1. Yel na kaŋa zuŋ Jehoova naŋ sɛgre kultaa yɛlɛ ko te la bo?

 JEHOOVA la ‘a popeɛloŋ Naaŋmen,’ o boɔrɔŋ ka te meŋ taa popeɛloŋ. (1 Tim. 1:11) O ko teŋ kyɔɔtaare yaga ka a soŋ te ka te taa popeɛloŋ te zemmo poɔŋ. (Gyi. 1:17) A kyɔɔtaare ŋa kaŋa la kultaa. Ka dɔɔ ane pɔgeŋ wa kultaa, ba maŋ eŋɛɛ noɔre ko taa ka ba na nɔŋɛɛ taa, a kyɛ korɔ taa gyeremɛ. Ka a dɔɔ ane a pɔgeŋ wa vɛŋ ka nɔmmo na ba naŋ taa ko taa naŋ e kpeɛŋaa, a na vɛŋeŋ ka ba taa popeɛloŋ yaga zaa.—Yeng. 5:18.

2. Bo ka sereba yaga maŋ de erɛ ba pɔgeba zenɛ ŋa?

² A posaanaa la ka, kultaa deme yaga bebeŋ zenɛ ŋa a ba paala noɔre na ba naŋ da eŋ ko taa ba kultaa bebiri ka ba na nɔŋɛɛ taa a kyɛ wulo gyeremɛ korɔ taa na. Lɛ vɛŋɛɛŋ baŋ ba taa popeɛloŋ. Yelpeɛreba mine peɛrɛɛ yɛlɛ beraayi ŋa a wa nyɛ ka sereba yaga maŋ ŋmeɛrɛ ba pɔgeba, a maŋ yele yɛlɛ naŋ ba soma a korɔ ba, a kyɛ maŋ erɛ ba nimikuõ-yɛlɛ naŋ ba soma. Kyɛ a sereba ŋa naŋ maŋ erɛ ba pɔgeba a yɛlɛ ŋa maŋ wulee gyeremɛ ane nɔmmo korɔ ba pɔgeba ka ba naŋ wa be noba poɔŋ, ka lɛ na vɛŋ ka noba ta baŋ ka ba maŋ dɔgrɛɛ ba pɔgeba, kyɛ ka ba naŋ wa gaa die, baŋ te erɛ ba nimikuõ-yɛlɛ. Sereba mine meŋ maŋ kaarɛɛ sɛŋsɛŋ vidiori ane fotori, lɛ meŋ maŋ vɛŋeŋ ka ba pɔgeba nyɛ ka ba ba nɔŋ ba, ka lɛ maŋ vɛŋ baŋ taa posaanaa.

3. Ananso la wala ka dɔbɔ mine maŋ dɔgrɔ ba pɔgeba?

³ Ananso la wala ka dɔbɔ mine maŋ dɔgrɔ ba pɔgeba lɛ? Aminekaŋaŋ ba mine saamine da maŋ dɔgrɛɛ ba mamine baŋ nyɛ, ka lɛ vɛŋ baŋ teɛrɛ ka a ba e yelfaa zaa ka ba naŋ meŋ wa dɔgrɔ ba pɔgeba. Ba mine meŋ maŋ nyɛɛ dɔbɔ naŋ ferɛ ba pɔgeba zie na ba naŋ baa na. Lɛ maŋ vɛŋeŋ baŋ teɛrɛ ka aseŋ ka ba dire kpeɛ̃o ba pɔgeba zuŋ ka lɛ vɛŋ ka ba pɔgeba baŋ ka ba taa la kpeɛ̃o ba zuŋ. Dɔbɔ mine dɔgreba ba wuli ba lɛ baŋ na maŋ dire kannyiri bee a nyɔgrɔ ba menne ka ba suuriŋ wa iri. Dɔbɔ mine  meŋ maŋ kaarɛɛ sɛŋsɛŋ vidiori ane fotori ka lɛ vɛŋ baŋ maŋ taa teɛroŋ naŋ ba tori a kyaare pɔgeba ane gaŋneŋ taa yɛlɛ. Yelpeɛreba meŋ la peɛrɛɛŋ a wa nyɛ ka a COVID-19 baaloŋ na saŋa, dɔbɔ yaga da piili dɔgrɛɛ ba pɔgeba. Kyɛ lɛ zaa naŋ la, sori ba kyebe fẽẽ zaa ka dɔɔ dɔgrɔ o pɔge.

