1. Bo teɛroŋ hoŋ taa kyaare a yelmeŋɛ?

 JEHOOVA puorebiiri nɔŋ la a yelmeŋɛ naŋ be Naaŋmen Yelbiri poɔŋ. O eŋɛŋ ka te sagediibu kyaare. (Uro. 10:17) Te wa sagedieŋ ka Jehoova vɛŋɛɛŋ ka a Kristabiiri lantaapuoruu wa bebe a “e dalugri ane bon naŋ maŋ nyɔge a yelmeŋɛ taa kpeɛŋaa.” (1 Tim. 3:15) Te maŋ yi la popeɛloŋ poɔŋ a sigri te menne ko “noba naŋ derɛ weɛ” te poɔŋ na, ba maŋ wɛlɛɛ a yelmeŋɛ naŋ be a Baabole poɔŋ ko te soŋ zaa lɛ, a kyɛ maŋ korɔ te sowuli neŋ Naaŋmen boɔbo naŋ kyaare taa.​—Hib. 13:17.

2. Aŋa lɛ na Gyimisi 5:19 naŋ yel na, boŋ naŋ na baŋ pɔge te aneazaa ka te wa zannɛɛ a yelmeŋɛ?

² Aneazaa ka te wa sagɛɛ a yelmeŋɛ a sage meŋ ka Naaŋmen laŋnoɔre puoruu na wulo te sori, kyɛ zirii naŋ na baŋ bɛnle teŋ yi a yelmeŋɛ soriŋ. (Kanne Gyimisi 5:19.) Setaana poɔ na pɛleŋ yaga zaa, ka o naŋ toɔ̃ bɛnle te ka te ba lɛ sage a Baabole ane sowuli na Naaŋmen laŋnoɔre puoruu naŋ maŋ korɔ te na di.​—Efe. 4:14.

3. Ananso la wala aŋ seŋ ka te nyɔge a yelmeŋɛ kpeɛŋaa? (Efesu 6:13, 14)

³ Kanne Efesu 6:13, 14. A koŋ kɔɔre, a Dɛɛvul na de la bɛnlɛ ane zirii a bɛnle a paalonne ka ba iri zɔɔ neŋ Jehoova. (Yel. 16:13, 14) Te baŋɛɛŋ meŋ ka Setaana naŋ mɔɔrɛɛ o moɔbo zaa ka o bɛnle Jehoova puorebiiri. (Yel. 12:9) Lɛ zuŋ aŋ e nimizeɛ ka te mɔɔ kyɛ baŋ tɛɛtɛɛ naŋ be a yelmeŋɛ ane zirii kpakyagaŋ, a kyɛ tuuro a yelmeŋɛ meŋ. (Uro. 6:17; 1 Pit. 1:22)  Lɛŋ na baŋ soŋ te ka te nyɛ faabo a dɔgroŋ kpoŋ saŋa!

4. Boŋ teŋ na zanne a zannoo ŋa poɔŋ?

⁴ A zannoo ŋa poɔŋ, te na nyɛɛ gyogri ayi mine aŋ seŋ ka te taa ka a baŋ soŋ te ka te baŋ a yelmeŋɛ naŋ yi a Baabole poɔŋ, a kyɛ sagra sowuli meŋ naŋ yi Naaŋmen laŋnoɔre puoruu na zie. A lɛ zanne yɛlɛ ata a naŋ seŋ ka te erɛ a naŋ kyɛnɛ nyɔge a yelmeŋɛ taa kpeɛŋaa.

