NƆKPEƐNE zaa kyebe ka ho poɔ pɛlɛɛŋ neŋ kyɔɔtaare na zaa Jehoova naŋ ko bo na, ane lɛ o naŋ ko bo a vuo ka ho iri lɛ hoŋ boɔrɔ ka ho de ana kyɔɔtaare ŋa toŋ ne toma. A Baabole yeleeŋ ka dãã eɛ kyɔɔtaa naŋ yi Naaŋmen zie, o yeleeŋ ka: “Ba maŋ maalɛɛ tigri laare zuŋ, ka waiŋ maŋ waane popɛle.” (Ikil. 10:19; Yiem. 104:15) Kyɛ aminekaŋaŋ, ho nyɛɛŋ ka dããkpeɛne nyuubu maŋ de la toɔro wa pɔge noba. Kyɛ noba naŋ be a donɛɛ lombori zaa taa la teɛrɛ tɛɛtɛɛ a kyaare dããkpeɛne nyuubu. Boŋ na baŋ soŋ Kristabiiri ka ba de gbɛ-sonne a kyaare dããkpeɛne nyuubu?

Gbɛɛ zaa te naŋ maŋ derɛ te zemmo poɔŋ, te maŋ de Naaŋmen kawane tonɔ neŋ toma, a ta tere vuo ka teɛroŋ noba naŋ ŋmaa gyeere te naŋ taa na wulo te sori. Ka teneeŋ e lɛ, te na taa la popeɛloŋ te zemmo poɔŋ.

Ka hooŋ nyɛ, noba yaga naŋ be a donɛɛ zuŋ maŋ nyuuree dããkpeɛne yaga zaa. Noba maŋ nɔŋeŋ ka ba nyuuro dããkpeɛne bonso a maŋ ko baŋ pɛnnoo. Ba mine meŋ maŋ nyu la dããkpeɛne ka lɛ na vɛŋ ka ba inni ba yelkpeɛne ba naŋ tuoro. Ziiri yaga poɔŋ, noba maŋ teɛrɛŋ ka ka neɛŋ wa nyuuro dããkpeɛne a wuleeŋ ka o soba kyilɛɛŋ a taa faŋa meŋ.

Kyɛ Kristabiiri yɛŋ, Naaŋmen ko teŋ sowuli yɛŋ naŋ bebe. Aŋa mannoo poɔŋ, o soŋ teŋ teŋ baŋ dɔgɛɛ naŋ na yi a poɔŋ wa ka neɛŋ nyuuro dããkpeɛne te gaali. Ka hooŋ kanne Yeng Yelibie 23:​29-35, o wulee lɛ neɛ naŋ maŋ erɛ o yɛlɛ ka o naŋ wa nyu dãã kuoli ane dɔgɛɛ naŋ maŋ yi a poɔŋ wa. a Daniel naŋ e a lantaapuoruu neŋkpoŋ kaŋa mannɛɛ lɛ o zemmo naŋ da waa sɛre kyɛ oŋ wa zanne a yelmeŋɛ. O yeleeŋ ka “Dããnyukuoli da vɛŋɛɛŋ maŋ de gbɛɛ mine naŋ ba soma ka lɛ vɛŋ maŋ da e yɛlɛ mine naŋ ba soma fẽẽ zaa. Ka maaŋ naŋ wa teɛraa a maŋ dɔnnɔ maŋ.”

Boŋ na baŋ soŋ te ka te de gbɛ-sonne a kyaare dããkpeɛne nyuubu ka toɔrɔ naŋ maŋ yi dããnyukuoli poɔ na ta pɔge te? Aseŋ ka te taa teɛroŋ na Naaŋmen naŋ taa na a de lɛ tonɔ neŋ toma.

Yɛ vɛŋ ka te nyɛ yɛlɛ na a Baabole naŋ yelkyaare dããkpeɛne nyuubu ane ananso noba naŋ maŋ nyuuro dããkpeɛne.

Naaŋmen Yelbiri na ba yelka dããkpeɛne nyuubu eɛ faa. A Baabole gba yeleeŋ ka dãã nyuubu na baŋ vɛŋeŋ ka te taa popeɛloŋ. O yeleeŋ ka: “Dire ho siimaa ane popeɛloŋ, a nyuuro ho waiŋ ane popɛle.” (Ikil. 9:7) Saŋa kaŋa, Yezu da maŋ nyu la dãã, ka Jehoova yelmeŋɛ puorebiiri mine meŋ da maŋ nyu dãã.—Mat. 26:​27-29; Luk. 7:34; 1 Tim. 5:23.

