1-2. Boŋ aŋ seŋ ka neɛ e sɛre kyɛ de suobu?

 YUOMO anuu naŋ pare, noba naŋ gaŋ turituri wa de la suobu a leɛ Jehoova Sieree Deme. A noba ŋa yaga zie zaa, ba da wuli baŋ a yelmeŋɛ a yi ba biiloŋ saŋa, aŋa lɛ baŋ da wuli Timoti a yelmeŋɛ a yi o “biiloŋ saŋa” na. (2 Tim. 3:14, 15) Ba mine meŋ da leɛ la nembɛrɛ bee neŋnyaane sɛre kyɛ wa zanne Jehoova yɛlɛ. Saŋa kaŋa naŋ pare, pɔge kaŋa neŋ Jehoova Sieree Deme da zannɛɛ a Baabole oŋ wa de suobu saŋa na oŋ da nyɛ yuomo 97 na!

² Ka ho eɛ Baabole zannezanna bee ka ho dɔgreba naŋ e Jehoova Sieree Deme la guoli bo, ka hooŋ de biŋ ho nimitɔɔreŋ ka ho de suobu, a eɛ yɛlɛ naŋ soma yaga zaa! Kyɛ sɛre hoŋ na de suobu na, a na fɛreŋ ka ho de ho meŋɛ ko Jehoova sɛre. A zannoo ŋa na soŋ boŋ ka ho nyɛ lɛ a naŋ wuli ka neɛ de o meŋɛ ko Jehoova a de suobu. A zannoo ŋa na lɛ soŋ boŋ ka ho nyɛ ananso a naŋ ba seŋ ka ho zoro dabeɛ̃ ka ho de ho meŋɛ ko Jehoova a de suobu, ka hooŋ e siri ka ho e lɛ.

BO LA MEŊƐ DETEREBO?

3. Wuli noba mine naŋ da de ba menne ko Jehoova ka ba yɛlɛ be a Baabole poɔŋ.

³ A Baabole poɔŋ, ka ba naŋ wa yelka neɛ de la o meŋɛ ko Jehoova, a wuleeŋ ka ba iree o soba ka o toŋ toma mine naŋ e a yoŋ. A Izerayɛl biiri da eɛ noba naŋ de ba menne ko Jehoova. Kyɛ noba mine naŋ da be a paaloŋ poɔŋ da de la ba  menne ko Jehoova sori kaŋa naŋ e o yoŋ poɔŋ. Aŋa mannoo poɔŋ, a ŋmenpuore wedeɛrekpoŋ zupil na Aaron naŋ da maŋ vɔgle na da maŋ taa la “meŋɛ deterebo sieree bon naŋ pɛgeyi” o nimitɔɔreŋ, sanlii baŋ da de maaloo oŋ maŋ nyegrɛ. A lɛ sanlii bon na da eɛ sieree naŋ wuli ka ba iruuŋ ka o tonɔ toma naŋ e a yoŋ, ka o e a Izerayɛl biiri ŋmenpuore wedeɛrekpoŋ. (Liiv. 8:9) A Naazariti meŋ da eɛ noba naŋ da de ba menne ko Jehoova sori kaŋa naŋ e o yoŋ poɔŋ. A yelbiri “Naazariti,” yi la a Hiburu yelbiri nazirʹ, o tɛgɛ la ka “Neɛ Kaŋa Ba Naŋ Iri Biŋ,” bee “A Iri Tere.” A Naazariti da seŋ ka ba tuuro Bege na zaa Naaŋmen naŋ da de ko Moosis a kyaare a Naazariti na.​—Sor. 6:2-8.

4. (a) Ka hooŋ wa de ho meŋɛ ko Jehoova, bo yɛlɛŋ maŋ wa e nimizeɛ yaga ho zemmo poɔŋ? (b) Ka ba naŋ yelka neɛ “zagre” o meŋɛ bare wala ka lɛ wuli? (Kaa a foto meŋ.)

