• “A da erɛ maŋ ŋa N serɛ naŋ sãã kultaa gbɛɛ yaga.”

• “Vi da maŋ kpɛ maŋ, maŋ teɛrɛ ka N ba veɛlɛ, a teɛrɛ ka N ba taa tɔnɔ meŋ.”

• “N da koŋ baŋ yel a yɛlɛ ko neɛzaa. A da maŋ dɔnnɔ maŋ yaga zaa, kyɛ neɛzaa ba kyebe a na dii N sukyiri.”

• “N da maŋ teɛrɛŋ ka Jehoova baga kye N zieŋ.”

A yɛlɛ ŋa zaa wulee lɛ aŋ maŋ dɔnnɔ pɔge yaga zaa ka o serɛŋ kaara pornography. Ka o serɛŋ de kyuuri yaga bee yuomo mine a sɔglɔ erɛ a yɛlɛ ŋa, a na baŋ eɛ kpeɛŋaa ka o pɔge sage o di. Pɔge kaŋa yeleeŋ ka: “A maŋ waa ŋa N ba baŋ N serɛ fẽẽ zaa. Yɛlɛ mine meŋ naŋ bebeŋ oŋ de sɔglɔ ma bee?”

Ba maalɛɛ a zannoo yɛlɛ ŋa ko pɔgeba sereba naŋ kaara pornography. a A zannoo wulee Baabole sowuli mine naŋ na baŋ dii a pɔge sukyiri, a vɛŋ ka o baŋ ka Jehoova nɔmooŋ a boɔrɔ ka o somoo. A somoo meŋ ka o taa sukyirimaaroŋ a kyɛ tage peɛle Jehoova. b

Aneazaa ka ho koŋ baŋ wuli ho serɛ yɛlɛ zaa naŋ seŋ ka o e, kyɛ yɛlɛ mine bebeŋ hoŋ na baŋ e ka a soŋ bo ka ho taa sukyirimaaroŋ. Te nyɛ yɛlɛ hoŋ na baŋ e.

Ta paana ho meŋɛ. Pɔge kaŋa na baŋ teɛrɛŋ ka o eɛ yelkaŋa naŋ ba soma anaŋ vɛŋ ka o serɛ kaara pornography. Alice c da teɛrɛ ka o ba veɛlɛ yaga ko o serɛ. O da maŋ teɛreŋ ka, ‘Ananso la wala ka N sɛre maŋ nɔŋ ka o kaara pɔge yobo mine a gaŋ oŋ na kaara ma?’ Pɔgeba mine maŋ paanɛɛ ba menne, a maŋ teɛrɛ ka ba yel-ereeŋ maŋ vɛŋ ka ba sereba naŋ moɔ̃ nimiri kaara pornography. Pɔge kaŋa na baŋ teɛreŋ ka o eɛ yelkaŋa naŋ ba soma anaŋ vɛŋ ka o serɛ kaara pornography. Danielle yeleeŋ ka, “N da teɛrɛ ka N suuri iri gaalii na la saana te kultaa na.”

Ka lɛ hoŋ meŋ wa teɛrɛ yɛŋ, baŋ ka Jehoova ba nyɛ ka hooŋ la vɛŋ ka ho serɛ erɛ yɛlɛ na o naŋ erɛ na. Gyimisi 1:14 yeleeŋ ka: “Kyɛ neɛ poboɔbo  yɛlɛ la maŋ bɛlle o, a nyɔge o taa.” (Uro. 14:12; Fil. 2:12) Jehoova ba paana bo, kyɛ o poɔ pɛlɛɛŋ ne yelmennoŋ na ho naŋ taa na.​—2 Tun. 16:9

Ka pɔge meŋ wa teɛrɛ ka o serɛ maŋ kaarɛɛ pornography o naŋ ba veɛlɛ yaga ko o serɛ zuŋ, a ba e yelmeŋɛ. Yelpeɛreba naŋ peɛrɛ a yɛlɛ ŋa taa yeleeŋ ka, dɔɔ naŋ kaara pornography maŋ taa la gaŋ ne taa vɔlaa na pɔge zaa naŋ koŋ baŋ mãã ana vɔlaa na.

