1. Bo yɛlɛ ka noba yaga maŋ erɛ zenɛ ŋa?

 ZENƐ ŋa, noba yaga maŋ teɛrɛɛ ba menne yɛlɛ yaga zaa a gaŋ ba taaba. Aŋa mannoo poɔŋ, noba maŋ tu la social media zuŋ a wulo ba menne ka noba na nyɛ boma ba naŋ taa bee yɛlɛ ba naŋ toɔnɔ erɛ. Kyɛ noba fẽẽ lɛ yoŋ maŋ boɔrɔ ka ba de puubu korɔ Naaŋmen. A zannoo ŋa poɔŋ, te na zanne nyɛɛ lɛ a naŋ wuli ka te de puubu korɔ Jehoova, ane ananso a naŋ seŋ ka te erɛ lɛ. Te na lɛ zanne nyɛɛ lɛ teŋ na baŋ de gyeremɛ Jehoova naŋ seŋ neŋ na a koroo, ane lɛ ona meŋɛ naŋ na eŋ o yuori gyeremɛ nendaarekaŋa.

KA BA NAŊ YELKA TE KORƆ JEHOOVA GYEREMƐ, WALA KA LƐ WULI?

2. Sobuoŋ ka Jehoova da wuli lɛ o naŋ taa kpeɛ̃o seŋ Sinai Taŋa na zuŋ? (Kaa a foto meŋ.)

² A Baabole yeleeŋ ka Jehoova Naaŋmen yɛlɛ eɛ nɔmãã yaga zaa. Saŋa na Jehoova naŋ da faa a Izerayɛl biiri yi Igyipiti gbaŋgbaaloŋ poɔŋ na, a da ba kɔɔre kyɛ ka Jehoova wuli ka o eɛ Naaŋmen naŋ taa kpeɛ̃o yaga zaa. Ŋmaa a yɛlɛ ŋa foto ho teɛroŋ poɔŋ a nyɛ: A Izerayɛl biiri turituri yaga da wa are peɛlɛɛ Sainai Taŋa na ka ba kyɛlle woŋ yɛlɛ na Naaŋmen naŋ waana ka o yelko ba na. Zuŋzugri naŋ soɔ yaga zaa da wa pɔgɛɛ a taŋa zaa. Tɔntɔbaalɛ ka nyuure da yire a taŋa zuŋ, ka a teŋɛ zaa da gbigri yaga zaa, ka saa da tanna, kyɛ ka gɔmɔ mine da gɔnɔ aŋa iilii ba naŋ peɛlɛ. (Yiib. 19:​16-18; 24:17; Yiem. 68:8) Saŋa na Jehoova naŋ da e a yɛlɛ ŋa zaa a wuli a Izerayɛl biiri na, nɔkpeɛne zaa kyebe ka ba nɔɛ zaaŋ da mãã ane lɛ o naŋ taa kpeɛ̃o seŋ na.

3. Ka ba naŋ yelka te korɔ Jehoova gyeremɛ, wala ka lɛ wuli?

³ Nensaaleba meŋ na baŋ de la gyeremɛ ko Jehoova. Sori na kaŋa teŋ na baŋ de gyeremɛ ko Jehoova la ka, te maŋ manna yelseɛlɛ na o naŋ e na korɔ noba, ane o gyog-sonne na zaa o naŋ taa na. Te maŋ la de la gyeremɛ korɔ Naaŋmen ka teneeŋ  wa pugruu ane yɛlɛ na zaa o naŋ soŋ te teŋ toɔ̃ e na. (Aiz. 26:12) Naa Deevid da eɛ neɛ na kaŋa naŋ maŋ de gyeremɛ korɔ Jehoova yaga zaa. Puoro na oŋ da puore a Izerayɛl biiri naŋ da wa lantaa nimitɔɔreŋ na, Deevid da yelko la Naaŋmen ka: ‘Oo Jehoova, hooŋ so gaŋdaaloŋ, kpeɛ̃o ane a gyeremɛ, hooŋ so a zɔɔ deɛbo ane a naaloŋ gyeremɛ, bonso hooŋ so bonzaa naŋ be sagbamaŋ ane teganeŋ.’ Saŋa na Deevid naŋ da wa puore baare na, ‘ka a lammo noba zaa da pugi Jehoova.’—1 Tun. 29:​11, 20.

