1-2. Wala aŋ seŋ ka bidɔgreba maŋ e ka ba bieŋ wa soorɔ ba soorebie naŋ kyaare te sagediibu yɛlɛ?

 NOBA yaga zie zaa baŋɛɛŋ ka biiri guoluu ba gaŋ teŋɛŋ. Ka hooŋ e bidɔgrɔ, nɔkpeɛne zaa kyebe ka ho mɔɔrɛɛ ho moɔbo zaa ka ho eŋ ho bie sagediibu faŋa, Jehoova poɔ meŋ pɛlɛɛŋ neŋ ho mɔɔre na zaa. (Dut. 6:6, 7) Ka ho bieŋ wa baara, kaapɔge o na piili soorɛɛ soorebie mine a kyaare te sagediibu yɛlɛ. Aŋa mannoo poɔŋ, bonso ka Jehoova yelka yɛlɛ mine ba soma azuŋ a ba seŋ ka te erɛ ana yɛlɛ na?

² Aminekaŋaŋ a piilee na, o soorebie na na dɔnnɔ boŋ. A gba na baŋ vɛŋeŋ ka ho teɛrɛ ka kaapɔge ho bie na ba taa sagediibu. Kyɛ ka bieŋ wa baara, aseŋ ka o maŋ soorɔ soorebie ka a somoo ka o toɔ̃ mɛ o sagediibu. (1 Kor. 13:11) Azuŋ a ba seŋ ka ho zoro dabeɛ̃ zaa. Ka ho bieŋ wa soore a soorebie ŋa mine taa, a eɛ apoɔsori hoŋ na baŋ tu a somoo ka o maŋ teɛre yɛlɛ gaa tɔɔre ka a eŋ o sagediibu faŋa.

3. Boŋ teŋ na zanne a zannoo ŋa poɔŋ?

³ A zannoo ŋa poɔŋ, te na zanne nyɛɛ lɛ bidɔgreba naŋ na baŋ e soŋ ba biiri ka ba taa sagediibu Naaŋmen ane a Baabole eŋɛŋ, a soŋ ba ka ba nyɛ ka, ka ba naŋ de Baabole sowuli naŋ kyaare yɛlɛ naŋ soma ane yɛlɛ naŋ ba soma tonɔ neŋ toma a na yi la tɔnɔ ko ba, a kyɛ soŋ ba ka ba zanne lɛ baŋ na baŋ manne ba sagediibu yɛlɛ ko ba taaba. Te na la zanne nyɛɛ ananso a naŋ soma ka bibiiri maŋ soorɔ yɛlɛ, ane yɛlɛ mine ho neŋ ho biiri naŋ na baŋ erɛ ka lɛ vɛŋ ka ho nyɛ a vuo a toɔ̃ manne te sagediibu yɛlɛ ko ba.

SOŊ HO BIE KA O SAGEDIIBU O NAŊ TAA NAAŊMEN ANE A BAABOLE EŊƐŊ MAALEŊ E KPEƐŊAA

4. Bo soorebie mine la ka ho bie na baŋ soore, ka ananso la wala?

⁴ Ho naŋ taa sagediibu Naaŋmen eŋɛŋ na ba wuli ka ho biiri meŋ na taa la sagediibu Naaŋmen eŋɛŋ. Ba ba dɔge bo neŋ sagediibu. Lɛ meŋ la ho bie na. Wagre naŋ gɛrɛ poɔŋ, kaapɔge ho biiri  na piili soorɛɛ soorebie mine aŋa: ‘Wala maŋ na e baŋ ka Naaŋmen bebeŋ? Ka lɛ N na baŋ sagɛɛ yɛlɛ na a Baabole naŋ yel na di bee?’ A Baabole gba eŋ teŋ faŋa ka te maŋ de te “teɛroŋ” tonɔ neŋ toma, a “kyɛ . . . maŋ tegre yelzaa nyɛ.” (Uro. 12:1; 1 Tɛs. 5:21) Kyɛ wala hoŋ na baŋ e soŋ ho bie ka o eŋ o sagediibu faŋa?

