋ tonɔ a toŋseɛlɛ ŋa? (Matio 20:30-34)

⁵ A dɛndɛŋ soba, Yezu ane o Saa nɔŋ teŋ yaga zaa. Saŋa na Yezu naŋ da be a donɛɛ zu kyɛ na, o da wuleeŋ ka o nɔŋɛɛ noba yaga zaa, a da maŋ de kpeɛ̃o na o naŋ da taa a sonnɔ ne noba naŋ dire dɔgɛɛ na. Saŋa kaŋa zɔnne bayi mine daŋ koŋ sɔrɛɛ Yezu ka o soŋ ba. (Kanne Matio 20:30-34.) “Ba nembaaloŋ naŋ da kpɛ” o zuŋ, o da saŋ la ba baaloŋ. A Giriki yelbiri na ba naŋ de toŋ ne toma ka “ba nembaaloŋ naŋ da kpɛ” Yezu na wuleeŋ ka, o da taa la nyonono yaga zaa ko ba o sukyiriŋ. Ana nyonono ŋa oŋ da taa na zuŋ, o da maŋ wulee nɔmmo korɔ noba, ana meŋ la vɛŋ oŋ da ko a noba turituri kɔŋ naŋ kpɛ bondirii, a kyɛ da saŋ kɔŋkɔŋɔ kaŋa meŋ baaloŋ. (Mat. 15:32; Mak. 1:41) Te na baŋ sagediŋ ka Jehoova naŋ e Naaŋmen naŋ taa “nimibaaloŋ”, ane o Bidɔɔ nɔŋ teŋ yaga zaa, ka ba naŋ wa nyɛ ka te diree dɔgɛɛ meŋ a maŋ beɛrɛ baŋ yaga. (Luk. 1:78; 1 Pit. 5:7) Ba enne zaaŋ nyagra ka ba iri yelkpeɛne na zaa naŋ vɛŋ ka nensaaleba dire dɔgɛɛ na bare!

6. Bo kpeɛ̃o ka Naaŋmen ko Yezu?

⁶ A yiiloŋ soba, Naaŋmen ko la Yezu a kpeɛ̃o ka o iri nensaaleba dɔgɛɛ zaa bare. Nensaaleba menne daŋ koŋ baŋ iri yelkpeɛne na zaa ba naŋ tuoro na bare. Kyɛ Yezu toŋseɛlɛ na wuleeŋ ka, o na baŋ iree a zaa bare. Aŋa mannoo poɔŋ, faaloŋ na te naŋ nyɛ yi Adama zie na la vɛŋ teŋ dire dɔgɛɛ yaga zaa ka kũũ ane baaloŋ meŋ poɔ. Kyɛ Yezu taa la a kpeɛ̃o ka o faa te yi faaloŋ na te naŋ nyɛ yi Adama zie na, ka lɛ vɛŋ ka te dɔgɛɛ zaa baare. (Mat. 9:1-6; Uro. 5:12, 18, 19) Yezu toŋseɛlɛ na wuleeŋ ka, o taa la a kpeɛ̃o a na baŋ saŋ baaloŋ boorɔ zaa, a na baŋ seŋ kũũni meŋ. (Mat. 4:23; Gyn. 11:43, 44) Sasekpeɛŋaa daŋ daaraŋ oŋ vɛŋ oŋ mãã, a dige sifaare meŋ yi noba enneŋ. (Mak. 4:37-39; Luk. 8:2) A eɛ sukyiridii yaga zaa ka te baŋ ka Jehoova de la kpeɛ̃o naŋ seŋ ŋaa a ko o Bidɔɔ!

7-8. (a) Bo sagediibu ka Yezu toŋseɛlɛ na korɔ te? (b) Bo toŋseɛlee la hoŋ kaara soriŋ ka ho nyɛ a dompaalaa naŋ waana na poɔŋ?

