1. Bo yɛlɛ mine la na baŋ dɔnnɔ Jehoova yelmeŋɛ puorebiiri mine teɛroŋ?

 NYƐ lɛ a naŋ e sukyiridii ka te baŋ ka Jehoova poɔ pɛlɛɛ o puorebiiri zaa yɛlɛ! A Baabole yeleeŋ ka: “Jehoova nimipɛle maŋ be la o noba eŋɛŋ.” (Yiem. 149:4) Kyɛ saŋa kaŋa, noba mine eŋɛ na baŋ kyoɔreŋ ka ba teɛrɛ ka ‘Jehoova poɔ ba pɛle neŋ ba.’ Jehoova yelmeŋɛ puorebiiri mine yɛlɛ naŋ be a Baabole poɔŋ meŋ eŋɛ da kyoɔrɛɛŋ baŋ meŋ taa a lɛ teɛroŋ ŋa.​—1 Saa. 1:6-10; Joob 29:2, 4; Yiem. 51:11.

2. Nembuo ka Jehoova poɔ maŋ pɛle o yɛlɛ?

² A Baabole vɛŋɛɛŋ aŋ pɛle ka Jehoova poɔ na baŋ pɛlɛɛ nensaaleba naŋ ba pɛgeyi yɛlɛ. Sobuoŋ ka lɛ na baŋ e? Aseŋ ka te wulo sagediibu Yezu Krista eŋɛŋ a de suobu. (Gyn. 3:16) Ka teneeŋ wa e lɛ, te maŋ wulee neɛzaa ka te eɛ kaŋdabaŋkalɛ te yelbebe yɛlɛ a eŋ noɔre ko Naaŋmen meŋ ka o boɔbo yoŋ teŋ na erɛ. (Tom. 2:38; 3:19) Jehoova poɔ maŋ pɛleŋ ka teneeŋ wa erɛ a lɛ yɛlɛ ŋa ka lɛ na vɛŋ ka te e o zɔmenne. Ka teneeŋ moɔ̃ nimiri a paala noɔre na te naŋ eŋ koo ka te na puoruuŋ na, Jehoova poɔ maŋ pɛlɛɛ te yɛlɛ a kyɛ nyɛ te ka te eɛ o zɔmenne.​—Yiem. 25:14.

3. Boŋ teŋ waana ka te zanne a zannoo ŋa poɔŋ?

³ Kyɛ ananso la wala ka saŋa kaŋa ka noba mine na maŋ teɛrɛ ka Naaŋmen poɔ ba pɛle ba yɛlɛ? Sobuo ka Jehoova maŋ wuli ka o poɔ pɛlɛɛ te yɛlɛ? Boŋ na baŋ soŋ Kristabie ka o maaleŋ sagedi yaga zaa ka Naaŋmen poɔ pɛlɛɛ o yɛlɛ?

YƐLƐ NAŊ NA BAŊ VƐŊ KA NOBA MINE TEƐRƐ KA JEHOOVA POƆ BA PƐLE BA YƐLƐ

4-5. Ka teneeŋ gbaŋ wa nyɛ ka te ba taa tɔnɔ zaa, kyɛ bo yɛlɛ teŋ na baŋ sagedi peɛlaaŋ?

⁴ Te mine bebeŋ a yi te biiloŋ saŋa zaa te maŋ teɛrɛ ka te ba taa tɔnɔ zaa. (Yiem. 88:15) Te yɔɔdɔɔ kaŋa yuori naŋ di Adrián yeleeŋ ka: “N da maŋ nyɛɛ N meŋɛ ka N ba taa tɔnɔ zaa. A yi saŋa na maŋ da e bidɔɔlee na, N teɛrɛŋ maŋ da maŋ puoro sɔrɔ  Jehoova ka o vɛŋ ka N booree deme zaa gaa Paradiisi aneazaa ka maaŋ yɛŋ da nyɛɛŋ ka N ba seŋ neŋ be gaabo.” Tony eɛ neɛ baŋ ba guoloo aŋa Jehoova Sieree Deme kaŋa. O yeleeŋ ka: “N dɔgreba daŋ ba yelka ba nɔŋ maŋ zaa bee ba poɔ pɛlɛɛ N yɛlɛ. Ba da vɛŋɛɛŋ maŋ nyɛ ka yelzaa maŋ erɛ ba pɛle ba poɔ.”

