1-2. (a) Bo yɛlɛ poɔŋ ka Pɔɔl da be saŋa na oŋ da sɛgrɛ a lɛtɛ korɔ a Kristabiiri naŋ da be Efesu na, ka ananso la wala oŋ da sɛge a lɛtɛ ko ba? (b) Bo soorebie teŋ na nyɛ a nɔɛ iribo?

 SAŊA na baŋ da nyɔge bitontona Pɔɔl pɔge o meŋɛ dieŋ na, o da naŋ boɔrɔŋ ka o eŋ o yɔɔmine faŋa. O da koŋ baŋ gaa ba zie a te puore ba, azuŋ o da sɛgɛɛ lɛtare ko ba. O da sɛgɛɛ a lɛtɛ ŋa kaŋa aminekaŋaŋ yuoni 60 bee 61 C.E. poɔŋ a ko Kristabiiri naŋ da be Efesu na.​—Efe. 1:1; 4:1.

² Aŋa yuomo pie mine naŋ pare, Pɔɔl da manna la a duorisoŋ korɔ noba a kyɛ wulo noba Naaŋmen yɛlɛ Efesu paaloŋ. (Tom. 19:1, 8-10; 20:20, 21) O da nɔnɔ la o yɔɔmine na yaga zaa a da boɔrɔ ka o soŋ ba ka ba naŋ puoro Jehoova yelmennoŋ poɔŋ. Kyɛ ananso la wala oŋ da sɛge ligroŋ ane kyaanee yɛlɛ ko Kristabiiri ba naŋ sɔ naaloŋ kãã na? Ka boŋ ka Kristabiiri zaa na baŋ zanne yi yɛlɛ na o naŋ sɛge na poɔŋ? Te na nyɛɛ a soorebie ŋa nɔɛ iribo a zannoo ŋa poɔŋ.

A YI LIGROŊ A GAA KYAANEE

3. Bo yelbie la ka Pɔɔl da de manne yɛlɛ o lɛtɛ na oŋ da sɛge ko a Efesu deme na poɔŋ?

³ Pɔɔl da sɛge ko la a Kristabiiri naŋ be Efesu na ka: “Yɛ da be la ligroŋ poɔŋ, kyɛ pampana ŋa yɛŋ, yɛ waa la kyaanee.” (Efe. 5:8) Pɔɔl da de la a yelbie ŋa, ligroŋ ane kyaanee a manne neŋ yɛlɛ a wuli lɛ a Efesu deme naŋ e leɛroo yaga zaa ba zemmo poɔŋ. Yɛ vɛŋ ka te nyɛ ananso naŋ vɛŋ ka Pɔɔl da yelka a Kristabiiri ŋa da “be la ligroŋ poɔŋ.”

4. Sobuo ka a Efesu deme na da be ligroŋ poɔ ŋmenpuore yɛlɛ poɔŋ?

 ⁴ Ba da be la ligroŋ poɔ zirii puoruu zuŋ. Sɛre kyɛ ka a Efesu deme na Pɔɔl naŋ da sɛge a lɛtɛ ŋa ko na wa zanne a yelmeŋɛ a leɛ Kristabiiri na, ba da be la zirii puoruu poɔŋ a da sage sefaare yel-eree meŋ di. Efesu teŋkpɛŋ na poɔŋ ka Ateme teebo na puoredie da be. A lɛ saŋa na, noba da nyɛɛŋ ka a puoredie ŋa eɛ bon seɛlee na kaŋa nensaaleba naŋ mɛ. Noba da maŋ gaa la a puoredie ŋa ka ba te puore tebɛ. Noba naŋ da maala a Ateme teebo ŋa ane a puoredie boma a koɔrɔ na da nyɛrɛɛ libie yaga zaa. (Tom. 19:23-27) Noba yaga zie meŋ naŋ da be Efesu teŋɛ na da maŋ erɛɛ sɔyɛlɛ.​—Tom. 19:19.

