1-2. Ka hooŋ naŋ ba e siri ka ho de suobu, ananso la wala aŋ ba seŋ ka ho eŋɛ kyoɔre? (Kaa a gane niŋe foto.)

 KA HOOŊ de biŋ ho nimitɔɔreŋ ka ho boɔrɔŋ ka ho de suobu, a eɛ yɛlɛ naŋ soma yaga zaa. Azuŋ ho eɛ siri ka ho de suobu pampana? Ka a lantaapuoruu nembɛrɛŋ ko bo sori ka ho de suobu, lɛ yɛŋ ta zoro dabeɛ̃. Ka hooŋ de suobu ho na nyɛɛ popeɛloŋ yaga Jehoova puoruu poɔŋ.

² Neɛ kaŋa daŋ yelko boŋ ka sɛre hoŋ na de suobu na aseŋ ka ho nyɛ nimitɔɔre gaabo a toɔ̃ sɛgre ho meŋɛ soŋ bee? Kyɛbee hooŋ meŋɛ la wa nyɛ ka aseŋ ka ho e lɛ? Ka lɛ na, ta vɛŋ ka ho eŋɛ kyoɔre. Ka ho e la neŋnyaaŋaa bee baapaalaa, ho na baŋ nyɛɛ nimitɔɔre gaabo a wa seŋ neŋ suobu deebo.

3. Bo yɛlɛ ka a Etopiya dɔɔ-varaa da soore Filipi, ka bo soorebiriŋ da yi a poɔ wa? (Toma 8:36, 38)

³ Kanne Toma 8:36, 38. A Etopiya dɔɔ-varaa da soorɛɛ Filipi a Ŋmen-yelnoore kannekanna ka: “Boŋ la na pigi N suobu deebo?” A Etopiya dɔɔ ŋa da boɔrɔŋ ka o de suobu, kyɛ o sereŋ da eɛ siri ka o de suobu bee?

4. Bo ka a Etopiya dɔɔ da e a wuli ka o boɔrɔŋ ka o zanne yɛlɛ yaga poɔ?

⁴ A Etopiya dɔɔ “da wa la Gyɛruzɛlɛm ka o wa puore.” (Tom. 8:27) Te na baŋ yeliŋ ka o da barɛɛ o puoruu kyɛ te puoro a Gyuumine puoruu na. Nɔkpeɛne zaa kyebe ka a dɔɔ ŋa da zannɛɛ Jehoova yɛlɛ a yi a Hiburu Sɛgre na poɔŋ. Kyɛ a dɔɔ ŋa da naŋ boɔrɔŋ ka o zanne yɛlɛ yaga poɔ. Saŋa na Filipi naŋ da te  pɔge a dɔɔ ŋa a soriŋ na, bo ka a Etopiya dɔɔ ŋa da erɛ? O da kanna la a daŋyele Aizeeya sɛgre na. (Tom. 8:28) A da eɛ a Baabole poɔ yelmenne naŋ e nimizeɛ yaga zaa. A Etopiya dɔɔ ŋa da zannɛɛ yɛlɛ mine a kyaare Jehoova, kyɛ o da boɔrɔŋ ka o naŋ kyɛnɛ zanna yɛlɛ yaga.

5. Sobuo ka a Etopiya dɔɔ da de yɛlɛ na oŋ da zanne na toŋ neŋ toma?

⁵ A dɔɔ ŋa da taa la arezie naŋ e kpoŋ Etopiya Pɔgenaa Kandase toŋtoneba poɔŋ; a dɔɔ ŋa “da e la a Etopiya pɔgenaa toŋtonɔ naŋ da kaara a pɔgenaa libie zu.” (Tom. 8:27) Azuŋ a dɔɔ ŋa toma da e la yaga. Kyɛ o da maŋ nyɛɛ wagre ko Jehoova puoruu. O da maŋ de la yelmenne na zaa oŋ zanna na, tonɔ ne toma. Azuŋ oŋ da yi Etopiya a tu sori gaa Gyɛruzɛlɛm ka o te puore Jehoova. A yi Etopiya a gɛrɛ Gyɛruzɛlɛm da eɛ so tɔɔre yaga, azuŋ a da de la wagre ane libie yaga sɛre kyɛ oŋ na baŋ gaa Gyɛruzɛlɛm. Kyɛ oŋ da boɔrɔ ka o puore Jehoova na zuŋ, o da eɛ siri ka o e yelzaa oŋ na toɔ̃, a puore Jehoova.

