1. Bo tɔnɔ teŋ maŋ nyɛ ka teneeŋ wa gaa a Yezu Kũũ Leɛteɛroo lammo na yuoni zaa?

 JEHOOVA ko teŋ kyɔɔtaa naŋ e tegroŋ yaga zaa a gaŋ kyɔɔtaa la kyɔɔtaa zaa, a de o Bidɔɔ tere oŋ wa kpi ko te! (2 Kor. 9:15) Yezu naŋ da de o nyɔvore iri sareka ko te saŋa na oŋ da e nensaalaa na zuŋ, te neŋ Jehoova Naaŋmen maŋ baŋ nyɔgɛɛ zɔmennoŋ. O la yuo la a sori ko te teŋ na baŋ nyɛ nyɔvore naŋ ba taa baaraa. Azuŋ aseŋ ka te puoro Jehoova bareka yaga zaa ane o naŋ ko te a yɔɔdeɛbo sareka ŋa, bonso o naŋ nɔŋ te zuŋ oŋ ko te a kyɔɔtaa ŋa! (Uro. 5:8) Yezu naŋ da boɔrɔ ka o soŋ te ka te naŋ kyɛnɛ taa nimipa yaga zaa ko a yɔɔdeɛbo sareka na zuŋ, o da ko teŋ noɔre ka te maŋ e o Kũũ Leɛteɛroo Lammo na yuoni zaa.​—Luk. 22:​19, 20.

2. Boŋ teŋ na zanne a zannoo ŋa poɔŋ?

² A yuoni ŋa Yezu Kũũ Leɛteɛroo bebiri na na eɛ Asibiti Daare, April 12, 2025. Nɔkpeɛne zaa kyebe ka te zaa kaarɛɛ soriŋ ka te gaa a lammozie. Ka teneeŋ bɔ wagre a Yezu kũũ Leɛteɛroo saŋa a teɛre yɛlɛ na Jehoova ane o Bidɔɔ naŋ e ko te na yɛlɛ gaa tɔɔre, a te na nyɛ la tɔnɔ yaga zaa. A zannoo ŋa poɔŋ, te na zannɛɛ yɛlɛ na a yɔɔdeɛbo naŋ wulo te a kyaare Jehoova ane o Bidɔɔ na. A zannoo naŋ tɔnne na meŋ poɔŋ, te na zanne nyɛɛ lɛ teŋ na baŋ nyɛ tɔnɔ yi a yɔɔdeɛbo poɔŋ ane lɛ teŋ na baŋ e wuli ka te niŋe paɛ̃ neŋ a kyɔɔtaa ŋa.

YƐLƐ A YƆƆDEƐBO NAŊ WULI TE A KYAARE JEHOOVA

3. Sobuoŋ ka nembonyenaa kũũ na baŋ faa nensaaleba zaa? (Kaa a foto meŋ.)

³ A yɔɔdeɛbo soŋ teŋ teŋ baŋ ka Jehoova eɛ dantorii Naaŋmen. (Dut. 32:4) Saŋa na Adama naŋ da zagre Jehoova noɔre  na, o da wa leɛ la yelfa-erɛ, a baaraa zaa oŋ da kpi. Te meŋ naŋ e Adama biiri na zuŋ teŋ meŋ e yelbe-erebɛ a kpiire. (Uro. 5:12) Kyɛ Jehoova da toŋɛɛ o bie oŋ wa ko te a yɔɔdeɛbo, ka o na faa te yi faaloŋ ane kũũ poɔŋ. Kyɛ sobuo ka nensaalaa bonyeni naŋ pɛgeyi na baŋ faa nensaaleba zaa yi faaloŋ ane kũũ poɔŋ? A bitontona Pɔɔl da yeleeŋ ka: “Bonso, aŋa lɛ nenyeni [Adama] noɔre zagroo naŋ e ka noba yaga leɛ yelbe-erebɛ, lɛ meŋ ka nenyeni [Yezu] noɔre sagoo e ka neŋyaga nyɛ mennoŋ.” (Uro. 5:19; 1 Tim. 2:6) Pɔɔl da boɔrɔŋ ka o wuli ka nembonyeni naŋ pɛgeyi naŋ da zagre Naaŋmen noɔre na zuŋ, ka nensaaleba zaa wa leɛ yelbe-erebɛ a kyɛ kpiire meŋ. Azuŋ nembonyeni naŋ pɛgeyi noɔre sagoo zuŋ, teŋ leɛ nyɛ faabo a yi kũũ ane faaloŋ eŋɛŋ.

