ZANNOO YƐLƐ 23
YIELOŊ 28 Gaining Jehovah’s Friendship
Jehoova Toŋboɔle Teŋ Ka Te Wa E Saamma O Tɛnte Na Poɔŋ
“N tɛnte na na be la ba zieŋ, N na eɛ ba Naaŋmen.”—IZIK. 37:27.
YƐLƐ TE NAŊ NA ZANNE
A zannoo ŋa na soŋ teŋ ka te taa nimipa yaga zaa a ko toŋboɔle na Jehoova naŋ toŋboɔle te ka te wa e saamma o tɛnte na ane lɛ oŋ maŋ kaara te zu soŋ zaa aŋa O saamma na.
1-2. Bo toŋboɔle la ka Jehoova toŋboɔle o yelmeŋɛ puorebiiri?
NEMBUO la Jehoova ho zemmo poɔŋ? Aminekaŋaŋ ho na yeleeŋ ka, ‘Jehoova eɛ N Saa, N Naaŋmen ane N Zɔmeŋa.’ Yoe mine meŋ bebeŋ teŋ na baŋ de boɔle Jehoova. Kyɛ ho baŋɛɛŋ ka ho eɛ saana Jehoova tɛnte poɔŋ?
2 Naa Deevid da yeleeŋ ka te neŋ Jehoova zɔmennoŋ na waa ŋa teŋ e saamma o yiriŋ. O da soorɛɛŋ ka: “Oo Jehoova, nembuo hoŋ na deɛ saannoŋ a kpɛ neŋ ho tɛnte na poɔ? Nembuoŋ na baŋ zeŋ ho taŋ-forifori na zuŋ?” (Yiem. 15:1) A sɛgre ŋa soŋ teŋ teŋ nyɛ ka te na baŋ eɛ saamma Jehoova yiriŋ—a e o zɔmenne. Ho ba nyɛ ka ana toŋboɔle ŋa Jehoova naŋ toŋboɔle te na eɛ tegroŋ yaga zaa bee?
JEHOOVA BOƆRƆŊ KA TE E O SAAMMA
3. Nembuo la a dɛndɛŋ saana Jehoova tɛnte naŋ, ka wala ka Jehoova neŋ o dɛndɛŋ saana na da nɔŋ taa seŋ?
3 Sɛre kyɛ ka Jehoova na maale boma na, Jehoova da eɛ o yoŋ. Kyɛ a da wa ta la saŋa kaŋa oŋ maale o Bidɔɔ dɛndɛŋ oŋ wa poɔ o eŋɛŋ o tɛnte na poɔŋ. Jehoova poɔ da pɛlɛɛŋ yaga zaa o naŋ wa e saana O tɛnte na poɔŋ. A Baabole gba yeleeŋ ka Jehoova “nɔŋ la” o Bidɔɔ na. O dɛndɛŋ saana na meŋ da taa la “popeɛloŋ naŋ e kpoŋ [Jehoova] nimitɔɔreŋ.”—Yeng. 8:30.
4. Wagre naŋ gɛrɛ poɔŋ na, wala ka Jehoova da e a wa taa noba yaga o tɛnte na poɔŋ?
4 Jehoova da maalɛɛ a malekere meŋ baŋ meŋ wa leɛ saamma o tɛnte na poɔŋ. A Baabole maŋ boɔlɛɛ a malekere ka “Naaŋmen bidɔba,” a lɛ yelka ba taa la popeɛloŋ yaga zaa ba neŋ Jehoova naŋ laŋ kpeɛrɛ sazuŋ. (Joob 38:7; Daan. 7: 10) Ana saŋa na, Naaŋmen malekere yoŋ da la o zɔmenne ka o neŋ ba zaa laŋ kpeɛrɛ sazuŋ. Kyɛ a puoriŋ o da maalɛɛ nensaaleba a donɛɛ ŋa zuŋ baŋ meŋ wa e o zɔmenne a be o tɛnte na poɔŋ. Yuomo mine puoriŋ, noba na mine naŋ da wa e saamma Jehoova tɛnte na poɔ da la Enɔke, Noowa, Aboraham, ane Gyoob. A Baabole yeleeŋ ka ba da eɛ Jehoova zɔmenne bonso ba da maŋ erɛɛ yɛlɛ naŋ pɛlɛ Jehoova poɔ.—Mun. 5:24; 6:9; Joob 29:4; Aiz. 41:8.
