1. Bonso ka a Yezu Kũũ Leɛteɛroo na e bebiri naŋ e tegroŋ gaŋ bebiri zaa a yuoni zaa poɔŋ? (Luka 22:​19, 20)

 KRISTA Kũũ Leɛteɛroo bebiri na la bebiri naŋ e tegroŋ yaga zaa a yuoni poɔŋ a ko Jehoova puorebiiri. Ona yoŋ la yɛlɛ Yezu naŋ yelka o potuuribo maŋ e a leɛteɛre o yɛlɛ. (Kanne Luka 22:​19, 20.) Te maŋ kaarɛɛ soriŋ ka a Yezu Kũũ Leɛteɛroo na ta. Ananso la wala? Yɛ vɛŋ ka te nyɛ.

2. Ananso la wala teŋ maŋ kaara soriŋ ka a Yezu Kũũ Leɛteɛroo na ta?

² A Yezu Kũũ Leɛteɛroo na maŋ soŋ teŋ teŋ teɛre lɛ a yɔɔdeɛbo naŋ e nimizeɛ aseŋ, ane maaloo na zaa oŋ na de wa ko te na yɛlɛ. O maŋ teɛre teŋ yɛlɛ na mine teŋ na baŋ e a wuli nimipa a ko Yezu sareka na. (2 Kor. 5:​14, 15) A maŋ la ko teŋ apoɔsori ka te neŋ te yɔɔmine “eŋ taa faŋa.” (Uro. 1:12) Yuoni zaa te yɔɔmine naŋ bare a lammore waabo maŋ wa la a Yezu Kũũ Leɛteɛroo lammo. Nɔmmo na te yɔɔmine naŋ maŋ wuli ba na, a maŋ eŋ baŋ faŋa baŋ lɛ piili puoro Jehoova. Nempaalba na meŋ naŋ maŋ wa a lammo na poɔ maŋ pɛleŋ neŋ yɛlɛ na baŋ maŋ woŋ a kyɛ nyɛ na, ka lɛ vɛŋ baŋ meŋ piili zanna a Baabole. Ana yɛlɛ ŋa zaaŋ vɛŋ ka a Yezu Kũũ Leɛteɛroo na e tegroŋ yaga zaa lɛ ko te!

3. Sobuo ka a Yezu Kũũ Leɛteɛroo na maŋ vɛŋ ka te neŋ te yɔɔmine zaa taa noɔreyeni? (Kaa a foto meŋ.)

³ Te maŋ la kaarɛɛ soriŋ ka a Yezu Kũũ Leɛteɛroo na ta, bonso a maŋ vɛŋeŋ ka te neŋ te yɔɔmine naŋ be a donɛɛ lombori zaa taa noɔreyeni. Ka ŋmenaaŋ wa sigre teŋɛ, Jehoova Sieree Deme zaa maŋ laŋ la taa a donɛɛ lombori zaa. Te zaa maŋ kyɛlle woŋ la yelyaga kaŋa naŋ wulo lɛ a yɔɔdeɛbo naŋ e nimizeɛ aseŋ. Te maŋ yielee pugibu yiele ayi, a de a dãã ane a boroboro tuuli, a yi te poɔ zaa a sage “ameena” ka ba naŋ wa puore a puoro anaare na kaŋa zaa baare. Aŋa aware 24 kpakyagaŋ, a  lantaapuoree zaa naŋ be a donɛɛ lombori zaa maŋ e la ana yɛlɛ ŋa. Hooŋ teɛre nyɛ popeɛloŋ na Jehoova ane Yezu naŋ na taa, ka ba naŋ wa nyɛ lɛ te zaa naŋ be a donɛɛ zuŋ naŋ de pugibu korɔ ba ana sori ŋaŋ!

4. Boŋ teŋ na zanne a zannoo ŋa poɔŋ?

⁴ A zannoo ŋa poɔŋ, te na nyɛɛ a soorebie ŋa nɔɛ iribo: Wala teŋ na baŋ e sɛgre te sukyie ko a Yezu Kũũ Leɛteɛroo? Wala teŋ na baŋ e soŋ noba na teŋ moɔlɔ a duorisoŋ korɔ na ka ba meŋ nyɛ tɔnɔ yi be? Ka wala teŋ na baŋ e soŋ te yɔɔmine naŋ bare lammore waabo na? A soorebie ŋa nɔɛ iribo na soŋ teŋ ka te nare te menne ko a lammo tegroŋ ŋa.