GYOGRI A NAŊ SEŊ KA TE TAA A TOƆ̃ BAŊ A YELMEŊƐ

5. Ka teneeŋ zoro Jehoova, sobuo aŋ na baŋ soŋ te ka te baŋ a yelmeŋɛ?

⁵ Zoro Jehoova. Teŋ na zoro Jehoova na wuleeŋ ka te nɔmooŋ yaga zaa a daŋ koŋ boɔrɔ ka te e yelzaa naŋ na sãã o poɔ. Te maŋ boɔrɔŋ ka te zanne baŋ tɛɛtɛɛ naŋ be soŋ ane faaloŋ kpakyagaŋ, ane a yelmeŋɛ ane zirii kpakyagaŋ, ka lɛ na baŋ soŋ te ka te erɛ yɛlɛ naŋ na vɛŋ ka Jehoova poɔ pɛle te yɛlɛ. (Yeng. 2:3-6; Hib. 5:14) Aseŋ ka te zoro Jehoova yaga zaa a gaŋ nensaalaa, bonso gbɛɛ yaga yɛlɛ naŋ pɛlɛ nensaaleba poɔ na ba maŋ pɛlɛ Jehoova poɔ.

6. Sobuoŋ ka dabeɛ̃ da vɛŋ ka a Izerayɛl biiri bale wedeɛreba mine da ba yel a yelmeŋɛ ko ba yɔɔmine?

⁶ Ka teneeŋ zoro nensaalaa a gaŋ Jehoova, te na bɔreŋ a yi a yelmeŋɛ poɔŋ. Te leɛ nyɛ a bale wedeɛreba 12 na baŋ da kaa iri ka ba te pigri teŋgane na Jehoova naŋ da eŋ noɔre ka o na de ko la a Izerayɛl biiri na. A dɔbɔ ŋa poɔ noba pie da zoree a Keenan deme dabeɛ̃ yaga zaa a gaŋ nɔmmo ba naŋ da taa ko Jehoova. Ba da yelko la ba Izerayɛl bitaaba na ka: “Te koŋ baŋ gaa te zɔɔ neŋ a noba ŋa, bonso ba eɛ kpeɛne gaŋ te.” (Sor. 13:27-31) Nensaalaa nimiriŋ yɛŋ, yelmeŋɛ la ka a Keenan deme da taa la faŋa gaŋ a Izerayɛl biiri. Kyɛ ka neɛzaaŋ da yelka a Izerayɛl biiri koŋ baŋ zɔɔtoɔ̃ ba dɔndɔnne ŋa wuleeŋ ka o ba teɛrɛ Jehoova yɛlɛ. A dɔbɔ pie na da seŋ ka ba de ba teɛroŋ zaa eŋ yɛlɛ Jehoova naŋ boɔrɔ ka a Izerayɛl  biiri e. A da seŋ ka ba lɛ teɛre yɛlɛ o naŋ e ko ba aŋ ba kɔɔre na. A lɛ ŋa da naaŋ soŋ baŋ ka ba baŋ ka a Keenan deme faŋa koŋ baŋ manne kpeɛ̃o na Jehoova naŋ taa na fẽẽ zaa. Kyɛ Gyoosua ane Kaleb yɛŋ da ba e ba yɛlɛ aŋa a dɔbɔ pie na, ba da boɔrɔŋ ka Jehoova poɔ pɛle ba yɛlɛ. Ba da yelko la a noba ka: “Ka Jehoova poɔŋ pɛle ne te yɛŋ, o na de teŋ gaaneŋ a teŋgane, a de o ko te meŋ.”​—Sor. 14:6-9.

7. Wala teŋ na baŋ e maaleŋ nɔŋ Jehoova yaga zaa ka lɛ vɛŋ ka te daŋ ta wa erɛ yelzaa naŋ na sãã o poɔ? (Kaa a foto meŋ.)

