ALARIBADAARE, January 18, 2023, te da nyɛɛ duoro kaŋa naŋ e o yoŋ jw.org zuŋ, a duoro da la ka, ba iree te Yɔɔdɔbɔ Gage Fleegle ane Jeffrey Winder baŋ wa poɔ Jehoova Sieree deme Lantaa Zukaareba poɔŋ. Te yɔɔdɔbɔ bayi ŋa de la yuomo yaga a puore neŋ Jehoova yelmennoŋ poɔŋ.

Te Yɔɔdɔɔ Fleegle dɔgreba naŋ e Jehoova puorebiiri la guoli o a yelmeŋɛ poɔŋ western Pennsylvania, U.S.A. paaloŋ. Saŋa na oŋ da e baapaalaa na, o booree da te kpeɛrɛɛ teŋbile kaŋa naŋ boɔrɔ naaŋ moɔleba yaga. A da ba kɔɔre kyɛ oŋ de suobu November 20, 1988 poɔŋ.

Te Yɔɔdɔɔ Fleegle dɔgreba da maŋ emooŋ faŋa ka o de o meŋɛ eŋ a wagre zaa naaŋ moɔloo toma poɔŋ. O dɔgreba da maŋ toŋ boɔlɛɛ gbandige zukaareba aneŋ Bɛɛtil tontonneba baŋ wa ba die. Te Yɔɔdɔɔ Fleegle da maŋ nyɛɛ lɛ na te yɔɔdɔba ane te yɔɔpɔgeba ŋa naŋ da maŋ taa popeɛloŋ aseŋ. Saŋa na oŋ da di yuomo 12 na, o da de biŋee o nimitɔɔreŋ ka o na te toŋɛɛ toma Bɛɛtiliŋ. O naŋ da de suobu, a ba kɔɔre kyɛ oŋ piili a paaneɛ toma September 1, 1989 poɔŋ. Yuomo ayi puoriŋ o da ta la yɛlɛ na oŋ da de biŋ o nimitɔɔreŋ na. October 1991 poɔŋ, o da piili tonɛɛ toma Brooklyn Bɛɛtil.

Yuomo anii ka te Yɔɔdɔɔ Fleegle da de toŋ neŋ toma Gama Maaloo Tomazieŋ Bɛɛtil poɔŋ, a puoriŋ, o da lɛ te tonɛɛ toma a Service Tomazieŋ. A lɛ saŋa na, o da be la lantaapuoruu kaŋa ba naŋ yele Russia kɔkɔre yuomo awala mine poɔŋ. Yuoni 2006 poɔŋ oŋ de o pɔge Nadia, o da wa poɔ la o eŋɛŋ a Bɛɛtil toma poɔŋ. Ba da laŋ toŋɛɛ a puoruu toma Portuguese kɔkɔre lantaapuoruu poɔŋ, a kyɛ la de yuomo naŋ pare yuoŋ pie toŋ neŋ toma Spanish kɔkɔre lantaapuoruu poɔŋ. O da de la yuomo yaga toŋ neŋ toma a Service Tomazieŋ. Ba da vɛŋɛɛŋ oŋ da la te tonɔ toma a Wulibo Komitii Tomazieŋ, a puoriŋ, o da la te toŋɛɛ toma a Service Komitii Tomazieŋ. March 2022 ba da kaa irooŋ aŋa a Lantaa Zukaareba sonnɔ oŋ tonɔ a Service Komitii poɔŋ.

 Murrieta, California, U.S.A. paaloŋ baŋ da guoli te Yɔɔdɔɔ Winder. O dɔgreba la da guoloo a yelmeŋɛ poɔŋ, oŋ da de suobu March 29, 1986 poɔŋ. Kyuu gbuli puoriŋ o da eɛ auxiliary paaneɛ. A da noma kooŋ yaga zaa oŋ da boɔrɔ ka o tɔnne a toma. O da de la kyuuri awala mine toŋ a auxiliary paaneɛ toma, a kyɛ pãã da piili a paaneɛ toma meŋɛ October 1, 1986 poɔŋ.

Saŋa na te Yɔɔdɔɔ Winder naŋ da e baapaalaa na, o da gaa te puoree o beɛre bayi mine naŋ da tonɔ toma Bɛɛtiliŋ a lɛ saŋa. A lɛ ŋa da vɛŋɛɛŋ oŋ boɔrɔ ka o meŋ fiili a Bɛɛtil fɔɔm ka o yuomoŋ wa ta ka o e lɛ. A yi May 1990 poɔŋ, ba da toŋ boɔlooŋ ka o wa tonɔ toma Wallkill Bɛɛtiliŋ.

Saŋa na te Yɔɔdɔɔ Winder naŋ da be Bɛɛtiliŋ na, o da toŋ la toma Bɛɛtil toma ziiri yaga ka a mine la Zie Maaloo Tomazie, Weɛ Tomazie, ane Bɛɛtil Office Tomazie. O da de la o pɔge Angela, yuoni 1997. A yi saŋa na zaa ba naŋ kultaa na, ba zaa laŋ tonɛɛ toma Bɛɛtiliŋ a wa tɔ zenɛ. Yuoni 2014 poɔŋ, ba da de baŋ wa gaa Warwick, ka te Yɔɔdɔɔ Winder da te soŋ baŋ mɛ te donɛɛ zaa toma zikpɛŋ na. Yuoni 2016 poɔŋ ba da de baŋ gaa Watchtower Educational Center naŋ be Patterson, ka te Yɔɔdɔɔ Winder da te tonɔ toma Audio/Video Services Tomazie na. Yuomo anaare puoriŋ ba da de baŋ leɛ gaaneŋ Warwick, ka te Yɔɔdɔɔ Winder te tonɔ toma a Personnel Komitii Tomazie na. March 2022 poɔŋ, ba da kaa irooŋ ka o e a Lantaa Zukaareba Personnel Komitii sonnɔ kaŋa.

Te puoro sɔrɛɛ Jehoova ka o maale “kyɔɔtaare” na a dɔbɔ ŋa naŋ taa na ka ba moɔ̃ nimiri a tonɔ tonkpeɛne korɔ a Naaloŋ.​—Efe. 4:8