6-7. Sobuo ka nɔmmo a Etopiya dɔɔ ŋa naŋ da taa ko Jehoova na maaleŋ wa e kpeɛŋaa?

⁶ A Etopiya dɔɔ ŋa da zannɛɛ yelmenne mine naŋ e nimizeɛ yaga a yi Filipi zie. A yɛlɛ ŋa kaŋa la ka, Yezu la a Mɛzaaya. (Tom. 8:34, 35) A Etopiya dɔɔ naŋ da zanne nyɛ yɛlɛ na Yezu naŋ e koo na, a da tɔ la o sukyiri yaga zaa. Oŋ da wa zanne a yɛlɛ ŋa zaa baare na bo oŋ da e? Ka o naŋ da boɔrɔ, o da naaŋ naŋ kyɛnɛ be la a Gyuumine puoruu poɔŋ, a e dɔɔ noba naŋ taa gyeremɛ yaga zaa a ko. Kyɛ nɔmmo oŋ da taa ko Jehoova ane O Bidɔɔ na da eɛ kpeɛŋaa yaga zaa, azuŋ o da boɔrɔŋ ka o de suobu a wa leɛ Yezu Krista potuuro. Filipi da nyɛɛŋ ka a dɔɔ ŋa eɛ siri ka o de suobu, azuŋ o da kooŋ suobu.

⁷ Ka hooŋ meŋ tɔgle a Etopiya dɔɔ ŋa ewuli soŋ na, a na baŋ soŋ boŋ ka ho sɛgre ho meŋɛ a de suobu. Ho meŋ na baŋ de la nyaa a yelka, “Boŋ la na pigi N suobu deebo?” Yɛ vɛŋ ka te zanne nyɛ lɛ hoŋ na baŋ e a tɔgle a Etopiya dɔɔ ŋa. O da moɔ̃ la nimiri a zanna Jehoova yɛlɛ, a de yɛlɛ na meŋ oŋ zanna na tonɔ neŋ toma, ka lɛ vɛŋ ka nɔmmo o naŋ taa ko Naaŋmen baara.

8. Bo ka Gyɔɔn 17:3 yele korɔ bo ka aseŋ ka ho e?

⁸ Kanne Gyɔɔn 17:3. A Yezu yelbie ŋa la soŋ bo hoŋ de gbɛre ka ho na zannɛɛ a Baabole bee? Ana sɛgre ŋa la soŋ te yaga zie zaa. Kyɛ a sɛgre ŋa naŋ yele korɔ teŋ ka te naŋ kyɛnɛ zanna a Baabole. Bonso te daŋ koŋ baŋ zanne a wa “baŋ . . . Naaŋmen” yɛlɛ baare. (Ikil. 3:11) Te na zannɛɛ Jehoova yɛlɛ tegitegilɛ. Ka teneeŋ zanna Jehoova yɛlɛ a na soŋ teŋ ka te tage peɛloo.​—Yiem. 73:28.

9. Ka teneeŋ wa zanne yɛlɛ mine muni wommo naŋ ba e kpeɛŋaa a yi a Baabole poɔŋ baare, bo aŋ seŋ ka te lɛ e?

 ⁹ Ka teneeŋ wa piili zanna Jehoova yɛlɛ, te maŋ daŋ zannɛɛ yɛlɛ mine muni wommo naŋ ba e kpeɛŋaa yaga a kyaare Jehoova. A gane na oŋ da sɛge ko a Hiburu Kristabiiri na poɔŋ, bitontona Pɔɔl da yelka ana yɛlɛ ŋa la “Naaŋmen yelbiri zannoo piiluu yelbie.” Bitontona Pɔɔl da ba wulo ka “a piilee wulibo” na ba e nimizeɛ. Kyɛ o da de a la manne neŋ berekoɔ̃ bilɛɛ naŋ maŋ ɛnnɛ. (Hib. 5:12; 6:1) Azuŋ o da eŋnɛɛ a Kristabiiri faŋa ka ba moɔ̃ nimiri zanna yelmeŋɛ naŋ be Naaŋmen Yelbiri na poɔŋ gɛrɛ tɔɔre. Ho meŋ maŋ boɔrɔŋ ka ho zanna a Baabole yɛlɛ gɛrɛ tɔɔre bee? Ho boɔrɔŋ ka ho nyɛrɛ nimitɔɔre gaabo a zanna yɛlɛ yaga a kyaare Jehoova ane o boɔbo?