4. Bo yɛlɛ aŋ seŋ ka Kristabiiri naŋ e sereba go ba menne yi a poɔŋ, ka ananso la wala?

⁴ Sereba naŋ e Kristabiiri ba seŋ ka ba vɛŋ ka teɛroŋ faa na a donɛɛ naŋ taa kyaare pɔgeba na sãã ba teɛroŋ. a Bonso teɛrɛ na neɛ naŋ maŋ taa na, ana la oŋ maŋ de tonɔ neŋ toma. A bitontona Pɔɔl da kpãã la Kristabiiri ba naŋ sɔ ba naaloŋ kãã baŋ da be Urom paaloŋ na ka ba “ta tuuro a teŋɛzu yeltuuri.” (Uro. 12:​1, 2) A Urom lantaapuoruu deme na da eɛ Kristabiiri kɔɔre saŋa na Pɔɔl naŋ da sɛgrɛ a yɛlɛ ŋa korɔ ba na. Kyɛ yɛlɛ na Pɔɔl naŋ da sɛge ko ba na da wuleeŋ ka ba mine da naŋ terɛɛ sori ka a donɛɛ teɛroŋ nyɛrɛ kpeɛ̃o ba zuŋ. Lɛŋ vɛŋ oŋ da eŋ ba faŋa ka ba leɛre ba teɛroŋ ane ba gyogri. A lɛ kawane na kyaarɛɛ Kristabiiri naŋ e sereba zenɛ ŋa meŋ. Kyɛ a posaanaa la ka, ba mine vɛŋɛɛŋ ka a donɛɛ teɛroŋ faa na sãã ba teɛroŋ, baŋ gba maŋ dɔgrɔ ba pɔgeba. b Wala ka Jehoova boɔrɔ ka sereba erɛ ba pɔgeba? A noɔre iribo be la sɛgre na ba naŋ iri a zannoo ŋa yi na.

5. Aŋa lɛ 1 Piita 3:7 naŋ yel na, bo aŋ seŋ ka dɔɔ maŋ erɛ korɔ o pɔge?

⁵ Kanne 1 Piita 3:7. Jehoova ko la sereba noɔre ka ba maŋ eŋnɛ ba pɔgeba. Ka hooŋ maŋ erɛ yɛlɛ gyeremɛ soriŋ a korɔ neɛ kaŋa, lɛ wuleeŋ ka ho eŋnɛɛ a soba. Dɔɔ naŋ taa emmo ko o pɔge maŋ wulooŋ nimimaaroŋ ane nɔmmo. A zannoo ŋa poɔŋ, te na zanne nyɛɛ lɛ dɔɔ naŋ na baŋ e a wuli ka o eŋnɛɛ o pɔge. Kyɛ yɛ vɛŋ ka te daŋ nyɛ yɛlɛ mine dɔɔ naŋ na erɛ ka a wuli ka o ba taa emmo ko o pɔge.

DAŊ TA WA ERƐ YELZAA NAŊ NA KYƐRE HO PƆGE SUKYIRI

6. Bo teɛroŋ ka Jehoova taa kyaare dɔbɔ naŋ maŋ ŋmeɛrɛ ba pɔgeba? (Kolosi 3:19)

⁶ A ba seŋ ka sereba maŋ ŋmeɛrɛ ba pɔgeba. Jehoova kyiiree neɛzaa naŋ nɔŋ zɔɔre. (Yiem. 11:5) Agaŋaazaa Jehoova kyiiree dɔɔ naŋ ŋmeɛrɛ o pɔge. (Maal. 2:16; kanne Kolosi 3:19.) Aŋa lɛ na 1 Piita 3:7 ba naŋ iri a zannoo ŋa yi naŋ yel na, ka dɔɔŋ ba taa o pɔge soŋ, o neŋ Jehoova niiloŋ na sããŋeŋ. Aminekaŋaŋ Jehoova gba koŋ la kyɛllɛ wono o puoro meŋ.

7. Aŋa lɛ Efesu 4:31, 32 naŋ yel na, bo tɔ yelyaga aŋ ba seŋ ka dɔɔ maŋ yele korɔ o pɔge? (Kaa “Yelbie Mine Ba Naŋ Wuli A Muni” zie na meŋ.)