Ta vɛŋ ka a yɛlɛ dɔnnɔ bo te gaali. Catherine yeleeŋ ka yɛlɛ na yoŋ oŋ da maŋ teɛrɛ wagre zaa la ka o serɛ maŋ kaarɛɛ pornography. Frances meŋ yeleeŋ ka: “Ka maaŋ ba baŋ zie N serɛ naŋ be, N eŋɛ ba maŋ maana ma. A yɛlɛ maŋ dɔnnɔ maŋ wagre zaa.” Pɔgeba mine meŋ yeleeŋ ka vi maŋ kpɛ baŋ ka ba naŋ wa nyɛ ba Kristabitaaba mine naŋ baŋ ba sereba yɛlɛ na. Ba mine meŋ maŋ nyɛŋ ka ba eɛ ba yoŋ lɛ bonso ba maŋ teɛre ka neɛzaa ba wono ba yɛlɛ na muni soŋ.

Ka lɛ aŋ waa ko ho meŋ yɛŋ, a ba e faa. Kyɛ ka hooŋ saana ho wagre a teɛrɛ a yɛlɛ ŋa taa, a na maaleŋ vɛmeŋ ka ho sukyiri dɔnnɔ bo yaga zaa. Erɛ yɛlɛ naŋ na soŋ ka ho neŋ Jehoova niiloŋ soma. Ka hooŋ erɛ lɛ, a na soŋ boŋ ka ho toɔ̃ are a yɛlɛ ŋa noɔreŋ.​—Yiem. 62:2; Efe. 6:10.

Ka hooŋ maŋ kanna a Baabole poɔ yɛlɛ mine naŋ kyaare pɔgeba mine naŋ da taa sukyiri dɔŋ, a kyɛ nyɛ sukyiridii saŋa na baŋ da puore sɔre Jehoova na, a na soŋ boŋ yaga zaa. Wagre zaa naane ka Jehoova da maŋ vɛŋ ka ba yeltuo na baare, kyɛ o da maŋ ko baŋ sukyiridii. Aŋa mannoo poɔŋ, Haana da “taa la sukyiri [dɔŋ]” yelkpeɛŋaa na o naŋ da tuoro na zuŋ. Kyɛ, saŋa na oŋ da wa “puore Jehoova nimitɔɔreŋ na,” o da nyɛ la sukyirimaaroŋ, aneazaa ka o da ba baŋ lɛ yɛlɛ naŋ na waa koo nendaare kaŋa.​—1 Saa. 1:10, 12, 18; 2 Kor. 1:3, 4.

Bɔ sommo yi a lantaapuoruu nembɛrɛ zie. Ba na baŋ eɛ “sɔgle zie a yi saseɛŋ, a e lirizie a yi saa saseɛŋ.” (Aiz. 32:2) Ba na baŋ wuli boŋ te yɔɔpɔge kaŋa hoŋ na baŋ yel yɛlɛ koo ka o ko bo sukyiridii.​—Yeng. 17:17.

Ka lɛ ho na baŋ soŋɛɛ ho serɛ ka o bare pornography kaabu bee? Aminekaŋaŋ. A Baabole yeleeŋ ka “noba bayiŋ seɛ neŋyeni,” lɛ wuleeŋ ka  ka yɛneeŋ e noba bayi, yɛ na baŋ maalɛɛ yɛlɛ bee a zɔɔtoɔ̃ yɛ dɔndɔma naŋ taa kpeɛ̃o yaga. (Ikil. 4:9-12) Yelpeɛre wuleeŋ ka, ka kultaa demeŋ wa laŋnoɔre mɔɔrɔ ka ba zɔɔtoɔ̃ pornography kaabu a kyɛ lɛ sage taa di, a maŋ soŋ baŋ yaga.