⁷ Ka teneeŋ maŋ mɔɔrɔ te moɔbo zaa ka te erɛ yɛlɛ naŋ pɛlɛ Jehoova poɔ te gbɛ deree zaa poɔŋ, a na vɛŋeŋ ka te maaleŋ nɔmoo yaga zaa a koŋ boɔrɔ ka te daŋ e yelzaa naŋ na sãã o poɔ. (Yiem. 16:8) Ka hooŋ wa kanna noba mine yɛlɛ naŋ be a Baabole poɔŋ, maŋ soore ho meŋɛ ka, ‘Ka maaŋ la da be a yɛlɛ ŋa poɔŋ, bo gbɛre maŋ da naaŋ de?’ Aŋa mannoo poɔŋ, de ka ho da bebeŋ saŋa na a Izerayɛl bale wedeɛreba pie naŋ da wa yele ka a Izerayɛl biiri koŋ baŋ zɔɔtoɔ̃ a Keenan deme na. Ka lɛ ho da naaŋ sagɛɛ yɛlɛ na ba naŋ yele na di, ka lɛ vɛŋ ka ho zoro nensaalaa dabeɛ̃? Kyɛbee nɔmmo ho naŋ taa ko Jehoova ane lɛ hoŋ boɔrɔ ka ho pɛlɛ o poɔ na da naaŋ eɛ kpeɛŋaa gaŋ ho dabeɛ̃ na hoŋ da naaŋ zoro na bee? A Izerayɛl biiri na zaa naŋ da bebe a lɛ saŋa na da ba sage yelmeŋɛ na Gyoosua ane Kaleb naŋ da yele na. Lɛ da vɛŋɛɛŋ baŋ kɔŋ apoɔsori na baŋ da taa ka ba kpɛ a Noɔre Emmo Teŋgane na.​—Sor. 14:10, 22, 23.

8. Bo gyogo aŋ seŋ ka te mɔɔrɔ te moɔbo zaa ka te taa, ka ananso la wala?

⁸ Sigrimennoŋ. Jehoova maŋ iree a yelmeŋɛ wuli noba naŋ sigre ba menne. (Mat. 11:25) Te maŋ yi la sigrimennoŋ poɔŋ a sage sommo a zanne a yelmeŋɛ. (Tom. 8:30, 31) Kyɛ aseŋ ka te kaara soŋ a ta wa piili zɛgrɛ te menne. Ka teneeŋ zɛgrɛ te menne, a na baŋ vɛŋeŋ ka te piili teɛrɛ ka teneeŋ meŋɛ teɛroŋ ane Baabole poɔ sowuli Jehoova laŋnoɔre puoruu naŋ korɔ te na kyaarɛɛ taa.

9. Wala teŋ na baŋ e a naŋ kyɛnɛ taa sigrimennoŋ?

⁹ Ka teneeŋ de te menne manne neŋ Jehoova a nyɛ lɛ te naŋ e fẽẽ yaga seŋ, a na soŋ teŋ ka te naŋ kyɛnɛ taa sigrimennoŋ. (Yiem. 8:3, 4) Te na baŋ puore sɔreŋ meŋ ka, Jehoova soŋ te ka te taa sigrimennoŋ a sagra wuluu. Jehoova na soŋ teŋ ka te maŋ de o teɛroŋ o naŋ maŋ de ko te a yi a Baabole poɔŋ ane o laŋnoɔre puoruu na poɔŋ, a daŋ weɛ sɛre kyɛ ka teneeŋ meŋɛ teɛroŋ a tuuro. Ka hooŋ wa kanna a Baabole, maŋ kaara ka ho nyɛ yɛlɛ naŋ wuli ka Jehoova nɔŋɛɛ sigrimennoŋ a kyɛ kyiiri pɔloo, zɛgemeŋɛ, ane wulimeŋɛ. Azuŋ mɔɔ kyɛ taa sigrimennoŋ yaga zaa ka ba naŋ wa ko bo apoɔsori kaŋa a lantaapuoruu poɔŋ ka lɛ vɛŋ ka te yɔɔmine yaga wa baŋ bo.

