1. Aŋa lɛ Hiburu 12:1 naŋ yel na, bo aŋ seŋ ka te e a toɔ̃ zo a zogaŋtaa zoobu baare?

 A BAABOLE de la Kristabiiri zemmo manne ne zogaŋtaa zoobu. Bana zaa naŋ zo a zogaŋtaa zoobu ŋa te baare na nyɛ la nyɔvore naŋ ba taa baaraa. (2 Tim. 4:7, 8) Kyɛ aseŋ ka te mɔɔ te mɔɔbo zaa a naŋ zoro a zogaŋtaa zoobu ŋa, bonso a zogaŋtaa zoobu baaroo peɛlɛɛŋ yaga zaa. A bitontona Pɔɔl naŋ da toɔ̃ zo a zogaŋtaa zoobu ŋa baare na, wulee yɛlɛ mine naŋ na baŋ soŋ te meŋ ka te zo te baare. O ko teŋ kawane ka, “yɛ e ka te togi tuobu zaa . . . naŋ maŋ gbiŋ te taa bare. Yɛ e ka te zo a zogaŋtaa zoobu na poɔ te naŋ be ne kannyiri.”​—Kanne Hiburu 12:1.

2. Ka ba naŋ yelka “te togi tuobu zaa . . . naŋ maŋ gbiŋ te taa bare,” wala ka lɛ wuli?

² Saŋa na Pɔɔl naŋ da sɛge ka “te togi tuobu zaa . . . naŋ maŋ gbiŋ te taa bare” na, o da wuloŋ ka tuobu zaa kyebe aŋ seŋ ka Kristabie tuo bee? Ai, lɛ naane. Kyɛ o da wuloŋ ka aseŋ ka te togi tuobu zaa naŋ ba seŋ ka te tuo bare. A tuobu ŋa taa na baŋ vɛmeŋ ka te mɔɔrɔ faana ka te eŋɛ meŋ kyoɔre. Ka teneeŋ na toɔ̃ are kpeɛŋaa yɛŋ, aseŋ ka te lɔɔ a tuobu ŋa taaba bare wieoŋ lɛ, ka teneeŋ wa nyɛ ka te tuo la mine. Kyɛ lɛ ba la wuli ka te lɔɔ tuobu na meŋ naŋ seŋ ka te tuo na bare. Bonso, ka teneeŋ lɔɔ ana tuobu na bare, te koŋ baŋ zo a zoobu te baare. (2 Tim. 2:5) Bo tuobu la aŋ seŋ ka te tuo?

3. (a) Aŋa lɛ Galesiya 6:5 naŋ wuli na, bo tuobu aŋ seŋ ka te tuo? (b) Bo teŋ na zanne a zannoo ŋa poɔŋ, ka boŋ so?

 ³ Kanne Galesiya 6:5. Pɔɔl da wulee tuobu mine naŋ seŋ ka te tuo. O da sɛgɛɛŋ ka, “neɛzaa [na] tuo [la] o meŋɛ tuobu.” A zie ŋaŋ, Pɔɔl da wuloŋ ka te ferebo toma te naŋ taa Jehoova nimitɔɔreŋ na, aseŋ ka te tuogaa te menneŋ. A zannoo ŋa poɔŋ, te na zannɛɛ tuobu naŋ e te “meŋɛ tuobu,” ane lɛ teŋ na baŋ tuo a. Te na lɛ nyɛɛ tuobu mine aminekaŋaŋ teŋ tuo kyɛ aŋ ba seŋ ka te tuo, ane lɛ teŋ na baŋ togaa lɔɔ bare. Ka teneeŋ tuo tuobu naŋ seŋ ka te tuo, kyɛ lɔɔ tuobu naŋ ba seŋ ka te tuo bare, a na soŋ teŋ ka te zo a nyɔvore zoobu na te baare.

4. Ananso la wala aŋ ba e tuo te gaali ka te paale noɔre na te naŋ eŋ Jehoova ka te na puorooŋ tegitegilɛ na? (Kaa a foto meŋ.)

