Ka teneeŋ na toɔ̃ pɛle Jehoova poɔ, aseŋ ka te taa sagediibu. Kyɛ a Baabole yeleeŋ ka “noba zaa naane taa yeldeebo.” (2 Tɛs. 3:2) Pɔɔl da yeleeŋ ka noba na naŋ da dɔgroo oŋ boɔrɔ faabo a yi ba nuuriŋ na eɛ “potuodeme ane yelfa-erebɛ.” Kyɛ yɛlɛ na meŋ oŋ da yelkyaare noba naŋ ba taa sagediibu na kyaarɛɛ noba yaga. Noba mine ba sage ka Naaŋmen bebeŋ a maale boma zaa. (Uro. 1:20) Noba mine meŋ na baŋ yelka ba sagɛɛ neɛ kaŋa naŋ taa kpeɛ̃o yaga zaa di. Kyɛ lɛ ba wuli ka a soba taa la sagediibu meŋɛmeŋɛ.

Aseŋ ka te sagedi ka Jehoova bebeŋ meŋɛmeŋɛ, ka o maŋ ko la neɛzaa naŋ taa sagediibu naŋ e kpeɛŋaa o eŋɛŋ maaloo. (Hib. 11:6) Ka teneeŋ na toɔ̃ taa a sagediibu ŋa tɔ, aseŋ ka Naaŋmen vooroŋ soŋ na soŋ te. Ka teneeŋ na nyɛ a vooroŋ soŋ meŋ, aseŋ ka te puore sɔre Naaŋmen ka o ko te a vooroŋ soŋ. (Luk. 11:​9, 10, 13) So nimizeɛ kaŋa meŋ teŋ na baŋ lɛ nyɛ a vooroŋ soŋ la ka, te kanna Naaŋmen Yelbiri na a vooroŋ soŋ naŋ soŋ noba mine baŋ sɛge na. A maŋ teɛre yɛlɛ na te naŋ kanne na gaa tɔɔre a mɔɔ kyɛ de tonɔ neŋ toma te zemmo poɔŋ. Ka teneeŋ erɛ lɛ, te na terɛɛ sori ka Naaŋmen vooroŋ soŋ na soŋ te ka te erɛ yɛlɛ naŋ na wuli ka te taa la sagediibu, lɛ meŋ na vɛŋeŋ ka Jehoova poɔ pɛle yaga zaa.