1. Wala aŋ maŋ waa ko ba mine ka ba moɔle a duorisoŋ ko noba a naaŋ moɔloo poɔŋ? (Kaa a foto meŋ.)

 TE NAŊ nɔŋ te Saa naŋ be sazuŋ ane te taaba na zuŋ, te maŋ moɔlɛɛ a duorisoŋ korɔ te taaba a kyɛ sonnɔ ba ka ba wa baŋ Jehoova soŋ. Naaŋ moɔleba yaga maŋ taa la popeɛloŋ yaga a naaŋ moɔloo poɔŋ. Kyɛ ba mine meŋ ba maŋ taa popeɛloŋ. Bonso ba mine maŋ zoree vi, bee a teɛrɛ ka ba ba baŋ wulibo. A maŋ eɛ kpeɛŋaa ko ba mine meŋ ka ba gaa noba yie saŋa na ba naŋ ba toŋboɔle ba. Ba mine meŋ maŋ zoree dabeɛ̃ ka aminekaŋaŋ noba suuri na iri neŋ baŋ. Aneazaa ka ba nɔŋ la Jehoova yaga zaa, kyɛ a maŋ eɛ kpeɛŋaa yaga zaa ko te yɔɔmine ŋa ka ba manne a duorisoŋ ko noba ba naŋ ba baŋ. Kyɛ ba baŋɛɛŋ ka, a naaŋ moɔloo toma eɛ toma naŋ e nimizeɛ, azuŋ wagre zaa ba maŋ gaa la a naaŋ moɔloo. Jehoova poɔ maŋ pɛle neŋ baŋ yaga zaa!

2. Saŋa kaŋa ka hooŋ ba maŋ taa popeɛloŋ a naaŋ moɔloo poɔŋ ananso la wala aŋ ba seŋ ka ho eŋɛ maŋ kyoɔre?

² Saŋa kaŋa a yɛlɛ ŋa mine maŋ vɛŋeŋ hoŋ ba taa popeɛloŋ a naaŋ moɔloo poɔŋ bee? Ka lɛ na, ta vɛŋ ka ho eŋɛ kyoɔre. A naŋ maŋ e kpeɛŋaa ka ho neŋ noba ho naŋ ba baŋ di dama na wuleeŋ ka, ho taa la sigrimennoŋ a ba boɔrɔ ka ho maŋ tagra noba teɛroŋ waana ho eŋɛŋ yaga. Lɛ meŋ lɛ wuleeŋ ka ho ba boɔrɔ ka ho neŋ noba maŋ ŋmeɛrɛ nɔkpeɛne. Neɛzaa meŋ boɔbo naaneŋ ka o iri o taaba suuri, agaŋaazaa ka o naŋ wa boɔrɔ ka o e yelsoŋ kaŋa ko ba. Ho Saa naŋ be sazuŋ baŋɛɛ yeltuo na zaa ho naŋ tuoro, a boɔrɔ ka o soŋ bo meŋ. (Aiz. 41:13) A zannoo ŋa poɔŋ, te na zanne nyɛɛ yɛlɛ anuu mine naŋ na baŋ soŋ te ka te are a yelkpeɛne ŋa noɔreŋ a kyɛ taa popeɛloŋ a naaŋ moɔloo poɔŋ.