⁴ Noɔre na te naŋ eŋ ko Jehoova ka te na puorooŋ tegitegilɛ na. Saŋa na te naŋ de te menne ko Jehoova na, te eŋɛɛ noɔre ka te na puorooŋ kyɛ erɛ o boɔbo. Aseŋ ka te paale ana noɔre na. Teŋ na paale noɔre na te naŋ eŋ  Jehoova na eɛ toŋ tegroŋ yaga zaa, kyɛ a ba e kpeɛŋaa te gaali. Bonso, Jehoova maale teŋ ka te erɛ o poboɔbo. (Yel. 4:11) O maale teŋ o waaloŋ poɔŋ, a maale te teŋ taa a boɔbo ka te bamoo a kyɛ puoruu meŋ. Azuŋ, te na baŋ tage peɛlooŋ ka te poɔ maŋ pɛle ka te erɛ o boɔbo meŋ. (Yiem. 40:8) Ane meŋ, ka teneeŋ wa erɛ Naaŋmen boɔbo a kyɛ tuuro o Bidɔɔ na, te na nyɛ “la pɛnnoo” a ko te menne.​—Mat. 11:28-30.

5. Boŋ na baŋ soŋ bo ka ho toɔ̃ paale noɔre ho naŋ eŋ Jehoova na? (1 Gyɔɔn 5:3)

⁵ Wala hoŋ na baŋ e a tuo a tuobu? Yɛlɛ ayi mine na baŋ soŋ teŋ. A dɛŋdɛŋ, naŋ kyɛnɛ vɛŋ ka nɔmmo na ho naŋ taa ko Jehoova na maaleŋ e kpeɛŋaa. Te na baŋ eɛ lɛ ka teneeŋ maŋ teɛrɛ yelsonne na oŋ e ko te ane maaloo oŋ na ko te nendaare kaŋa na. Ka nɔmmo ho naŋ taa ko Naaŋmen naŋ wa erɛ kpeɛŋaa, a na eɛ mɔlɔ ka ho tuuro o sowuli. (Kanne 1 Gyɔɔn 5:3.) A yiiloŋ, tɔglɔ Yezu. O da toɔ̃ eɛ Naaŋmen boɔbo bonso, o da puoreeŋ ka Jehoova somoo, kyɛ la de o teɛroŋ zaa eŋ kyɔɔtaa na naŋ da be o nimitɔɔreŋ na. (Hib. 5:7; 12:2) Aŋa Yezu, maŋ puore sɔre Jehoova ka o ko bo a kpeɛ̃o a kyɛ taa sagediibu naŋ e kpeɛŋaa a nyɔvore naŋ ba taa baara tamaa na eŋɛŋ. Ka hooŋ wa tɔglɔ Yezu, ka nɔmmo ho naŋ taa ko Naaŋmen naŋ wa erɛ kpeɛŋaa, ho na baŋ paalɛɛ noɔre na ho naŋ eŋ koo na.

6. Bonso aŋ seŋ ka te tonɔ te booree ferebo toma? (Kaa a foto meŋ.)

⁶ Te ferebo toma a booree poɔŋ. A nyɔvore zoobu ŋa poɔŋ, a ferɛɛŋ ka te nɔŋ Jehoova ane Yezu a gaŋ te booree deme. (Mat. 10:37) Kyɛ lɛ ba wuli ka aseŋ ka te zagre te booree ferebo toma. Ka teneeŋ na baŋ pɛle Naaŋmen ane Krista poɔ yɛŋ, aseŋ ka te tonɔ te booree ferebo toma. (1 Tim. 5:4, 8) Te poɔ na pɛleŋ yaga zaa ka teneeŋ wa erɛ lɛ. Jehoova baŋɛɛŋ ka ka a dɔɔ ane o pɔgeŋ wa taa nɔmmo ane gyeremɛ ko taa, a nɔŋ ba biiri kyɛ guolo ba soŋ, ka a biiri meŋ sagra ba dɔgreba nɔɛ, a booree deme na taa la popeɛloŋ.​—Efe. 5:33; 6:1, 4.

