1. Sobuo ka Yieme 15:1-5 na baŋ soŋ te?

 DAA naŋ pare, te da zanne nyɛɛŋ ka bana na naŋ de ba menne ko Jehoova ka ba neŋ Jehoova taa zɔmennoŋ naŋ soma na na baŋ wa eɛ saamma o tɛnte na poɔŋ. Kyɛ bo aŋ seŋ ka te e a wa e saamma o tɛnte na poɔŋ? Yieme 15 yelee yɛlɛ yaga a kyaare a yɛlɛ ŋa. (Kanne Yieme 15:1-5.) A Yieme ŋa wulee yɛlɛ a naŋ seŋ ka te e a naŋ e Naaŋmen zɔmenne naŋ peɛloo yaga zaa.

2. Aminekaŋaŋ, boŋ ka a yieloŋ yiele Deevid da teɛrɛ saŋa na oŋ da yele Jehoova tɛnte yɛlɛ na?

² Yieme 15 soorɛɛŋ ka: “Oo Jehoova, nembuo hoŋ na deɛ saannoŋ a kpɛ neŋ ho tɛnte na poɔ? Nembuoŋ na baŋ zeŋ ho taŋ-forifori na zuŋ?” (Yiem. 15:1) Saŋa na a yieloŋ yiele Deevid naŋ da yele Jehoova “tɛnte” yɛlɛ na, aminekaŋaŋ o da teɛrɛɛ a ŋmenpuoredie naŋ da be Giibiyoŋ ana saŋa na yɛlɛ. Deevid meŋ da la yelee Naaŋmen “taŋ-forifori” na meŋ yɛlɛ, aminekaŋaŋ o da teɛrɛɛ a tɛnte na naŋ da be Zaayɔŋ taŋa zuŋ Gyɛruzɛlɛm poɔŋ na. Deevid da maalɛɛ tɛnte Giibiyoŋ samun-duri seŋ a da de a nɔlaŋ daga na te eŋ beŋ sɛre kyɛ baŋ wa mɛ a ŋmenpuoredie. A yi Giibiyoŋ kyɛ gɛrɛ be da eɛ tɔɔre yaga.​—2 Saa. 6:17.

3. Ananso la wala aŋ seŋ ka te woŋ Yieme 15 muni soŋ? (Kaa a foto meŋ.)

³ Yelmeŋɛ la, a Izerayɛl biiri yaga zie zaa da ba taa apoɔsori ka ba te tonɔ a ŋmenpuoredieŋ, neŋ-fẽẽ yoŋ la da taa ana apoɔsori na ka ba te tonɔ toma a ŋmenpuoredieŋ, beŋ baŋ da biŋ a nɔlaŋ daga na. Kyɛ Jehoova yelmeŋɛ puorebiiri zaa na baŋ wa eɛ saamma o tɛnte na poɔŋ, ka ba naŋ wa e o zɔmenne a naŋ kyɛnɛ e o zɔmenne meŋ. Lɛ teŋ meŋ zaa boɔrɔ. Yieme 15 wulee gyogri mine a naŋ seŋ ka te taa ka a soŋ te ka te naŋ kyɛnɛ e Jehoova zɔmenne.

