1-2. (a) Bo la faaloŋ, ka wala teŋ na baŋ e zɔɔtoɔ̃ faaloŋ? (Kanne a “Yelbie Mine Ba Naŋ Wuli A Muni” zie na meŋ) (b) Bo yɛlɛ teŋ na zanne a zannoo ŋa poɔŋ ane a zannoo na mine naŋ be A Kaakaara Ziduoruu ŋa poɔŋ? (Kanne a yɛlɛ ŋa meŋ naŋ be a zannoo ŋa poɔŋ, o yelzu la, “A Ko Neɛ Naŋ Kanna A Yɛlɛ.”)

 WALA ka Jehoova Naaŋmen nɔŋ bo seŋ? Ka hooŋ zanne nyɛ yɛlɛ na Jehoova naŋ e ka o toɔ̃ faa bo yi yelfaare ane kũũ poɔŋ na, a na soŋ boŋ ka ho nyɛ a soorebiri ŋa noɔre iribo. Faaloŋ a eɛ te dɔndɔn-kpoŋ teŋ koŋ baŋ zɔɔtoɔ̃ o te meŋɛŋ. Te zaa maŋ eɛ yelfaare bebiri zaa. Te naŋ taa faaloŋ te eŋɛŋ na zuŋ teŋ maŋ kpiire. (Uro. 5:12) Kyɛ duorisoŋ kaŋa bebeŋ. Jehoova na baŋ soŋ teŋ ka te zɔɔtoɔ̃ faaloŋ. Te gba zɔɔtoɔ̃ baarɛɛŋ!

² Aneazaa ka nensaaleba ba pɛgeyi, kyɛ Jehoova soŋɛɛ o puorebiiri baŋ toɔ̃ puoruu neŋ yelmennoŋ yuomo naŋ gaŋ 6,000 a wa tɔ zenɛ. Bonso o nɔŋ teŋ. A yi saŋa na zaa Jehoova naŋ maale te na oŋ nɔŋ te. O naŋ nɔŋ te zuŋ, o eɛ lɛ zaa oŋ na toɔ̃ ka o maŋ soŋ te ka teneeŋ wa e yelfaa. Naaŋmen baŋɛɛŋ ka yelfaare maŋ de la kũũ waneŋ, o meŋ ba boɔrɔ ka te kpi. O boɔrɔŋ ka te nyɛ nyɔvore naŋ ba taa baaraa. (Uro. 6:23) Lɛ oŋ boɔrɔ ka o e ko te. A zannoo ŋa poɔŋ, te na zannɛɛ soorebie ata yɛlɛ: (1) Sobuoŋ ka Jehoova ko nensaaleba naŋ ba pɛgeyi teɛretɔ? (2) Bo yɛlɛ ka a takoreŋ saŋa noba na da maŋ e a toɔ̃ pɛlɛ Jehoova poɔ? (3) Bo yɛlɛ ka Yezu e a toɔ̃ faa nensaaleba naŋ ba pɛgeyi na?

 SOBUOŊ KA JEHOOVA KO NENSAALEBA NAŊ BA PƐGEYI TEƐRETƆ?