4. Sobuo ka Yezu da maŋ korɔ Jehoova gyeremɛ?

⁴ Saŋa na Yezu naŋ da wa be a donɛɛ ŋa zuŋ na, o da maŋ yelka Jehoova la koo a kpeɛ̃o oŋ de erɛ yelseɛlɛ na zaa o naŋ erɛ na, ka lɛ vɛŋ oŋ de gyeremɛ korɔ o Saa. (Mak. 5:​18-20) Lɛ na Yezu naŋ da maŋ yele o Saa yɛlɛ korɔ noba, ane yɛlɛ na oŋ da maŋ erɛ korɔ o taaba na da maŋ de la gyeremɛ korɔ Jehoova. Bebiri kaŋa, Yezu da wulee noba Naaŋmen yɛlɛ a puoruudie poɔŋ. Pɔge kaŋa sefaare naŋ da be o eŋɛŋ aŋa yuomo 18 da be la a noba poɔŋ. A sefaare da vɛŋɛɛŋ ka a pɔge eŋɛ kɔɔ-guri ziiri ayi, o da koŋ baŋ dɔle. Nɔkpeɛne zaa kyebe ka a pɔge ŋa da diree dɔgɛɛ yaga zaa! Yezu da yi la nimimaaroŋ poɔŋ a yel yɛlɛ ne kɔkɔbaaloŋ a koo. O da yelkooŋ ka: “Pɔge, a ho baaloŋ baarɛɛ la.” A kyɛ da de o nuuri dɔgle o zuŋ, tɔntɔbaalɛ oŋ da iri dɔle, oŋ da “piili [pugiro] Naaŋmen yuori,” ane o naŋ somoo oŋ nyɛ laafeɛ! (Luk. 13:​10-13) A pɔge da taa la ananso o naŋ pugiro Jehoova, te meŋ taa la yɛlɛ na zuŋ aŋ seŋ ka te pugiro Jehoova.

BONSO TEŊ MAŊ PUGIRO JEHOOVA?

5. Bonso teŋ taa gyeremɛ ko Jehoova?

⁵ Te maŋ pugiree Jehoova bonso te taa la gyeremɛ koo yaga zaa. Yɛlɛ yaga zuŋ teŋ taa gyeremɛ ko Jehoova. Jehoova taa la a kpeɛ̃o a na baŋ e yelzaa ka neɛzaa koŋ baŋ piguu sori. (Yiem. 96:​4-7) O bonmaalee wulee lɛ o naŋ taa yɛŋ aseŋ. Ona la ko te nyɔvore ane bonzaa naŋ maŋ soŋ te teŋ taa nyɔvore. (Yel. 4:11) O taa la yelmennoŋ. (Yel. 15:4) Yelzaa o naŋ erɛ maŋ nyɛ la maaloo, o maŋ paalɛɛ o nɔɛ zaa meŋ. (Joos. 23:14) Lɛŋ vɛŋ ka a daŋyele Gyeremaiya da yel a kyaare Jehoova ka: ‘A paalonne yɛmbaŋneba zaa poɔŋ ane a naalonne poɔŋ, neɛ kyebe a waa ŋa hooŋ’! (Jer. 10:​6, 7) Te taa la yɛlɛ yaga zuŋ aŋ seŋ ka te taa gyeremɛ ko te Saa naŋ be sazuŋ na. Kyɛ gyeremɛ yoŋ naane teŋ taa ko Jehoova, te nɔmooŋ meŋ.

6. Bonso teŋ nɔŋ Jehoova?

⁶ Te maŋ korɛɛ Jehoova gyeremɛ bonso te nɔmooŋ yaga zaa. Te nɔŋ la Jehoova bonso o taa la gyog-sonne yaga zaa. O taa la nembazo ane nimibaaloŋ yaga zaa. (Yiem. 103:13; Aiz. 49:15) Ka teneeŋ wa be awonaa poɔŋ a maŋ beɛrɛɛ Jehoova. (Zek. 2:8) O maŋ soŋ teŋ teŋ bamoo a wa e o zɔmenne meŋ. (Yiem. 25:14; Tom. 17:27) O taa la sigrimennoŋ; ‘onaŋ maŋ sigri o meŋɛ ka o baŋ nyɛ boma naŋ be saganeŋ ane teŋganeŋ. O maŋ de la nembaaleba yineŋ tɛneŋ.’ (Yiem. 113:​6, 7) A yɛlɛ ŋa zaa zuŋ teŋ maŋ de gyeremɛ korɔ Jehoova te Naaŋmen naŋ do saa yaga zaa na.—Yiem. 86:12.

