Ho kannɛɛ a yuoni ŋa A Kaakaara Ziduoruu gama na zaa soŋ bee? Tɔɔ, te nyɛ ka ho na baŋ iree a soorebie ŋa nɔɛ bee:

Ka ba naŋ yelka te naŋ kyɛnɛ ‘leɛrɛ te teɛroŋ,’ wala ka lɛ wuli? (Uro. 12:2)

Teŋ na tonɔ toŋ sonne yaga yoŋ naane. Kyɛ a wuleeŋ meŋ ka te maŋ peɛre te menne soŋ a nyɛ neɛ na meŋɛ naŋ la te te sukyiri poɔŋ, a mɔɔrɔ ka te leɛre te zemmo yɛlɛ zaa ka ane Naaŋmen boɔbo kyaare taa.​—w23.01, gam. 8-9.

Wala teŋ na baŋ e a taa teɛroŋ naŋ tori a kyaare yɛlɛ naŋ erɛ a donɛɛ poɔŋ na?

Te boɔrɔŋ ka te baŋ yɛlɛ naŋ erɛ a donɛɛ zuŋ pampana naŋ vɛŋ ka daŋyelbo nyɛrɛ eebo na. Te koŋ maŋ vɛŋ ka te dama diibu zaa kyaare yɛlɛ naŋ erɛ a donɛɛ zuŋ na, bonso a naŋ baŋ sãã la te noɔre yeni na. Kyɛ te na maŋ vɛŋeŋ ka te dama diibu kyaare yɛlɛ na Jehoova lantaapuoruu naŋ yel. (1 Kor. 1:10)​—w23.02, gam. 16.

Bo Tɛɛtɛɛ La Be Yezu Suobu Deebo Na Ane o Potuuribo Suobu Deebo Na Kpakyagaŋ?

A da ba fɛre ka o de o meŋɛ ko Jehoova, bonso ba da dɔgooŋ eŋ paaloŋ naŋ da de ba menne ko Naaŋmen. A da ba fɛre ka o e kaŋdabaŋkalɛ a sɔre o yelbebe sudi, bee a sɔre Naaŋmen ka o koo zoma naŋ soma, bonso o da eɛ dɔɔ naŋ pɛgeyi, a ba taa faaloŋ zaa o eŋɛŋ.​—w23.03, gam. 5.

Wala teŋ na baŋ e a soŋ te yɔɔmine ka ba iri yɛlɛ noɔre a lammo saŋa?

Te na baŋ vɛmeŋ ka te noɔre iribo e ŋmaaŋmaa lɛ, ka lɛ vɛŋ ka wagre bebe ka noba mine meŋ iri soorebie nɔɛ. Ta maŋ yel a yɛlɛ zaa. Lɛ na vɛŋeŋ ka ho taaba mine meŋ nyɛ a yɛlɛ mine yel.​—w23.04, gam. 23.

Boŋ ka a “Pɛgiyiibu Sokpoŋ” na Aizeeya 35:8 naŋ yel o yɛlɛ na are ko?

A sokpoŋ ŋa are ko la sori na a Gyuumine naŋ da tu gaa ba paaloŋ saŋa na baŋ da wa yi Baabilɔŋ na. Ka te zenɛ ŋa meŋ? Yuomo yaga mine naŋ pare sɛre ka yuoni 1919 ta na, noba mine da toŋ la tonkpeɛne mine—ba da leɛrɛɛ a Baabole eŋ kɔkɔ yobo poɔŋ a printaa, ane toŋ-yobo mine baŋ da toŋ. Naaŋmen puorebiiri kyɛnɛɛ a “Pɛgiyiibu Sokpoŋ” na zuŋ, a na soŋ teŋ ka te de puoruu naŋ seŋ neŋ korɔ Jehoova pampana ŋa, a kyɛ nyɛ maaloo yaga meŋ o Naaloŋ na poɔŋ nendaare kaŋa.​—w23.05, gam. 15-19.

Bo yɛlɛ ka Yeng Yelibie zuri 9 yelkyaare pɔgeba bayi mine yɛlɛ, ka bo kawane oŋ ko te kyaare ana pɔgeba bayi ŋa?

