1. Ananso la wala teŋ maŋ iri soorebie a lammo saŋa?

 ANANSO la wala teŋ maŋ gɛrɛ lantaapuoruu lammore? Ananso meŋɛmeŋɛ la ka te pugi Jehoova. (Yiem. 26:12; 111:1) Te maŋ lɛ gaa la a lammore ka te te eŋ taa faŋa a wagre kpeɛne ŋa saŋa. (1 Tɛs. 5:11) Ka teneeŋ wa zɛgi te nu a iri soorebie nɔɛ a lammo saŋa, te maŋ toɔ̃ eɛ a yɛlɛ ŋa ayi zaa.

2. Bo saŋa la teŋ na baŋ iri soorebie nɔɛ a lammo saŋa?

² Daa la daa zaa, te maŋ nyɛɛ apoɔsoe ka te iri soorebie nɔɛ a lammo saŋa. Aŋa mannoo poɔŋ, a daa baaroo saŋa, te maŋ nyɛɛ a vuo ka te iri soorebie nɔɛ a lantaapuoruu Kaakaara Ziduoruu Zannoo saŋa. A te daa gbuli poɔ lammo saŋa meŋ, te na baŋ iree soorebie nɔɛ a Baabole Poɔ Yelsonne zie na, a Lantaapuoruu Baabole Zannoo, ane a lammo saŋa ziiri mine ba naŋ maŋ soore soorebie na.

3. Boŋ na baŋ vɛŋ ka a e kpeɛŋaa ko te ka te iri soorebie nɔɛ, ka sobuo ka Hiburu 10:24, 25 na baŋ soŋ te?

³ Te zaa maŋ boɔrɔŋ ka te pugiro Jehoova a kyɛ eŋnɛ te yɔɔmine faŋa. Kyɛ ka teneeŋ wa boɔrɔ ka te iri soorebie nɔɛ a lammo saŋa, te maŋ tuoree yelkpeɛne mine. Aminekaŋaŋ, dabeɛ̃ na maŋ kpɛ teŋ ka te iri soorebie nɔɛ, bee aminekaŋaŋ meŋ, te maŋ boɔrɔŋ ka te ire soorebie nɔɛ kyɛ ka teneeŋ wa zɛgi te nu ba ba maŋ boɔle te. Boŋ na baŋ soŋ te? Te na baŋ nyɛɛ a soorebiri ŋa noɔre iribo yi a bitontona Pɔɔl lɛtɛ na o naŋ da sɛge ko a Hiburu Kristabiiri na.  Saŋa na oŋ da wulo lɛ aŋ e nimizeɛ ka te maŋ laŋna taa na, o da yeleeŋ ka te maŋ mɔɔ kyɛ “soŋnɔ taa.” (Kanne Hiburu 10:24, 25.) Ka teneeŋ baŋ ka, yelfẽẽ zaa teŋ na yel kyɛ a na toɔ̃ eŋɛɛ te yɔɔmine faŋa, lɛ yɛŋ te koŋ lɛ zoro dabeɛ̃ ka te zɛgi te nu a iri soorebie nɔɛ. Ka ba naŋ ba maŋ boɔle te gbɛɛ yaga ka te ire soorebie nɔɛ, te na maŋ taa la popeɛloŋ te taaba mine meŋ naŋ nyɛ a vuo ka ba iri soorebie nɔɛ na.​—1 Pit. 3:8.

4. Bo yɛlɛ ata teŋ na zanne a zannoo ŋa poɔŋ?

⁴ A zannoo ŋa poɔŋ te na zanne nyɛɛ lɛ teŋ na baŋ eŋnɛ taa faŋa ka teneeŋ be lantaapuoruu naŋ e bile poɔŋ. A la nyɛ lɛ teŋ na baŋ eŋnɛ taa faŋa ka teneeŋ be lantaapuoruu naŋ e kpoŋ poɔŋ ka noba yaga maŋ zɛgi ba nu ka ba iri soorebie nɔɛ na. A baaraa zaa te na nyɛɛ lɛ te soorebie nɔɛ iribo yelbie naŋ na baŋ eŋ te yɔɔmine faŋa.