7. Wala hoŋ na baŋ e a toŋ ho ferebo toma a booree poɔŋ?

⁷ Wala hoŋ na baŋ e tuo a tuobu? Ka ho eɛ serɛ, pɔge, bee bie, maŋ de Baabole sowuli tonɔ ne toma. Ta maŋ erɛ yɛlɛ hooŋ naŋ nyɛ ka a somaŋ, bee yɛlɛ neɛzaa naŋ erɛ zie na ho naŋ be na, bee a de a donɛɛ yɛmbaŋneba naŋ maŋ korɔ booree deme kawane yɛlɛ tonɔ ne toma ho zemmo poɔŋ. (Yeng. 24:3, 4) De te Baabole gama na tonɔ ne toma. A taa la kawaŋ sonne a kyaare lɛ hoŋ na baŋ de Baabole sowuli tonɔ ne toma. Aŋa mannoo poɔŋ, a zannoo yelzuri naŋ tutaa yelzu naŋ la “Help for the Family” taa la yɛlɛ yaga a kyaare yelkpeɛne kultaa deme, bidɔgreba, ane baapaalba naŋ maŋ tuoro zenɛ ŋa. b Mɔɔ kyɛ de Baabole sowuli tonɔ ne toma ka ho booree deme mineŋ gbaŋ ba erɛ lɛ. Ka hooŋ e lɛ ho booree na nyɛɛ tɔnɔ, ka Jehoova meŋ ko yɛ maaloo.​—1 Pit. 3:1, 2.

8. Bo yɛlɛŋ na baŋ yi te gbɛ deree poɔŋ wa?

⁸ Ferebo toma te naŋ taa kyaare yɛlɛ naŋ na yi te gbɛ deree zaa poɔŋ wa. Jehoova ko teŋ someŋɛ. O boɔbo la ka te taa popeɛloŋ ka teneeŋ wa de gbɛɛ naŋ soma. Kyɛ ka teneeŋ de gbɛ faare meŋ, o maŋ terɛɛ sori ka dɔgɛɛ naŋ maŋ yi a poɔŋ wa na pɔge te. (Gal. 6:7, 8) Azuŋ ka teneeŋ wa de gbɛre naŋ ba soma, a  ba teɛre yɛlɛ soŋ kyɛ yel yelkaŋa, bee a lonne e yelkaŋa, te maŋ sagɛɛ toɔrɔ zaa naŋ na yi a poɔŋ wa. Aminekaŋaŋ te zoma na dɔnnɔ teŋ a kyaare yɛlɛ na te naŋ e na. Kyɛ ka teneeŋ baŋ ka gbɛre zaa te naŋ de, te menneŋ na tuore yelzaa naŋ na yi a poɔŋ wa yɛŋ, a na soŋ teŋ ka te sɔre te yelbebe sudi, a leɛre yi a poɔŋ, a kyɛ mɔɔrɔ te mɔɔbo zaa ka te ta la ŋmɛ ana gbɛre na. Ka teneeŋ e lɛ, a na soŋ teŋ ka te naŋ kyɛnɛ be a nyɔvore zoobu na poɔŋ.

9. Boŋ hoŋ na baŋ e ka hooŋ wa de gbɛ faa kaŋa? (Kaa a foto meŋ.)

⁹ Wala hoŋ na baŋ e tuo a tuobu? Ka hooŋ de gbɛ faa kaŋa, boŋ hoŋ na baŋ e? Teɛre baŋ ka ho koŋ baŋ leɛre yɛlɛ na ho naŋ e aŋ pare na. Ta saana ho wagre ane ho faŋa ka ho wuli noba ka ho deme bebeŋ, bee a paana ho taaba mine ka bana la vɛŋ hoŋ de ana gbɛ faa na. Sage ho saanaa, a mɔɔrɔ ho mɔɔbo zaa ka ho maale a yɛlɛ. Ka ho zomaŋ dɔnnɔ bo a kyaare yelfaa kaŋa ho naŋ e, yi sigrimennoŋ poɔŋ a puore sɔre Jehoova, sage ho saanaa, a sɔroo ka o di suuri ko bo. (Yiem. 25:11; 51:3, 4) Sɔre sudi yi noba na ho naŋ sãã ba poɔ na, a sɔre sommo meŋ yi a lantaapuoruu nembɛrɛ zie ka anaŋ seŋ ka ho e lɛ. (Gyi. 5:14, 15) Zanne yelkaŋa yi ho gbɛ ŋmɛ na poɔŋ, a mɔɔrɔ ka ho ta la ŋmɛ ana gbɛre na. Ka hooŋ e lɛ, ho na baŋ sagediŋ ka Jehoova na wuli boŋ nimimaaroŋ, a ko bo sommo zaa naŋ seŋ neŋ.​—Yiem. 103:8-13.