⁴ Ka hooŋ wa de ho meŋɛ ko Jehoova, ho ireeŋ ka ho na eɛ Yezu potuuribo na kaŋa, ka Naaŋmen boɔbo eebo e yɛlɛ naŋ e nimizeɛ ho zemmo poɔŋ a gaŋ yelzaa. Bo ferebo toma la ka Kristabie naŋ de o meŋɛ ko Jehoova taa? Yezu yeleeŋ ka: “Ka neɛzaaŋ boɔrɔ ka o tuuro ma, vɛŋ ka o soba zagre o meŋɛ bare.” (Mat. 16:24) A Giriki yelbiri ba naŋ leɛre ka “vɛŋ ka zagre o meŋɛ bare” na wuleeŋ ka “oŋ koŋ erɛ o meŋɛ boɔbo.” Ka hooŋ wa de ho meŋɛ ko Jehoova, aseŋ ka ho zagre yelzaa bee bonzaa neŋ o boɔbo naŋ ba kyaare taa. (2 Kor. 5:14, 15) Lɛ wuleeŋ ka, aseŋ ka ho zagre “a eŋgannoŋ toma,” aŋa mannoo poɔŋ peɛ̃mo toma. (Gal. 5: 19-21; 1 Kor. 6:18) Ka hooŋ tuuro a bege ŋa a na vɛŋeŋ ka ho zemmo e kpeɛŋaa ko bo bee? Ka hooŋ nɔnɔ Jehoova, a sagedi meŋ ka o bege zaa o naŋ ko te somaŋ, lɛ yɛŋ a koŋ e kpeɛŋaa ko bo. (Yiem. 119:97; Aiz. 48:17, 18) Te yɔɔdɔɔ kaŋa yuori naŋ di Nicholas yeleeŋ ka: “Ho na baŋ deɛ bege na Jehoova naŋ ko te na ka a eɛ kuree naŋ gare taa a pigre bo sori ka ho ta e yɛlɛ ho naŋ boɔrɔ bee a eɛ  kuree naŋ gare taa baŋ de pɔge gbeŋni oŋ koŋ baŋ nyɔge bo ɔɔ.”

5. (a) Wala hoŋ na baŋ e a de ho meŋɛ ko Jehoova? (b) Bo tɛɛtɛɛ la be meŋɛ deterebo ane suobu deebo kpakyagaŋ? (Kaa a foto meŋ.)

⁵ Wala hoŋ na baŋ e a de ho meŋɛ ko Jehoova? Ho na emooŋ noɔre puoro poɔŋ ka ona yoŋ hoŋ na puoro, a de o boɔbo eebo meŋ de weɛ ho zemmo poɔŋ. Lɛ na wuliŋ ka ho eŋnɛɛ Jehoova noɔre ka ho na nɔmooŋ “ne ho sukyiri zaa ane ho nyɔvore zaa ane ho teɛroŋ zaa ane ho faŋa zaa.” (Mak. 12:30) Ho na puoree a puoro ŋa ho yoŋ tɛgɛ, bonso a eɛ yɛlɛ naŋ be ho neŋ Jehoova yoŋ kpakyagaŋ. Kyɛ ho maŋ deɛ suobu yɛŋ neŋ yaga nimitɔɔreŋ; a wuli neɛzaa naŋ bebe ka ho de la ho meŋɛ ko Jehoova. Ho meŋɛ deterebo na eɛ puŋli biŋ naŋ e nimizeɛ yaga zaa, azuŋ aseŋ ka ho mɔɔrɔ ho moɔbo zaa ka ho paale a lɛ noɔre na, Jehoova meŋ kaarɛɛ soriŋ ka ho e lɛ.​—Ikil. 5:4, 5.

ANANSO LA WALA AŊ SEŊ KA HO DE HO MEŊƐ KO JEHOOVA?