WALA TEŊ NA BAŊ E SƐGRE TE SUKYIE KO A YEZU KŨŨ LEƐTEƐROO LAMMO NA?

5. (a) Ananso la wala aŋ seŋ ka te maŋ teɛrɛ lɛ a yɔɔdeɛbo naŋ e tegroŋ seŋ? (Yieme 49:​7, 8) (b) Boŋ hoŋ zanne yi Bonso Ka Yezu Kpi? vidio na poɔŋ?

⁵ Yel na kaŋa teŋ na baŋ e a sɛgre te sukyie ko a Yezu Kũũ Leɛteɛroo la ka, te maŋ teɛre lɛ Yezu Krista yɔɔdeɛbo sareka na naŋ e tegroŋ seŋ. Yelzaa ba kyebe teŋ na baŋ e a faa te menne yi faaloŋ ane kũũ poɔŋ. (Kanne Yieme 49:​7, 8; kaa a vidio ŋa meŋ, Bonso Ka Yezu Kpi?) a Azuŋ ka Jehoova da sɛgre yɛlɛ ka o Bidɔɔ nɔŋnaa wa kpi a faa te. Jehoova ane Yezu zaa iree sareka naŋ e kpoŋ yaga zaa kyɛ na faa te nyɔvoɛ. (Uro. 6:23) Ka teneeŋ wa teɛre sareka na zaa Jehoova ane Yezu naŋ iri ko te na yɛlɛ yaga zaa, a na soŋ teŋ ka te maaleŋ taa nimipa ko a yɔɔdeɛbo. Te na zanne nyɛɛ yɛlɛ na mine Jehoova ane Yezu naŋ da e a de iri sareka ko te na. Kyɛ yɛ e ka te daŋ nyɛ bon naŋ la a yɔɔdeɛbo.

6. Bo la a yɔɔdeɛbo, ka bonso aŋ da seŋ ka Yezu yɔɔ a yɔɔdeɛbo ŋa?

⁶ Yɔɔdeɛbo eɛ sane neɛ naŋ yɔɔ a leɛ da bonkaŋa oŋ da kɔŋ. Adama da eɛ dɔɔ naŋ pɛgeyi saŋa na Jehoova naŋ da maaloo na. Saŋa na oŋ da wa e yelfaa na, o neŋ o biiri zaa da kɔŋ la a apoɔsori ba naŋ da taa ka ba nyɛ nyɔvore naŋ ba taa baaraa na. Kyɛ Yezu de la o nyɔvore naŋ pɛgeyi na iri sareka a leɛ da bon na Adama naŋ kɔŋ na. Saŋa na Yezu naŋ da wa be a donɛɛ zuŋ kyɛ na, “o da ba e yelbieri zaa, ka zirii zaa ba yi o noɔre poɔ” o zemmo zaa poɔŋ. (1 Pit. 2:22) Saŋa na Yezu naŋ wa kpiire na, o nyɔvore da pɛgeyieŋ aŋa lɛ na Adama nyɔvore naŋ da pɛgeyi kyɛ oŋ wa toŋ faaloŋ na. Azuŋ, o nyɔvore na oŋ de iri sareka na na baŋ leɛ da la bon na Adama naŋ kɔŋ na.​—1 Kor. 15:45; 1 Tim. 2:6.

