1. Bo yɛlɛŋ maŋ wa ho teɛroŋ ka hooŋ wa teɛrɛ Jehoova yɛlɛ?

 HO DAŊ teɛrɛɛŋ a nyɛ lɛ Jehoova naŋ sereŋ waa meŋɛmeŋɛ? Ka hooŋ wa yele yɛlɛ koroo puoro poɔŋ, boŋ maŋ wa ho teɛroŋ? Aneazaa ka te koŋ baŋ nyɛ Jehoova, kyɛ a Baabole mannɛɛ o waaloŋ wuli te soe yaga poɔŋ. A Baabole yeleeŋ ka Jehoova eɛ “ŋmenaa ane kuri bonlɛgraa” ane “vũũdi Naaŋmen.” (Yiem. 84:11; Hib. 12:29) Iziikiel da bigree Jehoova a yi o yelnyɛ poɔŋ ka o waa ŋa saafair kuurii, a nyegrɛ aŋa kuribo, a kyaane aŋa sasuo. (Izik. 1:​26-28) Aminekaŋaŋ, lɛ na a Baabole naŋ manne Jehoova waaloŋ na na e teŋ nɔmãã ane dabeɛ̃.

2. Bonso aŋ na baŋ e kpeɛŋaa ko noba mine ka ba tage peɛle Jehoova?

² Te naŋ daŋ ba nyɛ Jehoova na zuŋ, a na baŋ eɛ kpeɛŋaa ko te ka te sagedi ka o nɔŋ teŋ. Noba mine meŋ maŋ teɛrɛŋ ka Jehoova ba nɔŋ ba togitogi, bonso yelfaare yaga pɔge baŋ ba zemmo poɔŋ. Aminekaŋaŋ ba da ba taa saamine naŋ nɔŋ ba yɛlɛ. Jehoova baŋɛɛ yɛlɛ naŋ be te sukyieŋ, a baŋ ananso meŋ aŋ na baŋ e kpeɛŋaa ko te ka te tage peɛloo. O tu la a Baabole eŋɛŋ kyɛ soŋ te teŋ baŋ o gyog-sonne.

3. Ananso la wala aŋ seŋ ka te zanne Jehoova nɔmmo yɛlɛ gaa tɔɔre?

³ Yelbiri teŋ na baŋ de manne Jehoova yɛlɛ soŋ zaa la nɔmmo. A Baabole yeleeŋ ka “Naaŋmen la nɔmmo.” (1 Gyn. 4:8) Nɔmmo zuŋ oŋ maŋ erɛ yelzaa. Naaŋmen nɔmmo na eɛ zuluŋ yaga zaa oŋ maŋ wuluu korɔ neɛzaa, a gba maŋ wuluu korɔ noba naŋ ba nɔmoo. (Mat. 5:​44, 45) A zannoo ŋa poɔŋ, te na zannɛɛ Jehoova ane o nɔmmo yɛlɛ. Ka teneeŋ zanna Naaŋmen yɛlɛ yaga, lɛ na vɛŋeŋ ka te nɔmoo yaga zaa.

JEHOOVA NƆŊ TEŊ YAGA ZAA

4. Bo teɛroŋ hoŋ taa kyaare Jehoova nimibaalonzoe na? (Kaa a foto meŋ.)

⁴ “Jehoova eɛ neɛ naŋ taa nimibaaloŋ.” (Gyi. 5:11) A Baabole poɔŋ, Jehoova de la o meŋɛ manne neŋ bi-ma. (Aiz. 66:​12,  13) Hooŋ leɛteɛre nyɛ bi-ma naŋ yi nɔmmo poɔŋ a kaara o bie zieŋ. O maŋ de oŋ pare o gbɛɛ zuŋ a deɛnɛ neŋ o a kyɛ yele yɛlɛ koroo bɔĩn lɛ ane kɔkɔ baaloŋ. Ka o naŋ wa kono bee ka o zie kaŋaŋ wa beɛroo, o maŋ mɔɔ la o mɔɔbo zaa kyɛ kaa o zieŋ soŋ. Ka teneeŋ meŋ wa be yeltuo zaa poɔŋ, te na baŋ sagediŋ ka Jehoova nɔŋ teŋ. A yieloŋ yiele sɛgɛɛŋ ka: “Saŋa na yɛlɛ naŋ wa dɔɔnɔ ma yaga zaa, ho maŋ dii la N sukyiri a ko ma emmaaroŋ meŋ.”​—Yiem. 94:19.