10. Ananso la wala aŋ na e dɔgɛɛ ko te ka teneeŋ mɔɔrɔ ka te e gaŋ lɛ teŋ na baŋ e na? (Galesiya 6:4)

¹⁰ Ka teneeŋ teɛrɛ ka aseŋ ka te e gaŋ lɛ na te naŋ erɛ pampana. Ka teneeŋ de te menne manna te taaba, a na baŋ eɛ tuobu yaga zaa a ko te. (Kanne Galesiya 6:4.) Ka teneeŋ maŋ de te menne manna te taaba, a na vɛmeŋ ka te maŋ erɛ ba nyuuri a mɔɔrɔ ka te e gaŋ ba. (Gal. 5:26) Ka teneeŋ mɔɔrɔ ka te e yɛlɛ te taaba mine naŋ toɔ̃ e, aminekaŋaŋ a na gaalee te faŋa bɔgɔ, ka lɛ vɛŋ ka te dɔgrɔ te menne. Ka “tamaa naŋ ba nyɛ [eeboŋ] maŋ vɛŋ ka sukyiri beɛrɛ” yɛŋ, lɛɛŋ a na eɛ sukyiri kyɛre yaga zaa ko te ka teneeŋ mɔɔrɔ ka te e yɛlɛ naŋ gaali te faŋa! (Yeng. 13:12) Ka teneeŋ erɛ lɛ, te faŋa zaaŋ na baare; lɛ na vɛmeŋ te koŋ la toɔnɔ zoro a nyɔvore zoobu na.​—Yeng. 24:10.

11. Boŋ na baŋ soŋ bo ka ho ta erɛ yɛlɛ naŋ gaali ho faŋa?

¹¹ Wala hoŋ na baŋ e lɔɔ ana tuobu na bare? Ta mɔɔrɔ ka ho e gaŋ lɛ hoŋ na baŋ e na, bee lɛ na Jehoova naŋ boɔrɔ ka ho e na. O ba boɔrɔ ka ho e gaŋ lɛ hoŋ na baŋ e. (2 Kor. 8:12) Baŋ peɛlaaŋ ka Jehoova ba derɛ yɛlɛ ho naŋ erɛ na manna ne yɛlɛ noba mine naŋ erɛ. (Mat. 25:20-23) O niŋe paɛ̃ yaga zaa ane yɛlɛ na zaa ho naŋ yi ho sukyiri poɔŋ a erɛ koroo, ho yelmennoŋ, ane ho kannyiri. Baŋ ho faŋa bɔgɔ, a baŋ meŋ ka, ho yuomo, ho laafeeloŋ, ane ho zemmo yɛlɛ mine zuŋ ho koŋ baŋ e yɛlɛ na zaa ho naŋ boɔrɔ ka ho e pampana na. Aŋa Bariziileyai, ta sage toma zaa naŋ gaŋ ho faŋa, ho yuomo bee ho laafeeloŋ zuŋ. (2 Saa. 19:35, 36) Aŋa Moosis, maŋ sage sommo, a de a toma mine ko noba mine ka ba soŋ bo toŋ ka a naŋ wa seŋ neŋ. (Yiib. 18:21, 22) Ka hooŋ baŋ ho faŋa bɔgɔ, a na soŋ boŋ ka ho ta mɔɔrɔ ka ho e yɛlɛ naŋ gaŋ ho faŋa, a ta erɛ wa bali a nyɔvore zoobu poɔŋ.

