1-2. Bo yelkpeɛne mine ka Jehoova yelmeŋɛ puorebiiri na baŋ tuore?

 YELKPEƐNE mine na baŋ pɔge teŋ saŋa na teŋ ba kaara soriŋ, ka lɛ vɛŋ ka te zemmo yɛlɛ zaa leɛre kpɛlɛŋkpɛlɛŋ. Aŋa mannoo poɔŋ, te yɔɔdɔɔ kaŋa ba naŋ boɔlɔ Luis a da nyɛɛ cancer baaloŋ faa kaŋa. A dɔkta da yel kooŋ ka a kyɛrɛɛ kyuuri awala mine sɛre kyɛ oŋ na kpi. Monika ane o serɛ da moɔ̃ la niŋe a laŋ puoro Jehoova. Bebiri kaŋa, Monika da nyɛɛŋ ka o serɛ naŋ e a lantaapuoruu neŋkpoŋ kaŋa da sɔgle erɛɛ yɛlɛ mine naŋ ba pɛlɛ Jehoova poɔ yuomo yaga. Te yɔɔpɔge Olivia naŋ ba kuli serɛ da zo yi la o dieŋ sasekpeɛŋaa kaŋa naŋ da waana zuŋ. O naŋ da leɛ wa na, o da nyɛɛŋ ka a saseɛ sãã la o die zaa. Wagre fẽẽ poɔŋ, Luis, Monika, ane Olivia zemmo yɛlɛ da leɛrɛɛŋ kpɛlɛŋkpɛlɛŋ. Ho daŋ tuoree yelkpeɛne mine aŋ vɛŋ ka ho zemmo poɔ yɛlɛ zaa leɛre kpɛlɛŋkpɛlɛŋ bee?

² Aneazaa ka te eɛ Jehoova puorebiiri naŋ dire yelmennoŋ koroo, kyɛ te maŋ tuoree yelkpeɛne, ka baaloŋ meŋ maŋ kpɛ te aŋa lɛ a na maŋ pɔge neɛzaa na. Ane meŋ, te na baŋ tuoree yelkpeɛne bee pigrinyɛ mine yi noba naŋ ba nɔŋ Naaŋmen noba zie. Aneazaa ka Jehoova ba maŋ pigi te yelkpeɛne sori, kyɛ o eŋ teŋ noɔre ka o na soŋ teŋ te yelkpeɛne poɔŋ. (Aiz. 41:10) O sommo zuŋ te na ba taa la popeɛloŋ, a de gbɛɛ naŋ soma a kyɛ naŋ dire yelmennoŋ koroo te yelkpeɛne saŋa. A zannoo ŋa poɔŋ te na zannɛɛ soe anaare mine Jehoova naŋ maŋ tu kyɛ sonnɔ te te yelkpeɛne saŋa. Te na la zanne nyɛɛ lɛ teŋ na baŋ nyɛ tɔnɔ yi sommo na o naŋ maŋ korɔ te na poɔŋ.

 JEHOOVA NA GO BOŊ

3. Ka teneeŋ wa tuoro yelkpeɛne, bo yɛlɛŋ na baŋ e kpeɛŋaa ko te ka te e?

³ Ka teneeŋ wa tuoro yelkpeɛne yaga zaa, ana baŋ eɛ kpeɛŋaa ko te ka te teɛrɛ yɛlɛ soŋ a de gbɛre naŋ soma. Bonso a na baŋ kyɛrɛɛ te sukyiri yaga zaa ka lɛ vɛŋ ka te eŋɛ zaa kyoɔre ka dabeɛ̃ kpɛ te. Ana baŋ vɛŋeŋ ka a waa ŋa ho naŋ be die naŋ ligi poɔŋ a ba nyɛrɛ bonzaa a ba baŋ zie hoŋ na tu. Te nyɛ yɛlɛ na te yɔɔpɔgeba bayi na te naŋ daŋ yele ba yɛlɛ a piilee saŋa naŋ yel saŋa na baŋ wa tuoro ba pigrinyɛ na. Olivia yeleeŋ ka: “Saŋa na a sasekpeɛŋaa naŋ da wa sãã N die baare na, N da ba baŋ lɛ zaa maŋ na e, N eŋɛ zaaŋ da kyoɔre.” Ŋaa ka Monika yel a kyaare yɛlɛ na o serɛ naŋ e na: “N poɔ da saaŋɛɛŋ te gaali. N sukyiri zaaŋ da kyɛre. A gba da maŋ eɛ kpeɛŋaa ko ma ka N toŋ N bebiri zaa toŋ bilii. N daŋ ba teɛre ka a yɛlɛ ŋa na pɔge maŋ zaa.” Ka te yelkpeɛneŋ wa gaali te, sobuo ka Jehoova eŋ noɔre ka o na soŋ teŋ?

