1. Bonso ka Aboraham da na baŋ sagedi ka o na dɔgɛɛ bidɔɔ?

 JEHOOVA da eŋɛɛ o zɔmeŋɛ Aboraham noɔre ka o na dɔgɛɛ bidɔɔ kaŋa a tuuro o eŋɛŋ ka paalonne zaa nyɛ maaloo. (Mun. 15:5; 22:18) Aboraham da taa la sagediibu naŋ e zuluŋ Naaŋmen eŋɛŋ, azuŋ o da sagedieŋ ka Naaŋmen noɔre emmo na na nyɛɛ eebo. Kyɛ Aboraham da nyɛ la yuomo 100, ka o pɔge meŋ nyɛ yuomo 90 ka ba naŋ ba dɔge bie. (Mun. 21:​1-7) Kyɛ a Baabole yeleeŋ ka: “[Sagediibu zuŋ Aboraham] da sage deɛ la ka o na leɛ la, ‘a nemboore yaga saa,’ a kyaare ne lɛ ba naŋ da yeli.” (Uro. 4:18) Ho baŋɛɛŋ ka Aboraham teɛretɔ na da nyɛɛ eebo. O pɔge sereŋ da dɔge la o bidɔɔ Aziki oŋ da kaara soriŋ na. Ananso la wala ka Aboraham da taa sagediibu ka Jehoova na paalɛɛ noɔre na o naŋ eŋ na?

2. Bonso ka Aboraham da taa sagediibu ka Jehoova nɔ-eŋnaa na na nyɛɛ eebo?

² Aboraham naŋ da baŋ Naaŋmen soŋ na zuŋ, “o da sereŋ baŋ ka Naaŋmen na toɔ̃ e la bon na O naŋ da eŋ noɔre ka O na e la.” (Uro. 4:21) Jehoova poɔ da pɛle ne la Aboraham a da yelka o e la nemmeŋɛ o sagediibu zuŋ. (Gyi. 2:23) Aŋa lɛ Urom 4:18 naŋ yel na, Aboraham da taa la sagediibu ane teɛretɔ. Yɛ vɛŋ ka te pãã nyɛ yɛlɛ a bitontona Pɔɔl naŋ yel kyaare teɛretɔ yɛlɛ, aŋ be Urom zuri 5 poɔŋ.

3. Bo yɛlɛ ka Pɔɔl yelkyaare teɛretɔ?

³ Pɔɔl da wulee ananso teŋ na baŋ sagedi ka te “teɛretɔroo maŋ ko te la bambaare.” (Uro. 5:5) A lɛ soŋ te teŋ baŋ lɛ teŋ  na toɔ̃ e ka te Kristabiiloŋ teɛretɔroo na e kpeɛŋaa. Ka teneeŋ wa zanna yɛlɛ naŋ be Urom 5:​1-5 na, leɛteɛre nyɛ lɛ hooŋ meŋɛ naŋ toɔ̃ eŋ ho Kristabiiloŋ teɛretɔroo na faŋa a kyaare nendaare kaŋa yɛlɛ. A zannoo ŋa na soŋ boŋ ka ho nyɛ lɛ hoŋ na baŋ e ka ho teɛretɔ ho naŋ taa kyaare nendaare kaŋa na e kpeɛŋaa. Yɛ vɛŋ ka te daŋ zanne teɛretɔ na yɛlɛ Pɔɔl naŋ yelka o korɔ teŋ baŋbaare na yɛlɛ.

4. Bo yɛlɛŋ be Urom 5:​1, 2?

⁴ Kanne Urom 5:​1, 2. Pɔɔl da sɛgɛɛ a yelbie ŋa ko lantaapuoruu naŋ be Urom na. Te yɔɔmine na naŋ da bebe na da wa zannɛɛ Jehoova ane Yezu yɛlɛ, a wuli ka ba taa la sagediibu, a wa leɛ Kristabiiri. “Sagediibu zuŋ [Naaŋmen da] ŋmaa [baŋ] sɛrɛɛ ka [ba] eɛ sontuuribo,” a da de a vooroŋ soŋ sɔ ba sazu naaloŋ kãã. Ba da kaarɛɛ soriŋ ka ba na nyɛ la kyɔɔtaa kaŋa naŋ e tegroŋ yaga a da sagedi meŋ ka ba nu na kpɛ la a kyɔɔtaa ŋa.