5. Bo yɛlɛ ka bidɔgreba na baŋ e a soŋ ba biiri ka ba taa sagediibu naŋ e kpeɛŋaa a Baabole eŋɛŋ? (Urom 12:2)

⁵ Eŋ ho bie na faŋa ka o meŋɛ peɛre nyɛ ka yɛlɛ na a Baabole naŋ yel na eɛ yelmeŋɛ. (Kanne Urom 12:2.) Ka ho bieŋ wa soore soorebie mine, de a vuo a somoo ka o nyɛ lɛ oŋ na baŋ peɛre bɔ o soorebie na nɔɛ iribo jw.org zuŋ. Aŋa mannoo poɔŋ, ho na baŋ somooŋ ka o peɛre bɔ vidiori ane zannoo yɛlɛ naŋ na baŋ somoo ka o wa nyɛ ka aneazaa ka a Baabole eɛ gane nensaaleba naŋ sɛge, kyɛ o eɛ “Naaŋmen yelbiri.” (1 Tɛs. 2:13) Aŋa mannoo poɔŋ, o na baŋ peɛrɛɛ yɛlɛ a kyaare a takoreŋ saŋa Asiiriya paaloŋ teŋkpɛŋ Ninevɛ yɛlɛ. Saŋa kaŋa naŋ pare, Baabole gaŋbanneba mine da yeleeŋ ka, a Ninevɛ teŋɛ na da ba e teŋɛŋ naŋ bebe meŋɛmeŋɛ. Kyɛ yuoni 1850 poɔŋ, yelpeɛreba mine da tu la teŋɛ a te nyɛ zie na a Ninevɛ teŋɛ na naŋ da be, aŋ e sieree naŋ wuli ka yɛlɛ na a Baabole naŋ yel na toreeŋ. (Zef. 2:13-15) Ka hooŋ boɔrɔ ka ho baŋ lɛ Ninevɛ teŋɛ na saammo naŋ vɛŋ ka Baabole daŋyelbo nyɛ eebo, kanne a zannoo yɛlɛ ŋa, “Ho Da Baŋɛɛŋ?” naŋ be November 2021 A Kaakaara Ziduoruu gane na poɔŋ. Ho na baŋ eŋɛɛ ho bie na faŋa ka o de yɛlɛ na a Baabole naŋ yel na manne neŋ yɛlɛ na gama mine naŋ be dɛlebo meŋ naŋ yel. A na soŋɛɛ ho bie na ka o nyɛ ka a Baabole poɔ yɛlɛ eɛ yelmeŋɛ.

6. Wala ka bidɔgreba na baŋ e soŋ ba biiri ka ba nyɛ ka a Baabole poɔ yɛlɛ toreeŋ? Tere yelmannaa kaŋa. (Kaa a foto meŋ.)

⁶ Soŋ ho bie ka o nyɛ ka a Baabole poɔ yɛlɛ toreeŋ. Maŋ boɔrɔ soe hoŋ na baŋ tu ka ho neŋ ho bie maŋ di dama a kyaare Naaŋmen a neŋ a Baabole. Ho neŋ ho bie na baŋ nyɛɛ vuo a di dama kyaare a yɛlɛ ŋa ka yɛneeŋ gaa museum, zie kaŋa naŋ e gbangbali kyɛ ka moɔ fẽẽ bebe, bee ka yɛneeŋ gaa Bɛɛtil ka yɛ te kaa be. Ho na baŋ lɛ de la takoreŋ saŋa bonmeɛree mine yɛlɛ naŋ be a Baabole poɔŋ naŋ naŋ bebe zenɛ ŋa fotori bee vidiori a wuli ho bie na, a na baŋ somooŋ ka o nyɛ ka a Baabole poɔ yɛlɛ toreeŋ. Ho na baŋ wulee ho bie a kuurii na ba naŋ boɔlɔ ka Moabite Stone na yɛlɛ. A kuurii ŋa yuomo 3,000 la ŋa, Jehoova yuori be la a kuurii ŋa eŋɛŋ. Ka hooŋ gaa Louvre Museum naŋ be Paris France paaloŋ, ho na nyɛɛ a kuurii ŋa beŋ. Ba tɔgle maalɛɛ a Moabite Stone ŋa a de o biŋ ka noba maŋ te kaa zie na ba naŋ maale Jehoova Sieree Deme Donɛɛ Zaa Toma Zikpɛŋ naŋ be Warwick, New York na. A zie yuori la “The Bible and the Divine Name.” A Moabite Stone zuŋ, ba sɛgɛɛŋ ka Mooab Naa Miisa da zagrɛɛ a  Izerayɛl biiri noɔre. Lɛ meŋ neŋ o zu ka a Baabole yel. (2 Nam. 3:4, 5) Ka ho bieŋ wa zanne nyɛ ka yɛlɛ na a Baabole naŋ yel na eɛ yelmeŋɛ, a na vɛŋeŋ ka o sagediibu maaleŋ e kpeɛŋaa yaga zaa.​—De manne 2 Tungkori 9:6.