4. Ananso la wala ka Jehoova ba tere sori ka Adama biiri naŋ e sukyiri sonne deme na nyɛ nyɔvore naŋ ba taa baaraa weɛ lɛ?

⁴ Ka lɛ a fɛrɛɛŋ ka Yezu kpi sɛre kyɛ ka te na baŋ nyɛ faabo bee? Ananso la wala ka Jehoova da naaŋ koŋ baŋ vɛŋ ka Adama biiri naŋ e sukyiri sonne deme na nyɛ nyɔvore naŋ ba taa baaraa ka o ba ŋmɛ sane zaa? Tenee yɛŋ teɛroŋ poɔŋ, aminekaŋaŋ te na teɛre ka lɛŋ na baŋ soŋ ka a yɛlɛ maale soŋ. Kyɛ Jehoova nimitɔɔreŋ yɛŋ lɛ koŋ baŋ e, bonso a da naaŋ koŋ e dantorii soriŋ. Ka o naŋ da e lɛ, a na waa ŋa Adama da ba zagre Naaŋmen noɔre, ka o biiri na meŋ zaa ba taa faaloŋ zaa ba eŋɛŋ. Kyɛ lɛ meŋ ba e yelmeŋɛ.

5. Ananso la wala teŋ na baŋ taa sagediibu ka Jehoova na maŋ eɛ yɛlɛ naŋ tori wagre zaa?

⁵ Ka Jehoovaŋ da ba ko te a yɔɔdeɛbo sareka na, kyɛ tere sori ka Adama biiri naŋ ba pɛgeyi na nyɛ nyɔvore naŋ ba taa baaraa, lɛ naaŋ wuliŋ ka o ba de o meŋɛ dantorii toŋ neŋ toma. Lɛ da naaŋ vɛŋeŋ noba koŋ lɛ sagoo di, bonso ba da naaŋ teɛrɛ ka nendaarekaŋa meŋ o koŋ lɛ de o dantorii na toŋ neŋ toma a e yɛlɛ o naŋ yelbiŋ ka o na eŋ na. Aŋa mannoo poɔŋ, noba da naaŋ bonnɔŋ ka aminekaŋaŋ Jehoova koŋ paale nɔɛ na zaa o naŋ eŋ na. Kyɛ te ba taa a lɛ bonnoo ŋa, bonso Jehoova de la o meŋɛ Bidɔɔ o naŋ nɔŋ yaga zaa iri sareka ko te a ŋmɛ sane yaga zaa kyɛ ka lɛ na baŋ vɛŋ ka o e yɛlɛ dantorii soriŋ. Azuŋ te na baŋ taa la sagediibu ka lɛ zaa naŋ la kyɛ o na maŋ eɛ yɛlɛ naŋ tori wagre zaa.

6. Bo yelkaŋa meŋ la vɛŋ ka Jehoova toŋ o Bidɔɔ ka o wa kpi ko te? (1 Gyɔɔn 4:​9, 10)

⁶ Yel na kaŋa zuŋ Jehoova naŋ ko te a yɔɔdeɛbo sareka la ka o nɔŋ teŋ yaga zaa. (Gyn. 3:16; kanne 1 Gyɔɔn 4:​9, 10.) Jehoova naŋ boɔrɔ ka te nyɛ nyɔvore naŋ ba taa baaraa a kyɛ wa poɔ o booree poɔŋ na zuŋ oŋ toŋ o Bidɔɔ ka o wa kpi ko te. Adama naŋ da zagre Naaŋmen noɔre na zuŋ, o da koŋ baŋ lɛ poɔ Jehoova booree na poɔŋ. Azuŋ saŋa na baŋ wa dɔge te  na, te meŋ da ba poɔ Naaŋmen booree na poɔŋ. Kyɛ a yɔɔdeɛbo sareka na zuŋ, noba na zaa naŋ taa sagediibu Naaŋmen eŋɛŋ a kyɛ tuuro o noɔre na na baŋ wa poɔ la o booree na poɔŋ bebiri kaŋa. Kyɛ pampana ŋa gba, Jehoova na baŋ di la te yelbebe suuri ko te ka te neŋ o ane te yɔɔmine zaa taa niiloŋ naŋ soma. Yelmeŋɛ la, Jehoova sereŋ nɔŋ teŋ!—Uro. 5:​10, 11.