5. Bo teɛretɔroo la ka bana na ba naŋ sɔ naaloŋ kãã na taa?

⁵ A puoriŋ Pɔɔl da sɛge te ko la a Kristabiiri naŋ be Efesu baŋ sɔ ba naaloŋ kãã na a kyaare teɛretɔroo na ba naŋ ko ba na. Ba na nyɛ la “a nensonne gbandiruŋ.” (Efe. 1:18) Pɔɔl da lɛ wulee a Kolosi deme meŋ zie baŋ na nyɛ ba kyɔɔtaa. O da yeleeŋ ka, “a teɛretɔroo ba naŋ biŋ ko yɛ a [sazu] poɔ.” (Kol. 1:​4, 5) Azuŋ a Kristabiiri ba naŋ sɔ naaloŋ kãã teɛretɔroo la ka, ba na seŋ baŋ yi kũũni poɔ ka ba do sazu a te poɔ Krista eŋɛŋ ka ba di naaloŋ.—1 Tɛs. 4:​13-17; Yel. 20:6.

6. Boŋ ka te yɔɔdɔɔ kaŋa yelkyaare o teɛretɔ na yɛlɛ?

⁶ A Kristabiiri ba naŋ sɔ naaloŋ kãã na de la a teɛretɔ ba naŋ taa na tegroŋ yaga zaa. Ba kaŋa baŋ boɔlɔ, Frederick Franz yeleeŋ a yi o sukyiri zaa ka: “Te teɛretɔroo na na nyɛɛ eebo meŋɛmeŋɛ, te bana na zaa naŋ poɔ a noba noɔre naŋ ta 144,000 na nyɛ la kyɔɔtaa na Jehoova naŋ eŋ noɔre ko te zaa na. Te kyɔɔtaa na na gaŋɛɛ bonzaa te naŋ daŋ taa te zemmo zaa poɔŋ.” Te Yɔɔdɔɔ Franz de la yuomo yaga  a puore Jehoova, ŋaa oŋ da yel yuoni 1991 poɔŋ: “[Te] teɛretɔroo na eɛ nanee yaga zaa a ko te. . . . Lɛ zaa te naŋ kyɛnle kɔɔre seŋ, kyɛ te naŋ na taa la nimipa yaga zaa a ko a teɛretɔ ŋa. Te teɛretɔroo na eɛ tegroŋ yaga zaa ko te, azuŋ te eɛ siri ka te kyɛnle, haali ka teneeŋ na de yuomo turituri a kyɛnloo. Te teɛretɔroo na maaleŋ eɛ tegroŋ yaga zaa ko ma a gaŋ saŋa zaa naŋ pare.”

7-8. Bo teɛretɔroo ka Jehoova puorebiiri yaga zie zaa taa? (Urom 8:​20, 21)

⁷ Zenɛ ŋa Jehoova puorebiiri yaga zie taa la teɛretɔroo kaŋa naŋ e o yoŋ. Ona la a teɛretɔroo na Aboraham naŋ da taa ka o na nyɛɛ nyɔvore naŋ ba taa baaraa a donɛɛ zuŋ kyɛ, Naaŋmen Naaloŋ na poɔŋ. (Hib. 11:​8-10, 13) Pɔɔl yelee yelkaŋa a kyaare ana teɛretɔroo ŋa naŋ e tegroŋ na. (Kanne Urom 8:​20, 21.) A piilee saŋa na ho naŋ zanne a noɔre emmo naŋ be a Baabole poɔŋ na, buo soba la hoŋ da kaara soriŋ yaga zaa ka ho nyɛ? Ka nendaare kaŋa ho na pɛgeyiŋ a koŋ lɛ erɛ yelfaare bee? Bee a da e boŋ seɛlee ka ho nɔŋneba naŋ kpi na na leɛ iri voorɔŋ a paradiisi poɔŋ? A “teɛretɔroo” na Naaŋmen naŋ ko te na zuŋ, yelsonne yaga bebeŋ teŋ kaara soriŋ ka te na nyɛŋ.

