1. Bo yɛlɛ aŋ seŋ ka Kristabi-dɔbɔ e ka ba yɛlɛ toɔ̃ maale?

 NAA Deevid da yelko la Soolomoŋ ka: “Eŋ faŋa, a wuli ka dɔɔ la bo.” (1 Nam. 2:​1-3) Zenɛ ŋa Kristabi-dɔbɔ zaa maŋ mɔɔrɛɛ ba mɔɔbo zaa ka ba de a kawane ŋa toŋ neŋ toma. Ka banaŋ na toɔ̃ e lɛ, aseŋ ka ba de Jehoova bege a neŋ o sowuli tonɔ neŋ toma ba zemmo zaa poɔŋ. (Luk. 2:52) Bonso aŋ fɛre ka te yɔɔdɔba naŋ e baapaalba baa a wa leɛ Kristabiiri naŋ kyile?

2-3. Ananso la wala aŋ seŋ ka Kristabi-dɔbɔ baa wa kyile Kristabiiloŋ poɔŋ?

² Kristabi-dɔbɔ maŋ taa la ferebo toma yaga ba booree poɔŋ ane a lantaapuoruu poɔŋ. Te yɔɔdɔbɔ naŋ e baapaalba, nɔkpeɛne zaa kyebe ka yɛ maŋ teɛrɛɛ ferebo toma na yɛŋ na nyɛ nendaare kaŋa na yɛlɛ. Aminekaŋaŋ ho na boɔrɔŋ ka ho wa leɛ paaneɛ, a lantaapuoruu nembɛrɛ sonnɔ kaŋa, a puoriŋ ka ho wa leɛ a lantaapuoruu neŋkpoŋ kaŋa. Bee kaapɔge ho na boɔrɔŋ ka ho de pɔge a dɔge biiri. (Efe. 6:4; 1 Tim. 3:1) Ka hooŋ na baŋ ta ana yɛlɛ ŋa zaa ka ho yɛlɛ maale soŋ ko bo, aseŋ ka ho baa a wa leɛ Kristabie naŋ kyile. b

³ Boŋ na baŋ soŋ bo ka ho baa a wa leɛ Kristabie naŋ kyile? Yɛlɛ mine bebeŋ aŋ seŋ ka ho zanne eebo. Azuŋ boŋ hoŋ na baŋ e pampana a sɛgre ho meŋɛ ko ferebo toma zaa hoŋ na nyɛ nendaare kaŋa?

4. Yeŋ ho na baŋ nyɛ noba mine ewuli sonne hoŋ na baŋ tɔgle? (Kaa a foto meŋ.)

⁴ Tɔglɔ noba mine ewuli sonne. A Baabole taa la ewuli sonne yaga bi-pɔlɔ naŋ na baŋ tɔgle. A dɔbɔ ŋa naŋ da bebe takoreŋ  saŋa na da nɔnɔ la Naaŋmen, a da toŋ tonkpeɛne yaga a kaa Naaŋmen puorebiiri zu soŋ. Ho na baŋ nyɛ la Kristabi-dɔbɔ naŋ kyile ho booree ane a lantaapuoruu poɔŋ. (Hib. 13:7) Ho na baŋ tɔglɛɛ Yezu Krista ewuli sonne na meŋ. (1 Pit. 2:21) Ka hooŋ wa zanna a dɔbɔ ŋa ewuli sonne na, kaara ka ho nyɛ gyog-sonne na baŋ taa ka a yɛlɛ noma korɔ bo. (Hib. 12:​1, 2) A pãã nyɛ lɛ hoŋ na baŋ tɔgle ba ho zemmo poɔŋ.