3. Boŋ da vɛŋ ka Adama ane Hawaa da toŋ faaloŋ?

³ Saŋa na Jehoova naŋ da maale a dɔɔ dɛndɛŋ ane a pɔge dɛndɛŋ na, o da boɔrɔŋ ka ba taa popeɛloŋ. Azuŋ o da ko baŋ zie naŋ veɛlɛ ka ba kpeɛrɛ, a da ko ba kyɔɔtaa kaŋa ka ona la kultaa, ane popeɛloŋ toma ka ba tonɔ. Ba ferebo toma da la ka ba dɔge biiri a paale a teŋgane, a leɛre a donɛɛ zaa ka o leɛ paradiisi aŋa a Eedin gaadin na poɔŋ baŋ da kpeɛrɛ na. Kyɛ o da ko baŋ bege bonyeni kaŋa yoŋ. O da kpãã baŋ meŋ ka, ka ba naŋ sãã a bege a yi ba menne boɔbo poɔŋ a zagre o noɔre, ba na kpiŋ ba yelfaare zuŋ. Te zaa baŋɛɛ yɛlɛ naŋ da e. Malekefaa kaŋa naŋ da ba nɔŋ Naaŋmen, a ba nɔŋ ba meŋ da wa bɛnlɛɛ Adama ane Hawaa ka ba zagre Naaŋmen noɔre. Adama ane Hawaa da eɛ yɛlɛ na Setaana, a malekefaa naŋ da boɔrɔ ka ba e na. Ba da ba dɛle ba Saa Jehoova naŋ da wuli ba nɔmmo yaga zaa na, ba da toŋɛɛ faaloŋ. Aŋa lɛ na te naŋ baŋ na, yɛlɛ na Jehoova naŋ da yelka a na pɔge baŋ na da nyɛɛ eebo. Adama ane Hawaa naŋ da zagre Jehoova noɔre na zuŋ, ba da di la dɔgɛɛ yaga ba nyɔvore zemmo zaa poɔŋ. Ba da nyaaŋɛɛŋ, a baaraa zaa baŋ kpi.​—Mun. 1:28, 29; 2:8, 9, 16-18; 3:1-6, 17-19, 24; 5:5.

4. Bonso ka Jehoova kyiiri faaloŋ a kyɛ sonnɔ te ka te zɔɔtoɔ̃ faaloŋ? (Urom 8:20, 21)

⁴ Jehoova vɛŋɛɛŋ baŋ sɛge a posãã yɛlɛ ŋa eŋ a Baabole poɔŋ ka te na baŋ zanne yelnimizeɛ kaŋa yi be. A maŋ soŋ teŋ teŋ nyɛ ananso Jehoova naŋ kyiire faaloŋ yaga zaa lɛ. Faaloŋ maŋ sãã la te neŋ te Saa na niiloŋ, teŋ kpiire te yelfaare meŋ zuŋ. (Aiz. 59:2) Setaana kyiiree nensaaleba ane Naaŋmen, lɛŋ vɛŋ oŋ da bɛnle Adama ane Hawaa baŋ toŋ faaloŋ a kyɛ naŋ bɛnlɛ noba zenɛ ŋa. Azuŋ, saŋa na Adama ane Hawaa naŋ da zagre Jehoova noɔre na, Setaana da teɛrɛŋ ka o na toɔ̃ sãã la Jehoova poboɔbo na oŋ da taa na. Kyɛ o da ba baŋ lɛ Jehoova naŋ taa nɔmmo naŋ e zuluŋ yaga zaa aseŋ. Naaŋmen poboɔbo na oŋ da taa kyaare Adama ane Hawaa biiri na da naŋ ba leɛre. O nɔŋɛɛ nensaaleba yaga zaa, azuŋ o da ko la nensaaleba teɛretɔroo daadaalɛ. (Kanne Urom 8:​20, 21.) Jehoova da baŋɛɛŋ ka noba mine na nɔŋ la o yɛlɛ, a mɔɔrɔ ba moɔbo zaa meŋ ka ba erɛ o boɔbo. Jehoova terɛɛ vuo ka a noba ŋa na baŋ tage peɛloo, a nyɛ faabo a yi faaloŋ ane kũũ poɔŋ. Bo yɛlɛ ka Jehoova e a toɔ̃ vɛŋ ka lɛ nyɛ eebo?