4. Aŋa lɛ Filipae 4:​6, 7 naŋ yel na, bo noɔre ka Jehoova eŋ te?

⁴ Sobuo ka Jehoova na tu kyɛ soŋ te? O eŋɛɛ noɔre ka o na ko teŋ bonkaŋa a Baabole naŋ boɔlɔ ka “Naaŋmen maaroŋ.” (Kanne Filipae 4:​6, 7.) Te maŋ taa la ana maaroŋ ŋa ka te neŋ Jehoova niiloŋ wa e kpeɛŋaa. Ana maaroŋ ŋa “gaŋ [la] bammo zaa”; o somaŋ yaga zaa. Aŋa mannoo poɔŋ, ho daŋ puore sɔrɛɛ Jehoova yaga zaa, saŋa na hoŋ wa puore baare na hoŋ nyɛ ka ho taa la emmaaroŋ kaŋa ho sukyiri poɔŋ bee? Ana emmaaroŋ na eɛ “Naaŋmen maaroŋ” o naŋ ko bo.

5. Sobuo ka Naaŋmen maaroŋ na maŋ go te sukyie ane te teɛrɛ?

⁵ Ana sɛgre na lɛ yeleeŋ ka, a Naaŋmen maaroŋ na “go [la] yɛ sukyie ane yɛ teɛrɛ.” A yelbiri “go” e la yelbiri baŋ da maŋ de manne ne lɛ sogyare naŋ maŋ go teŋkpɛŋ kaŋa taa, ka noba naŋ bebe na taa gomeŋɛ. Azuŋ noba naŋ da maŋ be teŋbɛrɛ sogyare naŋ go na da maŋ nyɛŋ ka ba taa la gomeŋɛ bonso sogyare go la a denɔbɛrɛ taa. Lɛ meŋ la, ka Naaŋmen maaroŋ naŋ wa go te sukyie ane te teɛrɛ, a maŋ vɛŋeŋ teŋ taa emmaaroŋ a baŋ ka te taa la gomeŋɛ. (Yiem. 4:8) Aŋa Haana, ka yɛlɛŋ gbaŋ ba leɛre tɔntɔbaalɛ, kyɛ te naŋ na baŋ taa la emmaaroŋ. (1 Saa. 1:​16-18) Ka teneeŋ wa taa sukyiri maaroŋ meŋ a na eɛ mɔlɔ ka te teɛre yɛlɛ soŋ a de gbɛre naŋ soma.

6. Bo teŋ na baŋ e a toɔ̃ nyɛ Naaŋmen maaroŋ? (Kaa a foto meŋ.)

⁶ Boŋ aŋ seŋ ka te e? Ka yɛlɛŋ wa dɔnnɔ bo, maŋ puore sɔre Jehoova ka o soŋ bo, aŋa lɛ noba naŋ kpeɛrɛ teŋkpɛŋ naŋ da maŋ boɔle sogyare ka ba wa go ba taa na. Sobuoŋ? Maŋ puore a te ta saŋa na hoŋ na nyɛ Naaŋmen maaroŋ. (Luk. 11:9; 1 Tɛs. 5:17) Luis teŋ daŋ  yel o yɛlɛ na wulee lɛ o neŋ o pɔge Ana naŋ da toɔ̃ are kpeɛŋaa saŋa na baŋ wa baŋ ka a kyɛrɛɛ kyuuri awala mine yoŋ ka Luis kpi na. O yeleeŋ ka: “A yɛlɛ ŋa taa poɔŋ, a maŋ eɛ kpeɛŋaa yaga zaa ka ho de gbɛre a kyaare baaloŋ saŋ yɛlɛ ane yɛlɛ yaga. Kyɛ te da taa la emmaaroŋ bonso te da maŋ puoro sɔrɛɛ Jehoova wagre zaa.” Luis ane o pɔge yeleeŋ ka ba da maŋ puore sɔrɛɛ Jehoova yaga zaa ka o ko ba emmaaroŋ, sukyiri maaroŋ, ane yɛŋ ka ba toɔ̃ de gbɛ sonne. Ba sereŋ da nyɛɛŋ meŋ ka o soŋ baŋ. Ka hooŋ wa tuoro yelkpeɛne, kpi mare puoro, lɛ na vɛŋeŋ ka Jehoova ko bo emmaaroŋ ka o go ho sukyiri ane ho teɛroŋ.​—Uro. 12:12.