5. Wala hoŋ na baŋ e taa teɛroŋ naŋ soma, ka ananso la wala aŋ e nimizeɛ̃? (Yieme 119:9)

⁵ Mɔɔ kyɛ taa haakilisoŋ, a “nyɔge . . . [o] taa.” (Yeng. 3:21) Dɔɔ naŋ taa haakilisoŋ ba maŋ vaara erɛ yɛlɛ, kyɛ o maŋ teɛrɛɛ yɛlɛ gaa tɔɔre sɛre kyɛ erɛ yɛlɛ. Azuŋ zanne lɛ eebo, a moɔ̃ niŋe erɛ lɛ. Ananso la wala? A donɛɛ ŋa paalɛɛŋ neŋ bi-pɔlɔ naŋ maŋ de ba meŋɛ teɛroŋ ane yɛlɛ naŋ be ba sukyieŋ derɛ gbɛɛ. (Yeng. 7:7; 29:11) TV, vidiori, intanɛt, ane social media zu yɛlɛ na baŋ sãã la ho teɛroŋ. Kyɛ boŋ na baŋ soŋ bo ka ho maŋ baŋ teɛre yɛlɛ soŋ? A dɛndɛŋ soba, zanne a Baabole a nyɛ lɛ Jehoova naŋ maŋ teɛrɛ yɛlɛ, a teɛre nyɛ ananso aŋ na soma ko bo ka ho de yɛlɛ na o naŋ yel na tonɔ neŋ toma ho zemmo poɔŋ. Pãã vɛŋ ka yɛlɛ na ho naŋ zanne na sonnɔ bo ka ho derɛ gbɛɛ naŋ na pɛle Jehoova poɔ. (Kanne Yieme 119:9.) Ka hooŋ mɔɔ kyɛ taa a haakilisoŋ ŋa, a na soŋ boŋ ka ho baa wa leɛ Kristabi-dɔɔ naŋ kyile. (Yeng. 2:​11, 12; Hib. 5:14) Hooŋ nyɛ lɛ haakilisoŋ naŋ na baŋ soŋ bo yɛlɛ ayi ŋa poɔŋ: (1) lɛ hoŋ na maŋ erɛ ho yɛlɛ a kyaare te yɔɔpɔgeba ane (2) lɛ hoŋ na maŋ su ho boma ane lɛ hoŋ na maŋ maale ho meŋɛ.

6. Ka te yɔɔdɔɔ naŋ e bipɔleeŋ taa teɛroŋ na Jehoova naŋ taa na, sobuo aŋ na baŋ somoo ka o wulo gyeremɛ korɔ te yɔɔpɔgeba?

⁶ Dɔɔ naŋ taa teɛroŋ na Jehoova naŋ taa na maŋ taa la gyeremɛ ko pɔgeba. Aŋa mannoo poɔŋ, ka te yɔɔdɔɔ kaŋaŋ boɔrɔ ka o neŋ te yɔɔpɔge kaŋa piili tuuro taa, yelfaa zaa kyebe. Kyɛ bipɔlee naŋ taa Jehoova teɛroŋ koŋ e yelzaa a wuli ka o boɔrɛɛ te yɔɔpɔge na, ka onaŋ baŋ ka o koŋ de o ka o e o pɔge nendaare kaŋa. (1 Tim. 5:​1, 2) Ka o neŋ te yɔɔpɔge kaŋaŋ tuuro taa, o daŋ koŋ sage te be zie kaŋa ane te yɔɔpɔge na ba yoŋ tɛgɛ ka neɛzaa ba poɔ ba  eŋɛŋ, ka lɛ na vɛŋ ka o ta erɛ wa e yelzaa naŋ na baŋ sãã te yɔɔpɔge na yosoŋ.—1 Kor. 6:18.

7. Sobuo ka haakilisoŋ na baŋ soŋ te yɔɔdɔɔ naŋ e bipɔlee ka o de gbɛ-sonne a kyaare o bonsuurii ane lɛ oŋ na maŋ maale o meŋɛ?

