ZANNOO YƐLƐ 3
YIELOŊ 35 “Make Sure of the More Important Things”
Maŋ Derɛ Gbɛɛ Naŋ Na Vɛŋ Ka Jehoova Poɔ Pɛle
‘Jehoova zoobu la yɛŋ piilee, a Neŋpɛgeyiraa bammo la nimiyuo.’—YENG. 9:10.
YƐLƐ TE NAŊ NA ZANNE
Te na zanne nyɛɛ lɛ bammo, nimiyuo, ane lɛ teŋ na maŋ teɛrɛ yɛlɛ gɛrɛ tɔɔre naŋ na baŋ soŋ te ka te de gbɛɛ yɛŋ poɔŋ.
1. Bo yɛlɛ la maŋ e kpeɛŋaa ko te zaa saŋa kaŋa ka te e?
BEBIRI ZAA te maŋ de la gbɛɛ. A mine maŋ eɛ mɔlɔ lɛ, aŋa bon teŋ na di beguo saŋa, bee wagre te naŋ boɔrɔ ka te gaŋ zisoɔree saŋa. Kyɛ gbɛ-deree mine meŋ bebeŋ a ba maŋ e mɔlɔ lɛ ka te de. A gbɛ-deree ŋa mine na baŋ kyaarɛɛ te neŋ te booree laafeeloŋ ane popɛle yɛlɛ, ane lɛ te neŋ te booree naŋ na puoro Jehoova. Te maŋ boɔrɔŋ ka te de gbɛɛ naŋ soma ko te ane te yideme zaa. Kyɛ a nimizeɛ la ka te maŋ boɔrɔŋ ka te gbɛ-de na pɛle Jehoova poɔ.—Uro. 12:1, 2.
2. Bo yɛlɛ mine la aŋ seŋ ka ho e ka a soŋ bo ka ho maŋ de gbɛɛ naŋ soma?
2 Ka hooŋ boɔrɔ ka ho maŋ de gbɛ-sonne, aseŋ ka ho e a yɛlɛ ata ŋa, (1) mɔɔ kyɛ baŋ yelzaa naŋ bebe a kyaare gbɛre na ho naŋ derɛ na, (2) mɔɔ kyɛ baŋ teɛroŋ na Jehoova naŋ taa kyaare a yɛlɛ, (3) a kyɛ pãã teɛre a yɛlɛ gaa tɔɔre. A zannoo ŋa poɔŋ, te na zannɛɛ a yɛlɛ ata ŋa gaa tɔɔre, a lɛ zanne nyɛ lɛ teŋ na baŋ vɛŋ ka te yɛŋ kyile yaga zaa ka te maŋ teɛrɛ yɛlɛ gɛrɛ tɔɔre.—Yeng. 2:11.
MƆƆ KYƐ BAŊ A YƐLƐ ZAA
3. Bo yelmannaa la na baŋ soŋ bo ka ho baŋ ananso a naŋ seŋ ka ho peɛre baŋ yelzaa a kyaare gbɛre ho naŋ boɔrɔ ka ho de sɛre kyɛ derɛ a lɛ gbɛre na?
3 Ka hooŋ boɔrɔ ka ho de gbɛ-soŋ, a yeldɛndɛŋ soba a naŋ seŋ ka ho e la ka ho mɔɔ kyɛ baŋ yelzaa naŋ bebe a kyaare a yɛlɛ. Ananso la wala ka lɛ eebo e nimizeɛ? Te de ka baala kaŋa gaa la asibiti ka o te nyɛ dɔkta a kyaare baaloŋ nimizeɛ kaŋa o naŋ taa. Ka lɛ a dɔkta na piiliŋ a tegrɛ a baala ka o ba peɛre a baala yelzaa a kyaare o baaloŋ na yɛlɛ bee a peɛre ka o nyɛ yɛlɛ naŋ dɔnnoo bee? Ai, o koŋ e lɛ. Azuŋ aŋa lɛ a dɔkta naŋ na peɛre baŋ a baaloŋ yɛlɛ sɛre kyɛ tegrɛ a baala na, lɛ meŋ la aŋ na soŋ bo ka ho de gbɛ-soŋ, ka hooŋ peɛre baŋ yelzaa naŋ bebe a kyaare gbɛre na ho naŋ waana ka ho de na, sɛre kyɛ derɛ a gbɛre. Sobuo hoŋ na baŋ tu e lɛ?
