ZANNOO YƐLƐ 5
YIELOŊ 108 God’s Loyal Love
Maaloo Te Naŋ Maŋ Nyɛ Jehoova Naŋ Nɔŋ Te Zuŋ
“Krista Yezu da wa la a teŋɛzu ka o faa yelbe-erebɛ.”—1 TIM. 1:15.
YƐLƐ TE NAŊ NA ZANNE
Te na zanne nyɛɛ tɔnɔ te naŋ maŋ nyɛ yi a yɔɔdeɛbo eŋɛŋ ane lɛ teŋ na baŋ e a wuli nimipa ko Jehoova.
1. Bo yɛlɛ teŋ na baŋ e ka Jehoova poɔ pɛle?
TE DE ka ho ko la neɛ kaŋa ho naŋ nɔŋ kyɔɔtaa naŋ veɛlɛ yaga zaa a kyɛ na soŋ a soba meŋ yaga zaa o zemmo poɔŋ. Ho poɔ na sããŋeŋ yaga zaa ka o naŋ de a kyɔɔtaa te eŋ daga kaŋa poɔŋ a pɔge biŋ a daŋ ba lɛ teɛre o yɛlɛ zaa! Kyɛ ho poɔ na pɛleŋ yaga zaa ka o sobaŋ de a kyɔɔtaa tonɔ neŋ toma soŋ, a kyɛ puore bo bareka ane ho naŋ koo a kyɔɔtaa. Sobuo ka a yelmannaa ŋa kyaare a yɔɔdeɛbo sareka na Jehoova naŋ ko te na? Jehoova ko teŋ o Bidɔɔ ka o wa kpi ko te. Azuŋ Jehoova poɔ na pɛleŋ yaga zaa ka teneeŋ wuli nimipa koo ane a kyɔɔta-tegroŋ ŋa o naŋ ko te na, ane nɔmmo na o naŋ wuli te a ko te a yɔɔdeɛbo!—Gyn. 3:16; Uro. 5:7, 8.
2. Boŋ teŋ na zanne a zannoo ŋa poɔŋ?
2 Kyɛ wagre naŋ gɛrɛ poɔŋ na, ka teneeŋ ba kaa soŋ te koŋ lɛ taa nimipa yaga a ko a yɔɔdeɛbo sareka na. Ka teneeŋ ba lɛ taa nimipa a ko a yɔɔdeɛbo sareka na, a na waa ŋa teŋ de Naaŋmen kyɔɔtaa na eŋ daga kaŋa poɔŋ a pɔge biŋ a ba lɛ nyɛroo bee a teɛrɛ o yɛlɛ. Ka teneeŋ ba boɔrɔ ka lɛ pɔge te yɛŋ, aseŋ ka te maŋ teɛrɛ a yɔɔdeɛbo yɛlɛ wagre zaa. A zannoo ŋa na soŋ teŋ ka te nyɛ lɛ teŋ na baŋ e lɛ. Te na zanne nyɛɛ lɛ teŋ na baŋ nyɛ tɔnɔ yi a yɔɔdeɛbo eŋɛŋ pampana ane lɛ teŋ na baŋ nyɛ tɔnɔ yi a yɔɔdeɛbo eŋɛŋ nendaarekaŋa. Te na lɛ zanne nyɛɛ lɛ teŋ na baŋ wuli nimipa ko Jehoova ane nɔmmo na o naŋ wuli ko te na, agaŋaazaa a Yezu Kũũ Leɛteɛroo saŋa.
TƆNƆ TE NAŊ MAŊ NYƐ PAMPANA
3. Bo tɔnɔ teŋ nyɛrɛ yire a yɔɔdeɛbo eŋɛŋ pampana?
3 Te nyɛrɛɛ tɔnɔ yire Krista yɔɔdeɛbo sareka na eŋɛŋ pampana. Aŋa mannoo poɔŋ, a yɔɔdeɛbo zuŋ Jehoova maŋ di la te yelbebe suuri ko te. A ba e ferebo ka o di te yelbebe suuri ko te. Kyɛ o boɔrɔŋ ka o di te yelbebe suuri ko te. A yieloŋ yiele da yielee yiele a puore Jehoova bareka. O da yieleeŋ ka: ‘Bonso hooŋ Daana yɛlɛ somaŋ, a maŋ e siri ka ho vɛŋ ko.’—Yiem. 86:5; 103:3, 10-13.