⁷ Sori na kaŋa bipɔlee naŋ na baŋ wuli ka o taa la Jehoova teɛroŋ la lɛ o naŋ maŋ su boma ane lɛ o naŋ maŋ maale o meŋɛ. Noba naŋ maŋ maala bonsu paala waana neŋ na, ba yaga zie zaa ba nɔnɔ Jehoova a maŋ tonɔ peɛ̃mo toma meŋ. Azuŋ bonsuurii na baŋ maŋ maala na maŋ ŋmɛnnɛɛ neɛ ka o naŋ wa su a, bee ka dɔbɔŋ wa su a baŋ waa ŋa pɔgeba. Kyɛ bipɔlee naŋ boɔrɔ ka o baa a wa leɛ Kristabie naŋ kyile maŋ vɛŋeŋ ka Baabole sowuli ane noba mine naŋ be a lantaapuoruu poɔŋ ewuli sonne somoo oŋ kaa iri bonsuurii naŋ seŋ neŋ. O na baŋ soorɛɛ o meŋɛ ka: ‘Ka lɛ N gbɛ deree maŋ wuliŋ ka N taa la teɛroŋ soŋ a kyɛ taa gyeremɛ ko N taaba meŋ bee? Ka lɛ N bonsuurii maŋ vɛŋeŋ ka noba nyɛ ka N sereŋ eɛ Naaŋmen puorebie kaŋa bee?’ (1 Kor. 10:​31-33; Tit. 2:6) Bipɔlee naŋ taa Jehoova teɛroŋ na na nyɛ la gyeremɛ yi te yɔɔmine zie ane Jehoova meŋ zie.

8. Sobuo ka te yɔɔdɔɔ kaŋa naŋ e bipɔlee na baŋ zanne ka o e neɛ naŋ be dɛlebo?

⁸ E neɛ naŋ be dɛlebo. Bipɔlee naŋ be dɛlebo maŋ toŋ la o ferebo toma zaa o naŋ seŋ ka o toŋ na soŋ. (Luk. 16:10) Te nyɛ Yezu zemmo yɛlɛ ewuli sonne. O da ba taa N baga kyebe gyogo fẽẽ zaa. O da toŋɛɛ toma na zaa Jehoova naŋ koo na, ka anaŋ gbaŋ wa e kpeɛŋaa koo saŋa kaŋa ka o e lɛ. O da nɔnɔ la noba—agaŋaazaa o potuuribo na—o da yi la o poɔ zaa a de o nyɔvore iri sareka ko ba. (Gyn. 13:1) Meŋ tɔglɔ Yezu, a maŋ toŋ toma zaa ba naŋ ko bo ka ho toŋ. Ka hooŋ ba baŋ lɛ hoŋ na e toŋ a toma, sigri ho meŋɛ a sɔre te yɔɔdɔba mine naŋ kyile ka ba soŋ bo. Ta maŋ toŋ fẽẽ lɛ kyɛ vɛŋ ka a seŋ bo. (Uro. 12:11) Maŋ toŋ ho toma zaa naŋ seŋ ka ho toŋ a te baare “aŋa ho naŋ tonɔ korɔ Jehoova, kyɛ ka a ta waa ŋa nensaaleba la ka ho tonɔ korɔ.” (Kol. 3:23) Yelmeŋɛ la ho ba pɛgeyi, azuŋ sigri ho meŋɛ a sage saammo ka hooŋ wa ŋmɛ gbɛre.—Yeng. 11:2.

9. Ananso la wala aŋ seŋ ka bipɔlɔ maŋ zanne yɛlɛ mine eebo naŋ na baŋ soŋ ba ba zemmo poɔŋ?

⁹ Ka hooŋ na baŋ wa e Kristabi-dɔɔ naŋ kyile, aseŋ ka ho zanne yɛlɛ mine eebo. Lɛ na soŋ boŋ ka ho toɔ̃ tonɔ toma baŋ na ko bo a lantaapuoruu poɔŋ, a soŋ bo ka ho nyɛ toma a baŋ toɔ̃ kaara ho meŋɛ ane ho yideme, kyɛ taa niiloŋ meŋ naŋ soma neŋ ho taaba. Te nyɛ ana yɛlɛ ŋa mine hoŋ na baŋ zanne eebo na.