7-8. (a) Boŋ teŋ na baŋ zanne yi lɛ na Naaŋmen bonmaalee mine naŋ waa na eŋɛŋ? Tere yelmannaa kaŋa. (Kaa a foto meŋ.) (b) Bo soorebie mineŋ na baŋ soŋ ho bie ka o sagediibu o naŋ taa Naaŋmen eŋɛŋ maaleŋ e kpeɛŋaa?

⁷ Eŋ ho bie faŋa ka o teɛrɛ Jehoova bonmaalee yɛlɛ gɛrɛ tɔɔre. Ka yɛneeŋ wa kyɛnɛ zi-gbangbali moɔ fẽẽ naŋ bebe, bee gaadin poɔŋ, maŋ soŋ ho bie na ka o nyɛ lɛ Naaŋmen bonmaalee mine naŋ maŋ guoli guoli gbɛɛ yaga a veɛlɛ na. Soŋ ho bie na ka o nyɛ ka neɛ kaŋa naŋ baŋ yɛŋ yaga zaa la maale a boma ŋa zaa. Aŋa mannoo poɔŋ, Naaŋmen bonmaalee mine bebeŋ aŋa ŋmarbie turituri yaga naŋ lantaa, gyɛl-ŋmama, teere vaare, ane felaaware zuri zaa waaloŋ maŋ yi la taa. Science deme de la yuomo yaga a peɛrɛ a bonmaalee ŋa yɛlɛ gaa tɔɔre. Science gaŋbaŋna kaŋa ba naŋ boɔlɔ Nicola Fameli yeleeŋ ka, ka hooŋ peɛre ana boma ŋa yɛlɛ gaa tɔɔre, ho na nyɛŋ ka a maŋ guoli guoliŋ gbɛɛ yaga a waaloŋ poɔŋ, ka hooŋ na sɔre lɛ na aŋ maŋ guoli guoli na, ho na wa nyɛŋ ka a lomboe zaa guoluu maŋ seŋɛɛ taa. Ba boɔlɛɛ ana boma ŋa ba naŋ maŋ sɔre ka a lomboe zaa guoluu maŋ seŋ taa na ka Fibonacci sequence. a

⁸ Kaapɔge ka ho bie naŋ wa gaa sakuu, o na zannɛɛ bonmaalee mine meŋ yɛlɛ gaa tɔɔre. Aŋa mannoo poɔŋ, teere waaloŋ naŋ yitaa. A teɛ seɛ seŋ maŋ bebeŋ, ka a teɛ nuuri meŋ bebe, ka a teɛ nuuri mine naŋ kpi a koko meŋ bebe, lɛ ka teere zaa meŋ maŋ waa. Ba boɔlɛɛ lɛ na a teere waaloŋ ŋa naŋ maŋ yitaa na ka fractal. Bonmaalee mine meŋ bebeŋ a taa a waaloŋ ŋa tɔ. Kyɛ nembuo la maale a boma ŋa zaa aŋ taa a waaloŋ ŋa, a kyɛ veɛlɛ yaga zaa lɛ? Ka ho bie naŋ maŋ teɛrɛ Jehoova bonmaalee yɛlɛ gɛrɛ tɔɔre, lɛ na somooŋ ka o taa sagediibu naŋ e kpeɛŋaa ka Naaŋmen la maale boma. (Hib. 3:4) Ka ho bie naŋ wa baara, aseŋ ka ho mɔɔ kyɛ somoo ka o nyɛ ananso a naŋ e nimizeɛ ka o tuuro Naaŋmen bege. Ho na baŋ soorooŋ soorebie mine naŋ na baŋ somoo aŋa, “Ka Naaŋmen la maale te yɛŋ, ho teɛre ka o ba baŋ yɛlɛ teŋ na baŋ erɛ te zemmo poɔŋ a taa popeɛloŋ bee?” Ho pãã na baŋ somooŋ ka o nyɛ ka Naaŋmen ko teŋ a Baabole ka o wulo te lɛ teŋ na baŋ e taa popeɛloŋ te zemmo poɔŋ.

