1-2. Bo aŋ seŋ ka te erɛ kyɛ kyɛllɛ a dompaalaa?

 TE NIŊE paɛ̃ ne noɔre na Jehoova naŋ eŋ ka o na vɛmeŋ ka a donfaa ŋa leɛ dompaalaa naŋ pɛgeyi na. (2 Pit. 3:13) Aneazaa ka te ba baŋ saŋa na a dompaalaa naŋ na wa yɛŋ, kyɛ yɛlɛ na zaa te naŋ nyɛrɛ na wuleeŋ ka a koŋ lɛ kɔɔre.​—Mat. 24:32-34, 36; Tom. 1:7.

² Azuŋ lɛ zaa te naŋ be a yelmeŋɛ poɔŋ kɔɔre seŋ, kyɛ aseŋ ka te naŋ eŋnɛ te sagediibu faŋa a kyaare a nɔ-eŋ ŋa. Ananso la wala? Bonso, ka neɛ sagediibu gbaŋ e kpeɛŋaa kyɛ o na baŋ baliŋ. Azuŋ, a bitontona Pɔɔl da yeleeŋ ka ka teneeŋ ba taa sagediibu a eɛ “yelbieri na naŋ maŋ gbiŋ te taa.” (Hib. 12:1) Ka teneeŋ ba boɔrɔ ka te sagediibu bale, gbɛɛ yaga aseŋ ka te maŋ teɛrɛ yɛlɛ naŋ erɛ a wuli ka a koŋ kɔɔre a dompaalaa na waŋ na yɛlɛ.​—Hib. 11:1.

3. Bo yɛlɛ teŋ na zanne a zannoo ŋa poɔŋ?

³ A zannoo ŋa poɔŋ, te na zannɛɛ yɛlɛ ata naŋ na baŋ soŋ te ka te eŋ te sagediibu faŋa Jehoova nɔ-ennaa na o naŋ eŋ te a kyaare a dompaalaa na yɛlɛ: (1) ka teneeŋ maŋ teɛrɛ a yɔɔdeɛbo yɛlɛ gɛrɛ tɔɔre, (2) a teɛrɛ Jehoova kpeɛ̃o yɛlɛ, ane (3) teŋ na maŋ erɛ yɛlɛ naŋ na maŋ tagra te peɛlɛ Jehoova. A kyɛ pãã nyɛ lɛ duoro na Jehoova naŋ da de ko Habaakuk naŋ na baŋ eŋ te sagediibu faŋa zenɛ ŋa. A dɛndɛŋ soba, yɛ vɛŋ ka te zanne nyɛ yɛlɛ mine te naŋ tuoro pampana aŋ fɛre ka te taa sagediibu naŋ e kpeɛŋaa a dompaalaa eŋɛŋ a toɔ̃ are a noɔreŋ.

 YƐLƐ NA POƆŊ A NAŊ SEŊ KA TE TAA SAGEDIIBU NAŊ E KPEƐŊAA

4. Bo gbɛ deree la aŋ seŋ ka te taa sagediibu naŋ e kpeɛŋaa sɛre kyɛ na baŋ de?

⁴ Te bebiri zaa gbɛ deree poɔŋ, aseŋ ka te taa sagediibu naŋ e kpeɛŋaa sɛre kyɛ na baŋ de gbɛre naŋ soma. Aŋa mannoo poɔŋ, te maŋ deɛ gbɛɛ kyaare zɔmenne nyɔgebo, nimipɛle yɛlɛ, sakuu gaabo, kultaa, biiri dɔgebo, ane toma. Azuŋ te zaa maŋ soore te menne ka: ‘Gbɛɛ na maŋ maŋ derɛ N zemmo poɔŋ na wuleeŋ ka N sagedieŋ ka a koŋ kɔɔre a donɛɛ ŋa na wa pare gaaŋ kyɛ ka Naaŋmen dompaalaa na wa bee? Bee N maŋ erɛɛ N yɛlɛ aŋa noba na naŋ ba sagedi ka a dompaalaa na waŋ na?’ (Mat. 6:19, 20; Luk. 12:16-21) Ka te sagediibuŋ e kpeɛŋaa ka a dompaalaa na waŋ, te na maŋ derɛɛ gbɛ-sonne te zemmo poɔŋ.

5-6. Ananso la wala aŋ seŋ ka te taa sagediibu wagre kpeɛne saŋa? Manne wuli.