5. Sobuo teŋ na baŋ yelka a Efesu deme da be la ligroŋ poɔ ba gyogri na zuŋ?

⁵ Ba da be la ligroŋ poɔŋ bonso ba da taa la gyog-dɛgɛ. Noba naŋ be Efesu na da taa la gyog-dɛgɛ yaga zaa a da ba zoro vi neŋ gyog-dɛgɛ na poɔŋ baŋ da be na. Gbɛɛ yaga, deɛne na baŋ da maŋ deɛnɛ ba deɛŋ zieŋ ka noba te kaara ane ba puoruu lammore zaa da maŋ kyaarɛɛ gaŋneŋ taa yɛlɛ. (Efe. 5:3) Noba yaga zie zaa naŋ da be Efesu da “ba la zoro vi, kyɛ erɛ nemboŋyɛlɛ,” lɛ wuleeŋ ka “a da ba lɛ dɔnnɔ ba zomma fẽẽ zaa.” (Efe. 4:17-19) Sɛre kyɛ baŋ wa zanne baŋ yɛlɛ naŋ soma ane yɛlɛ naŋ ba soma Jehoova nimitɔɔreŋ na, ba da maŋ erɛɛ yelfaare kyɛ ka ba zomma ba dɔnnɔ ba. Ba baga meŋ da kye lɛ Jehoova naŋ teɛre kyaare yɛlɛ na ba naŋ erɛ na. Azuŋ ka Pɔɔl da yelka “a ba teɛroŋ be la lige poɔ, ka ba ba poɔ a nyɔvore Naaŋmen naŋ terɛ poɔ.”

6. Ananso la wala ka Pɔɔl da yelka a Efesu deme waa la “kyaanee pampana”?

⁶ Kyɛ a Efesu noba mine da yi la ligroŋ poɔŋ. Pɔɔl da sɛgɛɛŋ ka “pampana ŋa yɛŋ, [ba] waa la kyaanee a Daana eŋɛŋ.” (Efe. 5:8) Pampana ŋa yɛŋ ba de la Jehoova Yelbiri tonɔ neŋ toma ba zemmo poɔŋ, aŋ pãã da waa ŋa kyaanee naŋ kyaana ba sori. (Yiem. 119:105) A Efesu noba ŋa da barɛɛ zirii puoruu ane gyog-dɛgɛ na zaa baŋ da taa na. Ba da “tɔglɔ [la] Naaŋmen” a da mɔɔrɔ ba moɔbo zaa ka ba puoro Jehoova a erɛ o popɛle yɛlɛ.​—Efe. 5:1.

7. Sobuo ka te yɛlɛ ane a Kristabiiri naŋ da be Efesu na yɛlɛ yi taa?

 ⁷ Lɛ meŋ la, sɛre kyɛ teŋ meŋ wa zanne a yelmeŋɛ na, te da be la ligroŋ poɔŋ bonso te da be la zirii puoruu ane gyog-dɛgɛ poɔŋ. Te mine da maŋ di la zirii puoruu tige mine; te mine meŋ da taa la gyog-dɛgɛ mine. Kyɛ saŋa na teŋ wa zanne yɛlɛ naŋ soma ane yɛlɛ naŋ ba soma Jehoova nimitɔɔreŋ na, te da eɛ leɛroo mine. Te da piileeŋ a erɛ yɛlɛ naŋ soma te zemmo poɔŋ. Ka lɛ vɛŋ teŋ nyɛ tɔnɔ yaga zaa a yi be. (Aiz. 48:17) Kyɛ pampana ŋa te tuoree yelkpeɛne mine. Azuŋ aseŋ ka te mɔɔ te moɔbo zaa a tage te menne yi ligroŋ na poɔ te naŋ zo yi na, kyɛ “naŋ moɔ̃ niŋe a kyɛnɛ aŋa kyaanee biiri.” Sobuo teŋ na baŋ tu a e lɛ?