5. Boŋ ka Jehoova yelmeŋɛ nɔmmo na wulo bo?

⁵ Jehoova taa la yelmennoŋ. (Yiem. 103:8) Ka teneeŋ gbaŋ wa e yelfaa kaŋa, kyɛ o naŋ maŋ nɔŋ teŋ. A Izerayɛl biiri da maŋ zagrɛɛ Jehoova bege gbɛɛ yaga; kyɛ saŋa zaa ba naŋ maŋ wa e kaŋdabaŋkalɛ a bare ba yelfaare eebo na, o da maŋ yelee a yelbie ŋa a vɛŋ baŋ baŋ ka o nɔŋ baŋ: “Hoŋ daaŋ e nanee N nimiriŋ zuŋ, ba de boŋ tegroŋ. N nɔŋ boŋ meŋ.” (Aiz. 43:​4, 5) Zenɛ ŋa meŋ, ana nɔmmo ŋa neŋ o zu ka Jehoova taa ko te. Te meŋ na baŋ dɛlooŋ. Ka teneeŋ gbaŋ ŋmɛ gbɛɛ mine naŋ e nimizeere, Jehoova koŋ zagre te bare. Ka teneeŋ wa e kaŋdabaŋkalɛ a leɛ wa Jehoova zie, te na wa nyɛŋ ka o naŋ nɔŋ teŋ. O eŋɛɛ noɔre ka o na vɛŋ ko teŋ “kpɛlɛŋkpɛlɛŋ.” (Aiz. 55:7) A Baabole yeleeŋ ka a vɛŋ koobo ŋa maŋ wanɛɛ “pɛnnoo yaga zaa a yi Jehoova meŋɛ zie.”​—Tom. 3:19.

6. Boŋ ka Zekaraiya 2:8 wuli te a kyaare Jehoova?

⁶ Kanne Zekaraiya 2:8. Jehoova naŋ nɔŋ te yaga zaa na zuŋ, ka yelzaaŋ wa dɔnnɔ te, o maŋ baŋeŋ a e siri ka o soŋ te. Ka yɛlɛŋ wa dɔnnɔ te, a maŋ dɔnnɛɛ o meŋ. Azuŋ te na baŋ puoreŋ ka: “Taa ma aŋa ho nimibie.” (Yiem. 17:8) Nimiri eɛ nensaalaa eŋdaa zie naŋ maŋ daŋ nyɛ yɛlɛ wieoŋ ka o yɛlɛ meŋ e nanee yaga. Azuŋ Jehoova naŋ de te manne neŋ o nimibie na, a waa ŋa o naŋ yele ka, ‘Neɛzaa naŋ dɔgre yɛnee N noba, bon naŋ e nanee ko ma la oŋ dɔgrɔ.’

7. Ananso la wala aŋ seŋ ka te eŋ te sagediibu faŋa ka Jehoova nɔŋ teŋ?

⁷ Jehoova boɔrɔŋ ka ho sagedi ka o nɔŋ boŋ. Kyɛ o baŋeŋ ka yɛlɛ mine naŋ pɔge bo ho zemmo poɔŋ na baŋ vɛŋeŋ ka ho teɛrɛ ka o ba nɔŋ bo. Bee aminekaŋaŋ ho tuoree yelkpeɛne mine pampana aŋ na baŋ vɛŋ ka ho teɛrɛ ka Jehoova ba nɔŋ bo. Ka hooŋ zanne baŋ lɛ na Jehoova naŋ maŋ wulo nɔmmo korɔ Yezu,  bana na ba naŋ sɔ naaloŋ kãã, ane te zaa na, a na baŋ eŋɛɛ ho sagediibu faŋa ka Jehoova nɔŋ boŋ.