⁷ A taaloŋ soba, te na baŋ sagediŋ kpɛlɛŋkpɛlɛŋ ka, maaloo na zaa Naaŋmen naŋ eŋ noɔre ka o Naaloŋ na de wa ko teŋ na, a na nyɛɛ eebo meŋɛmeŋɛ. Toŋseɛlɛ na zaa Yezu naŋ da toŋ saŋa na oŋ da be a donɛɛ zuŋ kyɛ na wulo teŋ ka, o na toŋɛɛ ana toŋseɛlɛ  ŋa yaga a donɛɛ zu lombori zaa, bonso o diree Naaŋmen Naaloŋ na Naa sazuŋ. Te leɛ nyɛ lɛ te zemmo naŋ na waa ka Kristaŋ wa piili dire naaŋ a donɛɛ zuŋ. Te na taa la laafiiloŋ naŋ soma, bonso o na iree baaloŋ boorɔ zaa naŋ maŋ vɛŋ ka nensaaleba dire dɔgɛɛ a bare. (Aiz. 33:24; 35:5, 6; Yel. 21:3, 4) Kɔŋ daŋ koŋ lɛ kpɛ te, te ko lɛ di dɔgɛɛ saammo bɛrɛ meŋ zuŋ. (Aiz. 25:6; Mak. 4:41) Te na taa la popeɛloŋ yaga zaa bonso te nɔŋneba na zaa naŋ kpi na na iri yi la “ba yaare poore” ka te ko ba waayaane. (Gyn. 5:28, 29) Bo toŋseɛlee la hoŋ kaara soriŋ ka ho nyɛ a dompaalaa naŋ waana na poɔŋ?

⁸ Yezu da maŋ taa la sigrimennoŋ ane nyonono ka o naŋ wa tonɔ o toŋseɛlɛ na, te meŋ na baŋ tɔglɛɛ ana gyogri ŋa. Yɛ vɛŋ ka te zanne o toŋseɛlɛ ayi mine yɛlɛ. Te daŋ zanne o toŋseɛlee kaŋa o naŋ da toŋ kultaa tigri kaŋa zieŋ a yi Keeina paaloŋ.

9. Boŋ ka Yezu da e a kultaa tigri zieŋ? (Gyɔɔn 2:6-10)

⁹ Kanne Gyɔɔn 2:6-10. Saŋa na a dãã naŋ da wa baare a kultaa tigri zieŋ na, a da ba e ferebo ka Yezu e yelkaŋa a soŋ ba. Daŋyelbo zaa kyebe a yelka ka, ka a Mɛzaayaŋ wa wa, o na tu la soseɛlee poɔŋ a kyɛ maale dãã a ko noba. Kyɛ hooŋ leɛteɛre nyɛ lɛ a naŋ na waa ko bo ka bunnyuureeŋ baare ho kultaa tigri zieŋ. A kultaa deme ane ba yideme yɛlɛ da eɛ Yezu nembao, agaŋaazaa a pɔge paalaa neŋ o serɛ. Azuŋ o da boɔrɔ ka o pɔge ba vi. Ananso oŋ da toŋ a  toŋseɛlee na yɛlɛ teŋ daŋ zanne a yi a zannoo ŋa piilee na. O da vɛŋɛɛŋ ka koɔ̃ naŋ ta galɔŋni 103 leɛ dãã naŋ kpɛ. Aminekaŋaŋ o da boɔrɔŋ ka a dãã kyɛlɛɛ kyɛre ka ba la de e yelyobo, bee ka ba na baŋ koɔraa a de soŋ a kultaa deme. Lɛ zuŋ oŋ da leɛ a koɔ̃ yaga ŋa zaa aŋ leɛ dãã na. Nɔkpeɛne zaa kyebe ka a pɔge paalaa neŋ o serɛ poɔ na pɛleŋ yaga zaa ka ba taa nimipa ane yɛlɛ na Yezu naŋ da e ko ba na!

10. Bo yelnimizeere mine la be Gyɔɔn zuri 2 poɔŋ? (Kaa a foto meŋ.)

¹⁰ Te leɛ nyɛ yɛlɛ mine teŋ na baŋ zanne yi Gyɔɔn zuri 2 poɔŋ. Ka hooŋ nyɛ, Yezu meŋɛ naaneŋ da ɔŋ a koɔ̃ eŋ a senne pooreŋ. Oŋ da ba boɔrɔ ka noba teɛroŋ wa o eŋɛŋ na zuŋ, o da vɛŋɛɛŋ ka a tontonneba ɔŋ a koɔ̃ eŋ a senne pooreŋ. (Wɛlbo  6, 7) Saŋa na Yezu naŋ da wa vɛŋ ka a koɔ̃ leɛ dãã baare na, o meŋɛ naaneŋ da ɔŋ a dãã a te wuli a tigri zukaara. Kyɛ o da vɛŋɛɛŋ ka a tontonneba ɔŋ gaane. (Wɛlbo 8) Yezu da ba de ŋmanlee a ɔŋ a dãã mine a de teɛŋ wuli a saamma zaa naŋ bebe na, a e pɔloo a yelka, ‘Yɛ zaa wa lɛnne nyɛ a dãã N naŋ maale na!’