SOŊ HO BIE NA KA O BAŊ ANANSO A NAŊ SOMA KOO KA O DE BAABOLE SOWULI NAŊ KYAARE YƐLƐ NAŊ SOMA ANE YƐLƐ NAŊ BA SOMA TONƆ NEŊ TOMA

9. Bo yɛlɛŋ na baŋ vɛŋ ka ho bie soore bo soorebie a kyaare Baabole sowuli naŋ kyaare yɛlɛ naŋ soma ane yɛlɛ naŋ ba soma?

⁹ Saŋa kaŋa ho bie na na soorɛɛ soorebie mine a kyaare yɛlɛ a Baabole naŋ yelka a ba  soma. Mɔɔ kyɛ baŋ ananso o naŋ soorɔ a soorebie. Ka lɛ yɛlɛ na a Baabole naŋ yel na la oŋ ba sagedi bee? Kyɛbee a maŋ eɛ kpeɛŋaa koo ka o manne o sagediibu yɛlɛ ko o taaba? Lɛ zaa naŋ la, ho na baŋ somooŋ ka o baŋ ka a maŋ soma ko teŋ ka teneeŋ tuuro Baabole sowuli. Ho neŋ o na baŋ zannɛɛ a Nyɛ Zeŋ Laafeɛ Tegitegilɛ! gane na ka o somoo. b

10. Wala hoŋ na baŋ e soŋ ho bie ka o nyɔge zɔmennoŋ naŋ e kpeɛŋaa neŋ Jehoova?

¹⁰ Eŋ ho bie na faŋa ka o vɛŋ ka Jehoova e o zɔmeŋɛ naŋ peɛloo yaga zaa. Ka ho neŋ ho bie naŋ wa zanna boma, de a soorebie ane a yelmannee naŋ be a Nyɛ Zeŋ Laafeɛ Tegitegilɛ! gane na poɔŋ tonɔ neŋ toma, ka a soŋ bo ka ho baŋ teɛroŋ na o naŋ taa kyaare yɛlɛ mine. (Yeng. 20:5) Aŋa mannoo poɔŋ, zannoo 8 de la Jehoova manne neŋ zɔmeŋɛ naŋ taa te yɛlɛŋ yaga zaa, a maŋ leɛteɛre te yɛlɛ mine naŋ na baŋ soŋ te, a kyɛ go te meŋ. Ka yɛneeŋ wa dire dama a kyaare 1 Gyɔɔn 5:3, ho na baŋ soorooŋ ka, “Te naŋ baŋ ka Jehoova eɛ zɔmeŋ-soŋ na zuŋ, bo teɛroŋ aŋ seŋ ka te taa kyaare yɛlɛ na o naŋ maŋ yelka te erɛ na?” Aneazaa ka a soorebiri ŋa yɛlɛ ba e tuo, kyɛ a na baŋ soŋɛɛ ho bie na ka o nyɛ ka Jehoova naŋ nɔŋ te zuŋ Oŋ maŋ korɔ te bege.​—Aiz. 48:17, 18.

11. Wala hoŋ na baŋ e soŋ ho bie ka o baŋ ka o na nyɛɛ tɔnɔ yaga zaa ka o naŋ de Baabole sowuli tonɔ neŋ toma o zemmo poɔŋ? (Yeng Yelibie 2:10, 11)

¹¹ Yɛ di dama kyaare tɔnɔ te naŋ maŋ nyɛ ka teneeŋ wa de Baabole sowuli tonɔ neŋ toma. Ka yɛneeŋ wa laŋ kanna a Baabole bee a erɛ a bebiri zaa Baabole zannoo na, yɛ maŋ di dama a kyaare tɔnɔ yɛ booree naŋ nyɛ yɛ naŋ de Baabole sowuli tonɔ neŋ toma na zuŋ. Aŋa mannoo poɔŋ, ho na baŋ de la ana wagre na a soŋ ho bie na ka o nyɛ ka te na nyɛ la tɔnɔ yaga zaa ka teneeŋ maŋ tonɔ tonkpeɛne a kyɛ maŋ yele yelmenne wagre zaa. (Hib. 13:18) Ho na baŋ lɛ somooŋ ka o nyɛ ka, ka teneeŋ wa tuuro Baabole sowuli, a maŋ soŋ teŋ teŋ taa laafeeloŋ naŋ soma ane popeɛloŋ. (Yeng. 14:29, 30) Ka ho bie naŋ wa nyɛ lɛ a naŋ na soma ko te yaga zaa ka teneeŋ de Baabole sowuli tonɔ neŋ toma, aminekaŋaŋ o meŋ na de aŋ tonɔ neŋ toma o zemmo poɔŋ.​—Kanne Yeng Yelibie 2:​10, 11.