5. Bo yɛlɛ teŋ na baŋ zanne a yi daŋyelbo na naŋ be Iziikiel 37:26, 27 na?
5 A yi takoreŋ saŋa zaa a wa tɔ zenɛ, Jehoova naŋ tonɔ boɔlɛɛ o zɔmenne ka ba wa e saamma o tɛnte na poɔŋ. (Kanne Iziikiel 37:26, 27.) Aŋa mannoo poɔŋ, Iziikiel daŋyelbo na soŋ teŋ teŋ wa nyɛ ka Naaŋmen sereŋ boɔrɔŋ ka o neŋ o yelmeŋɛ puorebiiri taa zɔmennoŋ naŋ soma yaga zaa. O eŋɛɛ noɔre ka “N ne ba na maalɛɛ emmaaroŋ nɔlaŋ.” A daŋyelbo ŋa yelee saŋa na Jehoova puorebiiri o naŋ sɔ naaloŋ kãã ane bana na naŋ na zeŋ a donɛɛ ŋa zu paradiisi poɔŋ naŋ na wa laŋ taa noɔreyeni a be o tɛnte na poɔ aŋa “zage yeni peere.” (Gyn. 10:16) Ana saŋa na la pampana!
ZIE LA ZIE ZAA TE NAŊ BE KYƐ NAAŊMEN TAA LA TE YƐLƐŊ
6. Wala ka neɛ na baŋ e a wa leɛ saana Jehoova tɛnte na poɔŋ? Jehoova tɛnte na be la zi-yenaa kaŋa yoŋ bee?
6 Takoreŋ saŋa na, ka neɛŋ wa taa tɛnte o na baŋ kpɛ gaŋ la o poɔŋ a pɛnne kyɛ ka o baŋ go o yi dun-faare ane naŋnyig-kpeɛne eŋɛŋ. Ka saanaŋ wa wa a soba zie a wa be a tɛnte poɔŋ, o meŋ na nyɛɛ a gomeŋɛ ŋa. Ka teneeŋ wa de te menne a ko Naaŋmen, te meŋ maŋ wa eɛ saamma o tɛnte na poɔŋ. (Yiem. 61:4) Jehoova maŋ ko teŋ siiloŋ poɔ bondirii yaga zaa kyɛ ka te neŋ te yɔɔmine na naŋ e saamma O tɛnte na poɔŋ lanna wagre zaa. Zie la zie te naŋ be kyɛ te na baŋ be la Jehoova tɛnte na poɔŋ. Aminekaŋaŋ ho daŋ tu la sori gaa teŋ tɔɔre kaŋa, bee ho daŋ gaa la te lammo bɛrɛ naŋ e o yoŋ na kaŋa, a da nyɛ ka te yɔɔmine naŋ bebe na meŋ nyɛrɛɛ maaloo yire Naaŋmen tɛnte na poɔŋ. Azuŋ Jehoova yelmeŋɛ puorebiiri naŋ be a donɛɛ lombori zaa be la o tɛnte na poɔŋ.—Yel. 21:3.
7. Ananso la wala teŋ na baŋ yelka Jehoova puorebiiri na naŋ kpi na naŋ kyɛnɛ eɛ saamma o tɛnte na poɔŋ? (Kaa a foto meŋ.)