Yeng Yelibie yelee “pɔge damboli” kaŋa yɛlɛ a yelka, dɔɔ zaa naŋ sage o toŋboɔle, a na de oŋ gaa ne “Yaa” poɔ. O la yelee “yɛŋ” meŋ yɛlɛ, oŋ meŋ are ko a pɔge kaŋa, ona yɛŋ toŋboɔle na gɛrɛɛ “nimiyuo sori” ane nyɔvore poɔŋ. (Yeng. 9:​1, 6, 13, 18)​—w23.06, gam. 22-24.

Sobuo ka yɛlɛ na Naaŋmen naŋ da e ko Lɔt na wuli ka o taa la sigrimennoŋ ka o yɛlɛ meŋ ba e tuo te gaali?

Jehoova da yelko la Lɔt ka o zo gaa tanne zu. Lɔt da sɔrɛɛ Jehoova ka o vɛŋ ka o neŋ o yideme zo gaa Zooer. Jehoova da sagɛɛ o sɔroo na.​—w23.07, gam. 21.

Ka pɔge serɛŋ kaara pornography, bo oŋ na baŋ e?

A seŋ ka o teɛre baŋ ka o naaneŋ vɛŋ ka o serɛ na kaara pornography. O maŋ mɔɔrɔ ka o erɛ yɛlɛ naŋ na vɛŋ ka o neŋ Naaŋmen niiloŋ soma a maŋ teɛrɛ Baabole sɛgre naŋ yel pɔgeba mine naŋ da taa sukyiri dɔŋ a kyɛ nyɛ sukyiri dii. O na baŋ soŋɛɛ o serɛ ka o tage o meŋɛ yi yɛlɛ naŋ na baŋ vɛŋ ka o kpɛ pigrinyɛ poɔ.​—w23.08, gam. 14-17.

Ka teneeŋ e noba naŋ teɛrɛ yɛlɛ gɛrɛ tɔɔre, ka neɛ kaŋa wa yel yɛlɛ naŋ ba soma a kyaare te sagediibu, sobuo aŋ na baŋ soŋ te ka te e bɔĩn?

Te na baŋ teɛrɛɛ a soorebiri a soba naŋ soore bee yelkpeɛne onaŋ tuoro yɛlɛ gaa tɔɔre, ka a soŋ te ka te baŋ yɛlɛ o soba naŋ teɛrɛ bee lɛ yɛlɛ naŋ be ko o soba. Ana soŋ teŋ ka te e bɔĩn kyɛ iri a soba noɔre.​—w23.09, gam. 17.

Boŋ teŋ na baŋ zanne yi Mareya zie a kyaare lɛ teŋ na baŋ e a nyɛ kpeɛ̃o?

Saŋa na Mareya naŋ wa baŋ ka onaŋ na dɔge Yezu na, O da nyɛɛ faŋa emmo yi noba mine zieŋ. Gabereyɛl ane Elizabɛl da eŋɛɛ Mareya faŋa. Te meŋ na baŋ nyɛɛ faŋa emmo yi te taaba Kristabiiri zie.​—w23.10, gam. 15.

Aminekaŋaŋ, sobuo ka Jehoova na baŋ tu kyɛ iri te puoro nɔɛ ko te?

O eŋɛɛ noɔre ka O na maŋ kyɛnlɛ wonee te puoro. Ka teneeŋ wa puore sɔroo, O maŋ kaa nyɛŋ ka te puoro na neŋ o boɔbo kyaarɛɛ taa bee? (Jer. 29:12) Aminekaŋaŋ, O na maŋ iree a puoro ŋa taa nɔɛ so tɛɛtɛɛ poɔŋ a ko te, kyɛ o na maŋ sonnɔ teŋ meŋ.​—w23.11, gam. 21-22.

Urom 5:2 yelee “teɛretɔroo” yɛlɛ, kyɛ ananso la wala ka o wɛlbo 4 meŋ la yel o yɛlɛ?

Ka neɛŋ wa woŋ a duorisoŋ, o na baŋ wa taa la teɛretɔroo ka o na zeŋ la paradiisi poɔŋ a donɛɛ ŋa zuŋ. Kyɛ ka onaŋ wa tuoro yelkpeɛne a araa noɔreŋ a nyɛ ka Naaŋmen sonnooŋ, lɛ na vɛŋeŋ ka o teɛretɔroo na maaleŋ e kpeɛŋaa yaga zaa a kyɛ sagedi ka ana nyɛɛ eebo meŋɛmeŋɛ a koo.​—w23.12, gam. 12-13.