LƐ TEŊ NA BAŊ E A NYƆGE A YELMEŊƐ KPEƐŊAA

10. Nembobo eŋɛŋ ka Jehoova da maŋ tu kyɛ de sowuli korɔ o noba?

¹⁰ Maŋ sage sowuli zaa Jehoova laŋnoɔre puoruu naŋ korɔ te na di. A takoreŋ Izerayɛl biiri saŋa na, Jehoova da maŋ tu la Moosis ane Gyoosua eŋɛŋ kyɛ de sowuli ko O noba. (Joos. 1:16, 17) Ka a Izerayɛl biiriŋ wa nyɛ ka a noba ŋa eɛ Jehoova Naaŋmen gbɛbog-areba a tuuro ba sowuli, ba da maŋ nyɛɛ maaloo. Kyɛ yuomo yaga mine puoriŋ, saŋa na a dɛndɛŋ Kristabiiri naŋ da wa bebe na, a bitontonee pie neŋ bayi na la da korɔ ba sowuli. (Tom. 8:14, 15) Kyɛ a puoriŋ, nembɛrɛ mine meŋ naŋ da be Gyɛruzɛlɛm da wa poɔ la ba poɔŋ. A lantaapuoruu naŋ da tuuro a yelmeŋɛ dɔbɔ ŋa sowuli zuŋ, “a lantaapuoruu noba  zaa da [arɛɛ] kpeɛŋaa a sagediibu poɔŋ, ka ba noɔre da yɛllɛ bebiri zaa.” (Tom. 16:4, 5) Zenɛ ŋa meŋ ka teneeŋ wa de sowuli Jehoova laŋnoɔre puoruu naŋ korɔ te na tonɔ neŋ toma, te maŋ nyɛɛ maaloo. Kyɛ wala aŋ na erɛ Jehoova ka teneeŋ zagre ka te tuuro a noba ŋa o naŋ kaa iri na sowuli? Ka teneeŋ peɛre nyɛ yɛlɛ naŋ da e saŋa na a Izerayɛl biiri naŋ da gɛrɛ a Noɔre Emmo Teŋgane na, a na soŋ teŋ ka te nyɛ a soorebiri ŋa noɔre iribo.

11. Boŋ da pɔge a takoreŋ saŋa Izerayɛl biiri naŋ da iri zɔɔrɔ neŋ Moosis naŋ da e neɛ Naaŋmen naŋ da kaa iri ka o deɛrɛ o noba weɛ na? (Kaa a foto meŋ.)

¹¹ Saŋa na a Izerayɛl biiri naŋ da gɛrɛ a Noɔre Emmo Teŋgane na, dɔbɔ mine naŋ da taa yuori da iri zɔɔrɔ neŋ la Moosis ane apoɔsori na Jehoova naŋ koo na zuŋ. Ba da yeleeŋ ka: “A lammo zaa eɛ forifori, ba zaaŋ e forifori, Jehoova meŋ be la ba poɔŋ.” (Sor. 16:​1-3) Aneazaa ka Naaŋmen nimitɔɔreŋ “a lammo zaa” da eɛ forifori, kyɛ Jehoova da iree Moosis ka o deɛrɛ O noba weɛ. (Sor. 16:28) A noba ŋa naŋ da iri zɔɔrɔ neŋ Moosis na wuleeŋ ka Jehoova la baŋ da iri zɔɔrɔ neŋ. Ba da ba de ba teɛroŋ eŋ yɛlɛ Jehoova naŋ boɔrɔ; kyɛ ba da deɛ ba teɛroŋ zaa eŋ yɛlɛ bana menne naŋ boɔrɔ, ka ba nyɛ kpeɛ̃o yaga ane yuori. Naaŋmen da ko la noba na zaa naŋ da iri deɛ weɛ a zɔɔrɔ neŋ Moosis na, ane noba turituri na zaa naŋ da are ba puoriŋ na. (Sor. 16:​30-35, 41, 49) Zenɛ ŋa meŋ, te na baŋ sagediŋ peɛlaaŋ ka Jehoova poɔ ba pɛle neŋ bana na zaa meŋ naŋ ba wulo gyeremɛ korɔ o laŋnoɔre puoruu yelsɛgree na.