7. Bo apoɔsori naŋ e o yoŋ la teŋ taa?

⁷ Te maŋ pugiree Jehoova bonso te boɔrɔŋ ka noba mine meŋ bamoo. Noba yaga ba baŋ a yelmeŋɛ naŋ bebe a kyaare Jehoova. Bonso Setaana ŋma la zirii yaga a kyaare Jehoova, ka noba meŋ sage a lɛ zirii na di. (2 Kor. 4:4) Setaana vɛŋɛɛŋ ka noba sagedi ka Jehoova eɛ suuri Naaŋmen, ka o ba teɛrɛ te yɛlɛ, ka ona meŋ la vɛŋ ka dɔgɛɛ be a donɛɛ zuŋ yaga zaa lɛ. Kyɛ te baŋɛɛ yelmeŋɛ naŋ bebe a kyaare Naaŋmen! Te taa la apoɔsori ka te soŋ noba ka ba baŋ ka o eɛ Naaŋmen yɛlɛ naŋ soma yaga  zaa, a soŋ ba ka ba meŋ de gyeremɛ koroo. (Aiz. 43:10) Yieme 96 yelee gyeremɛ teŋ na de korɔ Jehoova yɛlɛ yaga zaa. Te na zannɛɛ yɛlɛ yi a yieme gane ŋa poɔŋ a nyɛ lɛ teŋ na baŋ e a de gyeremɛ na naŋ seŋ ka te de korɔ Jehoova na a koroo.

WALA TEŊ NA BAŊ E KO JEHOOVA A GYEREMƐ NA O NAŊ SEŊ NEŊ NA?

8. Bo soe mine la teŋ na baŋ tu kyɛ de gyeremɛ ko Jehoova? (Yieme 96:​1-3)

⁸ Kanne Yieme 96:​1-3. Te na baŋ de la te yelyaga a eŋ Jehoova gyeremɛ. A sɛgre ŋa yele korɔ teŋ ka Jehoova noba maŋ ‘yiele korɛɛ Jehoova,’ ka ba ‘pugiro o yuori,’ ka ba ‘yele o faabo duor-noɔ̃,’ a kyɛ ‘yele o gyeremɛ yɛlɛ a paalonne poɔŋ.’ Te na baŋ tu la a soe ŋa zaa poɔŋ a pugi te Saa naŋ be sazuŋ na. Jehoova puorebiiri naŋ da bebe takoreŋ saŋa na eŋɛ da maŋ nyagraŋ ka ba manne Jehoova toŋseɛlɛ ane o gyog-sonne yɛlɛ ko noba. (Daan. 3:​16-18; Tom. 4:29) Wala teŋ meŋ na baŋ toɔ̃ e lɛ?

9-10. Bo hoŋ zanne yi Angelena zemmo yɛlɛ ŋa poɔŋ? (Kaa a foto meŋ.)

⁹ Te nyɛ te yɔɔpɔge Angelena a naŋ be United States paaloŋ zemmo yɛlɛ. O da de la nyaa a yel Jehoova yɛlɛ o tomazieŋ. Angelena da eɛ nempaalaa a tomazieŋ. Ba da eɛ lammo kaŋa a tomazieŋ a ko noba na zaa naŋ e nempaalba a tomazieŋ na, ka ba kaŋa zaa na maŋ yel yɛlɛ fẽẽ a kyaare o meŋɛ a ko o taaba. Angelena da narɛɛ o meŋɛ a maale fotori mine naŋ tutu taa a wuli popeɛloŋ na o naŋ nyɛrɛ o naŋ e Jehoova Sieree Deme kaŋa zuŋ. Kyɛ sɛre oŋ na gaa te yel yɛlɛ a kyaare o meŋɛ a ko o taaba na, o tontoŋtɔ kaŋa da wa yieŋ a yelka ba guoluuŋ aŋa Jehoova Sieree Deme kaŋa. O da piili yelee yelfaare a kyaare Jehoova Sieree Deme ane yɛlɛ ba naŋ sagedi. Angelena yeleeŋ ka: “Dabeɛ̃ zaaŋ da kpɛ ma. Kyɛ N da yelko la N meŋɛ ka: ‘Ka lɛ N na are kaaraŋ ka neɛ kaŋa ŋma zirii a kyaare Jehoova? Bee N naŋ yelee yelkaŋa a vɛŋ ka ba baŋ a yelmeŋɛ naŋ bebe a kyaare Jehoova?’”