11. Boŋ teŋ na baŋ zanne yi Yezu toŋseɛlee na poɔŋ?

¹¹ Toŋseɛlee na Yezu naŋ da toŋ a vɛŋ ka koɔ̃ leɛ dãã na, bo teŋ na baŋ zanne yi be? Te na baŋ zannɛɛ sigrimennoŋ yɛlɛ yi be. Yezu da ba e pɔloo a yelseɛlee ŋa oŋ da toɔ̃ e na zuŋ. A yelmeŋɛ la ka Yezu daŋ ba e pɔloo ane yelzaa o naŋ toɔ̃ e. Kyɛ o da maŋ yi la sigrimennoŋ poɔŋ a de a gyeremɛ ane a pugibu zaa a korɔ o Saa. (Gyn. 5:19, 30; 8:28) Ka teneeŋ tɔglɔ Yezu, a sigri te menne, te koŋ maŋ erɛ pɔloo ane yɛlɛ te naŋ toɔ̃ e. Tone zaa te naŋ toɔ̃ toŋ Jehoova puoruu poɔŋ, yɛ ta vɛŋ ka te erɛ pɔloo te meŋɛ yɛlɛ, kyɛ te de a pugibu zaa ko te Naaŋmen na teŋ nyɛ apoɔsori ka te tonɔ koroo na. (Jer. 9:23, 24) Yɛ vɛŋ ka te de emmo naŋ seŋ neŋ a koroo. Bonso, te koŋ baŋ e yelsoŋ zaa te meŋɛŋ ka Jehoova ba soŋ te.​—1 Kor. 1:26-31.

12. Sobuo teŋ na baŋ la tɔgle Yezu sigrimennoŋ na? Manne wuli.

¹² Te la nyɛ lɛ teŋ na baŋ lɛ tɔgle Yezu sigrimennoŋ na. Hooŋ leɛteɛre a yelmannaa ŋa yɛlɛ a nyɛ: Lantaapuoruu neŋkpoŋ kaŋa deɛ wagre yaga a soŋ a nembɛrɛ sonnɔ kaŋa naŋ e baapaalaa ka o toɔ̃ nare o meŋɛ a tere o dɛndɛŋ yelyaga. O naŋ soŋ a te yɔɔdɔɔ pɔlee ŋa zuŋ, a da vɛŋɛɛŋ oŋ toɔ̃ tere a yelyaga soŋ zaa aŋ toɔ̃ eŋ a lantaapuoruu noba faŋa. A lammo naŋ wa baare na, ka te yɔɔ kaŋa gaa a lantaapuoruu neŋkpoŋ ŋa zie a te yelka: ‘Te Yɔɔdɔɔ ŋa yelyaga na oŋ tere na eŋnɛɛ faŋa yaga.’ Aseŋ ka a lantaapuoruu neŋkpoŋ leɛ yelka: ‘Ɛɛ, kyɛ maaŋ de N wagre yaga zaa a somoo oŋ toɔ̃ tere a yelyaga soŋ zaa lɛ’ bee? Kyɛbee aminekaŋaŋ o na yi la sigrimennoŋ poɔŋ a yelka: ‘Ɛɛ, o mɔɛ̃ yaga, N poɔ pɛlɛɛŋ ne o yaga zaa’? Ka teneeŋ taa sigrimennoŋ, te koŋ maŋ de yelsonne te naŋ e ko te taaba a boɔrɔ ne gyeremɛ korɔ te menne. Ka teneeŋ wa baŋ ka Jehoova maŋ nyɛrɛɛ yɛlɛ na zaa te naŋ erɛ, ka o poɔ pɛlɛ neŋ yɛlɛ na te naŋ erɛ na, lɛ yoŋ maŋ seŋ teŋ. (De manne Matio 6:2-4; Hib. 13:16) Nɔkpeɛne zaa kyebe ka, ka teneeŋ wa tɔglɔ Yezu a taa sigrimennoŋ, a maŋ pɛlɛɛ Jehoova poɔ.​—1 Pit. 5:6.