10. Ananso la wala aŋ maŋ e kpeɛŋaa ko noba mine ka ba zanna boma?

¹⁰ Noba yaga zie zaa ba maŋ nɔŋ boma zannoo. Ka ho meŋ? Saŋa na hoŋ da gɛrɛ sakuu na, ho da zannɛɛ boma kannoo ane boma zannoo soŋ zaa bee? Ho da nɔnɔ la boma zannoo, a da nyɛ ka tonɔ kaŋa be la boma zannoo poɔŋ bee? Kyɛbee ho nyɛɛŋ ka gama zannoo maŋ eɛ kpeɛŋaa yaga a ko bo? Ka lɛ na yɛŋ, a ba e ho yoŋ. Jehoova na baŋ soŋ boŋ. Ona la Wulwulo naŋ soma gaŋ wulwulo zaa.

11. Sobuo ka Jehoova wuli ka ona la a ‘Wulwuli Kpoŋ’?

¹¹ Jehoova yeleeŋ ka ona la ‘ho Wulwuli Kpoŋ.’ (Aiz. 30:20, 21) O eɛ Wulwulo naŋ taa kannyiri, nimimaaroŋ ane yɛlɛ muni wommo. O maŋ boɔrɔŋ ka o nyɛ yelsoŋ kaŋa noba na o naŋ maŋ wulo na eŋɛŋ. (Yiem. 130:3) O ba maŋ kaara soriŋ ka te e yɛlɛ naŋ gaŋ te faŋa. Teɛre ka Jehoova la maale ho kyaporo na, o eɛ kyɔɔtaa naŋ e seɛlee yaga. (Yiem. 139:14) Azuŋ O maale teŋ ka te maŋ boɔrɔ boma zannoo. Naaŋmen boɔrɔŋ ka te zanna o yɛlɛ tegitegilɛ, a boɔrɔ ka te nɔŋ yɛlɛ na te naŋ zanna na meŋ. Azuŋ yɛŋ bebeŋ ka ho “boɔrɔ” Baabole yelmenne zannoo pampana. (1 Pit. 2:2) De biŋ ho nimitɔɔreŋ ka ho maŋ kanna a kyɛ zanna a Baabole bebiri zaa. (Joos. 1:8) Jehoova na soŋ boŋ ka a maŋ noma korɔ bo ka ho zanna o yɛlɛ yaga zaa.

12. Ananso la wala aŋ seŋ ka te maŋ zanne Yezu zemmo yɛlɛ ane o naaŋ moɔloo toma yɛlɛ?

¹² Bebiri zaa maŋ bɔ wagre a teɛrɛ Yezu zemmo ane o naaŋ moɔloo toma yɛlɛ gɛrɛ tɔɔre. Ka hooŋ na toɔ̃ puore Jehoova a wagre kpeɛne ŋa poɔŋ, aseŋ ka ho tuuro Yezu gbɛbɔgri. (1 Pit. 2:21) Yezu da yelko la o potuuribo ka ba na tuoree yelkpeɛne. (Luk. 14:27, 28) Kyɛ Yezu da sagedieŋ ka o yelmeŋɛ potuuribo na toɔ̃ arɛɛ a noɔreŋ a di yelmennoŋ ko Jehoova aŋa lɛ oŋ da e na. (Gyn. 16:33) Zanne yɛlɛ yaga a kyaare Yezu zemmo yɛlɛ, a de biŋ ho nimitɔɔreŋ ka ho tɔgloo ho zemmo poɔŋ.

13. Bo yɛlɛ aŋ seŋ ka ho naŋ kyɛnɛ sɔrɔ yire Jehoova zie, ka ananso la wala?

¹³ Bammo yoŋ koŋ baŋ soŋ neɛ, kyɛ ka onaŋ de ana bammo na zanne Jehoova yɛlɛ a wa nɔŋ Jehoova a kyɛ taa sagediibu o eŋɛŋ, a na somooŋ yaga zaa. (1 Kor. 8:1-3) Naŋ moɔ̃ nimiri a zanna Jehoova yɛlɛ, a sɔroo ka o soŋ bo ka ho sagediibu maaleŋ e kpeɛŋaa yaga. (Luk. 17:5) Jehoova maŋ kyɛlle woŋee ana puoro ŋa taa. Ka hooŋ wa zanne Naaŋmen yɛlɛ ka lɛ soŋ bo ka ho taa sagediibu meŋɛmeŋɛ, ana soŋ boŋ ka ho nyɛrɛ nimitɔɔre gaabo.​—Gyi. 2:26.