⁵ Saŋa kaŋa ka teneeŋ maŋ nyɛ ka te ba taa tɔnɔ zaa, aseŋ ka te teɛre baŋ ka Jehoova meŋɛ la tage te peɛle o meŋɛ. (Gyn. 6:44) O maŋ nyɛɛ gyog-sonne na zaa te naŋ taa na aneazaa ka teneeŋ yɛŋ ba nyɛraa, a baŋ te sukyiri yɛlɛ zaa a gaŋ teneeŋ menne. (1 Saa. 16:7; 2 Tun. 6:30) Azuŋ ka o naŋ wa yelka te eɛ nanee yaga zaa aseŋ ka te sage lɛ di.​—1 Gyn. 3:19, 20.

6. Bo teɛroŋ ka bitontona Pɔɔl da taa kyaare yelbebe o naŋ e saŋa kaŋa naŋ pare na?

⁶ Aminekaŋaŋ sɛre kyɛ ka te mine wa zanne a yelmeŋɛ na, te da eɛ yɛlɛ mine naŋ na baŋ vɛŋ ka te zomma dɔnnɔ te. (1 Pit. 4:3) Noba gba naŋ puoro Jehoova yelmennoŋ poɔ na, saŋa kaŋa a na maŋ fɛreŋ ka ba mɔɔ ba moɔbo zaa a iri teɛroŋ faare bare ba teɛroŋ poɔŋ. Saŋa kaŋa, ho meŋ maŋ teɛrɛŋ ka Jehoova koŋ baŋ di ho yelfaare suuri ko bo bee? Ka lɛ aŋ waa ko bo yɛŋ, a eɛ sukyiridii ka ho baŋ ka Jehoova yelmeŋɛ puorebiiri mine meŋ da teɛrɛɛ lɛ. Aŋa mannoo poɔŋ, a bitontona Pɔɔl eŋɛ zaaŋ da kyoɔre saŋa na oŋ da leɛteɛre yelfaare mine o naŋ e saŋa kaŋa naŋ pare. (Uro. 7:24) Yelmeŋɛ la ka Pɔɔl da eɛ kaŋdabaŋkalɛ o yelfaare yɛlɛ a sɔre o yelbebe sudi a wa de suobu. Kyɛ o da yeleeŋ ka “maa la a [bitontonee] zaa poɔ bile soba” a e yelbebe “gaŋ ba zaa.”​—1 Kor. 15:9; 1 Tim. 1:15.

7. Bo yɛlɛ aŋ seŋ ka te baŋ peɛlaaŋ a kyaare yelbebe te naŋ e saŋa kaŋa naŋ pare?

⁷ Te Saa naŋ be sazuŋ eŋɛɛ noɔre ka o na di la te yelbebe suuri ko te ka teneeŋ e kaŋdabaŋkalɛ a sɔre te yelbebe sudi. (Yiem. 86:5) Azuŋ ka teneeŋ sereŋ e kaŋdabaŋkalɛ te yelbebe yɛlɛ yɛŋ, te na baŋ sagediŋ ka Jehoova di la te yelbebe suuri ko te.​—Kol. 2:13.

8-9. Boŋ na baŋ soŋ te ka te ta maŋ teɛrɛ ka yelzaa te naŋ erɛ daŋ koŋ baŋ pɛle Jehoova poɔ?