Aneazaa ka Naaŋmen Yelbiri na ba yelka dããkpeɛne nyuubu eɛ faa, kyɛ o yelka dããnyukuoli yɛŋ eɛ yelfaa. O yeleeŋ peɛlaaŋ ka: “Yɛ ta nyu dãã kuoli.” (Efe. 5:18) O gba lɛ yeleeŋ ka “dããnyukuoliba . . . koŋ kpɛ Naaŋmen Naaloŋ poɔ.” (1 Kor. 6:10) Yelmeŋɛ la, Jehoova yeleeŋ ka dããnyu-gaalii ane dããnyukuoli ba soma fẽẽ zaa. Azuŋ te ta maŋ erɛ yɛlɛ aŋa lɛ noba naŋ ŋmaa gyeere te naŋ maŋ erɛ na, kyɛ te maŋ de Naaŋmen sowuli tonɔ neŋ toma.

Noba mine maŋ teɛrɛŋ ka ba na baŋ nyu la dãã yaga zaa kyɛ ba koŋ bugi. Kyɛ lɛ ba soma fẽẽ zaa. A Baabole vɛŋɛɛŋ aŋ pɛle ka ka neɛŋ e “dããnyu [gbaŋgbaa],” ana baŋ vɛŋeŋ ka o soba te e yɛlɛ naŋ ba soma fẽẽ zaa, ka a baŋ sãã o neŋ Naaŋmen niiloŋ. (Tit. 2:3; Yeng. 20:1) Yezu meŋ da yeleeŋ ka “dããnyukuoli” na baŋ vɛŋeŋ ka neɛ koŋ kpɛ Naaŋmen dompaalaa na poɔ. (Luk. 21:​34-36)  Boŋ na baŋ soŋ Kristabie ka o tage o meŋɛ yi dããnyukuoli eŋɛŋ ka toɔrɔ naŋ maŋ yi a poɔŋ wa na ta pɔgoo?

Ka teneeŋ wa boɔrɔ ka te nyu dããkpeɛne, a koŋ soma fẽẽ zaa ka te maŋ kaara lɛ noba naŋ ŋmaa gyeere te naŋ maŋ erɛ na. Kristabiiri maŋ de la gbɛɛ naŋ pɛlɛ Jehoova poɔ a kyaare bondidi ane dããnyu yɛlɛ. A Baabole teɛre teŋ ka: “Bonzaa yɛ naŋ nyuuro kyɛbee a dire kyɛbee ka yɛneeŋ erɛ yelzaa, yɛ maŋ eraa a de eŋnɛ Naaŋmen gyeremɛ.” (1 Kor. 10:31) Soorebie mine ane Baabole sowuli hoŋ na baŋ teɛre a yɛlɛ la ŋa:

Ka lɛ N maŋ nyu la dãã ka noba ta e ma seɛ la bee? Yiibu 23:2 yeleeŋ ka: “Ta wa tuuro gyamaa te tonɔ beu.” Jehoova da kpããna la a Izerayɛl biiri ka ba ta tuuro noba naŋ erɛ yɛlɛ naŋ ba pɛlɛ o poɔ. Ana kpããmo ŋa soma ko la Kristabiiri zenɛ ŋa meŋ. Ka teneeŋ vɛŋ ka te taaba bɛnle te eŋ dããnyukuoli eŋɛŋ, fẽẽfẽẽ fẽẽfẽẽ te koŋ lɛ tuuro Jehoova sowuli, lɛ na vɛŋeŋ ka te neŋ o niiloŋ sãã.—Uro. 12:2.

Ka lɛ N maŋ nyuuree dããkpeɛne ka noba na nyɛ ka N taa la faŋa bee? Noba mine sããkomyɛlɛ poɔŋ, dããkpeɛne nyu gaalii eɛ yɛlɛ ba naŋ maŋ erɛ wagre zaa. (1 Pit. 4:3) Ka hooŋ nyɛ, yɛlɛ naŋ be 1 Korinti 16:13 na eŋ teŋ faŋa ka: “Yɛ gu yɛmenne velaa, a taa a yɛ yeldeebo kpeɛŋaa, yɛ ta zoro dabeɛ̃, yɛ taa faŋa.” Ka lɛ dããkpeɛne nyuubu na baŋ vɛŋeŋ ka neɛ taa faŋa bee? Akai, lɛ koŋ baŋ e. Dããkpeɛne na baŋ vɛŋeŋ ka neɛ koŋ baŋ teɛre yɛlɛ soŋ a de gbɛre naŋ soma. Azuŋ ka neɛŋ wa nyuuro dããkpeɛne yaga, a ba wuli ka o soba taa la faŋa, kyɛ a wuleeŋ ka o soba eɛ damboli. Aizeeya 28:7 mannɛɛ neɛ dããkpeɛne naŋ vɛŋ oŋ de gbɛre naŋ ba soma, ka o soba yi la a soriŋ ka lɛ vɛŋ oŋ ŋmɛ gbɛre.