4. Aŋa lɛ na Yeng Yelibie 18:13 naŋ yel na, wala hoŋ na baŋ e baŋ a yɛlɛ zaa a kyaare gbɛre kaŋa sɛre kyɛ derɛ a lɛ gbɛre na? (Kaa a foto meŋ.)
4 Ka hooŋ maŋ soorɔ soorebie, a na soŋ boŋ ka ho baŋ yelzaa naŋ bebe a kyaare a yɛlɛ. Aŋa mannoo poɔŋ, te de ka neɛ kaŋa toŋboɔle boŋ ka ho wa ka yɛ gaa tigri kaŋa zieŋ. Ka lɛ ho na gaaŋ bee? Ka hooŋ ba baŋ neɛ naŋ erɛ a tigri ane lɛ ba naŋ sɛgre a tigri yɛlɛ, a na fɛreŋ ka ho soore a soorebie ŋa taa: “Yenee ane bo saŋa baŋ na e a tigri? Noba bawala la na wa be? Nembobo la kaara a tigri yɛlɛ zu? Nembobo la gɛrɛ a tigri zie? Bo yɛlɛ baŋ na e beŋ? Dããkpeɛne na be la a zieŋ bee?” Ka hooŋ nyɛ a soorebie ŋa zaa nɔɛ iribo, a na soŋ boŋ ka ho de gbɛre naŋ soma.—Kanne Yeng Yelibie 18:13.
Maŋ peɛrɛ yɛlɛ ka a soŋ bo ka ho baŋ a yɛlɛ zaa (Kanne o wɛlbo 4) a
5. Ka hooŋ boɔrɔ ka ho de gbɛre kaŋa a peɛre baŋ a yɛlɛ zaa a kyaare gbɛre na ho naŋ boɔrɔ ka ho de na, bo aŋ seŋ ka ho e?
5 Ka hooŋ wa baŋ a yɛlɛ zaa baare, teɛre a yɛlɛ gaa tɔɔre. Aŋa mannoo poɔŋ, te de ka ho wa nyɛɛŋ ka noba na mine naŋ na gaa a tigri zie na ba tuuro Jehoova bege, dããkpeɛne meŋ na bebeŋ, kyɛ neɛzaa koŋ kaara ka noba naŋ be a tigri zie ta nyu a dãã gaali a kuolo. Ho nyɛɛŋ yɛlɛ mine naŋ wuli ka yelgalema na baŋ eɛ a tigri ŋa zieŋ bee? (1 Pit. 4:3) Kyɛbee te de ka wagre na baŋ na erɛ a tigri na, a wagre neŋ o zu aŋ seŋ ka ho gaa Lammozie bee a gaa a naaŋ moɔloo. Ka hooŋ teɛre a yɛlɛ ŋa zaa gaa tɔɔre, ana eɛ mɔlɔ ko bo ka ho de gbɛre naŋ soma. Kyɛ yelkaŋa meŋ lɛ bebeŋ aŋ seŋ ka ho e. Hooŋ yɛŋ baŋɛɛ teɛroŋ na ho naŋ taa kyaare a yɛlɛ, kyɛ aseŋ ka ho soore ho meŋɛ ka, bo teɛroŋ ka Jehoova meŋ taa kyaare a yɛlɛ ŋa?—Yeng. 2:6.