12. Ka neɛ kaŋa wa de gbɛ faa kaŋa, teneeŋ la vɛŋ oŋ de ana gbɛre na bee? Wuli a muni.

¹² Teŋ na paana te menne ka tenee la vɛŋ ka neɛ kaŋa de gbɛ faare mine. Te koŋ baŋ de gbɛɛ ko te taaba; te koŋ baŋ pegi sori meŋ ka toɔrɔ naŋ yi ba gbɛ faare poɔŋ wa na ta pɔge ba. Aŋa mannoo poɔŋ, ho bie na baŋ  iriŋ ka o ko la puore Jehoova. Ka bieŋ wa de ana gbɛre ŋa, a maŋ kyɛrɛɛ o dɔgreba sukyiri yaga zaa. Kyɛ ka bidɔgrebaŋ wa paana ba menne ba bie naŋ de gbɛ faa kaŋa zuŋ, a maŋ eɛ tuobu yaga zaa ko ba. A ba e tuobu Jehoova naŋ boɔrɔ ka ba tuo.​—Uro. 14:12.

13. Wala ka bidɔgreba na baŋ e ka ba bieŋ wa de gbɛ faa?

¹³ Wala hoŋ na baŋ e lɔɔ ana tuobu na bare? Jehoova ko la te zaa someŋɛ. O maŋ terɛɛ sori ka neɛzaa de gbɛre o naŋ boɔrɔ. O ko teŋ a vuo meŋ ka te iri ka te na puorooŋ bee ka te koŋ puoroo. Jehoova baŋɛɛŋ ka ho eɛ bidɔgrɔ naŋ ba pɛgeyi; o boɔbo zaa la ka ho mɔɔ ho mɔɔre zaa hoŋ na toɔ̃. Gbɛre zaa ho bie naŋ na de eɛ o meŋɛ gbɛre o naŋ de. (Yeng. 20:11) Kyɛ aminekaŋaŋ, gbɛɛ hooŋ meŋɛ naŋ ŋmɛ aŋa bidɔgrɔ yɛlɛ na dɔnnɔ boŋ. Ka lɛ na, yel yɛlɛ naŋ be ho sukyiriŋ a ko Jehoova, a sɔre ho yelbebe sudi meŋ. O baŋ ka ho koŋ baŋ leɛre yɛlɛ na ho naŋ e aŋ pare na. Kyɛ o ba kaara soriŋ ka ho go ho bie na yi toɔrɔ naŋ na pɔgoo o gbɛ faa na o naŋ de na poɔŋ. Baŋ ka, ka ho bie naŋ de gbɛre ka o leɛ wa Jehoova zie, O na la deɛ o la.​—Luk. 15:18-20.

14. Ananso la wala aŋ baŋ seŋ ka te vɛŋ ka te zoma dɔnnɔ te te gaali?

¹⁴ Ka ho zomaŋ wa dɔnnɔ bo wagre zaa yelfaa kaŋa ho naŋ e zuŋ. Ka teneeŋ wa e yelfaa kaŋa, a somaŋ ka te zoma dɔnnɔ te. Kyɛ, Jehoova ba boɔrɔ ka te vɛŋ ka te zoma maaleŋ dɔnnɔ te yaga zaa. A eɛ tuobu aŋ seŋ ka te lɔɔ bare. Kyɛ wala teŋ na baŋ e baŋ ka te zoma dɔnnɔ teŋ maaleŋ te gaali? Ka teneeŋ sɔre te yelbebe sudi, a e kaŋdabaŋkalɛ, a mɔɔrɔ te mɔɔbo zaa ka te ta la e ana yelfaa na yɛŋ, te na baŋ sagediŋ ka Jehoova na di la suuri ko te. (Tom. 3:19) Ka teneeŋ e a yɛlɛ ŋa zaa, Jehoova ba lɛ boɔrɔ ka te zoma dɔnnɔ te. O baŋɛɛŋ ka a lɛ eebo na baŋ vɛmeŋ ka te di dɔgɛɛ yaga. (Yiem. 31:10) Ka teneeŋ taa posaanaa te gaali, te na baŋ barɛɛ a nyɔvore zoobu na.​—2 Kor. 2:7.