12. Sobuo ka bi-saa kaŋa soŋ o bidɔɔ oŋ wa nyɛ ka, ka teneeŋ de Baabole sowuli tonɔ neŋ toma te na nyɛɛ tɔnɔ?

¹² Bi-saa kaŋa naŋ be France paaloŋ baŋ boɔlɔ Steve wulee lɛ o neŋ o pɔge naŋ wuli ba bidɔɔ Ethan oŋ wa nyɛ ka Jehoova naŋ nɔŋ te zuŋ oŋ maŋ korɔ te bege: “Te da maŋ soorooŋ soorebie aŋa, ‘Ananso la wala ka Jehoova boɔrɔ ka te tuuro a sowuli ŋa? Sobuo aŋ maŋ wuli ka o nɔŋ la te yɛlɛ? Boŋ na pɔge te ka teneeŋ ba tu a sowuli ŋa?’” A yɛlɛ ŋa soŋɛɛ Ethan oŋ maaleŋ sagedi yaga zaa ka yɛlɛ na zaa Jehoova naŋ yel eɛ yelmeŋɛ. Steve lɛ yeleeŋ ka: “Te boɔrɔŋ ka te mɔɔ te moɔbo zaa a soŋ Ethan ka o nyɛ ka yɛŋ be la yɛlɛ na a Baabole naŋ yel na poɔŋ yaga zaa a gaŋ nensaaleba teɛroŋ.”

13. Wala ka bidɔgreba na baŋ e a soŋ ba bie ka o nyɛ lɛ oŋ na baŋ de Baabole sowuli tonɔ neŋ toma? Tere yelmannaa kaŋa.

¹³ Wuli ho bie na lɛ oŋ na baŋ de Baabole sowuli tonɔ neŋ toma o zemmo poɔŋ. Aŋa mannoo poɔŋ, te de ka ba ko la ho bie gane kaŋa sakuuŋ ka o kanne a de toŋ o sakuu toma mine. Aminekaŋaŋ noba na yɛlɛ a gane naŋ yele na erɛɛ yɛlɛ mine naŋ ba pɛlɛ Jehoova poɔ, aŋa peɛ̃mo toma bee zɔɔzɔɔ yɛlɛ. Kyɛ lɛ na a gane naŋ yele a yɛlɛ na vɛŋɛɛŋ aŋ waa ŋa a ba e yelfaa zaa, ka lɛ vɛŋ ka neɛ naŋ kanna a gane na meŋ boɔrɔ ka o tɔglɔ ana yɛlɛ na mine. Ho na baŋ soŋɛɛ ho bie na ka o leɛteɛre nyɛ teɛroŋ na Jehoova naŋ taa kyaare noba naŋ erɛ a yɛlɛ na a gane naŋ yele a yɛlɛ na. (Yeng. 22:24, 25; 1 Kor. 15:33; Fil. 4:8) A na baŋ soŋɛɛ ho bie na ka o nyɛ ka yɛŋ bebeŋ ka o de Jehoova sowuli na tonɔ neŋ toma, a kyɛ somoo ka o toɔ̃ manne o sagediibu yɛlɛ ko o  wulwulo bee o class bitaaba ka ba naŋ wa sooroo a gane poɔ yɛlɛ.