Yelmeŋɛ la, aseŋ ka ho kultatɔ na e siri ka o bare pornography kaabu a mɔɔrɔ o mɔɔbo zaa meŋ ka o e lɛ. Ka lɛ o puore sɔrɛɛ Jehoova sommo a bɔ sommo meŋ yi a lantaapuoruu nembɛrɛ zie bee? (2 Kor. 4:7; Gyi. 5:14, 15) O sɛgrɛɛ yɛlɛ mine biŋ aŋ na baŋ somoo ka o ta kaa pornography bee? Aŋa mannoo poɔŋ, o sɛgrɛɛ wagre oŋ na maŋ de o fone bee tablɛt bee komputa tonɔ ne toma, a kyɛ bare yɛlɛ naŋ na baŋ vɛŋ ka o kpɛ pigrinyɛ poɔ bee? (Yeng. 27:12) O eɛ siri ka ho somoo, a maŋ yele yelmeŋɛ zaa naŋ bebe korɔ bo bee? Ka lɛ na, ho na baŋ somooŋ.

Sobuoŋ? Te nyɛ yelmannaa ŋa. Felicia da kulee Ethan. Pornography kaabu da nyɔgɛɛ Ethan saŋa na oŋ da e bile na. Felicia da vɛŋɛɛŋ aŋ e mɔlɔ koo ka o maŋ yel yɛlɛ koo ka o naŋ wa taa a vɔlaa ka o kaa pornography. Ethan yeleeŋ ka: “N maŋ yelee yelzaa naŋ bebe ko N pɔge. O yi la nɔmmo poɔŋ a soŋ ma maŋ de gbɛɛ naŋ na soŋ ma ka N ta kpɛ pigrinyɛ poɔ, kyɛ maŋ soorɔ ma wagre zaa lɛ yɛlɛ naŋ gɛrɛ. O soŋ maŋ meŋ maŋ ba de intanɛt tonɔ toma yaga.” Nɔkpeɛne zaa kyebe ka Ethan pornography kaabu na sãã la Felicia poɔ. Kyɛ o yeleeŋ ka: “N suuri ane N posaanaa na koŋ baŋ somoo ka o bare a gyog-dɛgre ŋa. Teŋ wa yel o yelkpeɛŋaa na o naŋ tuoro na yɛlɛ baare na, o meŋ eɛ siri ka o soŋ ma ka N sukyiri kyɛre na baare.”

Ka dɔɔ ne o pɔgeŋ maŋ dire a dama ŋa taa, a na baŋ soŋɛɛ a dɔɔ ka o bare pornography kaabu, kyɛ ka o pɔge meŋ la sagoo di. Ka a dɔɔŋ vɛŋ ka o pɔge baŋ o vɔlfaare, zie o naŋ gɛrɛ ane yɛlɛ o naŋ erɛ, a na eɛ mɔlɔ ko a pɔge ka o sagoo di.

Ho teɛre ka ho na baŋ soŋ la ho serɛ a sori ŋa poɔŋ bee? Ka lɛ na, yɛ na baŋ laŋ kannɛɛ a zannoo ŋa a gyieli o poɔ yɛlɛ. O poteɛrɛ zaa na la ka o bare pornography kaabu a kyɛ toɔ̃ wuli bo ka ho na baŋ lɛ sagooŋ di. A ba seŋ ka o suuri iri ho naŋ boɔrɔ ka yɛ yel a yɛlɛ zuŋ, kyɛ a seŋ ka o nyɛ lɛ a yɛlɛ naŋ dɔnnɔ bo seŋ. Aseŋ ka ho somoo ka o toɔ̃ bare gyogo na o naŋ taa na, a kyɛ koo a vuo ka o wuli ka ho na baŋ lɛ sagooŋ di. Aseŋ ka yɛ bayi zaa zanne baŋ ananso noba naŋ maŋ kaara pornography, ane lɛ yɛŋ na baŋ e zɔɔtoɔ̃ ana yɛlɛ ŋa. d