⁵ Te maŋ tuoree yelkpeɛne naŋ fɛre ka te taa sagediibu naŋ e kpeɛŋaa. Aminekaŋaŋ, te na baŋ tuoree dɔgɛɛ, ka baaloŋ faa kaŋa naŋ ba taa sammo nyɔge te, bee ka te tuore yɛlɛ mine naŋ na baŋ kyoɔre te eŋɛ. Aminekaŋaŋ a piilee saŋa na, te na eɛ siri ka te are a yelkpeɛŋaa noɔreŋ. Kyɛ a yelkpeɛne ŋa taa na baŋ bebeŋ a kɔɔre, azuŋ a na fɛreŋ ka te taa sagediibu naŋ e kpeɛŋaa kyɛ na toɔ̃ puoro Jehoova ne popeɛloŋ.​—Uro. 12:12; 1 Pit. 1:6, 7.

⁶ Ka teneeŋ wa tuoro yelkpeɛŋaa kaŋa, saŋa kaŋa te na maŋ teɛre ka Jehoova dompaalaa na daŋ koŋ wa zaa. Lɛ wuleeŋ ka te sagediibu balɛɛŋ bee? Aminekaŋaŋ lɛ naane. Aŋa mannoo poɔŋ, seɛ̃ saŋa ka saaŋ wa miire yaga zaa te maŋ teɛre ka uonii daŋ koŋ la yi. Kyɛ a baaraa zaa uonii maŋ la yiŋ. Lɛ meŋ la, ka te eŋɛŋ wa kyoɔre te na maŋ teɛre ka a dompaalaa daŋ koŋ wa zaa. Ka te sagediibuŋ e kpeɛŋaa, te na baŋeŋ ka Naaŋmen nɔ-ennee zaa na paaliŋ. (Yiem. 94:3, 14, 15; Hib. 6:17-19) Ka teneeŋ taa ana sagediibu na tɔ, te na baŋ de la Jehoova puoruu de weɛ te zemmo poɔŋ.

7. Bo teɛroŋ la aŋ ba seŋ ka te taa?

⁷ Aseŋ ka te taa sagediibu naŋ e kpeɛŋaa sɛre kyɛ na baŋ toŋ a naaŋ moɔloo toma. Noba yaga zie zaa te naŋ maŋ manna a duorisoŋ korɔ na maŋ teɛreŋ ka “yelnoore” na te naŋ manna kyaare Naaŋmen dompaalaa na koŋ baŋ nyɛ eebo. (Mat. 24:14; Izik. 33:32) Kyɛ aseŋ ka te kaara soŋ a ta wa bonnɔ Jehoova aŋa lɛ na ba naŋ erɛ na. Ka teneeŋ na toɔ̃ e lɛ, aseŋ ka te moɔ̃ niŋe eŋnɛ te sagediibu faŋa. Yɛ e ka te nyɛ soe ata mine teŋ na baŋ tu kyɛ e lɛ.

MAŊ TEƐRƐ A YƆƆDEƐBO YƐLƐ GƐRƐ TƆƆRE

8-9. Ka teneeŋ teɛrɛ a yɔɔdeɛbo yɛlɛ gɛrɛ tɔɔre sobuo aŋ na baŋ eŋ te sagediibu faŋa?

⁸ Sori na kaŋa teŋ na baŋ eŋ te sagediibu faŋa la ka te maŋ teɛrɛ a yɔɔdeɛbo yɛlɛ gɛrɛ tɔɔre. A yɔɔdeɛbo vɛŋɛɛŋ teŋ sagedi ka Naaŋmen nɔ-ennee zaa na nyɛɛ eebo. Ka teneeŋ mãã te menne a teɛre ananso Jehoova naŋ ko te a yɔɔdeɛbo ane sane o naŋ ŋmɛ kyɛ toɔ̃ e lɛ na, a na eŋɛɛ te sagediibu faŋa ka, noɔre na Naaŋmen naŋ eŋ ka o na ko teŋ nyɔvore naŋ ba taa baaraa a dompaalaa poɔŋ na, na nyɛɛ eebo meŋɛmeŋɛ. Ananso la wala teŋ yel lɛ?

⁹ Bo sareka ka Jehoova iri kyɛ toɔ̃ ko te a yɔɔdeɛbo? Jehoova da toŋɛɛ o Bidɔɔ dɛndɛŋ oŋ nɔŋ yaga zaa na oŋ yi sazu wa a donɛɛ ŋa zu baŋ dɔgoo aŋa nensaalaa. Saŋa na Yezu naŋ da be a donɛɛ zuŋ kyɛ na, o da tuoree yelkpeɛne yaga. A baaraa zaa o da di la dɔgɛɛ kyɛ kpi kũũ naŋ beɛrɛ yaga zaa. Nyɛ sane Jehoova naŋ da ŋmɛ seŋ kyɛ ko te a yɔɔdeɛbo! Te Naaŋmen naŋ  taa nɔmmo na daŋ koŋ sage tere sori ka o Bidɔɔ wa di dɔgɛɛ a kyɛ kpi, ka lɛ na vɛŋ ka te nyɛ zemmo naŋ soma yuomo awala mine yoŋ kyɛ kpi. (Gyn. 3:16; 1 Pit. 1:18, 19) Jehoova naŋ vɛŋ ka o Bidɔɔ nɔnaa wa kpi ko te na yɛŋ, lɛ zaa naŋ la, O na ko teŋ nyɔvore naŋ ba taa baaraa a dompaalaa poɔŋ.