SOŊ HO BIE KA O BAŊ LƐ NA OŊ NA MAŊ MANNE O SAGEDIIBU YƐLƐ KO O TAABA

14. Bo sagediibu yɛlɛ la na baŋ e kpeɛŋaa ko Kristabie ka o manne a yɛlɛ ko o taaba, ka ananso la wala?

¹⁴ Saŋa kaŋa Kristabiiri naŋ e baapaalba maŋ zoree dabeɛ̃ ka ba manne ba sagediibu yɛlɛ ko ba taaba. Aŋa mannoo poɔŋ, vi na baŋ erɛ baŋ ka a naŋ wa ta ka ba manne wuli ananso ba naŋ ba sagedi ka boma la leɛre a menneŋ lɛɛŋ wa bebe. Ananso la wala? Kaapɔge ba wulwulibo yeleeŋ ka a yɛlɛ eɛ yelmeŋɛ naŋ bebe, ka nɔkpeɛne zaa kyebe. Ka hooŋ e bidɔgrɔ, wala hoŋ na baŋ e soŋ ho bie ka o taa nyaa a ta zoro vi bee dabeɛ̃ o sagediibu yɛlɛ?

15. Boŋ na baŋ soŋ Kristabie naŋ e baapaalaa ka o sagedi meŋɛmeŋɛ ka yɛlɛ o naŋ sagedi eɛ yelmeŋɛ?

¹⁵ Soŋ ho bie na ka o sagedi meŋɛmeŋɛ ka yɛlɛ na o naŋ sagedi na eɛ yelmeŋɛ. A ba seŋ ka ho bie na zoro dabeɛ̃ o naŋ sagedi ka Naaŋmen la maale boma na zuŋ. (2 Tim. 1:8) Science deme mine meŋ gba sagedieŋ ka boma ba wa bebe a meŋɛŋ. Ba maŋ nyɛŋ ka lɛ na bonmaalee yɛlɛ naŋ e seɛlee seŋ na wuleeŋ ka neɛ kaŋa naŋ taa yɛŋ la maalaa. Azuŋ, ba ba sagedi ka boma la wa bebe a meŋɛŋ ka neɛzaa naaneŋ maalaa aŋa lɛ ba naŋ maŋ wulo a sakue yaga pooreŋ a donɛɛ lombori zaaŋ na. Yelkaŋa naŋ na baŋ soŋ ho bie ka o ta zoro dabeɛ̃ o sagediibu yɛlɛ la ka, o peɛre baŋ bon na naŋ soŋ te yɔɔmine baŋ sagedi ka Naaŋmen la maale boma. c

16. Wala ka bidɔgreba na baŋ e soŋ ba bie ka o baŋ lɛ oŋ na baŋ wuli o taaba ananso o naŋ sagedi ka Naaŋmen la maale boma? (1 Piita 3:15) (Kaa a foto meŋ.)

¹⁶ Soŋ ho bie ka o baŋ lɛ oŋ na baŋ manne ko noba mine ananso o naŋ sagedi ka Naaŋmen la maale boma. (Kanne 1 Piita 3:15.) Ka hooŋ vɛŋ ka ho neŋ ho bie maŋ zanne zannoo yɛlɛ mine naŋ be jw.org naŋ yele Naaŋmen bonmaalee yɛlɛ, a na somooŋ yaga zaa. Ka yɛneeŋ wa zanne baare, ho na baŋ vɛŋeŋ ka ho bie na kaa iri yɛlɛ na o naŋ nyɛ ka o na baŋ de soŋɛɛ o taaba ka ba baŋ ka Naaŋmen la maale boma. Pãã vɛŋ ka yɛ e nyɛ lɛ oŋ na baŋ de a toŋ neŋ toma. Vɛŋ ka o baŋ ka a ba seŋ ka o neŋ o sakuu bitaaba ŋmeɛrɛ nɔkpeɛne. Emoo faŋa ka, ka onaŋ wa nyɛ neɛ kaŋa naŋ boɔrɔ ka ba di dama kyaare a yɛlɛ ŋa, o maŋ vɛŋ ka o yelyaga e ŋmaa lɛ kyɛ ka o maŋ soorɔ soorebie naŋ na vɛŋ ka a soba teɛre yɛlɛ gaa tɔɔre. Aŋa mannoo poɔŋ, o sakuubitɔ kaŋa na baŋ yeleŋ ka: “Yɛlɛ  maŋ nyɛrɛ yoŋ maŋ sagedi, kyɛ N daŋ ba nyɛ Naaŋmen zaa.” Kristabie naŋ e baapaalaa na baŋ deɛ yelko la o sakuubitɔ na ka: “Te de ka ho kyɛnɛɛ mɔkpiri naŋ ba peɛle zie noba naŋ kpeɛrɛ poɔŋ a te nyɛ kɔloŋ ba naŋ tu a maaloo ka neɛ na baŋ ɔŋ koɔ̃ beŋ. Wala hoŋ na teɛre? Nɔkpeɛne zaa kyebe ka neɛ kaŋa la tu a kɔloŋ ŋa. Lɛ meŋ la, neɛ kaŋa la maale a aŋdonɛɛ ane bonzaa naŋ be o poɔŋ!”