 Ka hooŋ baŋ ka nɔkpeɛne na waŋ ka ho neŋ ho kultatɔ naŋ wa zeŋ ka yɛ yel a yɛlɛ, yɛ na baŋ vɛmeŋ ka a lantaapuoruu neŋkpoŋ kaŋa poɔ yɛ poɔŋ sɛre kyɛ ka yɛ yele a yɛlɛ. Ta vɛŋ ka ho eŋɛ kyoɔre. Kaara ka ho nyɛ yɛlɛ naŋ wuli ka yɛlɛ seɛrɛŋ. Taa teɛretɔ ka, ka yɛ zaaŋ dire kannyiri, yɛ kultaa na na leɛ maaleŋ somaŋ yaga zaa.​—Ikil. 7:8; 1 Kor. 13:4.

Ka ho serɛŋ mɔɔrɔ o mɔɔbo zaa ka o bare pornography kaabu a kyɛ wa ta sugɔ a lɛ kaa, lɛ wuleeŋ ka o koŋ baŋ bare a kaabu bee? Ai lɛ naane. Agaŋaazaa ka a kaabuŋ nyɔgoo, ana eɛ yɛlɛ oŋ na zɔɔrɔ ne o nyɔvore zemmo zaa poɔŋ. Ka onaŋ gbaŋ toɔ̃ baraa kaabu, kyɛ yuomo mine puoriŋ o na baŋ la kaa gaaŋ. Ka onaŋ ba boɔrɔ ka lɛ e yɛŋ, aseŋ ka o sɛgre yɛlɛ biŋ soŋ zaa ka a somoo ka o toɔ̃ tage o meŋɛ yi pigrinyɛ zaa poɔŋ. Ka onaŋ gbaŋ wa nyɛ ka o toɔ̃ barɛɛ a kaabu, kyɛ aseŋ ka o naŋ tage o meŋɛ yi yelzaa naŋ na baŋ e pigrinyɛ koo. (Yeng. 28:14; Mat. 5:29; 1 Kor. 10:12) Aseŋ ka ‘o vɛŋ ka o sukyiri ane o teɛroŋ leɛ e paalaa’ a zanne ka o “kyiiri  faaloŋ,” ka ana la pornography kaabu ane gyog-dɛgre zaa aŋa oŋ na maŋ de o nu nɔnɔ o dɔɔloŋ lɛɛŋ ka o gaŋneŋ taa vɔlaa wa mãã. (Efe. 4:23; Yiem. 97:10; Uro. 12:9) O eɛ siri ka o e a yɛlɛ ŋa zaa bee? Ka o naŋ e lɛ, fẽẽfẽẽ fẽẽfẽẽ o na toɔ̃ barɛɛ a gyogo ŋa kpɛlɛŋkpɛlɛŋ. e

Kyɛ ka ho kultatɔ naŋ ba boɔrɔ ka o bare ana gyogo ŋa? Nɔkpeɛne zaa kyebe ka aminekaŋaŋ a na maŋ vɛmeŋ ka ho eŋɛŋ kyoɔre, ka ho suuri iri, ka ho teɛrɛ ka o yi la ho puoriŋ. Bare a yɛlɛ zaa eŋ Jehoova nuureŋ, lɛ na soŋ boŋ ka ho taa sukyirimaaroŋ. (1 Pit. 5:7) Maŋ zanna boma, a maŋ teɛre a yɛlɛ gaa tɔɔre, a kyɛ puoro sɔrɔ Jehoova. Ana soŋ boŋ ka ho tage peɛle Jehoova, ka o meŋ tagra peɛlɛ bo. Aŋa lɛ Aizeeya 57:15 naŋ yel na, o maŋ be la “[neɛzaa] sukyiri naŋ taa posãã” zieŋ, ka o soŋ ba ka ba leɛ taa popeɛloŋ. Mɔɔrɔ ho mɔɔbo zaa ka ho e Kristabisoŋ. Bɔ sommo yi a nembɛrɛ zieŋ. Kyɛ taa teɛretɔ ka aminekaŋaŋ, nendaare kaŋa ho serɛ na na yi la o sukyiri zaaŋ a e leɛroo.​—Uro. 2:4; 2 Pit. 3:9.