14. Sobuo ka bitontona Piita wuli ananso a naŋ e nimizeɛ ka te maŋ de yɛlɛ na te naŋ zanna na tonɔ neŋ toma? (Kaa a foto meŋ.)

¹⁴ Bitontona Piita da wulee lɛ a naŋ e nimizeɛ ka Krista potuuribo maŋ de yɛlɛ na ba naŋ zanna na tonɔ neŋ toma. O da de la Noowa zemmo yɛlɛ naŋ be a Baabole poɔŋ na manne ne a yɛlɛ. Jehoova da yelko la Noowa ka O na  de la kɔmpiiri a wa sãã ne a neŋfaare na zaa naŋ da bebe ana saŋa na. Noowa neŋ o yideme naŋ da baŋ ka a kɔmpiiri na waŋ na yoŋ da koŋ baŋ faa ba nyɔvoɛ. Azuŋ ka hooŋ nyɛ, Piita da yelee yɛlɛ baŋ da e sɛre kyɛ ka a Kɔmpiiri wa, “a Noowa gbori maaloo saŋa.” (1 Pit. 3:20) Noowa neŋ o yideme da kyɛlle woŋee Jehoova yɛlɛ a da maale a gbori kpoŋkpoŋ. (Hib. 11:7) Piita da deɛ yɛlɛ na Noowa naŋ e na manne ne suobu deebo, a da sɛge ka: “A koɔ̃ ŋa da e la yelmannaa naŋ are ko suobu deebo naŋ maŋ faa yɛ pampana.” (1 Pit. 3:21) Yɛlɛ na zaa hoŋ erɛ pampana ka ho sɛgre ho meŋɛ a toɔ̃ de suobu na, te na baŋ deaŋ manne ne toma na zaa Noowa ane o yideme naŋ de yuomo yaga toŋ a maale a gbori na. Bo yɛlɛ aŋ seŋ ka ho e a toɔ̃ e siri ka ho de suobu?

15. Boŋ maŋ wuli ka neɛ e la kaŋdabaŋkalɛ meŋɛmeŋɛ?

¹⁵ Yeldɛndɛŋ soba aŋ seŋ ka te e la ka te leɛ yi te yelbebe poɔŋ. (Tom. 2:37, 38) Ka neɛŋ e kaŋdabaŋkalɛ, ana baŋ somooŋ ka o leɛ yi o yelbebe poɔŋ. Ho toɔ̃ barɛɛ yel-eree mine naŋ maŋ saana Jehoova poɔ bee? Aŋa peɛ̃mo toma, tɔbɔ nyuubu ane tɔbɔ lerebo, bee yeldɛgɛ yeluu. (1 Kor. 6:9, 10; 2 Kor. 7:1; Efe. 4:29) Ka hooŋ naŋ ba toɔ̃ e lɛ, naŋ moɔ̃ nimiri ka ho leɛ ho gyogo. Ho na baŋ yelko la neɛ na ho neŋ o naŋ zanna a Baabole na, bee a lantaapuoruu nembɛrɛ ka ba ko bo sommo ane sowuli naŋ na baŋ soŋ bo. Ka hooŋ naŋ e baapaalaa ka ho neŋ ho dɔgreba laŋkpeɛrɛ, yelko ba ka ba soŋ bo ka ho toɔ̃ bare gyogo zaa ho naŋ taa aŋ pigre ho suobu deebo sori.