 VƐŊ KA NAAŊMEN YELBIRI NA EŊ BO FAŊA

3. Boŋ da soŋ a daŋyele Jeremaiya oŋ da moɔle a duoro ko a noba?

³ Yuomo mine naŋ pare, Naaŋmen yelbiri na da eŋ la o puorebiiri faŋa baŋ toɔ̃ toŋ toŋ tegrɛ mine. Aŋa mannoo poɔŋ, te nyɛ daŋyele Jeremaiya yɛlɛ. O da zoree dabeɛ̃ ka o moɔle a duoro na Jehoova naŋ da yelka o moɔle ko a noba na. Jeremaiya da yeleeŋ ka: “N ba baŋ yɛlɛ yelbo, bonso N eɛ bibile.” (Jer. 1:6) Boŋ da somoo oŋ da de nyaa moɔlɔ a duorisoŋ? Yɛlɛ na Jehoova naŋ da yelkoo naŋ da emooŋ faŋa. O yeleŋ ka: “Ka o yelihuŋ da be N sukyiriŋ aŋa vũũ naŋ dire a lari N kɔbɔŋ, maŋ da yɛ ane maŋ nyɔgoo taa.” (Jer. 20:​8, 9) Aneazaa ka noba na Jeremaiya naŋ da manna a duoro korɔ na yɛlɛ da eɛ kpeɛŋaa, kyɛ duoro na Jehoova naŋ da de koo ka o manne ko a noba na da leɛ emooŋ faŋa oŋ toɔ̃ toŋ a toma.

4. Bo tɔnɔ teŋ maŋ nyɛ ka teneeŋ wa kanna Naaŋmen Yelbiri na a kyɛ teɛrɛ o poɔ yɛlɛ gɛrɛ tɔɔre? (Kolosi 1: 9, 10)

⁴ Kristabiiri maŋ nyɛɛ faŋa emmo yi Naaŋmen Yelbiri na poɔŋ. Saŋa na bitontona Pɔɔl naŋ da sɛgrɛ lɛtɛ korɔ a Kolosi lantaapuoruu na, o da yeleeŋ ka ka o yɔɔmine naŋ zanna a Naaŋmen yelbiri na, a na soŋ baŋ ka ba “kyɛnɛ sori naŋ seŋ neŋ poɔŋ Jehoova nimitɔɔreŋ” a kyɛ naŋ “wɔnɔ wɔŋsonne toŋ soŋ zaa poɔŋ.” (Kanne Kolosi 1:​9, 10.) A naaŋ moɔloo toma poɔ la a toŋ sonne ŋa poɔŋ. Azuŋ, ka teneeŋ wa kanna Naaŋmen Yelbiri a kyɛ maŋ teɛrɛ a yɛlɛ gɛrɛ tɔɔre, a na eŋɛɛ te sagediibu faŋa a soŋ te ka te nyɛ ka teŋ na moɔlɔ a Naaloŋ duorisoŋ la e nimizeɛ a gaŋ yelzaa.

5. Wala teŋ na baŋ e a nyɛ tɔnɔ yaga yi te Baabole kannoo ane o zannoo poɔŋ?

⁵ Ka teneeŋ na nyɛ tɔnɔ yi Naaŋmen Yelbiri na poɔŋ, a ba seŋ ka te maŋ pagra ka teneeŋ wa kanna, a zanna, a kyɛ teɛrɛ o poɔ yɛlɛ gɛrɛ tɔɔre. Maŋ mãã ho meŋɛ. Ka hooŋ wa kanna sɛgre kaŋa a ba wa woŋ o muni soŋ, maŋ mɔɔ ka ho baŋ ana sɛgre na muni soŋ sɛre kyɛ baŋ tɔnne. A Watch Tower Publications Index kyɛbee a Research Guide for Jehovah’s Witnesses gama na na baŋ soŋ boŋ ka ho woŋ a muni soŋ. Ka hooŋ maŋ mãã ho meŋɛ saŋa na hoŋ wa kanna a Baabole, ana soŋ boŋ ka ho wa nyɛ ka, Naaŋmen Yelbiri na eɛ yelmeŋɛ. (1 Tɛs. 5:21) Ka hooŋ wa woŋ a muni soŋ, ana eɛ mɔlɔ ka ho manna yɛlɛ na ho naŋ zanna na korɔ noba mine meŋ.