SORI NA JEHOOVA NAŊ MAŊ TU KYƐ WULO O NƆMMO

8. Ananso la wala ka Yezu da sagedi peɛlaaŋ ka o Saa nɔmooŋ?

⁸ Jehoova ane o Bidɔɔ nɔŋnaa na de la yuomo naŋ koŋ baŋ sɔre a vɛŋ ka nɔmmo na ba naŋ taa ko taa na maaleŋ e kpeɛŋaa yaga zaa. Saŋa na Jehoova ane o Bidɔɔ niiloŋ naŋ da piili na, ka aŋdonɛɛ da naŋ ba kyebe. Jehoova da wulee o nɔmmo ko Yezu aŋ pɛle aŋ be Matio 17:5. Jehoova da na baŋ yeleŋ ka, ‘N poɔ pɛle neŋ la o yɛlɛ.’ Kyɛ o da boɔrɔŋ ka te baŋ lɛ o naŋ nɔŋ Yezu seŋ, azuŋ o da yeleeŋ ka “N Bidɔɔ la ŋa, N nɔnɛɛ o yɛlɛ.” Jehoova poɔ da pɛlɛɛŋ neŋ Yezu yɛlɛ yaga zaa, bonso o da eɛ siri ka o de o nyɔvore iri sareka. (Efe. 1:7) Yezu da ba taa bonnoo zaa ka o Saa nɔmooŋ. Jehoova sereŋ nɔŋɛɛ Yezu yaga zaa, azuŋ o da baŋɛɛ lɛ peɛlaaŋ. O meŋɛ da maŋ yeleŋ ka a Saa nɔmooŋ.​—Gyn. 3:35; 10:17; 17:24.

9. Bo yelbie la ka Jehoova yel a wuli ka o nɔŋɛɛ noba na o naŋ sɔ naaloŋ kãã na? Wuli a muni. (Urom 5:5)

⁹ Jehoova wulee o nɔmmo a ko noba na o naŋ sɔ naaloŋ kãã na meŋ. (Kanne Urom 5:5.) A Baabole naŋ yelka “kyiri Naaŋmen nɔmmo . . . eŋ te sukyieŋ” na, Baabole dictionary kaŋa yeleeŋ ka ana baŋ wuliŋ ka Naaŋmen nɔmmo na “puo wa kpɛ teŋ aŋa baa koɔ̃.” A yelmannaa ŋa wuleeŋ ka Jehoova sereŋ nɔŋ la bana na ba naŋ sɔ naaloŋ kãã na yaga zaa! Noba na ba naŋ sɔ naaloŋ kãã na baŋɛɛŋ ka “Naaŋmen . . . nɔŋ” baŋ. (Gyud. 1) A bitontona Gyɔɔn da taa la teɛroŋ na ba naŋ taa saŋa na oŋ da sɛge ka: “Yɛ nyɛ nɔmmo na tɔ a Saa naŋ nɔŋ te, a e ka ba boɔlɔ te Naaŋmen bibiiri!” (1 Gyn. 3:1) Noba na ba naŋ sɔ naaloŋ kãã na yoŋ ka Jehoova nɔŋ bee? Ai, Jehoova wulee o nɔmmo ko te zaa.

10. Bo yelkpoŋ naŋ gaŋ yelzaa la ka Jehoova e a wuli ka o nɔŋ teŋ?

¹⁰ Yelkpoŋ naŋ gaŋ yelzaa Jehoova naŋ e a wuli ka o taa la nɔmmo ko te la a yɔɔdeɛbo. A nɔmmo ŋa Jehoova naŋ wuli te na, neɛzaa daŋ ba wuli ana nɔmmo ŋa tɔ zaa! (Gyn. 3:16; Uro. 5:8) Jehoova deɛ o Bidɔɔ nɔŋnaa tere, a tere sori oŋ kpi ko nensaaleba zaa ka te na baŋ nyɛ te yelbebe sudi a wa leɛ O zɔmenne. (1 Gyn. 4:10) Ka teneeŋ teɛre sane na Jehoova ane Yezu naŋ yɔɔ na, a na soŋ teŋ ka te nyɛ ka ba sereŋ nɔŋ la te kaŋa la kaŋa zaa. (Gal. 2:20) Jehoova dantorii zuŋ naane oŋ ko te a yɔɔdeɛbo. A eɛ kyɔɔtaa o naŋ ko te o nɔmmo zuŋ. Jehoova wulee o nɔmmo ko te a de neɛ na naŋ e nanee yaga zaa koo na iri sareka ko te, o na la Yezu. Jehoova da terɛɛ sori ka o Bidɔɔ di dɔgɛɛ a kyɛ kpi te zuŋ.

