1. Bonso aŋ maŋ e kpeɛŋaa ka ho baŋ bon na meŋɛ neɛ naŋ boɔrɔ ka o wuli ka o naŋ wa yelka o vɛŋ ko boŋ?

 “N VƐŊ KO BOŊ.” Nyɛ lɛ ho eŋɛ zaa naŋ maŋ mãã ka neɛ kaŋa ho naŋ sãã o poɔŋ wa yel a yɛlɛ ŋa ko bo! Kyɛ gbɛɛ yaga, a maŋ eɛ kpeɛŋaa ka ho baŋ yel na meŋɛ neɛ naŋ boɔrɔ ka o wuli ka onaŋ wa yelka “N vɛŋ ko boŋ.” Aminekaŋaŋ o boɔrɔŋ ka o wuli ka yɛ naŋ eɛ zɔmeŋ-sonne, bee aminekaŋaŋ o soba boɔrɔŋ ka o wuli ka, a yɛlɛ la oŋ ba boɔrɔ ka o lɛ yel, kyɛ yɛ zɔmennoŋ na yɛŋ koŋ lɛ waa ŋa lɛ oŋ da waa na. Ka neɛŋ wa yelka N vɛŋ ko boŋ, a na baŋ wulee yel yuo kaŋa meŋ.

 2. Wala ka a Baabole manne Jehoova sudi yɛlɛ? (Kaa a muni zie yɛlɛ na meŋ.)

² Lɛ Jehoova naŋ dire suuri korɔ te a neŋ lɛ te naŋ maŋ dire suuri korɔ te taaba na ba maŋ yitaa. Jehoova sudi na eɛ o yoŋ. A yieloŋ yiele yelkyaarɛɛ Jehoova ka: “Ho zieŋ la ka sudi meŋɛ a be, ka lɛ na vɛŋ ka ba de gyeremɛ naŋ e zuluŋ korɔ bo.” a (Yiem. 130:4) Ɛɛ, Jehoova sudi sereŋ eɛ “sudi meŋɛ.” O naŋ maŋ wuli te bon na sudi meŋɛ naŋ waa. A Hiburu sɛgre mine poɔŋ, a Baabole sɛgsɛgreba deɛ yelbiri kaŋa manne neŋ lɛ Jehoova naŋ maŋ dire suuri korɔ noba, ba daŋ ba de ana yelbiri na manne neŋ nensaalaa sudi zaa.

 3. Bonso teŋ na baŋ yelka Jehoova sudi eɛ o yoŋ? (Aizeeya 55:6, 7)

³ Ka Jehoovaŋ wa di suuri ko neɛ, o maŋ vɛŋ kooŋ kpɛlɛŋkpɛlɛŋ. O neŋ o soba naŋ na baŋ taa la niiloŋ naŋ soma. Te  puoree Jehoova bareka o naŋ maŋ vɛnɛ korɔ te kpɛlɛŋkpɛlɛŋ.​—Kanne Aizeeya 55:6, 7.

 4. Boŋ ka Jehoova e a soŋ te teŋ baŋ bon naŋ la sudi meŋɛmeŋɛ?

⁴ Ka Jehoova neŋ nensaaleba sudiŋ ba yitaa yɛŋ, wala ka tenee naŋ e noba naŋ ba pɛgeyi na baŋ baŋ bon na sudi meŋɛmeŋɛ naŋ wuli? Jehoova de la yelmannee naŋ toɔrɔ sukyiri a soŋ te teŋ baŋ lɛ o naŋ maŋ dire suuri korɔ te. A zannoo ŋa poɔŋ, te na zannɛɛ a mine yɛlɛ. A na vɛŋeŋ ka te nyɛ ka, ka teneeŋ wa e kaŋdabaŋkalɛ, o maŋ di la suuri ko te kyɛ ka te neŋ o niiloŋ naŋ e kpeɛŋaa. Ka teneeŋ wa zanna ana yelmannee ŋa, a na soŋ teŋ ka nɔmmo a neŋ nimipa te naŋ taa ko te nimimaaroŋ Saa naŋ maŋ dire suuri korɔ te na maaleŋ e kpeɛŋaa yaga zaa.