⁸ Ka te kaarɛɛ soriŋ ka te na nyɛɛ nyɔvore naŋ ba taa baaraa sazuŋ bee a teŋsare zuŋ, te zaa taa la teɛretɔroo naŋ e tegroŋ yaga zaa naŋ maŋ korɔ te popeɛloŋ. Te sagediibu te naŋ taa te teɛretɔ na eŋɛŋ na baŋ maaleŋ eɛ kpeɛŋaa yaga zaa. Yɛlɛ na Pɔɔl naŋ da lɛ sɛge na wuli teŋ lɛ aŋ na baŋ tu kyɛ nyɛ eebo. Yɛ vɛŋ ka te nyɛ yɛlɛ na o naŋ da sɛge a kyaare te teɛretɔroo na. Yɛlɛ na o naŋ sɛge na na ba soŋ teŋ ka te maaleŋ sagedi yaga zaa ka te teɛretɔroo na na nyɛɛ eebo meŋɛmeŋɛ.

9-10. Aŋa lɛ Pɔɔl naŋ da yel na, bo yɛlɛ aŋ seŋ ka Kristabiiri kaara soriŋ? (Urom 5:3) (Kaa a fotori meŋ.)

⁹ Kanne Urom 5:3. Ka hooŋ nyɛ, Pɔɔl yeleeŋ ka, ka teneeŋ wa tuoro yelkpeɛne te teɛretɔroo na maŋ maaleŋ eɛ kpeɛŋaa yaga zaa. Kaapɔge a na e teŋ nɔmãã. A yelmeŋɛ naŋ bebe la ka, Krista potuuribo zaa na baŋ tuoree dɔgroŋ. Te nyɛ Pɔɔl zemmo yɛlɛ. O da yelko la  bana na naŋ be Tɛsalonika na ka: “Saŋa na te naŋ da be yɛ zie, te da daŋ yeli ko yɛ la ka ba na dɔgre te la yaga. Yɛ nyɛ a la ka a sereŋ waa lɛ.” (1 Tɛs. 3:4) O da sɛge ko la a Korinti deme meŋ ka: “Yɔɔmine, te ba boɔrɔ ka yɛ be babammo poɔ a kyaare ne a woore na te naŋ da nyɛ . . . Ka te da ba la boɔrɔ ka te naŋ kyɛnɛ voorɔ.”​—2 Kor. 1:8; 11:​23-27.

¹⁰ Zenɛ ŋa meŋ, Kristabiiri na baŋ kaarɛɛ soriŋ ka ba meŋ na tuoree dɔgroŋ. (2 Tim. 3:12) Ka lɛ ho meŋ daŋ tuoree dɔgroŋ ho naŋ sage Yezu di a wa leɛ o potuuro na zuŋ bee? Aminekaŋaŋ ho booree deme ane ho zɔmenne na maŋ erɛ boŋ seɛ. Bee kaapɔge ba gba na e boŋ nimikuõ-yɛlɛ mine. Bee aminekaŋaŋ ho na tuoree dɔgroŋ yi ho tontoŋtaaba bee ho toma neŋkpoŋ zieŋ ho naŋ e yelmeŋɛ soba zuŋ? (Hib. 13:18) Ho paaloŋ gɔmenante iri dɔgrɔ boŋ ho naŋ moɔlɔ a duorisoŋ korɔ noba na zuŋ bee? Yeltuo zaa teŋ na tuore, kyɛ Pɔɔl yelka te taa popeɛloŋ. Bonso oŋ yel lɛ?

