1. Ka teneeŋ wa teɛre Aboraham sagediibu yɛlɛ, bo soorebiri teŋ na baŋ soore te menne?

 ANEAZAA ka noba yaga woŋ la Aboraham yɛlɛ, kyɛ noba fẽẽ lɛ yoŋ la baŋ o yɛlɛ. Kyɛ hooŋ yɛŋ baŋɛɛ yɛlɛ yaga a kyaare Aboraham. Aŋa mannoo poɔŋ, ho baŋɛɛŋ ka ba maŋ yeleŋ ka Aboraham “waa [la] a banaŋ zaa naŋ sage de . . . sããkoma.” (Uro. 4:11) Kyɛ aminekaŋaŋ ho na sooreŋ ka, ‘Ka lɛ N na baŋ taa la sagediibu aŋa lɛ Aboraham naŋ da taa sagediibu na bee?’ Ɛɛ ho na baŋ eɛ lɛ.

2. Ananso la wala aŋ e nimizeɛ ka te zanne Aboraham zemmo yɛlɛ? (Gyimisi 2:​22, 23)

² Sori na kaŋa teŋ na baŋ taa sagediibu aŋa Aboraham la ka te zanna o zemmo yɛlɛ. Aboraham da maŋ erɛɛ yelzaa Naaŋmen naŋ yelka o e. O da tu la Naaŋmen noɔre a da gaa teŋ tɔɔre kaŋa a te kpeɛrɛ tentire pooreŋ yuomo yaga, a da e siri meŋ ka o de o bidɔɔ nɔŋnaa Aziki iri sareka ko Naaŋmen. Aboraham naŋ da taa sagediibu naŋ e kpeɛŋaa Naaŋmen eŋɛŋ na zuŋ oŋ da e a yɛlɛ ŋa zaa. Aboraham sagediibu ane yɛlɛ na zaa oŋ da e na zuŋ, Naaŋmen poɔ da pɛlɛɛ o yɛlɛ, azuŋ o da wa eɛ Naaŋmen zɔmeŋɛ. (Kanne Gyimisi 2:​22, 23.) Jehoova boɔrɔŋ ka te zaa, ane hooŋ meŋ wa e o zɔmenne ka o poɔ pɛle neŋ te yɛlɛ. Azuŋ oŋ da vɛŋ ka a Baabole sɛgsɛgreba Pɔɔl ane Gyimisi sɛge yɛlɛ mine kyaare Aboraham zemmo yɛlɛ. Te na wa zanne nyɛɛ yɛlɛ na Urom zuri 4 ane Gyimisi zuri 2 naŋ yelkyaare Aboraham zemmo yɛlɛ. Pɔɔl ane Gyimisi zaa da yelee yelnimizeɛ kaŋa a kyaare Aboraham.

3. Bo sɛgre la ka Pɔɔl ane Gyimisi zaa da yel o yɛlɛ?

 ³ Pɔɔl ane Gyimisi zaa da yelee yɛlɛ naŋ be Munpiilee 15:​6, be yeleeŋ ka: “[Ka Aboraham] da sage Jehoova di. Ka Jehoova [nyɛ ka a eɛ] sontuubu.” Ka neɛ yɛlɛŋ wa pɛle Jehoova poɔ, lɛ wuleeŋ ka o nyɛɛŋ ka a soba eɛ nemmeŋɛ bee o ba taa saanaa zaa. A eɛ nɔmãã ka Naaŋmen nyɛ nensaalaa naŋ ba pɛgeyi ka o eɛ neɛ naŋ ba taa saanaa zaa! Nɔkpeɛne zaa kyebe ka lɛ hoŋ boɔrɔ ka Naaŋmen nyɛ ho meŋ, lɛ meŋ na baŋ eŋ. Pampana te waanaŋ ka te nyɛ ananso Naaŋmen naŋ da boɔle Aboraham ka nemmeŋɛ ane lɛ aŋ seŋ ka te meŋ e ka Naaŋmen boɔle te meŋ nemmenne.

4. Boŋ na baŋ pigi nensaaleba sori ka ba e nemmenne?

⁴ A lɛtɛ na Pɔɔl naŋ da sɛge ko a Urom deme na, Pɔɔl da yeleeŋ ka nensaaleba zaa e la yelbebe deme. (Uro. 3:23) Azuŋ wala ka te yɛlɛ na baŋ pɛle Naaŋmen poɔ ka o boɔle te ka nemmenne, bee noba naŋ ba taa saanaa zaa? Pɔɔl da de la Aboraham zemmo yɛlɛ na a soŋ yelmeŋɛ Kristabiiri zaa ka ba nyɛ a soorebiri ŋa noɔre iribo.