16. Ka teneeŋ boɔrɔ ka te puoro Jehoova wagre zaa, bo aŋ seŋ ka te maŋ erɛ?

¹⁶ Aseŋ ka ho de a Kristabiiri lammore gaabo nimizeɛ, a maŋ de ho meŋɛ eŋ a lammo meŋ poɔŋ. (Hib. 10:24, 25) Ka hooŋ wa seŋ neŋ ka ho piili gɛrɛ a naaŋ moɔloo, maŋ mɔɔ kyɛ erɛ lɛ wagre zaa. Ka hooŋ moɔ̃ nimiri a maŋ gɛrɛ a naaŋ moɔloo wagre zaa, ho na nyɛrɛɛ popeɛloŋ yaga. (2 Tim. 4:5) Ka ho neŋ ho dɔgreba la naŋ laŋkpeɛrɛ, soore ho meŋɛ ka: ‘N dɔgreba la maŋ teɛre ma sɛre kyɛ maŋ gaa a lammozie bee a naaŋ moɔloo? Kyɛbee N maŋ eɛ lɛ N meŋɛŋ?’ Ka hooŋ toɔnɔ erɛ lɛ ho meŋɛŋ, lɛ wuleeŋ ka ho taa la sagediibu Jehoova eŋɛŋ a nɔmoo, a wulo nimipa meŋ a koroo ne yelsonne na zaa o naŋ e ko bo na. Ana yɛlɛ ŋa zaa eɛ “Naaŋmen boɔbo tuubu,” a e  kyɔɔtaare ho naŋ de koroo. (2 Pit. 3:11; Hib. 13:15) Kyɔɔtaare zaa te naŋ yi te poɔ zaa a de korɔ Naaŋmen, a maŋ pɛlɛɛ o poɔ. (De 2 Korinti 9:7 manne ne.) Ka teneeŋ wa yi te poɔ zaa a de boma te naŋ taa a sonnɔ Jehoova puoruu a maŋ vɛmeŋ teŋ taa popeɛloŋ.

17-18. Boŋ na baŋ soŋ bo ka ho nyɛ nimitɔɔre gaabo a wa de suobu? Ka sobuo aŋ na soŋ bo? (Yeng Yelibie 3:3-6)

¹⁷ Ka hooŋ wa mɔɔrɔ ka ho nyɛ nimitɔɔre gaabo a de suobu, ho na tuoree yelkpeɛne mine. Aminekaŋaŋ noba mine na erɛ boŋ seɛ ho sagediibu zuŋ, bee a gba dɔgrɔ bo. (2 Tim. 3:12) Ka hooŋ wa mɔɔrɔ ho mɔɔbo zaa ka ho bare yelfaa kaŋa eebo, ana baŋ wa ta la saŋa kaŋa ka ho te e ana yelfaa na. Bee saŋa kaŋa ho eŋɛ zaaŋ na maŋ kyoɔre hoŋ teɛre ka ho koŋ baŋ ta yɛlɛ na hoŋ de biŋ ho nimitɔɔreŋ na. Boŋ na baŋ soŋ bo? Yelkaŋa naŋ e nimizeɛ ana baŋ soŋ bo la ka ho nɔŋ Jehoova.

¹⁸ Ka hooŋ nɔŋ Jehoova a eɛ yɛlɛ naŋ soma yaga a gaŋ yelzaa. (Kanne Yeng Yelibie 3:3-6.) Ka nɔmmo ho naŋ taa ko Jehoova naŋ e kpeɛŋaa, ho na toɔ̃ arɛɛ yelkpeɛŋaa zaa hoŋ na tuore noɔreŋ. Gbɛɛ yaga a Baabole maŋ yelee yelmeŋɛ nɔmmo na Jehoova naŋ taa ko o puorebiiri na yɛlɛ. A yelmeŋɛ nɔmmo ŋa tɛgɛ la ka, Jehoova daŋ koŋ zagre o puorebiiri bare. Nɔmmo na o naŋ taa ko ba na daŋ koŋ baare zaa. (Yiem. 100:5) Naaŋmen maale boŋ o waaloŋ poɔŋ. (Mun. 1:26) Azuŋ wala hoŋ meŋ na baŋ toɔ̃ e a wulo ana nɔmmo ŋa tɔ?