MAŊ NARE HO MEŊƐ SOŊ KO A NAAŊ MOƆLOO

6. Bonso aŋ seŋ ka te maŋ nare te menne soŋ sɛre kyɛ gɛrɛ a naaŋ moɔloo?

⁶ Ka hooŋ wa nare ho meŋɛ soŋ sɛre kyɛ gɛrɛ a naaŋ moɔloo, a na maŋ eɛ mɔlɔ ka ho neŋ noba di dama a naaŋ moɔloo poɔŋ. Yezu da  maŋ soŋ la o potuuribo na baŋ nare ba menne soŋ zaa sɛre kyɛ oŋ da maŋ toŋ ba a naaŋ moɔloo poɔŋ. (Luk. 10:​1-11) Baŋ da de wulibo na Yezu naŋ da ko ba na toŋ neŋ toma zuŋ, ba da toɔ̃ toŋ la tonsonne yaga, aŋ da vɛŋ baŋ taa popeɛloŋ yaga zaa.—Luk. 10:17.

7. Wala teŋ na baŋ e nare te menne ko a naaŋ moɔloo? (Kaa a foto meŋ.)

⁷ Wala teŋ na baŋ e nare te menne ko a naaŋ moɔloo? Aseŋ ka te teɛre yɛlɛ te naŋ boɔrɔ ka te yeli na, a nyɛ lɛ teŋ na baŋ de te menne yelbie a mannaa ka a pɛle soŋ zaa. A na somaŋ ka te teɛre yɛlɛ ayi bee ata mine noba naŋ maŋ yele a naaŋ moɔloo poɔŋ a wuli ka ba ba boɔrɔ ka ba kyɛlle woŋ a duorisoŋ, a nyɛ sori na teŋ na baŋ tu kyɛ ka te ne ba di dama. Te na baŋ mãã la te menne, a more laare, a kyɛ wulo zɔmennoŋ gyogo korɔ noba na teŋ na pɔge a naaŋ moɔloo poɔŋ.

8. Sobuoŋ ka Kristabiiri waa yagraa dogre na bitontona Pɔɔl naŋ yel a yɛlɛ o yelmannaa poɔŋ na?

⁸ A bitontona Pɔɔl da de la yelmannaa kaŋa manne neŋ ferebo toma te naŋ taa a naaŋ moɔloo poɔŋ na a da yelka: “Te taa la a naboma ŋa yagraa dogre poɔ.” (2 Kor. 4:7) Bo la a naboma? Ana la a nyɔvo deɛ toma te naŋ tonɔ a moɔlɔ a Naaloŋ duorisoŋ. (2 Kor. 4:1) Boŋ la a yagraa dogre? A are ko la Naaŋmen puorebiiri naŋ moɔlɔ a duorisoŋ korɔ noba na. Pɔɔl saŋa na, dadiriba da maŋ de la dogre ba naŋ de yagre maale a de neŋ boma naŋ e nanee yaga zaa aŋa bondirii, dãã, ane libie a gaa ziiri a te di daa. Lɛ meŋ la ka Jehoova de a duorisoŋ naŋ e tegroŋ yaga zaa ko te. Jehoova na baŋ soŋ teŋ ka te nyɛ faŋa a naŋ kyɛnɛ moɔlɔ a duorisoŋ korɔ noba.

PUORE SƆRE JEHOOVA KA O KO BO NYAA

9. Wala teŋ na baŋ e zɔɔtoɔ̃ nensaalaa dabeɛ̃? (Kaa a foto meŋ.)

⁹ Saŋa kaŋa, te na maŋ zoree nensaalaa dabeɛ̃ bee a zoro dabeɛ̃ ka noba koŋ kyɛlle woŋ te yɛlɛ. Wala teŋ na baŋ e zɔɔtoɔ̃ a lɛ dabeɛ̃ ŋa? Yɛ vɛŋ ka te nyɛ puoro na a bitontonee naŋ da puore saŋa na baŋ da yelka ba ta moɔle a duorisoŋ na. Dabeɛ̃ da ba kpɛ ba baŋ bare a naaŋ moɔloo toma, kyɛ ba da sɔrɛɛ Jehoova ka o ko ba “sukyirikpagu ka ba naŋ moɔ̃ niŋe moɔlɔ [o] yelbiri na.” Jehoova da iree ba puoro na noɔre ko ba tɔntɔbaalɛ. (Tom. 4:​18, 29, 31) Ka nensaalaa dabeɛ̃ŋ wa vɛŋ ka a e kpeɛŋaa ko te ka te moɔle a duorisoŋ, te meŋ maŋ puore sɔre Jehoova sommo. Sɔre Jehoova ka o soŋ bo ka ho taa nɔmmo naŋ e kpeɛŋaa  ko nensaaleba, ka lɛ vɛŋ ka ho ta zoro dabeɛ̃ ka ho moɔle a duorisoŋ ko ba.