6. Bonso ka neɛ maŋ de o meŋɛ ko Jehoova?

⁶ Bon na meŋɛ naŋ vɛŋ hoŋ de ho meŋɛ ko Jehoova la ka ho nɔmooŋ. A ba e yɛlɛ naŋ be ho sukyiriŋ yoŋ. Kyɛ “yɛlɛ bammo” ane “siiloŋ yɛŋ” na ho naŋ zanne yi Naaŋmen zie na la vɛŋ hoŋ wa nɔmoo. (Kol. 1:9) Ho Baabole zannoo na soŋ boŋ hoŋ wa sagedi (1) ka Jehoova bebeŋ meŋɛmeŋɛ, (2) ka a Baabole eɛ o Yelbiri oŋ de o vooroŋ soŋ soŋ baŋ sɛge, ane (3) ka o maŋ tu la o laŋnoɔre puoruu na eŋɛŋ kyɛ vɛŋ ka o boɔbo nyɛ eebo.

7. Bo aŋ seŋ ka te erɛ sɛre kyɛ de te menne ko Jehoova a de suobu?

⁷ Noba na naŋ maŋ de ba menne ko Jehoova seŋ ka ba baŋ yelnimizeere na naŋ be Naaŋmen Yelbiri na poɔŋ, a de a tonɔ neŋ toma ba zemmo poɔŋ meŋ. Ba maŋ mɔɔrɛɛ ba moɔbo zaa meŋ ka ba manne yɛlɛ na ba naŋ zanne na  korɔ ba taaba. (Mat. 28:19, 20) Nɔmmo ba naŋ taa ko Jehoova na maŋ wa eɛ kpeɛŋaa, ka ba sukyie yelboɔraa zaa la ka ba puoro ona yoŋ. Lɛ neŋ o zu hoŋ meŋ wa nyɛ bee? Ka hooŋ nɔŋ Jehoova neŋ ho sukyiri zaa, ho koŋ de ho meŋɛ koo a de suobu ho naŋ boɔrɔ ka ho pɛle ho Baabole wulwulo bee ho dɔgreba poɔ, bee ho zɔmenne zaa naŋ erɛ lɛ zuŋ.

8. Ka hooŋ taa nimipa, sobuo aŋ na baŋ soŋ bo ka ho de ho meŋɛ ko Jehoova? (Yieme 116:​12-14)

⁸ Ka hooŋ leɛteɛre yɛlɛ na zaa Jehoova naŋ e ko bo na, ho niŋe na paŋ yaga zaa ka ho boɔrɔ ka ho de ho meŋɛ koo. (Kanne Yieme 116:12-14.) A Baabole yeleeŋ ka Jehoova la Neɛ naŋ maŋ korɔ te “kyɔɔtaa zaa naŋ soma ane kyɔɔtaa zaa naŋ paale.” (Gyi. 1:17) A kyɔɔtaare ŋa zaa kpoŋ soba la o Bidɔɔ Yezu yɔɔdeɛbo sareka na. Hooŋ leɛteɛre a lɛ yɔɔdeɛbo na yɛlɛ soŋ a nyɛ! A yɔɔdeɛbo ŋa la vɛŋ ka ho neŋ Jehoova wa taa niiloŋ naŋ soma. O ko boŋ apoɔsori meŋ hoŋ na baŋ nyɛ nyɔvore naŋ ba taa baaraa. (1 Gyn. 4:9, 10, 19) Ka hooŋ de ho meŋɛ ko Jehoova, a eɛ sori na kaŋa naŋ soma yaga zaa hoŋ na baŋ tu a wuli nimipa ko Jehoova ane nɔmmo na o naŋ wuli yaga zaa ko bo na, ane maaloo na zaa o naŋ ko bo na. (Dut. 16:17; 2 Kor. 5:15) A nimipa yɛlɛ ŋa mine be la a Nyɛ Zeŋ Laafeɛ Tegitegilɛ!​ gane na poɔŋ o zannoo 46, yelzu bile 4 poɔŋ, ka minti 3 vidio kaŋa meŋ bebe, o yelzu la, Te De Boma Na Teŋ Taa Na A Iri Sareka Ko Naaŋmen.

HO EƐ SIRI KA HO DE HO MEŊƐ KO JEHOOVA A DE SUOBU BEE?