MAŊ TEƐRƐ JEHOOVA KPEƐ̃O YƐLƐ

10. Aŋa lɛ Efesu 3:20 naŋ yel na, bo yɛlɛ ka Jehoova maŋ toɔ̃ e?

¹⁰ Sori ayi soba teŋ na baŋ eŋ te sagediibu faŋa la ka te maŋ teɛrɛ Jehoova kpeɛ̃o yɛlɛ. O taa la a kpeɛ̃o ka o paale noɔre zaa o naŋ eŋ. Noba yaga zenɛ ŋa maŋ teɛrɛŋ ka te daŋ koŋ baŋ nyɛ nyɔvore naŋ ba taa baaraa a dompaalaa poɔŋ. Kyɛ gbɛɛ yaga, yɛlɛ na Jehoova naŋ maŋ eŋ noɔre ka o na eŋ na, nensaaleba koŋ baŋ e a. O na baŋ eɛ ana yɛlɛ na zaa bonso O na la Kpeɛ̃o Zaa Daana. (Joob 42:2; Mak. 10:27) Azuŋ a ba e te seɛlee o naŋ maŋ eŋnɛ te nɔɛ ka o na eɛ yɛlɛ mine naŋ e nɔmãã ko te na.​—Kanne Efesu 3:20.

11. Manne Naaŋmen noɔre kaŋa o naŋ eŋ aŋ e seɛlee yaga yɛlɛ. (Kaa a daga ŋa, “ Nɔ-ennee Yɛlɛ Naŋ E Seɛlee Yaga Naŋ Nyɛ Eebo.”)

¹¹ Te nyɛ yɛlɛ na mine Jehoova naŋ da eŋ noɔre ko o noba ka o na e ko baŋ aŋ da waa ŋa a koŋ baŋ nyɛ eebo na. O da yelko la Aboraham ane Saara ka ba na dɔgɛɛ bidɔɔ aneazaa ka ba da nyaaŋɛɛŋ. (Mun. 17:15-17) O da la yelko la Aboraham ka ba na de la Keenan teŋgane na ko o yaane. Kyɛ saŋa na Aboraham yaane naŋ e a Izerayɛl deme naŋ da be gbaŋgbaaloŋ poɔŋ Igyipiti paaloŋ na, a da waa ŋa a noɔre emmo ŋa daŋ koŋ baŋ nyɛ eebo. Kyɛ a da nyɛɛ eebo. Yuomo mine puoriŋ, Jehoova da yelko la Elizabɛl ka o na dɔgɛɛ bie aneazaa ka o da nyaaŋɛɛŋ. O da yelko la Mareya naŋ da e pɔge naŋ ba baŋ dɔɔ ka o na dɔgɛɛ ona Naaŋmen Bidɔɔ. Ana vɛmeŋ ka noɔre kaŋa Naaŋmen naŋ da eŋ yuomo turituri naŋ pare a Eedin gaadin na poɔŋ nyɛ eebo!​—Mun. 3:15.

12. Bo faŋa emmo ka Joosua 23:14 ane Aizeeya 55:10, 11 korɔ te a kyaare Jehoova kpeɛ̃o?

¹² Ka teneeŋ wa teɛre nɔɛ na zaa Jehoova naŋ eŋ, ane lɛ o naŋ paalaa na, a maŋ vɛmeŋ teŋ nyɛ lɛ o naŋ taa kpeɛ̃o seŋ. Lɛ na baŋ soŋ teŋ ka te sagediibu te naŋ taa a dompaalaa noɔre emmo na e kpeɛŋaa yaga. (Kanne Joosua 23:14; Aizeeya 55:10, 11.) A maŋ lɛ soŋ teŋ teŋ e siri ka te soŋ noba ka ba nyɛ ka, a dompaalaa nɔ-ennaa na ba e gaŋzannoo, a na nyɛɛ eebo meŋɛmeŋɛ. Jehoova meŋɛ la da yel ŋaa a kyaare a sazu paalaa ane dompaalaa ka: “A yelbie ama taa la dɛloo kyɛ waa yelmeŋɛ.”​—Yel. 21:1, 5.