 TA TAA SAANAA ZAA, MAŊ ERƐ YƐLƐ NAŊ TORI

4. Wala teŋ e baŋ ka suobu deebo yoŋ naane ka Jehoova boɔrɔ yire te zieŋ? (Aizeeya 48:1)

⁴ Yieme 15:2 yeleeŋ ka neɛ naŋ e Naaŋmen zɔmeŋɛ eɛ “neɛ naŋ ba taa saanaa zaa o sokyenee poɔŋ, a maŋ erɛ yɛlɛ naŋ tori.” A yelbie “sokyenee” ane “erɛ” wuleeŋ ka a eɛ yɛlɛ a naŋ seŋ ka te erɛ wagre zaa. Ka lɛ te ‘sokyenee zaa na baŋ toriŋ a ba taa saanaa zaa’? Ɛɛ. Yelmeŋɛ la, nensaalaa zaa ba pɛgeyi, kyɛ ka teneeŋ mɔɔrɔ te moɔbo zaa ka te erɛ yɛlɛ naŋ pɛlɛ Jehoova poɔ, o na nyɛŋ ka te eɛ noba naŋ “ba taa saanaa zaa [te] sokyenee poɔŋ.” Ka teneeŋ wa de te menne ko Jehoova a de suobu, lɛ wuleeŋ ka te neŋ Naaŋmen piileeŋ a laŋ kyɛnɛ. Takoreŋ saŋa na, ka neɛŋ e Izerayɛl bie, lɛ ba wuli ka o soba eɛ saana Jehoova tɛnte na poɔŋ. Ba mine da maŋ koŋ boɔlooŋ kyɛ ba da ba maŋ “e lɛ yelmeŋɛ ane sontuubu poɔŋ.” (Kanne Aizeeya 48:1.) Ka a Izerayɛl bie kaŋa da boɔrɔ ka o e saana Jehoova tɛnte na poɔŋ, aseŋ ka o zanne yɛlɛ Jehoova naŋ boɔrɔ a de tonɔ neŋ toma o zemmo poɔŋ. Lɛ meŋ la zenɛ ŋa, ka teneeŋ wa de suobu a e Jehoova Sieree Deme kaŋa yoŋ naaneŋ na baŋ vɛŋ ka te neŋ Jehoova taa zɔmennoŋ naŋ soma. Aseŋ ka te moɔ̃ nimiri a “erɛ yɛlɛ naŋ tori.” Wala teŋ na baŋ e a e lɛ?

5. Ka teneeŋ na erɛ Jehoova boɔbo yelzaa poɔŋ, wala ka lɛ wuli?

⁵ Jehoova nimitɔɔreŋ, “neɛ naŋ ba taa saanaa zaa o sokyenee poɔŋ” ane neɛ naŋ “erɛ yɛlɛ naŋ tori” ba wuli ka oŋ na maŋ gɛrɛ a lammozie wagre zaa yoŋ. (1 Saa. 15:22) Aseŋ ka te maŋ mɔɔrɔ ka te erɛ yɛlɛ naŋ na pɛle Naaŋmen poɔ wagre zaa, ka teneeŋ gbaŋ wa e te yoŋ. (Yeng. 3:6; Ikil. 12:13, 14) A eɛ nimizeɛ ka te maŋ mɔɔrɔ ka te erɛ yɛlɛ Jehoova naŋ boɔrɔ yelbilii meŋ gba poɔŋ. Ka teneeŋ wa erɛ lɛ wuleeŋ ka te nɔmooŋ yaga zaa. Lɛ  meŋ na vɛŋeŋ ka o meŋ nɔŋ te yaga zaa.​—Gyn. 14:23; 1 Gyn. 5:3.

6. Aŋa lɛ Hiburu 6:10-12 naŋ yel na, bo yɛlɛ la e nimizeɛ yaga zaa a gaŋ yelmennoŋ te naŋ daŋ di ko Jehoova saŋa kaŋa naŋ pare?

⁶ Jehoova poɔ pɛlɛɛŋ yaga zaa ane yelmennoŋ te naŋ di koo saŋa kaŋa naŋ pare. Kyɛ yelmennoŋ teŋ da di ko Jehoova saŋa kaŋa naŋ pare na yoŋ koŋ baŋ vɛŋ ka te naŋ kyɛnɛ e saamma Jehoova tɛnte na poɔŋ. Hiburu 6:​10-12 (Kanne.) vɛŋɛɛŋ ka a yɛlɛ ŋa pɛle soŋ zaa lɛ ko te. Jehoova daŋ koŋ inni yelsonne te naŋ e koo saŋa kaŋa naŋ pare. O boɔrɔŋ ka te yi te sukyiri zaa a puoruu “a te ta a baaraa.” O na eɛ te zɔmeŋɛ a gɛrɛ wagre naŋ ba taa baaraa “ka teneeŋ ba bale.”​—Gal. 6:9.