12. Ananso la wala aŋ seŋ ka te naŋ kyɛnɛ taa sagediibu Jehoova laŋnoɔre puoruu na eŋɛŋ?

¹² Te naŋ na baŋ taa la sagediibu Jehoova laŋnoɔre puoruu na eŋɛŋ. Ka a naŋ wa pɛle ka aseŋ ka ba e leɛroo mine a te wuluu poɔŋ a kyaare Baabole yelmenne mine, bee a kyaare sori te naŋ maŋ tu kyɛ tonɔ te puoruu toma mine, te yɔɔmine naŋ deɛrɛ te weɛ na maŋ eɛ  a leɛroo wieoŋ lɛ. (Yeng. 4:18) Ba maŋ eɛ lɛ bonso ba boɔrɔŋ ka ba pɛle Jehoova poɔ a gaŋ yelzaa. Ba maŋ mɔɔrɛɛ ba moɔbo zaa ka ba gbɛ deree zaa neŋ Naaŋmen Yelbiri na kyaare taa, bonso o poɔ yɛlɛ ka Jehoova puorebiiri zaa de tonɔ neŋ toma.

13. Bo la “a yelbi-sonne”? Ka bo aŋ seŋ ka te e “a yelbi-sonne” ŋa?

¹³ “Naŋ kyɛnɛ nyɔge a yelbi-sonne na.” (2 Tim. 1:13) “A yelbi-sonne” are ko la Kristabiiri wuluu naŋ be a Baabole poɔŋ. (Gyn. 17:17) Yɛlɛ zaa te naŋ sagedi yi la ana wuluu na poɔŋ. Jehoova laŋnoɔre puoruu na wulo teŋ ka te nyɔge a lɛ wuluu ŋa kpeɛŋaa. Ka teneeŋ wa erɛ lɛ te na nyɛ la maaloo.

14. Boŋ da vɛŋ ka a dɛndɛŋ Kristabiiri na mine da ba lɛ nyɔge “a yelbi-sonne na” kpeɛŋaa?

¹⁴ Boŋ na pɔge te ka teneeŋ ba lɛ tuuro “a yelbi-sonne na”? Te nyɛ yelmannaa kaŋa. A dɛndɛŋ Kristabiiri saŋa na, a Kristabiiri mine da yɔ yele korɛɛ ba Kristabi-taaba ka Jehoova bebiri na taɛŋ. Aminekaŋaŋ ba da nyɛɛ lɛta kaŋa baŋ da teɛrɛ ka a bitontona Pɔɔl la sɛgoo, aŋ da vɛŋ baŋ yɔ yele ana yɛlɛ na. Kristabiiri mine naŋ da be Tɛsalonika meŋ da ba peɛre a yelmeŋɛ zaa kyɛ da sage a yɛlɛ di, a gba da yɔ manna korɔ ba taaba. Ba da naaŋ koŋ kpɛ ana bɛnlɛ ŋa poɔ ka ba naŋ da leɛteɛre yɛlɛ na Pɔɔl naŋ da wuli ba saŋa na oŋ da be ba zieŋ na. (2 Tɛs. 2:​1-5) Pɔɔl da kpãã la o yɔɔmine na ka ba ta maŋ sage yelzaa ba naŋ woŋ a di. Kyɛ Pɔɔl da lɛ yelee yelbie mine naŋ na baŋ soŋ a Tɛsalonika deme na nendaarekaŋa. O da yeleeŋ ka: “Maaŋ Pɔɔl, N puoro la ŋa maŋ de N nu sɛge neŋ, a eɛ sieree a yi lɛta zaa maŋ sɛge poɔŋ; a sori ŋa poɔŋ ka N maŋ tu a sɛge yɛlɛ.”​—2 Tɛs. 3:17.