7. Yezu da di la dɔgɛɛ yaga zaa kyɛ na baŋ yɔɔ a yɔɔdeɛbo sareka na ko te, sobuo ka lɛ soŋ te teŋ baŋ lɛ Jehoova naŋ nɔŋ te seŋ?

⁷ Ka teneeŋ leɛteɛre lɛ na aŋ da beɛrɛ Jehoova yaga zaa saŋa na oŋ da nyɛ o Bidɔɔ naŋ dire dɔgɛɛ yaga zaa kyɛ na kpi ko te na, a na soŋ teŋ ka te nyɛ lɛ Jehoova naŋ nɔŋ te seŋ. Setaana yeleeŋ ka Naaŋmen puorebie zaa daŋ koŋ sage di yelmennoŋ ko Naaŋmen ka o naŋ tuore yelkpeɛne. Kyɛ Jehoova naŋ da boɔrɔ ka a pɛle ka zirii ka Setaana ŋma na zuŋ, o da terɛɛ sori ka Yezu di dɔgɛɛ yaga sɛre kyɛ kpi. (Joob 2:​1-5; 1 Pit. 2:21) Jehoova da kaaraŋ saŋa na baŋ da erɛ Yezu seɛ, ka a sogyare da ŋmeɛrɛ o, a baaraa zaa baŋ kpa o a daa zuŋ. Ka Jehoova da zeŋ kaara ka o Bidɔɔ nɔŋnaa ŋa di dɔgɛɛ a kyɛ kpi kũũ naŋ beɛrɛ yaga zaa. (Mat. 27:​28-31, 39) Jehoova taa la a kpeɛ̃o a da naaŋ baŋ de pigi a yɛlɛ ŋa zaa sori ka a ta nyɛ eebo. Aŋa mannoo poɔŋ, saŋa na o dɔndɔnne naŋ da wa yelka: “O e ka a Naaŋmen wa faa o a pampana ŋa zaa, ka [Naaŋmeneŋ boɔroo],” Jehoova da naaŋ baŋ eɛ lɛ meŋ. (Mat. 27:​42, 43) Kyɛ ka o naŋ da e lɛ meŋ, Yezu da naaŋ koŋ baŋ kpi a de o nyɔvore yɔɔdeɛ te, lɛ wuleeŋ ka te da koŋ taa teɛretɔ zaa. Azuŋ Jehoova da terɛɛ sori ka o Bidɔɔ ŋa di dɔgɛɛ a te kpi.

8. Wala teŋ e baŋ peɛlaaŋ ka Jehoova sukyiri da kyɛrɛɛŋ yaga zaa saŋa na o Bidɔɔ naŋ da dire dɔgɛɛ na? Wuli a muni. (Kaa a foto meŋ.)

⁸ A ba seŋ ka te teɛrɛ ka Jehoova naŋ e kpeɛ̃o zaa daana na zuŋ, ona yɛŋ ka yelfaareŋ wa e a ba maŋ dɔnnoo! Jehoova maale teŋ o waaloŋ poɔŋ, azuŋ ka yelfaareŋ wa e a maŋ beɛrooŋ, aŋa lɛ te meŋ naŋ maŋ nyɛ yelfaare aŋ beɛrɛ te na. A Baabole gba vɛŋɛɛŋ teŋ baŋ ka yɛlɛ mine daŋ eɛŋ aŋ vɛŋ ka Jehoova ‘poɔ sãã,’ ka a yɛlɛ da ‘dɔŋ o suuri.’ (Yiem. 78:​40, 41) Te nyɛ Aboraham ane Aziki zemmo yɛlɛ. Jehoova da yelko la Aboraham ka o de o bidɔɔ yenee na iri sareka koo. (Mun. 22:​9-12; Hib. 11:​17-19) Hooŋ teɛre nyɛ lɛ a yɛlɛ naŋ da naaŋ kyɛre Aboraham sukyiri yaga zaa seŋ saŋa na oŋ da nara o meŋɛ ka o ko Aziki na. Lɛ meŋ aŋ da kyɛre Jehoova sukyiri yaga zaa saŋa na oŋ da kaara baŋ dɔgre o Bidɔɔ a kyɛ koo na!​—Kaa a vidio ŋa jw.org zuŋ, Tɔglɔ Ba Sagediibu​—Aboraham, Kyɛlee 2.