5. Bo saŋa da la a dɛndɛŋ saŋa Jehoova naŋ ko nensaaleba naŋ ba pɛgeyi teɛretɔ? Manne wuli. (Munpiilee 3:15)

⁵ Kanne Munpiilee 3:15. Jehoova da ko la nensaaleba teɛretɔ a kyɛ yelka o na sãã la Setaana. A lɛ saŋa da la a dɛndɛŋ saŋa Naaŋmen naŋ da ko nensaaleba teɛretɔ. Naaŋmen da yeleeŋ ka, “yaaŋaa” kaŋa na wa faa la nensaaleba. A yaaŋaa na wa ŋmarɛɛ Setaana zu, ka nensaaleba yelwonii zaa baare. (1 Gyn. 3:8) Kyɛ, a lɛ yaaŋaa na na tuoree dɔgroŋ mine. Yɛlɛ naŋ na daŋ e la ka, Setaana na vɛŋeŋ ka o kpi. A yɛlɛ ŋa na kyɛrɛɛ Jehoova sukyiri yaga zaa. Kyɛ Jehoova da eɛ siri ka o tuore a sukyiri kyɛre yɛlɛ ŋa, a tere sori ka a “yaaŋaa” meŋ di a dɔgɛɛ ŋa ka lɛ na vɛŋ ka nensaaleba nyɛ nyɔvore.

WALA KA NOBA DA MAŊ E TAKOREŊ SAŊA NA, KYƐ TOƆ̃ PƐLE JEHOOVA POƆ?

6. Bo yɛlɛ ka dɔbɔ naŋ taa sagediibu, aŋa Abɛl ane Noowa, da e a toɔ̃ tage peɛle Jehoova?

⁶ A yi takoreŋ saŋa zaa a waana, fẽẽfẽẽ fẽẽfẽẽ Jehoova vɛŋɛɛŋ aŋ pɛle ko nensaaleba naŋ ba pɛgeyi, lɛ baŋ na baŋ e a tage peɛle o. Saŋa na Adama ane Hawaa naŋ wa zagre Jehoova noɔre a Eedin gaadin poɔŋ na, Abɛl naŋ da e ba biiri bayi soba da la neɛ naŋ e a dɛndɛŋ soba naŋ wuli sagediibu Jehoova eŋɛŋ. Abɛl naŋ da nɔŋ Jehoova, a boɔrɔ ka o pɛle O poɔ a kyɛ tage peɛloo na zuŋ, o da iree  sareka koo. Abɛl da eɛ pi-kyeenɛ, azuŋ o da nyɔgɛɛ o pi-pɔlɔ na mine a de iri sareka ko Jehoova. Wala ka Jehoova da e? O “da sage de la Abɛl yɛlɛ ane o sareka na.” (Mun. 4:4) Noba mine meŋ naŋ da nɔŋ Jehoova a kyɛ dɛloo da iree a sarekare ŋa meŋ taa ka Jehoova poɔ da pɛle neŋ ba sarekare na, ba kaŋa la, Noowa. (Mun. 8:20, 21) Jehoova poɔ naŋ da pɛle neŋ a sarekare ŋa zuŋ, o da wuleeŋ ka nensaaleba naŋ ba pɛgeyi yɛlɛ na baŋ pɛlɛɛ o poɔ a tage peɛloo meŋ. b

7. Aboraham da eɛ siri ka o na de la o meŋɛ bie iri sareka, boŋ teŋ zanne yi be?

⁷ Aboraham da taa la sagediibu naŋ e kpeɛŋaa yaga zaa Jehoova eŋɛŋ. Jehoova da yelkooŋ ka o e yelkaŋa naŋ na e kpeɛŋaa yaga zaa koo. O da yelka o de o bidɔɔ Aziki iri sareka koo. A yɛlɛ ŋa da na eɛ kpeɛŋaa yaga zaa a ko Aboraham. Kyɛ o da tu la Jehoova noɔre. Saŋa na oŋ da waana ka o ko o bidɔɔ na, Naaŋmen da yelkooŋ ka o ta ko a bie. Naaŋmen da baŋɛɛŋ ka, a yɛlɛ da naaŋ kyɛrɛɛ Aboraham sukyiri yaga zaa ka o naŋ da ko o meŋɛ bie. Kyɛ a yɛlɛ ŋa wuli teŋ lɛ Jehoova naŋ na e nendaarekaŋa. Jehoova da eɛ siri ka o de o meŋɛ Bidɔɔ nɔŋnaa iri sareka. A yɛlɛ ŋa wulee lɛ Jehoova naŋ nɔŋ nensaaleba seŋ.​—Mun. 22:1-18.