⁷ Sereba ba seŋ ka ba maŋ yele nimikuõ-yɛlɛ korɔ ba pɔgeba bee a tanna ba. Dɔbɔ mine maŋ de la suuri a yele yɛlɛ naŋ ba soma a korɔ ba pɔgeba, ka lɛ vɛŋ ka ba poɔ maŋ sãã yaga zaa. Kyɛ Jehoova meŋ kyiiree “sutoloŋ, suuri, gɔŋweere, [ane yelfaare yeluu].” c (Kanne Efesu 4:​31, 32.) O maŋ wonee yɛlɛ na zaa te naŋ maŋ yele. Lɛ na dɔɔ naŋ maŋ yele yɛlɛ korɔ o pɔge na maŋ ferɛɛ Jehoova yaga zaa, haali gba ka ba naŋ be ba dieŋ ka neɛzaa ba nyɛrɛ ba. Ka dɔɔŋ maŋ yele nimikuõ-yɛlɛ korɔ o pɔge, a maŋ sããnɛɛ o neŋ o pɔge niiloŋ a kyɛ naŋ sããna o neŋ Naaŋmen meŋ niiloŋ.—Gyi. 1:26.

8. Bo teɛroŋ ka Jehoova taa kyaare sɛŋsɛŋ vidiori ane fotori, ka ananso la wala?

⁸ A ba seŋ ka sereba maŋ kaara sɛŋsɛŋ vidiori ane fotori. Bo teɛroŋ ka Jehoova taa kyaare sɛŋsɛŋ vidiori ane fotori? O kyiiraaŋ yaga zaa.  Azuŋ dɔɔ naŋ kaara sɛŋsɛŋ yɛlɛ maŋ sããnɛɛ o neŋ Jehoova niiloŋ, lɛ meŋ ba wulo gyeremɛ fẽẽ zaa a korɔ o pɔge. d Jehoova boɔrɔŋ ka dɔɔ zaa maŋ dire yelmennoŋ korɔ o pɔge. Azuŋ o daŋ koŋ sage e peɛ̃mo yɛlɛ booree zaa neŋ pɔge zaala zaa, bee a gba nyɛ a lɛ teɛroŋ. Yezu yeleeŋ ka, dɔɔ zaa naŋ kaa pɔge neŋ peɛ̃mo vɔlaa gaŋnɛɛ a pɔge “o sukyiri poɔ.” e—Mat. 5:​28, 29.

9. Ka dɔɔŋ maŋ vɛŋ ka o neŋ o pɔge gana neŋ taa sori naŋ ba seŋ neŋ poɔŋ ka lɛ vɛŋ ka a pɔge zoma dɔnnoo, Jehoova poɔ maŋ sãã, ananso la wala?

⁹ A ba seŋ ka dɔbɔ maŋ vɛŋ ka ba neŋ ba pɔgeba erɛ gaŋneŋ taa yɛlɛ naŋ na vɛŋ ka ba pɔgeba zoma dɔnnɔ ba. Dɔbɔ mine maŋ vɛŋeŋ ka ba neŋ ba pɔgeba gana neŋ taa sori naŋ ba seŋ neŋ poɔŋ, ka lɛ maŋ vɛŋ ka ba pɔgeba zoma dɔnnɔ ba. Jehoova kyiiree a lɛ yeldɛgɛ ŋa taa. Jehoova boɔrɔŋ ka sereba nɔnɔ ba pɔgeba, a maŋ kaara ba zieŋ soŋ, a wulo gyeremɛ korɔ ba, a kyɛ ta erɛ yelzaa naŋ na dɔnnɔ ba zoma. (Efe. 5:​28, 29) Kyɛ ka dɔɔ naŋ e Kristabieŋ dɔgrɔ o pɔge bee a kaara sɛŋsɛŋ yɛlɛ meŋ? Wala oŋ na baŋ e leɛre o teɛroŋ ane o gyogo?