Jehoova yoŋ na baŋ ko te faŋa ka te de gbɛre naŋ soma, lɛ wuleeŋ ka teŋ na gu te menne velaa, a taa a te yeldeebo kpeɛŋaa. (Yiem. 18:32) Te na baŋ eɛ lɛ a yi teŋ na tage te menne yi yelzaa naŋ ba soma eŋɛŋ, a kyɛ maŋ derɛ gbɛɛ naŋ koŋ sãã te neŋ Jehoova niiloŋ. Yezu neŋ Jehoova niiloŋ da eɛ kpeɛŋaa saŋa na oŋ da be a donɛɛ zuŋ na, ka noba yaga meŋ da taa gyeremɛ koo bonso o da taa la nyaa, a da e siri ka o maŋ erɛ yɛlɛ meŋ naŋ soma.

 N maŋ nyu la dããkpeɛne ka lɛ na vɛŋ ka N inni N yelkpeɛne bee? A vooroŋ soŋ da soŋɛɛ yieloŋ yiele kaŋa oŋ sɛge ka: “Saŋa na yɛlɛ naŋ wa dɔɔnɔ ma yaga zaa, ho [Jehoova] maŋ dii la N sukyiri a ko ma emmaaroŋ meŋ.” (Yiem. 94:19) Ka yɛlɛ mineŋ wa dɔnnɔ bo, dɛle Jehoova ka o soŋ bo, ta dɛle dããkpeɛne. Yelkaŋa naŋ na baŋ soŋ bo ka a yɛlɛ ta dɔnnɔ bo yaga la ka ho maŋ puore sɔre Jehoova. Ba mine meŋ nyɛɛŋ ka ka ba naŋ bɔ kawaŋ sonne yi ba zɔmeŋɛ kaŋa naŋ kyile a lantaapuoruu poɔŋ zie a maŋ soŋ baŋ. Ka neɛŋ nyu dããkpeɛne ka lɛ na vɛŋ ka o inni o yelkpeɛne, lɛ na baŋ vɛŋeŋ ka a e mɔlɔ ko a soba ka o e yelfaa. (Hoz. 4:11) Daniel teŋ daŋ yel o yɛlɛ na yeleeŋ ka: “Yɛlɛ da maŋ dɔnnɔ maŋ ka N zoma meŋ dɔnnɔ ma. N da maŋ nyuuree dããkpeɛne ka lɛ na vɛŋ ka N inni yelkpeɛne N naŋ tuoro, kyɛ a da de la yelkpeɛne yaga wa pɔge ma, ka lɛ da vɛŋ maŋ kɔŋ N zɔmenne ka noba meŋ ba lɛ taa gyeremɛ ko ma.” A baaraa zaa boŋ da soŋ Daniel? O yeleeŋ ka, “N da wa nyɛɛŋ ka Jehoova yoŋ na baŋ soŋ ma, dããkpeɛne naane. Jehoova da soŋ maŋ maŋ toɔ̃ are N yelkpeɛne na noɔreŋ.” A yelmeŋɛ la ka Jehoova maŋ eɛ siri wagre zaa ka o soŋ te, ka te yelkpeɛne na gbaŋ waa ŋa tamaa zaa ba la kyebe.—Fil. 4:​6, 7; 1 Pit. 5:7.

Ka hooŋ maŋ nyu dããkpeɛne saŋa kaŋa, a na somaŋ ka ho de a soorebie ŋa peɛre ho meŋɛ soŋ nyɛ, ‘N booree neɛ kaŋa bee N zɔmeŋɛ kaŋa naŋ peɛle ma yelee yelkaŋa kyaare N dããkpeɛne nyuubu yɛlɛ bee?’ Ka lɛ na, a wuleeŋ ka dããkpeɛne nyuubu piili leɛrɛɛ ho gyogo kyɛ hoŋ ba baŋ. ‘Ka lɛ N maŋ nyu gaŋ la saŋa kaŋa naŋ pare bee?’ Lɛ aŋ na baŋ waa ko neɛ dããkpeɛne nyuubu naŋ piili ka a nyɔgoo. ‘Ka bebie awala mineŋ wa pare ka maaŋ ba nyu dããkpeɛne, N eŋɛ ba maŋ maana ma bee?’ Ka lɛ na, lɛ wuleeŋ ka dããkpeɛne nyuubu nyɔge boŋ bee a wa leɛ la ho gyogo naŋ na e kpeɛŋaa ko bo ka ho bare. Aminekaŋaŋ, lɛ na wuliŋ ka aseŋ ka ho nyɛ sommo naŋ seŋ neŋ ka a soŋ bo ka ho toɔ̃ bare.