19. Yelsonne na zaa Jehoova naŋ e ko bo na, sobuo hoŋ na baŋ wuluu nimipa? (Galesiya 2:20)

¹⁹ Te daŋ yel nimipa yɛlɛ. (1 Tɛs. 5:18) Bebiri zaa maŋ soore ho meŋɛ ka, ‘Sobuoŋ ka Jehoova wuli nɔmmo ko ma?’ Ka hooŋ wa puoro, maŋ mɔɔ kyɛ puore Jehoova bareka, a yel yɛlɛ na meŋɛ o naŋ e ko bo. Baŋ ka, yɛlɛ na zaa Jehoova naŋ erɛ korɔ bo na, o naŋ nɔŋ bo zuŋ oŋ maŋ eraa, aŋa lɛ bitontona Pɔɔl meŋ naŋ da wa nyɛ na. (Kanne Galesiya 2:20.) Soore ho meŋɛ ka, ‘Lɛ na Jehoova naŋ nɔŋ ma na vɛŋɛɛŋ maŋ meŋ boɔrɔ ka N wuli N nɔmmo koo bee?’ Ka hooŋ nɔŋ Jehoova a na soŋ boŋ ka ho toɔ̃ are ho pigrinyɛ ane ho yelkpeɛne noɔreŋ. Ana soŋ boŋ ka ho puoro Jehoova wagre zaa a maŋ wulo ho nɔmmo koroo bebiri zaa.

20. Ka hooŋ wa de ho meŋɛ ko Jehoova wala ka lɛ wuli, ka wala aŋ e nimizeɛ seŋ?

²⁰ Wagre naŋ gɛrɛ poɔŋ, nɔmmo ho naŋ taa  ko Jehoova na vɛmeŋ ka ho puore sɔroo, a de ho meŋɛ koo. Teɛre ka, ka hooŋ wa de ho meŋɛ ko Jehoova ho na taa la teɛretɔ kaŋa naŋ soma yaga zaa: Ho na eɛ o soobu a gɛrɛ wagre naŋ ba taa baaraa. Ka hooŋ wa de ho meŋɛ ko Jehoova, lɛ wuleeŋ ka ho emmooŋ noɔre ka, ka wagre kpeɛne bee wagre sonne poɔŋ la, kyɛ ho na puoruuŋ. Ka hooŋ wa eŋ a noɔre ŋa ko Jehoova, ho koŋ baŋ lɛ gaa puore te eŋ ana noɔre ŋa ko Jehoova zaa. Ka hooŋ wa de ho meŋɛ ko Jehoova a eɛ gbɛre naŋ e nimizeɛ yaga zaa ho naŋ de. Ho na de la gbɛɛ yaga naŋ soma ho zemmo poɔŋ, kyɛ kaŋa zaa koŋ soma seŋ ana gbɛre ŋa. (Yiem. 50:14) Setaana na mɔɔ la o mɔɔbo zaa ka o vɛŋ ka nɔmmo ho naŋ taa ko ho Saa na bale, o boɔbo zaa la ka o vɛŋ ka ho ta lɛ dire yelmennoŋ korɔ Jehoova. Ta wa korɔ Setaana vuo! (Joob 27:5) Ka hooŋ nɔŋ Jehoova yaga zaa, ana soŋ boŋ ka ho toɔ̃ paale noɔre na hoŋ eŋ koo na a puoruu tegitegilɛ, a kyɛ toɔ̃ tage peɛle ho Saa naŋ be sazuŋ na yaga zaa.

21. Ananso la wala teŋ na baŋ yelka ka hooŋ wa de suobu a ba baare be, kyɛ a piilee naŋ la lɛ?

²¹ Ka hooŋ wa de ho meŋɛ ko Jehoova baare, vɛŋ ka ho neŋ ho lantaapuoruu nembɛrɛ di dama a kyaare gbɛre naŋ e nimizeɛ aŋ seŋ ka ho lɛ de na. Wagre zaa maŋ teɛre ka, ka hooŋ wa de suobu baare a ba baare be, kyɛ a eɛ Jehoova puoruu piilee. A yi beŋ ho na baŋ puoree Jehoova tegitegilɛ. Azuŋ vɛŋ ka nɔmmo na ho naŋ taa ko ho Saa na e kpeɛŋaa pampana. De yɛlɛ mine hoŋ na baŋ erɛ ka lɛ vɛŋ ka ho nɔmmo ho naŋ taa koo maaleŋ erɛ kpeɛŋaa biŋ ho nimitɔɔreŋ. Ka hooŋ e lɛ a na eŋ boŋ faŋa ka ho de suobu. Ana bebiri na na eɛ popeɛloŋ bebiri. Kyɛ a piilee naŋ la lɛ. Azuŋ naŋ moɔ̃ nimiri a vɛnɛ ka nɔmmo ho naŋ taa ko Jehoova ane o Bidɔɔ maaleŋ erɛ kpeɛŋaa yaga zaa.