A DONPAALAA Kɔkɔleɛroo poɔ, a yelbiri “wiri toriko” na baŋ are ko la bon zɔnnaa zaa. (Tom. 8:​28, 29, 38) Kyɛ a wiri toriko na a Etopiya dɔɔ ŋa naŋ da zɔŋ na eɛ kpoŋ gaŋ zɔɔzɔɔ torikori, bee torikori baŋ da maŋ de gɛrɛ neŋ zogaŋ taa zoobu. Ananso la wala teŋ yele lɛ?

A Etopiya dɔɔ ŋa da taa la arezie naŋ e kpoŋ, a da tu so-tɔɔre meŋ. A dɔɔ ŋa da “eɛ Etopiya pɔgenaa na baŋ boɔlɔ Kandasi na toŋtonɔ, o da taa la arezie naŋ e kpoŋ. Onaŋ da kaara a pɔgenaa bonnanɛɛ zaa zu.” (Tom. 8:27) Zenɛ ŋa Sudan ane Igyipiti samun-duri seŋ da poɔ la takoreŋ saŋa Etopiya paaloŋ. A dɔɔ ŋa da taa la tuobu yaga, kyɛ aminekaŋaŋ bonzonnaa bonyenaa yoŋ naane oŋ da de tu o sokyeŋ na. Takoreŋ saŋa na, wie torikori na baŋ da maŋ de derɛ noba na da maŋ taa la kɔgbɛɛ anaare. Acts—An Exegetical Commentary gane na yeleeŋ ka, “Ana toriko ŋa da maŋ taa la zupɔgeraa a taa kɔgbɛɛ anaare meŋ, azuŋ o poɔ da maŋ eɛ kpoŋ hoŋ na baŋ de tuobu eŋ o poɔŋ, kyɛ ka neɛ meŋ naŋ nyɛ zie zeŋ pɛnnɛ. Aminekaŋaŋ, lɛ da maŋ vɛmeŋ ka noba de o tu so tɔɔre.”

A Etopiya dɔɔ da kannaŋ saŋa na Filipi naŋ da wa o zie na. A sɛgre yeleeŋ ka “Filipi da zo ta la a wiri toriko a woŋ a dɔɔ naŋ kanna daŋyele Aizeeya gane na aŋ yire.” (Tom. 8:30) Wie torikori ba naŋ da maŋ maale ka ba de derɛ neŋ noba na da ba maŋ zoro yaga. Azuŋ a toriko naŋ da ba zoro yaga naŋ da vɛŋ aŋ e mɔlɔ ko a Etopiya dɔɔ-varaa oŋ toɔ̃ kanna, a kyɛ da la e mɔlɔ meŋ ko Filipi ka o zo neŋ o gbɛɛ te pɔge o.

A Etopiya dɔɔ ŋa “da yelko la Filipi ka o kpɛ a wiri toriko poɔ ka ba laŋ zeŋ.” (Tom. 8:31) Wie torikori na ba naŋ da maŋ de zoro zogaŋtaa zoobu na yɛŋ, a wir-zɔnnɔ da maŋ areŋ. Kyɛ a so tu wiri toriko ŋa yɛŋ, dakogi da na be la o poɔŋ ka a dɔɔ-varaa ane Filipi na baŋ zeŋ o zuŋ.

Yɛlɛ na Toma zuri 8 ane takoreŋ saŋa yelpeɛre yɛlɛ naŋ wuli na zuŋ, beraayi ŋa ka teneeŋ wa yele a Etopiya dɔɔ-varaa toriko na yɛlɛ, te maŋ de la toriko naŋ e kpoŋ a gaŋ zɔɔzɔreba toriko, kyɛbee zogaŋtaa zoobu toriko foto toŋ neŋ toma a te gama pooreŋ.