8. A dunni na Jehoova naŋ da yelka ba maŋ de ire sareka koroo na, bo yɛlɛ teŋ zanne yi be? (Liivai 4:27-29; 17:11)

⁸ Saŋa na Jehoova naŋ da de a Bege korɔ a Izerayɛl biiri na, a Bege da wulee sarekare yaga aŋ da maŋ seŋ ka ba iri ka lɛ vɛŋ ka ba toɔ̃ nyɛ ba yelbebe sudi. (Kanne Liivai 4:27-29; 17:11.) A sarekare ŋa da wuleeŋ ka Jehoova na wanɛɛ sareka kaŋa naŋ soma yaga zaa, a lɛ sareka na na faa la nensaaleba yi yelfaare poɔŋ. Naaŋmen da vɛŋɛɛŋ ka o daŋyelba sɛge daŋyelbo a kyaare a yaaŋaa. A daŋyelba da vɛŋɛɛŋ aŋ pɛle ka a yaaŋaa la Naaŋmen Bidɔɔ yeni naŋ e o yoŋ na, o na wa di la dɔgɛɛ a kyɛ kpi. O na waa ŋa pere ba naŋ ko ka ba de iri sareka. (Aiz. 53:1-12) Azuŋ Jehoova da eŋɛɛ noɔre ka o na de la o Bidɔɔ nɔŋnaa iri sareka a faa nensaaleba yi faaloŋ ane kũũ poɔŋ. A yɛlɛ ŋa eɛ nɔmãã yaga zaa. Jehoova iree a sareka ŋa ko ho meŋ!

BO YƐLƐ KA YEZU E KA O FAA NENSAALEBA YI YELBIERI POƆŊ?

9. Boŋ ka Gyɔɔn a Ŋmen koɔ̃ suoro da yelkyaare Yezu? (Hiburu 9:22; 10:1-4, 12)

⁹ Yuoni 29 Yezu Waabo Puoriŋ (Y.W.P.), Gyɔɔn a Ŋmen koɔ̃ suoro da nyɛ la Yezu a yelka: “Yɛ nyɛ a Naaŋmen Pilee. Ona la na peere a andonɛɛ yelbieri bare!” (Gyn. 1:29) A yelbie ŋa da wuleeŋ ka Yezu la a yaaŋaa na baŋ daŋ yel o yɛlɛ yuomo yaga naŋ pare na. Yezu na de la o meŋɛ nyɔvore a iri sareka. A yaaŋaa pãã da waɛŋ ka o faa nensaaleba yi faaloŋ poɔŋ.​—Kanne Hiburu 9:22; 10:​1-4, 12.

10. Wala ka Yezu da e a wuli ka o “waɛ la ka [o] boɔle” yelbe-erebɛ?

¹⁰ Yezu da de la o teɛroŋ zaa eŋ lɛ oŋ na soŋ noba enne naŋ da kyoɔre ba yelbebe zuŋ a kyɛ toŋboɔle ba ka ba wa e o potuuribo. O da baŋɛɛŋ ka bon na meŋɛ naŋ vɛŋ ka nensaaleba dire dɔgɛɛ la ka, te naŋ taa faaloŋ zuŋ. Azuŋ o da maŋ mɔɔrɔŋ ka o sonnɔ noba naŋ da dire dɔgɛɛ ba faaloŋ zuŋ. O da de la yelmannaa a wuli a yɛlɛ muni a yelka: “Noba naŋ taa laafeɛ ba boɔrɔ tegetegrɛ, kyɛ baalba la maŋ boɔrɔ tegetegrɛ.” O da la yeleeŋ ka: “N ba wa ka N boɔle nemmenne, kyɛ N waɛ la ka N boɔle yelbe-erebɛ.” (Mat. 9:12, 13) Lɛ meŋ neŋ o zu ka Yezu da e. Saŋa na pɔge kaŋa naŋ da de o niŋtaŋ pɛge neŋ Yezu gbɛɛ na, o da de la kɔkɔ baaloŋ a yel yɛlɛ koo, a kyɛ da di suuri koo meŋ. (Luk. 7:37-50) Yezu da wulee a Samareya pɔge na a yelmeŋɛ aneazaa ka o da baŋɛɛŋ  ka o neŋ dɔɔ kaŋa naŋ ba e o serɛ la laŋkpeɛrɛ. (Gyn. 4:7, 17-19, 25, 26) Naaŋmen gba da ko la Yezu faŋa ka o seŋ kũũni ka ba leɛ-iri voorɔ. Yezu da seŋ la dɔbɔ, pɔgeba, ane bibiiri a yi kũũni poɔŋ.​—Mat. 11:5.

