Mary ane o serɛ John, a be la paaloŋ kaŋa noba yaga naŋ yi Philippines paaloŋ naŋ wa kpeɛrɛ be a kyɛ tonɔ toma, ba poɔ maŋ pɛleŋ yaga zaa ka ba manne a duorisoŋ ko ana noba na. A COVID-19 baaloŋ faa na saŋa, Mary neŋ noba naŋ be a lɛ paaloŋ na ane paaloŋ yobo meŋ da piili zannɛɛ a Baabole. Wala oŋ da e a kyɛ nyɛ ba?

Mary da maŋ soorɛɛ o Baabole zannezanneba na ka, “Yɛ baŋɛɛ neɛ kaŋa meŋ naŋ na boɔrɔ ka o zanne a Baabole bee?” Ka banaŋ wa yelka ɛɛ, o da maŋ yeleŋ ka ba somoo ka o neŋ ba nyɛ taa. Ka teneeŋ maŋ soorɔ te Baabole zannezanneba a soorebiri ŋa, a maŋ yi la tɔnɔ yaga zaa. Bonso teŋ yel lɛ? Noba poɔ naŋ pɛle neŋ yɛlɛ na baŋ zanna na maŋ boɔrɔŋ ka ba meŋ manne a yɛlɛ ko ba yideme ane ba zɔmenne. Mary da maŋ soorɛɛ o Baabole zannezanneba a soorebiri ŋa, te nyɛ tɔnɔ naŋ yi a poɔŋ wa.

Mary Baabole zannezanna Jasmin da de oŋ wuli noba banaare naŋ da boɔrɔ ka ba meŋ zanne a Baabole. Ba kaŋa la Kristine, o poɔ da pɛle neŋ la o zannoo na yaga zaa, azuŋ o da yelko la Mary ka ba maŋ zanne gbɛre buyi daa zaa. Saŋa na Mary naŋ da sooroo ka o baŋɛɛ noba mine meŋ naŋ na boɔrɔ ka ba zanne a Baabole na, Kristine da yeleeŋ ka, “Ɛɛ, N na deɛ N zɔmenne wuli bo.” Daaraa wala mine kpakyagaŋ, Kristine da de la Mary wuli o zɔmenne banaare naŋ da boɔrɔ ka ba meŋ zanne a Baabole. A puoriŋ, Kristine da de la Mary wuli o zɔmeŋ-yobo mine. O zɔmenne na meŋ da de oŋ wuli ba meŋ zɔmenne.

Kristine meŋ da boɔrɔŋ ka o booree deme na naŋ be Philippines paaloŋ na meŋ zanne a Baabole. Azuŋ o da yelko la o pɔgeyaa, Andrea. A piilee na, Andrea da teɛrɛŋ ka, ‘Jehoova Sieree Deme eɛ puor-paalaa kaŋa, ba ba sage Yezu di, a maŋ de a Old Testament yoŋ tonɔ neŋ toma.’ Kyɛ a dɛndɛŋ saŋa baŋ wa zanne a Baabole baare na, o da wa nyɛɛŋ ka teɛroŋ na oŋ da taa kyaare Jehoova Sieree Deme na da ba tori. Azuŋ ka onaŋ wa zanne yelpaalaa zaa yi a Baabole poɔŋ, o maŋ yeliŋ ka “a Baabole la yel, azuŋ aseŋ ka a e yelmeŋɛ!”

A puoriŋ, Andrea da de la Mary wuli o zɔmenne bayi mine ane o tontoŋtɔ kaŋa baŋ meŋ piili zanna a Baabole. Andrea puree Angela da eɛ zɔŋɔ, ka Mary neŋ Andrea wa zanna a Baabole, o da maŋ kyɛllɛŋ, kyɛ Mary da ba baŋ. Bebiri kaŋa, Angela da yelko la Andrea ka o soore Mary nyɛ ka o neŋ o meŋ na baŋ piili zannɛɛ a Baabole bee. Angela poɔ da pɛlɛɛŋ neŋ yɛlɛ na oŋ da zanna na. Kyuu gbuli kpakyagaŋ, o da nyɔgɛɛ Baabole sɛgre yaga eŋ o teɛroŋ, a da boɔrɔ ka ba maŋ zanne a Baabole gbɛre bonaare daa zaa! Andrea da maŋ soŋɛɛ o puree ŋa oŋ kyɛlle a lammore videoconferencing zuŋ.

 Saŋa na Mary naŋ wa baŋ ka Kristine serɛ Joshua da maŋ kyɛlɛɛ a zannoo poɔ yɛlɛ na, Mary da soorooŋ ka o na boɔrɔŋ ka o maŋ wa poɔ a zannoo poɔŋ bee. Ka Joshua yel, “N deɛ boɔrɔŋ ka N kyɛllɛ, ta wa soorɔ ma soorebiri zaa, ka hooŋ wa soore ma soorebiri, N na iriŋ.” Baŋ da piili a zannoo, mintiri anuu kpakyagaŋ, o da piili soorɛɛ soorebie a gaŋ Kristine gba, a da boɔrɔ ka o meŋ piili zanna a Baabole.

A soorebiri na Mary naŋ da maŋ soore na da vɛŋɛɛŋ oŋ wa nyɛ Baabole zannezanneba yaga. Saŋa na baŋ wa e yaga na, o da vɛŋɛɛŋ ka te yɔɔmine somoo. A baaraa zaa Mary ane noba 28 naŋ be paalonne anaare poɔŋ da piili zannɛɛ a Baabole.

Mary Baabole zannezanna dɛndɛŋ soba Jasmin da de la suobu April 2021 poɔŋ. Kristine meŋ da de la suobu May 2022 poɔŋ, o da leɛ gaa la Philippines ka o te poɔ o booree poɔŋ. Kristine zɔmenne na oŋ da de ba wuli Mary na, ba poɔ bayi meŋ da de la suobu. Kyuuri awala mine puoriŋ Angela meŋ da de la suobu. Pampana ŋa, o e la regular paaneɛ. Kristine serɛ Joshua, ba pɔgeyaa Andrea, ane o Baabole zannezanneba yaga nyɛrɛɛ nimitɔɔre gaabo yaga a Baabole zannoo poɔŋ, a tagra peɛlɛ Jehoova.

Yezu ane a bitontonee saŋa na, noba da maŋ mannɛɛ yɛlɛ ba naŋ zanne kyaare Yezu na korɔ ba booree deme ane ba zɔmenne. (Gyn. 1:​41, 42a; Tom. 10:​24, 27, 48; 16:​25-33) Azuŋ soore ho Baabole zannezanneba ane noba na poɔ naŋ pɛle ka ba meŋ zanne a Baabole na ka, “Yɛ baŋɛɛ neɛ kaŋa meŋ naŋ na boɔrɔ ka o zanne a Baabole bee?” Ka hooŋ meŋ de a soorebiri ŋa toŋ neŋ toma, aminekaŋaŋ a na soŋ boŋ ka ho meŋ nyɛ noba yaga naŋ na boɔrɔ ka ba meŋ zanne a Baabole.