4. Nembuo ka Jehoova de a yɔɔdeɛbo ko? (Luka 5:32; 1 Timoti 1:15)
4 Te mine na baŋ teɛrɛŋ ka te ba seŋ neŋ ka te nyɛ yelbebe sudi yi Jehoova zie. Yelmeŋɛ la, te kaŋa la kaŋa zaa ba seŋ neŋ ka te nyɛ yelbebe sudi yi Jehoova zie. A bitontona Pɔɔl da yeleeŋ a kyaare o meŋɛ ka o “da ba seŋ ka ba [boɔloo bitontona].” O da lɛ yeleeŋ ka: “Kyɛ a Naaŋmen garaaseɛ bee nembaalonzoe zuŋ la ka N waa a lɛ N naŋ waa.” (1 Kor. 15:9, 10) Ka teneeŋ wa e kaŋdabaŋkalɛ te yelfaare zuŋ, Jehoova maŋ di la te yelbebe suuri ko te. A ba wuli ka te naŋ seŋ neŋ lɛ zuŋ la, kyɛ o naŋ nɔŋ te zuŋ oŋ maŋ di te yelbebe suuri ko te. Ka hooŋ wa teɛrɛ ka ho ba seŋ neŋ ka Naaŋmen di suuri ko bo ka lɛ vɛŋ ka ho poɔ sãã, teɛre baŋ ka Naaŋmen ba de a yɔɔdeɛbo ko nensaaleba naŋ pɛgeyi, kyɛ o de oŋ ko nensaaleba naŋ ba pɛgeyi ka ba yelfaare yɛlɛ maŋ beɛrɛ ba baŋ boɔrɔ ka ba leɛre ba eebo.—Kanne Luka 5:32; 1 Timoti 1:15.
5. Ferebo la ka Jehoova di te yelbebe suuri ko te bee? Wuli a muni.
5 Te kaŋa zaa daŋ ta wa teɛrɛ ka te naŋ puore Jehoova yuomo yaga na zuŋ ferebo la ka o di suuri ko te. Yelmeŋɛ la, Jehoova teɛrɛɛ yelmennoŋ na zaa te naŋ di koo a yuomo ŋa zaa poɔŋ na. (Hib. 6:10) O ko teŋ a yɔɔdeɛbo kyɔɔtaa na zaala lɛ, a ba e saŋyɔɔ o naŋ de ko te yelsonne te naŋ erɛ na zuŋ. A ba seŋ ka te teɛrɛ ka te naŋ e yelsonne yaga ko Jehoova na zuŋ te seŋnɛɛ o yelbebe sudi, bonso ka teneeŋ teɛrɛ lɛ, a na waa ŋa te naŋ boɔrɔ ka te wuli ka a da ba e ferebo ka Yezu kpi ko te.—De manne Galesiya 2:21.
6. Ananso la wala ka Pɔɔl da tonɔ tonkpeɛne yaga zaa korɔ Jehoova?
6 Pɔɔl da baŋɛɛŋ ka ka o naŋ toŋ toma seŋ wala ko Jehoova, kyɛ lɛ koŋ baŋ vɛŋ ka o e neɛ naŋ seŋ neŋ ka Jehoova di suuri koo. Kyɛ ananso la wala oŋ da tonɔ tonkpeɛne yaga zaa korɔ Jehoova? O da tonɛɛ a lɛ toma na zaa korɔ Jehoova ka o wuli nimipa koo ane nimimaaroŋ na zaa o naŋ wuluu na. (Efe. 3:7) Aŋa Pɔɔl, te meŋ maŋ de la eŋnyagroŋ a tonɔ Jehoova toma, ka te wuli nimipa yaga zaa koo ane nimimaaroŋ na zaa o naŋ wuli ko te na.
7. Sori na kaŋa te naŋ nyɛrɛ tɔnɔ yire a yɔɔdeɛbo eŋɛŋ la bo? (Urom 5:1; Gyimisi 2:23)
7 Sori na kaŋa teŋ maŋ lɛ nyɛ tɔnɔ yi a yɔɔdeɛbo eŋɛŋ la ka te neŋ Jehoova na baŋ nyɔgɛɛ zɔmennoŋ naŋ e kpeɛŋaa yaga zaa. a Aŋa lɛ teŋ zanne a zannoo naŋ pare poɔŋ na, saŋa na baŋ da dɔge te na, te neŋ Jehoova da ba taa niiloŋ zaa. A yɔɔdeɛbo zuŋ te taa la “emmaaroŋ ne Naaŋmen” a na toɔ̃ tage peɛloo.—Kanne Urom 5:1; Gyimisi 2:23.