JEHOOVA MAŊ VƐŊƐƐ TE YELBEBE KO TE KPƐLƐŊKPƐLƐŊ

 5. Ka Jehoovaŋ wa di te yelbebe suuri ko te, wala aŋ maŋ waa ko te?

⁵ A Baabole poɔŋ, ba maŋ de la yelbebe a manne neŋ tuobu naŋ e tegroŋ yaga zaa. Ŋaa ka Naa Deevid da yelkyaare o meŋɛ yelbebe: “N gbɛ-ŋmɛ eɛ yaga dɔgle N zuŋ; aŋa tuo tegroŋ, a eɛ tegroŋ yaga ko ma ka N tuo.” (Yiem. 38:4) Kyɛ Jehoova maŋ di la suuri ko bana naŋ e kaŋdabaŋkalɛ. (Yiem. 25:18; 32:5) A Hiburu yelibie “di suuri” tɛgɛ la ka “a zɛle” bee “a tuo.” Te na baŋ de la Jehoova manne neŋ dɔɔ gandaa kaŋa naŋ zɛle tuo-tegroŋ kaŋa naŋ dɔgle te bɔgɔŋ a bare.

 6. Wala ka Jehoova maŋ de te yelbebe gaaneŋ tɔɔre aseŋ?

⁶ A Baabole la de la yelmannaa kaŋa a wuli lɛ Jehoova naŋ maŋ de te yelbebe a gaaneŋ tɔɔre zaa lɛ. Yieme 103:12 yeleeŋ ka: ‘Lɛ na ŋmenaa purizie neŋ ŋmenaa kpɛzie naŋ e tɔɔre na, lɛ meŋ la oŋ iri te begu sããbu a yi te seŋ.’ Zie na ŋmenaa naŋ maŋ puri yi ane zie na o naŋ maŋ te kpɛ na ba peɛle taa fẽẽ zaa. Te na baŋ lɛ yeleŋ ka, Jehoova maŋ de la te yelbebe gaaneŋ tɔɔre zaa a gaŋ lɛ te naŋ maŋ teɛrɛ. A yɛlɛ ŋa vɛŋɛɛŋ teŋ baŋ peɛlaaŋ ka Jehoova maŋ vɛŋ ko teŋ kpɛlɛŋkpɛlɛŋ!

 7. A Baabole yeleeŋ ka wala ka Jehoova maŋ e te yelbebe? (Maika 7:18, 19)

⁷ A yelmannaa ŋa vɛŋɛɛŋ teŋ baŋ ka Jehoova maŋ de la te yelbebe gaaneŋ tɔɔre zaa, kyɛ lɛ wuleeŋ ka a naŋ maŋ be la o sukyiriŋ bee? Ai. Naa Hezekaiya sɛge kyaarɛɛ Jehoova ka: ‘Ho de la N yelbebe zaa lɔɔ ho puoriŋ.’ (Aiz. 38:9, 17) A yelmannaa ŋa wuleeŋ ka, Jehoova maŋ de la noba na naŋ e kaŋdabaŋkalɛ yelbebe lɔɔ bare o puoriŋ, a ba la leɛrɛ kaaraa. A yelbie ŋa meŋ na baŋ lɛ wuliŋ ka: “Ho vɛŋɛɛŋ ka [N yelbebe] waa ŋa a daŋ ba e zaa.” A Baabole lɛ de la yelmannaa kaŋa wuli a yɛlɛ aŋ pɛle soŋ zaa, a yelmannaa be la Maika 7:​18, 19. (Kanne.) Be yeleeŋ ka Jehoova lɔɔ la te yelbebe eŋ maŋkpoŋ zi-zuluŋ poɔŋ. Takoreŋ saŋa na, ka bon kaŋaŋ wa le maŋkpoŋ zi-zuluŋ poɔŋ, ba daŋ koŋ baŋ lɛ nyɛ o zaa.

 8. A wa tɔ pampana, boŋ teŋ zanne?

⁸ A Baabole vɛŋɛɛŋ aŋ pɛle ka, ka Jehoovaŋ wa di te yelbebe suuri ko te, o maŋ iree te yelbebe na bare kpɛlɛŋkpɛlɛŋ, azuŋ a ba seŋ ka te vɛŋ ka a lɛ dɔnnɔ te. Yelmeŋɛ la, aŋa lɛ Deevid naŋ yel na, “Banaŋ yelbebe suuri ba naŋ di ko ba, ane banaŋ yelbebe ba naŋ pɔge nyɛ la maaloo; soba na a Daana naŋ ba de o yelbebe saanaa tuo o nyɛ la maaloo.” (Uro. 4:7, 8) Sudi meŋɛmeŋɛ la lɛ!

JEHOOVA MAŊ PƐGƐƐ TE YELBEBE

 9. Wala ka a Baabole soŋ te teŋ baŋ lɛ na Jehoova naŋ maŋ di te yelbebe suuri ko te kpɛlɛŋkpɛlɛŋ?

⁹ A tuuro a yɔɔdeɛbo eŋɛŋ, Jehoova na baŋ pɛgɛɛ bana na zaa naŋ e kaŋdabaŋkalɛ yelbebe bare. Te nyɛ lɛ a Baabole naŋ manne wuli sori Jehoova naŋ maŋ tu kyɛ e lɛ. A Baabole  yeleeŋ ka, Jehoova maŋ pɛgeŋ a kyɛ vaare te yelbebe zaa bare. Lɛ maŋ vɛŋeŋ ka yelbebe deme leɛ e forifori. (Yiem. 51:7; Aiz. 4:4; Jer. 33:8) Jehoova meŋɛ mannɛɛ a yɛlɛ ŋa ka: ‘Aneazaa ka yɛ yelbebe eɛ zeɛ toẽtoẽ lɛ, kyɛ N na vɛŋeŋ ka a waa peɛlaa lɛ aŋa sakubo; Ka a naŋ gbaŋ moɔ̃ a te suɔ, a na leɛ eɛ peɛlaa lɛ a ŋa pe-kɔ̃ɔ̃ peɛle.’ (Aiz. 1:18) Ka boma mine naŋ e zeɛ yaga zaaŋ wa waare wagyɛ, a maŋ eɛ kpeɛŋaa yaga zaa ka te pɛgaa ka a yi. Kyɛ Jehoova deɛ a yelmannaa ŋa a wuli ka o na baŋ pɛgɛɛ te yelbebe bare kpɛlɛŋkpɛlɛŋ ka te koŋ baŋ lɛ nyɛ a.

10. Bo yelmannaa la ka a Baabole de wuli lɛ na Jehoova naŋ maŋ yi nimimaaroŋ poɔŋ a vɛnɛ te yelbebe korɔ te na?

¹⁰ Aŋa lɛ a zannoo naŋ pare naŋ wuli na, ba deɛ yelbebe a manne neŋ “sane.” (Mat. 6:12; Luk. 11:4) Azuŋ wagre zaa te naŋ wa e yelfaa, sane na te naŋ di Jehoova na maŋ maaleŋ eɛ kpoŋ yaga zaa. Azuŋ te di la Jehoova sane yaga zaa! Kyɛ ka Jehoovaŋ wa di suuri ko te, a maŋ waa ŋa o naŋ vɛŋ sane na te naŋ di na ko te kpɛlɛŋkpɛlɛŋ. O ba lɛ kaara soriŋ ka te lɛ yɔɔ yelbebe onaŋ di suuri ko te na sane. Aŋa lɛ neɛ poɔ naŋ maŋ pɛle ka ba naŋ wa vɛŋ sane o naŋ di koo na, lɛ meŋ la teŋ maŋ taa popeɛloŋ ka Jehoovaŋ wa di suuri ko te!