7 Ka Jehoova yelmeŋɛ puorebiiri na meŋ naŋ kpi na? Ka lɛ te na baŋ yeleŋ ka ba naŋ kyɛnɛ eɛ saamma Jehoova tɛnte naŋ bee? Ɛɛ! Ananso la wala teŋ yel lɛ? Bonso ba naŋ voorɔ la Jehoova nimitɔɔreŋ. Yezu da wulee a yɛlɛ ŋa aŋ pɛle. O da yeleeŋ ka: “Kyɛ a kyaare a kũũ leɛ-iruu yɛlɛ, haali Moosis meŋɛ da vɛŋɛɛŋ yɛŋ baŋ a yɛlɛ ŋa a yi a moɔ goore yɛlɛ na poɔŋ, beŋ oŋ da boɔle Jehoova ka ‘Aboraham Naaŋmen ane Aziki Naaŋmen ane Gyekɔb Naaŋmen.’ O ba e kũũni Naaŋmen, kyɛ o eɛ neŋvobɔ Naaŋmen, bonso ba zaa eɛ neŋvobɔ o nimitɔɔreŋ.”—Luk. 20:37, 38.
Jehoova yelmeŋɛ puorebiiri naŋ kpi gba naŋ eɛ saamma Naaŋmen tɛnte na poɔŋ (Kanne o wɛlbo 7)
BO TƆNƆ TEŊ MAŊ NYƐ, KYƐ BO FEREBO TOMA TEŊ TAA?
8. Bo tɔnɔ ka noba naŋ e saamma Jehoova tɛnte na poɔŋ maŋ nyɛ?
8 Aŋa lɛ tɛnte naŋ e zie neɛ naŋ na baŋ gaŋ a pɛnne kyɛ ka o baŋ go o yi dun-faare ane naŋnyig-kpeɛne eŋɛŋ na, Jehoova tɛnte na meŋ maŋ go la o saamma na zaa naŋ bebe na a yi yɛlɛ naŋ na baŋ sãã o neŋ ba zɔmennoŋ na, a kyɛ vɛŋ baŋ taa teɛretɔ meŋɛmeŋɛ. Ka teneeŋ tage peɛle Jehoova, Setaana koŋ baŋ pigi te sori ka te ta nyɛ nyɔvore naŋ ba taa baaraa. (Yiem. 31:23; 1 Gyn. 3:8) A donpaalaa poɔŋ, Jehoova na go la o yelmeŋɛ puorebiiri a yi yɛlɛ naŋ na baŋ sãã ba neŋ o niiloŋ a kyɛ la go ba a yi kũũni poɔŋ.—Yel. 21:4.
9. Bo gyogo la ka Jehoova boɔrɔ ka noba naŋ e saamma o tɛnte na poɔŋ taa?
9 A eɛ apoɔsori naŋ e kpoŋ yaga zaa ka te e saamma Jehoova tɛnte na poɔŋ, ka te neŋ o taa zɔmennoŋ naŋ soma. Kyɛ bo gyogo aŋ seŋ ka te taa ka teneeŋ boɔrɔ ka te naŋ kyɛnɛ e saamma Jehoova tɛnte na poɔŋ? Ka neɛ kaŋaŋ toŋboɔle bo ka ho wa o die, nɔkpeɛne zaa kyebe ka ho na boɔrɔŋ ka ho baŋ yɛlɛ oŋ na boɔrɔ ka ho e. Aŋa mannoo poɔŋ, aminekaŋaŋ o na boɔrɔŋ ka ho iri ho nɔɔteɛ sɛre kyɛ kpeɛrɛ a die, ho na yi la ho poɔ zaa meŋ a e lɛ. Lɛ meŋ la, te boɔrɔŋ ka te baŋ yɛlɛ na meŋ Jehoova naŋ boɔrɔ ka te erɛ ka lɛ vɛŋ ka te naŋ kyɛnɛ e saamma o tɛnte na poɔŋ. Nɔmmo te naŋ taa ko Jehoova maŋ eŋ teŋ faŋa teŋ boɔrɔ ka te e lɛ zaa teŋ na toɔ̃ a “pɛlɛ o poɔ yaga zaa.” (Kol. 1:10) Aneazaa ka Jehoova eɛ te Zɔmeŋɛ, kyɛ te baŋɛɛŋ meŋ ka o eɛ te Naaŋmen ane te Saa aŋ seŋ ka te koroo gyeremɛ. (Yiem. 25:14) Azuŋ ka teneeŋ wa teɛre a yɛlɛ ŋa, a na maŋ vɛŋeŋ ka te taa gyeremɛ naŋ e zuluŋ yaga zaa a koo a ta wa inne neɛ na meŋɛ naŋ la o. Ka teneeŋ taa a gyeremɛ ŋa tɔ ko Jehoova, a na soŋ teŋ ka te tage te menne yi gyogo zaa naŋ na baŋ vɛŋ ka o poɔ sãã. Te boɔbo la ka te “kyɛnɛ . . . sigrimeŋɛ poɔŋ” ane te Naaŋmen.—Maik. 6:8.