11. Bonso aŋ seŋ ka te e siri ka te are yelwonaa bee dɔgroŋ zaa noɔreŋ?

¹¹ Te na baŋ taa la popeɛloŋ ka teneeŋ wa tuoro yelkpeɛne, bonso a baaraa zaa a na vɛŋeŋ ka te taa gyog-sonne. Aŋa lɛ na Urom 5:3 naŋ yel na, “dɔgɛɛ diibu maŋ waana ne la kannyiri.” Kristabiiri zaa na tuoree yelkpeɛne, azuŋ aseŋ ka Kristabiiri zaa e siri ka ba na arɛɛ yelkpeɛne zaa noɔreŋ. Lɛ yoŋ na baŋ vɛŋ ka te teɛretɔ naŋ kyaare te nendaare kaŋa na nyɛ eebo. Te ba boɔrɔ ka te waa ŋa a bombie na naŋ le pikubo zuŋ Yezu yelmannaa na poɔŋ. A piilee saŋa na, ba da sage deɛ a Naaŋmen yelbiri neŋ popeɛloŋ, kyɛ ka “yelwonaa bee dɔgroŋ” kaŋaŋ wa pɔge ba, ba yeldeebo na maŋ leŋ wieoŋ lɛ. (Mat. 13:​5, 6, 20, 21) Yelmeŋɛ la, ka teneeŋ tuoro yelwonaa bee dɔgroŋ, a ba maŋ e mɔlɔ ka te are a noɔreŋ, kyɛ ka teneeŋ toɔ̃ e lɛ, maaloo yaga na yi la a poɔŋ wa. Sobuoŋ?

12. Bo tɔnɔ teŋ maŋ nyɛ ka teneeŋ wa di kannyiri a are yelkpeɛne noɔreŋ?

¹² A bitontona Gyimisi da yelee maaloo teŋ na nyɛ ka teneeŋ maŋ di kannyiri a are te yelkpeɛne noɔreŋ. O sɛgɛɛŋ ka: “Yɛ vɛŋ ka kannyiri toŋ o toma baare, ka lɛ vɛŋ ka yɛ paale a kyɛ tori yelzaa poɔŋ, a ta kɔŋ bonzaa.” (Gyi. 1:​2-4) Gyimisi da mannɛɛ kannyiri diibu yɛlɛ aŋa o naŋ taa yelkaŋa bee toma mine a naŋ seŋ ka o toŋ. Azuŋ, boŋ toma oŋ taa ka o toŋ? Ka teneeŋ maŋ di kannyiri a are te yelkpeɛne noɔreŋ, ana soŋ teŋ ka te maaleŋ taa kannyiri, sagediibu a kyɛ dɛle Naaŋmen meŋ yaga zaa. Kyɛ agaŋaazaa, te maŋ nyɛɛ tɔnɔ kaŋa naŋ e o yoŋ, ka teneeŋ wa dire kannyiri.

13-14. Ka teneeŋ maŋ di kannyiri a are te yelkpeɛne noɔre, bo tɔnɔ teŋ na nyɛ? Ka sobuo aŋ na baŋ eŋ te sagediibu na faŋa? (Urom 5:4)

¹³ Kanne Urom 5:4. Pɔɔl yeleŋ ka kannyiri diibu maŋ “waana ne [la] gyogo naŋ soma.” Ka hooŋ wa taa kannyiri diibu gyogo, ho na nyɛɛ Jehoova maaloo. Kyɛ lɛ ba wuli ka Jehoova poɔ maŋ pɛleŋ ka teneeŋ wa tuoro pigrinyɛ bee yelkpeɛne. Kyɛ o poɔ maŋ pɛleŋ ho naŋ toɔ̃ are ana yelkpeɛne na noɔreŋ. Nyɛ lɛ a naŋ eŋnɛ faŋa seŋ ka te baŋ ka Jehoova poɔ maŋ pɛleŋ ka teneeŋ wa toɔ̃ are te yelkpeɛne noɔreŋ!​—Yiem. 5:12.