7. Bo pigrinyɛ mine la ka Yezu da tuore saŋa na oŋ da be a donɛɛ zuŋ kyɛ na?

⁷ Saŋa na Yezu naŋ da be a donɛɛ zuŋ kyɛ na, o da maŋ tuuree o Saa Jehoova naŋ be sazuŋ noɔre yelzaa poɔŋ, ka anaŋ gbaŋ wa e kpeɛŋaa koo ka o e lɛ. Yezu da eɛ bie naŋ pɛgeyi, kyɛ o dɔgreba yɛŋ da ba pɛgeyi, kyɛ Yezu da maŋ sagrɛɛ ba nɔɛ. (Luk. 2:51) O baapaaloŋ saŋa, aminekaŋaŋ noba mine da na bɛnlooŋ ka o zagre o dɔgreba noɔre bee a e yelkaŋa naŋ na sãã Jehoova poɔ, kyɛ o da ba e lɛ. Saŋa na Yezu naŋ wa leɛ dɔɔ kpoŋ na, Setaana da pigrooŋ nyɛ gbɛɛ yaga, a gba da yelkoo ka o ta dire yelmennoŋ korɔ Naaŋmen, kyɛ Yezu da zagrɛɛ ana pigrinyɛ na zaa. (Mat. 4:​1-11) Setaana da mɔɔrɛɛ o mɔɔbo zaa ka o bɛnle Yezu ka o e yelfaa kaŋa ka lɛ na vɛŋ ka o ta toɔ̃ yɔɔ a yɔɔdeɛbo.

8. Bo pigrinyɛ mine ka Yezu da lɛ tuore?

⁸ Saŋa na Yezu naŋ da tonɔ a naaŋ moɔloo toma a donɛɛ zu kyɛ na, o da lɛ tuoree pigrinyɛ mine meŋ. O dɔndɔnne da iri zɔɔrɔ neŋ o a da boɔrɔ ka ba koo. (Luk. 4:​28, 29; 13:31) O potuuribo da ŋmɛɛ gbɛɛ yaga kyɛ oŋ da vɛŋ ko ba o suuri da ba maŋ iri neŋ ba. (Mak. 9:​33, 34) Saŋa na baŋ da dire o sɛrɛɛ kyɛ na koo na, ba  da dɔgrooŋ a kyɛ e o seɛ meŋ. A baaraa zaa ba da kooŋ aŋa toŋfa tonɔ, oŋ di dɔgɛɛ yaga kyɛ kpi. (Hib. 12:​1-3) O da di la a dɔgɛɛ ŋa zaa o yoŋ tɛgɛ, Jehoova da ba somoo. b​—Mat. 27:46.

9. Bo teɛroŋ hoŋ taa kyaare Yezu yɔɔdeɛbo sareka na? (1 Piita 1:8)

⁹ A pɛlɛɛŋ ka Yezu da di la dɔgɛɛ yaga kyɛ ko te a yɔɔdeɛbo. Ka teneeŋ wa teɛre sarekare na zaa Yezu naŋ da yi o poɔ zaa a iri ka o faa te nyɔvoɛ na, a maŋ vɛŋeŋ teŋ maaleŋ nɔmoo yaga zaa.​—Kanne 1 Piita 1:8.

10. Wala aŋ da waa ko Jehoova saŋa na Yezu naŋ da yɔɔrɔ a yɔɔdeɛbo na?

¹⁰ Boŋ ka Jehoova yi o boɔbo poɔŋ a e ka lɛ vɛŋ ka Yezu baŋ yɔɔ a yɔɔdeɛbo? Aŋa lɛ na bi-saa naŋ maŋ nɔŋ o bidɔɔ na, lɛ meŋ la ka Jehoova taa nɔmmo naŋ e zuluŋ a ko Yezu. (Yeng. 8:30) Teɛre nyɛ lɛ aŋ da beɛrɛ Jehoova seŋ saŋa na oŋ da nyɛ Yezu naŋ da tuoro pigrinyɛ a teŋɛ zu kyɛ na. Nɔkpeɛne zaa kyebe ka saŋa na Yezu naŋ da tuoro daŋkyagre, baŋ da dɔgroo, a kyɛ zagroo bare na, a da beɛrɛɛ Jehoova yaga zaa.

11. De yelmannaa kaŋa a wuli lɛ aŋ da beɛrɛ Jehoova seŋ saŋa na baŋ da ko Yezu na.

¹¹ Bidɔgrɔ zaa naŋ kɔŋ o bie kũũ poɔŋ baŋɛɛ lɛ aŋ maŋ kyɛrɛ sukyiri seŋ. Te taa la sagediibu naŋ e kpeɛŋaa ka kũũni na lɛ iriŋ, kyɛ ka te nɔŋna kaŋaŋ wa kpi a naŋ maŋ beɛrɛ teŋ yaga zaa. A yelmannaa ŋa wuli teŋ lɛ aŋ da beɛrɛ Jehoova seŋ saŋa na oŋ da kaara o Bidɔɔ nɔŋnaa oŋ di dɔgɛɛ a kpi ana bebi faa na yuoni 33 C.E. c poɔŋ.​—Mat. 3:17.