MAŊ ERƐ YƐLƐ NAŊ NA TAGE BO PEƐLE JEHOOVA

13. Sobuo ka a lantaapuoruu lammore na baŋ eŋ ho sagediibu faŋa? Wuli a muni.

¹³ Sori ata soba teŋ na baŋ tu kyɛ eŋ te sagediibu faŋa la ka te maŋ erɛ yɛlɛ naŋ na tage te peɛle Jehoova. Aŋa mannoo poɔŋ, ka teneeŋ wa gaa te lantaapuoruu lammore na te maŋ nyɛɛ tɔnɔ yaga. Anna, de la yuomo yaga a toŋ a wagre zaa puoruu toŋ tɛɛtɛɛ yaga; o yeleeŋ ka: “Lammore gaabo maŋ soŋ maŋ ka N sagediibu maaleŋ e kpeɛŋaa yaga. Ka te yɔɔdɔɔ naŋ terɛ a yelyaga na gbaŋ ba baŋ wulibo soŋ, bee ka o naŋ ba yel yelpaalaa kaŋa gba maŋ ba baŋ, kyɛ N maŋ kyɛllɛŋ ka lɛ maŋ soŋ ma maŋ baŋ a Baabole soŋ aŋ eŋ N sagediibu meŋ faŋa.” b Ka teneeŋ wa kyɛllɛ wonno te yɔɔmine meŋ nɔɛ iribo a lammo saŋa, a na baŋ eŋɛɛ te sagediibu faŋa.​—Uro. 1:11, 12; 10:17.

14. Sobuo ka a naaŋ moɔloo maŋ eŋ te sagediibu faŋa?

 ¹⁴ Ka teneeŋ wa gɛrɛ a naaŋ moɔloo, a maŋ eŋɛɛ te sagediibu faŋa. (Hib. 10:23) Barbara meŋ naŋ de yuomo naŋ gaŋ 70 puore Jehoova yeleeŋ ka: “N meŋ nyɛɛŋ ka a naaŋ moɔloo toma eŋnɛɛ sagediibu faŋa yaga zaa. Ka maaŋ wa yele Jehoova nɔ-ennee yɛlɛ korɔ noba, a maŋ eŋnɛɛ N sagediibu meŋ faŋa yaga.”

15. Ka teneeŋ maŋ zanna boma te meŋɛŋ, sobuo aŋ na baŋ eŋ te sagediibu faŋa? (Kaa a fotori meŋ.)

¹⁵ Yelkaŋa naŋ na baŋ lɛ eŋ te sagediibu faŋa la ŋa: te meŋɛ boma zannoo. Susan yeleeŋ ka a maŋ somooŋ yaga zaa ka o naŋ sɛgre wagre biŋ a maŋ de zanna boma. O yelka: “Koseɛradaare N maŋ zannɛɛ a Kaakaara Ziduoruu Zannoo teŋ na zanne a daa naŋ waana na poɔŋ. Atɛnɛɛ ane Atalatadaare N maŋ sɛgrɛɛ N meŋɛ ko a daagbuli poɔ lammo. A bebie na naŋ kyɛre na N maŋ zannɛɛ N meŋɛ boma.” Susan naŋ tuuro ana sori ŋa a zanna boma na, a eŋnɛɛ o sagediibu faŋa yaga. Irene meŋ naŋ de yuomo yaga toŋ toma a te toma zaa zi-kpoŋ na meŋ nyɛɛŋ ka ka o naŋ wa zanna Baabole daŋyelbo yɛlɛ a maŋ eŋɛɛ o sagediibu faŋa yaga zaa. O yelka: “N noɔre maŋ mãã ane lɛ na Jehoova daŋyelbo zaa naŋ maŋ nyɛ eebo nɛnɛ na.” c

“BOZUŊ O NA PAALIŊ”