10. Wala ka Jehoova maŋ e a soŋ te teŋ toɔ̃ manna o yɛlɛ korɔ noba? (Aizeeya 43:​10-12)

¹⁰ Jehoova la kaa iri te ka te e o Sieree Deme, azuŋ o eŋɛɛ noɔre ka o na soŋ teŋ ka te taa nyaa. (Kanne Aizeeya 43:​10-12.) Te nyɛ soe anaare mine o naŋ maŋ tu kyɛ e lɛ. A dɛndɛŋ soba, ka teneeŋ wa be a naaŋ moɔloo poɔŋ, Yezu maŋ be la te zie. (Mat. 28:​18-20) A yiiloŋ soba, Jehoova kaa iree malekere ka ba sonnɔ te. (Yel. 14:6) A taaloŋ soba, Jehoova ko teŋ o vooroŋ soŋ na oŋ maŋ soŋ te teŋ teɛrɛ yɛlɛ na zaa te naŋ zanne na. (Gyn. 14:​25, 26) Anaare soba, Jehoova ko teŋ te yɔɔdɔba ane te yɔɔpɔgeba ka te ne ba maŋ gɛrɛ a naaŋ moɔloo. Jehoova ane te yɔɔmine sommo zuŋ, te na baŋ de la nyaa a moɔlɔ a duorisoŋ.

MAŊ LEƐRƐ HO YƐLƐ A KYƐ TAA TEƐROŊ NAŊ SOMA A KYAARE A NOBA

11. Wala teŋ na baŋ e nyɛ noba yaga ka teneeŋ wa be a naaŋ moɔloo poɔŋ? (Kaa a foto meŋ.)

¹¹ Ka hooŋ wa gaa naaŋ moɔloo a ba te pɔge noba yaga dieŋ ka lɛ ho eŋɛ maŋ kyoɔreŋ bee? Ho na baŋ leɛ soorɛɛ ho meŋɛ ka: ‘Yeŋ ka a noba ŋa zaa be pampana?’ (Tom. 16:13) ‘Ba be la toma zieŋ bee ba gaa la daa ka ba te di daa bee?’ Ka lɛ aŋ waa yɛŋ, aminekaŋaŋ ho na nyɛɛ noba yaga ka hooŋ gaa moɔlɔ a duoro sobɛrɛ noɔreŋ. Te yɔɔdɔɔ kaŋa yuori naŋ di Joshua yeleeŋ ka, “N maŋ nyɛɛ a vuo ka N moɔle a duorisoŋ ko noba ziiri noba yaga naŋ maŋ dire daa ane ziiri noba yaga naŋ maŋ tuuro.” O neŋ o pɔge meŋ maŋ pɔge la noba yaga dieŋ ka ba naŋ wa gaa a naaŋ moɔloo zimaanee saŋa ane Koseɛra daare ŋmenaa saŋa.—Efe. 5:​15, 16.