MƆƆ KYƐ BAŊ JEHOOVA TEƐROŊ A KYAARE A YƐLƐ
6. Aŋa lɛ na Gyimisi 1:5 naŋ yel na, ananso la wala aŋ seŋ ka te maŋ puore sɔre Jehoova sommo?
6 Puore sɔre Jehoova ka o soŋ bo ka ho baŋ o teɛroŋ a kyaare a yɛlɛ. Jehoova eŋɛɛ noɔre ka o na maŋ ko teŋ yɛŋ ka te teɛre yɛlɛ gaa tɔɔre a toɔ̃ baŋ gbɛre naŋ na pɛle o poɔ. O maŋ yi la “popeɛloŋ” poɔŋ a ko noba a yɛŋ ŋa, “a ba zɔɔrɔ yɛlɛ.”—Kanne Gyimisi 1:5.
7. Wala hoŋ na baŋ e baŋ teɛroŋ na Jehoova naŋ taa? Tere yelmannaa kaŋa.
7 Ka hooŋ wa puore sɔre Jehoova ka o soŋ bo ka ho nyɛ o sowuli, kaara soŋ ka ho nyɛ a puoro noɔre iribo. Aŋa mannoo poɔŋ: Ka hooŋ gaa zi-saana kaŋa a te bɔre, aminekaŋaŋ ho na soorɛɛ neɛ kaŋa naŋ kpeɛrɛ be a baŋaa zie ka o soŋ bo ka ho baŋ sori a naŋ seŋ ka ho tu. Kyɛ ka hooŋ wa sɔre o sommo baare, ho deɛ na te gɛrɛŋ kyɛ koŋ kyɛlle ka o wuli bo sori naŋ seŋ ka ho tu bee? Ai ho koŋ e lɛ. Ho na kyɛlle woŋee yɛlɛ na zaa o naŋ na yelko bo na. Lɛ meŋ la, ka hooŋ wa sɔre sommo yi Jehoova zieŋ, mãã ho meŋɛ a bɔ Baabole bege ane sowuli neŋ ho yɛlɛ na naŋ kyaare taa. Aŋa mannoo poɔŋ, te de ka ho boɔrɔŋ ka ho baŋ ka a na somaŋ ka ho gaa tigri na zie te naŋ daŋ yel o yɛlɛ na, ho na baŋ peɛrɛɛ Baabole sowuli naŋ bebe a kyaare tigri ba naŋ maŋ erɛ yɛlɛ naŋ ba soma beŋ, zɔmeŋ-faare yɛlɛ, ane ananso a naŋ seŋ ka te maŋ de Naaŋmen Naaloŋ na daŋ weɛ te zemmo poɔŋ a gaŋ te menne yelboɔree.—Mat. 6:33; Uro. 13:13; 1 Kor. 15:33.
8. Ka hooŋ boɔrɔ sommo ka ho toɔ̃ nyɛ yɛlɛ na mine ho naŋ boɔrɔ na, wala hoŋ na baŋ e? (Kaa a foto meŋ.)
8 Kyɛ saŋa kaŋa te na maŋ boɔrɛɛ sommo ka te baŋ toɔ̃ nyɛ yɛlɛ na mine te naŋ boɔrɔ. Ho na baŋ toɔ̃ nyɛɛ kawaŋ-sonne a yi te yɔɔdɔɔ bee te yɔɔpɔge kaŋa naŋ kyile zie. Kyɛ ka hooŋ peɛre bɔ a yɛlɛ ho meŋɛ meŋ, ho na nyɛ la tɔnɔ. Ho na baŋ nyɛɛ duoro yaga naŋ be te wulibo tontoŋ boma na poɔŋ, aŋa Research Guide for Jehovah’s Witnesses ane Scriptures for Christian Living. Teɛre baŋ ka, yɛlɛ ho naŋ boɔrɔ ka ho e la ka ho de gbɛre naŋ na pɛle Jehoova poɔ.