LƐ DƆƆ NAŊ NA BAŊ E BARE GYOG-DƐGƐ O NAŊ TAA

10. Sobuo ka sereba na baŋ nyɛ tɔnɔ yi Yezu ewuli soŋ na poɔŋ?

¹⁰ Ka dɔɔŋ taa gyog-dɛgɛ a kyɛ maŋ erɛ o pɔge nimikuõ-yɛlɛ, boŋ na baŋ somoo ka o baraa? O mɔɔrɔ ka o tɔglɔ Yezu. Aneazaa ka Yezu da ba de pɔge, kyɛ gyogo na oŋ da taa neŋ o potuuribo na eɛ ewuli soŋ a kyaare gyogo a naŋ seŋ ka sereba taa kyaare ba pɔgeba. (Efe. 5:25) Aŋa mannoo poɔŋ, te nyɛ yɛlɛ sereba naŋ na baŋ zanne yi lɛ na Yezu naŋ da maŋ erɛ o bitontonee na, ane lɛ oŋ da maŋ yele yɛlɛ korɔ ba na.

11. Wala ka Yezu da maŋ erɛ o bitontonee na?

¹¹ Yezu da maŋ taa la nimimaaroŋ a ko o bitontonee na, a kyɛ wulo ba gyeremɛ meŋ. O daŋ ba e ba nimikuõ-yɛlɛ zaa. Aneazaa ka o naŋ da taa kpeɛ̃o gaŋ ba, kyɛ o da ba maŋ de o kpeɛ̃o na erɛ yɛlɛ naŋ na vɛŋ ka ba zoroo. Kyɛ o da maŋ yi la sigrimennoŋ poɔŋ a tonɔ korɔ ba. (Gyn. 13:​12-17) O da yelko la o potuuribo na ka: ‘Yɛ zanne N waaloŋ, bonso N eɛ bɔin, a taa meŋɛ sigruu sukyiri, lɛ ka yɛ na nyɛ pɛnnoo a ko yɛ menne.’ (Mat. 11:​28-30) Ka hooŋ nyɛ, Yezu da taa la meŋɛ sigruu sukyiri. Ka neɛŋ e bɔin ka o suuri ba ire wieoŋ, lɛ ba wuli ka o soba eɛ bambaala. Kyɛ o naŋ taa faŋa yaga zaa la so oŋ maŋ baŋ nyɔge o meŋɛ. Ka o suuriŋ wa iri, o maŋ eɛ bɔin a toɔ̃ nyɔge o meŋɛ.

12. Ka Yezuŋ wa yele yɛlɛ korɔ o taaba, wala ka o yelyaga da maŋ waa?

¹² Yezu da maŋ de la o yelbie diire o taaba sukyie a kyɛ korɔ ba pɛnnoo. O da ba maŋ yele nimikuõ-yɛlɛ korɔ o potuuribo na. (Luk. 8:​47, 48) Saŋa na gba o dɔndɔnne naŋ da to o, a mɔɔrɔ ka ba iri o suuri na, “o da ba [maŋ] leɛ to” ba a yaa sane. (1 Pit. 2:​21-23) Saŋa kaŋa gba Yezu da maŋ taŋ la o noɔre, o da ba maŋ yel yelzaa a iri a noɔre ko ba. (Mat. 27:​12-14) A eɛ ewuli soŋ yaga zaa a ko sereba naŋ e Kristabiiri!

13. Aŋa lɛ na Matio 19:4-6 naŋ yel na, wala ka dɔɔ na baŋ e a ‘wɛle te mare o pɔge’? (Kaa a foto meŋ.)

¹³ Yezu yeleeŋ ka aseŋ ka sereba dire yelmennoŋ korɔ ba pɔgeba. O da yelee yɛlɛ na o Saa naŋ da yel na, a yelka serɛ seŋ ka o maŋ ‘wɛle te mare o pɔge.’ (Kanne Matio 19:​4-6.) A Giriki yelbiri na ba naŋ de toŋ neŋ toma a sɛgre ŋa poɔŋ oŋ are ko ‘te mare’ tɛgɛ la ka “sɛ mare.” Azuŋ aseŋ ka a dɔɔ neŋ o pɔge niiloŋ e kpeɛŋaa yaga zaa ka a waa ŋa ba naŋ sɛ ba mare taa. Ka kaŋaŋ e yelkaŋa a kyɛre o tɔsoba na sukyiri, ba zaaŋ na di a dɔgɛɛ. Ka dɔɔ neŋ o pɔgeŋ taa a niiloŋ ŋa tɔ ka o e kpeɛŋaa yaga zaa, a dɔɔ daŋ koŋ sage kaa sɛŋsɛŋ vidiori bee fotori booree zaa. O na maŋ iree o nimie wieoŋ lɛ  a yi ‘yelkpala kaabu eŋɛŋ.’ (Yiem. 119:37) O na tɔglɛɛ Gyoob, a e siri ka o daŋ koŋ sage kaa pɔge zaa neŋ peɛ̃mo vɔlaa.—Joob 31:1.