10-11. Ka te yɔɔdɔɔ naŋ e baapaalaaŋ zanne sɛgebo ane kannoo soŋ, bo tɔnɔ ka o neŋ a lantaapuoruu zaa na nyɛ? (Yieme 1:​1-3) (Kaa a foto meŋ.)

¹⁰ Zanne kannoo ane sɛgebo soŋ. A Baabole yeleeŋ ka neɛ naŋ maŋ kanna Naaŋmen Yelbiri, a teɛrɛ yɛlɛ na o naŋ kanna na gɛrɛ tɔɔre na taa la popeɛloŋ ka o yɛlɛ zaa maale soŋ. (Kanne Yieme 1:​1-3.) Ka o naŋ kanna a Baabole bebiri zaa, o na wa baŋɛɛ Jehoova teɛroŋ. Lɛ  na somooŋ ka o maŋ teɛre yɛlɛ soŋ a de a Baabole poɔ yɛlɛ toŋ neŋ toma. (Yeng. 1:​3, 4) A fɛrɛɛŋ ka a dɔbɔ ŋa taa be a lantaapuoruu poɔŋ. Ananso la wala?

¹¹ Te yɔɔmine maŋ boɔrɛɛ kawaŋ-sonne yi dɔbɔ naŋ baŋ wulibo a maŋ terɛ kawane naŋ yi a Baabole poɔŋ zieŋ. (Tit. 1:9) Ka hooŋ zanne kannoo ane sɛgebo soŋ, a na baŋ soŋ boŋ ka ho maŋ nare ho meŋɛ soŋ ka hooŋ wa taa yelyaga, ka a eŋ ho yɔɔmine sagediibu faŋa bee a maŋ sɛgre soorebie noɔre iribo naŋ na eŋ ho taaba faŋa. A na baŋ soŋ boŋ meŋ ka ho toɔ̃ sɛge yɛlɛ mine naŋ na baŋ soŋ bo biŋ ka hooŋ wa zanna boma bee ka hooŋ wa kyɛllɛ yelyaga a lammozieŋ bee te lammobɛrɛ na zieŋ. Ana yɛlɛ ŋa hoŋ na maŋ sɛgrɛ binne na na eŋɛɛ ho sagediibu faŋa, a kyɛ soŋ bo ka ho toɔ̃ eŋ ho taaba mine meŋ sagediibu faŋa.

12. Boŋ na baŋ soŋ bo ka ho zanne lɛ ho neŋ noba naŋ na maŋ dire dama soŋ?

¹² Zanne baŋ lɛ na ho neŋ noba naŋ na toɔ̃ yel yɛlɛ soŋ. Kristabi-dɔɔ seŋ ka o baŋ lɛ o neŋ noba naŋ na baŋ di dama soŋ. Lɛ wuleeŋ ka aseŋ ka o maŋ kyɛllɛ soŋ ka o taabaŋ wa yele yɛlɛ a toɔ̃ baŋ a pare soŋ. (Yeng. 20:5) Yelkaŋa oŋ na baŋ lɛ zanne eebo la ŋa; ka neɛŋ wa yele yɛlɛ, o na baŋ kaarɛɛ lɛ a soba naŋ yele a yɛlɛ, lɛ o naŋ e o nimisogɔ kyɛ yele a yɛlɛ, ane lɛ o naŋ erɛ o meŋɛ kyɛ yele a yɛlɛ na, ka a somoo ka o baŋ a yɛlɛ pare soŋ. Ho koŋ baŋ zanne lɛ eebo ka hooŋ ba maŋ lanna neŋ noba. Ka hooŋ maŋ tu komputa bee fone zuŋ ka ho neŋ noba dire dama, aŋa email ane text massage zuŋ, lɛ yɛŋ ana maŋ eɛ kpeɛŋaa ka ho neŋ noba kaara taa kyɛ dire dama. Azuŋ, maŋ mɔɔ ka ho neŋ noba maŋ nyɛrɛ taa kyɛ dire dama.—2 Gyn. 12.