YELE YELMEŊƐ HO SUKYIRIŊ

7. Ka ba naŋ yelka te yele yelmenne te sukyie pooreŋ, wala ka lɛ wuli?

⁷ Neɛ naŋ boɔrɔ ka o e saana Jehoova tɛnte na poɔŋ seŋ ka o maŋ “yele yelmenne o sukyiri poɔŋ.” (Yiem. 15:2) Lɛ ba wuli ka teŋ koŋ ŋmaara zirii yoŋ. Jehoova boɔrɔŋ ka te e yelmenne deme yelzaa poɔŋ. (Hib. 13:18) A yɛlɛ ŋa eɛ nimizeɛ, bonso “Jehoova kyiiree neɛ naŋ erɛ daware yɛlɛ, kyɛ o neŋ noba naŋ erɛ yɛlɛ naŋ soma maŋ nyɔgɛɛ zɔmennoŋ naŋ e kpeɛŋaa.”​— Yeng. 3:32.

8. Bo gyogo aŋ ba seŋ ka te taa?

⁸ Noba naŋ ‘yele yelmenne ba sukyie pooreŋ’ ba maŋ erɛ ba yɛlɛ aŋa ba naŋ tuuro Jehoova bege noba nimitɔɔreŋ kyɛ maŋ erɛ yelfaare sɔglɔ. (Aiz. 29:13) Ba ba maŋ erɛ daware yɛlɛ. Daware neɛ maŋ teɛrɛŋ ka yɛŋ naŋ yi Jehoova zie koŋ baŋ somoo yelzaa poɔŋ. (Gyi. 1:5-8) Aminekaŋaŋ, o na zagrɛɛ Jehoova sowuli yɛlɛ mine o naŋ teɛre ka a ba e nimizeɛ yaga zaa a koo. Kyɛ ka toɔrɔ zaaŋ ba wa yi a poɔŋ wa, aminekaŋaŋ o na piiliŋ a erɛ yɛlɛ naŋ gaŋ lɛ onaŋ e na. Aneazaa ka o naŋ puoree Jehoova, kyɛ o puoro koŋ pɛlɛ Jehoova poɔ. (Ikil. 8:11) Kyɛ tenee yɛŋ maŋ boɔrɔŋ ka te e yelmenne deme yelzaa poɔŋ.

9. A dɛndɛŋ saŋa Yezu naŋ da nyɛ Nataneɛl na, bo yɛlɛŋ da e, ka bo teŋ na baŋ zanne yi be? (Kaa a foto meŋ.)

⁹ A eɛ nimizeɛ ka te e noba naŋ na yele yelmeŋɛ te sukyie pooreŋ. Te nyɛɛ lɛ a yi saŋa na Filipi naŋ da de o zɔmeŋɛ Nataneɛl ka o wa  nyɛ Yezu na. Aneazaa ka Yezu daŋ ba nyɛ Nataneɛl zaa, kyɛ Yezu da yeleeŋ ka: “Nyɛ, Izerayɛl dɔɔ meŋɛ la ŋa, o ba taa daware yɛlɛ zaa o eŋɛŋ.” (Gyn. 1:47) Yezu da baŋɛɛŋ ka o potuuribo na da eɛ yelmeŋɛ deme, kyɛ o da nyɛɛŋ ka Nataneɛl yelmennoŋ na da eɛ o yoŋ. Nataneɛl meŋ da ba pɛgeyi aŋa tenee, kyɛ bampuori-kombampoɔ yɛlɛ zaa da ba kye o eŋɛŋ. Yezu da pugee Nataneɛl yaga zaa, bonso o poɔ da pɛle neŋ la a lɛ gyogo na. Nɔkpeɛne zaa kyebe ka lɛ teŋ boɔrɔ ka Yezu nyɛ te meŋ!

