HO DAŊ tuoree yeltuo kaŋa ka neɛzaa kyebe a na soŋ bo bee? A donɛɛ ŋa poɔŋ, “zie. . .e la kpeɛŋaa yaga” ka lɛ na baŋ vɛŋ ka te enne kyoɔre kyɛ ka te e te yoŋ lɛ. (2 Tim. 3:1) Kyɛ ka teneeŋ wa tuoro yelkpeɛne, te ba e te yoŋ, noba bebeŋ a na baŋ soŋ te. A Baabole yeleeŋ ka zɔmeŋ-sonne na baŋ soŋ teŋ “dɔgɛɛ daare.”​—Yeng. 17:17.

A bitontona Pɔɔl da nyɛɛ tɔnɔ yaga yi o zɔmeŋ-sonne na mine o neŋ ba naŋ da gɛrɛ a o misinaare sokyɛŋ na poɔŋ, ba da somooŋ yaga zaa. (Kol. 4:7-11) Saŋa na baŋ da nyɔge Pɔɔl eŋ nempɔgedieŋ Urom paaloŋ na, o zɔmenne da somooŋ, a da e yɛlɛ mine oŋ da koŋ baŋ e o meŋɛŋ a koo. Aŋa mannoo poɔŋ, Epaferase da de la bontaree mine yi a Kristabiiri naŋ da be Filipi na zieŋ a wa ko Pɔɔl. (Fil. 4:18) Takyiku meŋ da tɔrɛɛ Pɔɔl lɛtare na ko lantaapuor-tɛɛtɛɛ. (Kol. 4:7) Pɔɔl zɔmenne na sommo zuŋ, o da toɔ̃ toŋɛɛ o puoruu toma na, saŋa na baŋ da pɔgoo o meŋɛ dieŋ, ane saŋa na baŋ da pɔgoo nempɔgedieŋ na. Wala hoŋ meŋ na baŋ e a e zɔmeŋ-soŋ zenɛ ŋa?

Zenɛ ŋa meŋ, te yɔɔmine maŋ wulee lɛ teŋ na baŋ nyɛ tɔnɔ yi zɔmeŋ-sonne zieŋ. Elisabet naŋ e regular paaneɛ a be Spain paaloŋ yelee lɛ te yɔɔpɔge kaŋa naŋ da somoo saŋa na oŋ da tuoro yelkpeɛne mine na. Saŋa na dɔkta naŋ da yelka o ma taa la cancer baaloŋ kaŋa naŋ koŋ baŋ la saŋ na, te yɔɔpɔge na da sɛgɛɛ masɛgere naŋ eŋnɛ faŋa yaga zaa a yi a Baabole poɔŋ a de toɔle ko Elisabet. Elisabet yeleeŋ ka, “saŋa na maŋ wa nyɛ o sɛgre na, a da eŋ maŋ faŋa yaga zaa, maŋ nyɛ ka N ba e N yoŋ. Lɛ da soŋ maŋ maŋ naŋ erɛ yɛlɛ naŋ seŋ ka N erɛ na.”​—Yeng. 18:24.

Te neŋ te yɔɔmine zɔmennoŋ na baŋ eɛ kpeɛŋaa ka teneeŋ maŋ sonnɔ ba te puoruu toma poɔŋ. Aŋa mannoo poɔŋ, ho na baŋ de la te yɔɔdɔɔ nyaaŋaa kaŋa bee te yɔɔpɔge nyaaŋaa kaŋa neŋ ho lɔɔre a gaaneŋ a naaŋ moɔloo bee te lammozie bee? Ka hooŋ sonnɔ ba a sori ŋa poɔŋ, yɛ na baŋ eŋɛɛ taa faŋa. (Uro. 1:12) Kyɛ Kristabiiri mine bebeŋ a koŋ baŋ yi ba deriŋ. Wala teŋ na baŋ e a soŋ ba?

Te yɔɔmine na mine koŋ baŋ gaa a Lammozie ba naŋ beɛrɛ baaloŋ nimizeɛ kaŋa zuŋ. Lɛ aŋ da waa ko David, cancer baaloŋ kaŋa ba naŋ boɔlɔ lymphoma da nyɔgooŋ. Ba kooŋ cancer baaloŋ sammo kyuuri ayoɔbo. A kyuuri ayoɔbo ŋa zaa poɔŋ, David neŋ o pɔge Lidia da maŋ be la ba dieŋ a kyɛ kɔnɛte a lammo.

Bo sommo ka ba lantaapuoruu deme da ko ba? Ka a lammoŋ wa baare zaa, te yɔɔmine na mine naŋ be a Lammozieŋ na da maŋ mɔɔŋ kyɛ ka ba neŋ David ane Lidia di dama videoconference zuŋ. Ane meŋ, ka David ane Lidia wa iri soorebiri noɔre  a lammo poɔŋ, a puoriŋ te yɔɔmine na da maŋ toɔle baŋ masɛgere a yelko ba ka ba poɔ pɛlɛɛŋ neŋ ba noɔre iribo na. Boŋ da yi a poɔŋ wa? David ane Lidia da wa nyɛɛŋ ka ba ba e ba yoŋ.