¹⁰ Saŋa na a dɔɔ naŋ da wa yel yɛlɛ baare na, Angelena da puoreeŋ ŋmaaŋmaa lɛ o sukyiriŋ. O da de la kɔkɔmaaroŋ a yelka: “N ne bo zemmo yɛlɛ yi la taa. Ba guolee N meŋ aŋa Jehoova Sieree Deme kaŋa, N naŋ eɛ ba kaŋa a wa tɔ zenɛ.” Aneazaa ka a yɛlɛ da eɛ dabeɛ̃ koo; kyɛ o da eɛ bɔin. O da wulee o tontoŋtaaba na fotori naŋ wulo lɛ o neŋ o zɔmenne naŋ taa popeɛloŋ Jehoova puoruu poɔŋ, a kyɛ yi gyeremɛ poɔŋ a manne o sagediibu yɛlɛ.  (1 Pit. 3:15) Boŋ da yi be wa? Saŋa na Angelena naŋ da wa yel yɛlɛ baare na, a dɔɔ meŋ da leɛ eɛ bɔin. O meŋ gba da yelee popeɛloŋ na oŋ da maŋ nyɛ saŋa na oŋ da lanna neŋ Jehoova Sieree Deme o biiloŋ saŋa na. Angelena yeleeŋ ka: “Jehoova eɛ neɛ naŋ seŋ neŋ ka te maŋ yele o yelsonne yɛlɛ, ka noba baŋ yelmeŋɛ naŋ bebe a kyaaroo. A eɛ apoɔsori naŋ e kpoŋ yaga zaa ko te ka te manna Jehoova yɛlɛ korɔ noba.” Te meŋ na baŋ pugee Jehoova yuori ka noba mineŋ wa yele yɛlɛ a sããna o yuori na. A eɛ apoɔsori naŋ e tegroŋ yaga zaa.

11. Sobuo ka yelmeŋɛ puorebiiri de yɛlɛ naŋ be Yieme 96:8 na toŋ neŋ toma takoreŋ saŋa zaa a wa tɔ zenɛ?

¹¹ Kanne Yieme 96:8. Te na baŋ de la te bontaree a eŋnɛ Jehoova gyeremɛ. Jehoova yelmeŋɛ puorebiiri maŋ erɛɛ lɛ wagre zaa. (Yeng. 3:9) Aŋa mannoo poɔŋ, a Izerayɛl biiri da kyeɛrɛɛ ba bontaree lantaa ka ba de soŋ ka ba mɛ a ŋmenpuoredie a kyɛ de maala neŋ a ŋmenpuoredie. (2 Nam. 12:​4, 5; 1 Tun. 29:​3-9) Yezu potuuribo na mine da maŋ de la “ba boma” a sonnɔ Yezu ane o bitontonee na. (Luk. 8:​1-3) A Baabole la yeleeŋ ka saŋa na kɔŋ naŋ da le ka a dɛndɛŋ Kristabiiri na mine dire dɔgɛɛ na, ba Kristabitaaba naŋ da be ziyobo na da kyeɛrɛɛ boma lantaa a de wa ka ba soŋ ba. (Tom. 11:​27-29) Zenɛ ŋa, te meŋ na baŋ de la libie te naŋ maŋ ire na eŋnɛ Jehoova gyeremɛ.