12. Bo yɛlɛ teŋ na baŋ e a nare te menne sɛre kyɛ ka a Yezu Kũũ Leɛteɛroo ta?

¹² A yi pampana a te ta a Yezu Kũũ Leɛteɛroo bebiri, mɔɔ kyɛ zanne a yɔɔdeɛbo yɛlɛ yaga ho meŋɛ boma zannoo saŋa bee ho Booree Zannoo saŋa. Ho na baŋ de la a Research Guide for Jehovah’s Witnesses gane na, (ka onaŋ wa be ho kɔkɔre poɔŋ) bee te gaŋ yobo na mine a peɛre a yɔɔdeɛbo yɛlɛ gaa tɔɔre. d Maŋ mɔɔ kyɛ tuuro a Yezu Kũũ Leɛteɛroo Baabole kannoo naŋ be Te Kristabiiri Zemmo Ane Te Naaŋ Moɔloo Toma—Lammo Yelsɛgree Gane na poɔŋ. A Yezu Kũũ Leɛteɛroo bebiri meŋ, ta inni ka ho kaa a Beguo Saŋa Baabole Zannoo naŋ e o yoŋ na. Ka teneeŋ mɔɔ a kyɛ sɛgre te sukyie soŋ ko a Yezu Kũũ Leɛteɛroo na, lɛ na vɛŋeŋ ka te toɔ̃ soŋ noba na teŋ maŋ moɔlɔ a duorisoŋ korɔ na ka ba meŋ nyɛ tɔnɔ yi be.​—Eez. 7:10.

 SOŊ NOBA NA TE NAŊ MAŊ MOƆLƆ A DUORISOŊ KORƆ NA KA BA MEŊ NYƐ TƆNƆ

13. Bo yɛlɛ teŋ na baŋ daŋ e soŋ noba mine meŋ ka ba nyɛ tɔnɔ yi a Yezu Kũũ Leɛteɛroo poɔŋ?

¹³ Wala hoŋ na baŋ e soŋ noba mine meŋ ka ba nyɛ tɔnɔ yi a Yezu Kũũ Leɛteɛroo poɔŋ? Yɛlɛ naŋ seŋ ka ho daŋ e la ka ho toŋ boɔle ba. A yi noba na teŋ na toŋ boɔle a naaŋ moɔloo poɔŋ puoriŋ, te na baŋ sɛgɛɛ noba mine te naŋ baŋ, a boɔrɔ ka te toŋ boɔle ba yoe biŋ. Ba na baŋ eɛ te dɔgreba, te tontoŋ taaba, te sakuu bitaaba, bee neɛzaa te naŋ baŋ. Ka teneeŋ gbaŋ ba taa a toŋboɔle gama mine ba naŋ printi, te na baŋ de la te fone a toɔle a toŋboɔle gane a ko noba. A na e boŋ nɔmãã ane bana naŋ na wa a lammo!​—Ikil. 11:6.

14. Manne wuli lɛ aŋ na baŋ eŋ neɛ faŋa yaga zaa ka o wa a Yezu Kũũ Leɛteɛroo ka hooŋ wa de a toŋboɔle gane koo ho meŋɛŋ.

¹⁴ Ka ho meŋɛŋ wa de a toŋboɔle gane bee a link toɔle ko neɛ kaŋa, a na baŋ eŋɛɛ a daana faŋa kyɛ e mɔlɔ koo ka o wa. A da eɛ te yɔɔpɔge kaŋa seɛlee o serɛ naŋ ba e Jehoova Sieree Deme kaŋa naŋ yeli koo ka o ne o na gaa la a Yezu Kũũ Leɛteɛroo. Bonso o da maŋ toŋ boɔloo gbɛɛ yaga yuomo mine naŋ pare, kyɛ oŋ da maŋ zagre. Kyɛ ananso la wala ka pampana ŋa yɛŋ oŋ e siri ka o gaa? O yeleeŋ ka, “N nyɛɛ a toŋboɔle gane kaŋa,” o zɔmeŋɛ kaŋa naŋ e a lantaapuoruu neŋkpoŋ kaŋaŋ da toŋ boɔle o. O serɛ da gaa la a Yezu Kũũ Leɛteɛroo ana yuoni na ane yuomo yaga naŋ tu.