JEHOOVA NA EŊ BOŊ FAŊA

7. Wala aŋ na baŋ waa ko te ka teneeŋ wa tuoro yelkpeɛŋaa kaŋa?

⁷ Ka teneeŋ wa tuoro yelkpeɛne yaga zaa, aminekaŋaŋ te koŋ maŋ teɛrɛ yɛlɛ bee a erɛ yɛlɛ aŋa lɛ te naŋ maŋ erɛ bebiri zaa na. A na baŋ vɛŋeŋ ka te teɛroŋ zaa gyɛre a koŋ gaŋ ziyenaa. Ana teŋ daŋ yel o yɛlɛ na yeleeŋ ka lɛŋ da pɔgoo saŋa na o serɛ Luis naŋ wa kpi na. O yeleeŋ ka: “Saŋa kaŋa N eŋɛ zaaŋ da maŋ kyoɔre ka N teɛroŋ zaa gyɛre, ka lɛ da maŋ vɛŋ ka N yɛlɛ da maŋ e N meŋɛ nembao. N suuri meŋ da maŋ iriŋ saŋa kaŋa, o naŋ kpi kyɛ bare ma na zuŋ.” Saŋa kaŋa meŋ, Ana da maŋ eɛ o yoŋ lɛ, aŋ da maŋ e kpeɛŋaa ka o de gbɛre a kyaare yɛlɛ mine Luis naŋ da maŋ de gbɛre a poɔŋ na. Saŋa kaŋa o da maŋ nyɛŋ ka a waa ŋa o naŋ be mane poɔŋ ka sasekpeɛŋaa daara. Azuŋ ka te teɛrɛŋ wa gaali te, sobuo ka Jehoova maŋ tu kyɛ soŋ te?

8. Aŋa lɛ Aizeeya 33:6 naŋ yel na, bo noɔre ka Jehoova eŋ ko te?

⁸ Sobuo ka Jehoova na tu kyɛ soŋ te? O eŋ teŋ noɔre ka o na eŋ teŋ faŋa. (Kanne Aizeeya 33:6.) Ka maŋgboriŋ wa be koɔ̃ poɔŋ kyɛ ka sasekpeɛŋaa piili daara, a na baŋ vɛŋeŋ ka o piili laŋna yaga zaa. Azuŋ maŋgboe mine maŋ taa la boma mine a lomboeŋ ka sasekpeɛŋaaŋ wa daara, ba maŋ vɛŋeŋ aŋ wa yi be a koɔ̃ poɔŋ. Ana boma na maŋ vɛŋeŋ ka a maŋgbori ba lɛ laŋna yaga, lɛ maŋ vɛŋeŋ ka noba naŋ be a maŋgbori poɔŋ na nyɛ gomeŋɛ a gaa ta zie na ba naŋ gɛrɛ na laafeɛ. Kyɛ ana boma ŋa maŋ toɔ̃ tonɛɛ toma soŋ ka a maŋgboriŋ wa kyɛnɛ. Lɛ meŋ la, ka teneeŋ wa moɔ̃ nimiri a puoro Jehoova yelmennoŋ poɔŋ te yelkpeɛne saŋa, Jehoova meŋ na eŋ teŋ faŋa yaga zaa.