9. Boŋ hoŋ zanne yi Urom 8:​32, 38, 39 aŋ soŋ bo hoŋ nyɛ lɛ Jehoova naŋ nɔŋ bo ane te yɔɔmine zaa seŋ?

⁹ A yɔɔdeɛbo soŋ teŋ teŋ nyɛ ka neɛzaa ba nɔŋ te a gaŋ Jehoova, haali ka o soba gbaŋ e te dɔgrɔ kaŋa bee te zɔmeŋɛ kaŋa te naŋ nɔŋ yaga  zaa. (Kanne Urom 8:​32, 38, 39.) Jehoova gba nɔŋ teŋ a gaŋ lɛ na te naŋ nɔŋ te menne na. Ho boɔrɔŋ ka ho nyɛ nyɔvore naŋ ba taa baaraa bee? Jehoova boɔrɔŋ ka ho nyɛ nyɔvore naŋ ba taa baaraa a gba gaŋ lɛ ho naŋ boɔroo na. Ho boɔrɔŋ ka ho nyɛ ho yelbebe sudi bee? Jehoova gbaŋ boɔrɔ ka ho nyɛ ho yelbebe sudi a gaŋ bo. Yɛlɛ o naŋ deɛ boɔrɔ yire te zie la ka te wulo nimipa a korɔ a yɔɔdeɛbo kyɔɔta-tegroŋ na o naŋ ko te na, a taa sagediibu o eŋɛŋ, a kyɛ tuuro o nɔɛ. A yɔɔdeɛbo eɛ kyɔɔta-kpoŋ Jehoova naŋ de ko te a tu beŋ a wuli te nɔmmo yaga zaa. A donpaalaa poɔŋ meŋ, te na zannɛɛ yɛlɛ yaga Jehoova naŋ e ko te o naŋ nɔŋ te zuŋ.—Ikil. 3:11.

YƐLƐ A YƆƆDEƐBO NAŊ WULO TE A KYAARE YEZU

10. (a) Ananso la wala ka Yezu sukyiri da kyɛre yaga zaa lɛ saŋa na baŋ da waana ka ba koo na? (b) Sobuoŋ ka Yezu da vɛŋ ka Jehoova yuori pɛgeyi? (Kaa a daga ŋa, “ Yezu Yelmennoŋ Diibu Na Da Vɛŋɛɛŋ Ka Jehoova Yuori Pɛgeyi.”)

¹⁰ Yezu Saa yosoŋ yɛlɛ da fɛrooŋ yaga zaa. (Gyn. 14:31) Yezu sukyiri da kyɛrɛɛŋ yaga zaa saŋa na baŋ da ŋma zirii dɔgloo ka o to la Naaŋmen zoma na, bonso lɛ da naaŋ vɛŋeŋ ka Naaŋmen yuori sãã. Lɛ zuŋ oŋ da puore ka: “N Saa, ka a naŋ da na taa eebo, vɛŋ ka a [ŋmanlee] ŋa wa pare ma bare.” (Mat. 26:39) Kyɛ Yezu naŋ da di yelmennoŋ ko Jehoova a te ta o kũũ saŋa na, o da wuleeŋ ka yɛlɛ na zaa Setaana naŋ yelkyaare o Saa na ba e yelmeŋɛ.

11. Sobuo ka Yezu wuli nɔmmo yaga zaa a ko noba? (Gyɔɔn 13:1)

¹¹ A yɔɔdeɛbo lɛ soŋ teŋ teŋ baŋ ka Yezu taa la noba yɛlɛŋ yaga zaa, agaŋaazaa o potuuribo. (Yeng. 8:31; kanne Gyɔɔn 13:1.) Aŋa mannoo poɔŋ, Yezu da baŋɛɛŋ ka yɛlɛ na mine oŋ na wa e a donɛɛ ŋa zuŋ kyɛ na eɛ kpeɛŋaa yaga zaa, agaŋaazaa o kũũ na. Aneazaa ka Yezu da tu la Jehoova noɔre a toŋ a tonkpeɛne  ŋa zaa, kyɛ o naŋ da nɔŋ nensaaleba meŋ zuŋ oŋ da e a yɛlɛ ŋa zaa. Yezu da wulee nɔmmo yaga zaa a ko noba, a da maŋ manna a duorisoŋ korɔ ba, a wulo ba Naaŋmen yɛlɛ, a kyɛ sonnɔ ba meŋ. Daare na gba baŋ da na ko Yezu na, o da de la wagre a pɛge o bitontonee na gbɛɛ, a kyɛ da yel yelbie naŋ eŋ ba faŋa a kyɛ dii ba sukyie. (Gyn. 13:​12-15) Saŋa na gba baŋ da kpa o a daa zuŋ oŋ dire dɔgɛɛ a waana ka o kpi na, Yezu da ko la a toŋfatona na kaŋa baŋ da kpa o meŋ daa zuŋ a peɛloo na teɛretɔ ka o na gaa la Paradiisi, a da sɛgre yɛlɛ meŋ ka Gyɔɔn kaara o ma Mareya zu ka o naŋ wa kpi. (Luk. 23:​42, 43; Gyn. 19:​26, 27) Yezu kũũ na yoŋ naane oŋ da de wuli ka o nɔŋɛɛ nensaaleba, kyɛ ka o neŋ nobaŋ wa laŋ erɛ yɛlɛ o da maŋ wulo baŋ nimimaaroŋ ane nɔmmo.

