ZENƐ ŋa, ho nyɛɛŋ ka noba yaga maŋ boɔrɔŋ ka ba korɔ ba gyeremɛ naŋ e o yoŋ, ane arezi-bɛrɛ a donɛɛ poɔŋ bee? Lɛ zaa ba naŋ taa boma seŋ, kyɛ ba maŋ naŋ teɛreŋ ka aseŋ ka ba nyɛ gaŋ lɛ. Noba naŋ taa a lɛ teɛroŋ ŋa taa maŋ teɛrɛɛ ba yoŋ yɛlɛ, a ba taa bareka puoruu gyogo. A Baabole yeleeŋ ka lɛ aŋ na waa a bebi-baaree saŋa.​—2 Tim. 3:2.

Yelmeŋɛ la ka, zenɛ naane ka noba piili teɛrɛ ba menne yoŋ yɛlɛ. Aŋa mannoo poɔŋ, Adama ane Hawaa da deɛ gbɛre ko ba menne a kyaare yɛlɛ naŋ soma ane yɛlɛ naŋ ba soma. Ba gbɛ-de na zuŋ teŋ zaa dire woore zenɛ ŋa. Yuomo mine puoriŋ, Uzaaya naŋ da e Gyuuda Naa da teɛrɛŋ ka o taa la apoɔsori ka o iri sareka nyugiruu, Kyɛ o da ba taa apoɔsori fẽẽ zaa ka o e lɛ. (2 Tun. 26:​18, 19) Lɛ neŋ o zu ka a Faraziimine ane Sadusiimine meŋ da taa sagediibu ka baŋ e Aboraham yaane zuŋ, aseŋ ka Naaŋmen ko ba maaloo naŋ e o yoŋ.—Mat. 3:9.

Noba naŋ teɛrɛ ba menne yoŋ yɛlɛ a kyɛ zɛgrɛ ba menne la ŋmaa gyeere te, azuŋ ba gyogo na na baŋ nyɛ la kpeɛ̃o te zuŋ. (Gal. 5:26) Aminekaŋaŋ te na baŋ piili teɛrɛŋ ka aseŋ ka te nyɛ apoɔsori kaŋa naŋ e o yoŋ bee aseŋ ka ba korɔ te gyeremɛ naŋ e o yoŋ. Boŋ na baŋ soŋ te ka te ta taa a lɛ teɛroŋ ŋa tɔ? A dɛndɛŋ soba, aseŋ ka te daŋ baŋ Jehoova teɛroŋ a kyaare a yɛlɛ. Baabole sowuli ayi mine na soŋ teŋ.

Jehoovaŋ maŋ wuli bon naŋ seŋ neŋ te. Kaa a yɛlɛ ŋa nyɛ.

• A booree poɔŋ, Jehoova boɔrɔŋ ka pɔge de gyeremɛ korɔ o serɛ, ka serɛ meŋ nɔnɔ o pɔge. (Efe. 5:33) Jehoova yeleeŋ ka kultaa deme seŋ ka ba  wulo dɔɔ neŋ pɔge nɔmmo korɔ ba kultatɔ yoŋ. (1 Kor. 7:3) Aseŋ ka bibiiri taa gyeremɛ ko ba dɔgreba, lɛ meŋ aŋ seŋ ka bidɔgreba meŋ kaara ba biiri zu, a kyɛ wulo ba nɔmmo meŋ.—2 Kor. 12:14; Efe. 6:2.

• A lantaapuoruu poɔŋ, Jehoova boɔrɔŋ ka te derɛ gyeremɛ naŋ seŋ neŋ korɔ a lantaapuoruu nembɛrɛ tonkpeɛne ba naŋ tonɔ na zuŋ. (1 Tɛs. 5:12) Kyɛ ba ba taa apoɔsori ka ba dire kpeɛ̃o ba yɔɔmine zu.—1 Pit. 5:​2, 3.

• Naaŋmen ko la nensaaleba gɔmenantere apoɔsori ka ba maŋ de zuyɔɔ yi noba na ba naŋ dire naaŋ ba zuŋ na, a kyɛ la kaara soriŋ meŋ ka a noba de gyeremɛ korɔ ba.—Uro. 13:​1, 6, 7.