12. Wala teŋ na baŋ e baŋ yɛlɛ noba naŋ sagedi ane yɛlɛ naŋ e nimizeɛ ko ba ba zemmo poɔŋ?

¹² A piilee na ka neɛ kaŋaŋ ba boɔrɔ ka o kyɛlle ho yɛlɛ na, mɔɔ kyɛ baŋ yɛlɛ ba naŋ sagedi ane yɛlɛ naŋ e nimizeɛ ko ba ba zemmo poɔŋ. Ka Joshua ane o pɔge Bridget neŋ nobaŋ wa dire dama, ba maŋ daŋ de la a soorebie naŋ be te gambilii nimitɔɔreŋ na a piili a dama diibu. Aŋa mannoo poɔŋ, ka ba naŋ wa de Boŋ Gane La A Baabole? gambile na tonɔ neŋ toma, ba maŋ yeleeŋ ka: “Noba mine sagedieŋ ka a Baabole yi la Naaŋmen zie, kyɛ ba mine meŋ ba sage lɛ di. Wala hoŋ meŋ teɛre?” A lɛ ŋa maŋ soŋ baŋ ka ba neŋ noba piili dama diibu.

13. Ananso la wala teŋ na baŋ yelka te toŋɛɛ te ferebo toma haali ka nobaŋ ba kyɛllɛ a duorisoŋ? (Yeng Yelibie 27:11)

 ¹³ Ka teneeŋ moɔlɔ a duorisoŋ ka nobaŋ ba kyɛllɛ wono te yɛlɛ, kyɛ teneeŋ toŋɛɛ te ferebo toma. Bonso te toŋɛɛ toma na Jehoova ane o Bidɔɔ naŋ boɔrɔ ka te toŋ na—te di la sieree ko a noba. (Tom. 10:42) Ka teneeŋ gbaŋ ba nyɛ neɛzaa a na manne a duorisoŋ koo bee ka nobaŋ zagre ka ba kyɛlle woŋ a duorisoŋ te naŋ moɔlɔ na, kyɛ te na baŋ taa la popeɛloŋ bonso te baŋ ka te erɛɛ yɛlɛ naŋ pɛlɛ te Saa naŋ be sazuŋ poɔ.—Kanne Yeng Yelibie 27:11.

14. Ananso la wala teŋ na baŋ taa popeɛloŋ ka te yɔɔ kaŋaŋ wa nyɛ neɛ poɔ naŋ pɛle a yɛlɛ?

¹⁴ Te na baŋ taa la popeɛloŋ ka te yɔɔ kaŋaŋ wa nyɛ neɛ kaŋa poɔ naŋ pɛle a yɛlɛ. A Kaakaara Ziduoruu da de la te toma na manne neŋ bie naŋ bɔre teŋ boɔrɔ. Noba yaga zaa soŋɛɛŋ baŋ boɔrɔ a bie a gɛrɛ zie zaa baŋ na toɔ̃ ka ba te bɔ a bie. Ka ba naŋ wa nyɛ a bie, neɛzaa ane neɛ na naŋ nyɛ a bie na na taa la popeɛloŋ yaga zaa. Lɛ meŋ la, neɛzaa naŋ be a lantaapuoruu poɔŋ la maŋ soŋ ka neɛ wa leɛ Yezu potuuro. Neɛzaa naŋ be a lantaapuoruu poɔŋ seŋ ka o soŋ ka te moɔle a duorisoŋ, te zaa meŋ maŋ taa la popeɛloŋ ka neɛ kaŋaŋ wa piili waana a lammozie.

DE HO TEƐROŊ ZAA EŊ NƆMMO HO NAŊ TAA KO JEHOOVA ANE HO TAABA

15. Ka teneeŋ de yɛlɛ naŋ be Matio 22:​37-39 toŋ neŋ toma, sobuo aŋ na baŋ soŋ te ka te taa popeɛloŋ a naaŋ moɔloo poɔŋ? (Kaa a foto meŋ.)

¹⁵ Ka teneeŋ taa nɔmmo yaga zaa ko Jehoova ane te taaba, te na baŋ taa la popeɛloŋ yaga zaa a naaŋ moɔloo toma poɔŋ. (Kanne Matio 22:​37-39.) Hooŋ teɛre nyɛ lɛ Jehoova poɔ naŋ na pɛle seŋ ka o naŋ wa nyɛ ka te tonɛɛ toma na o naŋ ko te ka te tonɔ na, ane lɛ noba poɔ naŋ na pɛle yaga zaa ka ba naŋ wa piili zanna a Baabole! Teɛre baŋ ka noba na naŋ kyɛllɛ wono a duorisoŋ a de gbɛre ka ba na puoree Jehoova na baŋ nyɛɛ nyɔvore naŋ ba taa baaraa.—Gyn. 6:40; 1 Tim. 4:16.