11. Boŋ hoŋ zanne yi Jeremaiya 31:3?

¹¹ Aŋa lɛ na te naŋ wa nyɛ na, Jehoova ba taa nɔmmo ko te o sukyiriŋ yoŋ, kyɛ o maŋ yelko teŋ ka o nɔŋ teŋ. (Kanne Jeremaiya 31:3.) Jehoova tage teŋ peɛle o meŋɛ o naŋ nɔŋ te zuŋ. (De manne Duturoonomi 7:​7, 8.) Bonzaa bee neɛzaa koŋ baŋ wɛl te yi o nɔmmo na eŋɛŋ. (Uro. 8:​38, 39) Wala hoŋ teɛre kyaare ana nɔmmo ŋa? Kanne Yieme 23, a nyɛ lɛ Jehoova nɔmmo naŋ da tɔ Deevid sukyiri seŋ ane lɛ aŋ na baŋ tɔ te zaa sukyie.

WALA KA JEHOOVA NƆMMO NA TƆ HO SUKYIRI SEŊ?

12. Wala hoŋ na baŋ yel ŋmaaŋmaa lɛ a kyaare Yieme 23?

¹² Kanne Yieme 23:​1-6. Yieme 23 eɛ yieloŋ naŋ wulo sagediibu teŋ na baŋ taa Jehoova nɔmmo na eŋɛŋ. Deevid la da sɛge a yieloŋ ŋa. O da manne wulee lɛ nɔmmo naŋ  be o neŋ Jehoova naŋ e o Pekyeenɛ kpakyagaŋ naŋ e kpeɛŋaa seŋ. Deevid da taa la gomeŋɛ o naŋ vɛŋ ka Jehoova wuloo sori na zuŋ, a da de o meŋɛ meŋ zaa dɛloo. Deevid da baŋɛɛŋ ka Jehoova na maŋ wulee o nɔmmo ko bebiri zaa. Bonso oŋ da sage lɛ di yaga zaa?

13. Ananso la wala ka Deevid da sagedi peɛlaaŋ ka Jehoova na kaa la o zu?

¹³ “N koŋ kɔŋ bonzaa.” Deevid da nyɛɛŋ ka Jehoova kaarɛɛ o zu soŋ bonso o da maŋ kooŋ bonzaa yɛlɛ naŋ fɛroo. Deevid da baŋɛɛŋ meŋ ka Jehoova eɛ o zɔmeŋɛ ka o yɛlɛ da pɛle Jehoova poɔ meŋ. Lɛ zuŋ oŋ da sagedi yaga zaa ka yelzaa naŋ na pɔgoo nendaare kaŋa, Jehoova na kooŋ bonzaa yɛlɛ naŋ fɛroo. Deevid naŋ da sagedi ka Jehoova nɔmooŋ, a na kaara o zieŋ meŋ zuŋ na, a da somooŋ oŋ taa popeɛloŋ ka yelzaa ba dɔnnoo, ka bonzaa meŋ oŋ da maŋ taa seŋ o.​—Yiem. 16:11.

14. Sobuoŋ ka Jehoova maŋ yi nɔmmo poɔŋ a kaara te zu?

¹⁴ Jehoova maŋ yi la nɔmmo poɔŋ a kaara te zu, agaŋaazaa ka yelfaa kaŋa wa pɔge te te zemmo poɔŋ. Claire a naŋ de yuomo 20 toŋ toma Bɛɛtil poɔŋ eŋɛ da kyoɔrɛɛŋ saŋa na o booree deme naŋ da tuore yelkpeɛne tututaa na. Stroke baaloŋ da nyɔgɛɛ o saa, ba da iree o yɔɔpɔge kaŋa bare a lantaapuoruu poɔŋ, ka libi yɛlɛ meŋ wa e kpeɛŋaa ko o booree deme, baŋ kɔŋ ba die meŋ. Sobuo ka Jehoova wuli ba nɔmmo? Claire yeleeŋ ka: “Jehoova da maŋ soŋɛɛ N booree deme baŋ nyɛ bonzaa yɛlɛ naŋ fɛre ba bebiri zaa. Gbɛɛ yaga Jehoova gba da maŋ ko teŋ gaŋ boma yɛlɛ naŋ fɛre te! N maŋ teɛrɛɛ yɛlɛ na  Jehoova naŋ e ko te a wuli nɔmmo ko te na, N daŋ koŋ inni ana yɛlɛ ŋa zaa. A soŋ maŋ maŋ naŋ kyɛnɛ puoro Jehoova ane popeɛloŋ ka maaŋ gbaŋ wa tuore yelkpeɛne N zemmo poɔŋ.”