15. Ka ho zomaŋ dɔnnɔ bo te gaali boŋ na baŋ soŋ bo? (1 Gyɔɔn 3:19, 20) (Kaa a foto meŋ.)

 ¹⁵ Wala hoŋ na baŋ e lɔɔ ana tuobu na bare? Ka ho zomaŋ dɔnnɔ bo yaga zaa, de ho teɛroŋ zaa eŋ “vɛŋ koobu” na Naaŋmen naŋ maŋ vɛŋ ko te na. (Yiem. 130:4) Jehoova eŋɛɛ noɔre ka, ka neɛŋ e kaŋdabaŋkalɛ meŋɛmeŋɛ, o maŋ di la suuri koo, a “koŋ la teɛre [o] yelbee meŋ.” (Jer. 31:34) Lɛ wuleeŋ ka Jehoova daŋ koŋ la teɛre yelbebe na o naŋ di suuri ko bo na yɛlɛ. Azuŋ ka hooŋ wa tuoro yelkpeɛne mine gbɛ faa na ho naŋ da de na zuŋ, ta teɛrɛ ka lɛ wuleeŋ ka Jehoova naŋ ba di suuri ko bo. Ta paana ho meŋɛ ho naŋ kɔŋ a poɔ soe mine a lantaapuoruu poɔŋ ho gbɛ faa na ho naŋ da de na zuŋ. Jehoova ba lɛ teɛrɛ ho yelbebe na yɛlɛ, azuŋ meŋ ta teɛraa.​—Kanne 1 Gyɔɔn 3:19, 20.

16. Aŋa zogaŋtaa zozorebo, bo yɛlɛ aŋ seŋ ka te baŋ?

¹⁶ Ka teneeŋ wa zoro a nyɔvore zoobu, aseŋ ka te zoro lɛnɛɛ teŋ na baŋ toɔ̃ “zo [te] baare.” (1 Kor. 9:24) Te na baŋ zo te baareŋ ka teneeŋ baŋ tuobu naŋ seŋ ka te tuo ane tuobu naŋ ba seŋ ka te tuo. A zannoo ŋa soŋ teŋ teŋ nyɛ tuobu na mine a naŋ seŋ ka te lɔɔ bare ane ana naŋ seŋ ka te tuo. Kyɛ mine meŋ bebeŋ teŋ ba yel a yɛlɛ. Yezu da yeleeŋ ka, “tige diibu ane dããnyukuoli, kyɛ bee . . . a teŋɛzu nyɔvore yɛlɛ” na baŋ eɛ tuobu yaga zaa a ko te. (Luk. 21:34) A sɛgre ŋa a neŋ a taaba yaga na baŋ soŋ boŋ ka ho baŋ leɛroo naŋ seŋ ka ho e ho zemmo poɔŋ a naŋ kyɛnɛ zoro a nyɔvore zoobu na.

17. Ananso la wala teŋ na baŋ sagedi ka te na toɔ̃ zo te baareŋ a nyɔvore zoobu ŋa poɔŋ?

¹⁷ Te na baŋ sagediŋ ka te na zo la a nyɔvore zoobu te baare bonso Jehoova na ko teŋ a faŋa naŋ seŋ neŋ. (Aiz. 40:29-31) Azuŋ ta vɛŋ ka ho eŋɛ kyoɔre! Tɔglɔ a bitontona Pɔɔl naŋ da mɔɔ o mɔɔbo zaa ka o zo a nyɔvore zoobu te baare na. (Fil. 3:13, 14) Neɛzaa koŋ baŋ zo a zogaŋtaa zoobu ŋa ko bo, kyɛ Jehoova sommoŋ, ho na baŋ zoŋ te baare. Jehoova na baŋ soŋ boŋ ka ho tuo ho tuobu, a kyɛ lɔɔ ana naŋ ba seŋ ka ho tuo na bare. (Yiem. 68:19) O na soŋ boŋ ka ho zo a nyɔvore zoobu te baare ane kannyiri!