12. Sobuoŋ ka Yezu sonnɔ te pampana?

¹² Aneazaa ka Yezu da kpieŋ “dayeni yoŋ” a ko te, kyɛ o naŋ erɛɛ yɛlɛ yaga a korɔ te pampana. (Uro. 6:10) Bo yɛlɛ oŋ erɛ korɔ te? O naŋ moɔ̃ la nimiri a tonɔ tonkpeɛne ka lɛ na baŋ vɛŋ ka te nyɛrɛ a yelsonne na zaa te naŋ nyɛrɛ pampana a yɔɔdeɛbo zuŋ na. Te nyɛ tonkpeɛne na mine o naŋ tonɔ. O eɛ te Naa, te Ŋmenpuore Wedeɛrekpoŋ, ane a lantaapuoruu wedeɛrɛ. (1 Kor. 15:25; Efe. 5:23; Hib. 2:17) Ona la deɛrɛ weɛ a lagra a noba na ba naŋ sɔ ba naaloŋ kãã ane a nembeɛoŋ naŋ e yaga zaa na lanna taa, o na toŋɛɛ a toma ŋa baare sɛre kyɛ ka a dɔgroŋ kpoŋ baare. b (Mat. 25:32; Mak. 13:27) O maŋ tu la a gbaŋgba-bivelaa eŋɛŋ kyɛ korɔ te bonzaa naŋ na baŋ soŋ te ka te puoro Jehoova yelmennoŋ poɔŋ a bebi-baaree ŋa poɔŋ. (Mat. 24:45) O Yuoŋ Turi Naaŋ Diibu na poɔŋ, o naŋ na tonɛɛ toma a korɔ te. Jehoova ba de o Bidɔɔ na ko te ka o wa kpi ko te yoŋ, kyɛ o de oŋ ko te ka o wa e yɛlɛ yaga ko te!

NAŊ MOƆ̃ NIMIRI ZANNA YELPAALA

13. Ka hooŋ maŋ teɛre yɛlɛ ho naŋ zanna na yɛlɛ gaa tɔɔre, sobuo aŋ na baŋ soŋ bo ka ho zanne yɛlɛ yaga a kyaare nɔmmo na Naaŋmen ane Krista naŋ taa ko te na?

¹³ Ka hooŋ maŋ teɛrɛ nɔmmo na Jehoova Naaŋmen ane Yezu Krista naŋ wuli ko te na yɛlɛ gɛrɛ tɔɔre, ho na baŋ zannɛɛ yɛlɛ yaga yi be. Kaapɔge a yuoni ŋa Yezu Kũũ Leɛteɛroo na saŋa, ho na baŋ mãã la ho meŋɛ a kanne a Duorisoŋ gama na kaŋa bee a mine. Ta mɔɔrɔ ka ho kanne yɛlɛ yaga dayeni. Kyɛ ka hooŋ wa kanna, maŋ mãã ho meŋɛ a peɛre nyɛ ananso a naŋ seŋ ka te nɔŋ Jehoova ane Yezu. Ho na  baŋ mannɛɛ yɛlɛ na mine meŋ hoŋ zanne na ko ho taaba.

14. Aŋa lɛ Yieme 119:97 naŋ yel na, ka teneeŋ maŋ peɛrɛ yɛlɛ te naŋ kanne yi a Baabole poɔŋ gɛrɛ tɔɔre, sobuoŋ aŋ na baŋ soŋ te ka te zanne yɛlɛ yaga a kyaare a yɔɔdeɛbo ane yɛlɛ mine teŋ da ba baŋ? (Kaa a foto meŋ.)