TAGE HO MEŊƐ YI A LIGROŊ POƆ

8. Aŋa lɛ Efesu 5:3-5 naŋ yel na, bo yɛlɛ la aŋ da seŋ ka a Efesu deme tage ba menne yi a eŋɛŋ?

⁸ Kanne Efesu 5:3-5. Yɛlɛ naŋ da soŋ a Kristabiiri naŋ be Efesu baŋ tage ba menne yi a ligroŋ poɔ la ka, ba da zagrɛɛ gyog-dɛgɛ a kyɛ moɔ̃ nimiri a bare yel-eree zaa naŋ sããna Jehoova poɔ. Peɛ̃mo toma yoŋ naane baŋ da zagre bare kyɛ ba da barɛɛ yeldɛgɛ yeloo meŋ. Pɔɔl da teɛrɛɛ a Efesu deme ka neɛzaa naŋ be a gyog-dɛgɛ ŋa taa poɔŋ “koŋ kpɛ a Krista ane te Naaŋmen na Naaloŋ na poɔ.”

9. Ananso la wala aŋ seŋ ka te zagre yelzaa naŋ na baŋ tage te eŋ peɛ̃mo toma poɔŋ?

⁹ Aseŋ ka te meŋ mɔɔrɔ te moɔbo zaa ka te ta de te “nu poɔrɔ a ligroŋ toma naŋ ba taa tɔnɔ poɔ.” (Efe. 5:11) Yelmeŋɛ la ka ka neɛŋ wa kaara, kyɛllɛ, bee a yele yeldɛgɛ bee peɛ̃mo toma yɛlɛ, a maŋ eɛ mɔlɔ lɛ ka o soba de o meŋɛ eŋ a lɛ yeldɛgɛ na poɔŋ. (Mun. 3:6; Gyi. 1:14, 15) Paaloŋ kaŋa poɔŋ, te yɔɔmine yaga zaa da wa laŋ la taa a taa zie kaŋa ba naŋ maŋ dire dama social media zuŋ. A piilee na ba yaga zie da maŋ yelee Jehoova ane o puoruu yɛlɛ. Kyɛ fẽẽfẽẽ fẽẽfẽẽ ba da piileeŋ a yele yɛlɛ naŋ ba pɛlɛ Jehoova poɔ. Ka ba dama diibu zaa da maŋ leɛ kyaare gaŋ neŋ taa yɛlɛ yoŋ. A te yɔɔmine ŋa mine da yeleeŋ ka a lɛ yeldɛgɛ yeloo na da vɛŋɛɛŋ baŋ de ba menne te eŋ peɛ̃mo toma poɔŋ.

10. Sobuo ka Setaana maŋ tu a boɔrɔ ka o bɛnle te? (Efesu 5:6)

¹⁰ Setaana donɛɛ ŋa maŋ boɔrɔŋ ka o bɛnle te ka te sagedi ka yɛlɛ na Jehoova naŋ yelka a eɛ yeldɛgɛ a ba soma na ba e yelfaa zaa. (2 Pit. 2:19) A yɛlɛ ŋa ba e te nɔmãã! Gbɛɛ yaga a Dɛɛvul maŋ mɔɔrɔŋ ka o gyɛre noba teɛroŋ ka ba ta toɔ̃ baŋ yɛlɛ naŋ soma ane yɛlɛ naŋ ba soma. (Aiz. 5:20; 2 Kor. 4:4) Azuŋ a ba seŋ ka a e te nɔmãã ka vidiori, yɛlɛ ba naŋ iri TV zuŋ, ane intanɛt zu yɛlɛ neŋ Jehoova bege naŋ ba maŋ kyaare taa! Setaana maŋ boɔrɔŋ ka o bɛnle te ka te teɛrɛ ka yeldɛgɛ ane peɛ̃mo toma yel-eree na zaa noba naŋ maŋ erɛ a donɛɛ poɔŋ na ba e yelfaa zaa, ka a na baŋ ko teŋ popeɛloŋ, ka dɔgɛɛ zaa meŋ koŋ yi a poɔŋ wa.​—Kanne Efesu 5:6.