11. Ka a Baaboleŋ wa yelka te “nyɛ la te yelbebe sudi,” wala ka lɛ wuli? (Toma 3:19)

¹¹ Sane te naŋ di bee te yelfaare yoŋ naane ka Jehoova maŋ vɛŋ ko te, kyɛ o maŋ meelɛɛ te yelbebe bare. (Kanne Toma 3:19.) Aŋa mannoo poɔŋ, te de ka ho di la sane kaŋa baŋ sɛge a sane eŋ gane poɔŋ, kyɛ ka neɛ kaŋa de sɛge dalee toɔ ho sane na ba naŋ sɛge biŋ na. Ka neɛzaaŋ wa nyɛ a sɛgre, o naŋ na nyɛɛ sane na ho naŋ da di na aneazaa ka ba de la sɛge dalee toɔ a sane, kyɛ ka ba naŋ wa meelaa bare, neɛzaa koŋ baŋ lɛ nyɛ a. Yɛlɛ naŋ na baŋ soŋ te ka te baŋ a yelmannaa ŋa pare la ŋa, takoreŋ saŋa na a da maŋ eɛ mɔlɔ lɛ ka ba de koɔ̃ meele neŋ sɛgre ba naŋ de ink sɛge. Neɛ da na baŋ de la sapɔ maaroŋ a meele neŋ a sɛgre bare. Azuŋ ka ba naŋ wa meele sane bare, a da maŋ yiŋ kpɛlɛŋkpɛlɛŋ. Neɛzaa koŋ baŋ lɛ de o nimiri nyɛ bon na baŋ da sɛge na. A da maŋ waa ŋa ho ba di sane zaa. Nyɛ lɛ a naŋ e popeɛloŋ yaga zaa ka te baŋ ka, Jehoova ba maŋ vɛŋ te yelbebe ko te yoŋ, kyɛ o maŋ meelaaŋ bare kpɛlɛŋkpɛlɛŋ!​—Yiem. 51:9.

12. Boŋ teŋ na baŋ zanne yi a zuŋzugr-tegroŋ yelmannaa na poɔŋ?

¹² Jehoova lɛ wulee sori kaŋa o naŋ maŋ tu kyɛ meele te yelbebe bare kpɛlɛŋkpɛlɛŋ. O yeleeŋ ka: ‘N [na] meelɛɛ ho begu saaŋbu bare aŋa zuŋzugr-tegroŋ [naŋ pɔgaa], a meele ho yelbebe bare aŋa sagbama [naŋ pɔgaa].’ (Aiz. 44:22) Ka Jehoovaŋ wa di te yelbebe suuri ko te, a maŋ waa ŋa o naŋ de te yelbebe sɔgle tɔɔre zaa ka te neŋ o zaa koŋ baŋ lɛ nyɛ a.

13. Ka Jehoovaŋ wa di te yelbebe suuri ko te, wala aŋ maŋ waa ko te?

¹³ Bo teŋ zanne yi a yelmannee ŋa poɔŋ? Ka Jehoovaŋ wa di te yelbebe suuri ko te, a ba seŋ ka te vɛŋ ka a naŋ dɔnnɔ te te nyɔvore zemmo zaa poɔŋ. Yezu kũũ sareka na yɔɔ la te yelbebe sane kpɛlɛŋkpɛlɛŋ. Ka Jehoovaŋ wa di te yelbebe suuri ko te, a maŋ waa ŋa te daŋ ba e a lɛ yelfaa na zaa. Ŋaa ka Jehoova maŋ vɛŋ ko te ka teneeŋ wa e kaŋdabaŋkalɛ a yi te yelbebe poɔŋ.