Jehoova maŋ yi la nɔmmo poɔŋ a ko te a gaŋ lɛ te naŋ kaara soriŋ. Faaloŋ naŋ be te eŋɛŋ na zuŋ, aseŋ ka te kpi. (Uro. 6:23) Kyɛ yelmeŋɛ nɔmmo Jehoova naŋ taa ko te na zuŋ, o korɔ teŋ maaloo yaga. (Yiem. 103:​10, 11) Maaloo zaa te naŋ maŋ nyɛ bee apoɔsori zaa te naŋ maŋ nyɛ ba wuli ka teŋ seŋ neŋ zuŋ la, kyɛ a eɛ Jehoova yelmeŋɛ nɔmmo o naŋ taa ko te zuŋ.—Uro. 12:​6-8; Efe. 2:8.

Kaara soŋ a ta wa piili teɛrɛ yɛlɛ aŋa lɛ noba naŋ be a donɛɛ poɔŋ naŋ teɛrɛ na. Te na baŋ piili teɛrɛŋ ka aseŋ ka te taa apoɔsoe mine a gaŋ te taaba ka teneeŋ ba kaara soŋ. Yezu da terɛɛ yelmannaa kaŋa naŋ kyaare tontonneba mine ba neŋkpoŋ naŋ da yɔɔ ba kaŋa zaa denari bonyeni a de wuli lɛ aŋ na baŋ e mɔlɔ ka te piili taa a lɛ teɛroŋ ŋa. A tontonneba mine da piilee a toma begu-pipi a toŋ toma lɛɛŋ ka zie te mãã; ka ba mine meŋ toŋ awa gbuli yoŋ. A dɛndɛŋ tontonneba na da teɛrɛ ka ba na nyɛɛ saŋyɔɔ kpoŋ a gaŋ bana na naŋ wa a puoriŋ na. (Mat. 20:​1-16) Yezu da de la a yelmannaa ŋa wuli ka, aseŋ ka o potuuribo maŋ taa nimipa ko bonzaa Naaŋmen naŋ korɔ ba.

Taa bareka puoruu gyogo, a kyɛ ta maŋ kaara soriŋ ka noba korɔ bo boma. (1 Tɛs. 5:18) Tɔglɔ a bitontona Pɔɔl. O da ba maŋ yelka a Kristabiiri naŋ be Korinti na koroo boma yɛlɛ naŋ fɛre o, aneazaa ka o da taa la apoɔsori ka o e lɛ. (1 Kor. 9:​11-14) Aseŋ ka te maŋ wulo nimipa  korɔ bon na zaa noba naŋ korɔ te, a kyɛ ta maŋ kaara soriŋ ka noba korɔ te boma.

Taa sigrimennoŋ gyogo. Ka neɛŋ wa teɛrɛ o meŋɛ yoŋ yɛlɛ a te gaali, o maŋ teɛreŋ ka aseŋ ka o da taa boma gaŋ lɛ na o naŋ taa na. Ka teneeŋ taa sigrimennoŋ, te daŋ koŋ taa a teɛroŋ faa ŋa zaa.

Daŋyele Daaniel eɛ ewuli soŋ a kyaare sigrimennoŋ. O da yi la booree naŋ taa yuori yaga zaa poɔŋ, a da veɛlɛ, a baŋ boma, a kyɛ baŋ yɛlɛ yaga nimiri soŋ zaa. Azuŋ o da na baŋ teɛrɛŋ ka aseŋ ka o nyɛ arezi-kpoŋ bee ka ba derɛ gyeremɛ naŋ e o yoŋ koroo. (Daan. 1:​3, 4, 19, 20) Kyɛ Daaniel da sigree o meŋɛ, lɛ eebo da vɛŋɛɛŋ oŋ e nanee yaga zaa ko Jehoova.—Daan. 2:30; 10:​11, 12.

A donɛɛ poɔŋ yɛŋ, noba maŋ zɛgrɛɛ ba menne a kyɛ teɛrɛ ba yoŋ yɛlɛ, yɛ vɛŋ ka te tage te menne yi a lɛ gyogo ŋa eŋɛŋ. Lɛ na vɛŋeŋ ka te naŋ kyɛnɛ nyɛrɛ popeɛloŋ yire maaloo na zaa Jehoova naŋ korɔ te na aneazaa ka te ba seŋ neŋ.