JEHOOVA DA WULEEŊ KA O BA WƐLƐ NOBA A WƐGYƐŊ POƆŊ
10-11. Sobuo ka lɛ na Jehoova naŋ da taa a Izerayɛl biiri a Sainai wɛgyɛŋ poɔŋ wuli ka o ba wɛlɛ noba?
10 Jehoova ba wɛlɛ noba naŋ e saamma o tɛnte na poɔŋ. (Uro. 2:11) Ka teneeŋ zanne nyɛ lɛ Jehoova naŋ da taa a Izerayɛl biiri saŋa na baŋ da be a Sainai wɛgyɛŋ poɔŋ na, a na baŋ soŋ teŋ ka te nyɛ ka Jehoova sereŋ ba wɛlɛ noba.
11 A yi saŋa na Jehoova naŋ da faa o noba yi Igyipiti gbaŋgbaaloŋ poɔŋ na, Jehoova da kaa iree ŋmenpuore wedeɛreba baŋ tonɔ toma a ŋmenpuoredieŋ. Ba da kaa iree a Liivai booree na meŋ baŋ tonɔ toma mine a ŋmenpuoredieŋ. Ka lɛ Jehoova da kaarɛɛ bana na naŋ tonɔ toma a ŋmenpuoredieŋ ane bana na naŋ kpeɛrɛ peɛle a ŋmenpuoredie na zu a gaŋ bana na naŋ ba peɛle be na bee? Ai! Jehoova ba wɛlɛ noba.
12. Sobuo ka lɛ na Jehoova naŋ da taa a Izerayɛl biiri a wɛgyɛŋ poɔŋ na sereŋ wuli ka o ba wɛlɛ noba? (Yiibu 40:38) (Kaa a foto meŋ.)
12 Ka a Izerayɛl bie kaŋaŋ da taa arezie kaŋa, bee ka o da ba kpeɛrɛ peɛle a ŋmenpuoredie, kyɛ ba zaa da taa la apoɔsori ka ba neŋ Jehoova nyɔge zɔmennoŋ naŋ soma. Aŋa mannoo poɔŋ, Jehoova da vɛŋɛɛŋ ka a Izerayɛl biiri zaa da maŋ nyɛ a zuŋzugri ane a vũũ zele na oŋ da maŋ tu soseɛlee eŋɛŋ kyɛ vɛŋ aŋ wa dɔgle a ŋmenpuoredie zuŋ na. (Kanne Yiibu 40:38.) Ka a zuŋzugriŋ wa piili gɛrɛ, bana na gba naŋ da ba peɛle a ŋmenpuoredie na da maŋ nyɛŋ ka a zuŋzugri piili gɛrɛŋ, ba da maŋ piiliŋ a lagra ba boma lanna taa, ka ba neŋ ba yideme zaa piili sɛgrɛ ba menne ka ba poɔ a Izerayɛl biiri zaa poɔŋ ka ba gaa. (Sor. 9:15-23) Ba zaa da maŋ woŋee a iilɛ na baŋ da de ware maale baŋ da maŋ peɛle aŋ gɔnɔ yaga zaa a wuli ka a seŋɛɛŋ ka neɛ zaa piili sɛgrɛ o meŋɛ ka ba gaa. (Sor. 10:2) A yɛlɛ ŋa zaa wuleeŋ ka, ka neɛŋ da kpeɛrɛ peɛle a ŋmenpuoredie bee ka o ba kpeɛrɛ peɛle be, kyɛ lɛ naaneŋ na wuli ka o neŋ Jehoova na taa la zɔmennoŋ naŋ soma. Kyɛ neɛ zaa naŋ da poɔ a Izerayɛl biiri poɔŋ na na baŋ eɛ saana Jehoova tɛnte na poɔŋ ka Jehoova korɔ o soba gomeŋɛ ane sowuli naŋ seŋ neŋ. Lɛ meŋ la zenɛ ŋa, zie zaa te naŋ be a donɛɛ ŋa zuŋ, kyɛ Jehoova na baŋ wuli teŋ nɔmmo, a ko te gomeŋɛ a kyɛ kaara te zu velaa zaa.
Lɛ na Naaŋmen naŋ da sɛgre a ŋmenpuoredie yɛlɛ na wuleeŋ ka o ba wɛlɛ noba (Kanne o wɛlbo 12)
YƐLƐ JEHOOVA NAŊ ERƐ ZENƐ ŊA A WULI KA O BA WƐLƐ NOBA
13. Bonso teŋ na baŋ yelka zenɛ ŋa meŋ Jehoova ba wɛlɛ noba?
13 Zenɛ ŋa meŋ, Naaŋmen puorebiiri mine kpeɛrɛ peɛlɛɛ te donɛɛ zaa toma zikpɛŋ na, ka ba mine meŋ kpeɛrɛ peɛle Bɛɛtil toma ziiri naŋ be a donɛɛ lombori zaa. Ba mine gba tonɛɛ toma a lɛ ziiri ŋaŋ. Azuŋ ba mine maŋ sonnɔŋ yaga zaa ane a toma na zaa ba naŋ tonɔ a lɛ ziiri ŋaŋ na, ka ba mine meŋ gba maŋ nyɛ a vuo ka ba neŋ te yɔɔdɔbɔ na naŋ deɛrɛ a lantaapuoruu weɛ na maŋ lanna. Ba mine meŋ eɛ gbandige zukaareba, ka ba mine meŋ tonɔ a wagre zaa puoruu toŋ yobo mine. Ka hooŋ e neɛ naŋ ba tonɔ a toma ŋa kaŋa zaa, kyɛ ho na baŋ taa la sagediibu ka Jehoova sereŋ nɔŋ boŋ yaga zaa a sage ka ho e saana o tɛnte na poɔŋ. O maŋ kaarɛɛ o puorebiiri zaa zu. (1 Pit. 5:7) Naaŋmen maŋ ko la o puorebiiri zaa siiloŋ poɔ bondirii, sowuli, ane gomeŋɛ naŋ seŋ neŋ.
14. Bo yɛlɛ mine la lɛ wuli ka Jehoova ba wɛlɛ noba?
14 Yel na kaŋa Jehoova naŋ la erɛ zenɛ ŋa a wuli ka O ba wɛlɛ noba la ka, o vɛŋɛɛŋ ka noba naŋ be a donɛɛ lombori zaa na baŋ nyɛ a Baabole a kanne. A piilee saŋa na, ba da sɛgɛɛ a Sɛge Forifori kɔkɔɛ ata ŋa poɔŋ: Hiburu, Arameeik, ane Giriki. Noba naŋ kanna a Baabole a lɛ kɔkɔɛ ŋa poɔŋ na, ka lɛ ba neŋ Jehoova niiloŋ somaŋ yaga zaa gaŋ bana na naŋ ba kanna a Baabole a kɔkɔɛ ŋa poɔŋ bee? Ai, lɛ naane ka a yɛlɛ waa.—Mat. 11:25.