14. Bo yɛlɛ ayoɔbo la aŋ seŋ ka dɔɔ e ka o neŋ Jehoova ane o pɔge niiloŋ leɛ soma?

¹⁴ Ka dɔɔŋ maŋ dɔgrɔ o pɔge bee a maŋ yele nimikuõ-yɛlɛ korɔ o pɔge, aseŋ ka o e yɛlɛ mine sɛre kyɛ ka o neŋ Jehoova ane o pɔge na niiloŋ leɛ soma. Bo yɛlɛ la aŋ seŋ ka o e? A dɛndɛŋ soba, aseŋ ka o baŋ ka a yɛlɛ eɛ yelnimizeɛ yaga zaa. Jehoova nyɛrɛɛ yɛlɛ na zaa o naŋ erɛ ane yɛlɛ na zaa o naŋ maŋ yele korɔ o pɔge na. (Yiem. 44:21; Ikil. 12:14; Hib. 4:13) A yiiloŋ soba, aseŋ ka o bare o pɔge na dɔgroo a kyɛ leɛre o eebo meŋ. (Yeng. 28:13) A taaloŋ soba, aseŋ ka o sɔre sudi yi o pɔge ane Jehoova zie. (Tom. 3:19) Aseŋ ka o puore sɔre Jehoova ka o somoo ka o taa a boɔbo ka o leɛre o eebo; ka lɛ somoo ka o teɛrɛ, o yelyaga, ane o yele-eree maŋ pɛlɛ Jehoova poɔ. (Yiem. 51:​10-12; 2 Kor. 10:5; Fil. 2:13) Anaare soba, aseŋ ka o mɔɔrɔ ka o erɛ yɛlɛ na o naŋ puore sɔre na, a kyiiri zɔɔzɔɔ yɛlɛ ane nimikuõ-yelyaga boorɔ zaa. (Yiem. 97:10) Anuu soba, aseŋ ka o gaa a lantaapuoruu nembɛrɛ zie wieoŋ lɛ ka ba koo sommo naŋ seŋ neŋ. (Gyi. 5:​14-16) Ayoɔbo soba, aseŋ ka o sɛgre yɛlɛ biŋ soŋ zaa lɛ a kyaare yɛlɛ a naŋ ba seŋ ka o erɛ, ka a somoo ka o ta lɛ te e ana yɛlɛ na kaŋa zaa. Ka dɔɔŋ maŋ kaara sɛŋsɛŋ yɛlɛ meŋ, o na baŋ de la a yɛlɛ ayoɔbo ŋa zaa toŋ neŋ toma ka a somoo. Jehoova na kooŋ sommo naŋ seŋ neŋ ka o toɔ̃ leɛre o eebo. (Yiem. 37:5) Kyɛ ka onaŋ wa toɔ̃ bare a gyog-dɛgɛ ŋa zaa, aseŋ ka o mɔɔ kyɛ lɛ zanne yɛlɛ a naŋ seŋ ka o erɛ a toɔ̃ eŋnɛ o pɔge. Yɛ vɛŋ ka te zanne nyɛ yɛlɛ a naŋ seŋ ka o erɛ.

LƐ DƆƆ NAŊ NA BAŊ E A WULO EMMO KORƆ O PƆGE

15. Bo yɛlɛ mine la ka dɔɔ na baŋ e a wuli nɔmmo ko o pɔge?

¹⁵ Maŋ wulo ho pɔge ka ho nɔmooŋ. Te yɔɔdɔbɔ mine naŋ taa popeɛloŋ yaga zaa ba kultaa poɔŋ vɛŋɛɛŋ aŋ leɛ ba gyogo ka ba maŋ e yelkaŋa bebiri zaa a de wuli ba pɔgeba ka ba nɔŋ baŋ. (1 Gyn. 3:18) Dɔɔ na baŋ eɛ yelbilii bilii mine a de wuli o pɔge ka o nɔmooŋ. Aŋa mannoo poɔŋ, o na baŋ ti la o pɔge nuŋ ka ba naŋ wa kyɛnɛ bee a maŋ koroo mare o meŋɛ. O na  baŋ toɔlooŋ text message a yelko o pɔge ka “o vɔlaa kpɛ oŋ” bee a sooroo ka, “Wala ka ho toma gɛrɛ?” Saŋa kaŋa meŋ, o na baŋ sɛgɛɛ yelbi-noɔne mine eŋ card poɔŋ a koo a yelkoo lɛ o naŋ nɔmoo seŋ. Ka dɔɔŋ erɛ a yɛlɛ ŋa zaa korɔ o pɔge, o eŋnɛɛ o pɔge na, kyɛ ka lɛ meŋ vɛŋ ka ba kultaa na maaleŋ e kpeɛŋaa yaga zaa.