15. Bonso ka Deevid da nyɛ pɛnnoo? (Kaa a foto meŋ.)

¹⁵ “O maŋ korɔ maŋ pɛnnoo.”  Saŋa kaŋa, Deevid meŋ eŋɛ da maŋ kyoɔreŋ yelkpeɛne ane pigrinyɛ na oŋ da maŋ tuore na zuŋ. (Yiem. 18:​4-6) Kyɛ, Jehoova nɔmmo naŋ e zuluŋ, ane lɛ na Jehoova naŋ da maŋ kaara o zieŋ na da maŋ korooŋ pɛnnoo. Jehoova da de la o zɔmeŋɛ eŋɛ naŋ da kyoɔre na gaa ne “moɔ naŋ soma poɔŋ” ane “pɛnnoo ziiri naŋ peɛle koɔ̃nɛɛ naŋ gaŋ bɔin noɔreŋ.” Azuŋ Deevid da toɔ̃ arɛɛ o yelkpeɛne na zaa noɔreŋ a kyɛ da naŋ puoro Jehoova neŋ popeɛloŋ.— Yiem. 18:​28-32.

16. Sobuo ka Jehoova nɔmmo ko bo pɛnnoo?

¹⁶ Lɛ meŋ la zenɛ, “Jehoova yelmeŋɛ nɔmmo zuŋ teŋ ba wa te baaroo” ka teneeŋ wa tuoro yelkpeɛne te zemmo poɔŋ. (Laad. 3:22; Kol. 1:11) Te nyɛ te yɔɔpɔge Rachel zemmo yɛlɛ. O eŋɛ zaaŋ da kyoɔre saŋa na o serɛ naŋ da baroo, a bare Jehoova puoruu meŋ a COVID-19 baaloŋ na saŋa. Boŋ ka Jehoova da e koo? O yeleeŋ ka: “Jehoova da vɛŋɛɛŋ maŋ nyɛ ka noba mine nɔnɔ maŋ. O da maŋ soŋ maŋ maŋ nyɛ zɔmenne naŋ da maŋ be N zieŋ wagre zaa, a da maŋ maale bondirii wa ko ma, a da maŋ toɔle ma message ane sɛgre mine naŋ eŋnɛ faŋa, a da maŋ muri laare tɔgle ma, a da maŋ eŋ ma faŋa meŋ ka Jehoova kaarɛɛ N zieŋ. N puoree Jehoova bareka o naŋ ko ma booree deme yaga zaa naŋ nɔnɔ N yɛlɛ.”

17. Bonso ka Deevid da “ba zoro dabeɛ̃ zaa”?

¹⁷ “N ba zoro dabeɛ̃ zaa, bonso ho be la N zieŋ.” Gbɛɛ yaga a da maŋ kyɛrɛɛ fẽẽ ka Deevid kɔŋ o nyɔvore, o da tuoree dɔndɔnne naŋ taa faŋa yaga. Kyɛ Jehoova nɔmmo zuŋ, o da nyɛɛ gomeŋɛ. Deevid da nyɛɛŋ ka Jehoova be la o zieŋ yelzaa poɔŋ, a lɛ ŋa da maŋ emooŋ faŋa. Azuŋ oŋ da yiele ka: “[Jehoova] deɛ maŋ yi N dabeɛ̃ zaaŋ.” (Yiem. 34:4) Aneazaa ka saŋa kaŋa Deevid da maŋ zoree dabeɛ̃, kyɛ Jehoova naŋ da nɔmoo zuŋ, o dabeɛ̃ na zaa da baarɛɛŋ.

