Daare kaŋa, te yɔɔpɔge kaŋa naŋ be New Zealand da kaa la a vidio ŋa, “Have . . . Concern for One Another,” naŋ wulo ka Jehoova ba taa nyonono yoŋ, kyɛ o maŋ wulee nyonono meŋ. (Aiz. 63:​7-9) O zannɛɛ yel kaŋa yi a vidio poɔŋ a meŋ da boɔrɔ ka o soŋ neɛ kaŋa. Ana daare na neŋ o zu, o da gaa la daa ka o te da te wɔmɔ. Beŋ oŋ da nyɛ pɔge kaŋa naŋ ba taa kpɛzie, a gaa da bondirii koo. O da de la apoɔsori ŋa a de a gambile Dɔgɛɛ Daŋ Na Baare La? a manne ne Jehoova yɛlɛ koo ŋmaaŋmaa lɛ.

A pɔge da piileeŋ kono. O da yeleeŋ ka ba guoluuŋ aŋa Jehoova Sieree deme kaŋa kyɛ oŋ bare a yelmeŋɛ yuomo yaga naŋ pare. Beraa wala ŋa kpakyagaŋ, o puori sɔrɛɛ Jehoova ka O somoo ka o leɛ wa O zie. Te yɔɔpɔge na da kooŋ a Baabole, kyɛ baŋ sɛgre ka ba piili Baabole zannoo. a

Te meŋ na baŋ tɔglɛɛ Jehoova a wulo nyonono korɔ neɛzaa ane te booree deme ane te yɔɔmine naŋ be a lantaapuoruu poɔŋ. Te meŋ na baŋ wulee nyonono korɔ noba a kyɛ boɔrɔ soe teŋ na maŋ tu kyɛ manna Jehoova yɛlɛ korɔ noba.