¹⁴ Teɛre baŋ ka Aboraham da di la kannyiri a are o yelkpeɛne zaa noɔreŋ, azuŋ Jehoova poɔ da pɛle ne oŋ. Jehoova da nyɛɛŋ ka Aboraham eɛ sontuuro, azuŋ Oŋ da deo oŋ e o zɔmeŋɛ. (Mun. 15:6; Uro. 4: 13, 22) A na baŋ waaɛ lɛ ko te meŋ. Tonkpeɛne te naŋ tonɔ bee apoɔsoe te naŋ taa Jehoova puoruu poɔŋ naane oŋ maŋ kaa kyɛ ka o poɔ pɛle ne te, kyɛ o poɔ maŋ pɛle ne teŋ ka teneeŋ wa dire yelmennoŋ koroo aneazaa ka te tuoree yelkpeɛne. Yuomo na zaa te naŋ di, lɛ zaa te zemmo yɛlɛ naŋ waa bee bon zaa te naŋ taa, kyɛ te zaa na toɔ̃ di la kannyiri a are yelkpeɛne noɔreŋ.  Ho tuoree yelkpeɛne mine pampana a kyɛ yi yelmennoŋ poɔŋ a dire kannyiri bee? Ka lɛ la, teɛre baŋ ka Jehoova poɔ pɛle ne boŋ. Ka teneeŋ baŋ ka Jehoova poɔ pɛle ne teŋ, a na baŋ eŋ teŋ faŋa yaga zaa a kyɛ vɛŋ ka teɛretɔroo na te naŋ taa o eŋɛŋ na maaleŋ e kpeɛŋaa.

15. Bo yɛlɛ la ka Pɔɔl da lɛ yel, ka bonso aŋ na baŋ e nɔmãã ko noba mine?

¹⁵ Aŋa lɛ Pɔɔl naŋ da yel na, ka teneeŋ wa yi yelmennoŋ poɔŋ a di kannyiri a kyɛ are te yelkpeɛne noɔreŋ, Jehoova poɔ maŋ pɛlɛɛ te yɛlɛ. Te nyɛ lɛ Pɔɔl naŋ da lɛ yel: “Ka Naaŋmeneŋ wa boɔrɔ te yɛlɛ meŋ, a maŋ vɛmeŋ teŋ taa teɛretɔ, a teɛretɔ ŋa ba de te gɛrɛ neŋ posaanaa poɔ.” (Uro. 5:​4, 5) Kyɛ a yɛlɛ ŋa na baŋ eɛ nɔmãã ko noba mine. Ananso la wala? Bonso a piilee na Pɔɔl yeleeŋ aŋ be Urom 5:2 ka a Urom deme taa la teɛretɔroo, a “teɛretɔroo [ba] naŋ taa ka [ba] ne Naaŋmen na laŋ la puubu.” Azuŋ neɛ kaŋa na baŋ sooreŋ ka, ‘ka a Kristabiiri ŋaŋ taa teɛretɔroo, ananso la wala ka Pɔɔl da lɛ yel teɛretɔroo yɛlɛ ko ba a puoriŋ?’

16. Wala ka neɛ maŋ e a piili nyɛrɛ teɛretɔroo fẽẽfẽẽ fẽẽfẽẽ? (Kaa a fotori meŋ.)

¹⁶ Ka teneeŋ wa baŋ ka teɛretɔroo maŋ eɛ bonkaŋa naŋ maŋ baara, a na soŋ teŋ ka te baŋ yɛlɛ na Pɔɔl naŋ da yele na tɛgɛ. Aŋa mannoo poɔŋ: Ho teɛrɛɛ a dɛndɛŋ saŋa na ho naŋ woŋ a nɔmãã teɛretɔroo na naŋ be Naaŋmen Yelbiri poɔŋ na bee? Aminekaŋaŋ, ana saŋa na ho da teɛrɛɛŋ ka a duoro nomaŋ kyɛ a koŋ baŋ nyɛ eebo. Kyɛ saŋa na hoŋ wa zanna yɛlɛ yaga a kyaare Jehoova ane o noɔre emmo na, ho wa nyɛɛŋ ka a noɔre emmo ŋa sereŋ na nyɛɛ eebo meŋɛmeŋɛ.