13. Yezu naŋ da wa tara Nayine na boŋ oŋ da nyɛ, ka boŋ oŋ da e kyaare a yɛlɛ? (Luka 7:11-15)

¹³ Kanne Luka 7:11-15. Hooŋ leɛteɛre nyɛ ana yɛlɛ ŋa naŋ da nyɛ eebo saŋa na Yezu naŋ da naŋ tonɔ o naaŋ moɔloo toma na. O da tu la sori gaa Galili teŋɛ kaŋa ba naŋ boɔlɔ Nayine. Be peɛlɛɛ Suunem teŋɛ na daŋyele Eliisa naŋ da seŋ pɔge kaŋa bie naŋ da kpi yi kũũni poɔŋ yuomo kɔɔraawai naŋ da pare. (2 Nam. 4:32-37) Saŋa na  Yezu naŋ da wa tara a teŋɛ ŋa denɔkpoŋ na, o da nyɛɛŋ ka noba da wa yire la a teŋɛ poɔŋ ane kuori. A yɛlɛ da eɛ posaanee yaga zaa bonso, ko-pɔge kaŋa la da kɔŋ o bidɔɔ yenii. Kyɛ a ko-pɔge ŋa da ba e o yoŋ; nembeɛoŋ naŋ da yi a teŋɛ poɔŋ da be la o zie. Yezu da vɛmeŋ ka a noba arɛ, oŋ da e yelseɛlee kaŋa a ko a ko-pɔge ŋa, o da seŋ la o bidɔɔ na! Yezu seŋ la kũũni bata baŋ sɛge ba yɛlɛ eŋ a Baabole poɔŋ kyɛ ŋa la a dɛndɛŋ soba.

14. Bo yelsonne mine la baŋ sɛge eŋ Luka zuri 7? (Kaa a foto meŋ.)

¹⁴ Te nyɛ yelsonne mine teŋ na baŋ zanne yi Luka zuri 7. Saŋa na Yezu “naŋ da nyɛ” a pɔge naŋ kono na, “nembaaloŋ da kpɛ o la.” (Wɛlbo 13) Aminekaŋaŋ Yezu da nyɛ la a pɔge naŋ kono peɛle o bikũũ na baŋ tuo gɛrɛ ne, lɛ da vɛŋɛɛŋ ka nembaaloŋ kpɛ o yaga zaa a pɔge yɛlɛ. A pɔge yɛlɛ yoŋ naane da e Yezu nembao, kyɛ o da wuluuŋ nyonono. Nɔkpeɛne zaa kyebe ka o da de la kɔkɔre naŋ eŋnɛ faŋa a yel yɛlɛ koo ka: “Ta kono.” A kyɛ pãã da e yelkaŋa a somoo. O da seŋ la o bidɔɔ na yi kũũni poɔŋ a “de o ko o ma.”​—Wɛlbo 14, 15.

15. Bo teŋ na baŋ zanne yi Yezu toŋseɛlee ŋa poɔŋ?

¹⁵ Bo teŋ na baŋ zanne yi a toŋseɛlee na Yezu naŋ da toŋ a seŋ a ko-pɔge bidɔɔ na? Te zannɛɛŋ ka aseŋ ka te maŋ wulo nyonono korɔ noba naŋ kɔŋ ba nɔŋneba. Yelmeŋɛ la, te koŋ baŋ seŋ kũũ aŋa lɛ Yezu naŋ da e na. Kyɛ aŋa Yezu, ka teneeŋ de te niŋe biŋ teŋɛŋ, te na baŋ toɔ̃ wulee nyonono ko noba naŋ kɔŋ ba nɔŋneba. Te na baŋ toɔ̃ wuli baŋ nyonono a yi teŋ na yel yelkaŋa bee a e yelkaŋa naŋ na baŋ soŋ ba a kyɛ dii ba sukyie. d (Yeng. 17:17; 2 Kor. 1:3, 4; 1 Pit. 3:8) Ka teneeŋ gbaŋ yel yel-fẽẽ kaŋa bee a e yel-fẽẽ kaŋa ko ba gba, kyɛ a na baŋ eŋ baŋ faŋa, a dii ba sukyie yaga zaa.