⁸ Te zaa boɔbo la ka te mɔɔ te moɔbo zaa teŋ na toɔ̃ a puoro Jehoova. Kyɛ noba mine maŋ teɛrɛ ka yɛlɛ na baŋ erɛ na ba seŋ azuŋ o poɔ koŋ pɛle ba yɛlɛ. Te yɔɔpɔge kaŋa yuori naŋ di Amanda yeleeŋ ka: “N da teɛrɛ ka ka maaŋ tonɔ toma yaga Jehoova puoruu poɔŋ, lɛ wuleeŋ ka N mɔɔrɛɛ N moɔbo zaa korɔ Jehoova. Azuŋ N da maŋ mɔɔrɔŋ ka N erɛ yɛlɛ naŋ gaŋ N faŋa. Ka maaŋ ba wa toɔ̃ e yɛlɛ na maŋ da boɔrɔ ka N e na, N poɔ zaaŋ maŋ sãã, maŋ teɛrɛ ka Jehoova meŋ poɔ sãã ne maŋ.”

⁹ Ka teneeŋ maŋ teɛrɛ ka te daŋ koŋ baŋ e yelzaa pɛle Jehoova poɔ, wala teŋ na baŋ e a iri a lɛ teɛroŋ na bare te teɛroŋ poɔŋ? Teɛre baŋ ka Jehoova ba maŋ boɔrɔ ka te erɛ yɛlɛ naŋ gaŋ te faŋa. O ba maŋ kaara soriŋ meŋ ka te e yɛlɛ teŋ koŋ baŋ e. O poɔ maŋ pɛle neŋ la yɛlɛ zaa te naŋ maŋ yi te poɔ zaa a mɔɔ te moɔbo zaa a e koo na. Hooŋ leɛteɛre noba mine naŋ da de ba faŋa zaa puore Jehoova ka ba yɛlɛ be a Baabole poɔŋ. Aŋa mannoo poɔŋ, hooŋ teɛre Pɔɔl yɛlɛ nyɛ. O da de la yuomo yaga a toŋ tonkpeɛne yaga, a da maŋ tu sori gaa zitɔba yaga a te toŋ a naaŋ moɔloo toma, a kyɛ soŋ baŋ sɛgre lantaapuoruu yaga meŋ. Kyɛ saŋa na yɛlɛ naŋ wa leɛre o zemmo poɔŋ oŋ da koŋ baŋ lɛ toŋ a naaŋ moɔloo toma aŋa lɛ oŋ da tonɔ na, Jehoova poɔ da ba lɛ pɛle neŋ o bee? Ai. O da moɔ̃ la nimiri a mɔɔrɔ o moɔbo zaa oŋ na toɔ̃, ka Jehoova meŋ da koo maaloo. (Tom. 28:30, 31) Lɛ meŋ la, wagre zaa naane teŋ na maŋ erɛ yɛlɛ na zaa te naŋ boɔrɔ ka te erɛ korɔ Jehoova na. Yɛlɛ naŋ e nimizeɛ koo la teɛroŋ na te naŋ de erɛ yɛlɛ na te naŋ erɛ na. Yɛ vɛŋ ka te pãã nyɛ soe na mine Jehoova naŋ maŋ tu kyɛ wuli te ka o poɔ pɛlɛɛ te yɛlɛ.

 WALA KA JEHOOVA MAŊ E A WULI TE KA O POƆ PƐLƐƐ TE YƐLƐ?