13. Boŋ ka bipɔlee na baŋ la toɔ̃ zanne? (1 Timoti 5:8) (Kaa a foto meŋ.)

¹³ Zanne baŋ lɛ hoŋ na baŋ toŋ toma nyɛ libie a kaara ho meŋɛ. Aseŋ ka Kristabi-dɔɔ naŋ kyile maŋ toɔ̃ kaara o meŋɛ ane o yideme zemmo yelfɛree zu. (Kanne 1 Timoti 5:8.) Paalonne mine poɔŋ, bipɔlɔ maŋ zannɛɛ toma yi ba saa bee ba dɔgrɔ kaŋa zieŋ. Kyɛ paalonne mine meŋ, bipɔlɔ maŋ zannɛɛ nuuri toma sakuu poɔŋ. Lɛ zaa a naŋ waa, Kyɛ aseŋ ka ho zanne nuuri toma mine naŋ na baŋ toɔ̃ soŋ bo ka ho baŋ nyɛ toma tonɔ. (Tom. 18:​2, 3; 20:34; Efe. 4:28) Mɔɔ kyɛ vɛŋ ka neɛzaa nyɛ ka ho maŋ deɛ eŋnyagroŋ a tonɔ tone zaa ho naŋ piili a te ta a baara. Ka hooŋ e lɛ, a na eɛ mɔlɔ ko bo ka ho nyɛ toma a baŋ toɔ̃ toŋaa soŋ meŋ. Ana gyog-sonne ane nuuri toma na te naŋ zanne a yɛlɛ na, na baŋ soŋɛɛ Kristabi-dɔbɔ ka ba baŋ toɔ̃ toŋ ba ferebo toma soŋ nendaare kaŋa. Yɛ vɛŋ ka te nyɛ ana ferebo toma na mine.

14. Sobuo ka bipɔlee na baŋ sɛgre o meŋɛ a wa toŋ a wagre zaa naaŋ moɔloo toma na mine?

¹⁴ Wagre zaa naaŋ moɔla. Kristabi-dɔbɔ naŋ kyile maŋ piilee a wagre zaa naaŋ moɔloo toma saŋa na baŋ naŋ e baapaalba. A Paaneɛ toma maŋ soŋɛɛ bi-pɔlɔ ka ba zanne lɛ baneŋ neŋtɛɛtɛɛ naŋ na baŋ laŋ erɛ yɛlɛ. A maŋ la somooŋ ka o de o libie tonɔ neŋ toma soŋ a kyɛ ba dire sama meŋ. (Fil. 4:​11-13) Ka neɛŋ na baŋ toŋ a paaneɛ toma, aseŋ ka o daŋ piili a paaneɛ soŋnɔ toma. Noba yaga maŋ daŋ piilee a paaneɛ soŋnɔ toma wagre mine puoreŋ ka a baŋ soŋ ba ka ba piili a paaneɛ toma. Ka banaŋ wa piili a paaneɛ toma, a na baŋ yuo la sori ko ba ka ba te toŋ a wagre zaa naaŋ moɔloo toma mine aŋa; baŋ na te tonɔ a meɛbo toma, bee a leɛ Bɛɛtil toŋtoneba.

15-16. Boŋ na baŋ soŋ te yɔɔdɔɔ kaŋa naŋ e baapaalaa ka o toɔ̃ leɛ a nembɛrɛ sonnɔ kaŋa bee a lantaapuoruu neŋkpoŋ kaŋa?