11. Sobuo ka Angela zemmo yɛlɛ na wuli ka yɛŋ bebeŋ ka te de kawane naŋ be Efesu 5:7 na toŋ neŋ toma? (Kaa a foto meŋ.)

¹¹ Setaana boɔrɔŋ ka te maŋ de te menne laŋna neŋ noba naŋ na vɛŋ ka a e kpeɛŋaa ko te ka te tuuro Jehoova bege. Lɛŋ vɛŋ ka Pɔɔl da kpãã a Efesu deme ka: “Yɛ ta wa derɛ yɛ nuure poɔrɔ ba yel-eree na eŋɛŋ,” bana na naŋ erɛ yɛlɛ naŋ ba soma Naaŋmen nimitɔɔreŋ na. (Efe. 5:7) Kyɛ aseŋ ka te maaleŋ kaara soŋ yaga zaa a gba gaŋ a takoreŋ saŋa Efesu deme na. Bonso zenɛ ŋa te neŋ noba naŋ maŋ kpara yoŋ naane noba te neŋ ba naŋ maŋ laŋna, kyɛ noba te neŋ ba naŋ maŋ dire dama social media zu meŋ poɔyɛŋ. Angela a naŋ be Asia paaloŋ da wa nyɛɛ lɛ social media naŋ na  baŋ wane dɔgroŋ aseŋ. O yeleeŋ ka: “A na baŋ eɛ kyɛbaa, fẽẽfẽẽ fẽẽfẽẽ a na baŋ leɛrɛɛ ho teɛroŋ. A wa ta la saŋa kaŋa a da ba lɛ dɔnnɔ ma ka N nyɔge ‘zɔmenne’ neŋ noba naŋ ba de Baabole sowuli tonɔ neŋ toma ba zemmo poɔŋ. A baaraa zaa N da wa piili teɛrɛŋ ka a ba E YELFAA ZAA ka maaŋ erɛ yɛlɛ naŋ ba pɛlɛ Jehoova poɔ.” Kyɛ a lantaapuoruu nembɛrɛ mine naŋ taa nɔmmo da soŋ la Angela oŋ e leɛroo naŋ seŋ neŋ. O yeleeŋ ka: “Pampana ŋa N maŋ de la N teɛroŋ zaa eŋ Jehoova yɛlɛ eŋɛŋ a gaŋ social media zu yɛlɛ.”

12. Boŋ na baŋ soŋ te ka te tuuro Jehoova bege naŋ kyaare yɛlɛ naŋ soma ane yɛlɛ naŋ ba soma?

¹² Aseŋ ka te zagre teɛroŋ na a donɛɛ naŋ taa ka gyog-dɛgɛ ba e yelfaa zaa na bare. Te baŋɛɛŋ ka a ba soma. (Efe. 4:19, 20) Kyɛ a na somaŋ ka te maŋ soore te menne ka: ‘Ka lɛ N maŋ mɔɔ la N moɔbo zaa ka N ta laŋna neŋ N tontoŋ taaba, sakuu bitaaba, ane noba naŋ ba de Jehoova bege tonɔ neŋ toma bee? Ka lɛ N maŋ de la nyaa a tuuro Jehoova bege ka noba gbaŋ wa teɛrɛ ka N yɛlɛ eɛ tuo te gaali bee?’ Aŋa lɛ 2 Timoti 2:20-22 naŋ yel na, aseŋ ka te maŋ kaara soŋ meŋ ka teneeŋ wa ire zɔmenne a Krista lantaapuoruu poɔŋ. Aseŋ ka te teɛre baŋ ka ba mine koŋ baŋ soŋ te ka te moɔ̃ nimiri a puoro Jehoova yelmennoŋ poɔŋ.