18. Sobuo ka Jehoova nɔmmo na na baŋ eŋ bo faŋa saŋa na dabeɛ̃ naŋ wa kpɛ bo?

¹⁸ Ka teneeŋ wa baŋ ka Jehoova nɔŋ teŋ, sobuo aŋ na baŋ eŋ te faŋa ka teneeŋ wa tuoro yɛlɛ mine naŋ e dabeɛ̃ yaga? Te yɔɔpɔge  kaŋa yuori naŋ di Susi naŋ e paaneɛ, mannɛɛ lɛ yɛlɛ naŋ da waa ko o neŋ o serɛ saŋa na ba bidɔɔ naŋ ko o meŋɛ na: “Ka neɛŋ wa tuore yelkpeɛŋaa kaŋa o zemmo poɔŋ, a na baŋ vɛŋeŋ ka o yɛlɛ e nembao yaga zaa. Kyɛ Jehoova nembazo na maŋ vɛŋeŋ teŋ taa gomeŋɛ.” Rachel te naŋ daŋ yel o yɛlɛ na leɛteɛrɛɛ o zemmo yɛlɛ a yel ka: “Zisoɔree kaŋa, N teɛroŋ zaa da gyɛre, N poɔ zaaŋ da sãã ka dabeɛ̃ meŋ da kpɛ ma yaga zaa, azuŋ N da koŋ sɔrɛɛ Jehoova sommo. Tɔntɔbaalɛ, a da waa ŋa Jehoova naŋ dii N sukyiri aŋa lɛ na bi-ma naŋ maŋ mɔgle o bie na, maŋ da faa gbiri. N daŋ koŋ inni ana daare na zaa.” Ba da nyɔge la te yɔɔdɔɔ Tasos naŋ e a lantaapuoruu neŋkpoŋ kaŋa a pɔge nempɔgedieŋ yuomo anaare o naŋ zagre ka o gaa sogya zuŋ. Sobuo oŋ da nyɛ Jehoova nɔmmo ane o sommo? O yeleeŋ ka: “Jehoova da kaa la N zieŋ a gaŋ lɛ na maŋ da kaara soriŋ. Lɛ vɛŋɛɛŋ maŋ sagedi kpɛlɛŋkpɛlɛŋ ka N na baŋ dɛlooŋ. A neŋ meŋ, Jehoova da tu la o vooroŋ soŋ na eŋɛŋ kyɛ ko ma popeɛloŋ aneazaa ka a nempɔgedie poɔ zemmo da ba e mɔlɔ fẽẽ zaa. Lɛ vɛŋɛɛŋ maŋ wa nyɛ peɛlaaŋ ka, ka maaŋ wa dɛle Jehoova, o na wuli maŋ nɔmmo. Azuŋ, N wa leɛ la paaneɛ saŋa na maŋ da naŋ be a nempɔgedieŋ na.”

TAGE PEƐLE A NEMBAZO NAAŊMEN

19. (a) Ka teneeŋ wa baŋ ka Naaŋmen nɔŋ teŋ, bo teŋ na baŋ yeli te puoro poɔŋ? (b) Bo yɛlɛ la ka Jehoova e a wuli nɔmmo ko bo aŋ tɔ ho sukyiri yaga zaa? (Kaa a daga ŋa, “ Baabole Sɛgre Mine Naŋ Maŋ Soŋ Te Teŋ Nyɛ Ka Jehoova Sereŋ Nɔŋ Teŋ.”)

¹⁹ A zemmo yɛlɛ ŋa zaa te naŋ gyieli a yɛlɛ na wuleeŋ ka Jehoova, “a Naaŋmen naŋ waa nɔmmo,” be la te zieŋ! (2 Kor. 13:11) O tonɔ boɔlɛɛ te kaŋa la kaŋa zaa. Te na baŋ sagediŋ peɛlaaŋ ka “Jehoova nɔmmo na naŋ ba baara na ŋmaa gyeere” teŋ. (Yiem. 32:10) Ka teneeŋ maŋ teɛrɛ nɔmmo na onaŋ wuli te na yɛlɛ, ana soŋ teŋ ka te baŋ peɛlaaŋ ka Jehoova teɛrɛɛ te yɛlɛ ka lɛ vɛŋ ka te tage peɛloo. Te na baŋ puore sɔrɛɛ te yelfɛree zaa yi o zieŋ a kyɛ ba zoro dabeɛ̃ zaa. Te na baŋ yelee te yel-wɔnee zaa koo a kyɛ taa dɛlebo meŋ ka o baŋɛɛ yɛlɛ na poɔ te naŋ be, o taa la yɛlɛ muni wommo ko te kyɛ e siri meŋ ka o soŋ te.​—Yiem. 145:​18, 19.

20. Sobuo ka Jehoova nɔmmo na tagra te peɛloo?

²⁰ Aŋa lɛ te naŋ maŋ nɔŋ ka te uoro vũũ ɔɔre saŋa na, lɛ neŋ o zu la teŋ maŋ tagra peɛlɛ Jehoova nɔmmo. Jehoova nɔŋ teŋ yaga zaa a kyɛ taa nimimaaroŋ meŋ ko te. Azuŋ taa popeɛloŋ Jehoova naŋ nɔŋ bo na zuŋ. Yɛ vɛŋ ka te zaa sage Jehoova nɔmmo na, a de kɔkɔ kpeɛŋaa yel ka: “N nɔŋ la Jehoova”!​—Yiem. 116:1.