Mɔɔ kyɛ baŋ teɛroŋ na Jehoova naŋ taa kyaare a yɛlɛ (Kanne o wɛlbo 8) b
9. Wala teŋ na toɔ̃ e baŋ peɛlaaŋ ka te gbɛ-deree na na pɛlɛɛ Jehoova poɔ? (Efesu 5:17)
9 Wala teŋ na toɔ̃ e baŋ peɛlaaŋ ka te gbɛ-deree na na pɛlɛɛ Jehoova poɔ? A dɛndɛŋ yɛlɛ naŋ na baŋ soŋ te la ka te mɔɔ kyɛ bamoo soŋ. A Baabole yeleeŋ ka, ‘Jehoova zoobu la yɛŋ piilee, a Neŋpɛgeyiraa bammo la nimiyuo.’ (Yeng. 9:10) Yelmeŋɛ la, ka teneeŋ baŋ Jehoova gyogri, o poboɔbo, ane yɛlɛ o naŋ kyiiri, te na taa la nimiyuo. Soore ho meŋɛ ka, ‘Ka maaŋ leɛteɛre yɛlɛ na zaa maŋ baŋ kyaare Jehoova na, bo gbɛre maŋ na baŋ de ka lɛ vɛŋ ka o poɔ pɛle?’—Kanne Efesu 5:17.
10. Ananso la wala aŋ e nimizeɛ ka te de Baabole sowuli tonɔ neŋ toma a gaŋ teŋ na boɔrɔ ka te pɛle te yideme poɔ bee a tu te sããkoŋ-yeltuurii mine?
10 Saŋa kaŋa ka teneeŋ boɔrɔ ka te pɛle Jehoova poɔ aseŋ ka te e yɛlɛ mine naŋ na vɛŋ ka te nɔŋneba mine poɔ sãã. Aŋa mannoo poɔŋ, bidɔgreba mine naŋ taa teɛreŋ soŋ ko ba bipɔge na baŋ ferooŋ ka o kuli dɔɔ naŋ taa libie yaga bee a na baŋ de libie yaga yɔɔ o kyegre, aneazaa ka a dɔɔ ba e neɛ naŋ de o neŋ Jehoova niiloŋ nimizeɛ. Yelmeŋɛ la ka ba boɔrɔŋ ka ba bipɔge na nyɛ dɔɔ naŋ na koroo bonzaa yɛlɛ naŋ feroo eŋgannoŋ poɔŋ, kyɛ aseŋ ka o leɛ soore o meŋɛ ka: ka lɛ a dɔɔ ŋa na baŋ soŋ maŋ ka N neŋ Jehoova niiloŋ e kpeɛŋaa bee? Bo teɛroŋ ka Jehoova taa kyaare a yɛlɛ ŋa? A noɔre iribo be la Matio 6:33. Be eŋnɛɛ Kristabiiri faŋa ka ba “moɔ̃ nimiri a daŋ bɔ a Naaŋmen Naaloŋ.” Aneazaa ka te maŋ eŋnɛɛ te dɔgreba a kyɛ wulo gyeremɛ korɔ noba naŋ be zie na te naŋ kpeɛrɛ na, kyɛ yɛlɛ naŋ e nimizeɛ ko te a gaŋ yelzaa la ka te vɛŋ ka Jehoova poɔ pɛle.
TEƐRE A YƐLƐ GAA TƆƆRE
11. Bo yɛlɛ la ka Filipae 1:9, 10 yel a yɛlɛ aŋ na baŋ soŋ bo ka ho maŋ teɛre yɛlɛ gaa tɔɔre sɛre kyɛ derɛ gbɛre?
11 Ka hooŋ wa bɔ Baabole sowuli naŋ na baŋ soŋ bo ka ho de gbɛ-soŋ, aseŋ ka ho teɛre a yɛlɛ gaa tɔɔre. (Kanne Filipae 1:9, 10.) Ka hooŋ mãã ho meŋɛ kyɛ teɛre a yɛlɛ gaa tɔɔre, a na soŋ boŋ ka ho nyɛ yɛlɛ naŋ na baŋ yi ho gbɛ-deree na poɔŋ wa. Saŋa kaŋa a maŋ eɛ mɔlɔ lɛ ka te de gbɛɛ mine. Kyɛ wagre zaa naaneŋ ka gbɛ-de maŋ e mɔlɔ lɛ. Kyɛ ka hooŋ maŋ teɛre a yɛlɛ gaa tɔɔre, a na soŋ boŋ ka ho maŋ de gbɛɛ yɛŋ poɔŋ haali ka a gbɛre na hoŋ derɛ na yɛlɛŋ e kpeɛŋaa.