9. Sobuo ka te yelpeɛre boma na na baŋ soŋ te ka te are kpeɛŋaa? (Kaa a foto meŋ.)

⁹ Boŋ aŋ seŋ ka te e? Ka ho teɛrɛŋ wa gaala bo, mɔɔ ho mɔɔbo zaa a kyɛ maŋ puoro sɔrɔ Jehoova, a gɛrɛ a lammore, a moɔlɔ a duorisoŋ meŋ. Yelmeŋɛ la, aminekaŋaŋ ho koŋ baŋ  lɛ e seŋ lɛ na hoŋ da maŋ erɛ na, kyɛ aseŋ ka ho teɛre baŋ ka Jehoova ba maŋ kaara soriŋ ka te e yɛlɛ a gaŋ te faŋa bɔgɔ. (De manne Luk. 21:​1-4.) Maŋ mɔɔ kyɛ zanna boma ho meŋɛŋ, a maŋ teɛre yɛlɛ na ho naŋ zanna na gaa tɔɔre. Bonso, Jehoova maŋ tu la o lantaapuoruu na eŋɛŋ kyɛ ko te gama ane vidiori naŋ na baŋ soŋ te ka te are kpeɛŋaa te yelkpeɛne saŋa. Ka hooŋ boɔrɔ ka ho peɛre nyɛ yɛlɛ mine naŋ na baŋ soŋ bo, ho na baŋ de la te yelpeɛre tontoŋ boma na kaŋa zaa naŋ be ho kɔkɔre poɔŋ na toŋ neŋ toma, aŋa a JW Library^® app, Watch Tower Publications Index, ane Research Guide for Jehovah’s Witnesses. Monika teŋ daŋ yel o yɛlɛ na yeleeŋ ka, ka o teɛrɛŋ wa gaaloo, o maŋ de la a yelpeɛre tontoŋ boma ŋa peɛre bɔ kawane naŋ na baŋ somoo. Aŋa mannoo poɔŋ, o da peɛrɛɛ “suuri” yɛlɛ. Saŋa kaŋa meŋ o maŋ peɛrɛɛ yɛlɛ mine meŋ aŋa, “a yi neɛ puoriŋ” bee “yelmennoŋ.” O maŋ kannɛɛ yɛlɛ na oŋ peɛre nyɛ na zaa a te ta saŋa na o sukyiri naŋ wa mãã. O yeleeŋ ka: “Ka maaŋ wa piili peɛrɛ a yɛlɛ, N teɛrɛ maŋ gaali maŋ. Kyɛ ka maaŋ wa moɔ̃ niŋe kanna a yɛlɛ, a maŋ waa ŋa Jehoova naŋ wa kore ma. Ka maaŋ wa kanna, N maŋ nyɛŋ ka Jehoova sereŋ baŋɛɛ yɛlɛ na meŋɛ naŋ ferɛ ma, a kyɛ sonnɔ ma meŋ.” Ana sommo ŋa naŋ yi Jehoova zie ŋa na baŋ soŋ boŋ, ka ho teɛrɛ ŋmaa bare, a kyɛ ko bo sukyiri maaroŋ meŋ.​—Yiem. 119:​143, 144.

JEHOOVA NA SOŊ BOŊ

10. Wala aŋ na maŋ waa ko te ka yeltuo kaŋaŋ wa pɔge te?

¹⁰ Ka yeltuo kaŋaŋ wa pɔge te, saŋa kaŋa na maŋ taŋ ka te bale ka te eŋɛ meŋ zaa kyoɔre. Ana waa ŋa zozoro kaŋa naŋ da baŋ zoe yaga zaa naŋ pere a koŋ baŋ lɛ zo kyɛ maŋ kyɛnɛ kyɛ kpɛgrɛ. A na baŋ eɛ kpeɛŋaa ka te e yɛlɛ mine eebo naŋ da e mɔlɔ ko te, kyebee te koŋ taa eŋnyagroŋ ka te e yɛlɛ mine teŋ da maŋ erɛ a taa popeɛloŋ na. Aŋa Elaagya, te na maŋ boɔrɔŋ ka te gaŋ gbire a ta la iri. (1 Nam. 19:​5-7) Boŋ ka Jehoova eŋ noɔre ka o na eŋ ka te eŋɛŋ wa kyoɔre?

11. Sori na kaŋa Jehoova naŋ maŋ lɛ tu kyɛ sonnɔ te na la bo? (Yieme 94:18)

¹¹ Sobuo ka Jehoova na tu kyɛ soŋ te? O eŋɛɛ noɔre ka o na soŋ teŋ. (Kanne Yieme 94:18.) Ka zozoroŋ wa pere, aseŋ ka o nyɛ sommo sɛre kyɛ na toɔ̃ kyɛŋ, lɛ meŋ la, aminekaŋaŋ a na fɛreŋ ka te nyɛ sommo sɛre kyɛ na toɔ̃ are kpeɛŋaa Jehoova puoruu poɔ. Ka teneeŋ wa be yelkpeɛne poɔŋ, Jehoova eŋ teŋ noɔre ka: “Maaŋ Jehoova ho Naaŋmen la  nyɔgrɔ ho nuduluŋ, Maaŋ la yele korɔ bo ka, ‘Ta zoro dabeɛ̃. N na soŋ boŋ’” (Aiz. 41:13) Naa Deevid da nyɛ la ana sommo ŋa tɔ. Saŋa na oŋ da wa tuoro yelkpeɛne ane o dɔndɔnne na, ŋaa oŋ da yel ko Jehoova: “Ho nuduri nyɔge maŋ maŋ are.” (Yiem. 18:35) Kyɛ sobuo ka Jehoova maŋ ko te sommo?