12. Sobuo ka libie na te naŋ maŋ ire na na baŋ de gyeremɛ ko Jehoova? (Kaa a foto meŋ.)

¹² Te nyɛ yɛlɛ mine naŋ wuli ka libie na te naŋ maŋ iri na maŋ de la gyeremɛ korɔ Jehoova. Yuoni 2020 poɔŋ, wari da arɛɛŋ a kɔɔre yaga zaa Zimbabwe paaloŋ. Noba yaga naŋ gaŋ turituri da leeŋ ka ba kpi neŋ kɔŋ, ka te yɔɔpɔge kaŋa yuori naŋ di Prisca meŋ da poɔ be. Aneazaa ka yɛlɛ da eɛ kpeɛŋaa yaga zaa, kyɛ Prisca da maŋ gaa la a naaŋ moɔloo Alariba daare ane Asibiti daare zaa aŋa lɛ oŋ da erɛ saŋa zaa na, saŋa na gba baŋ da koɔrɔ zie a na bore boma na, kyɛ o da naŋ maŋ gaa la a naaŋ moɔloo. O kpeɛreŋ taaba da maŋ erooŋ seɛ a laara o naŋ maŋ bare o weɛ toma kyɛ gɛrɛ a naaŋ moɔloo na, ba da maŋ yeleŋ ka, “Kɔŋ na ko boŋ ka ho baŋ.” Prisca da taa la sagediibu ka Jehoova na kaa la o zieŋ, azuŋ o da maŋ leɛ yelko baŋ ka, “Jehoova daŋ ba zagre o puorebiiri bare zaa.” A da ba kɔɔre kyɛ baŋ da wa koo bondirii ane bontaree mine Bɛɛtil naŋ de wa ka ba soŋ te yɔɔmine na. A laŋnoɔre puoruu maŋ toɔ̃ soŋɛɛ te yɔɔmine aŋa Prisca te libie na te naŋ maŋ ire na zuŋ. Prisca  kpeɛreŋ taaba na nɔɛ zaaŋ da mãã, baŋ yelkoo ka, “Naaŋmen maŋ sonnɔ boŋ, azuŋ te meŋ boɔrɔŋ ka te zanne o yɛlɛ.” O kpeɛreŋ taaba bayɔpoi piili gɛrɛɛ a lantaapuoruu lammore.

13. Sobuo ka te gyog-sonne na baŋ eŋ Jehoova gyeremɛ? (Yieme 96:9)

¹³ Kanne Yieme 96:9. Te na baŋ de la te yel-eree eŋ Jehoova gyeremɛ. A ŋmenpuore wedeɛreba da maŋ pɛgɛɛ ba menne a e forifori sɛre kyɛ tonɔ toma Jehoova puoredieŋ. (Yiib. 40:​30-32) Aseŋ ka te meŋ maŋ e forifori eŋgannoŋ poɔŋ, a kyɛ maŋ tage te menne yi yelzaa Jehoova naŋ kyiire eŋɛŋ. (Yiem. 24:​3, 4; 1 Pit. 1:​15, 16) A Baabole yeleeŋ ka te yage “a nensaal-koraa” na bare a kyɛ pilli te menne neŋ “a nensaal-paalaa.” Lɛ wuleeŋ ka te mɔɔrɔ te moɔbo zaa ka te zagre yelzaa Jehoova naŋ ba boɔrɔ bare. Kyɛ maŋ mɔɔrɔ ka te teɛrɛ yɛlɛ, a kyɛ erɛ yɛlɛ naŋ wuli ka te tɔglɛɛ Jehoova. (Kol. 3:​9, 10) Jehoova na baŋ soŋɛɛ neɛ gba naŋ erɛ yelfaare yaga zaa ka o bare a yelfaare eebo, a kyɛ leɛ o gyogo.