12-13. Ka hooŋ maŋ teɛre yɛlɛ gaa tɔɔre sɛre kyɛ derɛ gbɛre, sobuo aŋ na baŋ soŋ bo ka ho de gbɛre naŋ soma?
12 Hooŋ teɛre a yɛlɛ ŋa nyɛ. Te de ka ho boɔrɛɛ toma ka ho toɔ̃ nyɛrɛ libie a kaara ho yideme. Hoŋ nyɛ toŋ-paraayi, a peɛre yelzaa naŋ bebe kyaare a toma, wagre na hoŋ na maŋ de toŋ neŋ a toma, ane yɛlɛ yaga. A toma ayi kaŋa zaa ba sãã Jehoova bege. Kyɛ ho boɔrɛɛ a toma kaŋa yaga, bonso ho nɔŋɛɛ ana toma na bee aminekaŋaŋ a saŋyɔɔ somaŋ. Kyɛ yɛlɛ mine meŋ lɛ bebeŋ aŋ seŋ ka ho teɛre a yɛlɛ gaa tɔɔre sɛre kyɛ derɛ gbɛre.
13 Azuŋ soore ho meŋɛ a soorebie ŋa, ka lɛ a toma kaŋa bebeŋ a na deɛ wagre na hoŋ maŋ de gɛrɛ a lammore ane a naaŋ moɔloo na bee? Ka lɛ a toma kaŋa bebeŋ a na vɛŋ ka ho koŋ lɛ nyɛrɛ wagre ka ho kaara ho yideme zieŋ ka ba nyɛ gomeŋɛ, a kyɛ sonnɔ ba ka ba puoro Jehoova bee? Ka hooŋ soore ho meŋɛ a soorebie ŋa taa, a na soŋ boŋ ka ho kaa-iri toma naŋ na soŋ bo ka ho naŋ toɔ̃ puoro Jehoova kyɛ kaara ho yideme meŋ yelfɛree zieŋ a gaŋ hoŋ na boɔrɔ libie yaga, ka hooŋ e lɛ, a wuleeŋ ka ho kaa iree “yeli naŋ soma.” Ka hooŋ de a lɛ gbɛre ŋa, Jehoova meŋ na ko boŋ maaloo.
14. Ka teneeŋ maŋ teɛre yɛlɛ gaa tɔɔre, a kyɛ wulo nɔmmo meŋ, sobuoŋ aŋ na baŋ soŋ te ka te ta erɛ yɛlɛ naŋ na baŋ vɛŋ ka te taaba ŋmɛ gbɛɛ?
14 Ka teneeŋ maŋ teɛre yɛlɛ gaa tɔɔre sɛre kyɛ derɛ gbɛre, a na baŋ lɛ soŋ teŋ ka te ta erɛ yɛlɛ naŋ na vɛŋ ka “noba ŋmeɛrɛ gbɛɛ.” (Fil. 1:10) A yɛlɛ ŋa maŋ maaleŋ eɛ nimizeɛ yaga zaa ka teneeŋ wa derɛ gbɛɛ naŋ kyaare te bonsuurii ane te meŋɛ maaloo. Aŋa mannoo poɔŋ, aminekaŋaŋ te na nɔŋɛɛ bonsuurii mine yɛlɛ yaga zaa. Kyɛ ka ana bonsuurii naŋ na vɛŋ ka noba naŋ be a lantaapuoruu poɔŋ bee noba naŋ ba puoro Jehoova na poɔ sãã, wala teŋ na e? Ka teneeŋ teɛre a yɛlɛ gaa tɔɔre, a na soŋ teŋ ka te teɛrɛ ba yɛlɛ te gbɛ-de poɔŋ. Nɔmmo na soŋ teŋ ka te boɔrɔ “[te] tɔsoba” maaloo a kyɛ baŋ te e ta zie. (1 Kor. 10:23, 24, 32; 1 Tim. 2:9, 10) Lɛ pãã na soŋ teŋ ka te maŋ de gbɛɛ naŋ wulo nɔmmo ane gyeremɛ korɔ te taaba.