10. Yeŋ teŋ na baŋ “woŋ” Jehoova naŋ yele yɛlɛ naŋ wuli ka o poɔ pɛlɛɛ te yɛlɛ? (Gyɔɔn 16:27)

¹⁰ A tuuro a Baabole eŋɛŋ. Jehoova maŋ boɔrɛɛ sori oŋ na baŋ tu kyɛ wuli o noba ka o nɔnɔ baŋ ka o poɔ pɛle ba yɛlɛ. Ziiri ayi zaa ka a Baabole yelka O da boɔlɛɛ Yezu ka O Bidɔɔ o naŋ nɔŋ o yɛlɛ yaga zaa ka o poɔ pɛle o yɛlɛ. (Mat. 3:17; 17:5) Ho poɔ pɛlɛɛŋ ka ho woŋ Jehoova naŋ yele ka o poɔ pɛlɛɛ ho yɛlɛ bee? Jehoova ba maŋ yele yɛlɛ yire sazu a korɔ te, kyɛ o maŋ yelee yɛlɛ korɔ te a tuuro a Baabole eŋɛŋ. Ka teneeŋ wa kanne sukyiridii yelbie na Yezu naŋ da maŋ yelko o potuuribo na, a maŋ waa ŋa Jehoova la yele yɛlɛ korɔ te. (Kanne Gyɔɔn 16:27.) Yezu maŋ tɔglɛɛ o Saa gyog-sonne na yaga zaa. Azuŋ ka teneeŋ wa kanne nyɛ Yezu yelbie naŋ wulo ka o poɔ pɛlɛɛ o potuuribo naŋ taa yelmennoŋ kyɛ da e nensaaleba naŋ ba pɛgeyi na, te na baŋ deaŋ ka Jehoova la yele a lɛ yɛlɛ na korɔ te.​—Gyn. 15:9, 15.

11. Ananso la wala teŋ na baŋ yelka ka teneeŋ wa tuoro yelkpeɛne lɛ ba wuli ka Jehoova poɔ ba pɛle te yɛlɛ? (Gyimisi 1:12)

¹¹ O maŋ ko teŋ boma yɛlɛ naŋ fɛrɛ te. Jehoova maŋ eɛ siri ka o ko te boma yɛlɛ naŋ fɛrɛ te, aŋa mannoo poɔŋ o maŋ ko teŋ boma yɛlɛ naŋ fɛrɛ te eŋgannoŋ poɔŋ. Kyɛ saŋa kaŋa Jehoova maŋ terɛɛ sori ka yelfaare pɔge te aŋa lɛ aŋ da pɔge Gyoob na. (Joob 1:8-11) Ka teneeŋ wa tuoro yelkpeɛne lɛ ba wuli ka Naaŋmen poɔ ba pɛle neŋ te. Kyɛ a maŋ ko teŋ a vuo ka te wuli Jehoova lɛ te naŋ nɔmoo seŋ, ane lɛ te naŋ dɛloo aseŋ. (Kanne Gyimisi 1:12.) Te yelkpeɛne saŋa te na nyɛɛ lɛ o naŋ nɔŋ te seŋ, ane lɛ o naŋ sonnɔ te ka te toɔ̃ are a yelkpeɛne noɔreŋ.

12. Boŋ teŋ na baŋ zanne yi Dmitrii zemmo yɛlɛ na poɔŋ?

¹² Te nyɛ yɛlɛ naŋ da pɔge te yɔɔdɔɔ Dmitrii naŋ be Asia paaloŋ zemmo yɛlɛ. O da kɔŋ la o toma, a da de kyuuri yaga a bɔ toma kyɛ o da ba nyɛrɛ toma. O da de la gbɛre ka o na dɛlɛɛ Jehoova, azuŋ o da de la o meŋɛ zaa eŋ a naaŋ moɔloo toma poɔŋ. Kyuuri yaga da wa parɛɛŋ kyɛ o da naŋ ba nyɛ toma. Ka baaloŋ nimizeɛ kaŋa meŋ da kpɛ o yaga zaa oŋ da koŋ baŋ lɛ kyɛŋ. A da vɛŋɛɛŋ oŋ piili teɛrɛ ka o ba e sere soŋ a e bi-saa meŋ yɛlɛ naŋ ba taa nimiri, aŋ da vɛŋ oŋ teɛrɛ ka aminekaŋaŋ Jehoova poɔ ba lɛ pɛle o yɛlɛ. Zimaanee kaŋa, o bipɔgelee da printɛɛ yelbie naŋ be Aizeeya 30:15. Be yeleeŋ ka: “Yɛŋ na mãã yɛ menne a dɛle ma la na ko yɛ kpeɛ̃o.” O da de la a gane o naŋ printi na gaa o ba zie a te yelka, “N saa, ka ho eŋɛŋ wa kyoɔre ho na baŋ teɛrɛɛ a sɛgre ŋa yɛlɛ.”  Dmitrii da nyɛɛŋ ka Jehoova soŋɛɛ o neŋ o yideme baŋ naŋ taa bondirii, bonsuurii, ane kpɛ zie. O yeleeŋ ka, “Yɛlɛ yoŋ aŋ da seŋ ka N erɛ la ka, N mãã N meŋɛ a kyɛ dɛle Naaŋmen.” Ka hooŋ wa tuoro a yelkpeɛne ŋa taa, ho na baŋ sagediŋ ka Jehoova taa la ho yɛlɛŋ, o na soŋ boŋ meŋ ka ho toɔ̃ are a yelkpeɛne noɔreŋ.