8. Ananso la wala aŋ seŋ ka te niŋe pa yaga zaa ane apoɔsori te naŋ taa ka te maŋ puore sɔre Jehoova na?
8 Puoro te naŋ maŋ puore sɔre Jehoova na eɛ apoɔsori naŋ e tegroŋ yaga zaa te naŋ maŋ nyɛ te neŋ Jehoova naŋ e zɔmenne na zuŋ. Ka teneeŋ wa lantaa a puore sɔre Jehoova, o maŋ kyɛlle woŋee te puoro. Ka te kaŋa la kaŋa zaaŋ meŋ wa puoro o yoŋ tɛgɛ, o maŋ kyɛlle woŋee a puoro. Puoro na baŋ vɛŋeŋ ka te e bɔin a taa sukyirimaaroŋ. A na baŋ vɛŋeŋ ka te neŋ Jehoova taa niiloŋ naŋ e kpeɛŋaa yaga zaa. (Yiem. 65:2; Gyi. 4:8; 1 Gyn. 5:14) Saŋa na Yezu naŋ da be a donɛɛ zuŋ kyɛ na, o da maŋ puoreŋ gbɛɛ yaga, bonso o da baŋɛɛŋ ka Jehoova kyɛllɛ wonee o puoro, a baŋ meŋ ka puoro na vɛŋeŋ ka o neŋ o Saa niiloŋ e kpeɛŋaa yaga zaa. (Luk. 5:16) Te puoree Jehoova bareka yaga zaa, bonso Yezu yɔɔdeɛbo sareka na zuŋ te neŋ Jehoova na baŋ nyɔgɛɛ zɔmennoŋ naŋ e kpeɛŋaa yaga zaa, kyɛ teŋ naŋ taa apoɔsori ka te maŋ puore sɔroo!
TƆNƆ TE NAŊ NA NYƐ NENDAAREKAŊA A YI A YƆƆDEƐBO EŊƐŊ
9. Sobuo ka a yɔɔdeɛbo na yi tɔnɔ ko Jehoova yelmeŋɛ puorebiiri nendaarekaŋa?
9 Sobuo ka Jehoova yelmeŋɛ puorebiiri na nyɛ tɔnɔ yi a yɔɔdeɛbo eŋɛŋ nendaarekaŋa? Jehoova na ko baŋ nyɔvore naŋ ba taa baaraa. Noba yaga teɛrɛŋ ka lɛ koŋ baŋ nyɛ eebo bonso noba yaga kpieŋ yuomo turi yaga naŋ pare. Kyɛ Jehoova poboɔbo meŋɛmeŋɛ da la ka nensaaleba taa nyɔvore naŋ ba taa baaraa. Ka Adamaŋ da ba zagre Naaŋmen noɔre, nensaalaa zaa da koŋ teɛrɛ ka te koŋ baŋ nyɛ nyɔvore naŋ ba taa baaraa. Bonso te da naaŋ taa la nyɔvore naŋ ba taa baaraa. Ka anaŋ e kpeɛŋaa ko te ka te sagedi pampana ka te na baŋ nyɛɛ nyɔvore naŋ ba taa baaraa, kyɛ aseŋ ka te mɔɔ kyɛ sagedi, bonso Jehoova vɛŋɛɛŋ ka o Bidɔɔ nɔŋnaa wa kpi a ko te a yɔɔdeɛbo, a yuo a nyɔvore naŋ ba taa baaraa sori ko te.—Uro. 8:32.