15. Boŋ aŋ seŋ ka te teɛre saŋa na te naŋ wa tonɔ boɔlɔ noba ka ba wa a Yezu kũũ Leɛteɛroo na?

¹⁵ Aseŋ ka te teɛre baŋ ka noba na teŋ na toŋ boɔle na na taa la soorebie a kyaare a yɔɔdeɛbo, agaŋaazaa ka ba naŋ daŋ ba gaa te lammo kaŋa zaa. Te maŋ teɛre soorebie na baŋ na baŋ soore yɛlɛ, a nare te menne ka te iri a noɔre ko ba. (Kol. 4:6) Aŋa mannoo poɔŋ, ba mine na sooreŋ ka: ‘Boŋ na e a lammozieŋ?’ ‘Wala ka a lammo na kɔɔre seŋ?’ ‘Bo boma aŋ seŋ ka N su?’ ‘Aseŋ ka N yɔɔ libiri sɛre kyɛ wa a lammo bee?’ ‘Ba na deɛ kɔlɛsin a lammozieŋ bee?’ Ka teneeŋ wa tonɔ boɔlɔ neɛ kaŋa ka o wa a Leɛteɛroo lammo, te na baŋ soorooŋ ka, “Ho taa la soorebiri kaŋa bee?” a pãã iri soorebiri zaa noɔre o soba naŋ taa. Te na baŋ iree a vidiori  ŋa meŋ wuluu, Leɛteɛre Yezu Kũũ Na ane Boŋ Ka Te Maŋ Erɛ Te Zannoo Zieŋ? ka a soŋ o soba ka o baŋ lɛ te naŋ maŋ erɛ te lammore. A Nyɛ Zeŋ Laafeɛ Tegitegilɛ!​ zannoo 28 meŋ taa la yɛlɛ mine hoŋ na baŋ de soŋ o soba.

16. Bo soorebie mine la ka noba naŋ maŋ wa a Leɛteɛroo na baŋ taa?

¹⁶ Ka neɛ kaŋa dɛndɛŋ saŋa la ŋa oŋ wa a Yezu Kũũ Leɛteɛroo, o na baŋ taa la soorebie mine oŋ na boɔrɔ a nɔɛ iribo. Ba na baŋ sooreŋ ka, bonso ka neɛzaa ba nyu a waiŋ bee a ɔɔ a boroboro? Bee bonso ka noba fẽẽ lɛ yoŋ nyu a waiŋ kyɛ ɔɔ a boroboro? Ba na baŋ lɛ sooreŋ ka, gbɛre bo wala teŋ maŋ e a Leɛteɛroo? Ba na baŋ lɛ boɔrɔŋ ka ba baŋ ka lɛ teŋ maŋ erɛ te lammore zaa bee. Aneazaa ka a Leɛteɛroo yelyaga maŋ iree a soorebie ŋa nɔɛ, kyɛ ka neɛ kaŋa dɛndɛŋ saŋa la ŋa oŋ wa a lammo, a na fɛrɛŋ ka ho mannaa ka a pɛle soŋ zaa koo. A zannoo yelzu “Why Do Jehovah’s Witnesses Observe the Lord’s Supper Differently From the Way Other Religions Do?” naŋ be jw.org zuŋ na na baŋ soŋ teŋ ka te iri o soorebie na nɔɛ koo. Sɛre kyɛ ka a Leɛteɛroo lammo na ta na, a lammo saŋa, bee a lammo puoriŋ te na boɔrɔŋ ka te mɔɔ te mɔɔbo zaa a soŋ “noba na zaa naŋ boɔrɔ nyɔvore naŋ ba taa baaraa” na ka ba nyɛ tɔnɔ yi a Yezu Kũũ Leɛteɛroo poɔŋ.​—Toma 13:48.