9. Ananso la wala aŋ ba seŋ ka neɛzaa fere o meŋɛ a de gbɛre ka a de o meŋɛ ko Jehoova?

⁹ Aminekaŋaŋ ho na teɛrɛŋ ka ho ba e siri ka ho de ho meŋɛ ko Jehoova a de suobu. Ane meŋ aseŋ ka ho e leɛroo mine ho zemmo poɔŋ ka ane Jehoova bege kyaare taa, bee aminekaŋaŋ aseŋ ka ho maaleŋ eŋ ho sagediibu faŋa yaga. (Kol. 2:6, 7) Baabole zannezanna zaa maŋ taaɛ lɛ aŋ na kɔɔre seŋ sɛre kyɛ ka o wa nɔŋ Jehoova, bie zaa meŋ maŋ taa la yuomo na oŋ na nyɛ sɛre kyɛ baŋ nyɛ nimitɔɔre gaabo a de o meŋɛ ko Jehoova a de suobu. Mɔɔ kyɛ baŋ ziiri na a naŋ seŋ ka ho e leɛroo a poɔŋ a kyɛ ta de ho meŋɛ manna neŋ ho taaba.​—Gal. 6:4, 5.

10. Boŋ hoŋ na baŋ e ka hooŋ wa nyɛ ka ho ba e siri ka ho de ho meŋɛ ko Jehoova a de suobu? (Kaa a daga ŋa meŋ, “ Bana Na Ba Naŋ Guoli Ba A Yelmeŋɛ Poɔŋ.”)

¹⁰ Ka hooŋ nyɛ ka ho naŋ ba e siri ka ho de ho meŋɛ ko Jehoova gba, kyɛ ho naŋ na baŋ de la a yɛlɛ biŋ ho nimitɔɔreŋ. Puore sɔre Jehoova ka o soŋ bo ka ho toɔ̃ e leɛroo zaa naŋ seŋ neŋ ho zemmo poɔŋ. (Fil. 2:13; 3:16) Ho na baŋ sagediŋ peɛlaaŋ ka o na sagɛɛ ho puoro na a kyɛ soŋ bo meŋ.​—1 Gyn. 5:14.

ANANSO BA MINE NAŊ MAŊ ZORO DABEƐ̃ KA BA DE BA MENNE KO JEHOOVA A DE SUOBU

11. Sobuo ka Jehoova na soŋ te ka te dire yelmennoŋ koroo?

¹¹ Noba mine maŋ eɛ siri ka ba de ba menne ko Jehoova a de suobu, kyɛ dabeɛ̃ ba maŋ sage ka ba e lɛ. Ba maŋ yeleŋ ka, ‘Ka maaŋ wa de suobu baare a e yelfaa kaŋa naŋ e nimizeɛ, ba na iri maŋ bare a lantaapuoruu poɔŋ.’ Ka hooŋ taa a lɛ dabeɛ̃ ŋa tɔ, baŋ ka Jehoova na ko boŋ bonzaa yɛlɛ naŋ ferɛbo ka ho na “taa [ho nyɔvore] aseŋ lɛ a Daana naŋ boɔrɔ.” (Kol. 1:10) O na ko boŋ a faŋa meŋ ka ho erɛ yɛlɛ naŋ soma. O toɔ̃ soŋ la noba yaga baŋ erɛ yɛlɛ naŋ soma, o na soŋ la ho meŋ. (1 Kor. 10:13) Lɛŋ vɛŋ ka noba ba naŋ maŋ iri yi a Krista lantaapuoruu poɔŋ na ba e yaga. Jehoova maŋ soŋ la o noba baŋ dire yelmennoŋ koroo.

