Ana zannoo na poɔŋ, te da zannɛɛ yelkaŋa naŋ e nimizeɛ yaga zaa naŋ kyaare nensaaleba zaa ane malekere meŋ. Ana yɛlɛ na la Jehoova yokpoŋ na pɛgeyiibu yɛlɛ. Ka teneeŋ sage ka Jehoova naaŋ diibu na somaŋ bee ka teneeŋ ba sage, a eɛ yɛlɛ naŋ kyaare o yuori pɛgiyiibu yɛlɛ na. Ka neɛŋ na dire yelmennoŋ korɔ Naaŋmen bee ka onaŋ ba dire yelmennoŋ koroo, a meŋ eɛ yɛlɛ naŋ kyaare o yuori pɛgiyiibu yɛlɛ na.

Kyɛ ananso la wala teŋ yele ka Jehoova yuori na ane o pɛgeyiibu yɛlɛ eɛ nimizeɛ yaga zaa a gaŋ yelzaa? Yɛ vɛŋ ka te nyɛ yɛlɛ ata mine zuŋ teŋ yele lɛ.

A dɛndɛŋ soba, Setaana da sãã la Jehoova yosoŋ na a Eedin gaadin na poɔŋ. Soorebiri na Setaana naŋ da soore Hawaa na, o da boɔrɔŋ ka o wuli ka Jehoova eɛ Naaŋmen naŋ e biere soba, a da lɛ boɔrɔ ka o wuli ka sowuli na Oŋ da ko ba na meŋ ba soma. Setaana da lɛ yeleeŋ ka yɛlɛ na Naaŋmen naŋ yel na koŋ nyɛ eebo. Lɛ wuleeŋ ka o da boɔlɛɛ Naaŋmen ziri-ŋmaara. Azuŋ o da sãã la Naaŋmen yosoŋ na. Setaana wa leɛ la ‘a Dɛɛvul,’ o tɛge la “ziri-ŋmaara.” (Gyn. 8:44) Hawaa naŋ da sage Setaana zirii na di zuŋ, o da zagrɛɛ Naaŋmen noɔre, a da wuli ka o ba boɔrɔ ka Naaŋmen e o zukaara. (Mun. 3:1-6) Zenɛ ŋa meŋ, Setaana naŋ kyɛnɛ ŋmaarɛɛ zirii a kyaare Naaŋmen. Bana naŋ sage a zirii ŋa taa di na, a maŋ eɛ mɔlɔ ka ba zagre Naaŋmen noɔre. Kyɛ Naaŋmen puorebiiri yɛŋ maŋ nyɛŋ ka lɛ na ba naŋ saana Naaŋmen yuori na eɛ daŋkyagre yaga zaa. A naŋ vɛŋ ka dɔgɛɛ ane faaloŋ pore yaga zaa lɛ.

A yiiloŋ soba, Jehoova na pɛgɛɛ o yuori na ka o yi, ka dɛgre zaa ta be o eŋɛŋ, lɛ na vɛmeŋ ka o bonmaalee zaa nyɛ maaloo. Yɛlɛ naŋ e nimizeɛ ko Jehoova yaga zaa la lɛ. Lɛŋ vɛŋ oŋ yelka: “N na [pɛgɛɛ] N yonanee na naŋ sãã” na. (Izik. 36:23) Yezu meŋ da wulee yɛlɛ naŋ seŋ ka a e yelnimizeɛ Jehoova yelmeŋɛ puorebiiri zaa puoro poɔŋ saŋa na o naŋ da yelka: “Vɛŋ ka ho yuori pɛgeyi.” (Mat. 6:9) Gbɛɛ yaga zaa a Baabole wulee lɛ aŋ e nimizeɛ ka Jehoova yuori pɛgeyi. Te nyɛ ana yɛlɛ na mine: “Yɛ korɔ Jehoova gyeremɛ naŋ seŋ neŋ o yuori.” (1 Tun. 16:29; Yiem. 96:8) “Yɛ yiele o yuori gyeremɛ yiele.” (Yiem. 66:2) “N na ko la ho yuori gyeremɛ a gɛrɛ wagre zaa.” (Yiem. 86:12) Saŋa na kaŋa Jehoova meŋɛ naŋ da yel yɛlɛ a yi sazuŋ na la saŋa na Yezu naŋ da yele yɛlɛ a ŋmenpuoredie naŋ be Gyɛruzɛlɛm a da yelka: “N Saa, e ka a ho yuori nyɛ puubu.” Ka Jehoova meŋ da yel sɔgoo ka: “N eɛ la ka a N yuori nyɛ puubu, kyɛ N na la eŋ ka o la nyɛ puubu.”​—Gyn. 12:28. a