13. Nenbobo ka Jehoova na baŋ tu ba eŋɛŋ kyɛ wuli te ka o poɔ pɛlɛɛ te yɛlɛ? Ka sobuoŋ oŋ maŋ tu kyɛ e lɛ?

¹³ O ko teŋ yɔɔdɔbɔ ane yɔɔpɔgeba. Jehoova maŋ tu la te yɔɔmine eŋɛŋ kyɛ wuli te ka o poɔ pɛlɛɛ te yɛlɛ. Aŋa mannoo poɔŋ, o na baŋ vɛŋeŋ ka te yɔɔmine yel yelbie naŋ eŋnɛ faŋa ko te wagre naŋ seŋ neŋ poɔŋ. Te yɔɔpɔge kaŋa naŋ be Asia paaloŋ da nyɛɛ a yɛlɛ ŋa mine saŋa na oŋ da tuoro yelkpeɛne yaga zaa na. O da kɔŋ la o toma kyɛ ka baaloŋ nimizeɛ kaŋa meŋ da kpɛ o. Ka o serɛ meŋ da e yelfaa kaŋa naŋ e nimizeɛ azuŋ o da ba lɛ e a lantaapuoruu neŋkpoŋ kaŋa. Te yɔɔpɔge ŋa yeleeŋ ka “N deɛ da ba baŋ bon naŋ vɛŋ ka a yɛlɛ ŋa zaa pɔgrɔ ma. N da teɛrɛ ka aminekaŋaŋ N eɛ yelfaa kaŋa ka Jehoova suuri iri neŋ ma.” Te yɔɔpɔge ŋa da sɔrɛɛ Jehoova ka o e yelkaŋa a wuloo ka o poɔ naŋ pɛlɛɛ o yɛlɛ. Sobuo ka Jehoova da tu kyɛ e lɛ? O yeleeŋ ka, “A lantaapuoruu nembɛrɛ neŋ ma da di la dama baŋ soŋ ma maŋ nyɛ ka Jehoova naŋ nɔnɔ maŋ.” A puoriŋ, o da la sɔrɛɛ Jehoova ka o lɛ wuloo ka o poɔ naŋ pɛlɛɛ o yɛlɛ. O yeleeŋ ka, “A lɛ daare na te yɔɔdɔbɔ ane te yɔɔpɔgeba mine naŋ be a lantaapuoruu poɔŋ da sɛgɛɛ lɛtɛ wa ko ma. Saŋa na maŋ da kanna a lɛtɛ na a da dii la N sukyiri yaga zaa, a da vɛŋɛɛŋ maŋ nyɛ ka Jehoova kyɛlle woŋee N puoro na.” Yelmeŋɛ la Jehoova maŋ tu la te yɔɔmine yelyaga eŋɛŋ kyɛ wuli te ka o poɔ pɛlɛɛ te yɛlɛ.​—Yiem. 10:17.