12. Nembobo ka Jehoova na baŋ tu ba eŋɛŋ kyɛ soŋ te ka te eŋɛŋ wa kyoɔre?

¹² Gbɛɛ yaga Jehoova maŋ tɔ la noba mine sukyie ka ba soŋ te. Aŋa mannoo poɔŋ, saŋa na Deevid eŋɛ naŋ da wa kyoɔre na, o zɔmeŋɛ Gyoonataŋ da wa emmooŋ faŋa. (1 Saa. 23:​16, 17) Lɛ meŋ la ka Jehoova da iri Eliisa oŋ de sommo naŋ seŋ neŋ ko Elaagya (1 Nam. 19:​16, 21; 2 Nam. 2:2) Zenɛ ŋa meŋ, aminekaŋaŋ Jehoova na tu la te booree, zɔmenne bee a lantaapuoruu nembɛrɛ zie kyɛ soŋ te. Kyɛ ka teneeŋ wa tuoro yelkpeɛŋaa kaŋa, kaapɔge te koŋ boɔrɔ ka te neŋ noba lanna. Te na maŋ boɔrɔŋ ka te e te yoŋ. Lɛ aŋ maŋ waa ko neɛzaa. Kyɛ wala teŋ na baŋ e a nyɛ Jehoova sommo?

13. Boŋ aŋ seŋ ka te e sɛre kyɛ na baŋ nyɛ Jehoova sommo? (Kaa a foto meŋ.)

¹³ Boŋ aŋ seŋ ka te e? Maŋ mɔɔrɔ ka ho ta wɛlɛ ho meŋɛ a e ho yoŋ. Ka teneeŋ wa wɛle te menne yi te taaba eŋɛŋ, a maŋ vɛŋeŋ teŋ teɛrɛ te yoŋ yɛlɛ ane yeltuo na naŋ pɔgrɔ te na. Lɛ na baŋ vɛŋeŋ ka te koŋ derɛ gbɛ sonne. (Yeng. 18:1) Yelmeŋɛ la ka saŋa kaŋa ho koŋ maŋ boɔrɔ ka ho peɛlɛ noba, a boɔrɔ ka ho e ho yoŋ lɛ. Lɛ aŋ maŋ waa saŋa kaŋa a ko te zaa agaŋaazaa ka teneeŋ wa tuoro yelkpeɛne. Kyɛ ka teneeŋ wɛle te menne kɔɔre, a na waa ŋa teŋ zagre sommo na Jehoova naŋ tuuro noba mine eŋɛŋ kyɛ de korɔ te na. Azuŋ ka anaŋ wa e kpeɛŋaa seŋ wala zaa, kyɛ ka ho yideme, ho zɔmenne, ane a lantaapuoruu nembɛrɛŋ wa korɔ bo sommo, sage ba sommo na. Baŋ ka Jehoova tuuree ba eŋɛŋ kyɛ sonnɔ bo.​—Yeng. 17:17; Aiz. 32:​1, 2.

JEHOOVA NA DII LA HO SUKYIRI

14. Bo yelkpeɛne mine teŋ na baŋ tuore ka a yɛlɛ e dabeɛ̃?

¹⁴ Te na baŋ tuoree yelkpeɛne mine naŋ e dabeɛ̃ yaga zaa. A Baabole poɔŋ, Naaŋmen yelmeŋɛ puorebiiri mine yeleeŋ ka ba da tuoree yelkpeɛne mine naŋ da vɛŋ ka dabeɛ̃ kpɛ ba, baŋ miine ba dɔndɔnne bee yelkpeɛne na ba naŋ tuoro na zuŋ. (Yiem. 18:4; 55:​1, 5) Te meŋ na baŋ tuoree dɔgroŋ sakuu poɔŋ, tomazieŋ, te dɔgreba zieŋ, bee a gɔmenante nuuriŋ. Baaloŋ kaŋa gba na baŋ kpɛ teŋ ka te zoro dabeɛ̃ ka te na kpiŋ. Ana yelkpeɛne ŋa saŋa,  aminekaŋaŋ a na waa ŋa teŋ e bilɛɛ, a koŋ baŋ e yelzaa soŋ te menne. Sobuo ka Jehoova maŋ tu kyɛ soŋ te a yelkpeɛne ŋa saŋa?