15. Bo yɛlɛ mine la wuli ka Jehoova sereŋ ba wɛlɛ noba? (Kaa a foto meŋ.)
15 Ka teneeŋ gaa sakuu gaa tɔɔre bee ka teneeŋ baŋ kɔkɔɛ na ba naŋ de sɛge a Baabole na yelibu, ana naane ka Jehoova na kaa kyɛ ka o poɔ pɛle te yɛlɛ. Jehoova maŋ de la yɛŋ naŋ yi o zie na ko noba naŋ be a donɛɛ lombori zaa, o ba maŋ de ko noba naŋ gaa sakuu gaa tɔɔre yoŋ. O vɛŋɛɛŋ baŋ leɛre o Yelbiri a Baabole a eŋ kɔkɔɛ turituri yaga poɔŋ; a lɛ zuŋ, nensaaleba zaa naŋ be a donɛɛ lombori zaa na baŋ nyɛ la tɔnɔ yi wulibo naŋ be o poɔŋ na, ka a soŋ ba ka ba zanne lɛ baŋ na toɔ̃ e a wa leɛ Naaŋmen zɔmenne.—2 Tim. 3:16, 17.
Lɛ na ba naŋ leɛre a Baabole eŋ kɔkɔɛ yaga poɔŋ na wuleeŋ ka Jehoova ba wɛlɛ noba (Kanne o wɛlbo 15)
NAŊ KYƐNƐ ERƐ YƐLƐ NAŊ NA VƐŊ KA JEHOOVA POƆ “PƐLE” HO YƐLƐ
16. Aŋa lɛ Toma 10:34, 35 naŋ yel na, bo aŋ seŋ ka te erɛ ka Jehoova poɔ naŋ pɛle te yɛlɛ?
16 A eɛ apoɔsori naŋ e kpoŋ yaga zaa ka Jehoova sage te ka te wa e saamma o tɛnte na poɔŋ. O eɛ neɛ naŋ wulo nimimaaroŋ, nɔmmo, aneŋ saannoŋ gyogo yaga zaa a korɔ noba na naŋ e saamma O tɛnte na poɔŋ a gaŋ neɛzaa naŋ be a donɛɛ ŋa zuŋ. Ane meŋ, o ba wɛlɛ noba. Zie zaa te naŋ yi, lɛ zaa te naŋ gaa sakuu a ta, bale te naŋ yi, yuomo te naŋ nyɛ, ka te eɛ dɔbɔ bee pɔgebɔ, kyɛ Jehoova maŋ sagɛɛ te zaa ka te wa e saamma o tɛnte na poɔŋ. Kyɛ bana na yoŋ naŋ erɛ yɛlɛ naŋ pɛlɛ o poɔ na oŋ maŋ sage baŋ wa e saamma o tɛnte na poɔŋ.—Kanne Toma 10:34, 35.
17. Yeŋ teŋ na baŋ lɛ zanne yɛlɛ yaga a kyaare lɛ teŋ na baŋ e a naŋ kyɛnɛ e saamma Jehoova tɛnte na poɔŋ?
17 A yi Yieme 15:1 poɔŋ, Deevid da soorɛɛŋ ka: “Oo Jehoova, nembuo hoŋ na deɛ saannoŋ a kpɛ neŋ ho tɛnte na poɔ? Nembuoŋ na baŋ zeŋ ho taŋ-forifori na zuŋ?” A vooroŋ soŋ da eŋ la a yieloŋ yiele faŋa oŋ iri a soorebie ŋa nɔɛ. A zannoo naŋ tɔnne poɔŋ, te na zanne nyɛɛ yɛlɛ na mine a naŋ seŋ ka te erɛ ka Jehoova poɔ pɛle te yɛlɛ.
YIELOŊ 32 Take Sides With Jehovah!