14. Bo sori kaŋa ka Jehoova maŋ lɛ tu a kyɛ wuli ka o poɔ pɛlɛɛ te yɛlɛ?

¹⁴ Jehoova maŋ tu la te yɔɔmine eŋɛŋ a ko te  kawane a de wuli te ka o poɔ pɛlɛɛ te yɛlɛ. Aŋa mannoo poɔŋ, a dɛndɛŋ Kristabiiri saŋa na, Jehoova da tu la Pɔɔl eŋɛŋ a vɛŋ oŋ sɛge lɛtare 14 a ko o Kristabitaaba. A lɛtare ŋa zaa poɔŋ, Pɔɔl da maŋ yi la nɔmmo poɔŋ a ko o yɔɔmine na kawane. Ananso la wala ka Jehoova da vɛŋ ka Pɔɔl da sɛge kawane poɔ o lɛtare na poɔŋ? Jehoova eɛ Saa naŋ soma yaga zaa, azuŋ o maŋ dɛnnɛɛ o biiri “o naŋ nɔŋ.” (Yeng. 3:​11, 12) Azuŋ ka neɛ kaŋaŋ wa ko te kawane yi a Baabole poɔŋ, lɛ ba wuli ka Jehoova poɔ sãã neŋ teŋ. Kyɛ a wuleeŋ ka o poɔ naŋ pɛlɛɛ te yɛlɛ. (Hib. 12:6) Bo yɛlɛ mine la ka Jehoova maŋ lɛ e a wuli ka o poɔ pɛlɛɛ te yɛlɛ?

SOE MINE JEHOOVA NAŊ MAŊ LƐ TU KYƐ WULI KA O POƆ PƐLƐƐ TE YƐLƐ

15. Nembobo ka Jehoova maŋ de o vooroŋ soŋ na ko, ka ananso la wala ka a yɛlɛ ŋa na baŋ eŋ te sagediibu faŋa?

¹⁵ Jehoova maŋ de la o vooroŋ soŋ ko bana na o poɔ naŋ pɛle ba yɛlɛ. (Mat. 12:18) Te na baŋ soorɛɛ te menne ka, ‘N maŋ baŋ toɔ̃ wulee a vooroŋ soŋ wɔnee gyogri na mine N zemmo poɔŋ bee?’ Ho nyɛɛŋ ka pampana ŋa yɛŋ ho maŋ taa la kannyiri ko ho taaba a gaŋ saŋa na hoŋ da naŋ ba baŋ Jehoova na bee? Azuŋ ka hooŋ toɔ̃ taa a vooroŋ soŋ wɔnee gyogri na, ho na baŋ sagediŋ ka Jehoova poɔ pɛlɛɛ ho yɛlɛ!—Kaa a daga ŋa,  “A Vooroŋ Soŋ Wɔnee La . . . ”

16. Nembobo ka Jehoova maŋ tu ba eŋɛŋ kyɛ moɔlɔ a duorisoŋ? Ka ananso la wala ka te poɔ pɛle lɛ yɛlɛ? (1 Tɛsalonika 2:4)

¹⁶ Jehoova poɔŋ maŋ pɛleŋ ka o de a duorisoŋ ko bana na o poɔ naŋ pɛle ba yɛlɛ na. (Kanne 1 Tɛsalonika 2:4.) Nyɛ tɔnɔ na Jocelyn naŋ da nyɛ saŋa na oŋ moɔlɔ a duorisoŋ korɔ o taaba na. Bebiri kaŋa, Jocelyn da ireeŋ ka eŋ kyoɔre kpɛ o yaga zaa. O yeleeŋ ka, “N da ba lɛ taa faŋa zaa azuŋ N da nyɛɛŋ ka N ba taa tɔnɔ zaa. N da eɛ paaneɛ, a lɛ bebiri na maŋ da maŋ gaa a naaŋ moɔloo. N da puore sɔrɛɛ Jehoova a kyɛ yi gaa a naaŋ moɔloo.” A lɛ beguo na Jocelyn da te pɔge la Mary, o da eɛ neɛ naŋ taa nimimaaroŋ yaga zaa a da sage ka o na zannɛɛ a Baabole. Kyuuri mine puoriŋ, Mary da yeleeŋ ka o da puoro sɔrɔŋ ka Naaŋmen somoo saŋa na Jocelyn naŋ da wa kpaare o pane na. Saŋa na Jocelyn naŋ da wa teɛrɛ a yɛlɛ ŋa na o da yeleeŋ ka, “A da waa ŋa Jehoova naŋ yele korɔ ma ka, ‘N poɔ pɛlɛɛ ho yɛlɛ.’” Yelmeŋɛ, neɛzaa naane na kyɛlle woŋ te yɛlɛ ka teneeŋ wa moɔlɔ a duorisoŋ.  Kyɛ te na baŋ sagediŋ peɛlaaŋ ka Jehoova poɔ maŋ pɛleŋ ka teneeŋ wa mɔɔrɔ te moɔbo zaa a moɔlɔ a duorisoŋ korɔ te taaba.