SOŊ NOBA NAŊ BARE A LAMMORE WAABO

17. Sobuo ka a lantaapuoruu nembɛrɛ na baŋ soŋ bana naŋ bare a lammore waabo? (Iziikiel 34:​12, 16)

¹⁷ A Yezu Kũũ Leɛteɛroo saŋa, sobuo ka a lantaapuoruu nembɛrɛ na baŋ soŋ bana naŋ bare a lammore waabo? Vɛŋ ka ba baŋ ka ho nɔŋ baŋ. (Kanne Iziikiel 34:​12, 16.) Sɛre kyɛ ka a Yezu Kũũ Leɛteɛroo na ta, mɔɔ ho mɔɔbo zaa kyɛ toŋ boɔle noba naŋ bare a lammore waabo yaga zaa. Vɛŋ ka ba baŋ ka ho taa la ba yɛlɛ, a kyɛ e siri meŋ ka ho soŋ ba yelzaa poɔŋ. Toŋ boɔle ba ka ba wa a Yezu Kũũ Leɛteɛroo. Ka banaŋ wa a Leɛteɛroo, de eŋnyagroŋ a ko ba waayaane. A Yezu Kũũ Leɛteɛroo puoriŋ, mɔɔ kyɛ maŋ boɔle bee a gaa te yɔɔmine ŋa zie a te ko ba sommo zaa naŋ seŋ neŋ ka ba leɛ wa puoro Jehoova.​—1 Pit. 2:25.

18. Sobuo teŋ zaa na baŋ soŋ noba naŋ bare a lammore waabo na? (Urom 12:10)

 ¹⁸ Neɛzaa naŋ be a lantaapuoruu poɔŋ na baŋ soŋɛɛ noba naŋ bare a lammore waabo a kyɛ wa a Yezu Kũũ Leɛteɛroo lammo na. Sobuoŋ? A yi baŋ na wulo ba nɔmmo, nimimaaroŋ ane gyeremɛ. (Kanne Urom 12:10.) Teɛre baŋ ka a na baŋ eɛ kpeɛŋaa ko te yɔɔmine ŋa ka ba leɛ wa a Lammozie. Aminekaŋaŋ, ba da zoree dabeɛ̃ ka te yɔɔmine naŋ be a Lammozieŋ na yelee yɛlɛ naŋ ba soma a kyaare ba. e Azuŋ ta maŋ soorɔ ba soorebie naŋ na eŋ ba vi, bee a yele yɛlɛ naŋ na dɔŋ ba. (1 Tɛs. 5:11) Te yɔɔmine ŋa eɛ te puorebi-taaba. Te poɔ pɛlɛɛŋ te neŋ ba naŋ la laŋ puoro Jehoova!​—Yiem. 119:176; Tom. 20:35.

19. Bo tɔnɔ teŋ maŋ nyɛ ka teneeŋ wa teɛrɛ Yezu kũũ na?

¹⁹ Te niŋe paɛ̃ Yezu naŋ yelka te maŋ leɛteɛre o kũũ na yɛlɛ yuoni zaa. Te baŋɛɛ ananso meŋ a yɛlɛ naŋ e nimizeɛ̃. Ka teneeŋ wa gaa a Yezu Kũũ Leɛteɛroo lammo na, te maŋ nyɛɛ tɔnɔ, a soŋ noba mine meŋ baŋ nyɛ tɔnɔ soe yaga poɔŋ. (Aiz. 48:​17, 18) Nɔmmo te naŋ taa ko Jehoova ane Yezu maŋ lɛ maaleŋ eɛ kpeɛŋaa. Te maŋ wuli baŋ lɛ te niŋe naŋ pa seŋ, ane yɛlɛ na ba naŋ e ko te na. A maŋ soŋ teŋ teŋ tage peɛle te yɔɔmine meŋ. Aminekaŋaŋ meŋ, te na nyɛɛ a vuo ka te soŋ noba mine meŋ ka ba zanne baŋ lɛ baŋ na baŋ e nyɛ maaloo na zaa teŋ na nyɛ a tuuro a yɔɔdeɛbo eŋɛŋ na. Azuŋ te zaa mɔɔ te mɔɔbo zaa a nare te menne ko a yuoni ŋa Yezu Kũũ Leɛteɛroo lammo na naŋ e a yuoni zaa bebi tegroŋ na!