YƐ ERƐ YƐ YƐLƐ “AŊA KYAANEE BIIRI”

13. Ka ba naŋ yelka te “kyɛnɛ aŋa kyaanee biiri” wala ka lɛ wuli? (Efesu 5:7-9)

¹³ Pɔɔl da eŋɛɛ a Efesu Kristabiiri na faŋa ka ba zagre a ligroŋ a kyɛ moɔ̃ nimiri “a kyɛnɛ aŋa kyaanee biiri.” (Kanne Efesu 5:7-9.) Wala ka lɛ wuli? Lɛ wuleeŋ ka te maŋ erɛ te yɛlɛ aŋa Kristabiiri wagre zaa. Yelkaŋa naŋ na baŋ soŋ te ka te e lɛ la ka, te maŋ moɔ̃ nimiri a kanna a kyɛ zanna Naaŋmen Yelbiri na ane gama na ba naŋ maŋ kaa a Baabole poɔŋ kyɛ maale na. Agaŋaazaa a eɛ nimizeɛ ka te maŋ zanna Yezu Krista naŋ e “a andonɛɛ kyaanee” na ewuli sonne, ane yɛlɛ oŋ da maŋ wulo noba na.​—Gyn. 8:12; Yeng. 6:23.

14. Sobuo ka a vooroŋ soŋ na baŋ soŋ te?

¹⁴ Naaŋmen vooroŋ soŋ na meŋ na baŋ soŋ teŋ ka te erɛ te yɛlɛ “aŋa kyaanee biiri.” Bonso, a ba e mɔlɔ ka te tage te menne yi a donɛɛ yeldɛgɛ eŋɛŋ. (1 Tɛs. 4:3-5, 7, 8) A vooroŋ soŋ  na baŋ soŋ teŋ ka te zagre a donɛɛ ŋa teɛroŋ, ba yɛŋ baŋ yɛlɛ ane yɛlɛ zaa neŋ Naaŋmen teɛroŋ naŋ ba kyaare taa na bare. A vooroŋ soŋ na baŋ lɛ soŋ teŋ ka te erɛ “sonnoŋ boorɔ zaa.”​—Efe. 5:9.

15. Sobuo teŋ na baŋ nyɛ a vooroŋ soŋ? (Efesu 5:19, 20)

¹⁵ Sori na kaŋa teŋ na baŋ nyɛ a vooroŋ soŋ la ka te maŋ puore sɔre Naaŋmen ka o ko te a vooroŋ soŋ. Yezu yeleeŋ ka Jehoova na de la o “vooroŋ soŋ na ko noba naŋ sɔroo.” (Luk. 11:13) Ka teneeŋ wa laŋ taa a Kristabiiri lammore saŋa a pugiro Jehoova, o maŋ ko teŋ o vooroŋ soŋ na. (Kanne Efesu 5:19, 20.) Teɛroŋ soŋ na a vooroŋ soŋ naŋ maŋ soŋ te teŋ taa na na baŋ soŋ teŋ ka te maŋ erɛ yɛlɛ naŋ pɛlɛ Naaŋmen poɔ.

16. Boŋ na baŋ soŋ te ka te de gbɛ-sonne? (Efesu 5:10, 17)

¹⁶ Ka teneeŋ wa boɔrɔ ka te de gbɛre kaŋa naŋ e nimizeɛ te zemmo poɔŋ, aseŋ ka te peɛre baŋ “yɛlɛ naŋ soma a Daana nimitɔɔreŋ” a de toŋ neŋ toma. (Kanne Efesu 5:10, 17.) Ka teneeŋ wa nyɛ Baabole sowuli naŋ kyaare te yɛlɛ na, lɛ na wuliŋ ka te sereŋ boɔrɛɛ Naaŋmen teɛroŋ a kyaare a yɛlɛ. Ka teneeŋ pãã wa de o sowuli na toŋ neŋ toma, a na soŋ teŋ ka te de gbɛ-sonne.