10. Ananso la wala aŋ seŋ ka te kaara te yelyaga zieŋ soŋ? (Gyimisi 1:26)

¹⁰ Yɛlɛ na yaga zie zaa Yieme 15 naŋ yelka aseŋ ka te maŋ erɛ na kyaarɛɛ lɛ teŋ na maŋ erɛ yɛlɛ kyaara te taaba. Yieme 15:3 yeleeŋ ka neɛ naŋ e saana Jehoova tɛnte na poɔŋ, “ba derɛ o zele sããna noba yoe, o ba derɛ yelfaare erɛ neŋ o tɔsoba, o ba yele yɛlɛ naŋ ba seŋ neŋ kyaara o zɔmenne.” Ka teneeŋ ŋma zirii naŋ e nimizeɛ a dɔgle te yɔɔ kaŋa, a na baŋ sãã la o poɔ yaga zaa, lɛ meŋ na vɛŋeŋ ka te koŋ baŋ lɛ e saamma Jehoova tɛnte na poɔŋ.—Kanne Gyimisi 1:26.

11. Boŋ la yo-sãã? Ka te yɔɔ kaŋaŋ wa e yo-sããna kyɛ ba e kaŋdabaŋkalɛ, boŋ na baŋ pɔgoo?

¹¹ A yieloŋ yiele yelee yo-sãã yɛlɛ. Bo la yo-sãã? Yo-sãã eɛ zirii naŋ na baŋ sãã neɛ kaŋa yo-soŋ. Ka te yɔɔ kaŋaŋ ŋma zirii dɔgle neɛ kaŋa kyɛ ba e kaŋdabaŋkalɛ, ba na baŋ irooŋ yi a lantaapuoruu poɔŋ.​—Jer. 17:10.

12-13. Bo yɛlɛ mine poɔŋ la teŋ na baŋ e yo-saaneba ka te ba baŋ neŋ a? (Kaa a foto meŋ.)

¹² Yieme 15:3 meŋ la teɛre teŋ ka, noba naŋ e saamma Jehoova tɛnte na poɔŋ ba maŋ erɛ yelfaa zaa a kyaara ba kpeɛreŋ taaba bee a sããna ba zɔmenne yoe. Boŋ na wuli ka te sããnɛɛ te zɔmenne yoe?

¹³ Te na baŋ saaŋɛɛ neɛ kaŋa yuori ka te ba baŋ perɛ ka teneeŋ wa yele o soba yelfaare korɔ noba. Aŋa mannoo poɔŋ, te de ka: (1) te yɔɔpɔge kaŋa barɛɛ a paaneɛ toma, (2) kultaa deme mine ba lɛ tonɔ toma aŋa Bɛɛtil  tontonneba, kyɛbee (3) te yɔɔdɔɔ kaŋa ba lɛ e a lantaapuoruu neŋkpoŋ kaŋa bee a lantaapuoruu nembɛrɛ sonneba kaŋa. A koŋ soma ka te yɔ yele korɔ noba ka aminekaŋaŋ, ba eɛ yelfaa kaŋa zuŋ baŋ leɛre ba toma na. Aminekaŋaŋ, yɛlɛ mine zuŋ ka ba toma na leɛre kyɛ teŋ ba baŋ. Ane meŋ, neɛ naŋ e saana Jehoova tɛnte na poɔŋ “ba derɛ yelfaare erɛ neŋ o tɔsoba, o ba yele yɛlɛ naŋ ba seŋ neŋ kyaara o zɔmenne.”

TAA EMMO KO BANA NA NAŊ ZORO JEHOOVA NA

14. Manne wuli lɛ Jehoova saamma naŋ maŋ tage ba menne yi “neɛzaa naŋ erɛ yeldɛgɛ” zieŋ.

¹⁴ Yieme 15:4 yeleeŋ ka Jehoova zɔmenne “neŋ neɛzaa naŋ erɛ yeldɛgɛ ba laŋna erɛ yɛlɛ.” Wala teŋ na toɔ̃ e baŋ ka neɛ kaŋa erɛɛ yeldɛgɛ? Te naŋ e noba naŋ ba pɛgeyi na zuŋ, te koŋ baŋ wuli ka neɛ kaŋa erɛɛ yeldɛgɛ. Ananso la wala? A na maŋ eɛ mɔlɔ ka te tage peɛle noba te neŋ ba teɛroŋ naŋ kyaare taa a gaŋ noba yɛlɛ naŋ maŋ ire te suuri. Azuŋ, te maŋ tagɛɛ te menne yi noba na yoŋ Jehoova naŋ yelka ba eɛ neŋ ‘dɛgɛ.’ (1 Kor. 5:11) Ba mine la noba naŋ maŋ baŋ perɛ kyɛ erɛ yelfaare, noba naŋ ba taa gyeremɛ a ko te sagediibu, kyɛbee noba naŋ maŋ boɔrɔ ka ba sãã niiloŋ na te neŋ Jehoova naŋ taa na.—Yeng. 13:20.