17. Wala ka bidɔgreba na baŋ e a soŋ ba bie ka o baŋ sori oŋ na baŋ tu kyɛ manne a Baabole poɔ yɛlɛ ko o taaba? Manne wuli.

¹⁷ Soŋ ho bie na ka o nyɛ lɛ oŋ na baŋ bɔ soe mine oŋ na baŋ tu kyɛ manne a Baabole poɔ yɛlɛ ko o taaba. (Uro. 10:10) Ho na baŋ de la lɛ na neɛ naŋ maŋ zanne yiele boma ŋmeɛbo na manne neŋ lɛ na te naŋ maŋ wulo noba a Baabole poɔ yɛlɛ na. Ka neɛŋ wa zanna yiele boma ŋmeɛbo, a piilee na o maŋ zannɛɛ yiele ŋmeɛbo naŋ ba e tuo. Kyɛ wagre naŋ gɛrɛ poɔŋ na, yieloŋ zaa ŋmeɛbo ba maŋ lɛ e kpeɛŋaa koo. Lɛ meŋ la, Kristabie naŋ e baapaalaa na baŋ piiliŋ a maŋ tu soe mine naŋ e mɔlɔ eŋɛŋ a moɔlɔ a duorisoŋ korɔ noba. Aŋa mannoo poɔŋ, o na baŋ soorɛɛ o sakuubitɔ kaŋa ka: “Ho baŋɛɛŋ ka science deme maŋ tɔglɛɛ Naaŋmen bonmaalee mine a maale boma? Vɛŋ ka N wuli bo vidio kaŋa naŋ manna a yɛlɛ ŋa mine.” Ka o naŋ wa wuli Was It Designed? vidio na kaŋa baare, o na baŋ yeleŋ ka: “Ka ba naŋ maŋ pugiro science deme ane boma ba naŋ tɔgle maale yɛŋ, lɛ yɛŋ nembuo aŋ seŋ ka te maŋ pugiro ka teneeŋ wa nyɛ boma na a science deme naŋ maŋ tɔgle a maale boma na?” Aminekaŋaŋ a yɛlɛ ŋa na baŋ vɛŋeŋ ka o sakuubitɔ na boɔrɔ ka o zanne yɛlɛ yaga poɔ.

NAŊ KYƐNƐ SONNƆ HO BIE NA KA O EŊNƐ O SAGEDIIBU FAŊA

18. Wala ka bidɔgreba na baŋ e a naŋ kyɛnɛ sonnɔ ba bie ka o sagediibu maaleŋ e kpeɛŋaa Naaŋmen eŋɛŋ?

¹⁸ Te be la donɛɛ kaŋa naŋ paale neŋ noba naŋ ba taa sagediibu Jehoova eŋɛŋ. (2 Pit. 3:3) Azuŋ bidɔgreba ka yɛ neŋ yɛ bieŋ wa zanna a Baabole, yɛ maŋ eŋnɛ o faŋa, ka o zanna yɛlɛ naŋ na vɛŋ ka o maaleŋ sage Naaŋmen Yelbiri na di yaga zaa, ane sowuli na zaa o naŋ ko te a kyaare yɛlɛ naŋ soma ane yɛlɛ naŋ ba soma na. Maŋ vɛŋ ka yɛ dire dama a kyaare Jehoova bonmaalee yɛlɛ, ka a vɛŋ ka o teɛre yɛlɛ gaa tɔɔre ka a somoo ka sagediibu o naŋ taa Jehoova eŋɛŋ maaleŋ e kpeɛŋaa. Somoo ka o baŋ Baabole daŋyelbo naŋ nyɛ eebo tɛgɛ soŋ zaa. Kyɛ agaŋaazaa, maŋ vɛŋ ka ho neŋ ho bie na puore kyɛ maŋ puoro koroo meŋ. Ka hooŋ wa erɛ lɛ, ho na baŋ sagediŋ ka Jehoova na soŋ boŋ ka ho soŋ ho bie na ka o eŋ o sagediibu faŋa.​—2 Tun. 15:7.