TE NEŊ JEHOOVA MAŊ LEƐ TAA LA NIILOŊ NAŊ SOMA

14. Bonso teŋ na baŋ sagedi ka, ka Jehoovaŋ wa di suuri ko te, o maŋ vɛŋ ko teŋ kpɛlɛŋkpɛlɛŋ? (Kaa a fotori meŋ.)

¹⁴ Ka Jehoovaŋ wa di suuri ko te, te na baŋ sagediŋ peɛlaaŋ ka te leɛ wa e la o zɔmenne. Ka Jehoovaŋ wa di suuri ko te, o maŋ vɛŋ ko  teŋ kpɛlɛŋkpɛlɛŋ, azuŋ a ba seŋ ka te vɛŋ ka a lɛ dɔnnɔ te. A ba seŋ ka te teɛrɛ ka Jehoova naŋ gbuulee a yɛlɛ eŋ o poɔŋ a boɔrɔ sori oŋ na tu kyɛ tage te tobo. O daŋ koŋ e lɛ zaa. Bonso teŋ na baŋ dɛle Jehoova, ka onaŋ wa yelka o di la te yelbebe suuri ko te? Jehoova da yelko la daŋyele Jeremaiya ka: ‘N na vɛŋɛɛ ba yelfaare ko ba. N koŋ la teɛre ba yelbebe meŋ.’ (Jer. 31:34) A yelbie ŋa meŋ neŋ a zu la ka Pɔɔl da de toŋ neŋ toma saŋa na oŋ da sɛge ka: “[N] daŋ koŋ la leɛteɛre a ba yelbebe yɛlɛ zaa.” (Hib. 8:12) Kyɛ boŋ ka lɛ wulo meŋɛmeŋɛ?

15. Ka Jehoovaŋ wa yelka o koŋ lɛ teɛre te yelbebe yɛlɛ, wala ka lɛ wuli?

¹⁵ A Baabole poɔŋ, a yelbiri “leɛteɛre” ba wulo neɛ naŋ teɛrɛ yelkaŋa naŋ pare. Kyɛ a na baŋ wulee neɛ naŋ erɛ yelkaŋa. A toŋfatonɔ na baŋ da kpa Yezu lomboreŋ na da sɔrɛɛ Yezu ka: “Yezu, ta inni N yɛlɛ, ka fõõ wa kpɛ a fo Naaloŋ poɔ.” (Luk. 23:42, 43) O da ba yele korɔ Yezu ka o teɛre o yɛlɛ ana wagre na. Yezu noɔre iribo na da vɛŋɛɛŋ aŋ pɛle ka o na seŋ la ana toŋfatonɔ na a yi kũũ poɔŋ. Azuŋ ka Jehoovaŋ wa yelka o koŋ lɛ teɛre te yelbebe, lɛ wuleeŋ ka, o di la te yelbebe suuri ko te a koŋ la tage te tobo nendaarekaŋa te yelbebe na zuŋ.

16. Boŋ ka a Baabole de te manne neŋ?

¹⁶ Ka Jehoovaŋ wa di suuri ko te, te maŋ so la te menne. A Baabole la de la yelmannaa kaŋa toŋ neŋ toma a soŋ te teŋ baŋ a yel ŋa pare soŋ. A Baabole yeleeŋ ka, teŋ ba pɛgeyi na zuŋ, te eɛ “yelbieri gbaŋgbaare.” Kyɛ ka Jehoovaŋ wa di suuri ko te, te maŋ waa ŋa gbaŋgbaare ba naŋ “faa yi ne yelbieri poɔ.” (Uro. 6:17, 18; Yel. 1:5) Yelmeŋɛ la, ka teneeŋ wa baŋ ka Jehoova di la te yelbebe suuri ko te, a na baŋ vɛŋeŋ ka te maaleŋ taa popeɛloŋ aŋa gbaŋgbaa naŋ nyɛ someŋɛ.