15. Ka te dɔndɔnne wa ŋma zirii mine kyɛ ka a waa ŋa a naŋ e yelmeŋɛ, wala teŋ na baŋ e go te menne yi a poɔŋ? Tere yelmannaa kaŋa. (Kaa a fotori meŋ.)

¹⁵ Boŋ teŋ na baŋ zanne yi yɛlɛ na Pɔɔl naŋ da sɛge ko a Tɛsalonika deme na? Ka teneeŋ wa woŋ yelkaŋa ka ane yɛlɛ na te naŋ zanne yi a Baabole poɔŋ naŋ ba kyaare taa bee a e duoro naŋ ba kye dɛlebo, aseŋ ka te teɛre a yɛlɛ gaa tɔɔre soŋ. A Soviet Union saŋa na, te dɔndɔnne na da de la lɛta kaŋa a ko te yɔɔmine na, a yelka a lɛ lɛta na yi la te toma zaa  zi-kpoŋ na. A lɛta da eŋɛɛ te yɔɔmine na faŋa ka ba maale ba yoŋ laŋnoɔre puoruu. A lɛta poɔ yɛlɛ na da waa ŋa aŋ e yelmeŋɛ. Kyɛ a da ba bɛnle te yɔɔmine ŋa naŋ da taa yelmennoŋ na. Ba da wa nyɛɛŋ ka yɛlɛ naŋ be a lɛta poɔŋ a neŋ yɛlɛ na baŋ zanne wa baŋ na ba kyaare taa. Zenɛ ŋa, te dɔndɔnne mine maŋ tu la intanɛt zuŋ a boɔrɔ ka ba gyɛre te teɛroŋ bee a wɛl te taa. A ba seŋ ka te “lonni wieoŋ a gbigri [te] teɛroŋ poɔŋ,” ka teneeŋ maŋ peɛre yɛlɛ na te naŋ woŋ bee a kanne na soŋ a nyɛ ka a neŋ yelmeŋɛ na te naŋ zanne na kyaarɛɛ taa, a na soŋ teŋ ka te go te menne. —2 Tɛs. 2:2; 1 Gyn. 4:1.

16. Aŋa lɛ Urom 16:​17, 18 naŋ yel na, boŋ aŋ seŋ ka te e ka te taa mineŋ wa tage ba menne yi a yelmeŋɛ poɔŋ?

¹⁶ Naŋ kyɛnɛ taa noɔreyeni neŋ bana na naŋ dire yelmennoŋ korɔ Jehoova na. Naaŋmen boɔrɔŋ ka te puoroo neŋ noɔreyeni. Ka teneeŋ nyɔge a yelmeŋɛ kpeɛŋaa a na soŋ teŋ ka te taa noɔreyeni. Neɛzaa naŋ zagre a yelmeŋɛ bare maŋ de la wɛltaa wane a lantaapuoruu poɔŋ, azuŋ ka Naaŋmen kpãã te ka ‘te tage te menne yi ba poɔŋ.’ Ka lɛ naane ba na tagɛɛ te meŋ yi a yelmeŋɛ poɔŋ.​—Kanne Urom 16:17, 18.

17. Bo tɔnɔ teŋ maŋ nyɛ ka teneeŋ wa baŋ a yelmeŋɛ a nyɔge o kpeɛŋaa?

¹⁷ Ka teneeŋ wa baŋ a yelmeŋɛ a nyɔge o kpeɛŋaa, a na soŋ teŋ ka te neŋ Jehoova niiloŋ e kpeɛŋaa yaga zaa. (Efe. 4:15, 16) Te na nyɛ la gomeŋɛ a yi Setaana zirii wuluu ane o ziri-ŋma zaa poɔŋ, Jehoova meŋ na ko teŋ gomeŋɛ a dɔgroŋ kpoŋ saŋa. Naŋ nyɔge a yelmeŋɛ kpeɛŋaa, “a emmaaroŋ Naaŋmen na be [la] yɛ zieŋ.”​—Fil. 4:8, 9.