Yelkpeɛne na dããkpeɛne nyuubu naŋ maŋ de wa pɔge noba na zuŋ, Kristabiiri mine ireeŋ ka ba koŋ nyu dããkpeɛne togitogi. Ba mine meŋ maŋ iriŋ ka ba koŋ nyu dããkpeɛne bonso a ba maŋ noma ko ba. Ka ho zɔmeŋɛ kaŋaŋ de ana gbɛre  ŋa kaŋa, ho na baŋ wulee nimimaaroŋ ane gyeremɛ koo a ta dire o sɛrɛɛ.

Aminekaŋaŋ ho nyɛɛŋ ka yɛŋ bebeŋ ka ho baŋ lɛ a naŋ seŋ ka ho nyu dããkpeɛne seŋ. Bee aminekaŋaŋ ho na baŋ biŋee bege a ko ho meŋɛ a kyaare gbɛre bo wala hoŋ na maŋ nyu dãã, kaapɔge dayeni daa gbuli zaa bee bondirii diibu saŋa. Ba mine meŋ maŋ iriŋ ka ba koŋ nyu dããkpeɛne mine boorɔ. Aŋa mannoo poɔŋ, ba maŋ nyu la waiŋ ane beer aŋ seŋ, kyɛ ba koŋ sage nyu dãã naŋ e kpeɛŋaa yaga bee dãã ba naŋ punlipunli lantaa aŋ e kpeɛŋaa yaga. Ka neɛŋ wa biŋ bege koo meŋɛ a kyaare lɛ oŋ na maŋ nyu dããkpeɛne seŋ, a na eɛ mɔlɔ koo ka o tuuraa. A ba seŋ ka Kristabie zoro vi, ka o naŋ de a gbɛre ŋa tɔ koo meŋɛ a e siri ka o de lɛ tonɔ ne toma.

Ka teneeŋ wa derɛ gbɛɛ a kyaare dããkpeɛne nyuubu, aseŋ ka te teɛrɛ te taaba meŋ yɛlɛ. Urom 14:21 yeleeŋ ka: “A na somaŋ yaga ka ho ta ɔɔ nɛne kyɛbee a nyu waiŋ kyɛbee a e yelzaa naŋ na vɛŋ ka ho yɔɔ ŋmɛ gbɛre.” Wala hoŋ na baŋ de a kawane ŋa toŋ neŋ toma? Wulo babiiloŋ nɔmmo. Ka ho neŋ neɛ kaŋaŋ be zie kaŋaŋ ka ho baŋ ka ka o naŋ nyɛ ka ho nyuuree dããkpeɛne o poɔ na sãã, nɔmmo zuŋ ho na baŋ iriŋ ka ho koŋ nyu dããkpeɛne ana saŋa na. Ka hooŋ e lɛ a wuleeŋ ka ho taa la gyeremɛ ko ho taaba a ba teɛrɛ ho yoŋ yɛlɛ kyɛ ho teɛrɛɛ ho taaba meŋ yɛlɛ.—1 Kor. 10:24.

Aminekaŋaŋ meŋ, a paaloŋ na hoŋ be na gɔmenante biŋee bege a kyaare dããkpeɛne nyuubu. Ana fɛreŋ ka Kristabie maŋ de ana bege na toŋ neŋ toma. Ana bege ŋa na baŋ wulee yuomo mine neɛ naŋ seŋ ka o nyɛ sɛre kyɛ na baŋ nyu dããkpeɛne, kyɛbee a ba seŋ ka ho mɔŋ lɔɔre ka hooŋ wa nyu dããkpeɛne, bee a de masine mine toŋ neŋ toma ka hooŋ wa nyu dããkpeɛne.—Uro. 13:​1-5.

Jehoova ko teŋ apoɔsori ka te de kyɔɔtaare na zaa onaŋ ko te na tonɔ neŋ toma lɛ te naŋ boɔrɔ. A kyɔɔtaa ŋa kaŋa la, Jehoova ko teŋ apoɔsori ka te menne maŋ de gbɛre a kyaare bondidi ane dããnyu yɛlɛ. Te mɔɔrɔ te mɔɔbo zaa ka te gbɛ deree zaa maŋ wuli ka te niŋe paɛ neŋ a kyɔɔtaa ŋa, ka a maŋ vɛŋ ka te Saa naŋ be sazuŋ poɔ pɛle te yɛlɛ.