12. Boŋ na baŋ soŋ te ka te ta de te menne eŋ yelfaare naŋ e nimizeɛ̃ eebo eŋɛŋ?

¹² Nensaalaa zaa naŋ ba pɛgeyi maŋ tuoree pigrinyɛ ka o e yelfaare. (Gyi. 1:14) Kyɛ a be la ho zieŋ ka ho de gbɛre ka hooŋ wa tuore  pigrinyɛ, ka ho na eŋ bee ka ho koŋ e. A yelmeŋɛ la ka ho na baŋ e la yelzaa ho naŋ boɔrɔ ho zemmo poɔŋ. Noba mine maŋ yeleŋ ka ka hooŋ wa taa a vɔlaa ka ho e yelkaŋa, ho koŋ baŋ nyɔge ho meŋɛ a ta e a yelbalaa. Kyɛ zirii lɛ. Azuŋ ka vɔlfaareŋ wa wa ho sukyiriŋ, ho na baŋ zagraaŋ bare. Yɛlɛ mine na baŋ soŋ boŋ ka ho zagre vɔlfaare. Aŋa mannoo poɔŋ, ho na baŋ puore sɔrɛɛ Jehoova bebiri zaa, a maŋ zanna Naaŋmen Yelbiri na ho meŋɛŋ wagre zaa, a maŋ gɛrɛ a Kristabiiri lammore, a kyɛ maŋ manna ho sagediibu yɛlɛ meŋ korɔ noba. Ka hooŋ maŋ erɛ a yɛlɛ ŋa wagre zaa, a na soŋ boŋ a ko bo a faŋa ka ho dire yelmennoŋ korɔ Jehoova. Daŋ ta wa inne zaa ka Jehoova na soŋ boŋ ka ho toɔ̃ e lɛ.​—Gal. 5:16.

13. Bo ewuli soŋ la ka Gyoosɛf e wuli te?

¹³ Ka hooŋ daŋ de gbɛre a kyaare lɛ hoŋ na e ka hooŋ wa tuore pigrinyɛ, a na eɛ mɔlɔ ko bo ka ho di yelmennoŋ ko Jehoova ka hooŋ wa tuore pigrinyɛ. A Baabole wuli teŋ noba mine meŋ naŋ da e a yɛlɛ ŋa aneazaa ka ba meŋ da eɛ nensaaleba naŋ ba pɛgeyi. Aŋa mannoo poɔŋ, gbɛɛ yaga Pɔtifa pɔge da boɔrɔŋ ka o bɛnle Gyoosɛf ka o gaŋ ne o. Kyɛ o da baŋɛɛ gbɛre a naŋ seŋ ka o de. A Baabole yeleeŋ ka ‘Gyoosɛf da zagrɛɛŋ,’ a kyɛ yelka: “Wala maŋ na toɔ̃ e a yelfaa ŋa naŋ e kpoŋ seŋ ŋaaŋ a kyaare ne Naaŋmen?” (Mun. 39:8-10) A pɛlɛɛŋ ka, sɛre kyɛ ka a pɔge gba na wa e Gyoosɛf nyɛ na, o da baŋɛɛ gbɛre na a naŋ seŋ ka o de. Lɛ da vɛŋɛɛŋ aŋ e mɔlɔ koo ka o e yɛlɛ naŋ soma saŋa na oŋ da wa tuore pigrinyɛ na.

14. Wala teŋ na baŋ e a baŋ lɛ teŋ na e a zagre pigrinyɛ?

¹⁴ Ka hooŋ wa tuore pigrinyɛ, wala hoŋ na baŋ e tɔgle Gyoosɛf a zagre a pigrinyɛ bare? Ho na baŋ de la gbɛre pampana a kyaare yɛlɛ hoŋ na e ka hooŋ wa tuore pigrinyɛ. Ka hooŋ wa tuore pigrinyɛ ka ho e yɛlɛ mine Jehoova naŋ kyiiri, maŋ zagraa bare tɔntɔbaalɛ, a gba ta teɛrɛ a yɛlɛ. (Yiem. 97:10; 119:165) Ka hooŋ toɔ̃ e lɛ, ho koŋ te e yelfaa ka hooŋ wa tuore pigrinyɛ. Ho na baŋɛɛ yɛlɛ na a naŋ seŋ ka ho e. A baŋ gbɛre na anaŋ seŋ ka ho de.