17. Wala teŋ na baŋ e a maŋ de te wagre tonɔ neŋ toma soŋ? (Efesu 5:15, 16) (Kaa a foto meŋ.)

¹⁷ Pɔɔl da la ko la a Efesu Kristabiiri na kawane ka ba maŋ de ba wagre tonɔ neŋ toma soŋ. (Kanne Efesu 5:15, 16.) “A neŋfaa,” naŋ e te dɔndɔma Setaana boɔbo la ka o vɛŋ ka a donɛɛ ŋa yeltaree deɛ te wagre zaa ka te koŋ lɛ taa wagre zaa ko Naaŋmen puore yɛlɛ. (1 Gyn. 5:19) Ka Kristabieŋ ba kaa soŋ o na baŋ leɛ de la o teɛroŋ zaa eŋ libi bɔ, sakuu gaabo, ane toma ka lɛ vɛŋ ka o koŋ baŋ lɛ nyɛ vuo puore Naaŋmen. Ka lɛŋ wa e, a wuleeŋ ka o soba piileeŋ a taa teɛroŋ na a donɛɛ naŋ taa na. Yelmeŋɛ la ka a yɛlɛ ŋa kaŋa zaa ba e yelfaa, kyɛ a ba seŋ ka a e yɛlɛ naŋ e nimizeɛ ko te te zemmo poɔŋ. Ka teneeŋ na toɔ̃ kyɛnɛ “aŋa kyaanee biiri,” aseŋ ka te de te “wagre  tonɔ neŋ toma soŋ,” lɛ wuleeŋ ka te de te teɛroŋ zaa eŋ yɛlɛ naŋ e nimizeɛ yaga zaa eŋɛŋ.

18. Bo yɛlɛ ka Donald da e aŋ somoo oŋ toɔ̃ de o wagre toŋ neŋ toma soŋ?

¹⁸ Kaara boɔrɔ soe mine hoŋ na baŋ tu a toŋ toma yaga ko Jehoova. Lɛ ka Donald naŋ be South Africa paaloŋ da e. O yeleeŋ ka: “N da teɛrɛɛ N zemmo yɛlɛ gaa tɔɔre a da puore sɔre Jehoova yaga zaa ka o soŋ ma ka N nyɛ nimitɔɔre gaabo a naaŋ moɔloo poɔŋ. N da puore sɔrɛɛ Jehoova ka o soŋ ma ka N nyɛ toma naŋ na soŋ ma ka N maŋ nyɛ wagre tonɔ a naaŋ moɔloo toma. Jehoova da soŋ maŋ maŋ nyɛ toma naŋ na baŋ soŋ ma a lɛ sori ŋa. Ka N neŋ N pɔge zaa pãã da laŋ piili a wagre zaa naaŋ moɔloo toma.”

19. Wala teŋ na baŋ e a naŋ kyɛnɛ “aŋa kyaanee biiri”?

¹⁹ A lɛtɛ na Pɔɔl naŋ da sɛge ko a Kristabiiri naŋ da be Efesu na da soŋ baŋ yaga zaa baŋ naŋ kyɛnɛ dire yelmennoŋ korɔ Jehoova. A lɛ kawane ŋa na baŋ soŋɛɛ te meŋ. Yɛlɛ na teŋ zanne na na baŋ soŋ teŋ ka te maŋ kaa soŋ kyɛ iri yɛlɛ na teŋ maŋ de pɛlɛ neŋ te niŋe ane noba na te naŋ maŋ laŋna neŋ na soŋ zaa. Ka teneeŋ zanna a Baabole wagre zaa, a na soŋ teŋ ka te maŋ derɛ gbɛ-sonne te zemmo poɔŋ. A zannoo lɛ soŋ teŋ teŋ nyɛ lɛ a vooroŋ soŋ naŋ na baŋ soŋ te ka te taa gyog-sonne. Ka teneeŋ de yɛlɛ na Pɔɔl naŋ sɛge na toŋ neŋ toma, a na baŋ soŋ teŋ ka te de gbɛ sonne ka a ne Jehoova teɛroŋ kyaare taa. Ka teneeŋ erɛ a yɛlɛ ŋa a na soŋ teŋ ka te tage te menne yi a donɛɛ ligroŋ poɔŋ a kyɛ naŋ kyɛnɛ be a kyaanee poɔŋ!