15. Bo yɛlɛ aŋ seŋ ka ho teɛre a yɛlɛ sɛre kyɛ derɛ gbɛre naŋ e nimizeɛ?
15 Ka hooŋ boɔrɔ ka ho de gbɛre kaŋa naŋ e nimizeɛ yaga zaa, teɛre a yɛlɛ gaa tɔɔre a nyɛ yɛlɛ naŋ seŋ ka ho e sɛre kyɛ de a gbɛre. Yezu wuli teŋ ka ka neɛŋ boɔrɔ ka o mɛ die, aseŋ ka o “peɛre a yiri meɛbo zaa sane a nyɛ.” (Luk. 14:28) Azuŋ ka hooŋ wa boɔrɔ ka ho de gbɛ-nimizeɛ kaŋa, maŋ peɛre a wagre, libie ane faŋa a naŋ seŋ ka ho taa sɛre kyɛ na baŋ e a yɛlɛ. Saŋa kaŋa gba, a na seŋ ka ho soore ho booree deme mine a nyɛ yɛlɛ ba kaŋa zaa naŋ na baŋ e a de soŋ yɛlɛ na ho naŋ derɛ gbɛre ka ho e na. Ananso la wala aŋ e nimizeɛ ka ho e a yɛlɛ ŋa zaa? A na soŋ boŋ ka ho nyɛ ka aseŋ ka ho e leɛroo mine ho gbɛ-de na poɔŋ bee a leɛre yɛlɛ na hoŋ da boɔrɔ ka ho e na. Ka hooŋ manne a yɛlɛ ko ho booree deme, a na vɛŋeŋ ka ba meŋ e siri ka ba soŋ bo ka yɛ e yɛlɛ na ho naŋ de gbɛre ka ho e na.—Yeng. 15:22.
DE GBƐRE NAŊ SOMA
16. Bo yɛlɛ mine la na baŋ soŋ bo ka ho de gbɛre naŋ soma? (Kaa a daga ŋa meŋ, “ Lɛ Hoŋ Na Baŋ E De Gbɛɛ Naŋ Na Vɛŋ Ka Jehoova Poɔ Pɛle.”)
16 Ka hooŋ e a yɛlɛ ŋa zaa te naŋ yel a yɛlɛ na, a na soŋ boŋ ka ho de gbɛre yɛŋ poɔŋ. Maŋ peɛre baŋ yelzaa naŋ bebe a kyaare a yɛlɛ, a peɛre bɔ Baabole sowuli meŋ naŋ na soŋ bo ka ho de gbɛre naŋ pɛlɛ Jehoova poɔ. Ka hooŋ pãã wa de a gbɛre baare, puore sɔre Jehoova ka o soŋ bo ka gbɛre na ho naŋ derɛ na yɛlɛ kyɛŋ soŋ.
17. Boŋ meŋɛmeŋɛ la na baŋ soŋ bo ka ho de gbɛɛ naŋ soma?
17 Ka hooŋ daŋ de gbɛ-sonne saŋa kaŋa naŋ pare, teɛre baŋ ka ka hooŋ dɛle ho meŋɛ bammo ho koŋ baŋ de gbɛ-sonne, kyɛ ka hooŋ maŋ de yɛŋ naŋ yi Jehoova zie tonɔ neŋ toma, anaŋ na soŋ bo ka ho maŋ de gbɛɛ naŋ soma. Ona yoŋ la na baŋ soŋ bo ka ho nyɛ bammo meŋɛmeŋɛ, nimiyuo, a kyɛ maŋ teɛrɛ yɛlɛ gɛrɛ tɔɔre, a yɛlɛ ata ŋa la na soŋ bo ka ho taa yɛŋ meŋɛmeŋɛ. (Yeng. 2:1-5) Jehoova na baŋ soŋ boŋ ka ho de gbɛɛ naŋ na pɛlɛ o poɔ.—Yiem. 23:2, 3.
YIELOŊ 28 Gaining Jehovah’s Friendship