17. Boŋ hoŋ zanne yi yɛlɛ na Vicky naŋ yel kyaare a yɔɔdeɛbo na? (Yieme 5:12)

¹⁷ Jehoova maŋ vɛŋeŋ ka bana na zaa o poɔ naŋ pɛle ba yɛlɛ nyɛ tɔnɔ yi a yɔɔdeɛbo eŋɛŋ. (1 Tim. 2:​5, 6) Kyɛ ka teneeŋ teɛre ka Jehoova poɔ ba pɛle te yɛlɛ aneazaa ka te taa la sagediibu a yɔɔdeɛbo eŋɛŋ a de suobu meŋ? Teɛre baŋ ka wagre zaa naane aŋ seŋ ka te sage yɛlɛ te sukyiri naŋ yele korɔ te. Bana na zaa naŋ taa sagediibu a yɔɔdeɛbo eŋɛŋ na o maŋ nyɛ baŋ ka ba eɛ nemmenne o nimitɔɔreŋ, a eŋ noɔre meŋ ka o na ko baŋ maaloo. (Kanne Yieme 5:12; Uro. 3:26) Te yɔɔpɔge Vicky da teɛrɛɛ a yɔɔdeɛbo yɛlɛ gaa tɔɔre aŋ da somoo yaga zaa. Bebiri kaŋa, o da teɛrɛɛ a yɔɔdeɛbo yɛlɛ gaa tɔɔre yaga zaa a da yelka: “Jehoova da taa la kannyiri ko ma a kɔɔre yaga zaa a boɔrɔ ka o wuli ma ka o nɔŋ maŋ. . . . Kyɛ aŋ da waa ŋa maŋ da yele koroo ka: ‘Jehoova koŋ baŋ nɔŋ N yɛlɛ. O Bidɔɔ sareka na meŋ koŋ baŋ pɔge N yelbebe zaa.’” Saŋa na oŋ da teɛre a yɔɔdeɛbo yɛlɛ gaa tɔɔre na a da vɛŋeŋ oŋ wa nɔŋ Jehoova yaga zaa. Ka teneeŋ meŋ teɛre a yɔɔdeɛbo yɛlɛ gaa tɔɔre a na soŋ teŋ ka te nyɛ ka Jehoova nɔnɔ teŋ ka o poɔ meŋ pɛle te yɛlɛ.

18. Bo yɛlɛ teŋ na baŋ sagedi peɛlaaŋ ka teneeŋ moɔ̃ nimiri a wulo nɔmmo korɔ te Saa naŋ be sazuŋ na?

¹⁸ Aneazaa ka te na mɔɔrɛɛ te moɔbo zaa ka te de yɛlɛ na te naŋ zanne a zannoo ŋa poɔŋ na tonɔ neŋ toma, kyɛ saŋa kaŋa te eŋɛ na baŋ kyoɔreŋ ka te teɛrɛ ka Jehoova poɔ ba pɛle te yɛlɛ. Ka lɛŋ wa e, teɛre baŋ ka o poɔ maŋ pɛlɛɛ “noba na aŋ naŋ kyɛnɛ nɔnoo na.” (Gyi. 1:12) Naŋ moɔ̃ nimiri tagra peɛlɛ Jehoova a maŋ kaara ka ho nyɛ yɛlɛ na zaa naŋ wuli ka o poɔ pɛlɛɛ ho yɛlɛ na. Maŋ teɛre baŋ ka Jehoova “ba e tɔɔre ne te kaŋa zaa.”—Tom. 17:27.