17. Sobuo ka ho teɛretɔroo na maaleŋ baara yaga zaa ho meŋɛ de terebo ane ho suobu deebo puoriŋ?

¹⁷ Saŋa na gba hoŋ wa de ho meŋɛ ko Jehoova a de suobu baare na, ho wa zannɛɛ yɛlɛ yaga zaa a kyaare Jehoova a wa bamoo soŋ ka lɛ vɛŋ hoŋ maaleŋ nɔmmoo yaga zaa. Lɛ meŋ soŋ boŋ ka teɛretɔroo na ho naŋ taa kyaare nendaare kaŋa na maaleŋ e kpeɛŋaa  yaga. (Hib. 5:13–6:1) Aminekaŋaŋ, ho meŋ nyɛɛ yɛlɛ naŋ be Urom 5:​2-4 ho zemmo poɔŋ. Ho tuoree yelkpeɛne yaga a kyɛ toɔ̃ are a noɔreŋ, ka Jehoova meŋ wuli bo ka o poɔ pɛlɛɛ ho yɛlɛ. Ho naŋ baŋ ka o nɔŋ boŋ ka o poɔ pɛle ho yɛlɛ zuŋ, a maaleŋ eŋɛɛ ho sagediibu faŋa ka o na paalɛɛ nɔɛ na zaa o naŋ eŋ ko bo na. Ho teɛretɔroo na maaleŋ eɛ kpeɛŋaa yaga zaa a gaŋ saŋa kaŋa naŋ pare. Ho wa sagedieŋ meŋ ka a na nyɛɛ eebo meŋɛmeŋɛ a ko bo. A teɛretɔroo ŋa maaleŋ nyɛ la kpeɛ̃o yaga zaa ho zuŋ. Lɛ wuleeŋ ka a leɛrɛɛ ho zemmo yɛlɛ zaa, lɛ hoŋ maŋ taa ho yideme, ho gbɛ deree, ane lɛ hoŋ maŋ de ho wagre tonɔ ne toma.

18. Bo yɛlɛ la ka Jehoova yel a de wuli ka o na paalɛɛ o nɔ-eŋnee?

¹⁸ A bitontona da lɛ yelee yelnimizeɛ kaŋa kyaare teɛretɔroo na te naŋ maŋ nyɛ ka Naaŋmen poɔŋ wa pɛle ne te. O maaleŋ eŋ boŋ faŋa ka ho teɛretɔroo na na nyɛɛ eebo. Bonso teŋ na baŋ sage a yɛlɛ ŋa di yaga zaa? Pɔɔl da lɛ yel ko la a Kristabiiri, yɛlɛ na Naaŋmen naŋ yel a de wuli ka o na paalɛɛ o nɔ-ennee na: “A teɛretɔ ŋa ba de te gɛrɛ neŋ posaanaa poɔ; bonso ba tu la Naaŋmen vooroŋ soŋ na eŋɛŋ a kyɛ kyiri Naaŋmen nɔmmo na o naŋ de ko te na eŋ te sukyieŋ.” (Uro. 5:5) Nɔkpeɛne zaa kyebe ka ho na baŋ sagediŋ ka a teɛretɔroo ŋa na nyɛɛ eebo meŋɛmeŋɛ.

19. Bo yɛlɛ teŋ na baŋ sagedi meŋɛmeŋɛ a kyaare te teɛretɔroo na?

¹⁹ Leɛteɛre nyɛ noɔre na Naaŋmen naŋ da eŋ ko Aboraham, lɛ na o poɔ naŋ da pɛle ne o, ane lɛ oŋ da de Aboraham ka O zɔmeŋɛ na. Aboraham teɛretɔroo na da nyɛɛ eebo meŋɛmeŋɛ. A Baabole yeleeŋ ka: “Azuŋ saŋa na Aboraham naŋ da di kannyiri na, o nu da kpɛɛ a noɔre emmo.” (Hib. 6:15; 11:​9, 18; Uro. 4:​20-22) O da ba di vi. Ka hooŋ meŋ wa di yelmennoŋ te ta a baaraa, nɔkpeɛne zaa kyebe ka ho meŋ na nyɛ la a kyɔɔtaa na Jehoova naŋ eŋ noɔre ko bo na. Ho teɛretɔroo na na nyɛɛ eebo meŋɛmeŋɛ; a na wa ko boŋ popeɛloŋ yaga, posaanee naane! (Uro. 12:12) Pɔɔl da sɛgɛɛŋ ka: “A teɛretɔroo Naaŋmen paale yɛ ne popeɛloŋ ane emmaaroŋ a yɛ yeldeebo poɔ, ka ka yɛ na paale ne teɛretɔroo a vooroŋ soŋ kpeɛ̃o eŋɛ.”—Uro. 15:13.