5. Wala teŋ na baŋ e a eŋ te taaba faŋa ka teneeŋ ba e yaga a Lammozieŋ?

⁵ Te yɔɔmine yaga ba maŋ kye lantaapuoruu naŋ e bile poɔŋ a na iri soorebie nɔɛ. Azuŋ saŋa kaŋa, ka te yɔɔdɔɔ na naŋ kaara a zannoo zu naŋ wa soore soorebiri, o maŋ are kyɛnleŋ fẽẽ sɛre ka neɛ kaŋa pãã zɛgi o nu. Ka a naŋ wa waa lɛ, a lammo ba maŋ noma bee a eŋnɛ faŋa. Boŋ hoŋ na baŋ e? Maŋ mɔɔrɔ ka ho zɛgrɛ ho nu gbɛɛ yaga. Ka hooŋ erɛ lɛ ho na maŋ eŋɛɛ ho yɔɔmine faŋa ka ba meŋ e lɛ.

6-7. Ka teneeŋ maŋ zoro dabeɛ̃ ka te iri soorebie nɔɛ, boŋ na baŋ soŋ ŋmaa te dabeɛ̃ na bare?

⁶ Noba mine maŋ zoree dabeɛ̃ ka ba iri soorebie nɔɛ. Bo hoŋ na baŋ e ka a naŋ maŋ erɛ bo dabeɛ̃ ka ho zɛgi ho nu a iri soorebiri noɔre? Ka hooŋ na toɔ̃ eŋ ho yɔɔmine faŋa yɛŋ, aseŋ ka ho bɔ soe mine hoŋ na baŋ tu a ŋmaa ho dabeɛ̃ na bare. Wala hoŋ na toɔ̃ e lɛ?

⁷ Ho na baŋ nyɛɛ yɛlɛ mine naŋ na baŋ soŋ bo a yi A Kaakaara Ziduoruu gama na mine poɔŋ. b Aŋa mannoo poɔŋ maŋ nare ho meŋɛ soŋ. (Yeng. 21:5) Ka hooŋ baŋ a zannoo poɔ yɛlɛ soŋ, a na eɛ mɔlɔ ko bo ka ho zɛgi ho nu a iri soorebie nɔɛ. A maŋ vɛŋ ka ho noɔre iribo meŋ e ŋmaaŋmaa. (Yeng. 15:23; 17:27) Ka hooŋ iri soorebiri noɔre naŋ e ŋmaaŋmaa dabeɛ̃ koŋ kpɛ bo yaga. Ka hooŋ e lɛ, a na eɛ mɔlɔ ko ho yɔɔmine ka ba baŋ a tɛgɛ soŋ gaŋ hoŋ na yel yɛlɛ yaga. Ka hooŋ de ho meŋɛ yelbie iri soorebiri noɔre, a na wuliŋ ka ho narɛɛ ho meŋɛ soŋ a baŋ a zannoo meŋ poɔ yɛlɛ soŋ.

8. Ka teneeŋ mɔɔrɔ te mɔɔre zaa wala ka Jehoova maŋ nyaa?

⁸ Kyɛ ka hooŋ de ana yɛlɛ ŋa zaa toŋ ne toma kyɛ ka dabeɛ̃ naŋ erɛ bo ka ho zɛgi ho nu a iri soorebie nɔɛ meŋ? Baŋ ka Jehoova niŋe paɛ̃ ne ho mɔɔre na zaa ho naŋ mɔɔrɔ na. (Luk. 21:1-4) Jehoova ba boɔrɔ ka te e yɛlɛ a gaŋ te faŋa. (Fil. 4:5) Baŋ yɛlɛ na hoŋ na baŋ e, a de ana yɛlɛ na biŋ ho nimitɔɔreŋ, a puore sɔre Jehoova ka o ko bo sukyiri maaroŋ meŋ. Ho na baŋ piiliŋ a de biŋ ho nimitɔɔreŋ ka ho maŋ iri soorebiri noɔre naŋ e ŋmaaŋmaa lɛ.