10. Boŋ ka noba na ba naŋ sɔ ba naaloŋ kãã ane a pikyɛlɛɛ na kaara soriŋ?
10 Aneazaa ka te na nyɛɛ nyɔvore naŋ ba taa baaraa nendaarekaŋa, kyɛ Jehoova boɔrɔŋ ka te maŋ teɛrɛ o yɛlɛ pampana. Noba na ba naŋ sɔ naaloŋ kãã na kaarɛɛ soriŋ ka ba te poɔ Krista eŋɛŋ a di naaloŋ a kaara a donɛɛ zu. (Yel. 20:6) A pikyɛlɛɛ na meŋ kaarɛɛ soriŋ ka ba zeŋ paradiisi poɔŋ a donɛɛ zuŋ kyɛ, a lɛ saŋa na dɔgɛɛ, woore, ane posãã yɛlɛ zaa koŋ lɛ bebe. (Yel. 21:3, 4) Ho poɔ la a pikyɛlɛɛ poɔŋ a kaara soriŋ ka ho nyɛ nyɔvore naŋ ba taa baaraa a donɛɛ zuŋ kyɛ bee? A kyɔɔtaa ŋa eɛ tegroŋ yaga zaa! Jehoova da maale teŋ ka te zeŋ a donɛɛ ŋa zuŋ tegitegilɛ, azuŋ ka teneeŋ wa nyɛ nyɔvore naŋ ba taa baaraa a donɛɛ ŋa zuŋ, te na taa la popeɛloŋ meŋɛmeŋɛ.
11-12. Bo maaloo mine la teŋ kaara soriŋ ka te na nyɛŋ a Paradiisi poɔŋ? (Kaa a fotori meŋ.)
11 Hooŋ teɛre nyɛ lɛ zemmo naŋ na waa Paradiisi poɔŋ. Ho koŋ lɛ zoro baaloŋ bee kũũ dabeɛ̃. (Aiz. 25:8; 33:24) Jehoova na ko boŋ yelsonne zaa ho sukyiri naŋ boɔrɔ. Bo yɛlɛ hoŋ na boɔrɔ ka ho zanne a yɛlɛ a lɛ saŋa? Ho na boɔrɔŋ ka ho zanne dunni yɛlɛ bee? Bee ho na boɔrɔŋ ka ho zanne yiele bon-ŋmeɛraa kaŋa ŋmeɛbo? Bee ho na boɔrɔŋ ka ho zanne lɛ hoŋ na baŋ e drɔɔ boma? Ka teneeŋ wa gaa paradiisi, a na fɛreŋ ka te nyɛ noba naŋ na baŋ drɔɔ deri ane noba naŋ baŋ meɛbo toma. Te na boɔrɛɛ noba meŋ naŋ na baŋ kɔ bondirii, noba naŋ na baŋ maale bondirii, ane noba naŋ na baŋ maale gaadin a kaara a zu. (Aiz. 35:1; 65:21) Ka teneeŋ wa nyɛ nyɔvore naŋ ba taa baaraa, te na nyɛɛ wagre a e a yɛlɛ ŋa zaa ane yɛlɛ yaga.
12 Nyɛ lɛ teŋ na taa popeɛloŋ yaga zaa seŋ ka teneeŋ wa korɔ te nɔŋneba naŋ ire yire kũũni poɔ waayaane! (Tom. 24:15) Nyɛ lɛ hoŋ na taa popeɛloŋ yaga zaa saŋa na hoŋ na zanna Jehoova bonmaalee yaga zaa yɛlɛ. (Yiem. 104:24; Aiz. 11:9) Kyɛ a noɔ̃ zie la ka, ho daŋ koŋ lɛ e yelfaa zaa, azuŋ ho na puoree Jehoova neŋ zoma naŋ e forifori, hoŋ koŋ lɛ sɔrɔ ho yelbebe sudi meŋ! Ka lɛ ho na erɛɛ yelzaa ho naŋ boɔrɔ pampana ŋa kyɛ kɔŋ a Paradiisi zemmo ŋa naŋ na noma yaga zaa na bee? (Hib. 11:25) Ai, ho koŋ sage e lɛ! Maaloo na zaa teŋ na nyɛ Paradiisi poɔŋ na gaŋ la bonzaa teŋ na baŋ nyɛ pampana a donɛɛ ŋa poɔŋ. Teɛre baŋ ka te koŋ kyɛnlɛ a Paradiisi lɛɛŋ a gɛrɛ tegitegilɛ. O na waŋ meŋɛmeŋɛ ka te kpeɛrɛ be tegitegilɛ. Kyɛ nɔmmo Jehoova naŋ taa ko te a ko te a yɔɔdeɛbo zuŋ, a yɛlɛ ŋa zaa na nyɛɛ eebo!