¹⁴ Ka hooŋ be a yelmeŋɛ poɔŋ kɔɔre yaga zaa aminekaŋaŋ ho na teɛrɛŋ ka yelzaa ba lɛ kyebe hoŋ na baŋ zanne a kyaare Naaŋmen dantorii, o nɔmmo, ane a yɔɔdeɛbo. Kyɛ yelpaala yaga bebeŋ teŋ na baŋ zanne a kyaare a yɛlɛ ŋa. Azuŋ wala hoŋ na baŋ e? Maŋ zanna yɛlɛ na zaa ba naŋ maŋ sɛge eŋ te gama na poɔŋ. Ka hooŋ wa kanne a Baabole a ba woŋ a muni soŋ, peɛre a yɛlɛ gaa tɔɔre. A lɛ bebiri na zaa, ho na baŋ teɛrɛɛ yɛlɛ na ho naŋ peɛre nyɛ na yɛlɛ gaa tɔɔre, a nyɛ yɛlɛ a naŋ wulo bo a kyaare Jehoova, o Bidɔɔ, ane nɔmmo ba naŋ taa ko bo.​—Kanne Yieme 119:97.

15. Ananso la wala aŋ seŋ ka te naŋ moɔ̃ nimiri a zanna yelpaala yire a Baabole poɔŋ?

¹⁵ Ka hooŋ wa zeŋ zanne boma bee a peɛre yɛlɛ kyɛ ba toɔ̃ zanne yelpaalaa zaa, ta vɛŋ ka ho eŋɛ kyoɔre. Ho waa ŋa neɛ naŋ yiilɛ tɛne a boɔrɔ salma. Noba naŋ maŋ boɔrɔ salma na maŋ de la aware ane bebie yaga bɔ lɛɛŋ kyɛ wa te nyɛ saleŋ-fẽẽ kaŋa. Kyɛ ba maŋ di la kannyiri kyɛ moɔ̃ nimiri a boɔrɔ bonso saleŋ-fẽẽ zaa ba naŋ nyɛ maŋ eɛ nanee yaga zaa ko ba. Ka teneeŋ wa zanne yelkaŋa yi a Baabole poɔŋ a gba maŋ eɛ nanee yaga zaa gaŋ salma! (Yiem. 119:127; Yeng. 8:10) Azuŋ moɔ̃ nimiri zanna a Baabole, a moɔ̃ nimiri peɛrɛ ka ho zanne yelpaala yi o poɔŋ.​—Yiem. 1:2.

16. Wala teŋ na baŋ e a tɔgle Jehoova ane Yezu?

¹⁶ Ka hooŋ wa zanna boma, maŋ teɛre nyɛ lɛ hoŋ na baŋ de yɛlɛ na ho naŋ zanne na toŋ neŋ toma. Aŋa mannoo poɔŋ, ho na baŋ tɔglɛɛ Jehoova dantorii na a ta maŋ erɛ ho taa nimikpɛ yɛlɛ. Tɔglɔ nɔmmo na Yezu naŋ taa ko o Saa ane nensaaleba na, a maŋ mɔɔrɔ ka ho erɛ yɛlɛ Jehoova naŋ boɔrɔ, a kyɛ maŋ erɛ yɛlɛ sonnɔ ho taaba ka lɛ eeboŋ gbaŋ na vɛŋ ka ho tuore yelkpeɛne mine. Ho na baŋ lɛ tɔglɛɛ Yezu a maŋ manna yelsonne na zaa Jehoova naŋ e ko nensaaleba na, ka a yuo sori ko ba ka ba meŋ wuli sagediibu a yɔɔdeɛbo eŋɛŋ.

17. Boŋ teŋ na zanne a zannoo naŋ tɔnne na poɔŋ?

¹⁷ Ka teneeŋ moɔ̃ nimiri a zanna a yɔɔdeɛbo yɛlɛ gɛrɛ tɔɔre, a na soŋ teŋ ka te maaleŋ nɔŋ Jehoova ane o Bidɔɔ na yaga zaa. Lɛ na vɛŋeŋ ka ba meŋ lɛ maaleŋ nɔŋ te yaga zaa. (Gyn. 14:21; Gyi. 4:8) Azuŋ yɛ vɛŋ ka te de bonzaa Jehoova naŋ ko te ka te maŋ de zanna o yɛlɛ a moɔ̃ nimiri a zanna a yɔɔdeɛbo yɛlɛ. A zannoo naŋ tɔnne na poɔŋ, te na zanne nyɛɛ tɔnɔ na mine teŋ na baŋ nyɛ yi a yɔɔdeɛbo eŋɛŋ ane lɛ teŋ na baŋ wuli nimipa a ko nɔmmo na Jehoova naŋ wuli ko te na.