16. Ka teneeŋ wa be te dieŋ a koŋ baŋ yi gba, kyɛ wala teŋ na baŋ e taa popeɛloŋ a naaŋ moɔloo toma poɔŋ? Tere yelmannaa kaŋa.

¹⁶ Yɛlɛ mine zuŋ ho koŋ baŋ yi ho dieŋ a gaa zie zaa bee? Ka lɛ na, de ho teɛroŋ zaa eŋ lɛ hoŋ na baŋ e wuli nɔmmo ko Jehoova ane ho taaba. A COVID-19 baaloŋ na saŋa, Samuel ane Dania da be la ba dieŋ, ba koŋ baŋ yi. A lɛ wagre kpeɛne na saŋa, ba da maŋ moɔlɛɛ a  duorisoŋ korɔ noba fone zuŋ, a sɛgrɛ lɛtare korɔ noba, kyɛ ka ba neŋ ba Baabole zannezanneba zanna boma Zoom zuŋ. Samuel da maŋ mannɛɛ a duorisoŋ korɔ noba na oŋ da maŋ pɔge a clinic na oŋ da gaa ka o te saŋ o cancer baaloŋ na. O yeleeŋ ka: “Ka teneeŋ wa tuoro yelkpeɛne te eŋɛ na baŋ kyoɔreŋ bee ka te bale, lɛ meŋ na baŋ vɛŋeŋ ka te sagediibu sigi teŋɛ. Azuŋ aseŋ ka te taa popeɛloŋ Jehoova puoruu toma poɔŋ.” Ba da naŋ tuoree a yelkpeɛne ŋa zaa kyɛ ka Dania meŋ da le aŋ vɛŋ oŋ gaŋ gado zuŋ kyuuri ata ka o koŋ baŋ iri. A da lɛ zeŋ gbɛrɛɛ sakere zuŋ kyuuri ayoɔbo. O yeleeŋ ka: “N da mɔɔrɛɛ N moɔbo zaa maŋ na toɔ̃. N da maŋ mannɛɛ a duorisoŋ korɔ a nɛɛsere naŋ da maŋ wa ka ba kaa ma na, ane noba naŋ da maŋ de boma mine wa ka ba ko te te dieŋ na. N neŋ pɔge kaŋa meŋ naŋ da tonɔ toma baaloŋ saŋ toma zie kaŋa meŋ da maŋ di la dama soŋ zaa.” Aneazaa ka Samuel ane Dania da koŋ baŋ lɛ toŋ seŋ lɛ baŋ da tonɔ na, kyɛ ba da mɔɔrɛɛ ba moɔbo zaa baŋ na toɔ̃ a da taa popeɛloŋ ne tɔnɔ na zaa baŋ da nyɛrɛ yire be na.

17. Wala hoŋ na baŋ e nyɛ tɔnɔ yaga zaa yi a sowuli naŋ be a zannoo ŋa poɔŋ na?

¹⁷ Mɔɔ ho moɔbo zaa ka ho de a yɛlɛ anuu ŋa zaa te naŋ zanne na tonɔ neŋ toma. Ana yɛlɛ anuu ŋa waa ŋa boma ba naŋ maŋ de lantaa a maale bondirii. Ka ba naŋ de ana boma ŋa zaa a lantaa a maale bondirii, a maŋ vɛŋeŋ aŋ noma yaga zaa. Ka teneeŋ de a sowuli ŋa zaa tonɔ neŋ toma, ana soŋ teŋ ka te nare te menne a toɔ̃ are eŋkyoɔre noɔreŋ a kyɛ taa popeɛloŋ yaga zaa a naaŋ moɔloo toma poɔŋ.