A taaloŋ soba, ka Jehoova boɔboŋ nyɛ eebo a na vɛmeŋ ka o yuori pɛgeyi. Ka a enyɛ baaraa soba naŋ nyɛ eebo a Krista Yuoŋ Turi Naaŋ Diibu  na puoriŋ, bo yɛlɛŋ na lɛ e? Bo teɛroŋ ka nensaaleba zaa ane malekere na taa kyaare Jehoova yuori na? Ka teneeŋ na baŋ nyɛ a soorebiri ŋa noɔre iribo yɛ vɛŋ ka te nyɛ a yɛlɛ ayi ŋa, yelmennoŋ teŋ na dire korɔ Naaŋmen ane teŋ na sage ka Jehoova la seŋ ka o dire naaloŋ. Bana naŋ na wuli ka ba taa la yelmennoŋ na na tuoree dɔgroŋ bee? Ai. Ba na pɛgeyiŋ ka ba e ba nyɛ lɛ zaa naŋ seŋ neŋ. Ba na ko baŋ nyɔvore naŋ ba taa baaraa. Ana saŋa na meŋ a ko la fere ka Jehoova e yelzaa wuli ka o naaŋ diibuŋ soma gaŋ naaŋ diibu zaa. Bonso, lɛ saŋa bana zaa naŋ be sazuŋ ane bana zaa naŋ be a teŋɛ zuŋ na de la noɔreyeni a sage ka Jehoova naaŋ diibuŋ soma gaŋ naaŋ diibu zaa. Ka Jehoova yuori pɛgeyiibu na meŋ?

A lɛ saŋa na neɛzaa na baŋ la yelmeŋɛ naŋ bebe kyaare Jehoova, azuŋ o yuori na pɛgeyiŋ yaga zaa. Kyɛ Jehoova yuori naŋ na kyɛnɛ eɛ yɛlɛ naŋ e nimizeɛ yaga zaa ko o puorebiiri zaa. Bonso ba na nyɛrɛɛ lɛ Jehoova naŋ na gɛrɛ nimitɔɔre a erɛ yelseɛlɛ. Yezu meŋ na yi la sigrimennoŋ poɔŋ a de a naaŋ diibu ko Jehoova, a na vɛmeŋ ka “Naaŋmen . . . dire naaloŋ a boma zaa zu.” (1 Kor. 15:28) A lɛ puoriŋ, nensaaleba na taa la popeɛloŋ “a Naaŋmen biiri faabo puubu” eŋɛŋ. (Uro. 8: 21) Ka Jehoova pãã vɛŋ ka o boɔbo o naŋ taa ka o vɛŋ ka o biiri zaa naŋ be sazuŋ ane a donɛɛ zuŋ e booree bonyeni na nyɛ eebo.​—Efe. 1:10.

Ka a yɛlɛ ŋa zaaŋ wa nyɛ eebo baare, wala ka Jehoova biiri zaa naŋ be sazuŋ ane a donɛɛ zuŋ na teɛre? Nɔkpeɛne zaa kyebe ka te poboɔbo zaa na la ka te pugiro Jehoova yosoŋ na. A vooroŋ soŋ da vɛŋɛɛŋ ka a yieloŋ yiele Deevid sɛge ka: “[Puubu] bebe a ko Jehoova Naaŋmen . . . [Puubu] bebe a ko o gyeremɛ yuori a gɛrɛ wagre zaa.” (Yiem. 72:18, 19) Te na erɛɛ lɛ tegitegilɛ, bonso wagre zaa te na maŋ nyɛɛ ananso a naŋ seŋ ka te pugiro o yuori na.

Jehoova yuori na wulee neɛ na meŋɛ naŋ la o. Ka teneeŋ wa teɛre Jehoova yuori yɛlɛ, te maŋ teɛrɛɛ o nɔmmo meŋ yɛlɛ. (1 Gyn. 4:8) Te daŋ koŋ inne ka Jehoova naŋ nɔŋ te zuŋ oŋ maale te, a ko te a yɔɔdeɛbo sareka meŋ. O naaŋ diibu meŋ eɛ yɛlɛ naŋ wulo o nɔmmo. Jehoova naŋ na kyɛnɛ wulo teŋ o nɔmmo na a gɛrɛ wagre naŋ ba taa baaraa. Te na tagra peɛlooŋ aŋa te Saa a pugiro o yosoŋ na tegitegilɛ.​—Yiem. 73:28.