Bo maaloo mine la hoŋ kaara soriŋ ka ho nyɛ Paradiisi poɔŋ? (Kanne o wɛlbo 11-12)
WULI KA HO NIŊE PAƐ̃ NEŊ NƆMMO NA JEHOOVA NAŊ WULI KO BO NA
13. Wala teŋ na baŋ e a wuli ka te niŋe paɛ̃ yaga zaa neŋ nɔmmo na Jehoova naŋ wuli ko te na? (2 Korinti 6:1)
13 Wala teŋ na baŋ e a wuli nimipa ko Jehoova o naŋ ko te a yɔɔdeɛbo kyɔɔtaa na zuŋ? Aseŋ ka te vɛŋ ka o puoruu yɛlɛ e nimizeɛ te zemmo poɔŋ a gaŋ yelzaa. (Mat. 6:33) Bonso Yezu da kpieŋ “ka ka a banaŋ naŋ voorɔ koŋ la voorɔ ba menne eŋɛ, kyɛ ba na voorɔ la korɔ a soba na naŋ da kpi kyɛ leɛ-iri a kũũni poɔ.” (2 Kor. 5:15) Jehoova wulee nimimaaroŋ ko te yaga zaa a di te yelbebe suuri meŋ ko te. Ka teneeŋ mɔɔrɔ te moɔbo zaa a puoruu, te na wuliŋ ka te de la yɛlɛ na o naŋ e ko te na tegroŋ yaga zaa, ka te niŋe meŋ pa neŋ yɛlɛ na zaa o naŋ e ko te na.—Kanne 2 Korinti 6:1.
14. Wala teŋ na baŋ e a wuli ka te sagɛɛ Jehoova sowuli di?
14 Te meŋ na baŋ wuliŋ ka te nɔŋɛɛ Jehoova ka teneeŋ sagoo di a kyɛ tuuro o sowuli zaa. Sobuo teŋ na baŋ tu a e lɛ? Aŋa mannoo poɔŋ, ka teneeŋ wa boɔrɔ ka te de gbɛre a kyaare lɛ te naŋ boɔrɔ ka te gaa sakuu ta, ane toma te naŋ boɔrɔ ka te tonɔ, te maŋ peɛre nyɛ yɛlɛ Jehoova naŋ boɔrɔ ka te e. (1 Kor. 10:31; 2 Kor. 5:7) Ka teneeŋ wa de te sagediibu na tonɔ neŋ toma a sori ŋa poɔŋ, te na nyɛɛ yelsonne yaga—te sagediibu maŋ maaleŋ eɛ kpeɛŋaa, kyɛ ka te ne Jehoova zɔmennoŋ meŋ e kpeɛŋaa yaga zaa. Lɛ meŋ maŋ vɛŋeŋ ka te teɛretɔ na maaleŋ e kpeɛŋaa.—Uro. 5:3-5; Gyi. 2:21, 22.
15. Wala teŋ na baŋ e a wuli ka te taa la nimipa yaga zaa a ko Jehoova a Yezu Kũũ Leɛteɛroo saŋa?
15 Kyɛ sori kaŋa meŋ la bebeŋ teŋ na baŋ wuli Jehoova ka te niŋe paɛ̃ neŋ nɔmmo na zaa o naŋ wuli te na. Teŋ na mɔɔrɔ te moɔbo zaa teŋ na toɔ̃ a Yezu Kũũ Leɛteɛroo saŋa na. Saŋa na te naŋ nara te menne korɔ a Leɛteɛroo na, te na baŋ toŋboɔlɛɛ noba ka ba wa. (1 Tim. 2:4) Manne yɛlɛ naŋ na e a lammozieŋ ko noba na ho naŋ tonɔ boɔlɔ na. Ka hooŋ boɔrɔ ho na baŋ wulee o soba a vidiori ŋa naŋ be jw.org zuŋ na, Bonso Ka Yezu Kpi? Ane Teɛre Yezu Kũũ Na. A lantaapuoruu nembɛrɛ seŋ ka ba mɔɔ kyɛ toŋboɔle noba naŋ bare a Lammozie waabo. Nyɛ lɛ Jehoova, Yezu ane a malekere zaa poɔ naŋ na pɛle seŋ ka Jehoova pere na kaŋa naŋ bɔre naŋ leɛ wa poɔ o peere poɔŋ! (Luk. 15:4-7) A Leɛteɛroo lammozieŋ, te ta maŋ puoro te yɔɔmine yoŋ, kyɛ te maŋ mɔɔ kyɛ puore a nempaalba ane noba naŋ daŋ ba lɛ wa te lammore zaa na. Te boɔrɔŋ ka te vɛŋ ka ba nyɛ ka te taa la ba yɛlɛŋ!—Uro. 12:13.