16. Aŋa lɛ a foto poɔ yɛlɛ naŋ wuli na, bo hoŋ zanne yi a bi-ma ŋa o bie naŋ da kpi aŋ ba kɔɔre zemmo yɛlɛ ŋa poɔŋ?

¹⁶ Te nyɛ te yɔɔpɔge kaŋa zemmo yɛlɛ. Yuomo mine naŋ pare, ba da yielee yieloŋ kaŋa a Lammozieŋ, ka te yɔɔpɔge ŋa da nyɛ  bi-ma kaŋa naŋ kono. A yieloŋ da yelee a kũũni leɛ iruu tamaa yɛlɛ; a bi-ma ŋa meŋ bipɔgeyalee da kpieŋ aŋ ba kɔɔre. Saŋa na te yɔɔpɔge ŋa naŋ wa nyɛ lɛ na, o da gaa arɛɛ te yɔpɔge ŋa lomboriŋ wieoŋ lɛ, a de o nu pare o bɔgɔŋ ka o neŋ o zaa da yiele a yieloŋ te baare. A bi-ma da yeleeŋ ka: “A da vɛŋɛɛŋ maŋ nyɛ nɔmmo yaga zaa a ko te yɔɔdɔba ane te yɔɔpɔgeba na.” O poɔ da pɛlɛɛŋ yaga zaa o naŋ da gaa a lammo. O da la yelka: “A Lammozie teŋ na baŋ nyɛ sommo.” Te na baŋ sagediŋ ka Jehoova maŋ nyɛ la yel-fẽẽ zaa te naŋ e ka te wuli nyonono a ko bana naŋ kɔŋ ba nɔŋneba, ka ba “sukyie . . . dɔnnɔ yaga zaa” na.​—Yiem. 34:18.

17. Boŋ teŋ zanne a zannoo ŋa poɔŋ?

¹⁷ Ka teneeŋ zanne toŋseɛlɛ na Yezu naŋ da toŋ baŋ sɛgaa eŋ a Baabole poɔŋ na, a na eŋɛɛ te sagediibu faŋa yaga. A maŋ wuli teŋ ka Jehoova neŋ Yezu nɔnɔ teŋ yaga zaa, a wuli te ka Yezu taa la a kpeɛ̃o a na baŋ vɛŋ ka nensaaleba dɔgɛɛ zaa baare, a kyɛ vɛŋ teŋ taa sagediibu ka a koŋ kɔɔre, nɔɛ na zaa Naaŋmen naŋ eŋ te na, na nyɛɛ eebo ka o Naaloŋ naŋ wa wa. Ka teneeŋ wa zanna a yɛlɛ ŋa aseŋ ka te maŋ teɛre lɛ teŋ na baŋ e kyɛ tɔglɔ a Yezu gyogri ŋa. Ho na baŋ zannɛɛ Yezu toŋseɛlɛ mine o naŋ toŋ na yɛlɛ ho Booree Zannoo saŋa bee ho meŋɛ zannoo saŋa. Ho na zannɛɛ yɛlɛ yaga a yi be, a baŋ wuli ho taaba mine meŋ yɛlɛ na ho naŋ zanne na. Ka hooŋ e lɛ ho neŋ ho taaba na maŋ diree dama naŋ eŋnɛ faŋa!​—Uro. 1:11, 12.

18. Boŋ teŋ na zanne a zannoo naŋ tɔnne na poɔŋ?

¹⁸ Kũũni bata na Yezu naŋ da seŋ baŋ sɛge a yɛlɛ eŋ a Baabole poɔŋ na, aŋ da kyɛre fẽẽ ka o kpi na, oŋ da seŋ a baaraa soba. Kyɛ ana kũũni leɛ iruu ŋa yɛŋ da eɛ o yoŋ, bonso Yezu zɔmeŋɛ o naŋ nɔŋ yaga zaa la oŋ da seŋ yi kũũni poɔŋ, azuŋ wagre kpeɛne poɔŋ la ka Yezu da e lɛ. Boŋ teŋ na baŋ zanne yi a toŋseɛlee ŋa yɛlɛ ba naŋ sɛge eŋ a duorisoŋ gama poɔŋ na? Ka wala teŋ na baŋ e a eŋ te sagediibu faŋa a kũũ leɛ iruu tamaa eŋɛŋ? Te na nyɛ la a soorebie ŋa nɔɛ iribo a zannoo naŋ tɔnne na poɔŋ.