¹⁵ A nembɛrɛ sonnɔ kaŋa bee lantaapuoruu neŋkpoŋ kaŋa. Te yɔɔdɔbɔ zaa seŋ ka ba maŋ mɔɔrɔ ba mɔɔbo zaa kyɛ wulo gyogri naŋ na wuli ka ba seŋnɛɛŋ ka ba iri ba ka ba e a lantaapuoruu nembɛrɛ ka lɛ vɛŋ ka ba toɔ̃ tonɔ korɔ ba yɔɔmine. A Baabole yeleeŋ ka dɔbɔ naŋ nyɛrɛ nimitɔɔre gaabo ka ba seŋ neŋ a toma ŋa, “boɔrɛɛ toma naŋ soma yaga.” (1 Tim. 3:1) Sɛre kyɛ ka te yɔɔdɔɔ kaŋa na leɛ a lantaapuoruu neŋkpoŋ kaŋa, aseŋ ka o daŋ e a nembɛrɛ sonnɔ kaŋa. A lantaapuoruu nembɛrɛ ane ba sonneba maŋ yi la sigrimennoŋ poɔŋ a tonɔ korɔ ba yɔɔmine, a kyɛ de eŋnyagroŋ meŋ tonɔ neŋ a naaŋ moɔloo toma. Te yɔɔdɔbɔ naŋ e baapaalba na baŋ wa leɛ la a nembɛrɛ sonneba ka ba naŋ gbaŋ naŋ ba ta yuomo lezare. A nembɛrɛ sonnɔ kaŋa naŋ seŋ neŋ na baŋ wa leɛ la a lantaapuoruu neŋkpoŋ kaŋa ka o naŋ gbaŋ pare yuomo lezare fẽẽ lɛ.

¹⁶ Bo yɛlɛ hoŋ na baŋ erɛ a wuli ka ho seŋnɛɛ ana toma ŋa? Gyogri mine bebeŋ aŋ seŋ ka ho taa. Aseŋ ka ho baŋ ka ana gyogri ŋa zaa be la a Baabole poɔŋ, ane meŋ aseŋ ka ho taa nɔmmo ko Jehoova, ho booree, ane a lantaapuoruu. (1 Tim. 3:​1-13; Tit. 1:​6-9; 1 Pit. 5:​2, 3) Mɔɔ kyɛ baŋ a gyogo kaŋa zaa yɛlɛ soŋ. Puore sɔre Jehoova ka o soŋ bo ka ho toɔ̃ ta ana yɛlɛ ŋa. c

17. Wala ka te yɔɔdɔɔ naŋ e baapaalaa na baŋ nare o meŋɛ ka o e serɛ ane booree zudaana? (Kaa a foto meŋ.)

¹⁷ Serɛ ane booree zudaana. Aŋa lɛ na Yezu naŋ da yel na, Kristabi-dɔbɔ mine maŋ iriŋ ka ba koŋ kpɛ kultaa poɔ. (Mat. 19:12) Kyɛ ka hooŋ iri ka ho na kpɛ la kultaa poɔ, ho na wa leɛ la serɛ ane booree zudaana. (1 Kor. 11:3)  Ferebo toma Jehoova naŋ ko serɛ la ka o nɔnɔ o pɔge a maŋ kaara o pɔge yelfɛree zaa zieŋ, a e zɔmeŋ-soŋ a koo, a kyɛ sonnoo ka o tage peɛle Jehoova. (Efe. 5:​28, 29) A gyogri na yɛlɛ te naŋ zanne a zannoo ŋa poɔŋ aŋa hoŋ na taa haakilisoŋ, a taa gyeremɛ ko pɔgeba, a kyɛ e neɛ naŋ be dɛlebo na na soŋ boŋ ka ho e sere-soŋ. A na vɛŋeŋ ka ho nare ho meŋɛ soŋ ka ho e serɛ ane booree zudaana.