15. Wala ka neɛ na baŋ e a wuli ka o “moɔ̃ la niŋe a boɔrɔ” Jehoova? (Hiburu 11:6)

¹⁵ Aminekaŋaŋ ho nyɛɛŋ ka a yelmeŋɛ puoruu la ŋa, a boɔrɔ ka ho de ho sukyiri zaa meŋ a puoro Jehoova, kyɛ ho teɛrɛ ka ho naŋ ba e siri ka ho de ho meŋɛ ko Jehoova a de suobu. Ho na baŋ eɛ yɛlɛ na Naa Deevid naŋ da e na. Ho na baŋ puore sɔrɛɛ Jehoova a yelka: “Oo Naaŋmen, peɛre ma a nyɛ, a baŋ N sukyiri. Peɛre ma velaa zaa a baŋ N gaŋ koŋ gbiri teɛrɛ.  Peɛre ma a nyɛ ka so-faa kaŋa be la N eŋɛŋ bee, a de ma weɛ a tuuro a sori naŋ bebe tegitegilɛ na.” (Yiem. 139:​23, 24) Jehoova maŋ ko la “noba na zaa naŋ moɔ̃ niŋe a boɔroo” na maaloo. Ho naŋ mɔɔrɔ ho moɔbo zaa ka ho sɛgre ho meŋɛ a de ho meŋɛ koo a de suobu na wuleeŋ ka ho erɛɛ a yɛlɛ ŋa.​—Kanne Hiburu 11:6.

MOƆ̃ NIMIRI A TAGRA PEƐLƐ JEHOOVA

16-17. Wala ka Jehoova maŋ e tage noba na ba naŋ guoli ba a yelmeŋɛ poɔŋ na baŋ wa o seŋ? (Gyɔɔn 6:44)

¹⁶ Yezu yeleeŋ ka Jehoova la maŋ tage noba baŋ wa leɛ o potuuribo. (Kanne Gyɔɔn 6:44.) Teɛre nyɛ lɛ a yɛlɛ ŋa naŋ e nɔmãã yaga zaa ane lɛ a yɛlɛ ŋa naŋ kyaare bo. Neɛzaa Jehoova naŋ tage wa o seŋ, o maŋ nyɛɛ yelsoŋ kaŋa o soba eŋɛŋ. O maŋ nyɛɛ a soba ka o eɛ “o meŋɛ [neɛ],” bee “o bon nanee naŋ e tegroŋ yaga zaa.” (Dut. 7:6.) Lɛ hoŋ meŋ e nanee yaga zaa a koo.

¹⁷ Aminekaŋaŋ ho eɛ baapaalaa ka ho dɔgreba guoli bo a yelmeŋɛ poɔŋ. Aminekaŋaŋ ho na teɛreŋ ka ho dɔgreba naŋ puoro Jehoova na zuŋ hoŋ meŋ puoruu, kyɛ Jehoova meŋɛ naaneŋ tage bo wa o seŋ. Kyɛ a Baabole yeleeŋ ka: “Tage peɛle Naaŋmen, o meŋ na tage peɛle bo la.” (Gyi. 4:8; 1 Tun. 28:9) Ka hooŋ wa de gbɛre ka ho tage peɛle Jehoova, o meŋ na tage peɛle boŋ. Jehoova ba nyɛ ka ho poɔ la o puorebiiri poɔŋ yoŋ. Kyɛ Jehoova la maŋ tage neɛzaa wa o seŋ, ane bana na zaa banaŋ guoli ba a yelmeŋɛ poɔŋ na. Ka a sobaŋ wa de gbɛre ka o tage peɛle Jehoova, O meŋ maŋ tage peɛlooŋ aŋa lɛ Gyimisi 4:8 naŋ yel na.​—De manne 2 Tɛsalonika 2:13.

18. Boŋ teŋ na zanne a zannoo naŋ tɔnne na poɔŋ? (Yieme 40:8)

¹⁸ Ka hooŋ wa de ho meŋɛ ko Jehoova a de suobu, lɛ wuleeŋ ka ho tɔglɛɛ Yezu. O da yi la o poɔ zaa a de o meŋɛ ko o Saa, a da maŋ erɛ yelzaa o Saa naŋ yelka o erɛ. (Kanne Yieme 40:8; Hib. 10:7) A zannoo naŋ tɔnne na poɔŋ, te na zanne nyɛɛ yɛlɛ naŋ na baŋ soŋ bo ka ho moɔ̃ nimiri a puoro Jehoova yelmennoŋ poɔŋ ho suobu deebo puoriŋ.