16. Ananso la wala aŋ seŋ ka te mɔɔ kyɛ de te menne eŋ a naaŋ moɔloo toma poɔŋ yaga a Yezu Kũũ Leɛteɛroo saŋa?
16 Ho na baŋ toŋɛɛ toma yaga ko Jehoova a Yezu Kũũ Leɛteɛroo saŋa bee? Ka hooŋ e lɛ a na wuliŋ ka ho taa la nimipa yaga zaa ko nɔmmo na zaa Jehoova ane Yezu naŋ wuli ko bo na. Ka teneeŋ wa de te menne eŋ a naaŋ moɔloo toma poɔŋ yaga zaa, te na nyɛŋ ka Jehoova sonnɔ teŋ, lɛ meŋ na vɛŋeŋ ka te maaleŋ sage o di yaga zaa. (1 Kor. 3:9) Ka hooŋ kaa A Bebiri Zaa Baabole Zannoo bee te zemmo ane te naaŋ moɔloo toma gane poɔŋ, ho na nyɛɛ daga kaŋa naŋ wulo a Yezu Kũũ Leɛteɛroo Baabole kannoo na, mɔɔ kyɛ tuuro yɛlɛ naŋ bebe na a maŋ kannaa bebiri zaa a Leɛteɛroo saŋa. Ho gba na baŋ de la a lɛ Baabole kannoo na e ho meŋɛ boma zannoo.
17. Bo yɛlɛŋ maŋ pɛlɛ Jehoova poɔ? (Kaa a daga ŋa, “ Yɛlɛ Te Naŋ Na Baŋ E A De Wuli Ka Te Niŋe Paɛ̃ Nɔmmo Na Jehoova Naŋ Wuli Ko Te Na.”)
17 Kyɛ aminekaŋaŋ ho zemmo yɛlɛ koŋ ko bo sori ka ho e a yɛlɛ ŋa zaa te naŋ yel a yɛlɛ a zannoo ŋa poɔŋ na. Baŋ ka Jehoova ba derɛ yɛlɛ ho naŋ toɔnɔ erɛ na manna neŋ yɛlɛ ho taaba naŋ erɛ; bonso o baŋɛɛ ho sukyiri, a baŋ lɛ ho naŋ nɔmoo seŋ. O poɔ maŋ pɛleŋ yaga zaa ka onaŋ wa nyɛ lɛ ho naŋ taa nimipa yaga zaa ho sukyiriŋ a ko a yɔɔdeɛbo kyɔɔtaa na.—1 Saa. 16:7; Mak. 12:41-44.
18. Ananso la wala teŋ taa nimipa yaga zaa ko Jehoova Naaŋmen ane Yezu Krista?
18 A yɔɔdeɛbo yoŋ eŋɛŋ teŋ na baŋ tu a kyɛ nyɛ te yelbebe sudi, ka te neŋ Jehoova toɔ̃ nyɔge zɔmennoŋ, a kyɛ taa teɛretɔ ka te na nyɛɛ nyɔvore naŋ ba taa baaraa. Te maŋ wulo nimipa wagre zaa a korɔ Jehoova ane lɛ o naŋ nɔŋ te, ka lɛ vɛŋ oŋ ko te a lɛ maaloo ŋa zaa na. (1 Gyn. 4:19) Te maŋ wulo nimipa korɔ Yezu meŋ wagre zaa o naŋ nɔŋ te a wa kpi a de o nyɔvore iri sareka ko te na!—Gyn. 15:13.
YIELOŊ 154 Unfailing Love
a Jehoova gba di la suuri ko o puorebiiri naŋ da puoruu a kyɛ kpi sɛre kyɛ ka Krista wa yɔɔ a yɔɔdeɛbo na. Jehoova da eɛ lɛ bonso o da taa la sagediibu ka o Bidɔɔ na na di la yelmennoŋ a te ta o kũũ saŋa. Azuŋ Jehoova yɛŋ nimitɔɔreŋ a da waa ŋa oŋ yɔɔ a yɔɔdeɛbo sareka baare sɛre kyɛ oŋ waana a donɛɛ zu kyɛ.—Uro. 3:25.