18. Wala ka te yɔɔdɔɔ naŋ e baapaalaa na baŋ nare o meŋɛ ka o e bi-saa?

¹⁸ Bi-saa. Aminekaŋaŋ ka hooŋ wa de pɔge baare ho na wa leɛ la bi-saa. Boŋ hoŋ na baŋ zanne yi Jehoova zieŋ aŋ na baŋ soŋ bo ka ho e bi-saa naŋ soma? Yɛlɛ yaga bebeŋ hoŋ na baŋ zanne. (Efe. 6:4) Jehoova da yelee yɛlɛ ko o Bidɔɔ Yezu noba poɔŋ ka o nɔmooŋ ka o poɔ pɛle o yɛlɛ meŋ. (Mat. 3:17) Ka hooŋ wa leɛ bi-saa, wagre zaa maŋ mɔɔ kyɛ vɛŋ ka ho biiri baŋ ka ho nɔŋ baŋ. Maŋ pugi ba ane yelsonne na zaa ba naŋ maŋ erɛ na. Bi-saa mine naŋ tɔglɔ Jehoova ewuli sonne na baŋ soŋɛɛ ba biiri ka ba wa leɛ Kristabiiri naŋ kyile. Ho na baŋ sɛgrɛɛ ho meŋɛ pampana a ko a yɛlɛ ŋa a yi hoŋ na maŋ wulo nɔmmo korɔ ho booree deme ane a lantaapuoruu noba, a maŋ kaara ba zu soŋ. A maŋ yelko ba meŋ ka ho nɔnɔ baŋ yaga zaa ka ho poɔ pɛle neŋ ba yɛlɛ. (Gyn. 15:9) A na soŋ boŋ ka ho e sere-soŋ ane bi-saa naŋ soma nendaare kaŋa. Kyɛ pampana ŋa yɛŋ, ho eɛ nanee yaga ko Jehoova, ho booree, ane a lantaapuoruu.

19-20. Boŋ na soŋ te yɔɔdɔba naŋ e baapaalba ka ba baa wa leɛ Kristabiiri naŋ kyile? (Kaa a gane niŋe foto.)

¹⁹ Te yɔɔdɔbɔ naŋ e baapaalba, aseŋ ka yɛ e eebo kaŋa sɛre kyɛ na baŋ wa leɛ Kristabiiri naŋ kyile. Azuŋ, aseŋ ka ho tɔglɔ noba mine ewuli sonne, a taa haakilisoŋ, a e neɛ naŋ be dɛlebo, a zanne baŋ yɛlɛ mine eebo naŋ na baŋ soŋ bo ho zemmo poɔŋ, a kyɛ nare ho meŋɛ ko nendaare kaŋa ferebo toma hoŋ na nyɛ.

²⁰ Ka hooŋ wa teɛre nyɛ yɛlɛ na zaa a naŋ seŋ ka ho e na, aminekaŋaŋ ho na maŋ nyɛŋ ka a gaalee ho faŋa. Kyɛ ho na baŋ toɔ̃ eɛ a zaa te baare. Teɛre baŋ ka Jehoova eɛ siri ka o soŋ bo. (Aiz. 41:​10, 13) Nɔkpeɛne zaa kyebe ka ho yɔɔmine naŋ be a lantaapuoruu poɔŋ meŋ na soŋ boŋ. Ka hooŋ toɔ̃ baa wa leɛ Kristabi-dɔɔ naŋ kyile meŋɛmeŋɛ, ho na taa la popeɛloŋ ho zemmo poɔŋ. Te yɔɔdɔbɔ naŋ e baapaalba, te nɔnɔ yɛŋ yaga zaa! Jehoova na ko yɛŋ maaloo yaga zaa, saŋa ŋa yɛ naŋ mɔɔrɔ ka yɛ baa wa leɛ Kristabi-dɔbɔ naŋ kyile na.—Yeng. 22:4.