15. Bo sori kaŋa teŋ na baŋ tu kyɛ eŋnɛ “noba naŋ zoro Jehoova”?

¹⁵ Yieme 15:4 la yeleeŋ ka aseŋ ka te maŋ ennɛ “noba naŋ zoro Jehoova.” Azuŋ te maŋ boɔrɛɛ soe teŋ na baŋ tu kyɛ wulo nimimaaroŋ a neŋ gyeremɛ korɔ Jehoova zɔmenne. (Uro. 12:10) Sobuoŋ? Yelkaŋa teŋ na baŋ e be la Yieme 15:4, be yeleeŋ ka neɛ naŋ e saana Jehoova tɛnte na poɔŋ “ka onaŋ wa eŋ noɔre o ba leɛrɛ gɛrɛ puori, haali ka a naŋ ba soma koo.” Ka teneeŋ ba wa paale noɔre te naŋ eŋ, ana vɛŋeŋ ka te taaba poɔ sãã yaga zaa. (Mat. 5:37) Aŋa mannoo poɔŋ, Jehoova boɔrɔŋ ka kultaa deme paale noɔre na ba naŋ eŋ saŋa na baŋ da waana ka ba kultaa na. O poɔ meŋ maŋ pɛleŋ ka onaŋ wa nyɛ bidɔgreba naŋ wa mɔɔrɔ ba moɔbo zaa ka ba paale noɔre na ba naŋ eŋ ko ba biiri. Nɔmmo te naŋ taa ko Naaŋmen a neŋ te taaba na na eŋ teŋ faŋa ka te mɔɔ te mɔɔbo zaa ka te paale noɔre na zaa te naŋ eŋ.

16. Bo yelkaŋa la teŋ na baŋ lɛ e a de emmo ko Jehoova zɔmenne?

¹⁶ Sori na kaŋa teŋ na baŋ lɛ tu kyɛ ennɛ Naaŋmen zɔmenne la ka te wulo ba saannoŋ kyɛ maŋ de te bontaree sonnɔ ba. (Uro. 12:13) Ka te neŋ te yɔɔmineŋ maŋ lanna taa ka te pɛlɛ te niŋe, lɛ na baŋ vɛŋeŋ ka te tage peɛle taa ane Jehoova. Ane meŋ ka teneeŋ wa wulo saannoŋ korɔ te taaba, te tɔglɛɛ Jehoova.

TA TAA LIBIE NƆMMO

17. Ananso la wala ka Yieme 15 yel libie yɛlɛ?

¹⁷ A Baabole yeleeŋ ka neɛ naŋ e Jehoova saana “ka onaŋ wa de libie pɛŋ neɛ, o ba eŋnɛ koɔ̃, ka ba naŋ wa koo bɛnloo boma ka o de a kyɛ e neɛ naŋ ba taa saanaa yelfaa, o maŋ zagreŋ.” (Yiem. 15:5) Ananso la wala ka a yieloŋ yiele yel libie yɛlɛ a sɛgre ŋa poɔŋ? Bonso ka teneeŋ nɔŋ libie a na baŋ wa eɛ yelnimizeɛ te zemmo poɔŋ a gaŋ nensaaleba bee Naaŋmen gba. (1 Tim. 6:10) Takoreŋ saŋa na, noba mine da maŋ erɛɛ ba yɔɔmine naŋ e nandaaneba na nimikuonii, bonso ba da maŋ eŋɛɛ koɔ̃ ka ba naŋ wa pɛŋ ba libie. Ane meŋ sɛreŋmaareba da maŋ deɛ la bɛnlɛ boma di kyɛ di sɛrɛɛ naŋ ba tori a kyaare noba naŋ ba taa saanaa zaa. Jehoova kyiiree a yɛlɛ ŋa zaa.—Izik. 22:12.