5. Ananso la wala ka Jehoova da boɔle Aboraham ka nemmeŋɛ? (Urom 4:​2-4)

⁵ Jehoova da boɔlɛɛ Aboraham ka nemmeŋɛ saŋa na oŋ da be Keenan teŋɛ na. Jehoova da ba boɔle Aboraham nemmeŋɛ o naŋ da tuuro a Moosis Bege na zuŋ. Wala teŋ e baŋ lɛ? (Uro. 4:13) Bonso, saŋa na Naaŋmen naŋ da boɔle Aboraham nemmeŋɛ na, yuomo 400 puoriŋ oŋ pãã da de ana Bege na ko a Izerayɛl paaloŋ. Azuŋ ananso la wala ka Naaŋmen da boɔle Aboraham nemmeŋɛ? Jehoova da wulee nimibaaloŋ naŋ e zuluŋ a ko Aboraham a da boɔloo nemmeŋɛ o sagediibu zuŋ.—Kanne Urom 4:​2-4.

6. Ananso la wala ka Jehoova na baŋ boɔle yelbe-erɛ nemmeŋɛ?

⁶ Pɔɔl da yeleeŋ ka ka neɛŋ taa yeldeebo Naaŋmen eŋɛŋ, “a yeldeebo ŋa tɔ la ka ba na de ka o waa mennoŋ.” (Uro. 4:5) Pɔɔl da lɛ yeleeŋ ka: “Aŋa lɛ Deevid naŋ da yeli na, ka Naaŋmeneŋ ba kaara neɛ yel-eree kyɛ nyɛ ka o soba eɛ nemmeŋɛ, o soba na taa la popeɛloŋ. Ŋaa oŋ da yel: ‘Banaŋ yelbebe suuri ba naŋ di ko ba, ane banaŋ yelbebe ba naŋ pɔge nyɛ la maaloo; soba na a Daana naŋ ba de o yelbebe saanaa tuo o nyɛ la maaloo.’” (Uro. 4:​6-8; Yiem. 32:​1, 2) Bana na zaa naŋ taa sagediibu Naaŋmen eŋɛŋ na, o maŋ di la suuri ko ba. O maŋ di la ba yelbebe suuri ko ba kpɛlɛŋkpɛlɛŋ a ba maŋ la teɛrɛ ba yelbebe na yɛlɛ. O maŋ nyɛ baŋ ka ba ba taa saanaa zaa ba sagediibu zuŋ.

7. Ananso la wala teŋ na baŋ yelka Naaŋmen yelmeŋɛ puorebiiri naŋ da bebe takoreŋ saŋa na da eɛ nemmenne?

⁷ Aneazaa ka Naaŋmen da boɔlɛɛ Aboraham, Deevid, ane O yelmeŋɛ puorebiiri mine ka nemmenne, kyɛ ba da eɛ noba naŋ ba pɛgeyi a e yelbebe deme meŋ. Kyɛ Naaŋmen da nyɛɛŋ ka ba eɛ noba naŋ ba taa saanaa zaa ba sagediibu zuŋ, agaŋaazaa ka o naŋ wa de ba manne ne noba naŋ ba taa sagediibu o eŋɛŋ na. (Efe. 2:12) A lɛtɛ na Pɔɔl naŋ da sɛge ko Urom deme na poɔŋ, o da vɛŋɛɛŋ aŋ pɛle ka aseŋ ka te taa sagediibu sɛre kyɛ na baŋ e Naaŋmen zɔmenne. Aboraham ane Deevid da eɛ Naaŋmen zɔmenne ba sagediibu zuŋ. Te meŋ na baŋ eɛ Naaŋmen zɔmenne te sagediibu zuŋ.

8-9. Bo teɛroŋ naŋ ba tori la ka noba mine taa kyaare yɛlɛ na Pɔɔl ane Gyimisi naŋ da sɛge na? Ka ananso la wala?