9. Ananso la wala aŋ na baŋ e kpeɛŋaa saŋa kaŋa ka te iri soorebie nɔɛ lantaapuoruu naŋ e bɛrɛ pooreŋ?

⁹ Ho meŋ yelkpeɛne na eɛ a yoŋ ka ho lantaapuoruuŋ taa naaŋ moɔleba yaga.  Aminekaŋaŋ te yɔɔmine yaga na maŋ zɛgɛɛ ba nuuri ka ba iri soorebie nɔɛ ka lɛ vɛŋ ba koŋ maŋ boɔle bo. Aŋa mannoo poɔŋ, Danielle da maŋ nɔŋeŋ ka o ire soorebie nɔɛ a lammo saŋa. c O nyɛɛŋ ka a poɔ la o puoruu yɛlɛ poɔŋ, a e sori oŋ na baŋ tu kyɛ eŋ o yɔɔmine faŋa, a kyɛ baŋ eŋ o meŋɛ sagediibu faŋa a kyaare a Baabole wuluu meŋ. Kyɛ saŋa na oŋ wa yi zie na o naŋ da be a gaa lantaapuoruu naŋ e kpoŋ na, ba da ba maŋ boɔloo gbɛɛ yaga ka o iri soorebie nɔɛ. O da yeleeŋ ka: “N poɔ zaaŋ da sãã, a da waa ŋa N naŋ kɔŋ poɔsori kaŋa. Wagre zaa ka ba naŋ ba maŋ boɔlɔ bo gbɛɛ yaga, ana baŋ vɛmeŋ ka ho piili teɛrɛ ka ba baŋɛɛ perɛ.”

10. Bo yɛlɛ mine teŋ na baŋ e a toɔ̃ nyɛ vuo a iri soorebie nɔɛ a lammo saŋa?

¹⁰ Danielle yɛlɛ ŋa mine daŋ pɔge boŋ zaa? Ka lɛ na, aminekaŋaŋ ka hooŋ ba kaa soŋ, ho na baliŋ a bare soorebie nɔɛ iribo a kyɛ maŋ ziŋ kyɛllɛ a lammo yoŋ. Ta vɛŋ ka ho eŋɛ kyoɔre, naŋ moɔ̃ niŋe a ire soorebie nɔɛ. Boŋ hoŋ na baŋ e? Yelkaŋa naŋ na baŋ soŋ la, maŋ nare ho meŋɛ ka ho iri soorebie yaga nɔɛ a lammo saŋa. Azuŋ ka ba naŋ ba boɔle bo ka ho iri soorebie nɔɛ a piilee saŋa, kyɛ ho naŋ na taa la a vuo ka ho e lɛ a lammo naŋ gɛrɛ poɔŋ. Ka hooŋ wa zanna a Kaakaara Ziduoruu a nara ho meŋɛ, maŋ teɛre nyɛ lɛ a wɛlbo kaŋa zaa naŋ kyaare a zannoo yelzu. Ka hooŋ e lɛ a na soŋ boŋ ka ho toɔ̃ iri soorebiri noɔre naŋ soma a lammo saŋa. Ane meŋ, ho na baŋ nare la ho meŋɛ ka ho iri soorebiri noɔre a zannoo ziiri naŋ e kpeɛne yaga ka noba wuli a muni na. (1 Kor. 2:10) Ananso la wala? Bonso, aminekaŋaŋ noba yaga koŋ zɛgi ba nuuri ana saŋa. Kyɛ, ka hooŋ de ana yɛlɛ ŋa zaa toŋ ne toma kyɛ naŋ ba nyɛrɛ a vuo a na iri soorebiri noɔre? Ho na baŋ daŋ gaa la te yɔɔdɔɔ naŋ na kaa a zannoo zu na zie a te wuluu soorebiri na hoŋ na boɔrɔ ka ho iri o noɔre.

11. Boŋ ka Filipae 2:4 eŋnɛ te faŋa ka te erɛ?

¹¹ Kanne Filipae 2:4. A vooroŋ soŋ da soŋ la a bitontona Pɔɔl oŋ eŋ a Kristabiiri faŋa ka ba maŋ teɛrɛ ba taaba yɛlɛ. Sobuo teŋ na baŋ de ana sowuli na toŋ ne toma  a lammo saŋa? Te maŋ teɛre ka te taaba mine meŋ maŋ boɔrɔŋ ka ba iri soorebiri noɔre a lammo saŋa.