Aminekaŋaŋ, te na baŋ sɛgrɛɛ yɛlɛ ka te neŋ te yɔɔmine na naŋ koŋ baŋ yi ba dieŋ na laŋ tonɔ a naaŋ moɔloo toma. Te na baŋ eɛ leɛroo fẽẽ te zemmo poɔŋ ka lɛ vɛŋ ka te neŋ ba lanna a de wuli ka te ba inni ba yɛlɛ. (Yeng. 3:27) Aminekaŋaŋ, ho neŋ ba na baŋ laŋ sɛgɛɛ lɛtare bee a e fone zu naaŋ moɔloo. A lantaapuoruu nembɛrɛ na baŋ sɛgrɛɛ yɛlɛ a de videoconference toŋ neŋ toma ka banaŋ wa erɛ naaŋ moɔloo yelsɛgraa. David ane Lidia poɔ da pɛlɛɛŋ yaga zaa ba lantaapuoruu naŋ da taa a yelsɛgraa ŋa. David yeleeŋ ka, “Te neŋ te naaŋ moɔloo sugu deme naŋ da maŋ de wagre fẽẽ a di dama a kyɛ laŋ puore na da maŋ eŋ teŋ faŋa yaga zaa.” Ane meŋ, ka anaŋ na baŋ nyɛ eebo, saŋa kaŋa, ho na baŋ de la ho Baabole zannezanna gaaneŋ te yɔɔmine naŋ koŋ baŋ yi ba dieŋ ka yɛ te e a zannoo. Kyɛ aseŋ ka ho daŋ soore ba nyɛ ka vuo na bebeŋ ka ho e lɛ bee.

Ka teneeŋ maŋ wa lanna neŋ te yɔɔmine naŋ koŋ baŋ yi ba deriŋ na, a na soŋ teŋ ka te baŋ ba soŋ, a nyɛ ba gyog-sonne, ka te neŋ ba zɔmennoŋ meŋ maaleŋ e kpeɛŋaa. Aŋa mannoo poɔŋ, ka hooŋ wa nyɛ lɛ ba naŋ maŋ wuli neɛ kaŋa a Baabole poɔ yɛlɛ aŋ tɔ a soba sukyiri yaga zaa, a na vɛŋeŋ ka ho maaleŋ nɔŋ ba yɛlɛ yaga zaa. Ho na wa nyɛɛ zɔmeŋ-paala ka hooŋ wa sonnɔ te yɔɔmine ka ba gɛrɛ a naaŋ moɔloo a neŋ a lammore.​—2 Kor. 6:13.

Saŋa na Pɔɔl naŋ da tuoro yelkpeɛne na, o zɔmeŋɛ Tiitu da gaa la o zie, lɛ eebo da dii la Pɔɔl sukyiri yaga zaa. (2 Kor. 7:​5-7) Te na baŋ yelee yɛlɛ a de eŋ te yɔɔmine faŋa. Kyɛ Tiitu ewuli soŋ ŋa soŋ teŋ teŋ nyɛ ka, ka teneeŋ maŋ lanna neŋ te yɔɔmine, a kyɛ erɛ yɛlɛ mine sonnɔ ba, ana baŋ dii la ba sukyie yaga zaa.​—1 Gyn. 3:18.

Te yɔɔmine naŋ be Russia eɛ ewuli soŋ a maŋ sonnɔ taa. Te nyɛ Sergey ane o pɔge Tatyana zemmo yɛlɛ. Polisiri da wa welɛɛ ba die a kyɛ de ba gaaneŋ police station. Tatyana baŋ da daŋ bare oŋ gaa die. Sergey yeleeŋ ka: “Saŋa na [Tatyana] naŋ da te ta die na, te yɔɔpɔge kaŋa da de la nyaa a gaa ka o te puoruu. A da ba kɔɔre kyɛ ka te yɔɔmine yaga da wa soŋ te teŋ leɛ maale te die poɔ boma na biŋ.”

Sergey la yeleeŋ ka: “N nɔŋɛɛ yelbie naŋ be Yeng Yelibie 17:​17, beŋ yelka: ‘zɔmeŋ soŋ maŋ wulee nɔmmo wagre zaa o maŋ eɛ yɔɔ ba naŋ dɔge dɔgɛɛ daare zuŋ.’ Saŋa na maŋ da tuoro dɔgroŋ na, N da boɔrɛɛ N zɔmenne sommo yaga zaa, lɛ vɛŋɛɛŋ maŋ nyɛ ka yelbie naŋ be Yeng Yelibie 17:17 na sereŋ eɛ yelmeŋɛ. Jehoova ko maŋ zɔmenne naŋ taa nyaa kpoŋ baŋ soŋ ma.” a

Pampana ŋa te naŋ tuoro yelkpeɛne yaga zaa na, a na fɛreŋ ka te nyɛ sommo yi te zɔmenne zie. A na fɛreŋ yaga zaa ka te nyɛ ba sommo a dɔgroŋ kpoŋ saŋa. Azuŋ yɛ vɛŋ ka te mɔɔ te moɔbo zaa a eŋnɛ te zɔmenne faŋa a kyɛ sonnɔ ba pampana!​—1 Pit. 4:​7, 8.