16. Ananso la wala aŋ seŋ ka dɔbɔ maŋ pugiro ba pɔgeba ane yelsonne ba naŋ erɛ na?

¹⁶ Maŋ vɛŋ ka o baŋ ka o eɛ nanee yaga zaa ko bo. Dɔɔ naŋ eŋnɛ o pɔge maŋ vɛŋeŋ oŋ baŋ ananso o naŋ e nanee yaga zaa koo, a maŋ vɛŋ oŋ nyɛ ka o taa la tɔnɔ yaga. Sori na kaŋa oŋ na baŋ tu kyɛ e lɛ la ka o maŋ puoruu bareka yaga zaa ane yɛlɛ na zaa o naŋ maŋ erɛ a sonnoo na. (Kol. 3:15) Ka dɔɔŋ maŋ pugiro o pɔge, a maŋ vɛŋeŋ ka a pɔge eŋɛ zaa mãã. A maŋ vɛŋeŋ oŋ nyɛ ka o serɛ wuluuŋ nɔmmo ane emmo ka lɛ vɛŋ oŋ taa gomeŋɛ.—Yeng. 31:28.

17. Wala ka dɔɔ na baŋ e a wuli gyeremɛ ko o pɔge?

¹⁷ Maŋ wuluu nimimaaroŋ ane gyeremɛ. Dɔɔ naŋ nɔŋ o pɔge maŋ nyɛŋ ka o pɔge na eɛ nanee yaga zaa koo a kyɛ kaara o zieŋ soŋ zaa. O maŋ nyɛŋ ka o eɛ kyɔɔta-tegroŋ naŋ yi Jehoova zie. (Yeng. 18:22; 31:10) Azuŋ o maŋ wuluuŋ gyeremɛ wagre zaa, haali ba gaŋneŋ taa yɛlɛ poɔŋ. O daŋ koŋ sage vɛŋ ka ba gaŋneŋ taa sori kaŋa naŋ ba seŋ neŋ poɔŋ ka lɛ vɛŋ ka a pɔge poɔ sãã, ka o nyɛ ka o ba lɛ e forifori, bee ka a dɔnnɔ o zoma. f Aseŋ ka a dɔɔ meŋ meŋɛ mɔɔ kyɛ kaara soŋ ka o neŋ o pɔge ta e gaŋneŋ taa yelzaa naŋ ba soma ka lɛ vɛŋ ka a dɔnnɔ o meŋɛ zoma.—Tom. 24:16.

18. Bo aŋ seŋ ka sereba e siri ka ba e? (Kaa a daga ŋa meŋ, “ Yɛlɛ Anaare Dɔbɔ Naŋ Na Baŋ Erɛ A Wulo Gyeremɛ Korɔ Ba Pɔgeba.”)

¹⁸ Sereba, yɛ baŋ ka Jehoova poɔ maŋ pɛleŋ yaga zaa ka o naŋ wa nyɛ ka yɛ mɔɔrɛɛ yɛ moɔbo zaa ka yɛ eŋnɛ yɛ pɔgeba yelzaa poɔŋ. Yɛ e siri ka yɛ koŋ e yelzaa naŋ na kyɛre yɛ pɔgeba sukyie, a wulo ba nimimaaroŋ ane gyeremɛ, a kyɛ wulo ba nɔmmo meŋ. Ka yɛneeŋ wa erɛ lɛ, a na wuliŋ ka yɛ nɔŋ baŋ, kyɛ baŋ e nanee yaga zaa ko yɛ. Eŋnɛ ho pɔge, lɛ na vɛŋeŋ ka ho neŋ Jehoova niiloŋ soma kyɛ ka ho neŋ ho pɔge meŋ niiloŋ soma.—Yiem. 25:14.