14. Bo hoŋ zanne yi Jack zemmo yɛlɛ ŋa poɔŋ? (Kaa a foto meŋ.)

¹⁴ Te nyɛ Jack zemmo yɛlɛ, o da eɛ dɔɔ naŋ tonɔ kpaŋkpaŋkpeɛ̃o toma yaga zaa a da nɔŋ zɔɔre meŋ, ba gba da boɔlooŋ ka The Demon. O toŋfatoŋ na zuŋ, ba da di la o sɛrɛɛ ka ba koo. Kyɛ saŋa na Jack naŋ da naŋ kyɛnlɛ ka a bebiri na baŋ na koo ta na, te yɔɔdɔɔ kaŋa da maŋ gɛrɛɛ a nempɔgedie a manna a duorisoŋ, a da yelka o boɔrɔŋ ka o neŋ Jack zanne a Baabole, ka Jack meŋ da sage ka o zanne a Baabole. Aneazaa ka Jack da toŋ la toŋfaare yaga, kyɛ o da toɔ̃ yagɛɛ o gyog-faare na zaa bare a wa deɛ suobu aŋa Jehoova Sieree Deme kaŋa. Jack da leɛrɛ o zemmo yɛlɛ yaga zaa, a bebiri na gba baŋ da gɛrɛ ka ba te koo na, a nempɔgedie kaareba mine da konoŋ. A nempɔgedie kaareba neŋkpoŋ kaŋa naŋ da tonɔ toma be yeleeŋ ka: “Jack da eɛ neɛ yɛlɛ naŋ ba soma fẽẽ zaa a nempɔgedieŋ. Kyɛ Pampana ona la neɛ na yɛlɛ naŋ soma yaga zaa a nempɔgedie noba zaa poɔŋ.” Saŋa na baŋ da ko Jack na, daagbuli puoriŋ, te yɔɔmine na da lɛ gaa la be ka ba te e lammo ko nempɔgedie noba, a nempɔgedie neɛ kaŋa da wa la a lammo, o dɛndɛŋ saŋa da la lɛ. Bonso oŋ da wa a lammo? O noɔre da mããyɛŋ a neŋ lɛ na Jack naŋ leɛre o zemmo yɛlɛ na, a da boɔrɔ ka o baŋ yɛlɛ o meŋ naŋ na baŋ e a puore Jehoova. A pɛlɛɛŋ ka te gyogo na baŋ eŋɛɛ te Saa naŋ be sazuŋ na gyeremɛ!—1 Pit. 2:12.

 SOBUOŊ KA JEHOOVA NA EŊ O YUORI NA GYEREMƐ NENDAAREKAŊA?

15. Sobuoŋ ka Jehoova na eŋ o yuori na gyeremɛ nendaarekaŋa? (Yieme 96:​10-13)

¹⁵ Kanne Yieme 96:​10-13. Yieme 96 baaraa seŋ na yeleeŋ ka Jehoova eɛ Sɛreŋmaara ane Naa naŋ tori. Sobuo ka Jehoova na eŋ o meŋɛ yuori na gyeremɛ nendaarekaŋa? O na wa di la sɛrɛɛ dantorii soriŋ. A koŋ kɔɔre o na sãã la Baabilɔŋ Kpoŋ bonso o dɛge la Jehoova yuori yaga zaa. (Yel. 17:​5, 16; 19:​1, 2) Kaapɔge ka ba naŋ wa sãã Baabilɔŋ Kpoŋ baare, noba mine na wa poɔ la te poɔŋ ka te puoro Jehoova. A baaraa zaa, ka Hammagedon zɔɔre na meŋ pãã piili, Jehoova na sãã la Setaana donɛɛ na zaa kpɛlɛŋ, a sãã bana na zaa naŋ ba nɔŋ o yɛlɛ a maŋ ŋmaara zirii a kyaaroo na, kyɛ faa bana na meŋ zaa naŋ nɔŋ o yɛlɛ a maŋ erɛ o boɔbo, a kyɛ korɔ o yuori gyeremɛ na. (Mak. 8:38; 2 Tɛs. 1:​6-10) Ka Krista Yuoŋ Turi Naaŋ Diibu naŋ wa baare, ka a enyɛ baaraa soba na meŋ wa baare, Jehoova na wuliŋ ka ona yoŋ la seŋ neŋ ka neɛzaa puoruu. (Yel. 20:​7-10) A lɛ saŋa na, ‘Jehoova gyeremɛ yɛlɛ bammo na paalɛɛ a donɛɛ aŋa koɔ̃ne naŋ pɔge maŋkpoŋ.’—Hab. 2:14.

16. Boŋ hoŋ e siri ka ho na eŋ? (Kaa a foto meŋ.)

¹⁶ Nyɛ lɛ aŋ na e popeɛloŋ yaga zaa ka noba zaa naŋ na be a donɛɛ zuŋ korɔ Jehoova yuori na gyeremɛ aŋa lɛ o naŋ seŋ neŋ na! Kyɛ pampana ŋa gba, te taa la a vuo ka te yele Jehoova yɛlɛ korɔ noba a kyɛ erɛ yɛlɛ meŋ naŋ na vɛŋ ka o yuori na nyɛ puubu. A Lantaa Zukaareba naŋ boɔrɔ ka te de te teɛroŋ zaa eŋ a yelnimizeɛ ŋa eŋɛŋ na zuŋ, ba kaa iree Yieme 96:8 ka o e a yuoni 2025 yelzu: ‘Yɛ korɔ Jehoova gyeremɛ naŋ seŋ neŋ o yuori.’