A bitontona Pɔɔl da sɛgɛɛ lɛtɛ te ko Kristabiiri naŋ da be Tɛsalonika na. O da ko baŋ kawane ka: “Yɛ baŋ ne a banaŋ naŋ ba tuuro a yɛlɛ te naŋ yele korɔ yɛ a lɛtɛ ŋa poɔ.” (2 Tɛs. 3:14) Saŋa kaŋa naŋ pare, te da yeleeŋ ka a lantaapuoruu nembɛrɛ la seŋ ka ba de a sowuli ŋa tonɔ neŋ toma. Ka neɛ kaŋaŋ baŋ perɛ a zagre ka o de Baabole sowuli tonɔ neŋ toma, haali saŋa na baŋ ko o soba kawane gbɛɛ yaga, lɛ yɛŋ a lantaapuoruu nembɛrɛ na baŋ terɛɛ yelyaga a kpãã a lantaapuoruu noba zaa. A lɛ puoriŋ, naaŋ moɔleba ba lɛ seŋ ka ba maŋ te laŋneŋ a soba ka ba pɛlɛ ba niŋe.

Kyɛ, te wa nyɛɛŋ ka aseŋ ka te leɛre a sowuli ŋa. Ka hooŋ kaa a sɛgre velaa, a waa ŋa Pɔɔl sowuli na da wulee gbɛre Kristabiiri yeni yeni zaa naŋ seŋ ka o de ka yɛlɛ mineŋ wa e. Lɛ zuŋ, a ba lɛ fɛre ka a lantaapuoruu nembɛrɛ maŋ tere yelyaga a kpãã a lantaapuoruu noba. Bonso teŋ waneŋ a leɛroo ŋa? Yɛ vɛŋ ka te kaa yɛlɛ na meŋɛ Pɔɔl naŋ da manna o yɛlɛ saŋa na oŋ da tere a sowuli na.

Pɔɔl da yeleeŋ ka, noba mine naŋ be a Tɛsalonika lantaapuoruu poɔŋ da ‘ba tuuro sori.’ Lɛ wuleeŋ ka ba da maŋ zagreŋ ka ba de sowuli naŋ be Naaŋmen Yelbiri na poɔŋ tonɔ neŋ toma. Saŋa kaŋa naŋ pare, o da te puore baŋ, a ko ba kawane ka: “Soba na zaa naŋ ba nɔŋ ka o toŋ toma ba seŋ ka o dire.” Aneazaa ka ba mine da taaɛ faŋa a na baŋ toŋ toma, kyɛ ba da maŋ zagreŋ ka ba toŋ toma a kaara ba menne. Ane meŋ, ba mine da maŋ de la ba nɔɛ te eŋnɛ noba yɛlɛŋ. Ka neɛŋ taa a gyogo ŋa, wala ka o Kristabitaaba na seŋ ka ba e a kyaaroo?​—2 Tɛs. 3:​6, 10-12.

Pɔɔl da yeleeŋ ka: ‘Yɛ baŋ o soba yɛlɛ.’ A Giriki yelbiri na Pɔɔl naŋ de toŋ neŋ toma na wuleeŋ ka, aseŋ ka te baŋ o soba yɛlɛ velaa, a kaara soŋ ka o ta wa bɛnle te ka te tɔglɔ o gyog-faare na. A lantaapuoruu noba zaa ka Pɔɔl da de a sowuli ŋa korɔ, a nembɛrɛ yoŋ naane. (2 Tɛs. 1:1; 3:6) Azuŋ, ka Kristabieŋ wa baŋ ka o Kristabitɔ kaŋa baŋɛɛ perɛ a zagre ka o de sowuli naŋ be Naaŋmen Yelbiri na poɔŋ tonɔ neŋ toma, ka o naŋ boɔrɔ, o na baŋ kaa iriŋ ka o koŋ lɛ “taa yelzaa ne” o soba.

Lɛ wuleeŋ ka aseŋ ka ba taa o soba aŋa neɛ ba naŋ iri bare a lantaapuoruu poɔŋ bee? Ai. Pɔɔl gaaɛ nimitɔɔre a yelka: “Yɛ kpãã ba ba naŋ waa yelderebɛ zuŋ.” Azuŋ, Kristabiiri neŋ o soba na maŋ laŋ erɛɛ yɛlɛ a Lammozieŋ ane a naaŋ moɔloo poɔŋ, kyɛ ka anaŋ wa ta nimipɛle yɛlɛ poɔŋ, ka ba naŋ boɔrɔ, ba koŋ sage laŋneŋ o soba. Ananso la wala? Pɔɔl wulee a muni ka: “Ka lɛ e ka vi kpɛ [o].” Ka teneeŋ tage te menne yi o soba zieŋ a sori ŋa poɔŋ na, aminekaŋaŋ vi na kpɛ oŋ o gyog-faa na yɛlɛ, ka lɛ vɛŋ ka o leɛre o gyogo ane o eebo.​—2 Tɛs. 3:14, 15.

Sobuo ka Kristabiiri na baŋ tu a de a kawane ŋa toŋ neŋ toma zenɛ ŋa? A dɛndɛŋ soba, aseŋ ka te peɛre baŋ velaa zaa ka o soba gyogo na sereŋ ‘ba tu sori,’ aŋa lɛ na Pɔɔl naŋ manne na. Te mine bebeŋ, te zomma maŋ ko teŋ sori ka te e yɛlɛ mine, ka te mine meŋ zomma ba maŋ ko te sori ka te e ana yɛlɛ na neŋ a zu. Te mine meŋ maŋ boɔrɛɛ yɛlɛ mine, kyɛ te mine ba nɔŋ a yɛlɛ togitogi. Kyɛ, a yɛlɛ ama taa naane ka Pɔɔl da manna a yɛlɛ. Pɔɔl da ba lɛ wulo ka, ka neɛŋ wa e te yelkaŋa ka a kpɛ te yaga zaa, aseŋ ka te de ka o soba eɛ yɛlɛ naŋ ba tu sori. Kyɛ, Pɔɔl da mannɛɛ Kristabiiri ba naŋ ko sowuli a yi Naaŋmen Yelbiri na poɔŋ, kyɛ baŋ baŋ perɛ a zagre ka ba de a sowuli toŋ neŋ toma.

Zenɛ ŋa, ka teneeŋ wa baŋ te Kristabitɔ kaŋa naŋ maŋ baŋ perɛ a zagre ka o de Baabole sowuli tonɔ neŋ toma, a te na baŋ de la gbɛre ka te koŋ maŋ lanna neŋ o soba nimipɛle yɛlɛ poɔŋ. A yɛlɛ ŋa eɛ te menne gbɛre te naŋ de, azuŋ te booree deme te ne ba naŋ laŋkpeɛrɛ yoŋ seŋ ka ba baŋ a yɛlɛ. Ka teneeŋ wa gaa a Lammozie, kyɛbee a be a naaŋ moɔloo poɔŋ, te neŋ o soba na baŋ laŋ erɛɛ yɛlɛ. Ka o soba wa leɛre o eebo, te neŋ o soba na baŋ laŋ erɛɛ yelzaa.