⁸ Yuomo yaga la ŋa ka Zirii Kristabiiri ŋmeɛrɛ nɔkpeɛne kyaare sagediibu yɛlɛ ane lɛ o  toma naŋ e nimizeɛ seŋ. Zirii Kristabiiri puore wedeɛreba mine maŋ wuloŋ ka yɛlɛ na yoŋ aŋ seŋ ka ho e kyɛ toɔ̃ nyɛ faabo la ka ho sage a Daana Yezu Krista di. Aminekaŋaŋ ho na woŋeŋ baŋ maŋ yelka, “Sage Yezu di a nyɛ faabo.” Ba mine gba maŋ yeleŋ ka Pɔɔl da yeleeŋ ka: “Naaŋmen ba [maŋ] kaara neɛ yel-eree kyɛ nyɛ ka o soba eɛ nemmeŋɛ.” (Uro. 4:6) Kyɛ ba mine meŋ maŋ yeleŋ ka, ka hooŋ maŋ gɛrɛ ziiri na a puoruu deme naŋ yelka a eɛ forifori a kyɛ erɛ yelsonne, ho na ‘nyɛ la faabo.’ Aminekaŋaŋ ba maŋ de la yɛlɛ naŋ be Gyimisi 2:24 toŋ ne toma: “Neɛ tontonnee la maŋ vɛŋ ka o e nemmeŋɛ kyɛ a ba e o yeldeebo yoŋ.”

⁹ Sagediibu tɛɛtɛɛ ŋa noba naŋ taa na zuŋ, Baabole gaŋ-baŋneba mine teɛrɛŋ ka Gyimisi ane Pɔɔl da ba laŋ teɛroŋ a kyaare yɛlɛ neɛ naŋ seŋ ka o e a toɔ̃ pɛle Naaŋmen poɔ. Aminekaŋaŋ Zirii Kristabiiri puoruu wedeɛreba na yeleŋ ka Pɔɔl da sagedieŋ ka sagediibu yoŋ aŋ seŋ ka neɛ taa kyɛ na toɔ̃ pɛle Naaŋmen poɔ, ka Gyimisi meŋ da sagedi ka aseŋ ka neɛ erɛ yelsonne sɛre kyɛ na toɔ̃ pɛle Naaŋmen poɔ. Ŋmenpuore yɛlɛ professor kaŋa yeleeŋ ka: “Gyimisi da ba baŋ ananso Pɔɔl naŋ yelka aseŋ ka neɛ taa sagediibu yoŋ kyɛ na baŋ pɛle Naaŋmen poɔ, azuŋ o neŋ o da ba laŋ teɛroŋ.” Kyɛ Jehoova la da ko Gyimisi ane Pɔɔl a vooroŋ soŋ baŋ sɛge yɛlɛ na ba naŋ sɛge na. (2 Tim. 3:16) Lɛ wuleeŋ ka yelkaŋa zuŋ vɛŋ ka tɛɛtɛɛ be ba yelyaga na poɔŋ. Ka teneeŋ boɔrɔ ka te baŋ yɛlɛ na baŋ da wulo meŋɛmeŋɛ, aseŋ ka te peɛre baŋ yɛlɛ na zaa baŋ da sɛge ba lɛtare na poɔŋ.

10. Bo “toma” la ka Pɔɔl da yele a yɛlɛ? (Urom 3:​21, 28) (Kaa a foto meŋ.)

¹⁰ Bo “toma” yɛlɛ la ka Pɔɔl da yel a yɛlɛ Urom 3 ane 4 poɔŋ? O da yelee a Moosis bege  na tuubu yɛlɛ, ona ka Jehoova da de ko a Izerayɛl biiri na. (Kanne Urom 3:​21, 28.) A waa ŋa Pɔɔl saŋa na, a Kristabiiri na naŋ da e Gyuumine na da teɛrɛŋ ka aseŋ ka ba naŋ tuuro a Moosis Bege na. Azuŋ Pɔɔl da de la Aboraham zemmo yɛlɛ na manne wuli ka a ba seŋ ka neɛ tuuro a Bege sɛre kyɛ na baŋ pɛle Naaŋmen poɔ. Kyɛ o da vɛŋɛɛŋ aŋ pɛle ka a seŋɛɛŋ ka te taa sagediibu. A yɛlɛ ŋa eŋnɛɛ faŋa yaga zaa, bonso a maŋ vɛŋeŋ teŋ baŋ ka te na baŋ eɛ nemmenne Naaŋmen nimitɔɔreŋ. Lɛ wuleeŋ ka ka teneeŋ taa sagediibu Naaŋmen ane Krista eŋɛŋ, Naaŋmen poɔ na pɛlɛɛ te yɛlɛ.