11. Ananso la wala ka nensaaleba naŋ ba pɛgeyi da maŋ toɔ̃ tage peɛle Yezu?

¹¹ A gba ba e seɛlee noba naŋ da erɛ yelfaare yaga zaa naŋ da maŋ toɔ̃ tage peɛle Yezu. O da taa la yɛlɛ muni wommo a ko ba a da maŋ wulo ba nimimaaroŋ meŋ. Ba da ba maŋ zoro dabeɛ̃ ka ba yel yɛlɛ ko Yezu. (Luk. 15:1, 2) Yezu meŋ da maŋ pugi baŋ a kyɛ erɛ yelsonne korɔ ba ba naŋ da maŋ wulo sagediibu o eŋɛŋ na zuŋ. (Luk. 19:1-10) Yezu da taa la nimibaaloŋ yaga zaa aŋa o Saa. (Gyn. 14:9) Lɛ na Yezu naŋ da maŋ wulo nimimaaroŋ ane nyonono na vɛŋɛɛŋ teŋ baŋ ka Jehoova nɔŋɛɛ nensaaleba naŋ ba pɛgeyi, a boɔrɔ ka o soŋ ba ka ba zɔɔtoɔ̃ faaloŋ. Yezu da soŋɛɛ noba naŋ ba pɛgeyi baŋ e siri ka ba leɛre ba eebo a wa tuuruu.​—Luk. 5:27, 28.

12. Bo yɛlɛ ka Yezu da yel a kyaare o meŋɛ kũũ?

¹² Yezu da baŋɛɛŋ ka o waanaŋ ka o wa de o nyɔvore iri sareka. O da yelko la o potuuribo na ka, ba na iruuŋ tere ka ba kpa o daa zuŋ ka o kpi. Dayeni yoŋ naane oŋ da yel a yɛlɛ ŋa ko ba. (Mat. 17:22; 20:18, 19) Aŋa lɛ na Gyɔɔn ane a daŋyelba naŋ da daŋ yel biŋ na, o sareka na na iree faaloŋ yi a donɛɛ poɔŋ. Yezu da lɛ yeleeŋ ka, ka onaŋ wa kpi, o na “tage la nensaaleba zaa” waneŋ o meŋɛ seŋ. (Gyn. 12:32) Noba naŋ taa sagediibu Yezu eŋɛŋ, a tuuro o sowuli na baŋ toɔ̃ pɛlɛɛ Jehoova poɔ. Ka ba  naŋ e lɛ, ba na nyɛ la faabo “yi . . . yelbieri poɔ.” (Uro. 6:14, 18, 22; Gyn. 8:32) Azuŋ Yezu da de la nyaa a yi o poɔ zaa a e siri ka o kpi kũũ naŋ beɛrɛ yaga zaa kyɛ na toɔ̃ faa te.​—Gyn. 10:17, 18.