12. Bo sori kaŋa naŋ soma la teŋ na baŋ tu kyɛ eŋ te yɔɔmine faŋa a lammo saŋa? (Kaa a foto meŋ.)

¹² Te de ka ho neŋ ho zɔmenne diree dama, ho na deɛ a yɛlɛ zaa yel ka lɛ vɛŋ ka ba na yɛŋ koŋ nyɛ yelzaa yel bee? Ai ho koŋ e lɛ! Ho na boɔrɔŋ ka ba meŋ yel a yɛlɛ mine. Lɛ meŋ la, ka teneeŋ wa be Lammozieŋ, aseŋ ka te maŋ ko te yɔɔmine vuo ka ba meŋ iri soorebie nɔɛ. Yelmeŋɛ la, sori na kaŋa teŋ na baŋ eŋ te yɔɔmine faŋa la ka te maŋ ko ba sori ka ba iri soorebie nɔɛ a lammo saŋa a wuli ba sagediibu. (1 Kor. 10:24) Yɛ vɛŋ ka te nyɛ sori na teŋ na baŋ tu kyɛ e lɛ.

13. Wala hoŋ na baŋ e a ko ho taa mine meŋ vuo ka ba iri soorebie nɔɛ a lammo saŋa?

¹³ Yelkaŋa teŋ na baŋ lɛ e la ka, te na baŋ vɛmeŋ ka te noɔre iribo e ŋmaaŋmaa lɛ, ka lɛ vɛŋ ka wagre bebe ka noba mine meŋ iri soorebie nɔɛ. A lantaapuoruu nembɛrɛ ane naaŋ moɔleba naŋ kyili na baŋ eɛ ewuli soŋ a yɛlɛ ŋa poɔŋ. Ka hooŋ gbaŋ iri soorebiri noɔre naŋ e ŋmaa, ta maŋ yel a yɛlɛ zaa. Ka hooŋ yel a noɔre iribo yɛlɛ zaa ho taaba mine koŋ nyɛ a yɛlɛ mine yel. Aŋa mannoo poɔŋ, a wɛlbo ŋa noɔre iribo eɛ ayi. Azuŋ vɛŋ ka ho noɔre iribo e ŋmaaŋmaa lɛ; ta yel a yɛlɛ zaa naŋ bebe na. Ka ba naŋ daŋ boɔle bo ka ho iri yɛlɛ noɔre a wɛlbo ŋa poɔŋ, yel a noɔre iribo bonyeni yoŋ yɛlɛ.

14. Boŋ na baŋ soŋ te ka te baŋ gbɛre bo wala a naŋ seŋ ka te zɛgi te nu? (Kaa a foto meŋ.)

¹⁴ Hooŋ meŋɛ teɛre a yɛlɛ soŋ a nyɛ gbɛre bo wala na hoŋ na maŋ zɛgi ho nu a iri soorebie nɔɛ. Ka teneeŋ maŋ zɛgrɛ te nu wagre zaa, ana vɛmeŋ ka te yɔɔdɔɔ naŋ kaara a zannoo zu na boɔle te gbɛɛ yaga kyɛ bare noba mine naŋ naŋ ba iri soorebiri noɔre. Lɛ na baŋ vɛmeŋ ka noba mine eŋɛ kyoɔre ka ba zɛgi ba nu a iri soorebiri noɔre.​—Ikil. 3:7.

15. (a) Wala aŋ seŋ ka te e te yɛlɛ ka ba naŋ ba boɔle te ka te iri soorebiri noɔre? (b) Sobuo ka te yɔɔmine naŋ maŋ kaara a zannoo zu na na baŋ e a wuli ka ba teɛrɛɛ neɛzaa yɛlɛ? (Kaa a daga ŋa, “ Ka Hooŋ Wa Kaara A Zannoo Zu.”)

 ¹⁵ Ka te yɔɔmine yagaŋ wa zɛgi ba nuuri ka ba iri soorebie nɔɛ a lammo saŋa, aminekaŋaŋ te koŋ maŋ nyɛ vuo ka te iri soorebie nɔɛ aseŋ lɛ te naŋ da boɔrɔ na. Saŋa kaŋa, te yɔɔdɔɔ naŋ kaara a zannoo zu na gba koŋ boɔle te. A na baŋ vɛmeŋ ka te poɔ sãã, kyɛ a ba seŋ ka te suure iri neŋ te yɔɔdɔɔ na ka o naŋ ba boɔle te ka te iri soorebie nɔɛ.​—Ikil. 7:9.