17. Ka Jehoovaŋ wa di te yelbebe suuri ko te, sobuoŋ aŋ maŋ vɛŋ teŋ nyɛ sammo? (Aizeeya 53:5)

¹⁷ Kanne Aizeeya 53:5. A Baabole yeleeŋ ka, teŋ e yelbebe deme na zuŋ, te waa ŋa  noba naŋ taa baaloŋ faa kaŋa. Kyɛ a tuuro a yɔɔdeɛbo sareka na Jehoova naŋ tu o Bidɔɔ eŋɛŋ kyɛ ko te na vɛŋɛɛŋ teŋ nyɛ sammo. (1 Pit. 2:24) Ka teneeŋ wa e yelfaa, te neŋ Jehoova niiloŋ na maŋ sããmeŋ. Kyɛ a tuuro a yɔɔdeɛbo sareka na eŋɛŋ, o na baŋ di la te yelbebe suuri ko te ka te neŋ o leɛ taa niiloŋ naŋ soma. Aŋa lɛ neɛ poɔ naŋ maŋ pɛle yaga zaa ka o naŋ wa nyɛ sammo a yi baaloŋ faa kaŋa eŋɛŋ na, lɛ neŋ o zu la ka te meŋ poɔ maŋ pɛle yaga zaa ka Jehoovaŋ wa di suuri ko te ka lɛ vɛŋ ka te neŋ o niiloŋ leɛ soma.

BO TƆNƆ TEŊ MAŊ NYƐ YI JEHOOVA SUDI NA POƆŊ?

18. Boŋ teŋ zanne yi yelmannee naŋ kyaare Jehoova yelbebe sudi na poɔŋ? (Kaa a daga ŋa, “Lɛ Na Jehoova Naŋ Maŋ Di Te Yelbebe Suuri Ko Te.”)

¹⁸ Boŋ teŋ zanne yi yelmannee naŋ kyaare Jehoova yelbebe sudi na poɔŋ? Ka Jehoovaŋ wa di te yelbebe suuri ko te, o maŋ vɛŋ ko teŋ kpɛlɛŋkpɛlɛŋ. Azuŋ te neŋ te Saa naŋ be sazuŋ na na baŋ leɛ taa la niiloŋ naŋ soma. Kyɛ te baŋɛɛŋ ka, yelbebe sudi naŋ yi Jehoova zie eɛ kyɔɔtaa o naŋ ko te, o naŋ nɔŋ te a kyɛ taa nimimaaroŋ ko te zuŋ, kyɛ a ba wuli ka te seŋnɛɛ yelbebe sudi.​—Uro. 3:24.

19. (a) Bo yɛlɛŋ maŋ vɛŋ ka te poɔ pɛle yaga zaa? (Urom 4:8) (b) Bo teŋ na zanne a zannoo naŋ tɔnne na poɔŋ?

¹⁹ Kanne Urom 4:8. Te poɔ pɛlɛɛŋ yaga zaa Jehoova naŋ maŋ dire suuri korɔ te! (Yiem. 130:4) Kyɛ ka teneeŋ wa boɔrɔ ka Jehoova di te yelbebe suuri ko te yɛŋ, aseŋ ka te e a yelnimizeɛ ŋa Yezu naŋ da yelka te maŋ erɛ na, o da yeleeŋ ka: “Ka yɛneeŋ ba di yɛ taaba yelfaare suuri a ko ba, yɛ Saa meŋ koŋ di yɛ yelfaare suuri a ko yɛ.” (Mat. 6:14, 15) Azuŋ, aseŋ ka te tɔglɔ Jehoova a maŋ vɛnɛ korɔ te taaba. Kyɛ wala teŋ na baŋ e a e lɛ? A zannoo naŋ tɔnne na na wuli teŋ.