15. Aŋa lɛ na Yieme 94:19 naŋ yel na, boŋ ka Jehoova yelka o na e ko teŋ?

¹⁵ Sobuo ka Jehoova na tu kyɛ soŋ te? O maŋ dii la te sukyie a ko te emmaaroŋ meŋ. (Kanne Yieme 94:19.) Aminekaŋaŋ a yelbie ŋa naŋ be a yieloŋ gane poɔŋ na, te na baŋ deɛŋ manne saa naŋ tanne yaga zaa ka lɛ vɛŋ ka dabeɛ̃ kpɛ bipɔgelee kaŋa oŋ koŋ baŋ lɛ gbiri. Te na baŋ ŋmaa la foto te teɛroŋ a nyɛ lɛ a bie saa naŋ kpɛ te de o pɔnne o nuuriŋ lɛɛŋ a te ta saŋa na a bie naŋ gbiri. Aneazaa ka a saa naŋ tannaŋ, kyɛ a bi-saa naŋ de a bie pɔnne o nuuriŋ na vɛŋɛɛŋ ka a bie nyɛ gomeŋɛ ka dabeɛ̃ ba lɛ eroo. Ka teneeŋ wa tuoro pigrinyɛ mine, aminekaŋaŋ te meŋ na boɔrɔŋ ka te Saa naŋ be sazuŋ meŋ nyɔge te eŋ o nuuriŋ a te ta saŋa na te eŋɛ naŋ na mãã te. Azuŋ wala teŋ na baŋ e nyɛ sukyiri dii a yi Jehoova zie?

16. Wala teŋ na baŋ e nyɛ sukyiridii a yi Jehoova zieŋ? (Kaa a foto meŋ.)

¹⁶ Boŋ aŋ seŋ ka te e? Maŋ nyɛ wagre ko Jehoova, a maŋ puoro sɔroo a kyɛ kanna o Yelbiri na wagre zaa. (Yiem. 77:​1, 12-14) Ka hooŋ maŋ erɛ ana yɛlɛ ŋa wagre zaa a wa tuoro yelkpeɛŋaa zaa, kaapɔge yɛlɛ hoŋ na daŋ e la ka ho gaa ho Saa naŋ be sazuŋ na zie a te sɔre sommo. Yelko Jehoova ananso dabeɛ̃ naŋ kpɛ bo, ane lɛ a yɛlɛ naŋ dɔnnɔ bo seŋ. Maŋ kyɛllɛ wono o yɛlɛ a yi hoŋ na maŋ kanna o Yelbiri na, a kyɛ nyɛ lɛ oŋ na dii ho sukyiri aseŋ. (Yiem. 119:28) A Baabole ziiri mine bebeŋ ka hooŋ wa kannaa a na baŋ dii la ho sukyiri yaga zaa ka dabeɛ̃ŋ wa kpɛ bo. Aŋa mannoo poɔŋ, ho na baŋ nyɛɛ yɛlɛ naŋ eŋnɛ faŋa a ayi Joob, Yieme, Yeng Yelibie ane Yezu yelbie naŋ be Matio o zuri 6 na poɔŋ. Ka hooŋ wa puoro sɔrɔ Jehoova a kyɛ maŋ kanna o Yelbiri na, ho na nyɛ la sukyiridii.

17. Bo sagediibu teŋ na baŋ taa?

¹⁷ Te na baŋ dɛlɛɛ Jehoova ka o na maŋ soŋ teŋ ka teneeŋ wa tuoro yelkpeɛne te zemmo poɔŋ. Te daŋ koŋ e te yoŋ zaa. (Yiem. 23:4; 94:14) Jehoova eŋɛɛ noɔre ka o na go teŋ, a eŋ te faŋa, a soŋ te, a kyɛ dii te sukyie. Ŋaa ka Aizeeya 26:3 yele kyaare Jehoova: “Ho na go la noba na naŋ dɛle bo kpɛlɛŋkpɛlɛŋ na; ho naŋ na kyɛnɛ korɔ baŋ emmaaroŋ, bonso hooŋ la baŋ dɛle.” Dɛle Jehoova, a maŋ mɔɔrɔ ho mɔɔbo zaa ka ho nyɛ tɔnɔ yi sommo na zaa o naŋ maŋ korɔ te na. Ka hooŋ e lɛ, ho na leɛ nyɛɛ faŋ-paalaa ka hooŋ gbaŋ wa tuoro yelkpeɛne.