16. Sobuo hoŋ na baŋ eŋ ho yɔɔmine naŋ iri soorebie nɔɛ na faŋa?

¹⁶ Ka hooŋ ba maŋ nyɛ a vuo ka ho iri soorebie nɔɛ lɛ hoŋ naŋ da boɔrɔ na, maŋ kyɛllɛ soŋ ka ho taaba mineŋ wa iri soorebie nɔɛ, ka a lammoŋ wa baare maŋ pugi ba ne ba noɔre iribo. Ka hooŋ e lɛ a na eŋɛɛ ho yɔɔmine faŋa yaga zaa aŋa lɛ ho noɔre iribo naŋ da naaŋ eŋ ba faŋa lɛ na. (Yeng. 10:21) Ka teneeŋ maŋ pugiro te yɔɔmine, a eɛ sori na kaŋa teŋ na baŋ eŋ ba faŋa.

17. (a) Sobuo ka bidɔgreba na baŋ soŋ ba biiri ka ba sɛgre noɔre iribo naŋ seŋ neŋ ba? (b) Aŋa lɛ a vidio naŋ wuli na, bo soe anaare la teŋ na baŋ tu sɛgre te noɔre iribo? (Kaa a foto meŋ.)

¹⁷ Sobuo teŋ na baŋ lɛ eŋ taa faŋa a Lammozieŋ? Ka hooŋ e bidɔgrɔ, maŋ soŋ ho biiri ka ba sɛgre soorebie nɔɛ iribo  naŋ seŋ neŋ ba yuomo. (Mat. 21:16) Saŋa kaŋa, a zannoo na maŋ kyaarɛɛ yelnimizeere aŋa kultaa yelkpeɛne yɛlɛ, ane yɛlɛ naŋ kyaare gyogri naŋ seŋ ka te taa. Kyɛ aminekaŋaŋ a wɛlbo bonyeni kaŋa bee ayi na bebeŋ ka ho bie na baŋ iri a noɔre. Soŋ ho biiri meŋ ka ba nyɛ ananso baŋ koŋ maŋ boɔle ba wagre zaa ka ba naŋ wa zɛgi ba nuuri. Ka hooŋ e lɛ, a na vɛmeŋ ka ba naŋ wa zɛgi ba nuuri kyɛ ka ba naŋ ba boɔle ba, ba eŋɛ koŋ kyoɔre.​—1 Tim. 6:18. d

18. Wala teŋ na baŋ e a ta tagra noba teɛroŋ waana te eŋɛŋ yaga ka teneeŋ wa terɛ noɔre iribo? (Yeng Yelibie 27:2)

¹⁸ Te zaa na baŋ sɛgrɛɛ noɔre iribo naŋ eŋnɛ Jehoova a kyɛ eŋnɛ te yɔɔmine meŋ sagediibu faŋa. (Yeng. 25:11) Aneazaa ka te na baŋ yelee te menne zemmo yɛlɛ mine fẽẽ, kyɛ te ta maŋ yele yɛlɛ yaga a kyaara te menne. (Kanne Yeng Yelibie 27:2; 2 Kor. 10:18) Kyɛ, aseŋ ka te maŋ de te teɛroŋ zaa eŋ Jehoova, o Yelbiri, ane o puorebiiri zaa eŋɛŋ. (Yel. 4:11) Kyɛ ka a soorebiriŋ yelka te manne te meŋɛ zemmo yɛlɛ yɛŋ, ana somaŋ ka te e lɛ, aŋa lɛ teŋ na nyɛ a wɛlbo naŋ tɔnne na poɔŋ.

19. (a) Ka teneeŋ maŋ teɛrɛ neɛzaa yɛlɛ a lammo saŋa boŋ na yi a poɔŋ wa? (Urom 1:11, 12) (b) Bo yɛlɛŋ noma korɔ bo a kyaare teŋ maŋ ire soorebie nɔɛ a lammo saŋa na?

¹⁹ Aneazaa ka bege zaa ba kyebe a wuli lɛ a naŋ seŋ ka te iri soorebie nɔɛ, kyɛ te zaa maŋ mɔɔ kyɛ tere soorebie noɔre iribo naŋ eŋnɛ faŋa. Lɛ na baŋ wuliŋ ka te maŋ zɛgrɛ te nu a terɛ noɔre iribo yaga. Bee ana baŋ wuliŋ ka, te maŋ vɛŋ ka te poɔ pɛle te taaba mine meŋ naŋ nyɛ a vuo ka ba iri yɛlɛ noɔre na. Ka teneeŋ maŋ teɛrɛ te taaba yɛlɛ yaga zaa a lantaapuoruu lammore saŋa, te na taa la popeɛloŋ a “teɛ taa yeldeebo.”​—Kanne Urom 1:11, 12.