11. Bo “toma” yɛlɛ la ka Gyimisi da yele a yɛlɛ?

¹¹ Kyɛ “toma” na yɛlɛ naŋ be Gyimisi zuri 2 na ba yele a Moosis Bege tuubu yɛlɛ. Gyimisi da yelee toma, bee yɛlɛ na Kristabiiri naŋ maŋ erɛ ba zemmo poɔŋ bebiri zaa. A toma ŋa la maŋ wuli ka neɛ taa la sagediibu bee o ba taa sagediibu. Te nyɛ yelmannee ayi mine Gyimisi naŋ da de toŋ ne toma.

12. Sobuo ka Gyimisi wuli lɛ sagediibu neŋ toma naŋ kyaare taa? (Kaa a foto meŋ.)

¹² O dɛndɛŋ yelmannaa na poɔŋ, Gyimisi da yelee lɛ a naŋ e nimizeɛ ka Kristabiiri ta erɛ nɔnne. O da mannɛɛ dɔɔ kaŋa naŋ da wuli nimimaaroŋ ko dɔɔ bondaana kaŋa a kyɛ ba wuli nimimaaroŋ ko dɔɔ kaŋa naŋ e nandaana. Gyimisi da vɛŋɛɛŋ aŋ pɛle ka ka a dɔɔ ŋaŋ yelka o taa la sagediibu, kyɛ o yel-eree yɛŋ ba wuli ka o taa la sagediibu. (Gyi. 2:​1-5, 9) A yelmannaa ayi soba na poɔŋ, Gyimisi da yelee neɛ kaŋa naŋ nyɛ o ‘yɔɔdɔɔ bee o yɔɔpɔge naŋ ba taa bonsuurii bee bondirii,’ a kyɛ zagre ka o somoo. Ka ana soba ŋaŋ meŋ yelka o taa la sagediibu, kyɛ o yel-eree ba wuli ka o taa la sagediibu. Azuŋ ka Gyimisi da sɛge ka, “ka neɛŋ ba de toma poɔ o sagediibu eŋɛŋ, o sagediibu na kpieŋ.”—Gyi. 2:​14-17.

13. Bo yelmannaa ka Gyimisi de wuli ka aseŋ ka te de te yel-eree wuli ka te taa la sagediibu? (Gyimisi 2:​25, 26)

 ¹³ Gyimisi da yelee Reehab zemmo yɛlɛ ka o da deɛ o yel-eree wuli ka o taa la sagediibu. (Kanne Gyimisi 2:​25, 26.) O da woŋee Jehoova yɛlɛ a da sagedi ka Jehoova da soŋnɛɛ a Izerayɛl biiri. (Joos. 2:​9-11) Reehab da deɛ o yel-eree wuli ka o taa la sagediibu. O da faa la a Izerayɛl biiri pigripigriba bayi na nyɔvoɛ saŋa na baŋ da boɔrɔ ba ka ba ko ba na. Azuŋ aneazaa ka Reehab da ba e Izerayɛl bie, a da ba pɛgeyi meŋ, kyɛ Naaŋmen da nyɛ oŋ ka o eɛ nemmeŋɛ o sagediibu zuŋ aŋa Aboraham. Yɛlɛ te naŋ zanne yi Reehab zieŋ la ka, a eɛ nimizeɛ ka te de te yel-eree wuli ka te sereŋ taa la sagediibu.

14. Ananso la wala teŋ na baŋ yelka Gyimisi ane Pɔɔl yɛlɛ na ba zaa naŋ sɛge na ba kyaare taa?

¹⁴ Azuŋ aneazaa ka Pɔɔl ane Gyimisi zaa da yelee sagediibu ane o toma yɛlɛ, kyɛ sori na ba kaŋa zaa naŋ da tu kyɛ manne ba yɛlɛ na ba yi taa. Pɔɔl da yele korɛɛ a Gyuumine Kristabiiri na ka baŋ na tuuro a Moosis Bege na yoŋ daŋ koŋ baŋ vɛŋ ka Naaŋmen poɔ pɛle ne ba. Gyimisi meŋ da wuloŋ ka aseŋ ka Kristabiiri zaa wuli ka ba taa la sagediibu a yi baŋ na maŋ erɛ yelsonne korɔ ba taaba.