13. Sobuoŋ baŋ da tu kyɛ ko Yezu, ka bo yɛlɛ ka o kũũ na wuli te a kyaare Jehoova Naaŋmen? (Kaa a foto meŋ.)

¹³ Yezu zɔmeŋɛ kaŋa naŋ da peɛloo yaga zaa da irooŋ tere. Ka o dɔndɔnne da nyɔgoo, a to o zoma, a kyɛ ŋma zirii dɔgloo. Ba da di la o sɛrɛɛ ka o seŋnɛɛ kũũ a kyɛ dɔgroo meŋ. A baaraa zaa, a sogyare da de oŋ gaaneŋ a te kpa o daa zuŋ ka o kpi. Yezu da di la yelmennoŋ a are a dɔgɛɛ ŋa zaa noɔreŋ a te ta a baaraa. Kyɛ Jehoova gba da di la dɔgɛɛ yaga zaa a gaŋ Yezu saŋa na oŋ da kaara lɛ o Bidɔɔ na naŋ dire dɔgɛɛ yaga zaa na. Jehoova taa la a kpeɛ̃o ane a faŋa ka o da vɛŋ ka Yezu dɔgɛɛ na baare, kyɛ o da ba e lɛ. Jehoova nɔŋ la o bidɔɔ na yaga zaa, azuŋ bonso oŋ da tere sori oŋ di dɔgɛɛ yaga zaa a kyɛ kpi? Jehoova naŋ nɔŋ te zuŋ. Yezu da yeleeŋ ka: “Naaŋmen naŋ nɔŋ a tendaa noba yaga la so ka o de o Bidɔɔ yeni tere, ka ka neɛ na zaa naŋ na sage de o yɛlɛ na ta wɛ, kyɛ nyɛ nyɔvore naŋ ba taa baaroo.”​—Gyn. 3:16.

14. Boŋ ka Yezu sareka na wulo bo?

¹⁴ Yezu sareka na eɛ sieree naŋ e kpoŋ yaga zaa a wuli lɛ Jehoova naŋ nɔŋ Adama ane Hawaa biiri na. A wuleeŋ ka Jehoova nɔŋ boŋ yaga zaa. O da de la o meŋɛ Bidɔɔ nɔŋnaa a iri sareka aŋ da e yɛlɛ naŋ kyɛre o sukyiri yaga zaa, kyɛ oŋ na toɔ̃ faa bo yi faaloŋ ane kũũ poɔŋ. (1 Gyn. 4:9, 10) O boɔrɔŋ ka o soŋ te kaŋa la kaŋa zaa ka te naŋ puoruu aneazaa ka pampana te naŋ ba pɛgeyi. Nendaarekaŋa meŋ, o na iree faaloŋ bare kpɛlɛŋkpɛlɛŋ!

15. Bo aŋ seŋ ka te e sɛre kyɛ na baŋ nyɛ tɔnɔ yi a yɔɔdeɛbo sareka na naŋ e kyɔɔtaa Naaŋmen naŋ de ko te na?

¹⁵ A yɔɔdeɛbo sareka na Naaŋmen naŋ de o Bidɔɔ bonyeni yoŋ yɔɔ neŋ a sane na eɛ kyɔɔtaa o naŋ de ko te ka te baŋ toɔ̃ nyɛ te yelbebe sudi. Kyɛ ka teneeŋ na nyɛ te yelbebe sudi yi Naaŋmen zie yɛŋ, aseŋ ka te e yelkaŋa. Bo aŋ seŋ ka te e? Gyɔɔn a Ŋmen Koɔ̃ Suoro ane Yezu Krista meŋɛ wuli teŋ yɛlɛ naŋ seŋ ka te e: “Yɛ leɛ yɛ eebo, bonso, a (sazu) Naaloŋ peɛlɛ la.” (Mat. 3:1, 2; 4:17) Azuŋ aseŋ ka te e kaŋdabaŋkalɛ a leɛre te eebo, kyɛ na baŋ tage peɛle Naaŋmen a nyɛ te yelbebe sudi. Kyɛ ka ba naŋ yelka te e kaŋdabaŋkalɛ a leɛre te eebo, wala ka lɛ wuli? Ka sobuoŋ aŋ maŋ sonnɔ te teŋ pɛlɛ Naaŋmen poɔ aneazaa ka te ba pɛgeyi? Te na nyɛɛ a soorebie ŋa nɔɛ iribo a zannoo naŋ tɔnne na poɔŋ.