Ananso la wala ka a dɔɔ na a Baabole naŋ boɔle ka “N dɔɔ” da yelka o kyɛŋ na “sãã” la ka o naŋ de Ruut ka o e o pɔge? (Ruut 4:1, 6)

Takoreŋ saŋa na a Izerayɛl paaloŋ poɔŋ, ka dɔɔŋ de pɔge a kpi kyɛ ka a pɔge ba dɔge bie, boŋ maŋ pɔge a teŋgane naŋ e o soobu na? O yuori maŋ bɔreŋ kpɛlɛŋkpɛlɛŋ bee? Bege na Naaŋmen naŋ da de ko Moosis na iree a soorebie ŋa zaa nɔɛ.

Ka dɔɔŋ wa kpi, bee ka naŋ wa kpɛ o ka o koɔre o teŋgane, boŋ maŋ pɔge o teŋgane na? O yɔɔ kaŋa bee o dɔgrɔ kaŋa naŋ peɛloo yaga na baŋ leɛ da la ana teŋgane na. Lɛ na vɛmeŋ ka a teŋgane naŋ e a booree deme soobu.​—Liiv. 25:23-28; Sor. 27:8-11.

Sobuo ka lɛ na baŋ soŋ ka a dɔɔ naŋ kpi na booree yuori ta bɔre? A dɔɔ naŋ kpi na yɔɔ maŋ leɛ de la a pɔge na o naŋ kpi kyɛ bare na ka o neŋ o dɔge biiri ka a biiri iri de a dɔɔ naŋ kpi na yuori a toɔ̃ di o kyɛŋ. Ana yelsɛgraa ŋa da wulee nɔmmo yaga zaa bonso a da maŋ vɛmeŋ ka a ko-pɔge taa neɛ naŋ na kaara o zu.​—Dut. 25:5-7; Mat. 22:23-28.

Te leɛ nyɛ Nawomi zemmo yɛlɛ. O da kulee dɔɔ kaŋa baŋ da boɔlɔ Eliimelek. Saŋa na o serɛ neŋ o bidɔbɔ bayi naŋ wa kpi na, dɔɔ zaa da ba lɛ kyebe a na kaara o zu. (Ruut 1:1-5) Saŋa na Nawomi ane o naapɔge Ruut naŋ da leɛ gaa Gyuuda paaloŋ na, Nawomi da yelko la Ruut ka o sɔre Booaz ka o leɛ da o serɛ naŋ kpi na teŋgane. O da e la Eliimelek dɔgrɔ kaŋa naŋ peɛle o. (Ruut 2:1, 19, 20; 3:1-4) Kyɛ Booaz da baŋɛɛ dɔɔ kaŋa naŋ e Nawomi serɛ na dɔgrɔ naŋ peɛle ka o da a teŋgane ka a Baabole boɔloo ka “N dɔɔ.” O na la neɛ naŋ da e a dɛndɛŋ soba naŋ seŋ neŋ ka o leɛ da a teŋgane.​—Ruut 3:9, 12, 13.

A piilee na, a dɔɔ a Baabole naŋ boɔlɔ “N dɔɔ” na da boɔrɔŋ ka o soŋ. (Ruut 4:1-4) O da baŋɛɛŋ ka o na ŋmɛ la sane ka onaŋ leɛ da a teŋgane, kyɛ o da la nyɛɛŋ ka Nawomi korɛɛŋ yaga ka o dɔge bie naŋ na iri di Eliimelek teŋgane na kyɛŋ. Lɛ wuleeŋ ka a teŋgane na wa leɛ la a dɔɔ kyɛŋ, azuŋ a da waa ŋa tɔnɔ na yi la a yɛlɛ poɔŋ wa.

Kyɛ a dɔɔ ŋa da zagrɛɛŋ ka o leɛ da a teŋgane saŋa na oŋ wa nyɛ ka aseŋ ka o de Ruut ka o e o pɔge na. O da yeleeŋ ka: “N koŋ toɔ̃ yɔɔdeɛ o ko N meŋɛ a erɛ wa sãã N meŋɛ kyɛŋ.” (Ruut 4:5, 6) Ananso la wala oŋ da e lɛ?

Ka a dɔɔ ŋa bee dɔɔ zaala zaaŋ de Ruut ka o e o pɔge ka ba dɔge bidɔɔ, a bie na iri di la Eliimelek teŋgane na kyɛŋ. Sobuo ka lɛ na “sãã” a dɔɔ ŋa “kyɛŋ” na? A Baabole ba yel, kyɛ aminekaŋaŋ ananso mine bebeŋ.

• A dɛndɛŋ soba, a da waa ŋa a libie na oŋ na de da ne a teŋgane na na e la zaala, bonso Eliimelek teŋgane na koŋ e o soobu. O na leɛ la Ruut bidɔɔ soobu.

• A yiiloŋ soba, a na eɛ o ferebo toma ka o kaara Nawomi ane Ruut zu.

• A taaloŋ soba, ka Ruut neŋ a dɔɔ ŋaŋ wa dɔge biiri poɔ o biiri poɔŋ, ba zaa na laŋ di la a dɔɔ kyɛŋ.

• Anaare soba, ka a dɔɔ ŋaŋ ba la taa bie zaa poɔ, lɛ yɛŋ Ruut bidɔɔ naŋ na di la a dɔɔ teŋgane na kyɛŋ a poɔ Eliimelek deni na. Azuŋ a bie naŋ na di a dɔɔ ŋa teŋgane kyɛŋ na na taa la Eliimelek yuori kyɛ a dɔɔ ŋa yuori naane. Azuŋ ka a dɔɔ ŋa da ba boɔrɔ ka o soŋ Nawomi ka o kyɛŋ ta erɛ wa wɛ. O da ko la Booaz naŋ e neɛ naŋ tu o puoriŋ ka o da a teŋgane na sori ka o e lɛ. Booaz da eɛ lɛ bonso o da boɔrɔŋ ka “a [dɔɔ naŋ kpi na] yuori boɔlɔ o kyɛŋ eŋɛŋ.”​—Ruut 4:10.

A dɔɔ ŋa boɔbo zaa da la ka o naŋ kyɛnɛ taa o kyɛŋ ane o yuori. O da eɛ neɛ naŋ boɔrɔ o meŋɛ yoŋ boma. A dɔɔ ŋa da mɔɔrɛɛ o mɔɔbo zaa ka o go o yuori taa, kyɛ zenɛ ŋa neɛzaa ba baŋ o yuori. O da la kɔŋ la apoɔsori kpoŋ na Booaz naŋ da nyɛ na. Booaz da wa leɛ la Yezu Krista naŋ e a Mɛzaaya saaŋkoma na kaŋa. A dɔɔ ŋa naŋ da boɔrɔ o yoŋ boma na da nyɛɛ apoɔsori ka o soŋ Nawomi kyɛ oŋ zagre ka o e lɛ na, nyɛ lɛ o naŋ kɔŋ apoɔsori naŋ e kpoŋ seŋ lɛ!​—Mat. 1:5; Luk. 3:23, 32.