16. Ananso la wala ka faŋa na Jehoova naŋ da eŋ Habaakuk na taa tɔnɔ ko te zenɛ? (Hiburu 10:36, 37)

¹⁶ Jehoova puorebiiri mine de la yuomo yaga a kyɛnlɛ a donfaa ŋa baaroo. Kyɛ noba yaga maŋ teɛreŋ ka, a donɛɛ ŋa baaroo kɔɔrɔŋ te gaali. Jehoova baŋɛɛŋ ka o puorebiiri mine meŋ taa la ana teɛroŋ ŋa tɔ, azuŋ oŋ da eŋ o daŋyele Habaakuk faŋa ka: “Bozuŋ a nyaabo biŋeeŋ ko wagre  kaŋa, kyɛ a baaraaŋ o na yelee yɛlɛ, o koŋ ŋma zirii. Haali ka o naŋ naari, kyɛ ho kyɛnloo, bozuŋ o na paaliŋ. O koŋ naari.” (Hab. 2:3) Habaakuk yoŋ la ka Jehoova da yel ana faŋa emmo yɛlɛ na ko bee? Kyɛbee te meŋ poɔyɛŋ? Jehoova da eŋɛɛ a bitontona Pɔɔl faŋa, oŋ sɛge ana yɛlɛ na ko Kristabiiri naŋ de eŋnyagroŋ a kaara a dompaalaa soriŋ. (Kanne Hiburu 10:36, 37.) Yelmeŋɛ la, ka teneeŋ taa teɛroŋ ka Jehoova nɔ-ennee na o naŋ eŋ te na kɔɔrɔŋ gba, “o na paaliŋ. O koŋ naari!”

17. Sobuo ka te yɔɔpɔge kaŋa de kawane na Jehoova naŋ da ko Habaakuk na toŋ ne toma?

¹⁷ Jehoova puorebiiri yaga deɛ Jehoova kawane ŋa toŋ ne toma a “kyɛnloo” yuomo yaga. Aŋa mannoo poɔŋ, Louise da piili puoree Jehoova a yi yuoni 1939. O yeleeŋ ka: “N da teɛre ka Hammagedon na waŋ ka N naŋ ba baare high school. Kyɛ lɛ da ba e. A yuomo ŋa zaa poɔŋ N da maŋ kannɛɛ sɛgre mine maŋ da boɔlɔ ka ‘sɛgre naŋ kyaare kyɛnloo yɛlɛ.’ Ana Baabole poɔ sɛgre ŋa kyaarɛɛ Noowa, Aboraham, Gyoosɛf, ane ba taaba mine naŋ da kyɛnle kɔɔre, sɛre kyɛ nyɛ kyɔɔtaa na Jehoova naŋ da eŋ noɔre ka o na ko baŋ na. Maaŋ ane N taaba mine naŋ sagedi kpeɛŋaa ka a nɔ-ennee zaa na paaliŋ na soŋ teŋ teŋ nyɛ ka a dompaalaa peɛlɛɛŋ.” Noba yaga zie meŋ naŋ de yuomo yaga puore Jehoova taa la a teɛroŋ ŋa!

18. Ka teneeŋ maŋ kaara Naaŋmen bonmaalee, sobuo aŋ na baŋ eŋ te sagediibu faŋa a kyaare a dompaalaa naŋ waana na?

¹⁸ Yelmeŋɛ la, a dompaalaa naŋ ba wa sɛre. Kyɛ hooŋ leɛteɛre nyɛ boma na naŋ bebe pampana, ŋmarbie, teere, donne, ane ho taa nensaaleba. Neɛzaa kyebe a na baŋ yelka ana boma ŋa ba bebe meŋɛmeŋɛ, aneazaa ka saŋa kaŋa naŋ pare a da ba kyebe. Kyɛ a bebeŋ zenɛ ŋa, bonso Jehoova la maalaa aŋ wa bebe. (Mun. 1:1, 26, 27) Te Naaŋmen na meŋ la eŋɛɛ noɔre ka o na maalɛɛ dompaalaa. O na paalɛɛ ana noɔre ŋa meŋ. A dompaalaa poɔŋ, nensaaleba na taa la nyɔvore naŋ ba taa baaraa, a taa laafeeloŋ naŋ soma ane popeɛloŋ. Te na baŋ sagediŋ ka a dompaalaa na waɛ saŋa na Naaŋmen naŋ sɛgre biŋ ka o wa na.​—Aiz. 65:17; Yel. 21:3, 4.

19. Wala hoŋ na baŋ e a eŋ ho sagediibu faŋa?

¹⁹ Kyɛ pampana ŋa yɛŋ, de wagre ho naŋ taa na a eŋnɛ ho sagediibu faŋa. Maŋ wulo nimipa a korɔ a yɔɔdeɛbo. Maŋ teɛrɛ Jehoova kpeɛ̃o yɛlɛ. Maŋ erɛ yɛlɛ naŋ na vɛŋ ka ho tage peɛle Jehoova. Ka hooŋ erɛ lɛ, ho meŋ na poɔ la “banaŋ naŋ tu ba yeldeebo ane kannyiri diibu a di a gbandiruŋ na ba naŋ eŋ noɔre ko ba” na.​—Hib. 6:11, 12; Uro. 5:5.