15. Bo yɛlɛ mine teŋ na baŋ e a wuli ka te taa la sagediibu? (Kaa a fotori meŋ.)

¹⁵ Jehoova ba yelka ka neɛŋ na e nemmeŋɛ aseŋ ka o e yɛlɛ na neŋ a zu Aboraham naŋ da e na. Yɛlɛ yaga bebeŋ teŋ na baŋ e a de wuli ka te taa la sagediibu. Te na baŋ ko la nempaala naŋ waana a lantaapuoruu waayaane, a sonnɔ te yɔɔmine naŋ be awonaa poɔŋ, a maŋ erɛ soŋ korɔ te yideme meŋ, ka teneeŋ erɛ lɛ, Naaŋmen poɔ na pɛle ne teŋ, a lɛ ko te maaloo meŋ. (Uro. 15:7; 1 Tim. 5:​4, 8; 1 Gyn. 3:18) Yelnimizeɛ kaŋa naŋ na baŋ wuli ka te taa la  sagediibu la ka teŋ na tonɔ a naaŋ moɔloo toma neŋ eŋnyagroŋ. (1 Tim. 4:16) Te zaa na baŋ de la te yel-eree wuli ka te taa la sagediibu ka Naaŋmen nɔ-ennee zaa na nyɛɛ eebo, ka yelzaa meŋ o naŋ yelka te e soma ko teŋ. Ka teneeŋ e lɛ, te na baŋ sagediŋ kpɛlɛŋkpɛlɛŋ ka Naaŋmen na nyɛ teŋ ka te eɛ nemmenne a wa e o zɔmenne meŋ.

16. Bo teɛretɔ ka Aboraham da taa, a taa sagediibu meŋ ka a na nyɛɛ eebo?

¹⁶ Urom zuri 4 meŋ lɛ wulee yelnimizeɛ kaŋa teŋ na baŋ zanne yi Aboraham zie. Ana sɛgre na wulo teŋ ka aseŋ ka te naŋ kyɛnɛ kaara soriŋ ka te teɛretɔ na na nyɛɛ eebo. Jehoova da eŋɛɛ noɔre ka a tuuro Aboraham eŋɛŋ “paalonne gyamaa” na nyɛɛ maaloo. Teɛre nyɛ nɔ-ennee naŋ soma yaga zaa Aboraham naŋ da kaara soriŋ na! (Mun. 12:3; 15:5; 17:4; Uro. 4:17) Kyɛ saŋa na Aboraham naŋ da wa nyɛ yuomo 100 ka Saara meŋ nyɛ yuomo 90 na, kyɛ ba da naŋ ba dɔge ba bidɔɔ na. Nensaaleba yɛŋ zieŋ a da waa ŋa Aboraham ane Saara koŋ baŋ lɛ dɔge bie. A da eɛ pigrinyɛ naŋ e kpoŋ a ko Aboraham. Kyɛ teɛretɔroo zuŋ, “o da sage deɛ la ka o na leɛ la, a nemboore yaga saa.” (Uro. 4:​18, 19) A baaraa zaa yɛlɛ na Aboraham naŋ da kaara soriŋ na da nyɛɛ eebo. O pɔge da dɔgɛɛ o bidɔɔ Aziki oŋ da kaara soriŋ saŋa zaa na.—Uro. 4:​20-22.

17. Wala teŋ e baŋ ka te na baŋ eɛ nemmenne Naaŋmen nimitɔɔreŋ, a kyɛ e o zɔmenne meŋ?

¹⁷ Te meŋ na baŋ pɛlɛɛ Naaŋmen poɔ ka o nyɛ te ka te eɛ nemmenne ane o zɔmenne aŋa Aboraham. Lɛ ka Pɔɔl da boɔrɔ ka o wuli saŋa na oŋ da sɛge ka: “Ba da ba sɛge a yelbie ama: ‘A da waa la mennoŋ koo’ kyaare ne a Aboraham yoŋ. Ba da sɛgaa la kyaare ne te meŋ. A na e la mennoŋ ko a te banaŋ meŋ naŋ de a Soba na naŋ e ka Yezu Krista leɛ-iri kũũni poɔ yɛlɛ.” (Uro. 4:​23, 24) Aŋa Aboraham, aseŋ ka te taa sagediibu naŋ e kpeɛŋaa, a tonɔ toŋ-sonne, a kyɛ taa sagediibu naŋ e kpeɛŋaa ka Naaŋmen nɔ-ennee zaa na nyɛɛ eebo. Pɔɔl da gaa la nimitɔɔre a te manne te teɛretɔ na yɛlɛ Urom zuri 5 poɔŋ. Te na zannɛɛ a yɛlɛ a zannoo naŋ tɔnne na poɔŋ.