18. Bo soorebie teŋ na baŋ soore te menne ka a soŋ te ka te baŋ teɛroŋ na te naŋ taa kyaare libie? (Hiburu 13:5)

¹⁸ A na somaŋ ka te peɛre te menne soŋ a nyɛ teɛroŋ te naŋ taa kyaare libie. Soore ho  meŋɛ ka: ‘Gbɛɛ yaga N maŋ teɛrɛɛ libie yɛlɛ ane boma maŋ boɔrɔ ka N da bee? Ka maaŋ wa pɛŋ neɛ kaŋa libiri a maŋ e maŋ tuo ka N leɛ yɔɔ a libiri ko o soba a teɛrɛ ka a libiri yɛlɛ ba fɛre o soba bee? Ka maaŋ wa taa libie a maŋ vɛŋeŋ maŋ nyɛ ka N seɛ la N taaba bee? A maŋ eɛ kpeɛŋaa ka N yuo N nu a soŋ N taaba bee? N maŋ teɛrɛŋ ka te yɔɔmine na naŋ taa libie na nɔŋ la libie a gaŋ Jehoova ba naŋ taa libie zuŋ bee? Ka lɛ N maŋ boɔrɔŋ ka N nyɔge zɔmennoŋ neŋ noba naŋ taa libie kyɛ ba boɔrɔ ka N nyɔge zɔmennoŋ neŋ noba naŋ ba taa libie bee?’ Aseŋ ka te soore te menne a soorebie ŋa bonso Jehoova ko teŋ apoɔsori naŋ e kpoŋ yaga zaa ka te wa e saamma o tɛnte na poɔŋ. Ka teneeŋ ba nɔŋ libie a na baŋ soŋ teŋ ka te naŋ kyɛnɛ e saamma Jehoova tɛnte na poɔŋ. Ka teneeŋ e lɛ, Jehoova daŋ koŋ gyɛ te bare zaa!—Kanne Hiburu 13:5.

JEHOOVA NƆNƆ LA O ZƆMENNE

19. Ananso la wala ka Jehoova boɔrɔ ka te erɛ yɛlɛ na zaa naŋ be Yieme 15 poɔŋ na?

¹⁹ Yieme 15 baaraa zie na eŋɛɛ noɔre kaŋa ka: “Neɛ na zaa naŋ erɛ a yɛlɛ ama daŋ koŋ gbigri zaa.” (Yiem. 15:5) A sɛgre ŋa poɔŋ a yieloŋ yiele wulee ananso Jehoova naŋ yelka te erɛ a yɛlɛ na zaa te naŋ yel a yɛlɛ na. Jehoova boɔrɔŋ ka te taa popeɛloŋ. Azuŋ, ka teneeŋ wa erɛ yɛlɛ Jehoova naŋ boɔrɔ, te na taa la zemmo naŋ soma, kyɛ nyɛ gomeŋɛ meŋ yi Jehoova zie.—Aiz. 48:17.

20. Bo maaloo ka noba naŋ e saamma Jehoova tɛnte na poɔŋ kaara soriŋ ka ba na nyɛŋ?

²⁰ Noba naŋ e saamma Jehoova tɛnte na poɔŋ taa la teɛretɔ ka ba na nyɛɛ nendaarekaŋa naŋ soma. Bana na ba naŋ sɔ naaloŋ kãã na na gaa la sazu a te kpeɛrɛ ziiri na Yezu naŋ maale ko ba na. (Gyn. 14:2) Bana na naŋ na zeŋ a donɛɛ zuŋ kyɛ na meŋ kaarɛɛ soriŋ ka nɔ-ennee na zaa naŋ be Yel-iriwulaa 21:3 na nyɛɛ eebo. Nɔkpeɛne zaa kyebe ka a sereŋ eɛ apoɔsori naŋ e kpoŋ yaga zaa Jehoova naŋ toŋboɔle te ka te wa e saamma o tɛnte na poɔŋ a gɛrɛ wagre naŋ ba taa baaraa!